Luku

14 O Paale Pɛŋgiaale pilɛ choo, mi Chiisu kua nyɛdiaa dioo o chiɛi wana bɛndu pilɛ le Falisiiya niŋ. Okoŋ ma chal ndu mɛŋgɛlaa. 2 Po pilɛ wa Chiisu lachi, ndoo nɔ naa hiindaa. 3 Okoŋ, mi Chiisu nyuna wanaa pɛɛku waŋnda Sawala Mɛlɛkalaŋ nda a Falisiiya aa: “Baa o bɛnda pa le waŋndo siŋgioo o Paale Pɛŋgiaaleŋ choo ɔɔ o bɛnda le?”+ 4 Kɛ a muli le. Okoŋ, mbo handu poo baa choo, mbo siŋgi ndu. Mbo mal ndu mbo kuaŋnuŋ. 5 Mbo nyuna nda aa: “Nɛɛnɛ cho yɛ nya tɛɛŋ, te po ndɔɔ ɔɔ nau ndɔɔ del pɛ o sooŋndo niŋ+ o Paale Pɛŋgiaaleŋ choo, o soli ndu chɔ chɔ le?”+ 6 A nɔla ma dimi nyɛ o nyɛ le.

7 Mɛɛ Chiisu che wanaa nda veelu wa fondaŋnda sɔvɛ sɔvɛlaŋ hɛlioo le challe,+ mbo dimul nda taloo aa: 8 “Te waŋndo veelu num pɛ o bɔŋaŋ nɔ kɛsiaa, chal o fondaŋnda sɔvɛ sɔvɛlaŋ te.+ Kɛlɛŋgaa dɔɔ wana koŋ veelu vɛlɛ mial cheleŋ o hiou numndo. 9 Te a chal loŋ pɛ, wana veelu nya vellaa velle wo cho hunɔɔ num dimul aa, ‘Mel fallo hoo kpeŋgbei* ŋ chal koŋ choo wo.’ Okoŋ siɔmbulaŋ la cho num biyɔɔ le chɔnɔŋndo ma kɔ chal kɔɔli. 10 Kɛ te a veelu num pɛ, kɔ chal amakɔɔ pɔ, okoŋ te wana veelu numndo hiŋ pɛ, o cho num dimul aa, ‘Chaaŋ nuu, kɔ chal lachi nda.’ Okoŋ, a nɔla ma sɔla bɛɛleŋ tau wanaa nda veelu wa kpou o hɔl.+ 11 Kanifuule wana o wana heeluŋ pɛ, a cho ndu tusi. Kɛ wana o wana tusiŋ pɛ, a cho ndu heelu.”+

12 Mi Chiisu dimul vɛlɛ wana veelu ndu wo aa: “Te a toosiaa pɛ nyɛdiaa ipalaa ɔɔ nyɛdiaa ichɔllo, veelu chaaŋaa numnda ɔɔ wanayaŋ numndoŋ ɔɔ wanaa sulaa nya chiɛɛliaŋ nda le. Te a veelu nda pɛ, nda bɛɛ cho num veelu, okoŋ mbo simnuŋ maa miŋgiaa. 13 Kɛ te a toosiaa pɛ nyɛdiaa, veelu wanaa bala fonduaa, wanaa bɛvɛiya, namtaa, a wanaa sumɛiya.+ 14 Te a tosa lende pɛ, a cho wa a kɔl kɛndɛ, kanifuule a nɔ nyɛ o nyɛ nda miŋgul num te. A cho paawa* numndo sɔla teleŋ wanaa cho sakpo wa cho miiŋgu yoomu+ wo.”

15 Mɛɛ wanaa nda veelu wa o pilɛ tuei sɔɔŋ muŋ, mbo dimul Chiisu aa: “Kɔl kɛndɔɔ cho le wana chal niŋ nyɛdiaa* dioo o Masale Mɛlɛkaleŋ niŋndo.”

