Lɛvitikɔɔ

2 “‘Te waŋndo wa pɛ sala ŋkullo+ solioo o ya Chɛhowa lo, o nɔ mbo yɔŋgu kpeyaŋ kɛndɛ kɛndɔɔ, nduyɛ mbo wou filaŋkiŋsɛŋ a chuɛiyaŋ lechoo.+ 2 Okoŋ, o hiŋ a ndu o puaa Elɔŋ nda lo, a cho wanaa soliaa lasalaa wa, nduyɛ mi wana soliaa lasalaa kɔndu kpeyaŋ cho koŋ o muuliaŋ a filaŋkiŋsɛŋ vɛlɛ a chuɛiyaŋ ndo baa cha maa tamasi, mbo lom ndu+ o bandu luamaa lasalaa choo. Sala nda luam o yiŋ le mi chuŋ kɛndɔɔ komal ya Chɛhowa wo o cho ni. 3 Sala ŋkul cho lo wo, Elɔŋ nda puaa nduaa+ nɔ ni. Kanifuule, nyɛ hiou diondɔɔ+ wo o cho ni, nduyɛ o sala nda lom o ya Chɛhowa lo wo niŋ nda soli ndu ni.

4 “‘Te beedii* nda toosiaa o nyɛ luamaa beediiyo niŋndo ŋ yeema salaa solioo ni, a nɔ ma chua kpeyaŋ kɛndɛ kɛndɔɔ, nduyɛ ma muuliaŋ ndu a chuɛiyaŋ, ma toosiaa beedii tiu tiu nɔ yiisii* leniŋ te wo, ɔɔ beedii fɛɛdɛɛ nɔ yiisii leniŋ te wo.+

5 “‘Te beedii nda toosiaa o kpɛɛnɛi tɛsɛi+ niŋndo ŋ yeema salaa solioo ni, a nɔ ma chua kpeyaŋ kɛndɛ kɛndɔɔ ma muuliaŋ ndu a chuɛiyaŋ, kɛ yiisii nɔ mbo wa leniŋ te. 6 A nɔ ma yimi yimi ndu a buŋgaŋ, nduyɛ ma dɔu chuɛiyaŋ lechoo.+ Sala ŋkullo o cho ni.

7 “‘Te beedii nda toosiaa o hɛŋgɔɔ niŋndo ŋ yeema salaa solioo ni, a nɔ ma chua kpeyaŋ kɛndɛ kɛndɔɔ, ma muuliaŋ ndu a chuɛiyaŋ, ma toosiaa ndu. 8 A nɔ ma kuɛ a sala ŋkul ŋ toosiaa hoo le ya Chɛhowa wo o wana soliaa lasalaa lo, okoŋ mbo kuɛ a ndu o bandu luamaa lasalaa ikɛi. 9 Nduyɛ, wana soliaa lasalaa cho sala ŋkul koŋ chua o tiŋ maa tamasi, mbo lom ndu+ o bandu luamaa lasalaa choo. Sala nda luam o yiŋ le mi chuŋ kɛndɔɔ komal ya Chɛhowa wo o cho ni.+ 10 Sala ŋkul cho lo wo, Elɔŋ nda puaa nduaa nɔ ni. Kanifuule, nyɛ hiou diondɔɔ wo o cho ni, nduyɛ o sala nda lom o ya Chɛhowa lo wo niŋ nda soli ndu ni.+

11 “‘Sala ŋkul kɛ kɛ nya wa pɛ solioo o ya Chɛhowa lo, yiisii nɔ mbo wa leniŋ te.+ Kanifuule, la nɔ mi la lom nyɛ o nyɛ nɔ yiisiiyo ɔɔ liaaŋ leniŋ le salaa solioo o ya Chɛhowa lo le.

12 “‘La nɔla mi la yɔŋgu muŋ o ya Chɛhowa lo, mɛɛ nya soli kɔmnde tasele+ tɔlɔɔla nyalaŋ sala yɛ. Kɛ, la nɔ mi la lom muŋ o bandu luamaa lasalaa choo le mi chuŋ kɛndɔɔ fula le.

13 “‘Sala ŋkul kɛ kɛ nya wa pɛ solioo, la nɔ mi la wou hɛlle. La chɛl mi hɛlii loonuŋ nya a kpema Mɛlɛka yii a nya wo, kɛɛ wa o sala ŋkul nya cho solioo wo niŋ te. Sala kɛ kɛ nya wa pɛ solioo, la nɔ mi la wou hɛlle.+

14 “‘Te kɔmnde tasele tɔlɔɔla numnda diu laŋ ŋ yeema sala ŋkullo solioo o ya Chɛhowa lo ni, a nɔ ma toŋ kuluŋ ŋ kendi sɛnɛiyoŋ, ma chuii muŋ, okoŋ ma yɔŋgu muŋ le ma soli sala ŋkul tɔlɔɔla numnda tasela diu laŋ.+ 15 A nɔ ma wou filaŋkiŋsɛŋ a chuɛiyaŋ lechoo. Sala ŋkullo o cho ni. 16 Kuluŋ nda chuii ma muuliaŋ a filaŋkiŋsɛŋ vɛlɛ a chuɛiyaŋ ndoŋ ŋ cho ni. Wana soliaa lasalaa nɔ mbo lom ŋ tiŋ maa tamasi.+ Sala nda luam o yiŋ o ya Chɛhowa lo wo o cho ni. Okoŋ, mbo kuɛ a ndu o bandu luamaa lasalaa ikɛi.