Koloniko Tasoo

26 Wanaa manda diola kpakilaŋ nda cho haa ni a kundala ndalaŋ:+ o pulale Kolua leŋ choo Misiɛlimaya,+ po Koluɛ wo, fulaa o yuŋgu Asafi wo choo. 2 Puaa Misiɛlimaya velu wa cho haa ni: Sɛkalaya po tasoo, Chɛdiya po diiŋ ndɔɔ, Sɛbadaya po yaa ndɔɔ, Chatiniɛɛ po hiɔɔloo, 3 Ɛlam po ŋuɛɛnoo, Chɛhohanaŋ po ŋɔmpum ndo, a Ɛliɛɛho-inai po ŋɔmmɛu wo. 4 Puaa Obɛdi-idɔm velu wa cho haa ni: Siɛmaya po tasoo, Chɛhosabadi po diiŋ ndɔɔ, Chowaa po yaa ndɔɔ, Saka po hiɔɔloo, Nɛtanɛɛ po ŋuɛɛnoo, 5 Amiɛɛ po ŋɔmpum ndo, Isaka po ŋɔmmɛu wo, a Piɔɔlɛtai po ŋɔmaa wo. A puaa haa Mɛlɛka dɔu Obɛdi-idɔm sala ni.

6 Nduyɛ, mi puaa Siɛmaya po ndɔ velu wa simnuŋ masaa o yuŋgu ndaa niŋ. Kanifuule ndaa nɔ kpaayaa, nduyɛ ndaa nɔ taasioo tau. 7 Puaa Siɛmaya velu wa cho haa ni: Otini, Luefahɛɛ, Obɛdi, a Ɛlisabadi. Nduyɛ, Ɛlisabadi puaapiliaa nduaa haa, Ɛlihu nda Sɛmachiya bɛɛ, ndaa nɔ taasioo tau. 8 Nda kpou, puaa Obɛdi-idɔm nda nda wa ni. Nduyɛ a wa ŋwaŋ 62. Nda ni, puaa ndaa ni, a wanayaŋ ndaŋ, a wa wanaa taasi nduyɛ ndaa suliŋ le wallo tosaa. 9 Misiɛlimaya+ ndoo nɔ puaa a wanayaŋ o yuŋgu ndɔɔ niŋ. Kpou kpou a wa ŋwaŋ 18, nduyɛ ndaa nɔ taasioo. 10 Hoosa fulaa o yuŋgu Meluali wo choo bɛɛ ndoo nɔ puaa. Similua wa nda bolleŋ ni. Mi che bɛɛ o cho ndu le wa po tasoo le, kɛ mi finya ndɔ hɛli ndu le mbo wa yuŋgu lebollo. 11 Hilikaya wa wana diiŋ ndɔɔ ni, Tɛbaliya wana yaa ndɔɔ, a Sɛkalaya wana hiɔɔloo. Puaa Hoosa wa a wanayaŋ ndɔŋ kpou a wa 13.

12 O wanaa ndaa manda haa diola kpakilaŋ nda tɛɛŋ, wanaa wa nda bolleŋ nda bɛɛ, ndaa nɔ wallo le tosaa o chiɛi Chɛhowa wo maa wanayaŋ ndaŋ. 13 Okoŋ ma wuu kooŋ.+ Nduyɛ feleŋgɔnɔ ni, kaasoŋnɔ ni, ma piɔu nda a bolii ndɛi layuŋguei le diola kpakila yɛ yɛlaŋ mandaa. 14 Mɛɛ nda wuu kooŋ, mi kuei cho le dioo ba paaleŋ le chaŋ ndo ve del le Siɛlɛmaya, nduyɛ mi kuei cho le dio kpakioo ba luaŋ ndo ve del le Sɛkalaya po ndɔ. Sɛkalaya yɛ, wana ndoo nɔ taasioo le silaa yɔŋgoo wo o wa ni. 15 Mi Obɛdi-idɔm sɔla wallo o ndɔɔ o dio kpakioo ba tou wo. Nduyɛ, ma ke puaa nduaa+ wallo le chiɛila ndaa kɛsi nyɔɔŋ ndaŋ mandaa. 16 Mi Supim nda Hoosa+ sɔla walta ndalaŋ o Dio Kpakioo Sialuɛchɛti ikɛi ba paaleŋ le del lo, o nɛi bɛndoo holnɔŋndo. Nduyɛ kundalaŋ ndaŋ la waŋnaŋ ikɛi vellaa velle. 17 Livaiya a ŋɔmpum wa ba paaleŋ le chaŋ ndo ni. Lepaa o lepaa ba luaŋ ndo a hiɔɔlu, ba tou wo a hiɔɔlu. Nduyɛ, wanaa ndaa manda chiɛila ndaa kɛsi nyɔɔŋ leniŋ ndaŋ,+ a ŋiɔɔŋ ŋiɔɔŋ wa loŋ ni. 18 Wanaa hiɔɔlu wa o nɛi bɛndoo o toŋgo vilɛiyo ba paaleŋ le del lo ni,+ nduyɛ wanaa ŋiɔɔŋ wa o toŋgo vilɛiyo ni. 19 Mɛɛ nuaa wanaa fula o pulale Kolua leŋ choo wa, a wanaa fula o pulale Meluali leŋ choo wa, a wa a piɔuwaa a kundalaŋ le diola kpakilaŋ mandaa ni.

