Sam
YAU HIƆƆLOO
(Sam 90-106)
Piɛile Muuse leŋ, buɛi Mɛlɛka tonyaa.+
90 Oo Chɛhowa, kani masindɛ num cho naa naŋ challa* ni.+
2 Oo Mɛlɛka, tuupa ma toosiaa pembuŋ bɛndoŋ,
Ɔɔ ma toosiaa lɛŋndeŋ, lɛŋnde kɛndɛ kɛndɛle naŋ nyɔɔŋ ndeŋ, a wa niŋ.+
Nduyɛ a cho wa le fɛɛŋ a fɛɛŋ.+
3 Ma tosa mi wanachioo miiŋgu o puuloo niŋ.
Ma dimi aa: “Nya chuauwaa ŋwaŋnda chiee, la miiŋgu o puuloo niŋ.”+
4 Kanifuule wɔsilaŋ waapilɛ la cho ko num o hɔl maa chiɛi,+
La cho ko mɛɛ nyumndaŋ ma hiau nuaa yɛ.
5 Ma basu nda tɛɛ,+ mɛɛ waŋndo hiau nuaa o luaŋ o lepilɛ niŋ kpe yɛ.
A cho ko mɛɛ bil puiyaa wa nuaa idii yɛ.+
6 Idii mbo pui tɛɛ tɛɛ,
Kɛ ichɔl mbo nyamala okoŋ mbo vesaŋ.+
7 Tumbe numndo mel naa chɔŋɔmu,+
Nduyɛ siooŋnde bii naa a kɔl num tuuwo.
9 Kɔl num tuu bɛndoo cho tosaa mi palɛi nɛi wa keleŋaa chuwɔɔ.
Nduyɛ mi wɔsila naalaŋ la fuuluu o mɛɛlulaŋ, mɛɛ waŋndo yoomu nuaa fuu yɛ.
10 Wɔsilaŋ 70 ɔɔ 80 naŋ chii yoomu ni,+
Te waŋndo nɔ pɛ dialuŋ kalaŋ tau.
Kɛ a koŋ kpou, o saŋga bɛndoo niŋ a kɔl tambɛiyo naŋ chii laŋ ni.
Haupa mi la keleŋa chuwɔɔ, okoŋ miŋ vi.+
11 O nɛɛnɛ nɔla yɛ mbo sina mɛɛ kpɛ tumbe numndo nɔ kpaayaa yɛ?
Kɔl tuu numndo cho o bɛndu mɛɛ mɛɛ siooŋii naŋ nɔ le numnde cho nuaa yɛ.+
12 Pɛɛku naa mɛɛ naŋ chɔm palɛi nɛi yɛ,+
Le halikpeŋ miŋ sɔla kɔl taasioo.
13 Oo Chɛhowa, a yandii miiŋgu nanuŋ!+ Le vɛɛ kpɛ hei cho yɛ naa viouwɔɔ choo?+
Tuiinuŋ buɛiyaa numnda inyiɛɛ.+
14 Idii o idii, tosa miŋ sinaŋ nyɛkɛndɛi a kaala lo lechoo numndo,+
Le halikpeŋ miŋ soli chonduŋ kɔl kɛndɔŋ, nduyɛ miŋ dɔɔnuŋ nyaale+ haaa a boondii naŋ cho wa yoomu ve.
15 Tosa miŋ dɔɔnuŋ nyaale le sɔŋgɔ palɛi ŋ tusi naa nyɛpalaa choo ve.+
Kanifuule le wɔsiŋ bɔɔbɔɔ, ŋ wa nyɛpalaa sinaŋndo.+
16 Maa buɛiyaa numnda chɔ walta numndaŋ,
Nduyɛ maa chuauwaa ndaa chɔ naŋɔɔ num bɛndoo.+
17 Maa Chɛhowa Mɛlɛka naa dɔu naa sala,
Maa salaa wa o walta naŋ tosa laŋ choo.
A tonya, salaa wa o walta naalaŋ choo.+