Isikiɛɛ

36 “Kɛ num po wanachioo, dimi yooŋgoo a pembuŋ bɛndoŋ Isɔluɛi okɔɔ aa, ‘Oo pembuŋ bɛndoŋ Isɔluɛi, la yaŋ nilaŋ o nyɛ Chɛhowa dimi wo. 2 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Yaamɔɔnɔɔ dimi a num okɔɔ aa, ‘A chaa! Fondaŋnda filioŋndaŋ paandu bɛɛ la simnuŋ nyɛm kɛŋ naa!’”’+

3 “Dimi yooŋgoo aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Yaamɔɔwaa nyaa fula ba o ba fee, ma huŋ chiŋalaŋ nya nduyɛ ma tɛɛmbuu nya. La simnuŋ nyɛm kiɔɔŋ le wanaa lo yoomu o lɛŋnde niŋnda. Waŋnda haa cho hiouwɔɔ lachi a suɛi a nya okɔɔ, vɛlɛ a nya tɔɔ tɛɛmbuuwo.+ 4 Lelaŋ nya pembuŋ bɛndoŋ Isɔluɛi, la yaŋ nilaŋ o nyɛ Chɛhowa, Mɛlɛka Kpuluŋguma Bɛndoo dimi wo! Nyɛ Chɛhowa, Mɛlɛka Kpuluŋguma Bɛndoo dimul pembuŋ bɛndoŋ, pembuŋ pɔmbɔŋ, peela pɔmbɔlaŋ, kpoloŋndaŋ, fondaŋnda tambu mi la simnuŋ pɔmndo laŋ, a chieeŋ bɛnduŋ waŋnda del choo ma puŋga nyɔɔŋ miŋ lo fondo,+ nduyɛ mi wanaa lo yoomu o lɛŋii balu nda ve niŋnda siiŋguu nyɛ mamaa woŋ ndo cho hoo ni.+ 5 Chɛhowa, Mɛlɛka Kpuluŋguma Bɛndoo dimi aa: ‘I cho dɔɔnɔŋ tumbe o kala kala,+ mi soo o wanaa lo yoomu o lɛŋnde niŋnda lo a haa Idɔm kpou. Nda chua lɛŋnde nileŋ chɔdɔ ni,+ ma del leŋ choo, ma puŋga nyɛm cho leniŋ ndoŋ, ma biu fondaŋnda chɔluaa dia laŋ, nduyɛ ma chua leŋ maa nyɛm kɛŋ nda a kɔl kɛndɛ bɛndoo.’”’+

6 “Lelaŋ dimi yooŋgoo a lɛŋnde Isɔluɛi leŋ okɔɔ, nduyɛ ma dimul pembuŋ bɛndoŋ, pembuŋ pɔmbɔŋ, peelaŋ, vɛlɛ a kpoloŋndaŋ aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho tumbe dɔɔnɔŋ a nya o kala kala, nduyɛ mi soo o nya lo a dialuŋ fulaa, kanifuule la chɛl mi waŋnda o lɛŋnde niŋ tɛɛmbuu nya labɛɛ.”’+

7 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Yapila heelu baa mi mɛnaŋ po maa siɔmbulaŋ la cho lɛŋii balu nya ve tolɔɔ.+ 8 Kɛ nya pembuŋ bɛndoŋ Isɔluɛi, la cho lɛuwoŋ soli nduyɛ mi la kom le wanaa niaa Isɔluɛi.+ Kanifuule, a cho suŋ miiŋgu o nda lo. 9 I cho a nya latulu, nduyɛ I cho nya hɔlla mulul. A cho nya chiɛi dɔwɔɔ, nduyɛ ma saŋ nya kulloŋ. 10 I cho tosa mi wanaa nyaa kui tau. Waŋnda Isɔluɛi kpou cho kui tau. Waŋnda cho vɛlɛ miiŋgu o chieeŋ bɛndoŋ niŋ+ ma miŋgi muŋ taŋgul.+ 11 A tonya, I cho tosa mi wanaa numnda a chɔluaa numnda kui tau.+ A cho chuauwa violɔɔ ma kui tau. I cho tosa mi la miiŋgu maa paandu,+ nduyɛ mi la sul mbo hiou maa paandu.+ Okoŋ, la cho sina maa ya cho Chɛhowa ni.+ 12 I cho tosa mi wanaa niaa Isɔluɛiya kela nya choo, nduyɛ mi la wa nyɛm kɛŋ nda.+ La cho simnɔŋ nyɛm kɛŋ nda, nduyɛ fɛɛŋ bɛɛ la tosa lɛ mi chuauwaa ndaa vi le.’”+

