Ɛsita
6 Ichɔl koŋ, masaa nɔla mbo lɔl te.* Lelaŋ, mbo viam waŋnda le ma chuu ndu yau konala paandulaŋ la wa leniŋ ndo.+ Ma veelul masaa diomndaŋ leniŋ. 2 O yau koŋ niŋ, ma saaluŋ konaa a mɛɛ Mɔdikai chɔɔmuu Bikitaŋ nda Tɛluɛsi, puaa ŋiɔɔŋaa wa wallo o chiɛi lemasaa niŋ mi ndaa manda diola kpaki laŋ nda, a mɛɛ ndaa yii Masaa Ahasilɔɔ dumbu* le ndu diyɔɔ* yɛ.+ 3 Mi masaa nyuna aa: “Yɛɛnɛ nyaa tosa yɛ le Mɔdikai bɛɛleŋ kioo?” Mi buɛiyaa wa masaa ikɛi kpɛɛluŋnda mulul ndu aa: “Nyɛ nyɛ bɛɛ tosaŋ le ndu le.”
4 Okoŋ kɔɔli, mi masaa nyuna aa: “Nɛɛnɛ cho yɛ koŋ isisi o luŋ chiɛi lemasaa?”+ Hemaŋ ndoo luɛi ko sɛnɛi o luŋ chiɛi lemasaa le suukaŋndo a masaa le Mɔdikai landɔɔ o yɔm o simi wo.+ 5 Mi buɛiyaa masaa mulul ndu aa: “Hemaŋ+ cho koŋ isisi o luŋ chiɛi lemasaa ni.” Mi masaa dimi aa: “La veelu ndu mbo luɛi.”
6 Mɛɛ Hemaŋ luɛi, mi masaa nyuna ndu aa: “Yɛɛ ŋ yiyaŋ yɛ maa o bɛnda mi masaa tosa le wana o yeema mbo ke bɛɛleŋ ndo?” Mi Hemaŋ dimi o kɔl niŋ aa: “Mi nɛɛnɛ kpeekpei masaa yeema yɛ mbo ke bɛɛleŋ o ya kɔɔli?”+ 7 Okoŋ mi Hemaŋ dimul masaa aa: “Wana masaa yeema koŋ mbo ke bɛɛleŋ ndo, 8 a huŋ a nyɛla lemasalaŋ,+ so masaa kela choo wo, vɛlɛ a mɔsil lemasaa. 9 Okoŋ ma chua nyɛlaŋ ndaŋ a soo hoo, ma ke masaa laŋgbaa nduaa kalla o pilɛ, nduyɛ ma wou wana masaa yeema koŋ bɛɛleŋ kioo wo nyɛlaŋ ndaŋ, ma heelu ndu o soo choo, okoŋ ma balu a ndu o chioo niŋ kpou. Te a wa kɔlaŋ pɛ, a wa ndu yondaa lachi aa: ‘Nyɛ nda nɔ le tosaa le wana masaa yeema mbo ke bɛɛleŋ ndo cho hoo ni.’”+ 10 O lepilɛ niŋ kpe, mi masaa dimul Hemaŋ aa: “Chua nyɛlaŋ chɔ chɔ a soo, ma kɔ tosa nyɛ ŋ dimi hoo wo le Mɔdikai, Chuunɔ cho ichali o dio kpaki masaa wo! Nyɛm ŋ dimi muŋ ndoŋ, o pilɛ bɛɛ mɛi ndu kɔɔli le.”
11 Okoŋ mi Hemaŋ chua nyɛlaŋ ndaŋ mbo wou Mɔdikai,+ nduyɛ mbo heelu ndu o soo choo, mbo balu a ndu o chioo niŋ kpou. O wa kɔlaŋ a ndu yondaa lachi aa: “Nyɛ nda nɔ le tosaa le wana masaa yeema mbo ke bɛɛleŋ ndo cho hoo ni!” 12 Okoŋ kɔɔli, mi Mɔdikai miiŋgu o dio kpaki masaa. Kɛ mi Hemaŋ ndu keleŋa miiŋgu chɔ chɔ o ndu lo bɛɛ o kɔl tambɛi bɛndoo niŋ a bolleŋ le kumbaa. 13 Mɛɛ Hemaŋ kɔ dimul chaaŋaa nduaa a Sɛluɛsi laa ndɔ+ nyɛ o nyɛ yɔŋnuŋ ndu, mi laŋgbaa nduaa kɔl kaluaa a laa ndɔ dimul ndu aa: “Kpaayaa Mɔdikai kandu num poondaa o ba nuaa ni. Nduyɛ te o pulale Chuuwa* choo o fula ni, a tiu ndu niŋ ba le. Kɛ ndu kpeekpei cho num yomɔɔ ni.”
14 A lo suukaŋndo nda ndaa, mi puaa tosa wallo o chiɛi lemasaa wa huŋ Hemaŋ kɔɔli chɔ chɔ le ma kɔ dio nyɛdiaa Ɛsita bɛɛndiaa wo.+