Saamiɛɛ Diiŋ Ndɔɔ

2 Okoŋ kɔɔli, mi Deeve nyuna Chɛhowa+ aa: “Baa I kɔ o chieeŋ bɛndoŋ o Chuda niŋ o pilɛ?” Mi Chɛhowa mulul ndu aa: “Ei, kɔ.” Mi Deeve nyuna ndu aa: “Kuɛɛnɛ ya kɔ yɛ?” Mbo mulul ndu aa: “Kɔ Hɛbulɔŋ.”+ 2 Okoŋ mi Deeve kua a laandaa nduaa ŋiɔɔŋnda loŋ, Ahinowam+ fulaa Chɛsiluɛɛ, a Abikɛɛ+ fulaa Kamɛɛ, lanɔ Nabal mɛiyo. 3 Mi Deeve kua vɛlɛ a puaa wa latulu a ndu wa,+ o kɛ kɛ a yuŋgu ndɔɔ. Ma kɔ chal o chieeŋ bɛnduŋ balu Hɛbulɔŋ ndoŋ niŋ. 4 Okoŋ mi waŋnda Chuda huŋ, ma siiŋguu Deeve masaa o yuŋgu Chuda wo choo.+

Ma dimul Deeve aa: “Waŋnda Chabɛsi-kiliaadi kumbu Sɔɔ ni.” 5 Mi Deeve viam waŋnda le ma kɔ dimul waŋnda Chabɛsi-kiliaadi aa: “Maa Chɛhowa dɔu nya sala fɔ, kanifuule la chɔm masanɔ nyaa Sɔɔ kaala lo lechoo wo mi la kumbu ndu.+ 6 Maa Chɛhowa chɔm nya kaala lo lechoo wo le teleŋ o teleŋ fɔ. Nduyɛ ya bɛɛ I cho nya kɛndɛi tosal le nyɛ nya tosa hoo wo.+ 7 Lelaŋ, la nɔ dialuŋ kalaŋ nduyɛ mi la nɔ kɔl simulaa. Kanifuule masanɔ nyaa Sɔɔ vi, nduyɛ mi yuŋgu Chuda wo hɛli ya le mi wa nda choo masa.”

8 Kɛ mi Abina+ po Nɛɛ wo, masa puaa chɔuwaa Sɔɔ wa chua po Sɔɔ wo Isi-bosiɛti,+ mbo kua a ndu Mahanɛm.+ 9 Okoŋ mbo siiŋguu ndu masaa Kiliaadi,+ Asiɛluati, Chɛsiluɛɛ,+ Ifiluem,+ Bɛŋjamiŋ vɛlɛ a Isɔluɛi kpou choo. 10 Isi-bosiɛti po Sɔɔ wo wa wɔsilaŋ 40 mbo simnuŋ masaa o Isɔluɛi niŋ. Nduyɛ le wɔsilaŋ la tiɔɔŋ o wa o masaleŋ choo. Kɛ mi wanaa wa o yuŋgu Chuda wo choo wa hiaunuŋ Deeve kɔɔli.+ 11 Le wɔsilaŋ la ŋɔmmɛu a paŋgoŋ ŋɔmpum, Deeve wa o masaleŋ choo Hɛbulɔŋ, yuŋgu Chuda wo choo.+

12 Mɛɛ teleŋ tiŋ hiou, mi Abina po Nɛɛ wo a buɛiyaa Isi-bosiɛti wa po Sɔɔ wo, mal Mahanɛm+ ma kua Kibiɔŋ.+ 13 Okoŋ kɔɔli, mi Chowaabi+ po Sɛluiya+ wo a buɛiyaa Deeve wa bɛɛ mal ma kɔ bɔɔŋiaŋ o mɛŋma ibuŋgaŋ Kibiɔŋ. Mi kundaa o pilɛ chal o mɛŋma ibuŋgaŋ kpeŋgei i pilɛ, nduyɛ mi kundaa o pilɔɔ chal kpeŋgei i pilɛi. 14 O mɛɛlulaŋ kpɔŋ, mi Abina dimul Chowaabi aa: “Puaa numnda a puaa niaa chɔŋ ma sɔŋga naa o hɔl.” Le hei, mi Chowaabi dimi aa: “Awa, a chɔŋ ma sɔŋga.” 15 Okoŋ ma chaŋ ma hɛli ŋwaŋ 12 o yuŋgu Bɛŋjamiŋ ndo niŋ, o kunda Isi-bosiɛti wo choo. Ma hɛli vɛlɛ ŋwaŋ 12 o buɛiyaa Deeve wa tɛɛŋ le sɔŋgɔɔ. 16 Ma saanaŋ bolle vellaa velle, mi o kɛ kɛ chuku chaŋ ndɔ luŋgbuei a muɛi faŋnde, okoŋ ma deli lɛŋ. Nduyɛ fondɛi keŋ o Kibiɔŋ niŋ ndaa veelu ni aa, Hɛlikati-hasuluim.

