Nɔmbaa

18 Mi Chɛhowa dimul Elɔŋ aa: “Te dɛnɛ tambɛi kɛ kɛ fula pɛ o fondaŋ diandaa,+ num ni, puaa numnda ni, a wanaa fula o pulale numndeŋ choo wa kpou, nya cho muli ni. Nduyɛ te dɛnɛ tambɛi kɛ kɛ fula pɛ a wali wanaa soliaa lasalaa okɔɔ, num a puaa numnda cho muli ni.+ 2 Huŋ a bɛndaa numnda vɛlɛ a pɔmbuaa numnda fulaa o kaale Livai leŋ choo, kaale finyaa num aa mamaa, le ma mala num a puaa numnda wallo tosaa+ o tɛndii Kɔfu laSawaa lachi.+ 3 A nɔ ma wa waltaŋ tosaa le num vɛlɛ a waltaŋ o tɛndii bɔŋaŋndo kpou.+ Kɛ a nɔ ma sɔɔŋguu nyɛm laanduŋ cho o fondaŋ diandaa woŋ a bandu luamaa lasalaa ikɛi le, yɔŋii nya sɔla piɔmndo vellaa velle.+ 4 A cho num sɔɔŋguu ikɛi le ma tosa walta keŋnuŋ nda le tosaa o tɛndii bɔŋaŋndo laŋ kpou. Nduyɛ wana o wana cheleŋ* nɔ mbo sɔɔŋguu nya ikɛi le.+ 5 Walta keŋnuŋ nya le tosaa o fondaŋ diandaa+ a o bandu luamaa lasalaa+ laŋ, la nɔ mi la wa laŋ tosaa, yɔŋii ya dɔɔnuŋ vɛlɛ tumbe o kala kala+ a Isɔluɛiya. 6 Yapila hɛli Livaiya chaaŋaa nyaa Isɔluɛiya tɛɛŋ ni, mi yɔŋgu nya maa ke.+ Le ya Chɛhowa nda cho wa ni, nduyɛ ma wa wallo tosaa o tɛndii bɔŋaŋndo.+ 7 Num a puaa numnda nɔ ni mi la tosa walta wanaa soliaa lasalaa o bandu luamaa lasalaa, a o fondaŋ cho o kola bɛndoo* kɔɔli+ wo. Nduyɛ nya nɔ le waltaŋ ndaŋ tosaa ni.+ I chua walta wanaa soliaa lasalaa mi yɔŋgu nya maa ke. Nduyɛ wana o wana cheleŋ* sɔɔŋguu pɛ ikɛi, o nɔ mbo sɔla piɔmndo.”+

8 Mi Chɛhowa dimul vɛlɛ Elɔŋ aa: “Nyɛm waŋnda chuu ya maa ke woŋ, num ya kɛsi muŋ hɔlteŋ ni.+ Nyɛm diandaa Isɔluɛiya chuu ya maa ke woŋ kpou, I chua ŋ tiŋ mi ke num a puaa numnda. Nduyɛ la cho wa muŋ sɔlaa le teleŋ o teleŋ.+ 9 Nyɛm nda cho faaŋiaa o salala luamaala hiou diondɔɔ kpou laŋ choo woŋ, le nya ŋ cho ni. Sala kɛ kɛ waŋnda chuu ya pɛ, o wa sala ŋkullo,+ sala hakioo,+ a sala yɔŋ wɔɔŋndo,+ muŋ kpou nyɛm hiou wa ŋ diandaa woŋ ŋ cho ni. Nduyɛ, le num a puaa numnda ŋ cho ni. 10 O fondaŋ hiou diondɔɔ wo nya nɔ ni mi la de muŋ.+ Waŋ piaanduaa nya tɛɛŋ kpou nɔ ma de muŋ. Nduyɛ, nyɛm cho wa ŋ diandaa le numndoŋ ŋ cho ni.+ 11 Nyɛm Isɔluɛiya chuu ya woŋ bɛɛ,+ latulu a salala keeliaa laŋ kpou,+ le num ŋ cho ni. Num ni, puaa numnda ni, a chuauwaa num aa laanduaa, nya ya ke muŋ ni. Nduyɛ la cho muŋ wa sɔlaa le teleŋ o teleŋ.+ Wana o wana cho o diandaa o numndo chiɛiniŋ, o tiuba mbo de muŋ.+

