Koloniko Tasoo

21 Okoŋ mi Setana* simul Isɔluɛiya, nduyɛ mbo nyindu Deeve le mbo chɔm Isɔluɛiya.+ 2 Mi Deeve dimul Chowaabi+ a wanaa wa puaa nduaa chɔuwa bolleŋ nda aa: “La kɔ chɔm Isɔluɛiya chɔŋ Biaa-siɛba haaa Daŋ,+ okoŋ mi la huŋ doonuŋ ya kona le mi sina mɛɛ nda cho bolle pilɛ yɛ.” 3 Kɛ mi Chowaabi dimul ndu aa: “Maa Chɛhowa tosa mi wanaa nduaa kui haaa bɛmbɔɔ 100. Masanɔ nuu, waŋnda haa kpou o cho buɛiyaa numnda le nda cho le? Le yɛɛnɛ kpeekpei masanɔ nuu yeema yɛ hei tosaa? Le yɛɛnɛ ŋ yeema yɛ ma tosa mi Isɔluɛiya del o hakioo niŋ?”

4 Kɛ mi Masaa Deeve kɛɛ le Chowaabi nilaŋ yaŋɔɔ. Le hei, mi Chowaabi mal mbo kɔ balu o Isɔluɛi niŋ kpou. Okoŋ kɔɔli, mbo miiŋgu Chulusalɛm.+ 5 Mi Chowaabi kɔ doonuŋ Deeve kona mɛɛ kpɛ wanaa nda poonyiaa diolaŋ nda wa yɛ. Puaa chɔuwaa ndaa nɔ mɔɔŋ faŋndoŋ o Isɔluɛi niŋnda wa 1,100,000. Nduyɛ, puaa chɔuwaa ndaa nɔ mɔɔŋ faŋndoŋ o Chuda niŋnda wa 470,000.+ 6 Kɛ wanaa wa o yuŋgu Livai yo niŋ a o yuŋgu Bɛŋjamiŋ ndo niŋnda,+ a poonyiaa nda ladio le, kanifuule pesiŋ bɛɛ Chowaabi ndoo niŋ kɔl a nyɛ masaa dimi wo le.+

7 Mi nyɛ Deeve tosa hoo wo tɛɛmbuu Mɛlɛka tonyaa kɔllo tau. Le hei, mbo tusi Isɔluɛi nyɛpalaa choo. 8 Okoŋ mi Deeve dimul Mɛlɛka tonyaa aa: “Haki+ wɔɔŋ wɔɔŋndo ya tosa hoo ni. Lelaŋ a yandii, mal ya buɛi numndo haki le biondɔŋ ya tosa hoo wo,+ kanifuule diɔmii bɛndu bɛnduei ya tosa hei ni.”+ 9 Okoŋ mi Chɛhowa dimul Kaadi,+ wana ndoo cha yilaŋndoŋ le Deeve wo aa: 10 “Kɔ dimul Deeve aa, ‘Nyɛ Chɛhowa dimi wo cho hoo ni: “I nɔ kpundɛlaŋ la yaa le num. Chua o ŋ yeema mi tusi num choo wo.”’” 11 Okoŋ mi Kaadi kua naa Deeve chua, mbo dimul ndu aa: “Nyɛ Chɛhowa dimi wo cho hoo ni, ‘Hɛli o ŋ yeema wo. 12 Le wɔsilaŋ la yaa, yima bɛnduaŋ ma cho wa,+ ɔɔ le paŋgoŋ ŋgaa, yaamɔɔwaa nyaa cho nya wa diuwo, nduyɛ mi muɛi faŋii yaamɔɔwaa nyaa tɛɛmbuu nya.+ Le palɛi i yaa, maalikɛinɔ Chɛhowa wo cho hunɔɔ a naa taŋ waŋnda wo o lɛŋndeŋ niŋ,+ mbo tɛɛmbuu waŋnda a muɛi faŋii Chɛhowa ve o tanda Isɔluɛiyo niŋ kpou.’+ Lelaŋ, yiyaŋ nyɛkɛndɛi ma chɔm ya nyɛ ya nɔ mi kɔ doonuŋ wana vem ya wo kona wo.” 13 Mi Deeve dimul Kaadi aa: “Kɔl nuu cho bɔɔ o saŋgaa niŋ. Lelaŋ a yandii, o cho fisa mi del Chɛhowa o ba, kanifuule nyiɛɛyii nduɛi i cho bɔɔ.+ Kɛ chɛl la mi del wanachioo o ba le.”+

14 Okoŋ, mi Chɛhowa yɔŋ naa taŋ waŋnda wo+ o Isɔluɛi niŋ. Le hei, mi waŋnda 70,000 sɔla piɔmndo.+ 15 Okoŋ kɔɔli, mi Mɛlɛka tonyaa yɔŋ maalikɛinɔɔ le Chulusalɛm tɛɛmbuuwo. Kɛ mɛɛ o hiŋ le hei tosaa, mi nyiɛɛye bii Chɛhowa, okoŋ mbo siŋga yiyaŋ ndɔɔ.+ Mbo dimul maalikɛinɔ wa waŋnda kpundɔɔ tusioo choo wo aa: “O cho letuu!+ Tusi ba numndo.” Maalikɛinɔ Chɛhowa wo wa niŋ isisi kpɛɛluŋ o yasaba luaa ŋwitii Ɔnaŋ ndo,+ Chɛbusaitiinɔɔ.+

