Masaa Tasiaa

3 Mi Sɔlɔmɔŋ tosa mi lefei luɛi nda tɛɛŋ nda Feloo, masaa le Ichipi. Mbo chua chua Feloo wo+ o nɔɔ niŋ, mbo huŋ a ndu o Chiee Deeve Wo.+ O lo loŋ haaa mi Sɔlɔmɔŋ chii chiɛi ndɔ ndupilaa,+ chiɛi Chɛhowa wo,+ a kpaki balu Chulusalɛm ndo taŋgul.+ 2 Kɛ waŋnda wa wɔ salalaŋ solioo o fondaŋnda filioŋndaŋ.+ Kanifuule, haaa huŋ bii a boondii keŋ, ndaa teŋgullɔ chiɛiyo le diola Chɛhowa laŋ te.+ 3 Mi Sɔlɔmɔŋ hiau lachi a Chɛhowa kaalaa, a mɛɛ o wa kɔlaŋ o silala Deeve finya ndɔ ke ndu laŋ choo yɛ. Kɛ nduyɛ, o wa wɔ salalaŋ solioo a salalaŋ lomɔɔ o fondaŋnda filioŋndaŋ.+

4 Mi masaa kua Kibiɔŋ le salaa solioo, kanifuule loŋ fondaŋ filioŋ bɛndoo+ wa ni. Mi Sɔlɔmɔŋ soli salala luamaa laŋ a chɔluaa 1,000 o bandu luamaa lasala koŋ choo.+ 5 O wa Kibiɔŋ mi Chɛhowa chɔɔmuŋ ndu o luaŋ niŋ ichɔllo, mbo dimul ndu aa: “Dimul la nyɛ ŋ yeema mi ke num ndo.”+ 6 Okoŋ mi Sɔlɔmɔŋ dimi aa: “A chɔm niŋ finya nuu, Deeve buɛi numndo kaala lo lechoo num bɛndu cho le teleŋ o teleŋ ndo. Kanifuule ndoo laalaŋ o num niŋ, o wa sakpo, nduyɛ mbo piɛi num a kɔl walaŋndo. Ma hiau lachi a ndu kaala lo lechoo bɛndoo hoo chɔmndo haaa a paale hauleŋ ndeŋ, mɛɛ ŋ hɛli po ndɔɔ le mbo chal o kpeŋgbei* ndɔ lemasaa choo.+ 7 Nduyɛ num Chɛhowa Mɛlɛka nuu, num hɛli ya buɛi numndo le mi wa masaa o foofo Deeve finya nuu ni, mi che bɛɛ poombɔɔ ko ya cho ni, nduyɛ I nɔ taasi le.+ 8 Ya buɛi numndo, I cho wanaa num aa ŋ hɛli+ ma wa faŋga bɛndoo wa tɛɛŋ, wana chii nda chɔm te. 9 Lelaŋ, ke buɛi numndo kɔllo le mbo tuei num diom, le wanaa numnda sɔɔŋ dimioo tɛɛŋ,+ le mbo sina teŋgeŋndo i kɛndɛi tɛɛŋ a i wɔɔŋnde.+ Kanifuule, o nɛɛnɛ kpeekpei nɔla yɛ mbo dimi wanaa numnda, a chuu haa chɔm te wa sɔɔŋ tɛɛŋ?”

10 Mi Chɛhowa naŋ kɔl tau le nyɛ Sɔlɔmɔŋ nyuna ndu hoo wo.+ 11 Le hei, mi Mɛlɛka dimul ndu aa: “A nyuna ya le mi ke num yoomu vilɛiyo, sullo, a le mi yaamɔɔwaa numnda vi le. Kɛ ma nyuna ya le mi ke num taasioo le waŋnda sɔɔŋ dimioo tɛɛŋ.+ Le mɛɛ ŋ nyuna ya le hei yɛ, 12 I cho nyɛ ŋ nyuna ya le ndu wo tosa.+ I cho num ke taasioo a kɔl kaloo,+ mbo hiou wana o wana wa num lachi, nduyɛ fɛɛŋ bɛɛ wana o wana ve niŋ maa num te.+ 13 O faŋaŋ okoŋ kɔɔli, I cho num vɛlɛ ke nyɛ ŋ nyuna bɛɛ le ndu le wo.+ I cho tosa ma sul, nduyɛ ma fula tɔɔ.+ O palɛi numnde niŋ kpou, masa o masa ve niŋ maa num te.+ 14 Te o yɔŋ pɛ ma kuɛ o nɛila nilaŋ choo, ma tosa nyɛ ya I dimi wo, nduyɛ ma bii sawala nilaŋ mɛɛ Deeve finya num tosa yɛ,+ I cho num vɛlɛ yoomu vilɛiyo ke.”*+

