Isikiɛɛ

46 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Dio kpaki cho le luɛiyɔɔ o luŋ cho leniŋ mbo muli hɔlla ba paaleŋ le chaŋ ndo wo,+ o nɔ mbo wa o kindaa+ le palɛi walle i ŋɔmpum.+ Kɛ o nɔ mbo wa o kumbiaa o Paale Pɛŋgiaaleŋ choo, a o paale bɔŋaŋ paŋgii sɛnɛiye cho kandɔŋ ndeŋ choo. 2 Te masaa wa pɛ luɛiyɔɔ, o nɔ mbo kei o toŋgo pɔmbɔ dio kpaki cho o bɛɛ wo,+ okoŋ mbo kɔ sim o keedei dio kpakioo choo. Wanaa soliaa lasalaa cho ndu solul sala ndɔ luamaa kpulukuu wo, a salala kɔl nyulu laŋ, okoŋ mbo baŋ wulaŋ o dio kpakioo bɛŋgu mbo fula o bɛɛ. Dio kpakioo nɔ mbo wa o kumbiaa haaa ichɔllo. 3 Waŋnda o lɛŋndeŋ niŋ bɛɛ nɔ ma baŋ wulaŋ Chɛhowa lachi o dio kpakioo sondoo o Palɛi Pɛŋgiɛi choo, a o bɔŋaŋnda paŋguŋ sɛnɛilaŋ choo.+

4 “‘Masaa nɔ mbo chua saa fɔŋnduaa kɛndɛ kɛndiaa a ŋɔmpum a saa kondoo o pilɛ o kɛndɛ kɛndɔɔ+, mbo soli sala luamaa kpulukuu wo o Chɛhowa lo o Paale Pɛŋgiaaleŋ choo. 5 Sala ŋkullo nɔ mbo wa ɛfaa 11* le saa kondoo, nduyɛ a nyɛ o nyɛ o nɔla pɛ sɔlaa le saa fɔŋnduaa piaanduaa, latulu a chuɛiyaŋ hiŋndo cha* le ɛfa 11 kɛ kɛ.+ 6 O paale bɔŋaŋ paŋgii sɛnɛiye cho kandɔŋ ndeŋ choo, salala nya nɔ mi la soli laŋ la cho laŋ ni: Nau piaandu fɔŋndɔ kɛndɛ kɛndɔɔ o nauwaa nyaa tɛɛŋ, saa piaanduaa a ŋɔmpum, vɛlɛ a saa kondoo o pilɛ. Nda kpou nɔ ma wa a kɛndɛ kɛndiaa.+ 7 O nɔ mbo yɔŋgu sala ŋkullo ɛfaa 11 le nau fɔŋndɔ piaandoo, ɛfaa 11 le saa kondoo, nduyɛ a nyɛ o nyɛ o nɔla pɛ sɔlaa le saa piaanduaa. O nɔ mbo yɔŋgu chuɛiyaŋ hiŋndo cha le ɛfa kɛ kɛ.

8 “‘Te masaa wa pɛ luɛiyɔɔ, o nɔ mbo keeku o toŋgo pɔmbɔ dio kpakioo, nduyɛ mbo fula vɛlɛ a loŋ.+ 9 Te waŋnda o lɛŋndeŋ niŋ hiŋ pɛ Chɛhowa lachi le ndu piɛiyo a teleŋ bɔŋaŋndaŋ,+ wanaa luɛi a dio kpaki cho ba luaŋ ndo+ wa nɔ ma fula a dio kpaki cho ba tou wo wo,+ nduyɛ wanaa luɛi a dio kpaki cho ba tou wo wa nɔ ma fula a dio kpaki cho ba luaŋ ndo wo. Wana o wana nɔ mbo fula o dio kpaki o keeku mbo luɛi yo le, kɛ a nɔ ma fula o dio kpaki cho nda lachi wo. 10 Masaa nɔ mbo wa nda tɛɛŋ. O nɔ mbo luɛi te waŋnda luɛi pɛ, nduyɛ o nɔ mbo fula te waŋnda fula pɛ. 11 A teleŋ la bɔŋaŋndo, sala ŋkullo nɔ mbo wa ɛfaa 11 le nau fɔŋndɔ piaandoo, ɛfaa 11 le saa kondoo, a nyɛ o nyɛ o nɔla pɛ sɔlaa le saa piaanduaa, latulu a chuɛiyaŋ hiŋndo cha le ɛfa 11 kɛ kɛ.+

