Saamiɛɛ Diiŋ Ndɔɔ

24 Okoŋ kɔɔli, mi Chɛhowa duaunuŋ vɛlɛ tumbe o kala kala a Isɔluɛiya,+ mɛɛ waŋndo nyindu Deeve le mbo tosa nyɛ luei yoomula ndalaŋ o kpundɔɔ niŋndo. Mi wana koŋ dimul ndu aa: “Kɔ chɔm+ waŋnda Isɔluɛi a Chuda kpou.”+ 2 Okoŋ mi masaa dimul Chowaabi,+ wana wa puaa nduaa chɔuwa bolleŋ ndo aa: “A yandii, kɔ ma balu o kaalaŋ Isɔluɛi niŋ kpou chɔŋ Daŋ haaa Biaa-siɛba,+ ma poonyiaa waŋnda diolaŋ o yauwo choo, le mi sina mɛɛ nda cho bolle pilɛ yɛ.” 3 Kɛ mi Chowaabi dimul masaa aa: “Maa Chɛhowa Mɛlɛka numndo tosa mi waŋnda kui haaa bɛmbɔɔ 100, nduyɛ mi masanɔ nuu ndupila che ndi a lehɔl pɛɛŋ. Kɛ, le yɛɛnɛ kpeekpei masanɔ nuu yeema yɛ suɛi waa nuaa tosaa?”

4 A koŋ kpou, mi Masaa Deeve kɛɛ le Chowaabi a masaa puaa chɔuwa nilaŋ yaŋɔɔ. Okoŋ mi Chowaabi a masaa puaa chɔuwa faŋaŋ o masaa lo, ma kua waŋnda Isɔluɛi diolaŋ poonyiaa.+ 5 Ma taŋ Chɔɔdaŋ ndaŋ, okoŋ ma kɔ kila dɔɔŋgɔɔ o chiee bɛndoo Aloya+ kpeŋgii ba tou ve* o kpoloŋndo tɛɛŋ. Ma kua kpeŋgii Kaadi ve a Chasɛɛ.+ 6 Okoŋ kɔɔli, ma kua Kiliaadi+ a o lɛŋnde Tatim-hodisi leŋ niŋ. Mɛɛ nda chɛŋ loŋ, ma kua Daŋ-chaŋ a Saidɔŋ.+ 7 Ma kua vɛlɛ Taaya+ o chiee bɛndu nɔ kpaki kala kalaa wo, a o chieeŋ bɛnduŋ Hivaitiiya+ a Kenanaitiiya niŋ kpou. O mɛɛlulaŋ kpɔŋ, ma fuuluu Biaa-siɛba. Nɛkɛbi+ o Chuda niŋ Biaa-siɛba wo hoo wa ni.+ 8 Mɛɛ nda kɔ balu o lɛŋndeŋ niŋ kpou, ma miiŋgu Chulusalɛm. Nduyɛ, paŋgoŋ ŋɔmahiɔɔlu a palɛi 20 nda chii ni. 9 Okoŋ mi Chowaabi kɔ dounuŋ masaa kona, mɛɛ kpɛ wanaa nda poonyiaa diolaŋ nda wa yɛ. Puaa chɔuwaa ndaa nɔ mɔɔŋ faŋndoŋ o Isɔluɛi niŋnda wa 800,000, nduyɛ puaa Chuda wa 500,000.+

10 Kɛ mɛɛ Deeve chii waŋnda chɔm, mi kɔl* ndɔɔ wa ndu paaliaŋndo.+ Okoŋ mbo dimul Chɛhowa aa: “Haki+ wɔɔŋ wɔɔŋndo ya tosa hoo ni. Lelaŋ a yandii Chɛhowa, mal ya buɛi numndo haki le biondɔŋ ya tosa hoo wo,+ kanifuule diɔmii bɛndu bɛnduei ya tosa hei ni.”+ 11 Mɛɛ Deeve chɛŋ idiiyo, mi Chɛhowa suaa o Kaadi lo,+ wana ndoo suaa le ndu, mbo cha yilaŋndoŋ le Deeve wo. Mbo dimul ndu aa: 12 “Kɔ dimul Deeve aa, ‘Nyɛ Chɛhowa dimi wo cho hoo ni: “I nɔ kpundɛlaŋ la yaa le num. Chua o ŋ yeema mi tusi num choo wo.”’”+ 13 Okoŋ mi Kaadi kua naa Deeve chua, mbo dimul ndu aa: “Baa a yeema mi yima bɛnduaŋ ma del o lɛŋnde numndeŋ niŋ le wɔsilaŋ la ŋɔmmɛu?+ Baa a yeema mi yaamɔɔwaa numnda wa num touwɔɔ le paŋgoŋ ŋgaa?+ Ɔɔ a yeema mi naa taŋ waŋnda wo del o lɛŋnde numndeŋ niŋ le palɛi i yaa?+ Lelaŋ, yiyaŋ nyɛkɛndɛi ma chɔm ya nyɛ ya nɔ mi kɔ doonuŋ wana vem ya wo kona wo.” 14 Mi Deeve dimul Kaadi aa: “Kɔl nuu cho bɔɔ o saŋgaa niŋ. Lelaŋ a yandii, o cho fisa miŋ del Chɛhowa o ba,+ kanifuule nyiɛɛyii nduɛi i cho bɔɔ.+ Kɛ chɛl la mi del wanachioo o ba le.”+

