Isikiɛɛ

20 O wɔsi ŋɔmmɛu wo niŋ, paŋgii ŋuɛɛnuei, malɔ tɔ, mi waŋ banaa apum o Isɔluɛi niŋ huŋ chal la lachi le mi nyunal nda Chɛhowa. 2 Okoŋ mi Chɛhowa suaa naa ya chua aa: 3 “Po wanachioo, soo o waŋ banaa Isɔluɛi lo, ma dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Baa le ya nyunaa a isɔɔ okɔɔ nya cho hunɔɔ ni? ‘Mɛɛ i cho kpendekele maa I cho yoomu yɛ, I cho nya mulul te.’+ Ya Chɛhowa, Mɛlɛka Kpuluŋguma Bɛndoo dimi lende ni.”’

4 “A cho pa o bɛɛndiaŋ le nda yamɛi kilullo? Po wanachioo, a cho pa o bɛɛndiaŋ le nda yamɛi kilullo? Tosa ma sina sɔɔŋ nɔɔlɛi finyaa ndaa mamaa tosa woŋ.+ 5 Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Paale ya hɛli Isɔluɛi leŋ,+ mi mɛnaŋ* vɛlɛ o chuauwaa Chekɔpu wa* lo. Nduyɛ mi chɔɔmuŋ nda o lɛŋnde Ichipi leŋ niŋ.+ A tonya, mi mɛnaŋ o nda lo mi dimi aa, ‘Ya cho Chɛhowa Mɛlɛka nyaa ni.’ 6 O paale leŋ choo, mi mɛnaŋ le mi soli nda o lɛŋnde Ichipi leŋ niŋ, mi kuɛ a nda o lɛŋnde ya hɛli le nda leŋ niŋ. Lɛŋnde milikiiyaŋ* a liaaŋ ma cho taaliaa leniŋ ndeŋ.+ Lɛŋnde leŋ lee hiou lɛŋnde kpou naŋɔɔ. 7 Mi dimul nda aa, ‘Wana o wana nɔ mbo vii vii nyɛm nɔɔlɛi o cho sooluuwo woŋ. Nduyɛ, la nɔɔliaa nyapila a piɔmaa nɔɔlɛiya* Ichipi le.+ Ya cho Chɛhowa Mɛlɛka nyaa ni.’+

8 “‘“Kɛ ma simul la, nduyɛ a yeŋ ya lani le. A vii vii nyɛm nɔɔlɛi nda wa sooluuwo woŋ te, nduyɛ a chɛl le ma mal piɔmaa nɔɔlɛiya Ichipi sooluuwo le.+ Lelaŋ, mi kɛɛsiaa le mi dɔɔnuŋ tumbe a nda o kala kala o lɛŋnde Ichipi leŋ niŋ. 9 Kɛ I tosa lɛ nyɛ yaa kɛɛsiaa le tosaa wo le, yɔŋii diola nilaŋ laa tambu tɔɔ wanaa nda wa tɛɛŋ nda.+ Mɛɛ ya soli nda o lɛŋnde Ichipi leŋ niŋ,+ mi chɔm nda* wana suu ya cho wo wanaa nda* wa tɛɛŋ nda o hɔl kpendekele. 10 Lelaŋ mi soli nda o lɛŋnde Ichipi leŋ niŋ, mi kua a nda o pollo niŋ.+

11 “‘“Okoŋ mi ke nda sawala nilaŋ, nduyɛ mi tosa ma sina nɛila nila chɔmaalaŋ,+ le halikpeŋ wana tol taŋ kɔɔli pɛ, o hiou lachi a waa yoomu.+ 12 Mi ke nda vɛlɛ palɛi pɛŋgiɛi+ le mi i wa maa tamasi naa ndaa tɛɛŋ,+ le halikpeŋ ma sina maa ya Chɛhowa, ya cho nda dindioo ni.

