Saamiɛɛ Diiŋ Ndɔɔ

16 Mɛɛ Deeve chɛŋ o pembei choo mbo tual tiŋ nyɛɛmbɔ,+ ma bɔŋaŋ nda Saiba,+ buɛi Mɛfibosiɛɛ wo.+ Mbo komal ndu a sofɛliaa a ŋiɔɔŋ, nduyɛ sofɛliaa haa wa kɔlaŋ a beediiyo* kpuŋgbaŋ 200, kato nda toosiaa a kilepiima vesɛiyaŋ ndo kpuŋgbaŋ 100, kato nda toosiaa a nyɛm kuamaŋ lewɔɔ woŋ ndo kpuŋgbaŋ 100, a muɛiyaŋ kpɛɛnɛi bɛnduei cha.+ 2 Okoŋ, mi masaa nyuna Saiba aa: “Le yɛɛnɛ ŋ hiŋ yɛ a nyɔɔŋ muŋ?” Mi Saiba muli aa: “Sofɛliaa haa, le mi yuŋgu numndo wa kɔlaŋ lechoo ya hiŋ a nda ni, fallo masaa. Beediiyo hoo a nyɛm kuamaŋ lewɔɔ woŋ muŋ, le mi puaa num aa feleŋguaa de. Nduyɛ muɛiyaŋ maŋ, le mi wanaa cho yɔkpa a kɔlaŋ o pollo niŋnda kol.”+ 3 Mi masaa nyuna ndu aa: “Kuɛɛnɛ ŋ mɛi yɛ po* masanɔ numndo?”+ Okoŋ, mi Saiba mulul masaa aa: “O choŋnuŋ Chulusalɛm, kanifuule o dimi aa, ‘Waŋnda Isɔluɛi cho ya hau masale finya nuu miŋgi o ba pila.’”+ 4 Okoŋ kɔɔli, mi masaa dimul Saiba aa: “Yaŋ ya nilaŋ! Nyɛ o nyɛ Mɛfibosiɛɛ nɔ, num nɔ niŋ ni.”+ Mi Saiba mulul masaa aa: “Masanɔ nuu, buɛi numndo ya cho ni.* Maa hiou lachi a ya chɔɔ wana sɔvɛ fɔ, fallo masaa.”+

5 Mɛɛ Deeve fuuluu Bahuluim, mi po pilɛ fulaa o yuŋgu Sɔɔ wo choo diolaŋ aa Simɛi,+ po Kiluaa wo fulal ndu, mbo wa hunɔɔ a ndu yiou yioulaŋ choo choo kpeleŋ.+ 6 O wa Deeve vɛlɛ a buɛiyaa nduaa kpou vii viiyo a poutaŋ. Wanaa wa kɔlaŋ latulu a Masaa Deeve wa, vɛlɛ a kuubaa kpaayaa bɛnduaa wa o ba ndɔ kɛndɔɔ choo a o ba ndɔ miallo choo wa kpou bɛɛ, o wa nda vii viiyo. 7 Simɛi wa yioulaŋ mbo dimi aa: “Faŋaŋ nanuŋ! Hiou ma kuɛ, num wana diyaa! Wana fondoo ŋ cho ni! 8 Wanaa ŋ diu diu o yuŋgu Sɔɔ wo niŋ ma miiŋgu o masale ndɔleŋ choo wa, Chɛhowa heelu num kooma ndaŋ o lebol. Nduyɛ, Chɛhowa puu num masaleŋ o ba mbo ke Abisalɔŋ po num. Num bɛɛ dɛnɛ palaa tol num choo le mɛɛ ŋ cho wana diyaa yɛ.”+

