Sɛkalaya

14 “Paale Chɛhowa leŋ le cho hunɔɔ. Paale leŋ nda cho nyɛm nda poondiaa nya* o laba woŋ piɔuviaŋ nya o hɔl ni. 2 I cho lɛŋnde kpou chuuŋgiaa naapilɛ, le ma del Chulusalɛm choo a chɔuwo. A cho chioo biyɔɔ, ma chɔuviaa nyɔɔŋ o chiɛilaŋ niŋ, nduyɛ ma kpuviaa waŋ laanduaa. Waŋnda o chiee koŋ niŋ tɛndaa tɛɛŋ cho lakɔ o biyɔɔ niŋ, kɛ mi a tuaa lo loŋ.

3 “Chɛhowa cho lakɔ lɛŋii keŋ chiŋalaŋ a sɔŋgɔɔ,+ mɛɛ ndoo sɔŋga paandu o paale chɔuleŋ choo yɛ.+ 4 O paale leŋ choo, o cho lakɔ isisi o pembii ɔlifii ve choo.+ Nduyɛ, Chulusalɛm ba paaleŋ le chaŋ ndo pembei hei cho ni. Pembii ɔlifii ve cho tɛnda tɛɛŋ kpala, chɔŋ ba paaleŋ le chaŋ ndo mbo kuɛ ba le del lo. Okoŋ, mi kpoloŋ bɛndoo del tɛɛŋ. Kumbuei i pilɛ cho lakɔ ba luaŋ ndo, mi i pilɛi kuɛ ba tou wo. 5 La cho nyaanɔŋ o kpoloŋ cho o pembuŋ niŋ bɛndoŋ tɛɛŋ ndo, kanifuule kpoloŋ cho o pembuŋ muŋ tɛɛŋ ndo cho pɛŋgɛlaŋ haaa Esɛɛ. La cho nyaanɔŋ mɛɛ nya nyaanuŋ lɛŋnde nyiiyaaleŋ a teleŋ Yusaya wa masaa o lɛŋnde Chuda leŋ niŋndo yɛ.+ Chɛhowa Mɛlɛka nuu cho hunɔɔ, nduyɛ wanaa diandaa kpou cho wa latulu a ndu.+

6 “O paale leŋ choo, nyɛ teŋgaa sɔvɛ ve niŋ te,+ nduyɛ nyɔɔŋ ve niŋ wali le.* 7 Paale leŋ le wa niŋ teŋgeŋ, nduyɛ paale Chɛhowa leŋ le cho wa ni.+ Teŋgeŋ ve niŋ paaleŋ a nyumndaŋ tɛɛŋ te. Nduyɛ a teleŋ fitilioo bɛɛ, nyɛ teŋgaa cho wa. 8 O paale leŋ choo, mɛŋma yɔŋgu yoomoo waŋ+ ma cho piɔl Chulusalɛm.+ Mɛŋma maŋ, kumbuei i pilɛ cho lakɔ o pee mɛŋma ihɛllo ba paaleŋ le chaŋ ndo,*+ mi i pilɛi kuɛ o pee mɛŋma ihɛllo ba paaleŋ le del lo.*+ Hei cho yɔŋnɔŋ o wɔɔleŋ niŋ a o sialteŋ niŋ. 9 Nduyɛ, Chɛhowa cho wa masaa o lɛŋndeŋ choo kpou ni.+ O paale leŋ choo, Chɛhowa kinɛi waŋnda kpou cho wa piɛiyo ni,+ nduyɛ diola ndɔlaŋ kinɛi nda cho wa saŋgalaa ni.+

10 “Lɛŋndeŋ kpou le cho simnɔŋ maa dɛŋgbɔɔ Aluaba,+ chɔŋ Kiba+ kɔ Luimɔŋ,+ Chulusalɛm ba tou wo. Chulusalɛm cho miiŋgu maa paandu. Waŋnda cho wa loŋ+ chɔŋ o Dio Kpaki Bɛŋjamiŋ Ndo,+ mbo kuɛ o fondaŋ Dio Kpaki Tasoo haaa o Dio Kpakioo o Sɔŋgioo. Nduyɛ, chɔŋ o Bandu Vilɛiyo Hananɛɛ,+ mbo kuɛ haaa o doolala* nda toosiaa muɛiyaŋ le masaa laŋ, waŋnda cho wa loŋ. 11 Waŋnda cho hunɔɔ wa o Chulusalɛm niŋ, nduyɛ fɛɛŋ bɛɛ o tembu lɛ niŋ te.+ Wanaa cho wa loŋ nda ve niŋ a isiooŋ te.+

