Maatiu

14 A boondii keŋ, mi Hɛlɔɔ, masa ibuŋgaa tuɛi konaa a Chiisu okɔɔ.+ 2 Okoŋ, mbo dimul buɛiyaa nduaa aa: “Chɔŋ Wana Yiŋaa kpeekpei miiŋgu hoo yoomu ni. Lelaŋ o cho walta kɔndɔfiltaŋ tosaa ni.”+ 3 Hɛlɔɔ* ndoo bii niŋ Chɔŋ mbo duau ndu o yɔlɔŋ, nduyɛ mbo wou ndu o chiɛi manyumndo niŋ le suɛi Hɛloodiaa ve, lanɔɔ Filipi bɛ ndɔ.+ 4 Kanifuule, Chɔŋ wa ndu dimullo aa: “O bɛnda kposoŋ ma chua Hɛloodiaa o nɔɔ niŋ te.”+ 5 Mi che bɛɛ ndoo yeema le Chɔŋ diyɔɔ, kɛ siooŋnde wa ndu le waŋnda kanifuule, ma chua Chɔŋ maa wana suaa le Mɛlɛka wo.+ 6 Kɛ mɛɛ nda wa paale vialaŋnde Hɛlɔɔ leŋ biiloo,+ mi chua Hɛloodiaa wo ya yolaŋ pila. Mi Hɛlɔɔ naŋ kɔl tau a mɛɛ o ye yɛ.+ 7 Okoŋ, mbo chuel ndu buŋgɛi, nduyɛ mbo mɛnaŋ po maa nyɛ o nyɛ o nyuna ndu pɛ, o cho ndu ke. 8 Chuaambɔɔ bɛɛ mɛɛ kala ndɔ dimul ndu yɛ, lende o tosa ni. Mbo dimi aa: “Ke ya bolle Chɔŋ Wana Yiŋaa o peetiiyo* niŋ.”+ 9 Mi mɔnɛi bii masaa tau. Kɛ le mɛɛ ndoo chii niŋ buŋgɛi chua wanaa nda wa nyɛdiaa dioo* wa o hɔl lɛ, mbo dimul waŋnda le ma ke chuaambɔɔ bolle Chɔŋ ndeŋ. 10 Okoŋ, mbo viam waŋnda le ma kɔ kiolu Chɔŋ bolleŋ o chiɛi manyumndo niŋ. 11 Ma duau bolle ndɔleŋ o peetiiyo niŋ ma ke chuaambɔɔ, mbo yoo kala ndɔ. 12 Okoŋ kɔɔli, mi buɛiyaa Chɔŋ nda kɔ chua dialuŋ ndɔŋ ma kɔ kumbu. Okoŋ ma kɔ doonuŋ Chiisu kona. 13 Mɛɛ Chiisu tuei hei, mbo luɛi o dɛndɔɔ niŋ, mbo kuaŋnuŋ naa yololiaa le mbo waŋnuŋ ndu pilɛ kpeele. Kɛ mɛɛ waŋnda tuei a ndu okɔɔ, ma fula o chiooŋ ma tual ndu kɔɔli a ŋpelu.+

14 Mɛɛ o fula o dɛndɔɔ niŋ, mbo cha waŋnda faŋga bɛndoo, mi nyiɛɛye bii ndu tau le nda.+ Okoŋ mbo siŋgi wanaa ndaa wa a naalaŋ nda.+ 15 Kɛ mɛɛ paaleŋ le yɔŋguŋ, mi buɛiyaa nduaa huŋ dimul ndu aa: “Fondaa hoo cho bɔɔ yololɛ, nduyɛ paaleŋ le cho niŋ le chuwaa. Lelaŋ, dimul waŋnda ma kuɛ o sɔndɔkɔltaŋ, ma kɔ piondu nyɛdiaa le ndapila.”+ 16 Kɛ mi Chiisu dimul nda aa: “Waŋnda haa nɔ ma kuɛ inɛ le. La ke nda nyɛdiaa ma de.” 17 Ma dimul ndu aa: “Ŋ nɔ nyɛ o nyɛ o ba le, mɛɛ beediiyo* kpuŋgbaŋ ŋuɛɛnu a suuwa a ŋiɔɔŋ kinɛi.” 18 Mbo dimi aa: “La chuu ya beediiyo a suwaa kaŋ nanuŋ.” 19 Okoŋ, mbo dimul waŋnda le ma chal o billo choo. Mbo chua beedii kpuŋgbaŋ ŋuɛɛnoo a suwaa ŋiɔɔŋnda, mbo heelu hɔlla choo choo, mbo piɛi.+ Mɛɛ o yimi yimi beediiyo, mbo ke buɛiyaa nduaa, mi buɛiyaa nduaa nda ke waŋnda. 20 Mi nda kpou dia ma pum cha. Ma chuuŋgiaa o biŋgi biŋgi nda dema wo, mbo pia kambɛilaŋ 12.+ 21 Waŋ piaanduaa de nyɛdiaa hoo wa, a wa 5,000. A chɔm waŋ laanduaa a chuaambuaa le.+ 22 O lepilɛ niŋ kpe, mbo dimul buɛiyaa nduaa le ma luɛi o dɛndɔɔ niŋ, ma taŋ pɔɔ ma kuɛ o kɔŋgɔɔ o pilɔɔ. Mi ndupila lo kɔɔli le mbo dimul waŋnda ma miiŋgu o la nda lo.+

