Koloniko Tasoo

23 Teleŋ Deeve wa o yuwɛi mbo wa niŋ o yoomu ndɔɔ mɛɛlulaŋ ndo, mbo siiŋguu Sɔlɔmɔŋ po ndɔ masaa Isɔluɛi.+ 2 Okoŋ kɔɔli, mbo chuuŋgiaa waŋ banaa, wanaa soliaa lasalaa,+ a Livaiya kpou o Isɔluɛi niŋ naapilɛ.+ 3 Livaiyaa wa wɔsilaŋ chɔŋ 30 kɔ kɛ wa, ma chɔm nda kpou.+ A wa kpou kpou 38,000. 4 O nda tɛɛŋ, waŋnda 24,000 wa wali wa tosaŋndo le chiɛi Chɛhowa wo taŋgullo wo hɔlteŋ ni. Waŋ banaa a wanaa kialaa ŋyamaa wa 6,000,+ 5 wanaa ndaa manda diola kpakilaŋ nda 4,000,+ a wanaa wa Chɛhowa saŋgalaa a nyɛm chaaŋ nda 4,000.+ Nduyɛ, a nyɛm chaaŋ muŋ okɔɔ Deeve dimi ni aa: “Le Mɛlɛka saŋgalaa ya toosiaa muŋ ni.”

6 Okoŋ mi Deeve piɔu nda a kundalaŋ kpɛ kpɛ+ mɛɛ nda fula o pulale puaa Livai ya choo yɛ: Kɛɛsiɔŋ, Kohati, a Meluali.+ 7 Puaa Kɛɛsiɔŋ nda velu wa cho haa ni: Ledaŋ nda Simɛi. 8 Puaa a yaa Ledaŋ ndoo velu ni. Nda cho haa ni: Chɛhayɛɛ, Sɛtam, a Chowɛɛ.+ Nduyɛ, Chɛhayɛɛ wa wana lebollo ni. 9 Puaa a yaa Simɛi ndoo velu ni. Nda cho haa ni: Siɛlomoti, Hasiɛɛ, a Haluaŋ. Nduyɛ, puaa haa wa yuŋgula leboltaŋ o pulale Ledaŋ ndeŋ choo ni. 10 Puaa a hiɔɔlu Simɛi ndoo velu ni. Nda cho haa ni: Chahati, Sina, Chɛhusi, a Bɛluaya. 11 Chahati wa nda bolleŋ ni, nduyɛ Saisaa wa wana diiŋ ndɔɔ ni. Kɛ Chɛhusi nda Bɛluaya ndaa vilu chuauwaa bɔɔ le. Le hei, ma chua nda maa yuŋgu lebollo o pilɛ, nduyɛ wali pilɔɔ nda wa tosaa ni.

12 Puaa a hiɔɔlu Kohati ndoo velu ni. Nda cho haa ni: Amiluam, Isihaa,+ Hɛbulɔŋ, a Yuusiɛɛ.+ 13 Amiluam velu Elɔŋ+ nda Muuse ni.+ Kɛ Elɔŋ nda puaa nduaa wa a hɛliaŋ+ le wallo tosaa o fondaŋ hiou diondɔɔ wo, le salalaŋ solioo Chɛhowa lachi, le wallo tosaa le ndu, a le waŋnda salaa dɔwɔɔ o diola ndɔlaŋ niŋ teleŋ o teleŋ.+ 14 Kɛ Muuse, buɛi Mɛlɛka tonyaa puaa ndoo velu wa, ma chɔm nda o pulale kaale Livai leŋ choo. 15 Muuse velu Kɛɛsiɔm+ nda Ɛliɛɛsa ni.+ 16 O puaa Kɛɛsiɔm velu wa tɛɛŋ, Siɛbuɛɛ+ wa bolleŋ ni. 17 O puaa Ɛliɛɛsa velu wa tɛɛŋ, Luɛhabiya+ wa bolleŋ ni. Ɛliɛɛsa ndu vilu lɛ puaa cheleŋ te. Kɛ mi Luɛhabiya vialu puaa tau tau. 18 O puaa Isihaa+ velu wa tɛɛŋ, Siɛlomiti+ wa bolleŋ ni. 19 O puaa Hɛbulɔŋ velu wa tɛɛŋ, Chɛluiya wa bolleŋ ni, Amaluiya wa o diiŋ ndɔɔ ni, Chahasiɛɛ wa o yaa ndɔɔ ni, nduyɛ Chɛkamiam+ wa o hiɔɔloo ni. 20 O puaa Yuusiɛɛ+ velu wa tɛɛŋ, Maika wa bolleŋ ni, nduyɛ Isiaaya wa o diiŋ ndɔɔ ni.

