Isikiɛɛ

18 Mi Chɛhowa suaa vɛlɛ naa ya chua aa: 2 “Mi la dimi taloo o Isɔluɛi niŋ aa, ‘Finyaa de kilepiima waalɛiyaŋ, kɛ puaa ndaa chiŋndoŋ waala ni.’ Yɛɛnɛ taloo hoo sim yɛ?+

3 “‘Mɛɛ i cho kpendekele maa I cho yoomu yɛ, la cho lɛ wa taloo hoo dimi o Isɔluɛi niŋ te.’ Ya Chɛhowa, Mɛlɛka Kpuluŋguma Bɛndoo dimi lende ni. 4 ‘Yoomulaŋ* kpou, ya nɔ laŋ ni. Yoomu finyaa vɛlɛ a yoomu poleŋ, ya nɔ laŋ ni. Yoomu* tosa hakioo wo, ndu wu ni.

5 “‘Yiyaŋndɔ maa waŋndo cho sakpo nduyɛ mbo tosa sɔɔŋ o nɛi sakpoo choo. 6 O di nyɛdiaa lasooluuwo o pembuŋ bɛndoŋ choo le,+ o sooluu piɔmaa nɔɔlɛiyaa* waŋnda Isɔluɛi sooluu wa le, o suunda a lanɔ pila le,+ nduyɛ o ve a wana lanɔ cho teleŋ ndɔɔ chɔɔ wo le.+ 7 O tosal wana suɛi wɔɔŋ te.+ Te waŋndo lendul ndu pɛ nyɔɔ o ba, mbo miŋgul ndu.+ O chiimbuu wana o wana le,+ kɛ mbo ke wanaa yiaaŋ ma cho nɛiyo wa nyɛdiaa.+ Nduyɛ mbo yɔŋgu wanaa cho o fɛlioo niŋndo nyɛlaŋ le wounɔŋndo.+ 8 O wuu wana kuee mbo handu nyɛ lechoo le,+ nduyɛ mbo soli balaŋ o kafalaŋ niŋ.+ Mbo kelu waŋnda yamaŋ tɛɛŋ o nɛi sakpoo choo.+ 9 Mbo hiou lachi a sawala nilaŋ diikɔŋndo, vɛlɛ a nɛila nila chɔmaalaŋ tolɔɔ kɔɔli, le halikpeŋ mbo tosa sɔɔŋ o nɛi sakpoo choo. Wana sakpoo wana waa nuaa cho ni. Nduyɛ a tonya, o cho hiouwɔɔ lachi a waa yoomu.’+ Ya Chɛhowa, Mɛlɛka Kpuluŋguma Bɛndoo dimi lende ni.

10 “‘Kɛ yiyaŋndɔ maa o velu poo, mi po koŋ simnuŋ viinɔɔ+ ɔɔ wana diyaa,*+ ɔɔ mbo tosa sɔɔŋ muŋ i pilɛ, 11 (mi che bɛɛ finya ndɔ tosa i kɛ kɛ le) mbo de nyɛdiaa lasooluuwo o pembuŋ bɛndoŋ choo, mbo suunda a lanɔ pilaa, 12 mbo bii wanaa bala fonduaa biyɔɔ wɔɔŋndo,+ mbo chiimbuu nyɛm pilaŋ, te waŋndo ke ndu pɛ landei o miŋgi le, mbo sooluu piɔmaa nɔɔlɛiya,+ mbo luei balaŋ o sɔɔŋ nɔɔlɛiyoŋ tosaa niŋ,+ 13 nduyɛ te waŋndo bii ndu pɛ kuoo o ba o hendul ndu nyɛ lechoo.+ Po waa nuaa hiu lachi a waa yoomu le. Le mɛɛ o tosa sɔɔŋ nɔɔlɛiyoŋ muŋ kpou yɛ, o nɔ mbo sɔla piɔmndo. Ndupila kooma nduaŋ ma cho wa o lebol ni.

14 “‘Kɛ yiyaŋndɔ maa poo che finya ndɔ sɔɔŋ muŋ kpou tosaa, mi ndu wou laba o muŋ tosaa niŋ te. 15 O di nyɛdiaa lasooluuwo o pembuŋ bɛndoŋ choo le, o sooluu piɔmaa nɔɔlɛiyaa waŋnda Isɔluɛi sooluu wa le, o suunda a lanɔ pila le, 16 o tosal wana suɛi wɔɔŋ te, o kukaŋ nyɛ nda lendul ndu o ba wo choo le, o chiimbuu wana o wana le, kɛ mbo ke wanaa yiaaŋ ma cho nɛiyo wa nyɛdiaa, nduyɛ mbo yɔŋgu wanaa cho o fɛlioo niŋnda nyɛlaŋ le wounɔŋndo. 17 O tusi wanaa bala fonduaa nyɛpalaa choo le, o wuu wana kuee mbo handu nyɛ lechoo le, mbo diikuŋ sawala nilaŋ, nduyɛ mbo kuɛ o nɛila nila chɔmaalaŋ choo. Wana waa nuaa sɔla piɔmndo le biondɔŋ finya ndɔ wo le. O cho hiouwɔɔ lachi a waa yoomu. 18 Kɛ le mɛɛ finya ndɔ tosa kafalaŋ, viileŋ, nduyɛ mbo tosa suɛi wɔɔŋnde wanaa niaa tɛɛŋ yɛ, o cho piɔmndo sɔla le biondɔŋ ndɔɔ.