12 “‘Te masaa yɔŋgu pɛ chɔloo le ma soli sala luamaa kpulukuu wo+ ɔɔ mbo yɔŋgu salala kɔl nyulu laŋ o Chɛhowa lo a kɔl ndɔɔ kpou, a nɔ ma kumbul ndu dio kpaki muli hɔlla ba paaleŋ le chaŋ ndo wo, okoŋ mbo soli sala ndɔ luamaa kpulukuu wo a salala kɔl nyulu laŋ mɛɛ o tosa o Paale Pɛŋgiaaleŋ choo+ yɛ. Nduyɛ te o fula pɛ, a nɔ ma kinda dio kpakioo ndu kɔɔli.+

13 “‘Lepaa o lepaa, la nɔ mi la yɔŋgu saa piaandu kɛndɛ kɛndɔɔ o chii wɔsioo o pilɛ wo le sala luamaa kpulukuu wo solioo o Chɛhowa lo.+ La nɔ mi la wa hei tosaa idii o idii. 14 Idii o idii, la nɔ mi la yɔŋgu sala ŋkullo ɛfaa cha a mɛlɛ mɛlɛ, latulu a chuɛiyaŋ hiŋndo piɔuwo le yaa, le muuliaŋndo a kpeyaŋ kɛndɛ kɛndɔɔ. Sala nya cho wa solioo teleŋ o teleŋ o Chɛhowa lo wo cho hoo ni. Nduyɛ, sawaa hoo nɔ mbo wa le fɛɛŋ a fɛɛŋ. 15 Idii o idii, la nɔ mi la yɔŋgu saa piaandoo, sala ŋkullo, a chuɛiyaŋ le sala luamaa kpulukuu wo solioo teleŋ o teleŋ.’

16 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Te masaa yɔŋgu pɛ puaa nduaa o kɛ kɛ kioo maa nyɛm ŋkɛ, nyɛ koŋ simnuŋ nyɛm kɛŋ ndaŋ. Nyɛm kɛŋ nda sɔla finya nda o ba woŋ wa muŋ ni. 17 Kɛ te masaa ke pɛ buɛi ndɔɔ o pilɛ kioo maa nyɛm ŋkɛ, ke koŋ cho wa le ndu haaa a wɔsi baŋaŋndo,+ okoŋ o miŋgi masaa o ba. Puaa nduaa kinɛi nyɛm kɛŋ o ke nda woŋ nɔ ni miŋ lo nda o ba le fɛɛŋ a fɛɛŋ. 18 Masaa nɔ mbo poondiaa waŋnda nyɛm ndaŋ o laba a ka ka le. Nyɛm ndɔŋ o nɔ ni mbo ke puaa nduaa maa nyɛm ŋkɛ, le halikpeŋ a feŋa wanaa niaa o pilɛ bɛɛ o nyɛm kɛŋ ndɔŋ choo le.’”

19 Okoŋ kɔɔli, mbo huŋ a ya o fondaŋ luɛiyaa+ wa o dio kpakioo wo ikɛi, fondaŋ wa le luɛiyɔɔ o lumuila diandaala wanaa soliaa lasalaa dia nyɛdiaa laŋ, la muli hɔlla ba luaŋ ndo laŋ.+ Nduyɛ, mi cha fondaa loŋ amakɔɔ ba paaleŋ le del lo. 20 Mbo dimul la aa: “Fondaa hoo wanaa soliaa lasalaa cho wa visioŋ yauwo ni le sala yɔŋ wɔɔŋndo a sala hakioo, a le beediiyo toosiaa le sala ŋkullo,+ le halikpeŋ a soli nyɛm nda cho wallo woŋ o luŋ cho o bɛɛ wo, okoŋ ma tɛɛŋguu waŋnda diondɔɔ ndaa* le.”+

21 Mbo huŋ a ya o luŋ cho o bɛɛ wo, okoŋ mbo tosa mi keeku o sɔŋgila hiɔɔlula balu luŋ tɛndiiyo laŋ. Mi cha luŋndo o sɔŋgile kɛ kɛ o luŋ cho o bɛɛ wo. 22 Luŋnda pɔmbɔlaŋ la wa o sɔŋgila hiɔɔlula balu luŋndo laŋ, bandei nɛiyo 60, toŋgei nɛiyo 45.* Nduyɛ laŋ hiɔɔlu kpou, nyɛpilɔɔ kpe la wa ni.* 23 Luŋnda hiɔɔlu laŋ, kpakila pɔmbɔlaŋ la wa laŋ la balaa silɔ. Nduyɛ o kpakilaŋ ndaŋ bɛŋgu, ma toosiaa yiŋnda chieele laŋ le visioŋ yauwo le salalaŋ solioo. 24 Okoŋ mbo dimul la aa: “O chiɛilaŋ ndaŋ niŋ wanaa tosa wallo o chiɛi Mɛlɛkaa niŋnda yau visioŋ ni le salalaŋ solioo le waŋnda.”+