16 Mi Chiisu dimul ndu aa: “Po pilɛ chɛŋ ni mbo toosiaa nyɛdiaa ichɔllo o hɔbɛi,+ okoŋ mbo veelu waŋnda tau tau. 17 Mɛɛ teleŋndo fuuluu le nyɛdiaa hoo dioo, mbo viam buɛi ndɔɔ le mbo kɔ veelu wanaa o yooŋgu wa aa, ‘La huŋ niko, kanifuule nyɛ o nyɛ chuu bɛɛndiaa.’ 18 Kɛ mi nda kpou kandu kafɛilaŋ yɔŋgoo.+ Mi o tasoo dimul ndu aa, ‘I laŋga piondu yondoo, nduyɛ I nɔ mi kɔ tofa ndu. Lelaŋ, I nɔ ba le.’ 19 Mi o cheleŋ dimi aa, ‘I laŋga piondu nauwa tɔ, nduyɛ I nɔ mi kɔ tofa nda. Lelaŋ, I nɔ ba le.’+ 20 Mi o pilɔɔ ndu dimi aa: ‘I laŋga yil lanɔɔ. Lelaŋ, I cho hunɔɔ le pa.’ 21 Okoŋ mi buɛiyo miiŋgu mbo kɔ doonuŋ masanɔ ndɔɔ kona. Mi masanɔ ndɔɔ tuulu kɔl tau, mbo dimul buɛi ndɔɔ aa, ‘Kɔ chɔ chɔ o nɛila bɛndulaŋ a o kolo kololaŋ o chioo niŋ, ma veelu wanaa bala fonduaa, namtaa, wanaa sumɛiya, a wanaa bɛvɛiya.’ 22 Mɛɛ buɛiyo hiŋ, mbo dimi aa, ‘Masanɔɔ, I tosa mɛɛ ŋ dimul la yɛ, kɛ fondaa lo wɔ.’ 23 Okoŋ mi masanɔ ndɔɔ dimul ndu aa, ‘Kɔ o nɛila pɔmbɔlaŋ kɔɔli kɔɔli ma tosa mi waŋnda hiŋ, le mi chiɛi nuu pɛ cha.+ 24 Mi dimul num, wanaa yaa veelu wa kinɛi, o pilɛ bɛɛ wounuŋ nyɛdiaa hoo o sondo le.’”+

25 Faŋga bɛndoo wa kɔlaŋ Chiisu kɔɔli. Okoŋ mbo muliŋ mbo dimul nda aa: 26 “Wana o wana yeema pɛ mbo tol la kɔɔli, mɛɛ o nɔ mbo tul finya ndɔ, kala ndɔ, chuauwaa nduaa, bɛndaa nduaa, pɔmbuaa nduaa, yemaa nduaa, a yoomu ndɔɔ leyɛ.+ Te o cho koŋ te, o tiuba mbo wa buɛi ni le.+ 27 Wana o wana chue yɔm ndɔ imɔnɔɔ,* nduyɛ mbo tol la kɔɔli le, o nɔla mbo simnuŋ buɛi ni le.+ 28 Le tamaseliiyo, nɛɛnɛ cho yɛ nya tɛɛŋ mbo yeema chiɛiyo* taŋgullo, o chel fɛlɛŋ mbo tuu le sinaa te o nɔ pɛ nyɛsɔlaa tau le ndu chiiyo taŋgullo le? 29 Te o tosa lende le, mbo kila chiiye, kɛ o nɔla mbo chii ndu taŋgul te. Waŋnda kpou cho ndu kandɔɔ mamɔɔ 30 ma dimi aa, ‘Poo hoo kandu taŋgullo, kɛ o nɔla ndu chii le.’ 31 Lende koni, te masa nɔ puaa chɔuwa 10,000 wo yeema pɛ le mbo simul masa nɔ puaa chɔuwa 20,000 ndo a sɔŋgɔɔ, o chal fɛlɛŋ mbo nyuuniaa wanaa cheleŋ le sinaa te o nɔla pɛ mbo tiu ndu ba, lende le? 32 Te o sina pɛ maa o tiu niŋ ndu ba le, o yɔŋ waŋnda le ma kɔ toosiaa mi kɔl nyuloo miiŋgu nda tɛɛŋ. 33 Lelaŋ, wana o wana mel nyɛm o nɔ woŋ kpou le, o tiuba mbo wa buɛi ni le.+

34 “Hɛlle naŋ. Kɛ te yeelaa fulaŋ pɛ o hɛlle niŋ, a yɛɛnɛ wana miŋgi yɛ yeela ndɔɔ?+ 35 I bɛnda lɛ le dɔwɔɔ lɛŋ ɔɔ le nyɛ nɛŋi tɔlɔɔ wo le. Viouwɔɔ koni nda viau ndi ni. Num o num nɔ pɛ nila tuɛiyaa isɔɔ, mɛɛ yaŋ nilaŋ.”+