Maika
5 “Kpokoo nya wanaa cho o chiee nda del hoo choo wo niŋnda,
La cho dialuŋ nyaŋ tɛɛndiaa.
A chii naa luei o piŋndo niŋ.+
A lɔɔ wana kialaa ŋyamaa Isɔluɛi kpaŋnde a tindaa.+
A cho bɛɛ o bɔɔ le ma wa o chieeŋ cho muŋ o waalaŋ niŋ Chuda woŋ tɛɛŋ te.
Kɛ o num niŋ wana cho hunɔɔ wa masaa Isɔluɛi le ya wo cho fula ni.+
Waŋndo hoo chii niŋ wɔsilaŋ o wɔsilaŋ niŋ, nduyɛ o cho niŋ kani masindɛ.
3 Lelaŋ, Mɛlɛka cho nda hunɔɔ baa faŋa kɔɔli,
Haaa mi wana lanɔ nɔ le violɔɔ wo o velu.
Masaa hoo pɔmbuaa nduaa a tuaa kpou, a cho miiŋgu waŋnda choo Isɔluɛi.
4 O cho hunɔɔ chɔnɔŋ mbo manda saa nduaa o kpaaya Chɛhowa wo niŋ.+
O cho nda wa choo o diola tɔɔmala Chɛhowa Mɛlɛka ndɔɔ niŋ.
Nduyɛ, a cho waŋnɔŋ hɛnɛkɛ o ba ndaa choo.+
Tɔɔmayɛi nduɛi cho tiu ba o ba fee o lɛŋndeŋ choo.+
5 O cho hunɔɔ a kɔl nyuloo.+
Te o yɔŋ pɛ mi Asiiliaŋnda hiŋ o lɛŋnde naaleŋ niŋ, ma niɔu niɔu chiɛila choo choo la kala kalalaŋ,+
Ŋ cho hɛli wanaa mandaa lasaa a ŋɔmmɛu waŋnda tɛɛŋ, a waŋ banaa* a ŋɔmaa le ma chiŋalaŋ nda.
6 A cho lɛŋnde Asiiliaa leŋ chɔulaba a mɔɔŋ faŋndoŋ,+
Nduyɛ ma chɔulaba vɛlɛ lɛŋnde Nimilɔɔ leŋ+ o pɛŋgula lelɛŋndaŋ.
Te Asiiliaŋnda hiŋ pɛ o lɛŋnde naaleŋ niŋ le leŋ niɔu niɔu wo,+
Masaa hoo cho naa piŋi nda o ba.
7 Wanaa cho lo o yuŋgu Chekɔpu wo niŋnda a cho wa wanaa faŋga faŋga tɛɛŋ,
Mɛɛ Chɛhowa tosa nuaa mi mɔmndo chuchu yɛ.
A cho wa mɛɛ piɔɔ sia nuaa o tɔlɔɔlaŋ choo yɛ.
O cho wanachiee le tosa mbo sia le,
Nduyɛ o chum wana o wana le.
8 Wanaa cho lo o yuŋgu Chekɔpu wo niŋnda cho wa o lɛŋii bɔɔbɔɔ niŋ.
A cho wa wanaa faŋga faŋga tɛɛŋ,
Mɛɛ kpɔkuŋndo* wa nuaa visiaa tɛɛŋ yondoo niŋ yɛ.
Mɛɛ kpɔkuŋ fɔŋndɔɔ luɛi nuaa saa tɛɛŋ mbo tisa nda choo,
Mbo sɛɛsiaa nda wana nɔla nda ndu puu o ba le yɛ,
Lende nda wa niŋ ni.
9 Wanaa simul nya wa cho wa nya o ba bɛŋgu.
Nduyɛ, yaamɔɔwaa nyaa kpou cho tambei sɔla.”
10 Chɛhowa dimi aa, “O paale leŋ choo,
I cho suaa nyaa diu diu, okoŋ mi tɛɛmbuu nyɛm nyaanaŋ suaa naŋndoŋ.
11 I cho chieeŋ bɛnduŋ cho o lɛŋnde nyaleŋ niŋndoŋ tɛɛmbuu,
Mi pesi pesi fondaŋnda kala kalala nya taŋgul taŋ.
12 I cho tosa mi la soli balaŋ o yawalaŋ viomɔɔ niŋ.
Wanaa cho maŋgaliaalaŋ tosaa nya tɛɛŋ nda, I cho nda soli po.+
13 I cho piɔmaa nya toosiaa wa tɛɛmbuu, nduyɛ mi pesi pesi suŋgbuma nya simi waŋ.
Fɛɛŋ bɛɛ la tunduŋ lɛ niŋ o nyɛm nya toosiaa a laba woŋ lachi le.+
14 Nyɛ o nyɛ nya simi maa piɔm le ndu sooluuwo,+ I cho ndu hunɔɔ suŋgɔɔ,
Mi tɛɛmbuu chieeŋ nyaŋ bɛndoŋ.
15 Lɛŋii kɛɛ le ya diikɔŋndo ve kinɛi, I cho hunɔɔ tumbe dɔɔnɔŋ a ndi o kala kala,
Nduyɛ mi miŋgul ndi maa.”