Masaa Tasiaa

22 Le wɔsilaŋ la yaa, chɔu ve Siiliaa tɛɛŋ nda Isɔluɛi le. 2 O wɔsi yaa ndɔɔ niŋ, mi Chɛhosiafati,+ masaa le Chuda kua o masaa le Isɔluɛi lo.+ 3 Mi masaa le Isɔluɛi dimul waŋ banaa aa: “La sina maa naŋ nɔ Luamɔti-kiliaadi ni.+ Kɛ nduyɛ, miŋ wa siɛlɛŋ siɛlɛŋndo le ndu biyɔɔ masaa le Siiliaa o ba.” 4 Okoŋ mbo nyuna Chɛhosiafati aa: “A cho lakɔ a ya latulu le miŋ kɔ del Luamɔti-kiliaadi choo a sɔŋgɔɔ?” Mi Chɛhosiafati mulul masaa le Isɔluɛi aa: “Naa num, wanaa piliaa naŋ cho ni. Wanaa niaa, wanaa numnda nda cho ni. Nduyɛ suaa niaa, suaa numnda nda cho ni.”+

5 Kɛ mi Chɛhosiafati dimul masaa le Isɔluɛi aa: “A yandii, nyuna wɔ fɛlɛŋ+ Chɛhowa a ndi okɔɔ.”+ 6 Okoŋ, mi masaa le Isɔluɛi chuuŋgiaa wanaa suaa le Mɛlɛka wa diompilɛ, a wa puaa le 400. Mbo nyuna nda aa: “Baa I kɔ mi kɔ chɔulaba Luamɔti-kiliaadi, ɔɔ I kua le?” Ma mulul ndu aa: “Kɔ, nduyɛ Chɛhowa cho num ndu malɔɔ o ba.”

7 Mi Chɛhosiafati dimi aa: “Baa wana cho pa nanuŋ o suaa le Chɛhowa wo? Ŋ nyunaŋ ndɔ ndu vɛlɛ a ndi okɔɔ.”+ 8 Okoŋ, mi masaa le Isɔluɛi dimul Chɛhosiafati aa: “Po pilɛ cho wɔ nanuŋ o naŋ nɔla miŋ dimul le mbo nyuna Chɛhowa diom ndo.+ Kɛ I tul ndu leyɛ,+ kanifuule o dimi sɔɔŋ kɛndɛ a ya okɔɔ le. Ŋ wɔɔŋndoŋ kinɛi o dimi ni.+ Ndu cho Maikaya ni, po Imila wo.” Kɛ mi Chɛhosiafati dimi aa: “Masaa nɔ mbo dimi suɛi waa nuaa le.”

9 Okoŋ, mi masaa le Isɔluɛi veelu wana bɛndoo o pilɛ o chiɛi lemasaa niŋ, mbo dimul ndu aa: “Kɔ chɔ chɔ ma kɔ veelu Maikaya, po Imila wo.”+ 10 Masaa le Isɔluɛi a Chɛhosiafati masaa le Chuda wa ichali o kpeŋgbeila ndala lemasalaŋ choo o yasaba, o dio kpakioo Sameeliaa ikɛi. Nduyɛ, a wa a doviaŋ o nyɛla ndala lemasalaŋ niŋ. Wanaa suaa le Mɛlɛka wa kpou wa nda lachi, ma wa nda yooŋgula Mɛlɛkalaŋ dimullo.+ 11 Okoŋ mi Sɛdikaya, po Chenaana wo toosiaa leela ŋchiliŋndaŋ le ndupila. Mbo dimi aa: “Nyɛ Chɛhowa dimi wo cho hoo ni, ‘A leelaŋ ndaŋ ŋ cho lo Siiliaŋnda kundɔɔ ni* haaa ma chii nda paku.’” 12 Wanaa suaa le Mɛlɛka wa a piliaa bɛɛ kpou, nyɛpilɔɔ kpe nda wa dimioo ni aa: “Kɔ Luamɔti-kiliaadi, a cho batiuwaa sɔla. Chɛhowa cho num ndu malɔɔ o ba.”