21 Meluali velu Maali nda Musai ni.+ Maali velu Ɛlieesa nda Kisi ni. 22 Mi Ɛlieesa wu kɛ o vilu wana pɔnɔ le. Waŋ laanduaa kinɛi ndoo velu ni. Le hei, mi puaa Kisi pɔmbɔ ndɔ velu wa chua waŋ laanduaa kaŋ o nɔɔ niŋ. 23 Puaa a yaa Musai velu ni. Nda cho haa ni: Maali, Ɛda, a Chɛluimoti.

24 Puaa Livai ya wa haa ni a bolii ndɛi layuŋguei vɛlɛ a yuŋgula nda fula choo laŋ. Ma poonyiaa nda diolaŋ kpɛ kpɛ o lepula, a wa chɔŋ wɔsilaŋ 20 kɔ kɛ, nduyɛ ma wa wallo tosaa o chiɛi Chɛhowa wo wa. 25 Kanifuule mi Deeve ndoo dimi aa: “Chɛhowa, Mɛlɛka Isɔluɛiya tosa mi wanaa nduaa luɛi o pɛŋgioo niŋ.+ Nduyɛ Chulusalɛm o cho wa ichali ni le fɛɛŋ a fɛɛŋ.+ 26 Livaiya nɔ lɛ ma wa kelaa a tɛndiiyo ɔɔ nyɛm ndɔŋ waliŋ nda soliŋ kpeku le wallo woŋ te.”+ 27 A mɛɛ Deeve ndoo mɛɛlu nɛila chɔmaalaŋ yɔŋgu yɛ, ma poonyiaa Livaiya diolaŋ chɔŋ wɔsilaŋ 20 kɔ kɛ. 28 Wali ndaa wa le puaa Elɔŋ+ nda malaa wallo tosaa o chiɛi Chɛhowa wo ni.+ Nduyɛ nda wa luŋ tɛndiiyo hɔlteŋ ni, fondaŋnda diaa nyɛdiaa laŋ, nyɛm wa ŋ diandaa woŋ kpou dindioo a mɛɛ naamoo wa yɛ, vɛlɛ a wali kɛ kɛ ndoo yeemaŋ le chiɛi Mɛlɛka tonyaa. 29 Mi ndaa mala le beedii wa o hɛɛndaa wo*+ toosiaa, kpeyaŋ kɛndɛ kɛndɔɔ le sala ŋkullo, beedii fɛɛdɛɛ nɔ yiisii leniŋ te wo,+ kato nda toosiaa o kpɛɛnɛi tɛsɛi niŋndo, kpeyaŋndo lindaa,+ a nyɔɔŋ tuuwo le sinaa mɛɛ ŋ cho yɛ. 30 Idii a ichɔl,+ mi ndaa sim le Chɛhowa balikaa mello a ndu saŋgalaa.+ 31 Teleŋ o teleŋ nda wa pɛ salala luamaa laŋ solioo o Chɛhowa lo o palɛi pɛŋgiɛi choo,+ bɔŋaŋnda paŋguŋ sɛnɛilaŋ,+ a bɔŋaŋnda yɛ yɛlaŋ o wɔsioo niŋ,+ mi ndaa sɔɔŋguu le malaa a mɛɛ kɛɛsiaa wa le ndi tosaa yɛ. Nduyɛ, mi ndaa tosa ndi teleŋ o teleŋ Chɛhowa o hɔl. 32 Mi ndaa tosa vɛlɛ walta ndalaŋ o tɛndii bɔŋaŋndo a o fondaŋ diandaa. Nduyɛ, mi ndaa mala puaa Elɔŋ nda le walta ndalaŋ tosaa o chiɛi Chɛhowa wo.