Sɔɔŋ Chɔɔmaŋndoŋ

15 Okoŋ kɔɔli, mi cha suɛi kɔndɔfili bɛndu cheleŋ o choo choo niŋ. Mi cha maalikɛiya a ŋɔmmɛu+ a kpundɛlaŋ la ŋɔmmɛu nda o laba. Kpundɛla mɛɛlaalaŋ la cho laŋ ni, kanifuule a laŋ kɔl tuu Mɛlɛkaa cho mɛɛlu ni.+

2 Mi cha nyɔɔ maa tofaŋ o kuaŋnaŋ kɛ kɛ maa pee mɛŋma ihɛl,+ o muuliaŋ a yiŋndeŋ. Wanaa yem+ visi biyaa, a velaŋ ndɔɔ,+ a nɔmbɛi sim le diola ndɔlaŋ ndo+ wa, a wa isisi pee mɛŋma ihɛl wa maa tofaŋndo ikɛi a towala Mɛlɛka laŋ o laba. 3 A wa chondii Muuse,+ buɛi Mɛlɛkaa solioo a chondii Saa Fɔŋndɔɔ+ aa:

“Chɛhowa,* Mɛlɛka Kpaaya Kpou Kpou Wo,+ walta numndaŋ la cho walta kɔndɔfili bɛndu.+ Num cho Masaa le fɛɛŋ a fɛɛŋ ni.+ Sɔɔŋ ŋ tosa woŋ cho sakpo,+ nduyɛ ŋ cho sɔɔŋ tonya. 4 Chɛhowa,* numpilɛ kpe chɔm lo lechoo wo ni.+ Nɛɛnɛ kpeekpei cho yɛ mbo kɛɛ siooŋnde nɔ le num, nduyɛ mbo kɛɛ diola numndaŋ biilu? Waŋnda o lɛŋnde niŋ kpou cho hunɔɔ ma piɛi num,+ kanifuule a cho chɔɔ maa o sakpoyɛi choo ŋ kialu yamaŋ ni.”

5 Okoŋ kɔɔli, mi cha mi tɛndii lesei Mɛlɛkaa+ kumbiŋ o choo choo niŋ.+ 6 Okoŋ, mi maalikɛiyaa ŋɔmmɛuwaa nɔ kpundɛla ŋɔmmɛu laŋ+ o laba wa fula o chiɛi Mɛlɛkaa hoo niŋ. Feŋgbɛla diandaa laŋ la wa nda lekɔɔ, nduyɛ la wa ŋɛlɛŋgi ŋɛlɛŋgi. Kolala ŋpɛŋgɛla nda toosiaa a kooliiye laŋ la wa nda la yiyaa o latakpa. 7 Mi nyaa yoomaa hiɔɔluaa o pilɛ ke maalikɛiyaa ŋɔmmɛuwa haa hɛŋgɛila ŋkooliilaŋ la ŋɔmmɛu. Hɛŋgɛilaŋ ndaŋ la wa la piaa cha a tumbe Mɛlɛka+ cho le fɛɛŋ a fɛɛŋ ndo. 8 Okoŋ, mi biilu Mɛlɛkaa+ a kpaaya ndɔɔ tosa mi kumnde pia cha o chiɛi Mɛlɛkaa niŋ. Wana o wana ndoo nɔla mbo luɛi o chiɛi Mɛlɛkaa niŋ te, mɛɛ mi maalikɛiyaa ŋɔmmɛuwa+ chii kpundɛla ŋɔmmɛu laŋ hulɔɔ.