Isikiɛɛ

33 Mi Chɛhowa suaa naa ya chua aa: 2 “Po wanachioo, dimul wanaa numnda+ aa:

“‘Ŋ dimi wɔ maa I kɛɛsiaa le mi chiŋalaŋ lɛŋndeŋ a muɛi faŋnde,+ okoŋ mi waŋnda o lɛŋndeŋ niŋ kpou hɛli waŋndo le mbo wa wana nda mɛŋgɛlaa, 3 mbo che muɛi faŋnde hunɔɔ le lɛŋndeŋ chiŋalaŋndo, okoŋ mbo hɔŋ buloo, mbo dimul waŋnda a ndi okɔɔ.+ 4 Te waŋndo tuei pɛ buloo suɛi mbo saalaŋ te,+ okoŋ mi muɛi faŋnde huŋ dii ndu, ndupila kooma nduaŋ ma cho wa o lebol ni.+ 5 Kanifuule, mbo tuɛi buloo suɛi, kɛ o saalaŋ te. Lelaŋ ndupila kooma nduaŋ ma cho wa o lebol ni. Te ndoo saalaŋ pɛ, o wa yoomu ndɔɔ piŋi.

6 “‘Kɛ te wana mɛŋgɛlaa che pɛ muɛi faŋnde hunɔɔ mbo kɛɛ le buloo hɔŋndo+ le waŋnda dimullo a ndi okɔɔ, okoŋ mi i huŋ dii wana pilɛ o nda tɛɛŋ, wana koŋ cho wu le haki ndɔɔ, kɛ I cho wana mɛŋgɛlaa nyuna le kooma nduaŋ.’*+

7 “Num po wanachioo, I hɛli num le ma wa wana mɛŋgɛlaa le waŋnda Isɔluɛi. Nyɛ o nyɛ ŋ tuei ya pɛ o sondo, a nɔ ma dimul nda ndu le nda silaa.+ 8 Te o yɔŋ pɛ mi dimul wana dɛnɛ wɔɔŋndo aa, ‘Num wana dɛnɛ wɔɔŋndo, a cho piɔmndo sɔla!’+ kɛ ma sila ndu le, nduyɛ ma kɛɛ kpooŋ le ndu dimullo mbo mal dɛnɛ ndɔ wɔɔŋndo le halikpeŋ mbo wa yoomu le, o cho piɔmndo sɔla le mɛɛ o cho wana dɛnɛ wɔɔŋndo yɛ.+ Kɛ num, I cho num nyuna le kooma nduaŋ. 9 Kɛ te a sila pɛ wana dɛnɛ wɔɔŋndo, nduyɛ mbo kɛɛ kpooŋ le dɛnɛ ndɔ wɔɔŋndo malɔɔ, o cho piɔmndo sɔla le haki ndɔɔ,+ kɛ mi num piŋi yoomu numndo.+

10 “Num po wanachioo, dimul waŋnda Isɔluɛi aa, ‘La dimi aa: “Yɔŋnda naala wɔɔŋndaŋ a hakila naalaŋ la cho naa bɔɔ kindilaa. La tosa miŋ yɔŋnuŋ fando fando.+ Lelaŋ, vɛɛ naŋ cho yɛ hiouwɔɔ lachi a waa yoomu?”’+ 11 Dimul nda aa, ‘“Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Mɛɛ i cho kpendekele maa I cho yoomu yɛ, o cho yeemɛi ni le i cho le mi wana dɛnɛ wɔɔŋndo vi le.+ Kɛ I yeema mi wana dɛnɛ wɔɔŋndo mulul yɔŋ ndɔ wɔɔŋndo kɔɔ,+ okoŋ mbo hiou lachi a waa yoomu.+ Lelaŋ nya waŋnda Isɔluɛi, la mulul yɔŋ nya wɔɔŋndo kɔɔ.+ Baa la yeema mi la sɔla piɔmndo?””’+

