Saamiɛɛ Diiŋ Ndɔɔ

4 Mɛɛ po Sɔɔ wo Isi-bosiɛti+ tuei maa Abina vi o Hɛbulɔŋ niŋ,+ mi yoomuaŋ ma fula ndu po.* Nduyɛ, mi Isɔluɛiya kpou luɛi o buulaŋndo niŋ. 2 Po Sɔɔ wo ndoo nɔ puaa chɔuwaa ndaa kei waŋnda delɔɔ choo le nyɛm ndaŋ puŋgaa wa. Nduyɛ, mbo hɛli puaa a ŋiɔɔŋ le ma wa nda bolleŋ: Puaa haa o pilɛ diolaŋ aa Bana, o pilɔɔ diolaŋ aa Luechabi. Luimɔŋ, wana waa Biaalɔti ndoo velu nda ni, fulaa o kaale Bɛŋjamiŋ ndeŋ choo. (Biaalɔti bɛɛ,+ o tanda Bɛŋjamiŋ ndo choo ndaa chɔm ndu ni. 3 Waŋnda Biaalɔti yɛ, nyaanɔŋndo ndaa nyaanuŋ Kitiɛm ni.+ Nduyɛ haaa a paale hauleŋ ndeŋ, mialla nda cho loŋ ni.)

4 Po Sɔɔ wo Chonataŋ,+ ndoo nɔ poo diolaŋ aa Mɛfibosiɛɛ. Nduyɛ wana bɛvɛiyo o wa ni.+ O wa wɔsilaŋ la ŋuɛɛnu mi yooŋgoo fula Chɛsiluɛɛ+ a Sɔɔ nda Chonataŋ okɔɔ. Mɛɛ wana wa ndu mandaa wo tuei yooŋgu koŋ, mbo chua ndu mbo nyaanuŋ a ndu. Kɛ mɛɛ o wa nyaanɔŋndo a kɔl fulaa koŋ, mbo hialuŋ ndu mbo del, okoŋ mbo sɔla namtaleŋ.+

5 Mi puaa Luimɔŋ nda wana waa Biaalɔti, Luechabi nda Bana, chaŋ a paale kalaleŋ ma kua o Isi-bosiɛti lo bɛɛ. A teleŋ koŋ, Isi-bosiɛti wa pɛŋgi ipalaa. 6 Mɛɛ nda wa luɛiyɔɔ chiɛiniŋ, ma chɔm maa witiiyoŋ nda cho laŋ kɔndɔɔ ni. Okoŋ ma chuku ndu demboo. Okoŋ kɔɔli, mi Luechabi nda Bana+ nyaanuŋ. 7 Teleŋ nda luɛi chiɛiniŋ ndo, a komal ndu ihini o kpele o lumui ndɔɔ niŋ. Ma chuku ndu mbo wu, nduyɛ ma kialu ndu bolleŋ. Okoŋ kɔɔli, ma chua bolle ndɔleŋ, ma lɔl kɔlaŋ a leŋ pii pii o nɛi kuɛ o tanda Aluaba wo niŋndo. 8 Ma kua a bolle Isi-bosiɛti leŋ+ o Deeve lo Hɛbulɔŋ. Ma dimul ndu aa: “Mi che bolle Isi-bosiɛti leŋ po Sɔɔ wo, yaamɔɔnɔ num+ wa kindiŋndo le num diyɔɔ wo.+ O paale hauleŋ ndeŋ choo, Chɛhowa miŋgul Sɔɔ nda puaa nduaa maa le masanɔ naa.”

9 Kɛ mi Deeve dimul Luechabi nda Bana, puaa Luimɔŋ nda, wana waa Biaalɔti aa: “I mɛnaŋ po o Chɛhowa, Mɛlɛka cho yoomu wo lo, o piŋi ya o dɛnɛla palaala nilaŋ niŋ kpou wo maa,+ 10 mɛɛ waŋndo chuu ya yooŋgoo aa ‘Sɔɔ vi,’+ mbo yiyaŋ maa yooŋgu kɛndɔɔ o chuu ya ni. Kɛ mi bii ndu mi dii ndu+ o Sikila niŋ. Yooŋgu o chuu ya wo, paawa* ndɔɔ wa koŋ ni. 11 Te I tosa wɔ pɛ keŋ, ɔɔ niŋ te wanaa dɛnɛ wɔɔŋnda kɔ dii pɛ wana sakpoo o ndu lo chiɛiniŋ o kpele ndɔɔ choo? Baa la yiyaŋ pa maa mi mal nya lende le kooma nduaŋ+ I wɔɔsuu nya o lɛŋndeŋ choo le?” 12 Okoŋ, mi Deeve dimul puaa nduaa le ma dii nda.+ Ma kili nda balaŋ a peloŋ, ma landu nda+ o mɛŋma ibuŋgaŋ ikɛi Hɛbulɔŋ. Kɛ ma chua bolle Isi-bosiɛti leŋ, ma kumbu leŋ o fondaŋ nda kumbu Abina o Hɛbulɔŋ niŋndo.