Sam
74 Oo Mɛlɛka, le yɛɛnɛ ŋ kɛɛ yɛ naa nuaa lefafɛɛŋ?+
Le yɛɛnɛ ŋ dɔɔnuŋ yɛ tumbe o kala kala a saa num aa ŋ cho mandaa wa?+
Loonuŋ a Pembii Saayɔŋ Nde okɔɔ, naa ŋ wa ichali wa.+
3 Chɔŋ ma balu o fondaŋ cho o tambɛi le teleŋ vilɛiyo niŋ.+
Yaamɔɔwa tɛɛmbuu nyɛ o nyɛ cho o fondaŋ diandaa.+
4 Yaamɔɔwaa numnda cho kuuliaalaŋ o fondaŋ num lepiɛiyo niŋ.+
A lɛɛnduu kolala ndalaŋ loŋ maa tamasi, le chɔmndo maa a bii fondɛi.
5 A wa ko maa puaa kiiŋuu yɔmnde o bundɛlaŋ niŋ a chooŋ nda.
6 Nyɛ o nyɛ nda tuuliaa o chiɛi Mɛlɛkaa niŋ, ma tɛɛmbuu ndu+ a chooŋ vɛlɛ a chiliŋndoŋ.
7 Ma mal chiɛi num diandaa o yiŋ.+
Ma nɔɔliaa fondaŋ diola numndaŋ la cho wo, nduyɛ ma pesi ndu wɔ wɔ.
8 Mi nda a chuauwaa ndaa mamaa dimiŋ o lakɔl aa:
“Ŋ cho fondaŋnda nda piɛi Mɛlɛka o lɛŋndeŋ niŋndaŋ kpou lomɔɔ.”
9 Tamasi kɛ kɛ cho le naa o naŋ nɔla miŋ che wo le.
Wanaa suaa le Mɛlɛka wa, o pilɛ bɛɛ cho lɛ le.
Nduyɛ, wana o wana cho naa tɛɛŋ mbo sina mɛɛ kpɛ hei cho viouwɔɔ yɛ le.
10 Oo Mɛlɛka, le vɛɛ kpɛ yaamɔɔwaa numnda cho yɛ hiouwɔɔ lachi a num mamɔɔ?+
Baa yaamɔɔwaa numnda cho pa hiouwɔɔ lachi a diola numndaŋ tɛɛmbuuwo le fɛɛŋ a fɛɛŋ?+
11 Le yɛɛnɛ ŋ faŋa yɛ naa ba num kɛndɔɔ choo ma kɛɛ le naa malaa?+
Soli ba numndo* ma tɛɛmbuu nda.
12 Kɛ I sina niŋ le teleŋ vilɛi maa Mɛlɛka cho Masa nuu ni.
Ndu tosa sɔɔŋ piŋi waŋnda woŋ o lɛŋndeŋ choo ni.+
13 Ma piɔu pee mɛŋma ihɛllo tɛɛŋ a kpaaya numndo.+
Ma pesi nyaa yoomaa bɛnduaa cho o pee mɛŋma ihɛllo niŋnda bolle.
14 Ma pesi Liviaataŋ* bolle.
Ma yɔŋgu wanaa cho ichali o pollo niŋnda le ma de ndu.
15 Ma tɛɛndiaa peela pɔmbɔlaŋ a peela bɛndulaŋ.+
Ma veesiaa peela vela le laŋ.+
16 Num nɔ paaleŋ a nyumndaŋ ni.
Num toosiaa nyɛ teŋgaa* a paaleŋ ni.+
17 Num handu pɛŋgulaŋ kpou le lɛŋndeŋ ni.+
Num tosa ni mi sialteŋ a wɔɔleŋ le wa.+
18 Oo Chɛhowa, loonuŋ a mamɔɔ yaamɔɔwaa numnda cho num ndo,
Vɛlɛ a mɛɛ diɔmaa fonduaa cho diola numndaŋ tɛɛmbuuwo yɛ.+
19 Mal yoomu piiŋ numndo visiaa yonduaa o ba le.
Puɛɛnuŋ a yoomula wanaa num aa nda cho nyɛpalaa tusioo choo wa okɔɔ lefafɛɛŋ te.
20 Loonuŋ a kpema numndo okɔɔ,
Kanifuule wanaa dɛnɛ wɔɔŋnda cho a tiuwaa kpou o fondaŋnda manyumndaŋ o lɛŋndeŋ choo.
21 Chɛl mi siɔmbulaŋ la bii wanaa nyɛkindilaa cho choo wa le.+
Maa wana nɔ wana malaa le wo a wana bala fondoo saŋgala diola numndaŋ.+
22 Oo Mɛlɛka, chɔŋ ma suŋgu le diola numndaŋ.
Loonuŋ a mɛɛ diɔmaa fonduaa niilu num mamɔɔ kpɛŋ yɛ okɔɔ.+
23 Puɛɛnuŋ a nyɛ yaamɔɔwaa numnda cho dimioo wo okɔɔ le.
Bɔɔluu wanaa cho diola numndaŋ tɛɛmbuuwo wa cho tuŋ hiouwɔɔ lachi a helɔɔ.