Koloniko Diiŋ Ndɔɔ

15 Okoŋ, mi nyina Mɛlɛkaa tual Asaluaya po Odɛdi wo choo. 2 Le hei, mbo kua naa Esa chua. Mbo dimul ndu aa: “Num Esa a nya waŋnda Chuda a Bɛŋjamiŋ kpou, la yaŋ ya nilaŋ! Te la hiou pɛ lachi a waa a Chɛhowa latulu, ndu bɛɛ cho wa a nya latulu.+ Nduyɛ te la nuuviaa ndu pɛ, o cho tosa mi la saaluŋ ndu.+ Kɛ te la mal ndu pɛ, ndu bɛɛ cho nya malɔɔ.+ 3 Kanifuule le teleŋ vilɛi,* Mɛlɛka tonyaa ve a Isɔluɛiya latulu le. Ndaa nɔ wana soliaa lasala pɛɛku nda le, nduyɛ a ve sawala Mɛlɛka laŋ biyɔɔ le.+ 4 Kɛ te ndaa wa pɛ o nyɛkindilaa bɛŋgu ma muliŋ o Chɛhowa, Mɛlɛka Isɔluɛiya lo nduyɛ ma nuuviaa ndu, mi ndoo tosa ma saaluŋ ndu.+ 5 A teleŋ koŋ, i wa suɛi kpundɛ le kelaa,* kanifuule sɔŋgɔlaŋ la wa waŋnda tɛɛŋ o lɛŋnde niŋ kpou. 6 Lɛŋndeŋ le wa lɛŋnde cheleŋ delɔɔ choo mi le tɛɛmbuu leŋ, nduyɛ mi chiee bɛndoo del chiee bɛndu cheleŋ choo mbo tɛɛmbuu ndu. Kanifuule, mi Mɛlɛka tosa ma yɔŋnuŋ yolomaŋ yolomaŋ a nyɛpalaa suu o suu.+ 7 Kɛ nya nya, la nɔ dialuŋ kalaŋ nduyɛ la wu ŋdial te.*+ Kanifuule, la cho fandaa sɔla le wali nya cho tosaa wo.”

8 Dimioo nuaa mi Esa tuɛi diomnda Asaluaya dimi laŋ, vɛlɛ a huului Odɛdi wana suaa le Mɛlɛka wo dimi ve, mbo sɔla kɔl simulaa. Okoŋ, mbo faaŋiaa piɔmaa nɔɔlɛiyaa wa o lɛŋnde Chuda+ a Bɛŋjamiŋ ndeŋ niŋnda kpou. A wa bɛɛ o chieeŋ bɛnduŋ o biu biu o tanda ŋpemboo o Ifiluem niŋnda, mbo faaŋiaa nda kpou. Okoŋ kɔɔli, mbo miŋgi bandu luamaa lasala Chɛhowa wo toosiaa o toŋgo chiɛi Chɛhowa wo lachi.+ 9 Mbo chuuŋgiaa waŋnda o yuŋgu Chuda a o yuŋgu Bɛŋjamiŋ ndo niŋ kpou. Mbo chuuŋgiaa vɛlɛ mialaa fula o yuŋgu Ifiluem, Manaasɛ, a o yuŋgu Simiɔŋ ndo niŋnda kpou.+ Kanifuule, mɛɛ nda che maa Chɛhowa Mɛlɛka ndɔɔ cho a ndu latulu, mi a bɔɔbɔɔ faŋaŋ Isɔluɛi ma tual ndu kɔɔli. 10 Ma chuuŋgiaŋ Chulusalɛm o wɔsi 15 Esa wa o masaleŋ choo wo o paŋgii yaa nduɛi niŋ. 11 O paale leŋ choo, ma chua chɔluaa nda fula o chɔuwo wa, nauwa 700 a saa 7,000, ma soli salaa o Chɛhowa lo. 12 Okoŋ kɔɔli, ma chua buŋgɛi le Chɛhowa, Mɛlɛka finyaa ndaa mamaa nuuviaa a kɔl ndaa kpou vɛlɛ a yoomu ndaa kpou.+ 13 Wana pɔmbɔ ni, wana bɛndu ni, wana pɔnɔ ni, wana lanɔ ni, wana o wana ndoo kɛɛ pɛ le Chɛhowa, Mɛlɛka Isɔluɛiya nuuviaa, ndoo nɔ mbo sɔla piɔmndo.+ 14 Okoŋ, ma chua buŋgɛi o Chɛhowa lo choo choo kpeleŋ. A wa deŋioo a nyaaloo, nduyɛ ma wa bululaŋ hɔŋndo. 15 Mi waŋnda o Chuda niŋ kpou duaunuŋ nyaale a buŋgɛi nda chua ve, kanifuule a kɔl ndaa kpou nda chua ndi ni. A doonuŋ tamala le Chɛhowa nuuviaa le, nduyɛ mbo tosa ma saaluŋ ndu.+ Mbo tosa vɛlɛ ma sɔla pɛŋgioo ba o ba fee.+

16 Mi Esa faŋa pɛŋ Maaka+ mama ndɔ o foofo ndoo nɔ maa kalaa masaa wo. Kanifuule, mbo simi suŋgbule iyɔm nde wɔɔŋ wɔɔŋndeŋ le leŋ sooluuwo.*+ Mi Esa kili kili piɔm koŋ, nduyɛ mbo luam ndu chilikɔ o Kpoloŋndo Kidilɔŋ.+ 17 Kɛ fondaŋnda filioŋndaŋ la wa wɔ+ o Isɔluɛi niŋ.+ A koŋ kpou, mi Esa piɛi Mɛlɛka a kɔl ndɔɔ kpou haaa a yoomu ndɔɔ* mɛɛlulaŋ.+ 18 Nduyɛ, nyɛm nda dindi nda finya ndɔ woŋ, mbo huŋ a muŋ o chiɛi Mɛlɛka tonyaa niŋ. Muŋ cho ni, kaniŋ humboŋ, kooliiyoŋ, a nyɛm laanduŋ yɛ yiɔɔŋ.+ 19 Chɔu ve o Chuda niŋ te haaa mɛɛ wɔsi 35 Esa wa o masaleŋ choo wo.+