12 “Num po wanachioo, dimul wanaa numnda aa: ‘Te wana cho sakpo wo mal pɛ sɔɔŋ cho sakpo woŋ tosaa mbo muliŋ sɔɔŋ wɔɔŋndoŋ tosaa, keŋ piŋi ndu le.+ Nduyɛ te wana dɛnɛ wɔɔŋndo mal pɛ sɔɔŋ wɔɔŋndoŋ tosaa okoŋ mbo mulul muŋ kɔɔ, o sɔla tambei le.+ Paale wana cho sakpo wo cho hakioo tosa leŋ, o hiu lachi a waa yoomu le sakpoyɛi nduɛi le.+ 13 Te I dimul pɛ wana cho sakpo wo aa: “A cho hiouwɔɔ lachi a waa yoomu,” kɛ mbo tosa dɛnɛ wɔɔŋndo* mbo yiyaŋ maa sakpoyɛi nduɛi cho ndu piŋi,+ sɔɔŋ sakpoŋ o tosa woŋ, i pilɛ bɛɛ I loonuŋ te. Kɛ o cho piɔmndo sɔla le suɛi wɔɔŋ o tosa ve.+

14 “‘Kɛ te I dimul pɛ wana dɛnɛ wɔɔŋndo aa: “A cho piɔmndo sɔla,” okoŋ mbo mulul yɔŋ ndɔ wɔɔŋndo kɔɔ mbo tosa nyɛ cho sakpo wo,+ 15 mbo miŋgi nyɛ waŋndo ke ndu o landei niŋndo,+ mbo miŋgi nyɛ o chiimbuu wo,+ nduyɛ mbo soli balaŋ o sɔɔŋ wɔɔŋndoŋ tosaa niŋ, mbo tol sawala ke wana yoomoo laŋ kɔɔli, o cho wu le, kɛ o cho hiouwɔɔ lachi a waa yoomu.+ 16 Hakila o tosa laŋ kpou, o pilɛ bɛɛ I loonuŋ lɛ a ndu okɔɔ le.+ Le mɛɛ o tosa nyɛ cho sakpo wo yɛ, o cho hiouwɔɔ lachi a waa yoomu.’+

17 “Kɛ mi wanaa numnda dimi aa: ‘Chɛhowa tosa sɔɔŋ o nɛi sakpoo choo le.’ Kɛ o kpeekpei niŋ, nda tosa sɔɔŋ o nɛi sakpoo choo le ni.

18 “Te wana cho sakpo wo mal pɛ sɔɔŋ cho sakpo woŋ tosaa mbo muliŋ sɔɔŋ wɔɔŋndoŋ tosaa, o cho piɔmndo sɔla le keŋ.+ 19 Kɛ te wana dɛnɛ wɔɔŋndo mal pɛ dɛnɛ ndɔ wɔɔŋndo tosaa mbo muliŋ nyɛ cho sakpo wo tosaa, o cho hiouwɔɔ lachi a waa yoomu.+

20 “Kɛ mi la dimi aa, ‘Chɛhowa tosa sɔɔŋ o nɛi sakpoo choo le.’+ Oo waŋnda Isɔluɛi, I cho nya a pilɛŋ pilɛŋnda yamɛi kilul a mɛɛ kelala nyalaŋ la cho yɛ.”

21 O wɔsi 12 naŋ wa o biyɔɔ niŋndo, paŋgii tɔ ve malɔ le ŋuɛɛnu, mi laŋunɔ pilɛ hialuŋ Chulusalɛm mbo huŋ naa ya chua,+ mbo dimi aa: “A tɛɛmbuu Chulusalɛm!”+

22 Tuupa mi laŋunɔ hɛluŋ koŋ ndo komal la idiiyo, mi nyina Chɛhowa wo tual la choo ichɔl koŋ, mbo kumbi ya sondoo, okoŋ mi kandu suɛi.+

23 Mi Chɛhowa suaa naa ya chua aa: 24 “Po wanachioo, wanaa cho o chieeŋ bɛnduŋ sɔla muŋ tambei yoŋ niŋnda+ cho dimioo a lɛŋnde Isɔluɛi leŋ okɔɔ aa, ‘Ebilaham ndu pilɛ kpe wa ni, kɛ a koŋ kpou mbo sɔla lɛŋndeŋ maa nyɛm kɛŋ ndɔ.+ Kɛ naa naa, ŋ cho kunda. Lelaŋ naa nda ke lɛŋndeŋ ni le mi le wa nyɛm kɛŋ naa.’

