Ɛsodɔɔ

22 “Te waŋndo chiimbuu pɛ nau towaa ɔɔ saa, mbo dii ndu ɔɔ mbo pisi ndu, o nɔ mbo yɔŋgu nauwaa towaa a ŋuɛɛnu sɔŋgɔ nau koŋ, nduyɛ mbo yɔŋgu saa a hiɔɔlu sɔŋgɔ saa koŋ.+

2 “Te waŋndo lo pɛ viileŋ+ ichɔl ma bii ndu, nduyɛ ma lɔɔ ndu mbo vi, kooma nduaŋ ma cho wana o lebol te. 3 Kɛ te ipala i yɔŋnuŋ ni, kooma nduaŋ ma cho wa wana dii ndu wo o lebol.

“O nɔ mbo paawa* le nyɛ o chiimbuu koŋ ndo. Kɛ te o nɔ nyɛ o nyɛ le, a nɔ ma pisi ndu le nyɛm o chiimbuu woŋ. 4 Kɛ te o yɔŋ pɛ ma saaluŋ chɔlu o chiimbuu wo yoomu ndu o ba, o wa nau towa, sofɛlɛ ɔɔ saa, o nɔ mbo yɔŋgu chɔluaa a ŋiɔɔŋ sɔŋgɔ koŋ.

5 “Te waŋndo kuɛ pɛ a chɔluaa nduaa o yondo ndɔɔ niŋ ɔɔ kpele ndɔ makilepiiyo niŋ le diolaŋ, okoŋ mbo mal nda ma kuɛ diolaŋ o kpele pilaa niŋ, o nɔ mbo yɔŋgu yondo ndɔ kɛndɛ kɛndɔɔ ɔɔ kpele ndɔ makilepii kɛndɛ kɛndɔɔ sɔŋgɔ koŋ.

6 “Te waŋndo mal pɛ yiŋndeŋ mi le tiu yondoo niŋ, okoŋ mi le kɔ lom kpɔŋnda ŋwitiilaŋ ɔɔ witiiŋ nda kilu wɔ le woŋ o chiɛi niŋ, ɔɔ mi le kɔ lom kpele pilaa, wana mal yiŋnde leŋ ndo nɔ mbo paawa le nyɛ o nyɛ ŋuɛ.

7 “Te waŋndo ke pɛ chaaŋ ndɔ kaniei* ɔɔ nyɔɔŋ le kɛsioo, nduyɛ ma chiimbuu wana koŋ nyɛm muŋ o ba o ndu lo chiɛiniŋ, te a saaluŋ pɛ viinɔ koŋ, o nɔ mbo paawa le nyɛm muŋ bɛmbɔɔ le diiŋ.+ 8 Kɛ te a seeluŋ viinɔ koŋ te, a nɔ ma hiŋ a wana nyɛm muŋ lo o ndu lo chiɛiniŋ ndo Mɛlɛka tonyaa lachi,+ le sinaa te bala ndɔla cho leniŋ te. 9 Te waŋndo saaluŋ pɛ nyɛ lo ndu o ba wo chaaŋ ndɔ o ba, o wa nau towa, sofɛlɛ, saa, doma, ɔɔ nyɛ o nyɛ cheleŋ, nda ŋiɔɔŋ kpou nɔ ma kuɛ a suɛi keŋ Mɛlɛka tonyaa lachi,+ le sinaa wana kpeekpei nɔ nyɛ koŋ ndo. Mɛlɛka cho chɔm wana nɔ di le wo, okoŋ mi ndu paawa chaaŋ ndɔ bɛmbɔɔ le diiŋ le nyɛ koŋ.+

10 “Te waŋndo ke pɛ chaaŋ ndɔ sofɛlɔɔ, nau towaa, saa, ɔɔ chɔlu kɛ kɛ cheleŋ le mbo mandal ndu, kɛ mi chɔlu koŋ o vi ɔɔ mbo yɔŋuluŋ tau tau ɔɔ mbo luusiaŋ, nduyɛ wana o wana chi ndu le, 11 o nɔ mbo mɛnaŋ po ya Chɛhowa o hɔl maa, o sina isɔɔ a chɔlu chaaŋ ndɔ koŋ okɔɔ le. O hei niŋ, wana nɔ chɔloo wo nɔ mbo chɛl, nduyɛ o bii lɛ nyɛ o nyɛ ndu o ba sɔŋgɔ chɔlu koŋ te.+ 12 Kɛ te chiimbuuwo nda chiimbuu ndu chɔlu koŋ o ba ni, o nɔ mbo paawa chɔlu pilaa. 13 Te o yɔŋ pɛ maa visi biyaa sɛɛsiaa chɔlu koŋ ni, o nɔ mbo hiŋ a o tɔ lo wo le seileŋ. O hei niŋ, o nɔ mbo paawa le chɔlu visi biyaa sɛɛsiaa wo le.

