Chɔŋ Diiŋ Ndɔɔ

1 Ya bɛndu yuuwo, ya cho yauwo hoo poonyiaa o chua Mɛlɛka hɛli wo lo nda chuauwaa nduaa ya kaala wa ni. O cho ko ya le, kɛ wanaa sina tonyaa wa bɛɛ kpou kaala nda. 2 Kanifuule, tonyaa cho naa o lakɔl, nduyɛ o cho naa lo o lakɔl lefafɛɛŋ. 3 Mɛlɛka Finya naa, a Po ndɔɔ Chiisu Kiliti cho naa kɛndɛi ndɛi bɛnduei tosal, ma tuiinuŋ naa inyiɛɛ, ma ke naa kɔl nyuloo, nduyɛ ma chɔm naa tonyaa a kaalaa.

4 I naŋ bɔɔ kɔl le mɛɛ ya che chuauwaa numnda apum kɔlaŋ o nɛi tonyaa choo,+ a mɛɛ Finya naa ke naa sawaa yɛ. 5 Lelaŋ, num chua Mɛlɛka hɛli hoo wo, I cho num nyɔɔloo maa ŋ kaaliaŋ vellaa velle. (O cho a sawa sɛnɛi okɔɔ le ya cho num poonyiallo le, kɛ a sawa paandu naŋ sɔla o kandɔŋndo pa wo okɔɔ.)+ 6 Nyɛ kaalaa sim ndo cho nyɛ sawala ndɔlaŋ la dimi wo tosaa ni.+ Sawa paandu nya tuei o kandɔŋndo pa wo cho ni maa, la wa kaalaa chɔmndo lɔɔlɔɔ. 7 Wanaa hui waŋnda wa a bɔɔbɔɔ cho niŋ o chieeŋndo niŋ,+ a sɛɛŋgiaa maa Chiisu Kiliti hiŋ o chieeŋndo choo o iwana chieeya le wa.+ Nda cho wanaa huiyaa a wanaa simul Kiliti wa ni.+

8 La mandaŋ a nyɛ nya tosa wo, yɔŋii wali kala kala naŋ tosa wo simnuŋ nyɛ fondoo fuu. O hei niŋ, la nɔla mi la sɔla fanda Mɛlɛka nɔ le nya wo.+ 9 Wana o wana lo o pɛɛku Kiliti wo bɛŋgu le, nduyɛ mbo kandu pɛɛkula lachoowalaŋ pɛɛkoo, mɛɛ o cho diompilɛ a Mɛlɛka le.+ Kɛ wana lo pɛ o pɛɛkoo hoo bɛŋgu, mɛɛ wana koŋ cho o diompilɔɔ niŋ a Finyaa nda Po ndɔɔ.+ 10 Wana o wana komal nya pɛ, mbo chuu nya pɛɛkoo hoo le, la yiya ndu o chiɛila nyalaŋ niŋ te.+ Nduyɛ la yil ndu le. 11 Kanifuule, wana yil ndu pɛ, mɛɛ o toolu wana koŋ o yɔŋ ndɔ wɔɔŋndo niŋ.

12 Mi che bɛɛ I nɔ sɔɔŋ tau le nya dimullo, kɛ I yeema mi poonyiaa muŋ o yau choo le. I nɔ yeemɛi le mi kuɛ o nya lo, okoŋ mi soo o nya lo hɔlla a hɔlla, le halikpeŋ mi la wa a nyaale tau.

13 Bɛ num Mɛlɛka hɛli wo, chuauwaa nduaa yil num lapi.