Saamiɛɛ Tasoo

13 Sɔɔ wa wɔsilaŋ . . .* mbo simnuŋ masaa.+ Nduyɛ, le wɔsilaŋ la tiɔɔŋ o wa masaa o Isɔluɛi niŋ. 2 Mi Sɔɔ hɛli puaa 3,000 o Isɔluɛi niŋ. Puaa 2,000 o nda tɛɛŋ wa a ndu latulu Mikimaasi a o fondaŋ ŋpemboo o tanda Bɛtɛl lo niŋ. Nduyɛ puaa 1,000 wa a Chonataŋ+ latulu Kibiya+ o tanda Bɛŋjamiŋ ndo niŋ. Mbo miŋgi a tuaa kpou, mi wana o wana kua o tɛndii ndɔɔ. 3 Okoŋ, mi Chonataŋ diu kunda puaa chɔuwaa Filitiaŋaa+ wa Kiba+ wa, nduyɛ mi Filitiaŋnda tuɛi a ndi okɔɔ. Okoŋ, mi Sɔɔ yɔŋ waŋnda ma balu bululaŋ hɔŋndo+ o lɛŋndeŋ niŋ kpou. A wa dimioo aa: “Nya Hibuluiya, la nɔ mi la tuei hei!” 4 Mi Isɔluɛiya kpou tuɛi yooŋgoo hoo maa: “Sɔɔ diu kunda puaa chɔuwaa Filitiaŋnda, nduyɛ mi Isɔluɛiya simnuŋ maa nyɛ siouwɛi le Filitiaŋnda.” Okoŋ ma chuuŋgiaa waŋnda kpou naapilɛ, ma tual Sɔɔ kɔɔli Kikaa.+

5 Mi Filitiaŋnda chuuŋgiaŋ naapilɛ le kɔlaŋ Isɔluɛiya delɔɔ choo a sɔŋgɔɔ. Ndaa nɔ nyɛm nyaanaŋ suaa naŋndoŋ 30,000, wanaa nyaanuŋ suaa wa 6,000, a puaa chɔuwaa cheleŋ a hɔbɛi mɛɛ siooŋnde wa nuaa o pee mɛŋma ihɛllo kɔŋgɔ yɛ.+ Mɛɛ nda kuɛ, ma kɔ kila dɔɔŋgɔɔ Mikimaasi, Bɛti-aviŋ ba paaleŋ le chaŋ ndo.+ 6 Mi puaa Isɔluɛi cha maa a del o kpundɔɔ niŋ, kanifuule a wa nda kindɔɔ kpeekpei. Le hei, ma kɔ vioŋnuŋ o buululaŋ niŋ,+ o sooŋndaŋ niŋ, o pouta bɛndulaŋ tɛɛŋ, a o sooŋnda mamɛŋndaŋ niŋ. 7 Mi Hibuluiya apum taŋ Chɔɔdaŋ ndaŋ le kɔlaŋ o tanda Kaadi wo niŋ, a o tanda Kiliaadi wo niŋ.+ Kɛ mi Sɔɔ ndu lo Kikaa, nduyɛ wanaa wa a ndu latulu wa kpou wa nyiiyaa a siooŋnde. 8 Le palɛi i ŋɔmmɛu, o wa chumndo loŋ haaa a teleŋ Saamiɛɛ ndoo mɛi le hunɔɔ wo, kɛ o hiŋ te. Nduyɛ waŋnda wa niŋ ndu malɔɔ ma kuaŋnuŋ. 9 O mɛɛlulaŋ kpɔŋ, mi Sɔɔ dimi aa: “La chuu ya sala luamaa a salala kɔl nyulu laŋ.” Okoŋ, mbo soli sala luamaa.+

10 Kɛ dimioo nuaa o chii sala luamaa soli, mi Saamiɛɛ huŋ. Le hei, mi Sɔɔ fula mbo kɔ yil ndu. 11 Mi Saamiɛɛ nyuna ndu aa: “Yɛɛnɛ ŋ tosa yɛ hoo?” Mi Sɔɔ muli aa: “Waŋnda wa ya malɔɔ ma kuaŋnuŋ,+ nduyɛ num bɛɛ a hiŋ a teleŋ naŋ mɛiyo le. Filitiaŋnda bɛɛ wa niŋ chuuŋgiaŋndo kpeekpei Mikimaasi.+ 12 Le hei, mi yiyaŋ maa Filitiaŋnda cho hunɔɔ Kikaa le ya delɔɔ choo, nduyɛ I nyuna Chɛhowa a ndi okɔɔ le. Lelaŋ, mi cha maa I nɔ mi soli sala luamaa.”