16 Mɛɛ Deeve chua hɔlla, mbo cha maalikɛinɔ Chɛhowa wo isisi o hueiye niŋ* a muɛi faŋnde ndu o ba,+ mbo yulu ndi kpeŋgii Chulusalɛm nde. O lepilɛ niŋ kpe, mi Deeve nda waŋ banaa wounuŋ nyɛla labɛkilaŋ,+ ma hini lɛŋ a hɔlla a fuulaa lɛŋ mɛɛ.+ 17 Mi Deeve dimul Mɛlɛka tonyaa aa: “O cho ya le dimi le ma chɔm waŋnda le? Ya tosa hakioo ni, nduyɛ ya tosa suɛi wɔɔŋnde ni.+ Kɛ yɛɛnɛ kpeekpei waŋnda haa tosa yɛ? Oo Chɛhowa Mɛlɛka nuu, a yandii tusi ya a yuŋgu finya nuu nyɛpalaa hoo choo. Kɛ tusi ndu wanaa numnda choo le.”+

18 Okoŋ, mi maalikɛinɔ Chɛhowa wo dimul Kaadi+ le mbo kɔ dimul Deeve mbo taŋgul bandu luamaa lasalaa le Chɛhowa, o yasaba luaa ŋwitii Ɔnaŋ ndo, Chɛbusaitiinɔɔ.+ 19 Mi Deeve chaŋ mbo kua a mɛɛ Chɛhowa ndoo dimul Kaadi le mbo dimul ndu yɛ. 20 Okoŋ kɔɔli, mɛɛ Ɔnaŋ muliŋ mbo cha maalikɛinɔɔ, mi puaa nduaa hiɔɔluaa wa a ndu latulu wa viaŋnuŋ. Nduyɛ witiiyoŋ Ɔnaŋ wa lɔɔ ni. 21 Mɛɛ Deeve kuɛ naa Ɔnaŋ chua nduyɛ mi Ɔnaŋ cha Deeve, o lepilɛ niŋ kpe, mbo chaŋ o yasaba luaa ŋwitiiyo mbo beŋ Deeve wulaŋ, nduyɛ mbo fuuluu hɔlla lɛŋ. 22 Mi Deeve dimul Ɔnaŋ aa: “Ke ya yasaba num luaa ŋwitiiyo mi pendu, okoŋ mi taŋgul bandu luamaa lasalaa le Chɛhowa. Pisi ya ndu o ba a mɛɛ baa ndɔɔ cho yɛ, le halikpeŋ mi naa wɔɔŋ cho hoo waŋnda choo wo faŋaŋ.”+ 23 Kɛ mi Ɔnaŋ dimul Deeve aa: “Masanɔ nuu, chua. Num nɔ ni. Tosa nyɛ o nyɛ ŋ yeema pɛ a ndu. A che nauwa a yɔmii naŋ luaa witiiyoŋ nde le sala luamaa solioo, vɛlɛ a witiiyoŋ le sala ŋkullo solioo.+ Muŋ kpou I ke num.”

24 Kɛ mi Masaa Deeve dimul Ɔnaŋ aa: “Sako, chɔm ya baa, okoŋ mi pendu num o ba. Kanifuule, I yeema mi chua nyɛ cho le numndo mi ke Chɛhowa le. Ɔɔ, mi soli sala luamaa a nyɛ nda ke ya fondo fuu wo le.”+ 25 Okoŋ, mi Deeve ke Ɔnaŋ kooliiyoŋ lusullo siɛkɛlloŋ 600* le fondaŋ koŋ. 26 Mi Deeve taŋgul bandu luamaa lasalaa+ loŋ le Chɛhowa, mbo soli salala luamaa laŋ a salala kɔl nyulu laŋ. Nduyɛ mbo piɛi o Chɛhowa lo, okoŋ mbo muli piɛile ndɔleŋ. Mbo tosa mi yiŋndeŋ le chaŋ o choo choo niŋ,+ mi le huŋ lom sala luamaa o bandu luamaa lasalaa choo. 27 Okoŋ mi Chɛhowa dimul maalikɛinɔɔ+ le mbo miŋgi muɛi nduɛi faŋnde o boo niŋ. 28 Mɛɛ Deeve che maa Chɛhowa muli piɛile ndɔleŋ o yasaba luaa ŋwitii Ɔnaŋ ndo, Chɛbusaitiinɔɔ, mbo hiau lachi a salalaŋ solioo loŋ. 29 Kɛ a teleŋ koŋ, tɛndii Muuse toosiaa le Chɛhowa o pollo niŋndo a bandu ndaa luam salala luamaa laŋ ndo wa o fondaŋ filioŋndo Kibiɔŋ.+ 30 Kɛ Deeve ndoo tiuba mbo kɔ sim bandu koŋ lachi le Mɛlɛka nyunaa le, kanifuule siooŋnde wa ndu le muɛi faŋii maalikɛinɔ Chɛhowa ve.