13 “‘“Kɛ mi waŋnda Isɔluɛi simul la o pollo niŋ.+ A tosa nyɛ sawala nilaŋ la dimi wo le, nduyɛ ma kɛɛ le nɛila nila chɔmaalaŋ tolɔɔ kɔɔli, la tosa mi waŋndo hiou lachi a waa yoomu laŋ. Ma nɔɔliaa palɛi nii pɛŋgiɛi. Okoŋ, mi kɛɛsiaa le mi dɔɔnuŋ tumbe a nda o kala kala o pollo niŋ, nduyɛ mi basu nda tɛɛ.+ 14 Kɛ I tosa lɛ nyɛ yaa kɛɛsiaa le tosaa wo le, yɔŋii diola nilaŋ laa sɔla tɔɔ wɔɔŋndo wanaa nda wa tɛɛŋ nda, a wa tofaa mi soli nda* nda o hɔl kpendekele wa.+ 15 Mi mɛnaŋ vɛlɛ o pollo niŋ maa I cho lakɔ a nda o lɛŋnde yaa ke nda leŋ niŋ te.+ Lɛŋnde milikiiyaŋ* a liaaŋ ma cho taaliaa leniŋ ndeŋ.+ Lɛŋnde leŋ lee hiou lɛŋnde kpou naŋɔɔ. 16 Kanifuule, a tosa nyɛ sawala nilaŋ la dimi wo le, nduyɛ ma kɛɛ le nɛila nila chɔmaalaŋ tolɔɔ kɔɔli. Ma nɔɔliaa palɛi nii pɛŋgiɛi, mɛɛ nda muliŋ piɔmaa ndaa nɔɔlɛiya sooluuwo.+

17 “‘“Kɛ mi* tuiinuŋ nda inyiɛɛ, I tɛɛmbuu nda le. Nduyɛ, I besu nda tɛɛ o pollo niŋ te. 18 Mi dimul puaa ndaa o pollo niŋ+ aa, ‘La tual sawala finyaa nyaa mamaa kɔɔli+ a nɛila ndala chɔmaalaŋ te, nduyɛ la nɔɔliaa nyapila a piɔmaa ndaa nɔɔlɛiya le. 19 Ya cho Chɛhowa Mɛlɛka nyaa ni. Lelaŋ, la tosa nyɛ sawala nilaŋ la dimi wo, nduyɛ mi la tol nɛila nila chɔmaalaŋ kɔɔli.+ 20 La ke palɛi nii pɛŋgiɛi bɛɛleŋ.+ Palɛi hei cho wa maa tamasi naa nyaa tɛɛŋ, le halikpeŋ mi la sina maa ya cho Chɛhowa Mɛlɛka nyaa ni.’+

21 “‘“Kɛ mi puaa ndaa simul la.+ A tosa nyɛ sawala nilaŋ la dimi wo le, nduyɛ ma kɛɛ le nɛila nila chɔmaa laŋ tolɔɔ kɔɔli, la tosa mi waŋndo hiou lachi a waa yoomu laŋ. Ma nɔɔliaa palɛi nii pɛŋgiɛi. Okoŋ mi kɛɛsiaa le mi dɔɔnuŋ tumbe a nda o kala kala o pollo niŋ.+ 22 Kɛ I tosa lɛ nyɛ yaa kɛɛsiaa le tosaa wo le,+ le sabu diola nilaŋ,+ yɔŋii la sɔla tɔɔ wɔɔŋndo wanaa nda wa tɛɛŋ nda, a wa tofaa mi soli nda* nda o hɔl kpendekele wa. 23 Mi mɛnaŋ vɛlɛ o nda lo o pollo niŋ maa I cho nda puusiaa, okoŋ mi sɛŋi nda o lɛŋnde niŋ kaala cheleŋ tɛɛŋ.+ 24 Kanifuule, a tosa nyɛ sawala nilaŋ la dimi wo le, nduyɛ ma kɛɛ le nɛila nila chɔmaalaŋ tolɔɔ kɔɔli,+ ma nɔɔliaa palɛi nii pɛŋgiɛi, mɛɛ nda muliŋ piɔmaa nɔɔlɛiyaa finyaa ndaa mamaa sooluuwo.+ 25 Mi chɛl nda vɛlɛ ma tual sawala wɔɔŋndaŋ kɔɔli vɛlɛ a nɛila chɔmaala tosa ma sɔla piɔmndo laŋ.+ 26 Mi chɛl nda ma nɔɔliaa ndapila mɛɛ nda soli puaa ndaa tasiaa salalaŋ o yiŋndeŋ niŋ,+ le halikpeŋ mi tɛɛmbuu nda, okoŋ ma sina maa ya cho Chɛhowa ni.”’