15 Mɛɛ Sɔlɔmɔŋ tendu, mbo sina maa luaŋ o sɔl ni. Okoŋ, mbo kua Chulusalɛm mbo kɔ sim kɔfu kpema Chɛhowa wo lachi, nduyɛ mbo soli salala luamaa laŋ a salala kɔl nyulu laŋ.+ Mbo tusi vɛlɛ dunyɛi bɛnduei le buɛiyaa nduaa kpou.

16 A teleŋ koŋ, mi waŋ laanduaa suundɛiya a ŋiɔɔŋ luɛi naa masaa chua ma sim ndu lachi. 17 Mi o tasoo dimi aa: “Masanɔ nuu, o chiɛi pilɔɔ niŋ naŋ cho naa chuaa hoo ni, nduyɛ o wa loŋ mi vialu. 18 Mɛɛ ya velu, palɛi i yaa okoŋ kɔɔli, mi ndu bɛɛ vialu. Naa ŋiɔɔŋ kpe wa ni, wana o wana ve a naa latulu chiɛiniŋ te. 19 Ichɔllo, mi chuaa hoo hini po ndɔɔ choo mbo wu. 20 A ditɛɛŋndo, ya buɛi numndo wa o luaŋ, mbo chua po nuu mbo yambuŋ ndu o ibuŋ, okoŋ mbo chua po ndɔ vilɛiyo mbo yambu ya o ibuŋ. 21 Mɛɛ ya chɛŋ le po nuu wɛsioo idiiyo, mi saaluŋ maa o vi. Mɛɛ ya mɛɛndaŋ ndu nyɛkɛndɛi, mi cha maa o cho po ya velu wo le.” 22 Kɛ mi chuaa o pilɔɔ dimi aa: “Sako, po nuu cho yoomu ni, num nɔ o vilɛiyo ni.” Kɛ mi chua tasoo bɛɛ wa dimioo aa: “Sako, po numndo vi ni, o nuu cho yoomu ni.” Mɛɛ lende nda wa sɛɛŋgiaŋndo masaa o hɔl ni.

23 O mɛɛlulaŋ kpɔŋ, mi masaa dimi aa: “Hoo cho dimioo aa, ‘Po nuu cho yoomu ni, num nɔ o vi wo ni!’ Mi hoo bɛɛ wa dimioo aa, ‘Sako, po numndo vi ni, o nuu cho yoomu ni!’” 24 Okoŋ mi masaa dimi aa: “La chuu ya muɛi faŋnde.” Ma chuu ndu muɛi faŋnde. 25 Mi masaa dimi niko aa: “La kiolu chɛlɛkpɛ cho yoomu wo tɛɛŋ mi la ke hoo kpeŋgei i pilɛ, mi la ke o pilɔɔ kpeŋgei i pilɛi.” 26 O lepilɛ niŋ kpe, mi chua po ndɔɔ wa yoomu wo nyɔɔlu masaa, kanifuule mi nyiɛɛye bii ndu le po ndɔɔ. Mbo dimi aa: “Yandii masanɔ nuu, ke chuaa hoo poombɔ cho yoomu wo, dii ndu le.” Kɛ mi chuaa o pilɔɔ wa dimioo aa: “O yɔŋgu ya le, num bɛɛ o yɔŋgu num te! A kiolu ndu tɛɛŋ!” 27 Okoŋ, mi masaa dimi aa: “La ke chua tasoo poombɔ cho yoomu wo! La dii ndu le, kanifuule kala ndɔ cho koŋ ni.”

28 Mi Isɔluɛiya kpou tuɛi a yamɛi masaa kelu hei ve okɔɔ, nduyɛ mi kɔndɔfillo bii nda.+ Kanifuule, ma cha maa taasi Mɛlɛkaa wa a ndu latulu le sɔɔŋ dimioo o nɛi sakpoo choo.+