20 Ahicha nda hɛli o Livaiya tɛɛŋ ni, le waa fondaŋ nda kɛsi nyɛm baa kalaŋ o chiɛi Mɛlɛka tonyaa niŋndo a fondaŋ nda kɛsi nyɛm diandaŋ ndo mandaa ni.+ 21 O puaa Ledaŋ nda tɛɛŋ, ma hɛli Chɛhalaya o wa yuŋgu lebollo o pilɛ le yuŋgu Ledaŋ ndo wo. Ledaŋ yɛ, o yuŋgu Kɛɛsiɔŋ ndo choo o fula ni.+ 22 O puaa Chɛhalaya wa tɛɛŋ, ma hɛli Sɛtam nda Chowɛɛ pɔmbɔ ndɔ. Nda wa fondaŋ nda kɛsi nyɛm baa kalaŋ o chiɛi Chɛhowa wo niŋndo mandaa ni.+ 23 O pulale Amiluam, Isihaa, Hɛbulɔŋ a Yuusiɛɛ leŋ choo,+ 24 ma hɛli Siɛbuɛɛ, po Kɛɛsiɔm ndo. Ndu wa chiɛila ndaa kɛsi nyɔɔŋ ndaŋ bolleŋ ni. Kɛɛsiɔm yɛ, Muuse velu ndu ni. 25 O wanayaŋ ndɔŋ fula o pulale Ɛliɛɛsa+ leŋ choo woŋ tɛɛŋ, ma hɛli Luɛhabiya,+ Chɛseya, Choluam, Sikili, a Siɛlomoti. 26 Siɛlomoti wo hoo nda wanayaŋ ndɔŋ wa nyɛsɔlaa wa le nyɛm diandaŋ ndo kpou hɔlteŋ ni.+ Nyɛm diandaŋ muŋ Masaa Deeve,+ bolii layuŋguei,+ wanaa wa waŋnda waapilɛ choo masa wa, a wa waŋnda kɛmɛ choo masa wa, a masaa puaa chɔuwa yɔŋgu ni. 27 Nyɛm nda sɔla o chɔuwo woŋ+ nda chua ŋ tiŋ ni,+ ma yɔŋgu muŋ maa sala diandaa le wallo tosaa o chiɛi Chɛhowa wo niŋ. 28 Nduyɛ, nyɛ o nyɛ Saamiɛɛ wana cha wo,+ Sɔɔ po Kisi wo, Abina+ po Nɛɛ wo, a Chowaabi+ po Sɛluiya wo+ ndaa yɔŋgu maa sala diandaa, ma yɔŋgu le wallo o chiɛi Mɛlɛkaa niŋ. Nyɛ o nyɛ nda yɔŋgu maa sala diandaa, Siɛlomiti nda wanayaŋ ndɔŋ wa muŋ hɔlteŋ ni.

29 O pulale Isihaa leŋ choo,+ ma hɛli Chɛnaniya nda puaa nduaa, ma siiŋguu nda waŋ banaa a wanaa kialaa ŋyamaa+ le Isɔluɛiya.

30 O pulale Hɛbulɔŋ ndeŋ choo,+ ma hɛli Hasiabaya nda wanayaŋ ndɔŋ. Kpou kpou, puaa 1,700 ndaa suliŋ ni le wali lemasaa tosaa, le Isɔluɛiyaa wa o tanda Chɔɔdaŋ ndo niŋ ba paaleŋ le del lo wa. Wali kɛ kɛ wa le Chɛhowa a le masaa, nda wa ndu tosaa ni. 31 Chɛluicha+ wa bolleŋ ni le wanaa fula o yuŋgu Hɛbulɔŋ ndo choo wa. O wɔsila 40 Deeve wa o masaleŋ choo laŋ niŋ+ nda mɛɛndiaŋ o yuŋgu Hɛbulɔŋ ndo niŋ ni, ma saaluŋ puaa dialuŋ kalaa a puaa suliŋ haa wa. Nduyɛ, Chasɛɛ+ nda wa ni o Kiliaadi niŋ. 32 O wanayaŋ ndɔŋ tɛɛŋ, puaa ndaa suliŋ ma wa yuŋgula leboltaŋ nda, a wa kpou kpou 2,700. Okoŋ, mi Masaa Deeve handu nda yuŋgu Lubɛŋ ndo, yuŋgu Kaadi wo, a yuŋgu Manaasɛ wo tɛndaa tɛɛŋ chilaŋ, le nyɛ o nyɛ wa a Mɛlɛka tonyaa okɔɔ vɛlɛ a masaa.