9 Okoŋ, mi Abisiaa po Sɛluiya wo+ dimul masaa aa: “Le yɛɛnɛ mi tuŋ vilɛiyo hoo+ yei masanɔ nuu?+ A yandii, mal la, mi kɔ kiolu ndu bolleŋ.”+ 10 Kɛ mi masaa dimi aa: “Nya puaa Sɛluiya wa,+ le yɛɛnɛ nya cho yɛ sondoo wouwo o suɛi hei niŋ? La mal ndu o yei,+ kanifuule Chɛhowa dimul ndu ni aa,+ ‘Yei Deeve!’ Lelaŋ, nɛɛnɛ nɔla yɛ mbo kuuna ndu hei tosaa?” 11 Okoŋ, mi Deeve dimul Abisiaa a buɛiyaa nduaa a tuaa kpou aa: “Po ni ya velu kɛsɛ wo cho ya nuuviaa le ya diyɔɔ,+ ɔɔ niŋ wana waa Bɛŋjamiŋ?+ La mal ndu o yei ya, kanifuule Chɛhowa dimul ndu lende ni! 12 Naapum Chɛhowa cho saŋga nuu chɔ,+ nduyɛ mi ndu Chɛhowa tosal la dɛnɛ kɛndɔɔ le yioula ya sɔla hau laŋ.”+ 13 Okoŋ, mi Deeve nda laŋgbaa nduaa hiau lachi a kɔlaŋ. Kɛ Simɛi wa tuŋ kɔlaŋ o pembii wa Deeve waa ikɛiye holnɔŋndo, mbo wa nda yiou yioulaŋ+ a nda vii viiyo, nduyɛ mbo kuandu chundoo mbo wuu nda choo.

14 Mi masaa a wanaa wa kɔlaŋ latulu a ndu wa kpou fuuluu a saŋgɛiya yɔkɔɔ o fondaŋ nda wa kɔlaŋ ndo. Nduyɛ ma pɛŋgi, ma sɔla yoomuaŋ.

15 A teleŋ koŋ, mi Abisalɔŋ a puaa Isɔluɛi kpou bɛɛ fuuluu Chulusalɛm. Nduyɛ, Ahitofɛɛ+ wa latulu a ndu. 16 Mɛɛ Husai+ Akaitiinɔɔ,+ chaaŋ o Deeve luɛi o Abisalɔŋ ndo, mbo dimul Abisalɔŋ aa: “Maa masaa viou naa choo fɔ!+ Maa masaa viou naa choo fɔ!” 17 Okoŋ mi Abisalɔŋ nyuna Husai aa: “Baa kaala lo lechoo wo pa ŋ chɔm hoo chaaŋ num ni? Le yɛɛnɛ a kue chaaŋ num kɔɔli le?” 18 Mi Husai dimul Abisalɔŋ aa: “Sako, wana Chɛhowa, waŋnda haa, a puaa tuaa kpou o Isɔluɛi niŋ hɛli wo, kumbuii nduɛi ya cho ni. Nduyɛ, ndu ya cho lo kɔɔli ni. 19 I chɔɔlu wɔ vɛlɛ dimi, Le nɛɛnɛ ya nɔ yɛ mi wa? Baa o cho le po ndɔɔ le? Mɛɛ ya tosa wallo le finya num yɛ, lende koni ya cho wallo tosa le num ni.”+

20 Okoŋ, mi Abisalɔŋ dimul Ahitofɛɛ aa: “Chɔm ndɔ ya yiyaŋ numndo.+ Yɛɛnɛ naŋ nɔ yɛ miŋ tosa?” 21 Mi Ahitofɛɛ dimul Abisalɔŋ aa: “Hini a laanduaa pɔmbuaa finya num+ mɛi le ma wa chiɛiyo* hɔlteŋ nda.+ Te Isɔluɛiya kpou tuei pɛ a hei okɔɔ, a sina dɔɔ maa a fula chuŋ wɔɔŋndo finya num o miliŋ, okoŋ wanaa cho num tooloo wa cho yoomuaŋ sɔla.” 22 Ma tuandu tɛndiiyo o chiɛiyo choo le Abisalɔŋ.+ Nduyɛ, mbo hini a laanduaa pɔmbuaa finya ndɔ +mɛi ya waŋnda Isɔluɛi kpou o hɔl.+

23 O palɛi keŋ niŋ, te Ahitofɛɛ+ ndoo yɔŋgu pɛ silaa, mi ndaa chua sila koŋ maa sila fula Mɛlɛka tonyaa o ba wo. Lende Deeve nda Abisalɔŋ ndaa chua silala Ahitofɛɛ ndoo yɔŋgu laŋ kpou la sɔvɛ ni.