Lɛvitikɔɔ

7 “‘Sawa cho a sala yɔŋ wɔɔŋndo+ okɔɔ wo cho hoo ni: Nyɛ hiou diondɔɔ wo o cho ni. 2 Fondaŋ nda nɔ ma dii chɔloo le salala luamaa laŋ ndo, loŋ koni nda nɔ ni ma dii chɔloo le sala yɔŋ wɔɔŋndo. Nduyɛ, a nɔ ma fasaŋiaa kooma nduaŋ+ o bandu luamaa lasalaa+ balɔɔ silɔ. 3 Wana soliaa lasalaa nɔ mbo faŋa chuɛiyaŋ+ kpou, ma cho o puiileŋ ndaŋ, ma kumbu puloŋ ndaŋ, 4 kɔl keluŋ muuŋ ndoŋ a chuɛima balu muŋ ndaŋ. O nɔ vɛlɛ mbo faŋa yemii hɔlle a kɔl keluŋ muuŋ ndoŋ latulu.+ 5 Wana soliaa lasalaa nɔ mbo lom nyɔɔŋ muŋ o bandu luamaa lasalaa choo o ya Chɛhowa lo.+ Sala yɔŋ wɔɔŋndo o cho ni. 6 Wanaa soliaa lasalaa kinɛi nɔ ni ma de ndu,+ nduyɛ o fondaŋ diandaa nda nɔ ni ma de ndu. Nyɛ hiou diondɔɔ wo+ o cho ni. 7 Sawa cho a sala hakioo okɔɔ wo koni cho a sala yɔŋ wɔɔŋndo okɔɔ ni. Wana soliaa lasala nyuna le malɔɔ hakioo wo+ nɔ ndu ni.

8 “‘Te wana soliaa lasalaa soli pɛ sala luamaa le waŋndo, wana soliaa lasala koŋ nɔ yau+ chɔlu o soli salaa wo ni.

9 “‘Sala ŋkul kɛ kɛ nda toosiaa pɛ o nyɛ nda toosiaa buloo wo niŋ, o hɛŋgɛiyo niŋ, ɔɔ o kpɛɛnɛi tɛsɛi+ niŋ, wana soliaa lasala cho sala koŋ soli wo nɔ ndu ni. Ndu nɔ o cho lo wo ni.+ 10 Sala ŋkul kɛ kɛ, o wa o muuliaŋ a chuɛiyaŋ,+ o wa o muuliaŋ te,+ puaa Elɔŋ nda kpou nɔ ndu ni. A nɔ ma piɔuwaŋ ndu kpeŋkpeŋ.

11 “‘Sala kɔl nyulu+ waŋndo nɔ mbo yɔŋgu o ya Chɛhowa lo wo, sawa cho a ndu okɔɔ wo cho hoo ni: 12 Te o yeema pɛ salaa solioo le balika melaa chɔmndo,+ o nɔ mbo soli ndu latulu a beedii* tiu tiu nɔ yiisii* leniŋ te wo, o nda muuliaŋ kpeyaŋ ndɔɔ a chuɛiyaŋ le sala balika melaa wo, beedii fɛɛdɛɛ nɔ yiisii leniŋ te wo, o nda pɛŋgɛla kpeyaŋ ndɔɔ a chuɛiyaŋ ndo, a beedii tiu tiu nda toosiaa a kpeyaŋ kɛndɛ kɛndɔɔ, ma muuliaŋ kpeyaŋ ndɔɔ nyɛkɛndɛi a chuɛiyaŋ ndo. 13 O nɔ mbo soli sala ndɔɔ latulu a beedii tiu tiu nɔ yiisiiyo leniŋ ndo, vɛlɛ a salala ndɔla kɔl nyulula o soli le balika melaa chɔmndo laŋ. 14 O nɔ mbo chua beediila yɛ yɛlaŋ la pilɛŋ pilɛŋ o sala ndɔɔ niŋ, mbo kɛsi laŋ teŋgeŋ le ya Chɛhowa. Kanifuule, wana soliaa lasala cho koowaŋ fasaŋiaa o salala kɔl nyulu laŋ+ choo wo nɔ laŋ ni. 15 Visiŋ salala ndɔla kɔl nyulula o soli le balika melaa chɔmndo woŋ, o nɔ mbo de muŋ o paale nda soli salaa leŋ choo. O nɔ mbo kɛsi muŋ haaa diimandɔɔ le.+

16 “‘Te o yɔŋ pɛ aa le buŋgɛi waŋndo chua ve+ o cho salaa solioo ni, ɔɔ ndupila kɛɛsiaŋ o kɔl le salaa solioo ni,+ o nɔ mbo de ndu o paale nda cho salaa soli leŋ choo. Nduyɛ sala tɔ cho lo wo, o nɔla vɛlɛ mbo de ndu diimandɔɔ. 17 Kɛ te visiŋ salaŋ muŋ lo pɛ haaa o paale yaa ndɔ leŋ choo, la nɔ mi la lom muŋ.+ 18 Te waŋndo de pɛ visiŋ sala kɔl nyuloo o paale yaa ndɔ leŋ choo, Mɛlɛka chɛl wana soli koŋ salaa wo le. O cho sala ndɔɔ kɛɛ. Kanifuule, suɛi wɔɔŋ wɔɔŋnde i cho ni. Nduyɛ wana o wana de pɛ visiŋ muŋ, nyɛpalaa cho ndu tolɔɔ choo.+ 19 Visiŋ kɛ kɛ pilaŋ pɛ nyɛ nɔɔlɛiyo, la nɔ mi la de muŋ te. La nɔ mi la lom muŋ. Wana o wana cho wana diandaa, o nɔla mbo de visiŋ cho ŋ diandaa woŋ.