13 Mi wana kuɛ Maikaya veeloo wo dimul ndu aa: “Wanaa suaa le Mɛlɛka wa kpou, sɔɔŋ kɛndɔŋ kpu nda cho masaa dimullo ni. A yandii, num bɛɛ dimi sɔɔŋ kɛndɔŋ a ndu okɔɔ maa nda.”+ 14 Kɛ mi Maikaya dimi aa: “I mɛnaŋ po o Chɛhowa, Mɛlɛka cho yoomu wo lo maa, nyɛ o nyɛ Chɛhowa dimul la pɛ, ndu ya cho dimi ni.” 15 Okoŋ, mi Maikaya huŋ o masaa lo, mi masaa nyuna ndu aa: “Maikaya, baa ŋ kɔ miŋ kɔ chɔulaba Luamɔti-kiliaadi, ɔɔ ŋ kua le?” Mbo mulul ndu o lepilɛ niŋ kpe aa: “Kɔ, a cho batiuwaa sɔla. Chɛhowa cho num ndu malɔɔ o ba.” 16 Okoŋ, mi masaa nyuna ndu aa: “Vɛɛnɛ kpɛ ya dimul lɛ num niŋ le ma mɛnaŋ maa tonyaa kinɛi ŋ nɔ ni ma dimul la o diola Chɛhowa laŋ niŋ?” 17 Mi Maikaya dimi aa: “I cho chɔɔ Isɔluɛiya kpou a sɛŋiaŋ o pemboŋ choo,+ mɛɛ saa wa nuaa a nɔ wana mandaa le yɛ. Mi Chɛhowa dimi aa: ‘A nɔ wana simlachinɔ le. Lelaŋ, wana o wana miiŋgu o chiɛi ndɔɔ o kɔl nyulu niŋ.’”

18 Mi masaa le Isɔluɛi dimul Chɛhosiafati aa: “A che nyɛ ya dimul num ndo le, ‘O dimi sɔɔŋ kɛndɛ a ya okɔɔ le, ŋ wɔɔŋndoŋ kinɛi o dimi ni.’”+

19 Okoŋ mi Maikaya dimi aa: “Tueiyɔ nyɛ Chɛhowa dimi wo: Mi cha Chɛhowa ichali o kpeŋgbei ndɔ lemasaa choo,+ nduyɛ puaa chɔuwa o choo choo niŋ kpou wa ndu isisi ikɛi. Haa wa o ba ndɔ kɛndɔɔ choo, mi haa wa o ba ndɔ miallo choo.+ 20 Mi Chɛhowa nyuna aa, ‘O nɛɛnɛ cho yɛ lakɔ Ehaabi hui le mbo kuɛ Luamɔti-kiliaadi, mbo kɔ wu loŋ?’ A ve nyɛ pilɛ dimi le. Te hoo dimi pɛ nuaa, o pilɔɔ dimi nyɛ cheleŋ. 21 Okoŋ mi maalikɛinɔɔ+ fula mbo sim Chɛhowa lachi, mbo dimi aa, ‘I cho ndu lakɔ hui.’ Mi Chɛhowa nyuna ndu aa, ‘Vɛɛnɛ ŋ cho yɛ ndi looku tosa?’ 22 Mbo muli aa, ‘I cho lakɔ tosa mi wanaa nduaa suaa le Mɛlɛka wa kpou dimul ndu choolaŋ.’+ Okoŋ mi Mɛlɛka dimul ndu aa, ‘A cho ndu hui. Nduyɛ i hiou kpou ve, a cho batiuwaa sɔla. Kɔ ma kɔ tosa lende.’ 23 Chɛhowa tosa ni mi wanaa num aa suaa haa le Mɛlɛka wa kpou+ dimul num choolaŋ. Nduyɛ Chɛhowa dimi maa kpundɔɔ cho num tolɔɔ choo.”+

