Maki

4 Mi Chiisu kandu vɛlɛ waŋnda pɛɛkoo o mɛŋma ihɛllaŋ ikɛi, nduyɛ mi faŋga bɛndoo chuuŋgiaŋ ndu ikɛi. Okoŋ, mbo luɛi o dɛndɔɔ niŋ mbo chal. Mbo faŋaŋ tiŋ o kɔŋgɔɔ ikɛi. Kɛ mi faŋgaa kpou chal o pee mɛŋma ihɛllo kɔŋgɔ.+ 2 Mbo kandu nda sɔɔŋ bɔɔbɔɔ pɛɛkoo o talelaŋ niŋ.+ Mɛɛ o wa nda pɛɛkoo, mbo dimul nda aa:+ 3 “La yaŋ nilaŋ! Po pilɛ chɛŋ ni mbo kua yɛiye saŋɔɔ.+ 4 Mɛɛ o wa ndi saŋɔɔ, mi kulloŋ ŋ pum deli o nɛi kɔllo, okoŋ mi youwa huŋ chɔuviaa muŋ. 5 Mi ŋ pum deli o lɛŋnde bandilaleŋ choo naa puulu bɔɔ ve le wa, okoŋ miŋ keleŋa wulɔɔ.+ 6 Kɛ mɛɛ paaleŋ le fula mi le luaa muŋ, miŋ nyamala, nduyɛ miŋ vesa, kanifuule muŋ tul ŋpuundu le. 7 Mi ŋ pum deli o yɔɔŋ tɛɛŋ. Mi yɔɔŋ hindu, miŋ kaya kayaŋ muŋ. Le hei, ŋ chuulu le.+ 8 Kɛ mi ŋ pum deli o lɛŋnde kɛndɛleŋ choo. Miŋ hindu, nduyɛ miŋ chuulu. Yasaa o pum kulloŋ hiouwɔɔ 30, hoo hiouwɔɔ 60, o pum yɛ hiouwɔɔ 100.”+ 9 Mbo chɔɔlu dimi aa: “Num o num nɔ pɛ nila tuɛiyaa isɔɔ, mɛɛ yaŋ nilaŋ.”+

10 Mɛɛ o lo ndupilɛ, mi wanaa wa ndu ikɛiya a kiilaa nduaa 12 nda kandu ndu nyuuniaa a talelaŋ ndaŋ okɔɔ.+ 11 Mbo dimul nda aa: “Nya sɔla dioo ni le mi la bii sɔɔŋ viaŋnaŋ+ cho a Masale Mɛlɛkaleŋ okɔɔ woŋ bila. Kɛ le acheleŋnda, mɛɛ mi pɛɛku nda o talelaŋ niŋ.+ 12 Kanifuule, ma tofa, kɛ a chi le. Mi che bɛɛ a cho tueiyɔɔ, kɛ a bii bila kposoŋ te, kɛlɛŋgaa niŋ te ma mal yɔŋnda ndala wɔɔŋndaŋ le ma sɔla malɔɔ hakioo.”+ 13 Mbo nyuna nda aa: “Te la bii taloo hoo bila le, vɛɛnɛ nya looku yɛ niŋ talela cheleŋndaŋ kpou biyɔɔ bila?

14 “Wana saŋ yɛiye wo saŋ diom Mɛlɛkaa.+ 15 Kuluŋ deli o nɛi kɔllo woŋ cho ko maa waŋnda apum, a tuei diom Mɛlɛkaa wa. Kɛ o lepilɛ niŋ kpe, mi Setana huŋ+ poonda ndu nda o lakɔl.+ 16 Kuluŋ deli o lɛŋnde bandilaleŋ choo woŋ sim le waŋnda apum, a tuei diom Mɛlɛkaa, ma chɛl ndu a kɔl kɛndɛ wa.+ 17 Kɛ le mɛɛ o luei ŋpuundu le yɛ, ma hiau lachi le teleŋ biŋgi. Kɛ mɛɛ nyɛpalaa ɔɔ tɔɔndaŋndo komal dɔɔ nda le sabu diomndo hoo, ma mal laalaŋ ndaa. 18 Wanaa cheleŋ cho maa kuluŋ deli o yɔɔŋ tɛɛŋ ndoŋ. Nda cho wanaa tuei diom Mɛlɛkaa wa ni.+ 19 Kɛ mi buulaŋnda+ chieeŋndo hoo,* yeemɛi sullo,+ a yeemɛi+ nyɛm cheleŋndoŋ hiau nda o kɔl kɔɔli, miŋ kaya kayaŋ diom nda tueiyo. Okoŋ mbo foofi. 20 Kuluŋ deli o lɛŋnde kɛndɛleŋ choo woŋ sim le wanaa yaŋ diom Mɛlɛkaa nilaŋ, ma chɛl ndu a kɔllo kpou, okoŋ ma yɔŋgu kɔmndeŋ nda. O pum kulloŋ hiouwɔɔ 30, o pum hiouwɔɔ 60, o pum yɛ hiouwɔɔ 100.”+

