Ditɔnɔmii

21 “Te la saaluŋ pɛ waŋndo o vilɛiyo yondoo niŋ o lɛŋnde Chɛhowa Mɛlɛka nyaa cho nya kioo le challe leŋ niŋ, nduyɛ mi la sina wana dii ndu wo le, 2 wanaa nyaa banaa a wanaa kialaa ŋyamaa+ nɔ ma kuɛ o foŋndaŋ wana vilɛi koŋ cho ihini wo, nduyɛ ma kindiŋ le sinaa chieeŋ bɛnduŋ balu fondaŋ koŋ ndoŋ. 3 Okoŋ, te a saaluŋ pɛ chiee bɛndu cho kpɛɛluŋ a fondaŋ wana vilɛi koŋ cho wo, waŋ banaa cho o chiee koŋ niŋnda nɔ ma bii nau fɔŋndɔ nda soliŋ ndɔ kpeku le wali le wo, o nda bee wɔ yɔm o ikɛsu le wo, 4 ma kuɛ a ndu o kpoloŋ mɛŋndaŋ ma cho hiouwɔɔ wo,* naa nda tosa wɔ wali le wa, okoŋ ma yem ndu kɛsei loŋ.+

5 “Nduyɛ wanaa soliaa lasalaa, a fula o pulale Livai leŋ choo wa nɔ ma wa loŋ, kanifuule nda Chɛhowa Mɛlɛka nyaa hɛli ni le ma tosa wallo le ndu,+ nduyɛ ma dɔu waŋnda sala o diola Chɛhowa laŋ niŋ.+ A nɔ ma dimul waŋnda mɛɛ sɛɛŋgiaŋ huŋ a sɔŋgɔɔ wo nɔ mbo toosiaŋ yɛ.+ 6 Okoŋ, waŋ banaa cho o chiee nda saaluŋ wana vilɛi koŋ ikɛiya kpou, a nɔ ma pulu bala ndalaŋ+ o nau fɔŋndɔ nda yem koŋ kɛsei o kpoloŋndo niŋndo choo. 7 A nɔ ma dimi aa, ‘O cho naa le dii waŋndo hoo le, nduyɛ ŋ chi nyɛ dii ndu wo le. 8 Oo Chɛhowa, wanaa ŋ piŋi wa,+ wanaa numnda Isɔluɛi, bii nda tɔɔyaŋ le hei le. Nduyɛ tɔɔyaŋ piɔm wana sina isɔɔ le wo, o wa wanaa numnda Isɔluɛi choo le.’+ Okoŋ, tɔɔyaŋ piɔm wana koŋ ve lɛ nda choo le. 9 O hei niŋ, la cho tosa nyɛ bɛnda Chɛhowa o hɔllo, nduyɛ mi la faŋa tɔɔyaŋ piɔm wana tɛɛmbuu isɔɔ le wo nya tɛɛŋ.

10 “Te la kuɛ pɛ yaamɔɔwaa nyaa chɔulabaa, nduyɛ mi Chɛhowa Mɛlɛka nyaa tosa mi la yem nda, okoŋ mi la kuɛ a waŋnda apum o biyɔɔ niŋ,+ 11 mi waŋndo saaluŋ wana lanɔ kɛndɛ kɛndɔɔ o a nya kuɛ kaŋ o biyɔɔ niŋnda tɛɛŋ mbo yeema le ndu chuaa o nɔɔ niŋ, 12 o nɔ mbo kuɛ a ndu o chiɛi ndɔɔ, nduyɛ mi chuaa sendi, okoŋ mbo dindi yɛmbɛŋ ndɔŋ, 13 mbo siŋga nyɛla wa ndu lekɔɔ ma bii ndu laŋ, nduyɛ mbo wa ndu o ba chiɛiniŋ. Chua koŋ nɔ mbo chaŋ kala ndɔ a finya ndɔ le paŋgei kpulukuu.+ Okoŋ, po koŋ nɔla mbo hiviŋ ndu kɔɔli mbo simnuŋ laa ndɔ, mi ndu simnuŋ pɔnɔ ndɔ. 14 Te o hini kɔl a ndu le, o nɔ mbo mal ndu mbo kuɛŋnuŋ+ ba o ba o yeema pɛ. Kɛ o pisi ndu le kaniei* ɔɔ mbo bii ndu biyɔɔ wɔɔŋndo le, kanifuule o chii ndu niŋ hiviŋ kɔɔli.

15 “Te waŋndo nɔ pɛ laanduaa a ŋiɔɔŋ, nduyɛ mbo kaala o pilɔɔ tau mbo hiou o pilɔɔ,* okoŋ mi nda ŋiɔɔŋ kpou vilul ndu puaa, kɛ mbo wa maa lanɔ o kaala tau le wo velu po tasoo ni,+ 16 paale o cho wa puaa nduaa nyɛm kiɔɔŋ piɔuwo leŋ, o nɔ mbo bii po lanɔ o kaala tau wo maa po tase le. Kanifuule, lanɔ o kaala tau le wo po ndɔɔ cho po tasoo ni. 17 O nɔ mbo sina maa lanɔ o kaala tau le wo, po ndɔɔ cho po tasoo ni, nduyɛ nyɛ o nyɛ o nɔ, o nɔ mbo ke ndu bɛmbɔɔ le diiŋ. Kanifuule, ndu cho violɔɔ ndɔ tasoo a kpaaya ndɔɔ o chua piaanduyɛi nduɛi niŋ ni. Di po tasoo nɔ mbo sɔla wo, le ndu o cho ni.+

18 “Te waŋndo nɔ pɛ po luɛi nilakalulaŋ ndo, nduyɛ mbo simul finya ndɔ nda kala ndɔ+ o tui nda diom te, ma kindiŋ o nɛi o nɛi niŋ le ndu silaa kɛ o yeŋ nda la ni le,+ 19 finya ndɔ a kala ndɔ nɔ ma hiŋ a ndu o waŋ banaa lo, o dio kpaki chioo sondoo. 20 Te a hiŋ pɛ a ndu, a dimul waŋ banaa o chiee koŋ niŋ aa, ‘Po naa hoo luɛi nilakalulaŋ mbo simul naa, nduyɛ o tui naa diom te. Wana lepuloo+ a wana kolaa o simnuŋ ni.’+ 21 Wanaa cho o chiee koŋ niŋnda nɔ ma vii vii ndu a poutaŋ haaa mbo vi. La nɔ mi la faŋa wana dɛnɛ wɔɔŋndo nya tɛɛŋ. Okoŋ, Isɔluɛiyaa tuaa kpou cho tueiyɔɔ a ndi okɔɔ mi siooŋnde bii nda.+

22 “Te waŋndo tosa pɛ haki o nɔ mbo sɔla piɔmndo wo,+ okoŋ mi la landu ndu o yɔmndo choo mbo vi,+ 23 dialuŋ ndɔŋ vilɛiyoŋ nɔ miŋ lɔl o yɔm koŋ choo le.+ La nɔ mi la kumbu ndu o paale leŋ choo, kanifuule wana Mɛlɛka handu sendioo choo wo o cho ni.+ Nduyɛ, la nɔ mi la nɔɔliaa lɛŋnde Chɛhowa Mɛlɛka nyaa ke nya le mi le wa nyɛm kɛŋ nya leŋ te.+