12 “Nyɛm nda chuu ya Chɛhowa woŋ, muŋ cho ni, chuɛima kɛndɛ kɛndiaŋ kpou, muɛima sɛnɛima kɛndɛ kɛndiaŋ kpou, a kulloŋ, koŋ cho ni, kɔmnde ndale taseleŋ,+ num ya ke muŋ ni.+ 13 Komɔɔla tasela nda cho kendi o chiɔɔŋ ndaŋ niŋ ma chuu ya Chɛhowa laŋ, le num la cho wa ni.+ Wana o wana cho o diandaa o numndo chiɛiniŋ, o tiuba mbo de ndu.

14 “Nyɛ o nyɛ nda kɛsi pɛ kɔdɔ o Isɔluɛi niŋ le Mɛlɛka kioo,* le num o cho wa ni.+

15 “Po tase kɛ kɛ wanachioo velu pɛ, ɔɔ chɔlu tase kɛ kɛ chɔloo kom pɛ+ ma huŋ yɔŋgu ndu o ya Chɛhowa lo, le num o cho wa ni. Kɛ po tasoo+ a chuale tasele chɔluaa cho a diandaa le wa, a nɔ ma chɛl ma baŋa nda num o ba.+ 16 Te o hiou pɛ paŋgei i pilɛ, a nɔ ma chɛl ma baŋa ndu a baa cho le nyɔɔ baŋaa wo. Koŋ cho ni, kaniŋ humboŋ siɛkɛlloŋ ŋuɛɛnu,*+ a mɛɛ nda tuu siɛkɛlloŋ o fondaŋ diandaa yɛ.* Siɛkɛlle i pilɛ, lusul ndɔɔ wa le kilua woŋ 20.* 17 A nɔ ma chɛl ma baŋa chuale tasele nauwo, chuale piaandule tasele saa ɔɔ chuiŋndo le.+ Kanifuule, chɔluaa diandaa nda cho ni. A nɔ ma fasaŋiaa kooma ndaŋ o bandu luamaa lasalaa choo,+ nduyɛ ma lom chuɛima ndaŋ maa sala, le mi chuŋ kɛndɛ koŋ komal ya Chɛhowa.+ 18 Le num visiŋ ndaŋ cho wa ni, mɛɛ mɛɛma chɔloo le sala keeliaa a lɔlu ba kɛndɔɔ cho le num yɛ.+ 19 Nyɛm diandaŋ Isɔluɛiya cho wa chuuŋgiaa le ya Chɛhowa+ kioo woŋ kpou, num ni, puaa numnda ni, a chuauwaa num aa laanduaa, le nya ŋ cho wa ni. Nduyɛ la cho wa muŋ sɔlaa le teleŋ o teleŋ.+ Kpema fafɛɛŋ ihɛl* ya Chɛhowa yii a num vɛlɛ a chuauwaa num aa mamaa wo o cho ni.”

20 Mi Chɛhowa dimul vɛlɛ Elɔŋ aa: “A cho nyɛm ŋkɛ sɔla o lɛŋnde Isɔluɛi leŋ niŋ te, nduyɛ a cho buŋgɛi lelɛŋ sɔla nda tɛɛŋ mi le wa le num te.+ Ya cho buŋgɛi numnde ni, nduyɛ ya cho nyɛm kɛŋ numndoŋ nda tɛɛŋ ni.+