23 Mɛɛ o miŋgi waŋnda o la nda lo, mbo hel o pembei choo le piɛileŋ.+ O lo loŋ mi nyumndaŋ ma tual. 24 A boondii keŋ, dɛndɔɔ waŋnuŋ niŋ kɔŋndaŋ landaŋ o mɛŋndaŋ choo. Nduyɛ, mɛŋndaŋ ma wa dɛndɔɔ hiiluuwo yokpaŋ yokpaŋ, kanifuule hueiye wa hɔŋndo kpeekpei. 25 Kɛ a ditɛɛŋ paale siaa* kinɛi, mi Chiisu tual buɛiyaa nduaa kɔɔli o mɛŋndaŋ choo. 26 Mɛɛ buɛiyaa nduaa che ndu hunɔɔ o mɛŋndaŋ choo, mi kɔltaŋ la laasiaŋ nda. Mi siooŋnde bii nda, okoŋ ma mɛli yeelaŋ aa: “Yɛɛnɛ cho yɛ hoo hunɔɔ?” 27 Kɛ o lepilɛ niŋ kpe, mi Chiisu dimul nda aa: “La bii kɔltaŋ! Ya ni, la yɔŋ isiooŋ te.”+ 28 Mi Pitɛ dimul ndu aa: “Masanɔɔ, te num ni, mɛɛ dimullɔ ya mi kuɛ naa num chua o mɛŋndaŋ choo.” 29 Mi Chiisu dimul ndu aa: “Huŋ!” Okoŋ, mi Pitɛ fula o dɛndɔɔ niŋ mbo kandu kɔlaŋ naa Chiisu chua o mɛŋndaŋ choo. 30 Kɛ mɛɛ o tofa hueiyii bɛnduii wa hɔŋndo ve, mi siooŋnde bii ndu. Nduyɛ mɛɛ o kandu mɔɔwaa, mbo mal yioo kpeleŋ aa: “Masanɔɔ, piŋi ya fɔ!” 31 O lepilɛ niŋ kpe mi Chiisu siɛndi baa mbo saa Pitɛ, mbo dimul ndu aa: “Baa a nɔ laalaŋ bɔɔ le? Le yɛɛnɛ kiisaŋndo luɛi yɛ num o kɔl?”+ 32 Mɛɛ nda luɛi o dɛndɔɔ niŋ, mi hueiye pɛŋgi hɔŋndo. 33 Mi buɛiyaa nduaa wa o dɛndɔɔ niŋnda beŋ ndu wulaŋ. Ma dimi aa: “A tonya, Po Mɛlɛkaa kpeekpei ŋ cho ni.” 34 Okoŋ ma taŋ kɔŋgɔɔ leeloo ma huŋ o lɛŋnde Kɛnɛsaluɛi leŋ niŋ.+

35 Mɛɛ waŋnda o fondaŋ koŋ sina maa Chiisu hiŋ, ma kua a dimulaŋndo o tanda koŋ niŋ kpou. Okoŋ, mi waŋnda chuu ndu wanaa wa a naalaŋ nda kpou. 36 Ma nyɔɔlu Chiisu le ma pilaŋ bɔɔle doma ndɔɔ kinɛi.+ Nduyɛ wana o wana pilaŋ bɔɔle doma ndɔɔ, nda kpou ma siaŋgu kpɛlɛkɛ.