15 Okoŋ, mi Chɛhowa yɔŋ naa taŋ waŋnda wo+ o Isɔluɛi niŋ chɔŋ idiiyo haaa a teleŋ o kɛɛsiaa wo. Nduyɛ, mi waŋnda 70,000 sɔla piɔmndo+ chɔŋ Daŋ kɔ Biaa-siɛba.+ 16 Mɛɛ maalikɛinɔɔ siɛndi ba ndɔɔ kumbuii Chulusalɛm nde le ndu tɛɛmbuuwo, mi nyiɛɛye bii Chɛhowa, okoŋ mbo siŋga yiyaŋ ndɔɔ. Mbo dimul maalikɛinɔ wa waŋnda kpundɔɔ tusioo choo wo+ aa: “O cho letuu! Tusi ba numndo.” Nduyɛ, maalikɛinɔ Chɛhowa wo wa niŋ kpɛɛluŋ o yasaba luaa ŋwitii Aluana wo,+ Chɛbusaitiinɔɔ.+

17 Mɛɛ Deeve che maalikɛinɔ wa waŋnda diu diuwo wo, mbo dimul Chɛhowa aa: “Ya tosa hakioo ni, nduyɛ ya tosa suɛi wɔɔŋnde ni. Kɛ yɛɛnɛ kpeekpei waŋnda* haa tosa yɛ?+ Lelaŋ a yandii, tusi ya a yuŋgu finya nuu nyɛpalaa choo.”+

18 O paale leŋ choo, mi Kaadi kua naa Deeve chua, mbo dimul ndu aa: “Chɔŋ ma kuɛ o yasaba luaa ŋwitii Aluana wo, Chɛbusaitiinɔɔ, okoŋ ma taŋgul bandu luamaa lasalaa loŋ le Chɛhowa.”+ 19 Mi Deeve chaŋ mbo kua a mɛɛ Chɛhowa ndoo dimul Kaadi yɛ. 20 Mɛɛ Aluana tofa mbo cha masaa a buɛiyaa nduaa hunɔɔ naa ndu chua, o lepilɛ niŋ kpe, mi Aluana fula mbo kɔ beŋ masaa wulaŋ, nduyɛ mbo fuuluu hɔlla lɛŋ. 21 Mi Aluana nyuna aa: “Le yɛɛnɛ masanɔ nuu hiŋ yɛ naa ya buɛi ndɔɔ chua?” Mi Deeve muli aa: “I hiŋ le ma ke ya yasaba num luaa ŋwitiiyo mi pendu, okoŋ mi taŋgul bandu luamaa lasalaa le Chɛhowa, le halikpeŋ mi naa wɔɔŋ cho hoo waŋnda choo wo faŋaŋ.”+ 22 Kɛ mi Aluana dimul Deeve aa: “Masanɔ nuu, te fondaa hoo ŋ yeema ni, mɛɛ chua ma soli sala kɛ kɛ ŋ yeema pɛ le solioo. A che nauwa a yɔmii naŋ luaa witiiyoŋ nde le sala luamaa solioo. Yɔmii naŋ yii nauwa o lakɛsu ve bɛɛ cho nanuŋ. 23 Masanɔ nuu, nyɔɔŋ muŋ kpou, ya Aluana ke num ni.” Okoŋ mi Aluana dimul masanɔɔ aa: “Maa Chɛhowa Mɛlɛka numndo tuiinuŋ num inyiɛɛ fɔ.”

24 Kɛ mi masaa dimul Aluana aa: “Sako, chɔm ya baa, okoŋ mi pendu num o ba. Kanifuule, I yeema mi solul Chɛhowa Mɛlɛka nuu salala luamaa laŋ a nyɛ nda ke ya fondo fuu wo le.” Okoŋ, mi Deeve piandu yasaba luaa ŋwitiiyo a nauwa kaniŋ humboŋ lusullo siɛkɛlloŋ 50.*+ 25 Mi Deeve taŋgul bandu luamaa lasalaa+ loŋ le Chɛhowa, mbo soli salala luamaa laŋ a salala kɔl nyulu laŋ. Okoŋ, mi Chɛhowa yaŋ nilaŋ o piɛile Deeve leŋ le waŋnda Isɔluɛi.+ Nduyɛ mbo tosa mi naa wɔɔŋ wa Isɔluɛiya choo wo faŋaŋ.