24 Mi Sɛdikaya, po Chenaana wo sɔɔŋguu Maikaya ikɛi mbo luaa ndu kpaŋnde. Mbo nyuna ndu aa: “Vɛɛ maalikɛinɔ Chɛhowa wo kei yɛ ya choo, mbo kɔ soo o numndo?”+ 25 Mi Maikaya muli aa: “Paale ŋ cho luɛiyɔɔ o lumuiyo niŋ di le vioŋnɔŋndo leŋ, paale leŋ ŋ cho sina ni.” 26 Okoŋ, mi masaa le Isɔluɛi dimi aa: “La bii Maikaya mi la kuɛ a ndu o Amɔŋ masa chioo lo, a o Chowaasi lo po masaa. 27 La dimul nda aa, ‘Nyɛ masaa dimi wo cho hoo ni: “La bii laŋunɔɔ hoo mi la dɔu ndu o chiɛi manyumndo niŋ,+ nduyɛ mi la dɔɔniaa nyɛdiaa* o dia o paaleŋ niŋndo, vɛlɛ a mɛŋma o kol laŋ haaa mi miiŋgu o kɔl nyulu niŋ.”’” 28 Kɛ mi Maikaya dimi aa: “Te a miiŋgu nanuŋ pɛ o kɔl nyulu niŋ, mɛɛ o cho Chɛhowa le soo naa ya chua le.”+ Mbo dimi vɛlɛ aa: “Nya waŋnda kpou, la kɛsiŋ hei o lakɔl.”

29 Okoŋ, mi masaa le Isɔluɛi a Chɛhosiafati masaa le Chuda kua Luamɔti-kiliaadi.+ 30 Mi masaa le Isɔluɛi dimul Chɛhosiafati aa: “I cho nyɛla cho ya lekɔɔ laŋ siŋga mi kuɛ naa sɔŋgɔɔ cho wa, kɛ mi num kuɛ a nyɛla numnda lemasalaŋ lekɔɔ.” Okoŋ, mi masaa le Isɔluɛi siŋga nyɛla wa ndu lekɔɔ laŋ+ mbo kua le chɔuwo. 31 Masaa le Siiliaa ndoo chii niŋ puaa sɔŋga o nyɛm nyaanaŋ suaa naŋndoŋ choo wa, wanaa ndaa banaa 32+ dimul aa: “La sɔŋga a wana o wana le, o wa wana pɔmbɔ ɔɔ wana bɛndu. A masaa le Isɔluɛi kinɛi nya sɔŋga ni.” 32 Dimioo nuaa mi waŋ banaa le puaa sɔŋga o suaa choo wa cha Chɛhosiafati, ma dimulaŋ aa: “Masaa le Isɔluɛi kpeekpei cho hoo ni.” Okoŋ, ma kua le ndu chiŋalaŋndo a sɔŋgɔɔ. Nduyɛ, mi Chɛhosiafati kandu chaŋndo le malaa. 33 Mɛɛ waŋ banaa haa che maa o cho ndu le cho masaa le Isɔluɛi le, o lepilɛ niŋ kpe, ma faŋaŋ ndu kɔɔli.

34 Kɛ mi laŋunɔ pilɛ wuu chiŋɔle ndɔleŋ, mi i yɔŋnuŋ kinɛi* mi le kɔ viɔ masaa le Isɔluɛi o bɔŋala doma ndɔ chɔuwo. Okoŋ, mi masaa dimul wana kua a nyɛ ndɔ nyaanaŋ suaa naŋndo aa: “Muliŋ miŋ faŋaŋ o fondaŋ chɔuwo* hoo, kanifuule a yɔŋul la bɔɔ.”+ 35 Mi chɔuwo hiau lachi a tuuloo ketu ketu o paale leŋ choo. Nduyɛ ma kɛsi masaa o nyɛ nyaanaŋ suaa naŋndo niŋ, ma muli ndu hɔlla kumbuii Siiliaŋnda. Mi kooma nduaŋ ma talaŋ o nyɛ nyaanaŋ suaa naŋndo niŋ, nduyɛ mbo wu a paale yɔŋgaŋndeŋ.+ 36 A paale delaaleŋ, ma yonda o dɔɔŋgɔɔ niŋ kpou aa: “Wana o wana miiŋgu o ndu lo chiee! Wana o wana miiŋgu o lɛŋnde ndɔleŋ niŋ!”+ 37 Mɛɛ masaa vi, ma kua a ndu Sameeliaa, ma kɔ kumbu ndu loŋ. 38 Mɛɛ nda tɔɔ nyɛ nyaanaŋ suaa naŋndo o mɛŋma tiilaŋndaŋ Sameeliaa, mi tuŋnda deembuu kooma nduaŋ, nduyɛ mi waŋ laanduaa tiamaa puluŋ loŋ.* Mi i yɔŋnuŋ mɛɛ Chɛhowa ndoo dimi yɛ.+

39 Sɔɔŋ cheleŋ cho a Ehaabi okɔɔ woŋ, nyɛ o nyɛ o tosa, chiɛi* o taŋgul a chiŋuŋ kamaa wo,+ nduyɛ a chieeŋ bɛnduŋ o taŋgul loŋ, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 40 Okoŋ mi Ehaabi wu,*+ nduyɛ mi po ndɔɔ Ahasaya+ miiŋgu o masaleŋ choo o foofo ndɔɔ.

