Lɛvitikɔɔ

4 Mi Chɛhowa dimul vɛlɛ Muuse aa: 2 “Dimul Isɔluɛiya aa, ‘Te waŋndo tosa pɛ hakioo mbo ve o sina choo le,+ nduyɛ mbo tosa sɔɔŋ ya Chɛhowa dimul nya maa la tosa le woŋ, nyɛ o nɔ mbo tosa wo cho hoo ni:

3 “‘Te wana soliaa lasala nda pɔya wo+ tosa pɛ hakioo+ mi nyɛpalaa tol waŋnda choo le haki o tosa wo, o nɔ mbo hiŋ a nau towa fɔŋndɔ kɛndɛ kɛndɔɔ o ya Chɛhowa lo, nduyɛ ma soli ndu salaa le haki o tosa wo.+ 4 O nɔ mbo hiŋ a nau koŋ o tɛndii bɔŋaŋndo hɔlndɔ+ ya Chɛhowa lachi, mbo handu ndu baa o lebol, nduyɛ mbo dii nau koŋ ya Chɛhowa lachi.+ 5 Okoŋ, mi wana soliaa lasala nda pɔya wo+ chua kooma nau koŋ ma tiŋ, mbo hiŋ a maŋ o tɛndii bɔŋaŋndo niŋ. 6 Nduyɛ mi wana soliaa lasala koŋ yiŋ suei o kooma maŋ niŋ,+ mbo fasaŋiaa maŋ bɛmbɔɔ le ŋɔmmɛu+ ya Chɛhowa lachi o kola bɛndu cho o fondaŋ diandaa wo hɔlndɔ. 7 Wana soliaa lasala koŋ cho vɛlɛ kooma maŋ ma tiŋ dɔwɔɔ o leela bandu luamaa lasala nda luam nyɛm chuŋ kɛndɔŋ+ ndo choo, o cho ya Chɛhowa lachi o tɛndii bɔŋaŋndo wo. Nduyɛ, mbo hulu kooma tuaŋ kpou o bandu luamaa lasala nda soli sala luamaa+ lechoo wo bɛŋgu, o cho o tɛndiiyo bɔŋaŋndo hɔlndɔ wo.

8 “‘Okoŋ, mbo faŋa chuɛima nau sala haki koŋ kpou, kɔ bii chuɛima cho o puloŋ ikɛi yaŋ a ma balu puloŋ kpou waŋ, 9 kɔl keluŋ muuŋ ndoŋ, a chuɛima balu muŋ ndaŋ. O nɔ vɛlɛ mbo faŋa yemii hɔlle a kɔl keluŋ muuŋ ndoŋ latulu.+ 10 O nɔ mbo faŋa nyɔɔŋ muŋ, mɛɛ o faŋa muŋ o nau sala kɔl nyuloo+ yɛ. Okoŋ, mi wana soliaa lasalaa lom muŋ o bandu luamaa lasala nda soli sala luamaa wo choo.

11 “‘Kɛ nauwo hoo yau ndɔɔ, visiŋ ndɔŋ, bolle ndɔleŋ, peluŋ ndɔŋ, puluŋ ndɔŋ, a poola ndɔlaŋ,+ 12 nau tɔɔ kpou, o nɔ mbo fula a ndu o dɔɔŋgɔɔ niŋ, mbo kuɛ a ndu o fondaŋ nda dindi le pultaŋ hulɔɔ wo, mbo lom ndu o yiŋnde nda kiisuu a yɔmnde leŋ niŋ.+ O fondaŋ nda hulu pultaŋ ndo o nɔ ni mbo lom ndu.

13 “‘Te Isɔluɛiya kpou tosa pɛ hakioo ma ve o sina choo le,+ nduyɛ mbo wa maa nyɛ ya Chɛhowa dimul nda maa a tosa le wo+ nda tosa ni kɛ a sina a ndi okɔɔ le, 14 okoŋ ma mɛɛlu sina a haki koŋ okɔɔ, a nɔ ma hiŋ a nau piaandu fɔŋndɔɔ le sala hakioo o tɛndii bɔŋaŋndo hɔlndɔ. 15 Waŋ banaa o Isɔluɛi niŋ nɔ ma handu nau koŋ balaŋ o lebol ya Chɛhowa lachi, nduyɛ ma dii ndu ya Chɛhowa lachi.

16 “‘Okoŋ, mi wana soliaa lasala nda pɔya wo hiŋ a kooma nau koŋ ma tiŋ o tɛndii bɔŋaŋndo niŋ. 17 Wana soliaa lasala koŋ nɔ mbo yiŋ suei o kooma maŋ niŋ, mbo fasaŋiaa maŋ bɛmbɔɔ le ŋɔmmɛu ya Chɛhowa lachi o kola bɛndoo hɔlndɔ.+ 18 Okoŋ, mbo dɔu vɛlɛ kooma maŋ ma tiŋ o leela bandu luamaa lasala cho+ ya Chɛhowa lachi wo choo, o tɛndii bɔŋaŋndo. Nduyɛ, mbo hulu kooma tuaŋ kpou o bandu luamaa lasala nda soli sala luamaa lechoo wo bɛŋgu, o cho o tɛndii bɔŋaŋndo hɔlndɔ+ wo. 19 O nɔ mbo faŋa chuɛima nduaŋ kpou, mbo lom maŋ o bandu luamaa lasalaa choo.+ 20 O nɔ mbo tosa a nau koŋ mɛɛ o tosa a nau sala hakioo yɛ. Lende wana soliaa lasalaa nɔ ni mbo tosa, mbo nyuna le malɔɔ hakioo le nda,+ okoŋ ma sɔla malɔɔ hakioo. 21 O nɔ mbo fula a nau koŋ o dɔɔŋgɔɔ niŋ, mbo kɔ lom ndu mɛɛ o lom nau tasoo+ yɛ koni. Sala hakioo o cho ni le waŋnda kpou.+

