Koloniko Diiŋ Ndɔɔ

3 Okoŋ, mi Sɔlɔmɔŋ kandu chiɛi Chɛhowa wo taŋgullo+ Chulusalɛm o Pembii Moliaa Ve choo.+ Loŋ Deeve toosiaa fondaa o yasaba luaa ŋwitii Ɔnaŋ+ Chɛbusaitiinɔɔ wo ni. Nduyɛ, loŋ koni Chɛhowa chɔɔmuŋ Deeve finya ndɔ ni.+ 2 Wɔsi hiɔɔlu ndɔ Sɔlɔmɔŋ wa o masaleŋ choo wo, a paŋgii diiŋ nduɛi malɔ le diiŋ o kandu chiɛiyo hoo taŋgullo ni. 3 Chiyii Sɔlɔmɔŋ kila le chiɛi Mɛlɛka tonyaa taŋgullo ve wa bandei nɛiyo 90, toŋgei nɛiyo 30,+ a mɛɛ ndaa tuu o paandoo niŋ yɛ.* 4 Toŋgo wa o chiɛiyo hoo lachi wo wa bandei nɛiyo 30. Mɛɛ chiɛiyo ndoo toŋgu yɛ koni o wa ni.* Helɔɔ ndɔɔ wa bandei nɛiyo 30.* Nduyɛ mbo yikpa ndu leniŋ a koolii kɛndɛ kɛndɛi.+ 5 Mbo pɛŋgɛla pɛŋgɛŋ yɔm chunipa woŋ o chiɛiyo hoo niŋ, nduyɛ mbo kumbu muŋ a koolii kɛndɛ kɛndɛi.+ Okoŋ, mbo tuuliaa wauwaŋ+ a yɔlɔŋ+ lechoo le ndu nɛŋioo. 6 Okoŋ kɔɔli, mbo hɛɛnduu pouta baa kalala kɛndɛ kɛndɛlaŋ o chiɛiyo hoo.+ Nduyɛ kooliŋ+ o soliŋ kpeku woŋ, Pavayim ŋ fula ni. 7 Chiɛiyo ni, kandulaŋ ni, chiiyoŋ ni, vɛlɛ a diolaŋ, a kooliiye o kumbu laŋ ni.+ Nduyɛ, mbo tuuliaa chɛlɔbiiya o chiiyuŋ chiɛiyo kpou.+

8 Okoŋ kɔɔli, mbo toosiaa Fondaŋ* Hiou Diondɔɔ Wo.+ Bandii nduɛi wa a toŋgii chiɛiyo kpeŋ. Bandei nɛiyo 30, nduyɛ toŋgei nɛiyo 30. Mbo kumbu ndu a koolii kɛndɛ kɛndɛi+ talɛŋndoŋ 600.* 9 Kooliŋ nda toosiaa lɔndimɛiyoŋ ndoŋ, lusul ndɔɔ wa siɛkɛlloŋ 50.* Nduyɛ, mbo kumbu kaa chiɛiyo hoo kpou a kooliiye.

10 Okoŋ kɔɔli, mbo toosiaa chɛlɔbiiya a ŋiɔɔŋ o Fondaŋ* Hiou Diondɔɔ Wo, nduyɛ mbo kumbu nda a kooliiye.+ 11 Chɛlɔbiiya haa kpou, kumbaŋnda ndalaŋ+ la wa bandei nɛiyo 30. Chɛlɔbiinɔ tasoo, kumbaŋ ndɔɔ wa bandei nɛiyo le ŋɔmmɛu a tɛndaa tɛɛŋ, nduyɛ mi kumbaŋ ndɔɔ pilaŋ chiɛiyo. Kumbaŋ ndɔɔ o pilɔɔ bɛɛ wa bandei nɛiyo le ŋɔmmɛu a tɛndaa tɛɛŋ, nduyɛ mbo pilaŋ kumbaŋnda chɛlɔbiinɔɔ o pilɔɔ. 12 Kumbaŋ chɛlɔbiinɔɔ o pilɔɔ wa bandei nɛiyo le ŋɔmmɛu a tɛndaa tɛɛŋ, nduyɛ mbo pilaŋ chiɛiyo kumbuei i pilɛi. Kumbaŋ ndɔɔ o pilɔɔ bɛɛ wa bandei nɛiyo le ŋɔmmɛu a tɛndaa tɛɛŋ, nduyɛ mbo pilaŋ kumbaŋnda chɛlɔbiinɔ tasoo o pilɛ. 13 Kumbanda chɛlɔbiiya haa, la wa la pɛŋgɛlaa le nɛiyo 30. A wa isisi, nduyɛ ma muli hɔlla o fondaŋ diandaa.

14 Mbo toosiaa vɛlɛ kola bɛndoo+ a kɛi buliiyo, kɛi yim yimndo, kɛi siaŋaa, a fuŋnde kɛndɛ kɛndɛleŋ, okoŋ mbo tuuliaa chɛlɔbiiya lechoo.+

15 Mbo toosiaa suŋgbuaŋ ma miɔɔŋ+ o chiɛiyo hɔlndɔ. Le kɛ kɛ wa bandei nɛiyo 52 a tɛndaa tɛɛŋ. Nduyɛ nyɛla nda wou o suŋgbuaŋ maŋ bolleŋ ndaŋ, o kɛ kɛ wa bandei nɛiyo le ŋɔmmɛu a tɛndaa tɛɛŋ.+ 16 Mbo toosiaa yɔlɔŋ maa yɔlɔŋ labolo, mbo wou muŋ o suŋgbuaŋ maŋ bolle. Nduyɛ mbo toosiaa pɔmɛkilanetiiyaŋ 100, mbo bayiaa maŋ o yɔlɔŋ muŋ. 17 Mbo simi suŋgbuaŋ maŋ o chiɛi Mɛlɛkaa hɔlndɔ. Le pilɛ le wa o ba miallo choo, le pilɛ leŋ le wa o ba kɛndɔɔ choo. Mbo ke le wa o ba kɛndɔɔ choo leŋ diolaŋ aa Chakiŋ,* nduyɛ mbo ke le wa o ba miallo choo leŋ diolaŋ aa Bowaa.*