20 “‘Kɛ te waŋndo ve o diandaa le mbo de visiŋ sala kɔl nyulu cho muŋ le ya Chɛhowa woŋ, a nɔ ma faŋa ndu wanaa nduaa tɛɛŋ.+ 21 Te waŋndo pilaŋ pɛ nyɛ o nyɛ nɔɔlɛi, o wa wana nɔɔlɛiyo+ ɔɔ visi nɔɔlɛiyo,+ ɔɔ nyɛ o nyɛ nɔɔlɛi cheleŋ,+ okoŋ mbo de visiŋ sala kɔl nyuluŋ cho le ya Chɛhowa woŋ ŋ tiŋ, o nɔ mbo sɔla piɔmndo.’”

22 Mi Chɛhowa dimul vɛlɛ Muuse aa: 23 “Dimul Isɔluɛiya aa, ‘La nɔ mi la de chuɛima+ nauwo, chuɛima saa fɔŋndɔ piaandoo, ɔɔ chuɛima chuiŋndo kposoŋ te. 24 Te la saaluŋ pɛ visioo o vilɛiyo, o wa a ba ndɔ o vi ni ɔɔ visi cheleŋ dii ndu ni, la nɔ mi la de chuɛima nduaŋ kposoŋ te.+ Kɛ, la nɔla mi la soliŋ maŋ kpeku le sɔɔŋ cheleŋ. 25 Wana o wana de pɛ chuɛima chɔlu o lom salaa o ya Chɛhowa lo waŋ, o nɔ mbo sɔla piɔmndo.

26 “‘Ba o ba nya wa, la nɔ mi la de kooma kɛ kɛ le,+ o wa kooma you ɔɔ kooma visi. 27 Wana o wana de pɛ kooma kɛ kɛ, o nɔ mbo sɔla piɔmndo.’”+

28 Mi Chɛhowa dimul vɛlɛ Muuse aa: 29 “Dimul Isɔluɛiya aa, ‘Wana o wana hiŋ pɛ a sala kɔl nyuloo o ya Chɛhowa lo, o nɔ mbo chua sala kɔl nyulu koŋ o tiŋ mbo ke ya Chɛhowa.+ 30 O nɔ mbo hiŋ a chuɛiyaŋ+ vɛlɛ a takpa chɔlu koŋ le salaa lomɔɔ o ya Chɛhowa lo. Nduyɛ, o nɔ mbo keeliaa nyɛm muŋ maa sala keeliaa+ ya Chɛhowa lachi. 31 Wana soliaa lasalaa nɔ mbo lom chuɛiyaŋ o bandu luamaa lasalaa choo.+ Kɛ Elɔŋ nda puaa nduaa+ nɔ takpaa ni.

32 “‘A nɔ ma chua lɔlu ba kɛndɔɔ o salala kɔl nyulula numndaŋ choo, ma yɔŋgu wana soliaa lasalaa le mbo wa sala diandaa.+ 33 O puaa Elɔŋ nda tɛɛŋ, wana cho kooma sala kɔl nyulu koŋ a chuɛima nduaŋ yɔŋgu o Mɛlɛka lo wo, ndu nɔ lɔlu ba kɛndɔɔ ni.+ 34 I chua takpaa le sala keeliaa a lɔloo le sala diandaa o salala kɔl nyulula Isɔluɛiya soli laŋ niŋ, mi ke Elɔŋ wana soliaa lasalaa a puaa nduaa. Nduyɛ le fɛɛŋ a fɛɛŋ, lende Isɔluɛiya nɔ ni ma wa tosaa.+

35 “‘Paale nda hɛli Elɔŋ nda puaa nduaa le ma wa wanaa soliaa lasalaa le ya Chɛhowa+ leŋ, nyɛm nda nɔ ma sɔla o salala nda luam o ya Chɛhowa lo laŋ niŋndoŋ cho muŋ ni. 36 Mi ya Chɛhowa dimul Isɔluɛiya le ma ke nda nyɔɔŋ muŋ o paale ya pɔya nda leŋ choo.+ Sawaa hoo cho wa le nda a chuauwaa ndaa mamaa le fɛɛŋ a fɛɛŋ.’”

37 Sawa cho a sala luamaa,+ sala ŋkullo,+ sala hakioo,+ sala yɔŋ wɔɔŋndo,+ salaa le waŋndo hɛlioo+ le waa wana soliaa lasalaa, a sala kɔl nyuloo+ okɔɔ wo cho hoo ni. 38 Lende Chɛhowa dimul Muuse o Pembii Sanai Ve+ ni, paale o dimul ndu o pollo niŋ Sanai+ le mi Isɔluɛiya wa salala ndalaŋ solioo o ndu Chɛhowa lo leŋ.