12 “Wanaa cho hunɔɔ Chulusalɛm chiŋalaŋ a sɔŋgɔɔ wa, nyɛpalaa Chɛhowa cho nda kpou tusi choo wo cho hoo ni:+ Waŋnda haa cho lo isisi mi dialuŋ ndaŋ sɛ, mi hɔlta ndalaŋ la sɛ o kooŋgolaŋ niŋ, nduyɛ mi diɔɔmuii ndɛi sɛ nda o lasondo.

13 “O paale leŋ choo, Chɛhowa cho tosa mi sɛɛŋgiaŋ bɛndoo del nda tɛɛŋ. Wana o wana cho chaaŋ ndɔ baa saa, okoŋ mbo chiŋalaŋ ndu a sɔŋgɔɔ.+ 14 Chuda bɛɛ cho sɔɔŋguu le sɔŋgɔ cho wa o Chulusalɛm niŋndo. Nduyɛ, a cho sulta lɛŋii balu nda ve kpou chuuŋgiaa naapilɛ, ma chuuŋgiaa kaniŋ humboŋ a kooliiyoŋ, vɛlɛ a nyɛla chuɛɛnaŋ ndaŋ tau tau.+

15 “Nduyɛ, nyɛpalaa pilɛ koŋ cho suaa, chɔluaa yɛiyii muuliaŋ nda,* nyɔɔmiaa, sofɛliaa, vɛlɛ a chɔlu kɛ kɛ cho o dɔɔŋgɔla laŋ niŋ tolɔɔ choo ni.

16 “Wanaa cho lo yoomu o lɛŋii simul Chulusalɛm nde tɛɛŋ kpou wa, cho wa kɔlaŋ iwɔsi o iwɔsi+ le ma kɔ beŋ* Masaa Chɛhowa, Mɛlɛka puaa chɔuwa+ wulaŋ, nduyɛ ma bii Bɔŋaŋ laBafɛiyo.*+ 17 Kɛ te waŋndo o pilɛ o yuŋgula cho o lɛŋndeŋ choo laŋ kɛɛ pɛ kɔlaŋ Chulusalɛm le mbo beŋ Masaa Chɛhowa, Mɛlɛka puaa chɔuwa wulaŋ, piɔɔ o piɔɔ se le nda le.+ 18 Te waŋnda Ichipi kɛɛ pɛ le hunɔɔ, nduyɛ ma kɛɛ le luɛiyɔɔ chiee, a cho piɔɔ sɔla le. Nduyɛ, nyɛpalaa Chɛhowa tusi kaala kɛɛ le Bɔŋaŋ laBafɛiyo biyɔɔ laŋ choo wo, ndu koni o cho nda tusi choo ni. 19 Nyɛpalaa hoo cho Ichipi a kaalaŋ kpou tolɔɔ choo le haki nda tosa wo, kanifuule a kɛɛ le hunɔɔ Bɔŋaŋ laBafɛiyo biyɔɔ.

20 “O paale leŋ choo, diomndaŋ ndaŋ ‘Chɛhowa nɔ diondɔɔyɛi ni!’+ la cho wa la poonyiaa o bambaŋ suaa choo. Nduyɛ, kpɛɛnɛŋ yauwaŋ*+ cho o chiɛi Chɛhowa wo niŋndoŋ cho wa maa hɛŋgɛila+ cho o bandu luamaa lasalaa laŋ. 21 Kpɛɛnɛi yauwɛi* kɛ kɛ cho Chulusalɛm a Chuda cho wa i diandaa, nduyɛ mi i wa le Chɛhowa, Mɛlɛka puaa chɔuwa. Wanaa cho wa salalaŋ solioo wa kpou cho hunɔɔ ŋpum soliŋ kpeku le yauwo. O paale leŋ choo, Kenanaitiinɔ* kɛ kɛ ve lɛ niŋ o chiɛi Chɛhowa, Mɛlɛka puaa chɔuwa wo niŋ te.”+