27 “Lelaŋ po wanachioo, dimul waŋnda Isɔluɛi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “O nɛiyo hoo choo finyaa nyaa mamaa nɔɔliaa vɛlɛ diola nilaŋ ni, mɛɛ nda kɛɛ waa sakpo o ya lo. 28 Mi kua a nda o lɛŋnde ya chuel nda buŋgɛi leŋ niŋ.+ Mɛɛ nda che pembuŋ vilɛiyoŋ kpou a yɔmii pui yukɔŋ nde,+ ma kandu salala tɛɛmbuu ya kɔllo laŋ solioo. Ma soli salala nyɛm chuŋ kɛndɔŋ vɛlɛ a salala mamuɛilaŋ loŋ. 29 Okoŋ mi nyuna nda aa, ‘Le sabu yɛɛ nya kua yɛ o fondaŋ filioŋndo hoo? (Haaa a paale hauleŋ ndeŋ, lende nda veelu ndu ni aa Fondaŋ Filioŋndo.)’”’+

30 “Lelaŋ dimul waŋnda Isɔluɛi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Baa la yeema mi la nɔɔliaa nyapila mɛɛ finyaa nyaa mamaa tosa yɛ, mi la muliŋ piɔmaa ndaa nɔɔlɛiya sooluuwo?+ 31 Baa la cho wɔ puaa nyaa salalaŋ solioo o yiŋndeŋ niŋ o piɔmaa nyaa nɔɔlɛiya lo le nyapila nɔɔliaa?+ Oo waŋnda Isɔluɛi, baa la nɔla pa mi la wa sɔɔŋ muŋ tosaa okoŋ mi muli nya vɛlɛ diom te la nyuna ya pɛ?”’+

“‘Mɛɛ i cho kpendekele maa I cho yoomu yɛ, I muli nya diom te.’+ Ya Chɛhowa, Mɛlɛka Kpuluŋguma Bɛndoo dimi lende ni. 32 ‘Yɛɛ ndoo hel lɛ nya mɛɛ nya dimi aa, “Ŋ waŋnuŋ maa yuŋgulaŋ o lɛŋii balu naa ve niŋ, a piɛi* poutaŋ a yɔmnde wa?”+ Nyɛ nya yiyaŋ koŋ ndo, fɛɛŋ bɛɛ o yɔŋnuŋ te.’”

33 “‘Mɛɛ i cho kpendekele maa I cho yoomu yɛ, ya cho wa masaa nya choo ni. I cho ba ni kpaaya bɛndoo siɛndi mi tusi nya nyɛpalaa choo. I cho dɔɔnuŋ tumbe a nya o kala kala.’+ Ya Chɛhowa, Mɛlɛka Kpuluŋguma Bɛndoo dimi lende ni. 34 ‘I cho dɔɔnuŋ tumbe o kala kala, mi siɛndi ba ni kpaaya bɛndoo,+ mi soli nya o lɛŋii nya saŋnuŋ nde niŋ, okoŋ mi chuuŋgiaa nya naapilɛ. 35 I cho lakɔ a nya o lɛŋnde polteŋ niŋ kaalaŋ tɛɛŋ, mi yapila kɔɔsa a nya loŋ.+

36 “‘Mɛɛ mɛɛ ya kɔɔsa a finyaa nyaa mamaa o pollo niŋ o lɛŋnde Ichipi leŋ niŋ yɛ, lende ya cho kɔɔsa a nya ni.’ Ya Chɛhowa, Mɛlɛka Kpuluŋguma Bɛndoo dimi lende ni. 37 ‘I cho tosa mi la wa o tinda wana mandaa lasaa bɛŋgu,+ nduyɛ mi baŋ nya mi la wa o kpemaa bɛŋgu. 38 I cho soli wanaa bolii kalaa a wanaa cho hakioo tosaa wa nya tɛɛŋ.+ I cho nda soli o lɛŋnde isumialteŋ niŋ, kɛ a luei niŋ o lɛŋnde Isɔluɛi leŋ niŋ te.+ Okoŋ, a cho sina maa ya cho Chɛhowa ni.’

