Koloniko Diiŋ Ndɔɔ

1 Mi Sɔlɔmɔŋ, po Deeve wo hiau lachi a kpaayaa sɔlaa o masale ndɔleŋ niŋ, nduyɛ Chɛhowa Mɛlɛka ndɔɔ wa a ndu latulu. Mbo tosa mi Sɔlɔmɔŋ fula tɔɔ tau tau.+

2 Mi Sɔlɔmɔŋ yooŋgu le waŋnda Isɔluɛi kpou. Wanaa wa waŋnda waapilɛ a wanaa wa waŋnda kɛmɛ bolleŋ nda, wanaa kialaa ŋyamaa, vɛlɛ a yuŋgula leboltaŋ o Isɔluɛi niŋ kpou. 3 Okoŋ, mi Sɔlɔmɔŋ a Isɔluɛiya kpou kua o fondaŋ filioŋndo Kibiɔŋ,+ kanifuule loŋ tɛndii bɔŋaŋ Mɛlɛka tonyaa wa ni, o Muuse buɛi Chɛhowa wo toosiaa o pollo niŋndo. 4 Kɛ Deeve ndoo chua niŋ Kɔfu Mɛlɛka tonyaa Kiliaati-chiaaluim,+ mbo kua a ndu Chulusalɛm naa o toosiaa tɛndiiyo le ndu wa.+ 5 Nduyɛ ma kɛsi vɛlɛ bandu luamaa lasala chiliŋii siaŋaa,*+ o Bɛsalɛɛ+ po Yului yo toosiaa o tɛndii Chɛhowa wo lachi wo. Yului yɛ, Hɔɔ velu ndu ni. Loŋ Sɔlɔmɔŋ a Isɔluɛiya kpou ndaa kua le Mɛlɛka piɛiyo ni. 6 Nduyɛ, mi Sɔlɔmɔŋ soli chɔluaa 1,000 salala luamaa laŋ Chɛhowa lachi, o bandu luamaa lasala koŋ choo,+ o tɛndii bɔŋaŋndo.

7 Ichɔl koŋ, mi Mɛlɛka chɔɔmuŋ Sɔlɔmɔŋ, mbo dimul ndu aa: “Dimul la nyɛ ŋ yeema mi ke num ndo.”+ 8 Okoŋ mi Sɔlɔmɔŋ dimul Mɛlɛka aa: “A chɔm niŋ Deeve finya ni kaala lo lechoo num bɛndoo,+ okoŋ ma siiŋguu ya masaa o foofo ndɔɔ.+ 9 Lelaŋ Oo Chɛhowa Mɛlɛka, maa buŋgɛi ŋ chuel Deeve finya ni ve peeluŋ fɔ!+ Kanifuule, wanaa ŋ hɛli ya le mi wa nda choo masa wa, a cho faŋga bɛndu bɛndoo maa chundu cho o lɛŋndeŋ choo wo.+ 10 Ke ya taasioo a kɔl kaloo+ le mi sim waŋnda haa lachi.* Kanifuule, o nɛɛnɛ kpeekpei nɔla yɛ mbo dimi wanaa num aa faŋga bɛnduaa haa sɔɔŋ tɛɛŋ?”+

11 Okoŋ mi Mɛlɛka dimul Sɔlɔmɔŋ aa: “A nyuna ya le nyɛm kɛ, sullo, le ma fula tɔɔ, le piɔm wanaa tul num leyɛ wa, ɔɔ le yoomu vilɛi le, kɛ ma nyuna le taasioo a kɔl kaloo le wanaa ya handu num haa masa choo wa sɔɔŋ dimioo tɛɛŋ.+ Le mɛɛ hei cho yeemɛi numnde yɛ, 12 I cho num taasioo a kɔl kaloo ke, mi ke num vɛlɛ nyɛm kiɔɔŋ, sullo, nduyɛ ma fula tɔɔ mbo hiou masa o masa keeku num lachi, vɛlɛ a masaa cho hunɔɔ o num kɔɔli wa.”+

13 Okoŋ mi Sɔlɔmɔŋ faŋaŋ o fondaŋ filioŋndo Kibiɔŋ,+ o tɛndii bɔŋaŋndo hɔlndɔ, mbo miiŋgu Chulusalɛm. Nduyɛ, mbo kandu masaleŋ Isɔluɛi. 14 Mi Sɔlɔmɔŋ hiau lachi a nyɛm nyaanaŋ suaa naŋndoŋ deŋgelaa vɛlɛ a suaa.* Ndoo nɔ nyɛm nyaanaŋ suaa naŋndoŋ 1,400, a suaa* 12,000.+ Mbo kɛsi nyɛm nyaanaŋndoŋ muŋ ŋ tiŋ o chieeŋ o taŋgul le muŋ ndoŋ,+ mbo kɛsi ŋ tiŋ ndupila ikɛi Chulusalɛm.+ 15 Mi masaa tosa mi kaniŋ humboŋ a kooliiyoŋ hɔba Chulusalɛm mɛɛ poutaŋ la wa nuaa yɛ.+ Nduyɛ yɔmii sida ve bɛɛ, i waŋnuŋ i hɔbɛi maa yɔmii sikamɔɔ ve o tanda Siɛfila wo niŋ.+ 16 Suaa Masaa Sɔlɔmɔŋ ndoo nɔ wa, Ichipi ndaa kua nda chuaa ni ma huŋ a nda.+ Nduyɛ, yulaa nduaa ndaa kua nda piondɔɔ loŋ ni a kundalaŋ* mɛɛ baa wa yɛ.+ 17 Nyɛm nyaanaŋ suaa naŋndoŋ, ŋ nda pendu Ichipi woŋ, o pilɛ baa ndɔɔ wa le kaniŋ humboŋ 600. Nduyɛ soo o pilɛ, baa ndɔɔ wa kaniŋ humboŋ 150. Okoŋ kɔɔli, mi ndaa kuɛ a nyɔɔŋ muŋ vɛlɛ a suaa haa o masaa Hitaitiiya, a o masaa wa Siiliaa wa lo.