Maki

3 Paale pilɛ, mi Chiisu luɛi vɛlɛ o chiɛi Chuuwa piɛi Mɛlɛka wo niŋ. Po pilɛ wa loŋ, baa wa ndu o vesɛi.*+ 2 Le hei, mi waŋnda wa ndu tofaa le chɔɔ te o cho pɛ poo hoo siŋgi o Paale Pɛŋgiaaleŋ choo, le halikpeŋ mi ndaa hol ndu suɛi. 3 Mbo dimul po ba vesɛiyo aa: “Chɔŋ, ma hiŋ tɛɛŋ nanuŋ deŋ.” 4 Okoŋ mbo nyuna nda aa: “Baa o bɛnda pa le suɛi kɛndɛi ɔɔ suɛi wɔɔŋnde tosaa o Paale Pɛŋgiaaleŋ choo? Baa o bɛnda pa le yoomu waŋndo piŋioo ɔɔ le ndu diyɔɔ o paaleŋ ndeŋ choo?”+ Kɛ ma mei kpili. 5 Mɛɛ Chiisu tofa nda a hɔlla a tuu kpɛi, nduyɛ mi mɔnɛi bii ndu le kɔlta ndala vesɛilaŋ,+ mbo dimul po ba vesɛiyo aa: “Siɛndi ba numndo.” Mbo siɛndi baa, okoŋ mi ba ndɔɔ miiŋgu ndu nyɛkɛndɛi. 6 Le hei, mi Falisiiya fula ma kɔ bii bɔŋaŋndo chɔ chɔ a kunda Hɛlɔɔ wo+ le mɛɛ nda looku ma dii Chiisu yɛ.

7 Kɛ mi Chiisu faŋaŋ loŋ nda buɛiyaa nduaa, ma kua o pee mɛŋma ihɛllo. Mi waŋnda faŋga bɛndoo tual ndu kɔɔli, fulaa Kalili a Chudiaa.+ 8 Mɛɛ waŋnda faŋga bɛndoo Chulusalɛm, Idumiaa, Chɔɔdaŋ leeloo, Taaya, a Saidɔŋ tuei a walta o wa tosaa laŋ okɔɔ, ma huŋ naa ndu chua. 9 Okoŋ, mbo dimul buɛiyaa nduaa le ma bɛɛndial ndu pɔɔ dɛndɛ pɔmbɔɔ le luɛiyɔɔ leniŋ, yɔŋii faŋgaa piɔ ndu choo doŋgo doŋgo. 10 Le mɛɛ o siŋgi wanaa bɔɔbɔɔ yɛ, mi wanaa wa a naala kala kalalaŋ nda kpou wa nyiindaŋndo le ndu pilaŋndo.+ 11 Nduyɛ nyinaa wɔɔŋnda bɛɛ,+ teleŋ o teleŋ ndaa che ndu pɛ, a beŋ ndu wulaŋ a deŋi choo choo kpeleŋ aa: “Num cho Po Mɛlɛkaa ni.”+ 12 Kɛ teleŋnda bɔɔbɔɔ, mi Chiisu ndoo sila nda o kala kala maa a dimul waŋnda a ndu okɔɔ le.+

13 Mbo hel o pembei choo, mbo veelu wanaa o yeema wa.+ Okoŋ ma kua naa ndu chua.+ 14 Nduyɛ, mbo hɛli puaa 12, mbo veelu nda aa kiilaa. Nda wa ndu balɔɔ kɔɔli ni. Nda ndoo viam yooŋgu kɛndɔɔ dimioo ni. 15 Mbo ke nda kpaayaa le nyinaa wɔɔŋnda touwɔɔ.+

16 Diola puaa 12+ o hɛli kaŋ nda la cho laŋ ni: Saimɔŋ, o Chiisu ke vɛlɛ diolaŋ aa Pitɛ wo,+ 17 puaa Sɛbidi wa Chemisi nda Chɔŋ pɔmbɔ ndɔ (mbo ke nda vɛlɛ diolaŋ aa Buanachii, koŋ cho ni, “Puaa Letaŋnda”),+ 18 Andulu, Filipi, Batolomi, Maatiu, Tɔmɔsi, Chemisi po Afiɔɔsi wo, Tadiɔɔsi, Saimɔŋ Wana Dialuŋ Fulaa, 19 a Chuda Isikaliɔɔ, o pisi ndu o mɛɛlulaŋ ndo.