41 Wɔsi hiɔɔlu ndɔ Masaa Ehaabi wa o masaleŋ choo Isɔluɛiyo, Chɛhosiafati+ po Esa wo simnuŋ masaa le Chuda ni. 42 Chɛhosiafati wa wɔsilaŋ 35 mbo simnuŋ masaa, nduyɛ mbo chii wɔsilaŋ 25 o masaleŋ choo Chulusalɛm. Kala ndɔ ndoo nɔ diolaŋ ni aa Asuba, chua Silihi wo. 43 Mbo hiau lachi a kɔlaŋ o nɛi Esa+ finya ndɔ wo choo. O feŋaŋ lechoo le, nduyɛ mbo tosa nyɛ bɛnda Chɛhowa o hɔl lo.+ Kɛ nduyɛ, fondaŋnda filioŋndaŋ la feŋaŋ te. Waŋnda wa wɔ salalaŋ solioo a salalaŋ lomɔɔ o fondaŋnda filioŋnda laŋ.+ 44 Chɛhosiafati wa o kɔl nyuloo niŋ nda masaa le Isɔluɛi.+ 45 Sɔɔŋ cheleŋ cho a Chɛhosiafati okɔɔ woŋ, kpaaya ndɔɔ, a chɔula o yem ndaŋ, ŋ cho o yau nda poonyiaa konaa a masaa keeku Chuda wa okɔɔ wo niŋ. 46 Waŋ piaanduaa ndaa hini a chaaŋaa ndaa waŋ piaanduaa o maaŋndaŋ niŋnda,+ a ndaa lo o palɛi Esa finya ndɔ ve niŋnda, mbo soli nda o lɛŋndeŋ niŋ.+

47 A teleŋ koŋ, masa kpeekpei ve Idɔm+ te. Masa pɔmbɔɔ wa lɛŋndeŋ hɔlteŋ ni.+

48 Mi Chɛhosiafati toosiaa vɛlɛ dɛndɛla bɛndula mamɛŋnda kua Taasi laŋ,* le kɔlaŋ Ofii le kooliiyoŋ.+ Kɛ mɛɛ dɛndɛlaŋ ndaŋ la wa kɔlaŋ, la fuuluu le, kanifuule mi la kei kɔɔlu* Ɛsiɔŋ-kɛbɛ.+ 49 A teleŋ koŋ Ahasaya po Ehaabi wo dimul Chɛhosiafati ni aa: “Chɛl mi buɛiyaa niaa a buɛiyaa numnda kuɛ a dɛndɛlaŋ ndaŋ latulu.” Kɛ Chɛhosiafati chɛl te.

50 Okoŋ kɔɔli mi Chɛhosiafati wu,*+ ma kumbu ndu nda finyaa nduaa mamaa latulu o Chiee Deeve finya ndɔ mama wo niŋ. Okoŋ mi Chɛholuam+ po ndɔ miiŋgu o masaleŋ choo o foofo ndɔɔ.

51 Mi Ahasaya+ po Ehaabi wo simnuŋ masaa le Isɔluɛi o Sameeliaa niŋ. Hei yɔŋnuŋ o wɔsi 17 Chɛhosiafati, masaa le Chuda wa o masaleŋ choo wo niŋ. Nduyɛ, mbo chii wɔsilaŋ la tiɔɔŋ o masaleŋ choo Isɔluɛi. 52 Mbo hiau lachi a sɔɔŋ wɔɔŋndoŋ tosaa Chɛhowa o hɔl, nduyɛ mbo tual nɛi finya ndɔ+ a kala ndɔ+ wo kɔɔli, a nɛi Chɛlobowam po Nebati wo, o tosa mi Isɔluɛi tosa hakioo wo.+ 53 O wa Baal tundɔŋndo o labɛŋguniŋ le ndu sooluuwo,+ nduyɛ mbo hiau lachi a Chɛhowa, Mɛlɛka Isɔluɛiya+ kɔllo tɛɛmbuuwo, mɛɛ finya ndɔ tosa yɛ.