22 “‘Te waŋ banaa+ nya tɛɛŋ o pilɛ ve o sina choo le, mbo tosa sɔɔŋ ya Chɛhowa Mɛlɛka ndɔɔ dimul ndu maa o nɔ mbo tosa le woŋ, okoŋ mbo del o hakioo niŋ, 23 ɔɔ te o yɔŋ pɛ mbo sina maa o tɛɛmbuu sawaa mbo luɛi o hakioo niŋ, mɛɛ o nɔ mbo hiŋ a chuiŋ tooye fɔŋndɔ kɛndɛ kɛndɔɔ le salaa solioo. 24 O nɔ mbo handu baa o chuiŋ fɔŋndɔ koŋ choo, mbo dii ndu o fondaŋ nda soli sala luamaa wo ya Chɛhowa lachi,+ kanifuule sala hakioo o cho ni. 25 Wana soliaa lasalaa nɔ mbo yiŋ suei o kooma sala haki koŋ niŋ, mbo dɔu maŋ o leela+ bandu luamaa lasala nda soli sala luamaa wo choo. Nduyɛ, mbo hulu kooma tuaŋ kpou o bandu luamaa lasala nda soli sala luamaa+ lechoo wo bɛŋgu. 26 O nɔ mbo lom chuɛima nduaŋ kpou o bandu luamaa lasalaa choo, mɛɛ o lom chuɛima sala kɔl nyuloo+ yɛ. Wana soliaa lasalaa nɔ mbo soli sala malɔɔ lahakioo le haki ndɔɔ, nduyɛ mbo sɔla malɔɔ hakioo.

27 “‘Te wana pilɛ nya tɛɛŋ tosa pɛ sɔɔŋ ya Chɛhowa dimi maa la nɔ mi la tosa le woŋ mbo ve o sina choo le, okoŋ mbo del o hakioo niŋ,+ 28 ɔɔ te o yɔŋ pɛ mbo sina maa o tɛɛmbuu sawaa mbo luɛi o hakioo niŋ, mɛɛ o nɔ mbo hiŋ a chuiŋ laandu fɔŋndɔ kɛndɛ kɛndɔɔ le salaa solioo le haki o tosa wo. 29 O nɔ mbo handu chɔlu o hiŋ le sala hakioo wo baa o lebol, nduyɛ mbo dii ndu o fondaŋ nda soli sala luamaa+ wo. 30 Wana soliaa lasalaa nɔ mbo yiŋ suei o kooma maŋ niŋ, mbo dɔu maŋ o leela bandu luamaa lasala nda soli sala luamaa wo choo. Nduyɛ, mbo hulu kooma tuaŋ kpou o bandu luamaa lasala+ nda soli sala luamaa lechoo wo bɛŋgu. 31 O nɔ mbo faŋa chuɛima nduaŋ kpou,+ mɛɛ o faŋa chuɛima sala kɔl nyuloo+ yɛ. Nduyɛ, mi wana soliaa lasalaa lom maŋ o bandu luamaa lasalaa choo, le mi chuŋ kɛndɔɔ komal ya Chɛhowa. Wana soliaa lasalaa nɔ mbo nyuna le malɔɔ hakioo le ndu, nduyɛ mbo sɔla malɔɔ hakioo.

32 “‘Kɛ te saa fɔŋndɔɔ o yeema yɔŋgoo ni le sala hakioo, o nɔ mbo yɔŋgu saa fɔŋndɔ laandu kɛndɛ kɛndɔɔ. 33 O nɔ mbo handu chɔlu o hiŋ le sala hakioo wo baa o lebol, okoŋ mbo dii ndu le sala hakioo solioo o fondaŋ nda dii chɔlu sala luamaa+ wo. 34 Wana soliaa lasalaa nɔ mbo yiŋ suei o kooma maŋ niŋ, mbo dɔu maŋ o leela bandu luamaa lasala nda soli sala luamaa+ wo choo. Nduyɛ, mbo hulu kooma tuaŋ kpou o bandu luamaa lasala nda soli sala luamaa lechoo wo bɛŋgu. 35 O nɔ mbo faŋa chuɛima nduaŋ kpou, mɛɛ o faŋa chuɛima saa kondo fɔŋndɔ sala kɔl nyuloo yɛ. Wana soliaa lasalaa cho maŋ handɔɔ o salala nda luam+ o bandu luamaa lasalaa choo o ya Chɛhowa lo laŋ choo, mbo lom maŋ. Wana soliaa lasalaa nɔ mbo soli sala malɔɔ lahakioo le haki o tosa wo, nduyɛ mbo sɔla malɔɔ hakioo.+