Okoŋ mbo luɛi o chiɛiyo o pum niŋ. 20 Mi faŋgaa huŋ chuuŋgiaŋ vɛlɛ loŋ. Le nyɛdiaa dioo bɛɛ a sɔla fonda le. 21 Kɛ mɛɛ wanayaŋ ndɔŋ tuei a ndi okɔɔ, ma kua le ndu solioo nda tɛɛŋ, kanifuule a wa dimioo aa: “Seemaa o seema nuaa ni.”+ 22 Mi wanaa pɛɛku waŋnda sawala Mɛlɛkalaŋ nda, a fula Chulusalɛm nda wa dimioo aa: “Bɛɛsibɔɔ* cho poo hoo kɔɔli. Nduyɛ, a kpaaya masa nyinaa wɔɔŋnda o cho nyinaa wɔɔŋnda touwɔɔ ni.”+ 23 Mi Chiisu veelu nda, mbo dimul nda o talelaŋ niŋ aa: “Vɛɛnɛ Setana nɔla yɛ mbo tou Setana? 24 Te masaleŋ le piɔuwaŋ pɛ ma kandu sɔŋgɔɔ ndapila tɛɛŋ, masale leŋ le sim te.+ 25 Nduyɛ te chiɛiyo piɔuwaŋ pɛ ma kandu sɔŋgɔɔ ndapila tɛɛŋ, chiɛi koŋ nɔla mbo sim te. 26 Lende koni, te Setana simul pɛ ndupila mbo piɔuwaŋ tɛɛŋ, o sim te. Mɛɛ mɛɛlula ndɔlaŋ la fuuluu. 27 Le mi waŋndo nɔla mbo luɛi o wana dialuŋ kalaa lo chiɛiniŋ mbo chua nyɛm ndɔŋ, mɛɛ mbo bii ndu fɛlɛŋ mbo yii ndu poŋ. Te o cho koŋ te, o nɔla mbo chua nyɛm ndɔŋ te. 28 A tonya mi dimul nya, yɔŋ wɔɔŋ kɛ kɛ waŋndo tosa pɛ ɔɔ suɛi wɔɔŋ kɛ kɛ o dimi pɛ, mbo sɔla malɔɔ hakioo. 29 Kɛ wana o wana dimi pɛ suɛi wɔɔŋnde a nyina diandaa okɔɔ, fɛɛŋ bɛɛ o sɔla malɔɔ haki le.+ Haki koŋ cho ndu wa choo lefafɛɛŋ.”+ 30 O dimi hei kanifuule a wa dimioo aa: “Nyina wɔɔŋndo cho ndu kɔɔli ni.”+

31 Okoŋ mi kala ndɔ a pɔmbuaa nduaa+ huŋ sim o bɛɛ. Ma viam waŋndo chiɛiniŋ le mbo kɔ veelu ndu.+ 32 Faŋgaa wa ndu o balaa silɔ. Ma dimul ndu aa: “Kala num a pɔmbuaa numnda cho isisi o bɛɛ, a yeema ma che num.”+ 33 Kɛ mbo nyuna nda aa: “Nɛɛnɛ cho yɛ kala nuu, nduyɛ nɛɛ yaa cho yɛ pɔmbuaa niaa?” 34 Mbo mɛɛndaŋ wanaa wa ichali ma balu ndu silɔ wa. Mbo dimi aa: “Kala nuu a pɔmbuaa niaa cho haa ni!”+ 35 Wana o wana tosa pɛ hɛnaŋ Mɛlɛkaa, mɛɛ ndu cho pɔmbɔ nuu, a yema nuu, a kala nuu ni.”+