Saamiɛɛ Diiŋ Ndɔɔ

1 Mɛɛ Sɔɔ vi, a teleŋ koŋ, Deeve ndoo fula niŋ Amalɛkaitiiya yomɔɔ* mbo miiŋgu Sikila,+ nduyɛ ndoo chii niŋ palɛi i ŋiiŋ loŋ. 2 O paale yaa ndɔleŋ choo, mi po pilɛ fula o dɔɔŋgɔ Sɔɔ wo, mbo kua naa Deeve chua. Nyɛlaŋ la wa ndu la sɛɛsiɛi lekɔɔ, nduyɛ chundoo wa ndu o lebol. Mɛɛ o che Deeve, mbo baŋ wulaŋ okoŋ mbo fuuluu hɔlla lɛŋ.

3 Mi Deeve nyuna ndu aa: “Kuɛɛnɛ ŋ fula yɛ?” Mbo muli aa: “O dɔɔŋgɔ Isɔluɛiya ya fula ni. Kɛ hiɔlɔŋndo ya hɛluŋ ni mi nyaanuŋ.” 4 Mi Deeve nyuna ndu aa: “A yandii, dimul la, vɛɛ la waa loŋ?” Mbo muli aa: “Waŋnda nyaanuŋ chɔuwo, nduyɛ a dii wanaa bɔɔbɔɔ. Sɔɔ nda Chonataŋ po ndɔ bɛɛ sɔla piɔmndo.”+ 5 Okoŋ mi Deeve nyuna po chuu ndu yooŋgoo wo aa: “Vɛɛnɛ ŋ looku yɛ sina maa Sɔɔ nda Chonataŋ po ndɔ sɔla piɔmndo?” 6 Mi poo muli aa: “I waŋnuŋ o Pembii Kibuaa ve choo,+ mi cha mi Sɔɔ saa bal ndɔɔ, mbo tunduŋ lechoo. Nduyɛ nyɛm nyaanaŋ suaa naŋndoŋ, a wanaa nyaanuŋ suaa wa wa ndu niŋ kpɛɛluŋ.+ 7 Mɛɛ o muliŋ mbo cha ya, mbo veelu ya. Mi nyuna ndu aa, ‘Yɛɛnɛ ŋ yeema yɛ mi tosal num?’ 8 Mbo nyuna ya aa, ‘Wana maavɛɛ ŋ cho yɛ?’ Mi muli aa, ‘Amalɛkaitiinɔɔ ya cho ni.’+ 9 Okoŋ mbo dimul la aa, ‘A yandii, sim ya choo ma siou ya diyɔɔ, kanifuule I cho wɔ yoomu, nduyɛ I cho o nyɛ nɛiyaa kala kalaa niŋ.’ 10 Le hei, mi sim ndu choo, mi siou ndu diyɔɔ.+ Kanifuule mɛɛ o del lɛŋ a yɔŋul nda yɔŋul ndu wo, mi sina kɛsɛ maa o ve chinda le. Okoŋ kɔɔli, mi soli mɔsil lemasa wa ndu o lebollo a kelɛi wa ndu o ba ve, mi chuu masanɔ nuu.”

11 Mɛɛ Deeve tuei hei, mbo sɛɛsiaŋ nyɛlaŋ lekɔɔ, nduyɛ mi puaa wa a ndu latulu wa kpou bɛɛ tosa nyɛ pilɛ koŋ kpe. 12 Ma bii mɔnɛi, ma chaŋ nduyɛ ma bii sumndo+ paaleŋ kpɛŋ le mɛɛ nda dii Sɔɔ, Chonataŋ po ndɔ, wanaa Chɛhowa wa, vɛlɛ a Isɔluɛiya+ a muɛi faŋnde yɛ.

13 Mi Deeve nyuna laŋunɔ chuu ndu yooŋgoo wo aa: “Wana maavɛɛ ŋ cho yɛ, nduyɛ kuɛɛnɛ ŋ fula yɛ?” Mbo muli aa: “Amalɛkaitiinɔɔ finya nuu cho ni, nduyɛ miallo o cho o Isɔluɛi niŋ ni.” 14 Okoŋ mi Deeve nyuna ndu aa: “Le yɛɛnɛ siooŋii bii num le wana Chɛhowa pɔya wo diyɔɔ le?”+ 15 Le hei, mi Deeve veelu puaa nduaa o pilɛ mbo dimul ndu aa: “Sɔɔŋguu ma dii ndu.” Okoŋ mbo lɔwa ndu a muɛi faŋnde, mbo dii ndu.+ 16 Mi Deeve dimul ndu aa: “Kooma numndaŋ ma cho numpila o lebol, kanifuule numpila o sondo i fula ni maa num dii wana Chɛhowa pɔya wo ni.”+

17 Okoŋ, mi Deeve soli chondii imɔnɛi* hei le Sɔɔ a Chonataŋ po ndɔ.+ 18 Nduyɛ, mbo dimi le ma pɛɛku waŋnda Chuda chondii imɔnɔ nda veelu aa “Chiɔuleŋ” nde, i cho i poonyiaa o yau Chasilua wo niŋndo.+

19 “Oo waŋnda Isɔluɛi, wanaa nyaa kɛndiaa cho ihini a vilɛiya o pembuŋ nyaŋ bɛndoŋ choo.+

Kuubaa chɔuwa del!

20 La duau bali a ndi okɔɔ o Kaati niŋ te.+

Maa lɛŋnde leŋ le soli nyɛdiaa le salaa solioo le fɔ!+

Kanifuule, loŋ boo chɔu kuubaa dialuŋ kalaa tambu labɛɛ ni.

Fɛɛŋ bɛɛ chuɛima suiinuŋ lɛ o boo chɔu Sɔɔ wo le.

22 Chiɔule Chonataŋ ndeŋ lee bindu le.+

Sɔɔ bɛɛ muɛi faŋii nduɛi ndii hui ndu le.

Mi chiɔuleŋ a muɛi faŋnde diu diu kuubaa dialuŋ kalaa, nduyɛ mi kooma yaamɔɔwaa ndaa suiinuŋ nyɔɔŋ muŋ.+

23 Sɔɔ nda Chonataŋ,+ wanaa waŋnda ndaa kaala nduyɛ ma hɛnaŋ tau wa nda wa ni, teleŋ nda wa yoomu wo.

Nduyɛ piɔmndo bɛɛ piɔu nda tɛɛŋ te.+

Ndaa keleŋa ndaa hiou koviaa.+

Ndaa nɔ kpaayaa ndaa hiou kpɔkuŋnda.*+

24 Nya waŋ laanduaa Isɔluɛi, la chaŋ le Sɔɔ.

Ndu tosa ni mi la chuɛɛnuŋ kolala siaŋa laŋ a la baa kala kalalaŋ.

Ndu tosa ni mi la wounuŋ nyɛm kɛvɛlɛŋ ŋkooliiyoŋ o nyɛla nyalaŋ choo.

25 Nuawɔ se mɛɛ kuubaa dialuŋ kalaa del o chɔuwo yɛ!

Chonataŋ hini o vilɛiyo o pembuŋ nyaŋ bɛndoŋ choo!+

26 I cho bɔɔ a kɔl tambɛiyo le num Chonataŋ bɛ ni!

A wa bɔɔ wana kɛndɛ naa ya chua.+

Kaala num oo nɔ le ya wo ndoo hiou poloŋ a kaala waŋ laanduaa nɔ le ya wo.+