Koloniko Diiŋ Ndɔɔ

5 Okoŋ, mi Sɔlɔmɔŋ chii wali o wali ndoo nɔ le tosaa o chiɛi Chɛhowa wo.+ Mbo luei nyɛm Deeve finya ndɔ ndoo dindi woŋ o chiɛiyo hoo niŋ.+ Mbo luei vɛlɛ kaniŋ humboŋ, kooliiyoŋ, vɛlɛ a nyɛ o nyɛ o fondaŋ nda kɛsi nyɛm baa kalaŋ o chiɛi Mɛlɛka tonyaa niŋndo.+ 2 A teleŋ koŋ, mi Sɔlɔmɔŋ chuuŋgiaa waŋ banaa kpou o Isɔluɛi niŋ. Nda cho ni, wanaa wa kaalaŋ bolle wa, vɛlɛ a wanaa wa yuŋgula leboltaŋ o Isɔluɛi niŋnda kpou. Ma kua Chulusalɛm le ma kɔ chua kɔfu kpema Chɛhowa wo o Chiee Deeve Wo,+ koŋ cho ni, Saayɔŋ.+ 3 Mi puaa o Isɔluɛi niŋ kpou chuuŋgiaŋ masaa lachi o bɔŋaŋ* nda bii o paŋgii ŋɔmmɛu ve choo wo.+

4 Okoŋ, mi waŋ banaa o Isɔluɛi niŋ kpou huŋ, nduyɛ mi Livaiya chua Kɔfoo.+ 5 Ma kua a Kɔfoo, tɛndii bɔŋaŋndo,+ vɛlɛ a nyɛm diandaŋ wa leniŋ ndoŋ kpou. Wanaa soliaa lasalaa a Livaiya kuɛ a nyɔɔŋ muŋ ni. 6 Mi Masaa Sɔlɔmɔŋ a Isɔluɛiyaa wa a chuuŋgiaŋ loŋ nda kpou sim Kɔfoo lachi. Ma soli saa a nauwa salaa tau,+ wanaa nɔla ma chɔm nda le. 7 Okoŋ mi wanaa soliaa lasalaa kua a kɔfu kpema Chɛhowa wo o fondaŋ ndɔɔ o lumui cho leniŋ di wo, koŋ cho ni, Fondaŋ Hiou Diondɔɔ Wo. Ma kɔ kɛsi ndu o kumbaŋnda chɛlɔbiiya bɛŋgu.+ 8 Kumbaŋnda chɛlɔbiiya la wa la pɛɛŋgaa o fondaŋ Kɔfoo wa wo, le mi chɛlɔbiiya kumbu Kɔfoo a yɔmii nda kua a ndu ve.+ 9 Yɔmii nda kua a ndu ve wa i vilɛi vilɛi. Wanaa lo o Fondaŋ Diandaa ma che ndi bolle o lumui wa leniŋ di wo niŋ. Kɛ wanaa lo o bɛɛ ma che ndi le. Nduyɛ i cho wɔ loŋ haaa a paale hauleŋ ndeŋ. 10 Nyɛ o nyɛ ve o Kɔfoo niŋ te, mɛɛ pouta yɛndɛla tiɔɔŋnda Muuse kɛsi leniŋ o Holuɛɛbi laŋ.+ A teleŋ koŋ Chɛhowa yii kpemaa+ a waŋnda Isɔluɛi ni, mɛɛ nda wa fulaa Ichipi.+

11 Mi wanaa soliaa lasalaa chaŋ o fondaŋ diandaa ma fula. (Kanifuule wanaa soliaa lasalaa wa o fondaŋ koŋ nda kpou, mi che bɛɛ a wa o kundala yɛ yɛlaŋ niŋ,+ kɛ ndaa dindi niŋ ndapila.)+ 12 Mi Livaiyaa soli chondoŋ nda kpou,+ a wa o kunda Asafi,+ Hamaŋ,+ a Chɛdutɔŋ,+ puaa ndaa vɛlɛ a kundala puaapiliaa ndaa kpou wa wounuŋ nyɛla nda toosiaa a fuŋnde kɛndɛ kɛndɛleŋ ndaŋ. Nduyɛ ma bii kumbula ŋchiliŋndaŋ, nyɛm chaaŋ iyooŋ, vɛlɛ a towalaŋ. A wa isisi o bandu luamaa lasalaa ba paaleŋ le chaŋ ndo, nduyɛ wanaa soliaa lasalaa 120 wa bululaŋ hɔŋndo.+ 13 Mɛɛ wanaa wa bululaŋ hɔŋndo wa a wanaa wa chondoŋ solioo wa wa Chɛhowa balikaa mello diompilɛ, nduyɛ mi kumbula ŋchiliŋndaŋ a nyɛm chaaŋ cheleŋndoŋ wa diomndo helɔɔ le Chɛhowa saŋgalaa, “kanifuule o cho wana kɛndɛ, nduyɛ kaala lo lechoo ndɔɔ cho le fɛɛŋ a fɛɛŋ,”+ mi yumbu yumboo kumbu chiɛi Chɛhowa wo kpu.+ 14 Wanaa soliaa lasalaa ndaa tiuba ma tosa wallo le, kanifuule mi paŋgele Chɛhowa wo tiu silɔ o chiɛi Mɛlɛka tonyaa niŋ.+