21 “I ke puaa Livai ya o Isɔluɛi niŋ kpou o tɔ ndɔɔ+ le mbo wa nyɛm ndaŋ ŋkɛ, le wali o wali nda cho tosaa o tɛndii bɔŋaŋndo. 22 Waŋnda Isɔluɛi nɔ lɛ ma sɔɔŋguu tɛndii bɔŋaŋndo ikɛi le. Te a sɔɔŋguu ndu ikɛi pɛ, a cho hakioo kɔndɔŋ nduyɛ ma sɔla piɔmndo. 23 Livaiya pila nɔ ni ma tosa wali cho o tɛndii bɔŋaŋndo wo. Nduyɛ te biondɔŋ kɛ kɛ yɔŋnuŋ pɛ, nda nɔ ni ma muli.+ Sawa ya dɔu hoo maa Livaiya nɔ ma sɔla nyɛm kiɔɔŋ Isɔluɛiya tɛɛŋ te wo, o cho wa le num a chuauwaa num aa mamaa le fɛɛŋ a fɛɛŋ.+ 24 Kanifuule, nyɛm waŋnda Isɔluɛi chuuŋgiaa ma ke ya Chɛhowa woŋ, I chua o tɔ ndɔɔ mi ke Livaiya maa nyɛm kɛŋ nda. Le sabu koŋ ya dimul nda ni aa, ‘La nɔ mi la sɔla nyɛm kiɔɔŋ Isɔluɛiya tɛɛŋ te.’”+

25 Okoŋ mi Chɛhowa dimul Muuse aa: 26 “Dimul Livaiya aa, ‘Nyɛm Isɔluɛiya cho ya kioo woŋ, la cho wa o tɔ ndɔɔ sɔlaa ya o ba, le mbo wa nyɛm kɛŋ nyaŋ.+ Nya bɛɛ la nɔ mi la chua o tɔ ndɔɔ o nyɛ nya sɔla wo choo, mi la yɔŋgu tooloo o ya Chɛhowa lo.+ 27 O cho wa maa tooloo o nyaa. O tɔ cho lo wo cho wa le nya, mɛɛ nya luaa nuaa kulloŋ o yasaba+ ɔɔ mi la toosiaa muɛiyaŋ ɔɔ chuɛiyaŋ o doolaa* niŋ yɛ. 28 O hei niŋ, nya bɛɛ cho tooloo yɔŋgu o Chɛhowa lo a o tɔ ndɔ nya cho sɔla Isɔluɛiya o ba wo. Nduyɛ, o nyɛm nya cho muŋ sɔla woŋ tɛɛŋ nya cho tooloo chua ni, mi la ke Elɔŋ wana soliaa lasalaa toolu cho le Chɛhowa wo. 29 O kela diandaala nya cho sɔla laŋ choo, la hɛli o sɔviɔɔ o ke kɛ kɛ choo,+ mi la yɔŋgu tooloo o ya Chɛhowa lo.’

30 “Dimul nda aa, ‘Te la hɛli pɛ o kɛndɛ kɛndɔɔ o nyɛm nda ke nya woŋ tɛɛŋ mi la yɔŋgu tooloo, o tɔ lo wo cho wa le nya Livaiya, mɛɛ nya luaa nuaa kuluŋ nyaŋ o yasaba ɔɔ mi la toosiaa muɛima nyaŋ ɔɔ chuɛima nyaŋ o doolaa niŋ yɛ. 31 Num a yuŋgu numndo, la dia ndu o fondaŋ kɛ kɛ, kanifuule paawa* nyaa cho koŋ ni le wali nya cho tosaa o tɛndii bɔŋaŋndo wo.+ 32 Te la wa pɛ tooloo yɔŋgoo o nyɛm sɔvɛ nya sɔla woŋ tɛɛŋ, la cho haki kɔndɔŋ te. Nduyɛ la nɔ mi la nɔɔliaa nyɛm diandaŋ Isɔluɛiya yɔŋgu woŋ te. Te la nɔɔliaa muŋ pɛ, la sɔla piɔmndo.’”+