Nɔmbaa

19 Okoŋ, mi Chɛhowa dimul vɛlɛ Muuse nda Elɔŋ aa: 2 “Sawa ya Chɛhowa dɔu wo cho hoo ni, ‘Dimul Isɔluɛiya le ma bii nau siaŋa kɛndɛ kɛndɔɔ, o nɔ sɔŋ o sɔŋ te wo,+ o nda bee wɔ yɔm o ikɛsu le wo, ma chuu num. 3 Okoŋ ma kuɛ a ndu naa Ɛlieesa, wana soliaa lasalaa chua. Mi ndu chua ndu mbo soli ndu o dɔɔŋgɔɔ niŋ, ma dii nau koŋ ndu o hɔl. 4 Okoŋ kɔɔli, mi Ɛlieesa wana soliaa lasalaa yiŋ suei o kooma nau koŋ niŋ, mbo fasaŋiaa maŋ bɛmbɔɔ le ŋɔmmɛu, kpeŋgii dio tɛndii bɔŋaŋndo.+ 5 Okoŋ, ma lom nau koŋ ndu o hɔl. Yau ndɔɔ ni, visiŋ ndɔŋ ni, kooma nduaŋ ni, latulu a poola ndɔlaŋ, ma lom.+ 6 Nduyɛ mi wana soliaa lasalaa chua yɔm sida wo, yɔm hisɔpi wo,+ a kola ipɛŋgɛ siaŋaa, mbo wuu o yiŋnde nauwo cho wa ŋɔɔ leŋ niŋ. 7 Okoŋ kɔɔli, mi wana soliaa lasalaa tɔɔ nyɛla ndɔlaŋ nduyɛ mbo puluŋ fo. Te o chii pɛ, o miiŋgu o dɔɔŋgɔɔ niŋ. Kɛ o cho wa o nɔɔlɛi haaa a paale delaa leŋ.

8 “‘Wana lom nau koŋ ndo nɔ mbo tɔɔ nyɛla ndɔlaŋ, nduyɛ mbo puluŋ fo. Ndu bɛɛ cho wa o nɔɔlɛi haaa a paale delaa leŋ.

9 “‘Wana cho o diandaa wo nɔ mbo kɔndu pulta nau koŋ,+ mbo soli laŋ o dɔɔŋgɔɔ niŋ, mbo kɔ kɛsi laŋ o fondaŋ diandaa. Nduyɛ, Isɔluɛiya nɔ ma kɛsi pulta laŋ le mɛŋma dindi wana waŋ toosiaa.+ Nau koŋ cho* sala hakioo ni. 10 Wana cho pulta nau koŋ kɔndɔɔ wo nɔ mbo tɔɔ nyɛla ndɔlaŋ, nduyɛ mbo lo o nɔɔlɛi haaa a paale delaa leŋ.

“‘Sawaa hoo cho wa le Isɔluɛiya a le mialaa cho nda tɛɛŋ nda le fɛɛŋ a fɛɛŋ.+ 11 Wana o wana pilaŋ pɛ wana vilɛi* kɛ kɛ, o nɔ mbo wa o nɔɔlɛi le palɛi i ŋɔmmɛu.+ 12 O paale yaa ndɔ leŋ choo, wana koŋ nɔ mbo dindiŋ a mɛŋma maŋ. Nduyɛ o paale ŋɔmmɛu leŋ choo, mbo simnuŋ o diandaa. Kɛ te o dindiŋ o paale yaa ndɔ leŋ choo le, mɛɛ o cho wa o diandaa o paale ŋɔmmɛu leŋ choo le. 13 Wana o wana pilaŋ pɛ wana vilɛi kɛ kɛ mbo dindi ndupila le, mɛɛ o nɔɔliaa tɛndii Chɛhowa wo.+ A nɔ ma faŋa wana koŋ Isɔluɛiya tɛɛŋ bau.*+ Le mɛɛ nda fasaŋiaa ndu mɛŋma dindi wana waŋ+ choo le yɛ, wana nɔɔlɛiyo o cho ni, nduyɛ o cho hiouwɔɔ lachi a waa o nɔɔlɛi.

14 “‘Te waŋndo vi pɛ o tɛndiiyo niŋ, sawaa hoo cho a ndu okɔɔ ni: Wana o wana luɛi pɛ o tɛndii koŋ niŋ ɔɔ wana o wana wa niŋ pɛ o tɛndii koŋ niŋ, o cho wa o nɔɔlɛi le palɛi i ŋɔmmɛu. 15 Nyɛi laandii kɛ kɛ wa pɛ o tɛndii koŋ niŋ mi i ve i kindaa le, i cho i nɔɔlɛi.+ 16 Wana o wana wa pɛ yondoo niŋ mbo pilaŋ wana nda dii a muɛi faŋnde wo ɔɔ wana vi a ba ndɔ wo, ɔɔ paa wana vilɛiyo, ɔɔ sɛiyo, o cho wa o nɔɔlɛi le palɛi i ŋɔmmɛu.+ 17 A nɔ ma chua pulta sala haki nda lom ndo la tiŋ le wana cho o nɔɔlɛiyo, ma wou o nyɛi laandei niŋ, okoŋ ma tala mɛŋndaŋ lechoo. 18 Mi wana cho o diandaa wo+ chua yɔm hisɔpi wo,+ mbo yiŋ ndu o mɛŋma maŋ niŋ, okoŋ mbo fasaŋiaa maŋ o tɛndiiyo choo a o nyɛi laandii kɛ kɛ cho leniŋ. Okoŋ kɔɔli, mbo tosa vɛlɛ nyɛ pilɛ koŋ kpe a wanaa wa o tɛndiiyo niŋnda, wana pilaŋ paa wana vilɛiyo ɔɔ wana nda diiyo wo, wana pilaŋ wana vi a ba ndɔ wo ɔɔ sɛiyo wo. 19 Wana cho o diandaa wo cho wana cho o diandaa le wo mɛŋma maŋ fasaŋiaa choo o paale yaa ndɔ leŋ, a o paale ŋɔmmɛu leŋ choo. Nduyɛ, mbo sɔla dindioo le haki ndɔɔ o paale ŋɔmmɛu leŋ choo.+ Okoŋ kɔɔli, mbo tɔɔ nyɛla ndɔlaŋ, mbo puluŋ, nduyɛ mbo simnuŋ o diandaa a paale delaa leŋ.

20 “‘Kɛ te wana cho o nɔɔlɛiyo dindi ndupila le, a nɔ ma faŋa ndu kunda Isɔluɛiya tɛɛŋ bau,*+ kanifuule o nɔɔliaa chiɛi Chɛhowa wo. O cho o nɔɔlɛi, kanifuule a fasaŋiaa ndu mɛŋma dindi wana waŋ choo le.

21 “‘Sawaa hoo cho wa le nya le fɛɛŋ a fɛɛŋ. Wana fasaŋiaa waŋndo mɛŋma dindi wana waŋ+ choo wo nɔ mbo tɔɔ nyala ndɔlaŋ. Nduyɛ, wana o wana pilaŋ pɛ mɛŋma nda dindi wana waŋ, o nɔ mbo wa o nɔɔlɛi haaa a paale delaa leŋ. 22 Nyɛ o nyɛ wana cho o nɔɔlɛiyo pilaŋ pɛ, nyɛ koŋ cho wa o nɔɔlɛi. Nduyɛ wana o wana pilaŋ pɛ nyɛ koŋ, ndu bɛɛ cho wa o nɔɔlɛi haaa a paale delaa leŋ.’”+