19 “‘Kɛ mi la dimi dɔɔ aa: “Le yɛɛnɛ poleŋ le nɔ mi le sɔla dɛnɛ palaa le biondɔŋ finya ndɔ tosa wo le?” Le mɛɛ poleŋ le tosa sɔɔŋ o nɛi sakpoo choo nduyɛ mbo diikuŋ sawala nilaŋ kpou yɛ, o cho hiouwɔɔ lachi a waa yoomu.+ 20 Yoomu* tosa hakioo wo, ndu wu ni.+ Tɔɔyaŋ nɔ mbo wa poleŋ choo le haki finya ndɔ tosa wo le, nduyɛ tɔɔyaŋ nɔ mbo wa finyaa choo le haki po ndɔɔ tosa wo le. A cho wana cho sakpo wo yamɛi kilul a mɛɛ sakpoyɛi nduɛi cho yɛ, nduyɛ ma kilul wana dɛnɛ wɔɔŋndo yamɛi a mɛɛ dɛnɛ wɔɔŋ ndɔɔ cho yɛ.+

21 “‘Kɛ te wana dɛnɛ wɔɔŋndo mulul pɛ sɔɔŋ wɔɔŋ o wa tosaa woŋ kpou kɔɔ, mbo hiou lachi a sawala nilaŋ biyɔɔ nduyɛ mbo tosa nyɛ cho sakpo wo pɛ, o cho hiouwɔɔ lachi a waa yoomu. O cho wu le.+ 22 Sɔɔŋ wɔɔŋ o tosa woŋ kpou, i pilɛ bɛɛ cho lɛ ndu wa kuee le.*+ O cho hiouwɔɔ lachi a waa yoomu le mɛɛ o tosa sɔɔŋ sakpo yɛ.’+

23 “‘Baa yeemɛi nii i cho ni le mi wana dɛnɛ wɔɔŋndo vi?+ Baa o cho yeemɛi nii le cho le mbo mulul yɔŋ ndɔ wɔɔŋndo kɔɔ, okoŋ mbo hiou lachi a waa yoomu le?’ Ya Chɛhowa, Mɛlɛka Kpuluŋguma Bɛndoo dimi lende ni.+

24 “‘Kɛ te wana cho sakpo wo mal pɛ sɔɔŋ cho sakpo woŋ tosaa mbo muliŋ sɔɔŋ wɔɔŋndoŋ* tosaa, baa mbo wa pa yoomu? Sɔɔŋ kɛndɛŋ o tosa woŋ kpou, i pilɛ bɛɛ I loonuŋ ndi le.+ Le mɛɛ o kɛɛ le waa sakpo nduyɛ mbo tosa hakioo yɛ, o cho piɔmndo sɔla.+

25 “‘Kɛ mi la dimi dɔɔ aa: “Chɛhowa tosa sɔɔŋ o nɛi sakpoo choo le.”+ Oo waŋnda Isɔluɛi, yandii la yaŋ nilaŋ! Baa ya tosa sɔɔŋ o nɛi sakpoo choo le ni?+ Baa o cho nya le kɛɛ le sɔɔŋ tosaa o nɛi sakpoo choo le?+

26 “‘Te wana cho sakpo wo mal pɛ sɔɔŋ cho sakpo woŋ tosaa mbo mbo muliŋ sɔɔŋ wɔɔŋndoŋ tosaa, okoŋ mbo vi le sɔɔŋ wɔɔŋ o tosa woŋ, mɛɛ sɔɔŋ muŋ cho tosa ni mbo sɔla piɔmndo.

27 “‘Te wana dɛnɛ wɔɔŋndo mal pɛ dɛnɛ ndɔ wɔɔŋndo mbo muliŋ nyɛ cho sakpo wo tosaa, o cho yoomu* ndɔɔ manda.+ 28 Te o miiŋgu pɛ o ndupila niŋ, mbo mulul sɔɔŋ wɔɔŋuŋ o wa tosaa woŋ kpou kɔɔ, o cho wa yoomu. O cho wu le.

29 “‘Kɛ mi waŋnda Isɔluɛi dimi dɔɔ aa: “Chɛhowa tosa sɔɔŋ o nɛi sakpoo choo le.” Oo waŋnda Isɔluɛi, baa ya kpeekpei tosa sɔɔŋ o nɛi sakpoo choo le ni?+ Baa o cho nya le kɛɛ le sɔɔŋ tosaa o nɛi sakpoo choo le?’

30 “‘Lelaŋ, nya waŋnda Isɔluɛi, I cho wana o wana yamɛi kilul a mɛɛ kelala ndɔlaŋ la cho yɛ.+ La mulul sɔɔŋ wɔɔŋ nya cho tosaa woŋ kpou kɔɔ, yɔŋii ŋ simnuŋ pou boŋaa tosa mi dɛnɛ palaa tol nya choo wo.’ Ya Chɛhowa, Mɛlɛka Kpuluŋguma Bɛndoo dimi lende ni. 31 ‘Oo waŋnda Isɔluɛi, le yɛɛnɛ mi la sɔla piɔmndo?+ La soli balaŋ o sɔɔŋ wɔɔŋ nya tosa woŋ niŋ kpou,+ mi la nɔ* kɔlta sɛnɛilaŋ a yiyaŋnda sɛnɛilaŋ.’+

32 “‘I nɔ iyeema o piɔm wana o wana niŋ te.+ Lelaŋ, la mulul yɔŋ wɔɔŋndo kɔɔ okoŋ mi la wa yoomu.’ Ya Chɛhowa, Mɛlɛka Kpuluŋguma Bɛndoo dimi lende ni.”+