Koloniko Diiŋ Ndɔɔ
10 Mi Luihobowam kua Siɛkɛm,+ kanifuule mi Isɔluɛiya kpou chuuŋgiaŋ loŋ le ma siiŋguu ndu masaa.+ 2 Dimioo nuaa mi Chɛlobowam+ po Nebati wo tuɛi a ndi okɔɔ, mbo malnuŋ naa o wa Ichipi wa mbo miiŋgu. (A teleŋ koŋ, o wa wɔ Ichipi, kanifuule mbo nyaanuŋ Masaa Sɔlɔmɔŋ, mbo kɔ chalnuŋ loŋ.)+ 3 Okoŋ, mi waŋnda yooŋgu le Chɛlobowam. Mi ndu a waŋnda Isɔluɛi kpou kua naa Luihobowam chua ma dimul ndu aa: 4 “Finya num siiluu naa bɔɔ wolɔɔla lusulɛilaŋ.+ Kɛ te num tosa pɛ sɔɔŋ bɛɛŋ bɛɛŋ le naa, nduyɛ ma tosa wolɔɔla lusulɛila o siiluu naa laŋ fefele, ŋ cho wa buɛiyaa numnda.”
5 Le hei mbo dimul nda aa: “La kɔ. Te palɛi i yaa hiou pɛ, la miiŋgu naa ya chua.” Okoŋ, mi waŋnda kuaŋnuŋ.+ 6 Mi Masaa Luihobowam koma naŋgu a bɛnduaa yuuwaa* tosa wallo a Sɔlɔmɔŋ finya ndɔ wa teleŋ o wa yoomu wo. Mbo nyuna nda aa: “La kindi wɔ ya kɔl. Vɛɛ ya mulul lɛ waŋnda haa?” 7 Ma mulul ndu aa: “Te a wa pɛ wana kɛndɛ naa waŋnda haa chua, ma tosa nyɛ nda dimul num ndo nduyɛ ma mulul nda nyɛkɛndɛi, a cho wa buɛiyaa numnda le teleŋ o teleŋ.”
8 Kɛ mbo kɛɛ sila bɛnduaa yuuwa* ke ndu wo, okoŋ mbo kɔ naŋgu a chuaa piaanduaa nda sul latulu, ma wa buɛiyaa nduaa wa.+ 9 Mbo dimul nda aa: “La kindi wɔ ya kɔl. Vɛɛ naŋ nɔ yɛ miŋ mulul wanaa dimul la haa aa, ‘Tosa wolɔɔla lusulɛila finya num siiluu naa laŋ fefele’ wa?” 10 Mi puaa feleŋguaa nda sul latulu wa dimul ndu aa: “Nyɛ ŋ nɔ ma dimul wanaa dimul num haa aa, ‘Finya num siiluu naa bɔɔ wolɔɔla lusulɛilaŋ, kɛ num tosa mi la wa fefele le naa’ wo cho hoo ni, ‘Suei nii pɔmbuɛi hiau niŋ chelul a chaaŋaa finya nuu. 11 Wolɔɔla lusulɛila ya cho nya siiluu laŋ la cho hiouwɔɔ a la finya nuu siiluu nya laŋ. A kpatoole yɔŋaaleŋ finya nuu ndoo kuaŋ nya ni. Kɛ ya, I cho nya wa koŋɔɔ a kpatoole nɔ chiliŋuŋ sɛɛmbiaŋ ndeŋ.’”
12 Mi Chɛlobowam nda waŋnda kpou miiŋgu o Luihobowam ndo o paale yaa ndɔ leŋ choo. Kanifuule, mi masaa ndoo dimul nda aa: “La miiŋgu naa ya chua o paale yaa ndɔ leŋ choo.”+ 13 Kɛ mi Masaa Luihobowam kɛɛ sila bɛnduaa yuuwa* ke ndu wo, okoŋ mbo mulul nda a kaka. 14 Mbo tual sila chuaa piaanduaa ke ndu wo kɔɔli, mbo dimul waŋnda aa: “Wolɔɔla lusulɛila ya cho nya siiluu laŋ la cho hiouwɔɔ a la finya nuu siiluu nya laŋ. A kpatoole yɔŋaaleŋ finya nuu ndoo kuaŋ nya ni. Kɛ ya, I cho nya wa koŋɔɔ a kpatoole nɔ chiliŋuŋ sɛɛmbiaŋ ndeŋ.” 15 Mi masaa kɛɛ le waŋnda nilaŋ yaŋɔɔ, kanifuule Mɛlɛka tonyaa tosa ni mi sɔɔŋ kua o nɛi koŋ choo,+ le halikpeŋ mi nyɛ Chɛhowa dimul Ahicha+ Silɔnaitiinɔɔ a Chɛlobowam, po Nebati wo okɔɔ wo peeluŋ.
16 Mɛɛ Isɔluɛiya kpou che maa masaa kɛɛ le nda nilaŋ yaŋɔɔ, ma dimul ndu aa: “Tɔnɔ yɛɛ naŋ nɔ yɛ o Deeve niŋ? Nyɛm kɛŋ po Chɛɛse woŋ cho nyɛm kɛŋ naa le. Waŋnda Isɔluɛi, wana o wana muliŋ o mɛlɛkaa nduaa lo. Lelaŋ nya yuŋgu Deeve wo, la koma chal a chiɛi nyaa!”+ Okoŋ, mi Isɔluɛiya kpou miiŋguŋ o la nda lo.*+
17 Kɛ Isɔluɛiyaa wa o chiooŋ Chuda niŋnda, mi Luihobowam hiau lachi a nda waa choo masa.+
18 Okoŋ kɔɔli, mi Masaa Luihobowam viam Hadoluam+ wana wa wanaa ndaa hɛli le wali lechiɔɔ tosaa wa bolleŋ ndo. Kɛ mi Isɔluɛiya vii vii ndu mbo wu. Mi Masaa Luihobowam lo kindi kindiŋndo mbo hel o nyɛ ndɔ nyaanaŋ suaa naŋndo choo mbo nyaanuŋ Chulusalɛm.+ 19 Nduyɛ, mi Isɔluɛiya hiau lachi a yuŋgu Deeve wo simullo haaa a paale hauleŋ ndeŋ.