13 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘A cho nya dimullo aa, “Lɛŋnde tɛɛmbuu wanaa nduaa nduyɛ mi le tosa mi chuauwaa cho leniŋ nda vi wa leŋ le cho ni.”’ 14 ‘Lelaŋ, fɛɛŋ bɛɛ a tɛɛmbuu lɛ wanaa numnda ɔɔ ma tosa mi chuauwaa cho o kaala numndaŋ niŋnda vi le.’ Ya Chɛhowa, Mɛlɛka Kpuluŋguma Bɛndoo dimi lende ni. 15 ‘I cho lɛ chɛlɔɔ mi waŋnda o lɛŋnde niŋ dimi diomnda wɔɔŋndaŋ a num okɔɔ ɔɔ ma mam num te.+ Nduyɛ, fɛɛŋ bɛɛ a tosa lɛ niŋ mi wanaa cho o kaala numndaŋ niŋnda del te.’ Ya Chɛhowa, Mɛlɛka Kpuluŋguma Bɛndoo dimi lende ni.”

16 Mi Chɛhowa suaa vɛlɛ naa ya chua aa: 17 “Po wanachioo, teleŋ waŋnda Isɔluɛi wa ichali o lɛŋnde ndaleŋ niŋndo, ma nɔɔliaa leŋ a kelala ndalaŋ vɛlɛ a sɔɔŋ nda wa tosaa woŋ.+ Kelala ndalaŋ la wa la nɔɔlɛi ya o hɔl, mɛɛ wana lanɔɔ wa nuaa o teleŋ ndɔɔ niŋ yɛ.+ 18 Le hei, mi tusi nda kɔl ni tuuwo choo le mɛɛ nda diu waŋnda o lɛŋndeŋ niŋ yɛ,+ nduyɛ ma nɔɔliaa leŋ a piɔmaa ndaa nɔɔlɛiya* yɛ.+ 19 Le hei, mi puusiaa nda ma saŋnuŋ o lɛŋnde niŋ.+ Mi kilul nda yamɛi a mɛɛ kelala ndalaŋ vɛlɛ a sɔɔŋ nda wa tosaa woŋ wa yɛ. 20 Kɛ mɛɛ nda kuɛ o lɛŋii keŋ niŋ, mi waŋnda nɔɔliaa diola nila diandaa laŋ,+ mɛɛ nda wa dimioo a nda okɔɔ aa, ‘Wanaa Chɛhowa wa cho haa ni, kɛ a mal lɛŋnde ndɔleŋ.’ 21 Lelaŋ, I cho diola nilaŋ dindi, la waŋnda Isɔluɛi nɔɔliaa o lɛŋii nda kuɛ niŋnde laŋ.”+

22 “Lelaŋ, dimul waŋnda Isɔluɛi aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Oo waŋnda Isɔluɛi, o cho le nya le ya cho hei tosa le. Kɛ le diola nila diandaala nya nɔɔliaa o lɛŋii nya kuɛ ve niŋndaŋ.”’+ 23 ‘I cho diola nila tɔɔmalaŋ dindi kɛsɛ,+ la nya nɔɔliaa o lɛŋii nya kuɛ niŋnde laŋ. Te I chɔm pɛ waŋnda o lɛŋnde niŋ maa Mɛlɛka diandaa ya cho nya tɛɛŋ ni, okoŋ a cho sina maa ya cho Chɛhowa ni.’+ Ya Chɛhowa, Mɛlɛka Kpuluŋguma Bɛndoo dimi lende ni. 24 ‘I cho nya soli o lɛŋii nya cho ve niŋ kpou mi chuuŋgiaa nya naapilɛ, okoŋ mi miŋgi nya o lɛŋnde nyaleŋ niŋ.+ 25 I cho nya mɛŋma diandaŋ fasaŋiaa choo, okoŋ mi la simnuŋ a diandaa.+ I cho nyɛ o nyɛ nɔɔlɛi cho nya lekɔɔ dindi,+ nduyɛ mi faaŋiaa piɔmaa nyaa nɔɔlɛiya kpou.+ 26 I cho nya ke kɔl sɛnɛiyo+ a yiyaŋ sɛnɛiyo.+ I cho faŋa kɔl cho nya niŋ maa pou wo,+ nduyɛ mi ke nya kɔl cho maa i visi wo.* 27 I cho nya ke nyina ni diandaa, mi tosa mi la kuɛ o nɛila nila chɔmaalaŋ choo,+ nduyɛ mi la diikuŋ sawala nilaŋ a nyɛ ya dimul nya le tosaa wo. 28 Okoŋ la cho ichali o lɛŋnde ya ke finyaa nyaa mamaa leŋ niŋ, mi la simnuŋ wanaa niaa, mi ya bɛɛ simnuŋ Mɛlɛka nyaa.’+