21 Mi Chiisu dimul nda vɛlɛ aa: “Waŋndo mɛndul lambuiyo mbo kuumbuu kambɛiyo lechoo ɔɔ mbo luei ndu o kpeloo bɛŋgu le, lende le? Baa o cho o nyɛ kɛsiaa la lambuiyo choo le o kɛsi ndu le?+ 22 Nyɛ o nyɛ cho o viaŋnaŋ, o cho hunɔɔ fula kpendekele. Nyɛ o nyɛ cho o kumbaa, o cho hunɔɔ kumbiŋ.+ 23 “Num o num nɔ pɛ nila tuɛiyaa isɔɔ, mɛɛ yaŋ nilaŋ.”+

24 Mbo chɔɔlu nda dimul aa: “La kɛsiŋ nyɛ nya cho tueiyɔɔ wo o lakɔl.+ Mɛɛ nya tuulul chaanda yɛ, lende koni nda cho nya tuulul ni, nduyɛ mbo hiou bɛɛ mɛɛ nya tuulul nda yɛ. 25 Kanifuule, wana o wana nɔ, o cho chɔɔlu sɔla tau.+ Kɛ wana o wana nɔ le, hali o pɔmbɔ o nɔ wo bɛɛ, a cho ndu ndu poonda o ba.”+

26 Mbo hiau lachi a nda dimullo aa: “Masale Mɛlɛkaleŋ le cho ko maa po kɔ saŋ yɛiye wo. 27 Te nyumndaŋ ma tol pɛ, o kɔ hini. Te paaleŋ le sɛ pɛ, o chɛŋ, haaa mbo cha mi kuluŋ o saŋ ndoŋ wul, miŋ bandu bandei pila. Kɛ o sina mɛɛ ŋ looku hindɔɔ yɛ le. 28 Lɛŋndeŋ leŋ pila le nɔla mi le tosa mi yɛiye hindu o pɔmpɔmbɔ. Te i hindu pɛ, i mɛ, i chuulu, i nɛɛŋguŋ. 29 Te i vesa pɛ, o kandu kouwɔɔ a wɔlɔtɔɔ, kanifuule teleŋ kuauwaa fuuluu ni.”

30 Mbo hiau lachi a dimioo aa: “A yɛɛnɛ naŋ tuu yɛ Masale Mɛlɛkaleŋ, ɔɔ a tale kuɛɛnɛ naŋ tɛɛsiaa yɛ leŋ? 31 Le cho ko maa kulii mɔsitaa ve. Teleŋ nda tɔl ndi wo, kulle hei ndii hiou mɛsɛla a kulloŋ kpou o lɛŋndeŋ choo.+ 32 Kɛ mɛɛ nda tɔl ndi, mi i hindu tau tau, nduyɛ mi i simnuŋ yɔm bɛndoo mbo hiau yɔmnde kpou o fondaŋ koŋ. Mi i soli lɛuwuŋ bɛndoŋ, mi youwa sɔla naa lɔlaa o wunduma nduaŋ bɛŋgu.”

33 Mi Chiisu pɛɛku waŋnda diom Mɛlɛkaa o talela bɔɔbɔɔ niŋ.+ Mi keŋ tosa ma yaŋ ndu nilaŋ. 34 A tonya, ndoo suu o nda lo mbo kɛɛ nda taloo dimul te. Kɛ te ndoo wa pɛ a buɛiyaa nduaa kpeele, mi ndoo tɛɛsial nda sɔɔŋ muŋ kpou.+

35 O paale leŋ choo, mɛɛ paaleŋ le del, mbo dimul nda aa: “La ŋ taŋnuŋ o kɔŋgɔɔ leeloo.”+ 36 Mɛɛ buɛiyaa Chiisu wa dimul faŋgaa le ma kuɛ o la nda lo, ma luei ndu o dɛndɔɔ niŋ. Nduyɛ dɛndɛla cheleŋ la wa ndu ikɛi.+ 37 Okoŋ kɔɔli, mi hueiyii wɔɔŋ wɔɔŋnde kandu hɔŋndo. Mɛŋma wa hiilɔŋndo waŋ ma wa luɛiyɔɔ o dɛndɔɔ niŋ, nduyɛ ndoo lo niŋ chobe mi dɛndɔɔ ndoo mɔɔwa.+ 38 Kɛ Chiisu waŋnuŋ o luaŋ o dɛndɔɔ tumndo. Mbo handu bolleŋ o pileiyo* choo. Okoŋ ma tindi ndu, ma dimul ndu aa: “Wana Pɛɛkaa, a cho chɔ maa loo le naŋ hiŋ nuaa le?” 39 Okoŋ, mbo chaŋ mbo kpaa hueiye. Mbo dimul mɛŋndaŋ aa: “Mei! I tuɛi lɛ hau le dɛ!”+ O lepilɛ niŋ kpe, mi nyɛ o nyɛ mei doŋ. 40 Okoŋ mbo nyuna nda aa: “Le yɛɛnɛ nya cho yɛ siooŋnde? Baa la nɔ laalaŋ kposoŋ te?” 41 Mi siooŋnde bii nda kpou, okoŋ ma dimulaŋ aa: “Wana maavɛɛ kpeekpei cho yɛ hoo? Hueiye a mɛŋndaŋ bɛɛ diikɔŋndo ndu.”+