25 “Lelaŋ dimul nda aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “La cho nyɛdiaa dioo a koowaŋ latulu,+ mi la muliŋ piɔmaa nyaa nɔɔlɛiya* sooluuwo. La cho hiouwɔɔ lachi a waŋnda diuwo.+ Le sabu yɛɛ nya nɔ yɛ mi la sɔla lɛŋndeŋ maa nyɛm kɛŋ nya? 26 La tiindaŋ o mɔɔŋ nyaŋ faŋndoŋ niŋ,+ mi la yɔŋguŋ o kaala nɔɔlɛilaŋ tosaa niŋ, nduyɛ mi wana o wana wa kaa ihini nɔɔlɛiyo tosaa a lanɔɔ chaaŋ ndɔ.+ Lelaŋ, le sabu yɛɛ nya nɔ yɛ mi la sɔla lɛŋndeŋ maa nyɛm kɛŋ nya?”’+

27 “Dimul nda aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Mɛɛ i cho kpendekele maa I cho yoomu yɛ, wanaa cho ichali o chieeŋ bɛnduŋ sɔla tambei yoŋ niŋnda cho piɔmndo sɔla a muɛi faŋnde. A cho yondoo niŋnda, I cho nda malɔɔ visiaa yonduaa o ba ma de nda. Wanaa cho a viaŋnaŋ o fondaŋnda kala kalalaŋ a o buululaŋ niŋnda, I cho naa wɔɔŋndo yɔŋ mbo diu nda.+ 28 I cho tosa mi lɛŋndeŋ le tambu kpata kpata mi le simnuŋ pɔmndo,+ nduyɛ mi yoŋga ndɔɔ mɛɛlu. Pembuŋ bɛndoŋ o Isɔluɛi niŋ cho lo fondo,+ wana o wana kei lɛ loŋ te. 29 Te I tosa pɛ mi lɛŋndeŋ le tambu kpata kpata mi le simnuŋ pɔmndo+ le sɔɔŋ nɔɔlɛi nda tosa woŋ kpou, okoŋ a cho sina maa ya cho Chɛhowa ni.”’+

30 “Kɛ num po wanachioo, wanaa numnda cho suukaŋndo a num okɔɔ o kpakilaŋ ikɛi a o diola chiɛila ndalaŋ sondoo.+ A cho dimulaŋndo aa: ‘Ŋ kɔ miŋ kɔ tuei diom Chɛhowa wo.’ 31 A cho hunɔɔ kunda bɛndoo, ma chal num lachi. A cho tueiyɔɔ sɔɔŋ ŋ cho wa dimioo woŋ, kɛ a cho muŋ tosa le.+ Kanifuule a cho wa num sɔɔŋ yeelɛiyoŋ dimullo, kɛ mi kɔlta ndalaŋ la wa la yɔŋgaŋ le nyɔɔŋ sɔlaa o kafalaŋ choo. 32 A cho ko le nda maa chondii kaalɛi nda soli a diom kɛndɛ kɛndɔɔ, ma luaa ndi nyɛkɛndɛ kɛndɛ a nyɛchaa iyoo ve. A cho wa tueiyɔɔ nyɛ ŋ cho wa dimioo wo, kɛ wana o wana cho ndu wa tosa le. 33 Nyɛ ŋ cho dimi wo cho yɔŋnɔŋ. Nduyɛ te o yɔŋnuŋ pɛ, a cho sina maa wana suaa le Mɛlɛka wo wa nda tɛɛŋ.”+