29 “‘I cho tosa mi la soli balaŋ o sɔɔŋ nɔɔlɛiyoŋ niŋ, mi dimul kulloŋ miŋ kui tau tau, nduyɛ fɛɛŋ bɛɛ I tusi lɛ nya yima bɛnduaŋ choo le.+ 30 I cho tosa mi tɔlɔɔla nyalaŋ la kom, nduyɛ mi chiɔɔŋ nyaŋ yɔŋgu kulloŋ tau tau, le halikpeŋ yima bɛnduaŋ ma tɛɛmbuu lɛ nya labɛɛ o lɛŋii nya cho ve niŋ te.+ 31 Okoŋ la cho loonɔŋ a kelala nyala wɔɔŋndaŋ, vɛlɛ a sɔɔŋ wɔɔŋ nya tosa woŋ. La cho nyapila yɛleŋ tul le kelala nyalaŋ vɛlɛ a sɔɔŋ wɔɔŋ nya tosa woŋ.+ 32 Lelaŋ nya waŋnda Isɔluɛi, la kɛsiŋ o kɔl maa o cho le nya le ya cho hei tosa le.+ Kɛ le mi siɔmbulaŋ la bii nya, nduyɛ mi la tambu labɛɛ le nyɛ nya tosa wo.’ Ya Chɛhowa, Mɛlɛka Kpuluŋguma Bɛndoo dimi lende ni.

33 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Paale ya cho nya dindi mi wɔɔsuu hakila nyalaŋ kpou leŋ, I cho tosa mi waŋnda miiŋgu o chieeŋ bɛndoŋ niŋ,+ ma miŋgi muŋ taŋgul.+ 34 Lɛŋnde nda tɛɛmbuu mi le lo pɔm mi waŋnda ndaa kei leŋ chɔ ma hiaunuŋ ndeŋ, la cho wa waltaŋ tosaa lechoo. 35 Okoŋ waŋnda cho dimi aa: “Lɛŋnde wa leŋ pɔmndo leŋ le simnuŋ maa kpeloo Idɛŋ.+ Chieeŋ bɛnduŋ nda pesi miŋ simnuŋ pɔmndaŋ ndoŋ bɛɛ, a miŋgi muŋ taŋgul ŋ kala kala mi waŋnda wa leniŋ.”+ 36 Lɛŋii balu nya ve cho sina maa ya Chɛhowa pila miŋgi chieeŋ wa ŋ tambɛiyoŋ taŋgul ni, mi tual tɔlɔɔlaŋ o lɛŋnde simnuŋ pɔmndo leŋ niŋ. Ya Chɛhowa, yapila soo ni, nduyɛ mi tosa ndi.’+

37 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho vɛlɛ chɛlɔɔ mi waŋnda Isɔluɛi nyuna ya le mi tosa mi wanaa ndaa kui tau tau maa ŋchɔlu. 38 Waŋnda cho piɔ o chieeŋ sɔla tambei yoŋ niŋ cha cha,+ mɛɛ wanaa diandaa wa nuaa kunda bɛndoo yɛ, vɛlɛ a mɛɛ waŋnda pia nuaa Chulusalɛm cha a teleŋ bɔŋaŋndaŋ yɛ.+ Okoŋ, a cho sina ma ya cho Chɛhowa ni.’”