13 Okoŋ, mi Saamiɛɛ dimul ndu aa: “A tosa bɔɔ diɔmii bɛndu. A diikuŋ sawa Chɛhowa Mɛlɛka numndo ke numndo le.+ Te num oo diikuŋ pɛ Chɛhowa, o wa tosa mi masale numndeŋ lee sim yi o Isɔluɛi niŋ lefafɛɛŋ. 14 Kɛ le mɛɛ ŋ kɛɛ le nyɛ Chɛhowa dimul numndo tosaa yɛ,+ masale numndeŋ le cho viouwɔɔ le.+ Chɛhowa cho wana o hini kɔl lo nuuviaa,+ nduyɛ mi Chɛhowa siiŋguu ndu simlachinɔɔ wanaa nduaa choo.”+

15 Okoŋ mi Saamiɛɛ faŋaŋ Kikaa, mbo miiŋgu Kibiya o tanda Bɛŋjamiŋ ndo niŋ. Mi Sɔɔ chɔm waŋnda, nduyɛ puaa wa a ndu latulu wa ndaa wa le 600.+ 16 Sɔɔ, Chonataŋ po ndɔ, a wanaa tuaa wa a nda latulu Kiba,+ o tanda Bɛŋjamiŋ ndo niŋ. Nduyɛ, mi Filitiaŋnda kila dɔɔŋgɔɔ Mikimaasi.+ 17 Puaa chɔuwaa ndaa kua waŋnda delɔɔ choo wa, kundalaŋ la yaa laa fula o dɔɔŋgɔ Filitiaŋnda niŋ ni. Mi kundaa o pilɛ ndoo kuɛ o nɛi kuɛ Ofiluaa o lɛŋnde Suwaa leŋ niŋndo, 18 mi kundaa o pilɔɔ ndoo kuɛ o nɛi kuɛ Bɛti-hɔlɔŋ ndo,+ nduyɛ mi kunda yaa ndɔɔ ndoo kuɛ o pɛŋgula kuɛ o kpoloŋndo Sɛboyɛm ikɛi laŋ, le kɔlaŋ ba pollo.

19 O Isɔluɛi niŋ kpou, sumnɔ kɛ kɛ ve lɛ le, kanifuule mi Filitiaŋnda dimi aa: “Yɔŋii Hibuluiya toosiaa mɔɔŋ faŋndoŋ ɔɔ baltaŋ.” 20 Isɔluɛiya kpou, o Filitiaŋnda lo ndaa kua niŋ ni le dɛndɛla ndalaŋ, pekaasila ndalaŋ, chooŋ ndaŋ, a wɔlɔtɔla ndalaŋ chiɛɛŋaa. 21 Pimnde* i pilɛ ndaa yɔŋgu ni le nyɔɔŋ muŋ chiɛɛŋaa. Dɛndɛlaŋ, pekaasilaŋ, nyɛm piaanduŋ chiŋuŋ yaa woŋ, chooŋ, a chiliŋii sɛɛmbiɛi baŋɔɔ o piauwo. 22 Lelaŋ, teleŋ o teleŋ chɔuwo ndoo del pɛ, wanaa wa Sɔɔ a Chonataŋ kɔɔli wa kinɛi, o pilɛ bɛɛ ndoo nɔ imɔɔ ɔɔ bal te.+ Sɔɔ nda Chonataŋ po ndɔ kinɛi ndaa nɔ nyɛm chɔuwoŋ ni.

23 A teleŋ koŋ, puaa chɔuwaa Filitiaŋnda kunda bɛndoo ndaa kuɛ niŋ ma kɔ sim o kpoloŋndo Mikimaasi.+