39 “Kɛ nya waŋnda Isɔluɛi, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni, ‘Wana o wana kɔ sooluu piɔmaa nduaa nɔɔlɛiya.+ Kɛ la loonuŋ maa, te la yeŋ ya lani le, teleŋ cho fuuluu la nɔla lɛ niŋ mi la nɔɔliaa diola nilaŋ a salala nyalaŋ vɛlɛ a piɔmaa nyaa nɔɔlɛiya le.’+

40 “‘Kanifuule o pembii nii bɛnduii diandɛi choo, pembii vilɛiye o Isɔluɛi niŋ+ waŋnda o Isɔluɛi niŋ cho ya wa piɛiyo ni.’+ Ya Chɛhowa, Mɛlɛka Kpuluŋguma Bɛndoo dimi lende ni. ‘I cho hini kɔl a nya loŋ. Loŋ ya cho nya nyuna ni le mi la yɔŋgu nyɛm nyaŋ diandaŋ kpou. Muŋ cho yɛ chuuŋgiaala nyalaŋ a komɔɔla taselaŋ le salalaŋ solioo ni.+ 41 Te I soli nya pɛ o lɛŋii nya saŋnuŋ nde niŋ,+ okoŋ mi chuuŋgiaa nya naapilɛ, I cho hini kɔl a nya te la wa pɛ salalaŋ solioo mi chuŋ kɛndɛ koŋ komal la. Nduyɛ, waŋnda o lɛŋnde niŋ cho sina maa Mɛlɛka diandaa ya cho ni sanaa a nya.’+

42 “‘Te I hiŋ a nya pɛ o lɛŋnde Isɔluɛi leŋ niŋ,+ lɛŋnde ya chuel finyaa nyaa mamaa buŋgɛi le nda kioo leŋ, la cho sina maa ya cho Chɛhowa ni.+ 43 La cho lo loŋ mi la loonuŋ a kaala nyalaŋ, vɛlɛ a sɔɔŋ wɔɔŋ kɛ kɛ nya tosa mi la nɔɔliaa nyapila.+ Nduyɛ, la cho nyapila yɛleŋ tul le sɔɔŋ wɔɔŋ nya tosa woŋ kpou.+ 44 Oo waŋnda Isɔluɛi, la cho sina maa ya cho Chɛhowa ni, te I mal nya pɛ woloŋ le sabu diola nilaŋ,+ kɛ o cho le kaala nyala wɔɔŋndaŋ vɛlɛ a sɔɔŋ wɔɔŋ nya tosa woŋ te.’ Ya Chɛhowa, Mɛlɛka Kpuluŋguma Bɛndoo dimi lende ni.”

45 Mi Chɛhowa suaa vɛlɛ naa ya chua aa: 46 “Po wanachioo, muli hɔlla kpeŋgii ba tou ve ma dimi yooŋgu nuu. Dimul bundɛ cho ba tou wo wo nyɛ cho ndu hunɔɔ yɔŋnɔŋ ndo. 47 Dimul bundɛ cho ba tou wo wo aa, ‘Yaŋ nilaŋ o nyɛ Chɛhowa dimi wo. Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho num malɔɔ o yiŋ,+ mi yɔmii nyuluei a yɔmii vesɛiye kpou ŋuɛ. Wana o wana nɔla niŋ yiŋnde leŋ nyumi le.+ Wana o wana cho haŋgul yiŋnde leŋ sinaŋ chɔŋ ba luaŋ ndo mbo kɔ bii ba tou wo. 48 Waŋnda kpou cho sina maa ya Chɛhowa, yapila mal ndu o yiŋ ni, nduyɛ wana o wana tiuba mbo nyumi yiŋnde leŋ te.”’”+

49 Okoŋ mi dimi aa: “Kpokoo Chɛhowa, Mɛlɛka Kpuluŋguma Bɛndoo! Waŋnda haa cho dimioo a ya okɔɔ aa, ‘Mbɔ talelaŋ koni o cho dimioo ni.’”