14 “Te waŋndo you pɛ chɔloo chaaŋ ndɔ o ba mi chɔlu koŋ yɔŋuluŋ tau tau ɔɔ mbo vi, nduyɛ mi wana chɔloo ve o hɔlndɔ le, o nɔ mbo paawa le chɔlu koŋ. 15 Kɛ te wana chɔloo wa pɛ o hɔlndɔ, o nɔ mbo paawa le chɔlu koŋ te. Kɛ nduyɛ, te kaniei o yɔŋgu ni le chɔlu koŋ youwo, mɛɛ kanii keŋ cho lo lebɛŋgu.

16 “Te wana pɔnɔɔ vɛɛlu pɛ yufuaanɔ nda del lɔ kɔɔli le challe o nɔ le wo, nduyɛ mbo wa a ndu, o nɔ mbo dɔu ndu fulu, okoŋ mbo simnuŋ laa ndɔ.+ 17 Kɛ te finyaa chuaa kɛɛ pɛ kpooŋ le mbo ke ndu chua ndɔɔ o nɔɔ niŋ, a koŋ kpou, o nɔ mbo paawa kanii nda cho ndu kilul le fulu chuaa ve.

18 “Te wana lanɔ viam yawaa wo wa nya pɛ tɛɛŋ, la nɔ mi la dii ndu.+

19 “Wana o wana hini pɛ a chɔloo, o nɔ mbo sɔla piɔmndo.+

20 “O fulawɔ o Chɛhowa kɔɔli, wana o wana soli pɛ salalaŋ o mɛlɛkaa cheleŋnda lo, o nɔ mbo sɔla piɔmndo.+

21 “La bii mialaa cho nya tɛɛŋ nda biyɔɔ wɔɔŋndo ɔɔ mi la luei nda mɔnɛi le,+ kanifuule mialla nya bɛɛ wa o lɛŋnde Ichipi leŋ niŋ ni.+

22 “Waŋ laanduaa vii piaanduaa wa, a chuaambuaa nɔ ŋfinya le wa, la bii nda biyɔɔ wɔɔŋndo le.+ 23 Te la bii nda pɛ biyɔɔ wɔɔŋndo okoŋ ma chaŋ o ya lo le malaa, I cho nda nilaŋ yaŋɔɔ.+ 24 Hei cho tosa mi dɔɔnuŋ tumbe a nya o kala kala, nduyɛ mi diu nya a muɛi faŋnde. Okoŋ, mi laandaa nyaa a chuauwaa nyaa bɛɛ simnuŋ viiya.

25 “Te a wuu pɛ wanaa niaa bala fonduaa cho nya tɛɛŋ nda o kɛ kɛ kuoo, tosal ndu mɛɛ wanaa wuu waŋnda kueelaŋ nda tosa yɛ le. A nɔ ma hendul ndu nyɛ lechoo le.+

26 “Te a bii pɛ chaaŋ num doma ndɔ bɛndoo o ba le kuee ŋ wuu ndu wo,+ a nɔ ma miŋgi ndu o ba a paale delaaleŋ. 27 Kanifuule doma koŋ kinɛi o nɔ ni, nduyɛ ndu o wounuŋ ni le dialuŋ ndɔŋ kumbɔɔ. Te a bii ndu pɛ doma koŋ o ba, mi o kuɛɛnɛ o wounuŋ yɛ le luaŋ?+ Te o chaŋ pɛ o ya lo le malaa, I cho ndu nilaŋ yaŋɔɔ, kanifuule Mɛlɛka inyiɛɛyo ya cho ni.+

28 “A nɔ ma yei* Mɛlɛka+ ɔɔ yuŋgu lebollo* wanaa nyaa tɛɛŋ te.+

29 “Komɔɔla tasela nya kendi o chiɔɔŋ nyaŋ niŋndaŋ, a nyɛm nya sɔla o doolala nyalaŋ niŋndoŋ,*+ la kiisaŋ le ya muŋ kioo le. Nduyɛ, la nɔ mi la ke ya puaa nyaa tasiaa.+ 30 Nyɛ nya nɔ mi la tosa a nau towa nyaa ɔɔ saa nyaa wo cho hoo ni:+ O kɛ kɛ nda kom pɛ, le palɛi i ŋɔmmɛu o nɔ mbo wa kala ndɔ ikɛi. Kɛ o paale ŋɔmaa leŋ choo, la nɔ mi la ke ya chuale leŋ.+

31 “La nɔ mi la wa wanaa diandaa le ya.+ Nduyɛ te visi biyaa sɛɛsiaa pɛ chɔloo yondoo niŋ, la nɔ mi la de ndu le,+ kɛ la nɔ mi la wuulul tuŋnda.