Sam
O wana sim lachi le chondei yo lo. A “Tɛɛmbuu Ya Le” okɔɔ. Chondii Deeve ve. Mikitam.* Teleŋ Sɔɔ vem waŋnda chiɛi Deeve wo mɛŋgɛlaa le ndu diyɔɔ wo.+
59 Oo Mɛlɛka nuu, piŋi ya yaamɔɔwaa niaa o ba.+
Manda ya yɔŋii wanaa chiŋalaŋ ya wa tiu ya ba.+
2 A yandii, piŋi ya wanaa tosa sɔɔŋ wɔɔŋndoŋ nda o ba,
Nduyɛ ma chiindiaa ya wanaa kɔl tuuwa* o ba.
3 Oo Chɛhowa, tofawɔ! A cho a viŋi viŋiaŋnda le ya delɔɔ choo.+
Wanaa kpaayaa bɛnduaa chiŋalaŋ ya,
O cho nuaa maa bolle kalaleŋ ɔɔ haki le ya tosa le.+
4 Mi che bɛɛ I tosa suɛi wɔɔŋ te, kɛ a cho kiltaŋ ma wa bɛɛndiaŋndo le ya delɔɔ choo.
Te I veelu num pɛ, a yandii chɔŋ ma che.
5 Kanifuule num, Oo Chɛhowa, Mɛlɛka puaa chɔuwa, num cho Mɛlɛka Isɔluɛiya ni.+
Tiondu ma mulul kaalaŋ kpou hɔlla.
Tuiinuŋ wanaa mulu muluaŋaa tusi waŋnda nyɛpalaa choo wa inyiɛɛ le.+ (Sila)
6 Ichɔl o ichɔl, ma veŋnuŋ le ya delɔɔ choo.+
A cho busɔɔ maa ŋtuŋ,+ ma balu chioo silɔ.+
7 Tofawɔ nyɛ cho nda taaliaa o lasondo wo.
Chɔchɔŋ ndaŋ cho ko maa mɔɔŋ faŋndoŋ.+
Ma dimi aa: “Wana o wana cho naa tueiyɔɔ le.”+
8 Kɛ num Oo Chɛhowa, a cho nda mamɔɔ.+
A cho kaalaŋ kpou mamɔɔ chiki chiki.+
9 Oo Mɛlɛka nuu, num cho kpaaya nuu ni. I cho hiouwɔɔ lachi a num chumndo,+
Kanifuule num cho naa niaa viaŋnaŋaa kala kalaa ni.+
10 Mɛlɛka chɔm ya kaala lo lechoo wo wo cho ya mala.+
O cho tosa mi che yaamɔɔwaa niaa o delioo.+
11 Diu nda le, yɔŋii wanaa niaa puɛɛnuŋ.
Soliŋ kpaaya numndo kpeku ma wa heeloo a tuusoo.
Oo Chɛhowa, num cho boo naa chɔuwo ni.+ Lelaŋ, tosa ma del.
12 Maa heelɔŋ ndaa tusi nda nyɛpalaa choo,+
Kanifuule a cho hakioo tosaa a lasondo,
Ma mɛɛniaa waŋnda, nduyɛ ma hui nda a nyɛ nda dimi wo.
13 Basu nda tɛɛ a kɔl num tuuwo.+
Basu nda tɛɛ, le halikpeŋ a ve lɛ le.
Tosa ma sina maa num cho Chekɔpu choo ni, vɛlɛ a ba o ba fee o lɛŋndeŋ choo.+ (Sila)
14 Tosa ma miiŋgu a nyumndaŋ.
Tosa ma busu maa ŋtuŋ, ma balu chioo silɔ.+
15 Tosa ma wa heeloo a tuusoo le nyɛ nda sɔla ma de wo.+
Tosa ma pim, ɔɔ ma sɔla yiyaa le.
16 Kɛ le ya ndu, I cho chondei soli a kpaaya numndo okɔɔ.+
Nduyɛ idii, mi dimul waŋnda a kaala lo lechoo numndo okɔɔ a nyaale.