17 Mi sɔŋgɔ koŋ tuulu ketu ketu o paale leŋ choo. O mɛɛlulaŋ kpɔŋ, mi buɛiyaa Deeve wa yam Abina nda puaa o Isɔluɛi niŋ. 18 Puaa yaa waa Sɛluiya wa,+ Chowaabi,+ Abisiaa,+ a Asahɛɛ+ bɛɛ wa loŋ. Nduyɛ Asahɛɛ ndoo keleŋa a ŋpelu mɛɛ mɛɛ puuwɔɔ nyaanuŋ nuaa yondoo niŋ yɛ. 19 Mi Asahɛɛ tisa Abina kɔɔli a kiltaŋ. Nduyɛ nyaanɔŋ o wa ndu kɔɔli wo, o sei o ba kɛndɛ choo ɔɔ o ba mial choo le. 20 Mɛɛ Abina tofaŋ kɔɔli, mbo nyuna aa: “Num cho koŋ ni Asahɛɛ?” Mbo muli aa: “Ei, ya ni.” 21 Okoŋ mi Abina dimul ndu aa: “Sei o ba num kɛndɔɔ choo ɔɔ o ba num miallo choo, ma bii puaa feleŋguaa kaŋ o pilɛ. Nyɛ o nyɛ ŋ poonda ndu pɛ o ba, num nɔ ni.” Kɛ Asahɛɛ chɛl mbo pɛŋgi ndu kiltaŋ kɔɔli le. 22 Mi Abina dimul vɛlɛ Asahɛɛ aa: “Pɛŋgi ya kiltaŋ kɔɔli. Te o cho koŋ te, I cho num diyɔɔ. Nduyɛ te I dii num pɛ, I nɔla niŋ pa mi sim Chowaabi bɛ num o hɔl?” 23 Kɛ mbo kɛɛ le mbo pɛŋgi ndu kiltaŋ kɔɔli. Le hei, mi Abina via ndu demboo a bal tumndo,+ mi ballo buli ndu demboo mbo fula lekɔɔli, okoŋ mbo del lɛŋ ndoŋ mbo wu o foofo. Wana o wana ndoo fuuluu pɛ o fondaŋ Asahɛɛ wa ihini o vilɛiyo wo, o sim loŋ le teleŋ biŋgi.

24 Okoŋ mi Chowaabi nda Abisiaa tisa Abina kɔɔli a kiltaŋ. A teleŋ paaleŋ le del lo, ma fuuluu o pembei Amaa, Kiya ikɛi o nɛi kuɛ o yondo pollo Kibiɔŋ ndo. 25 Mi yuŋgu Bɛŋjamiŋ ndo kɔ balu Abina, ma simnuŋ kundaa o pilɛ. Okoŋ, ma kɔ sim o pembei ipum choo. 26 Mi Abina dimul Chowaabi choo choo aa: “Le vɛɛ kpɛ nya cho yɛ hiouwɔɔ lachi a sɔŋgaa vellaa velle a mɔɔŋ faŋndoŋ? La sina nuaa maa kpundɔɔ le cho wa fulamakɔɔlioo le? Mɛɛ a dimul niŋ waŋnda le ma pɛŋgi puaapiliaa ndaa touwɔɔ le?” 27 Okoŋ mi Chowaabi dimi aa: “I mɛnaŋ po o Mɛlɛka tonya cho yoomu wo lo maa, te num oo suu le, mɛɛ a wa lo puaapiliaa ndaa touwɔɔ haaa siɔdii idii.” 28 Le hei, mi Chowaabi hɔŋ buloo, mi puaa pɛŋgi Isɔluɛiya kiltaŋ kɔɔli, okoŋ mi chɔuwo pɔlul.

29 Mi Abina nda puaa nduaa keeku a Aluaba,+ ma lɔl kɔlaŋ pii pii. Nduyɛ ma taŋ Chɔɔdaŋ ndaŋ, ma keeku o dɛŋgbɔɔ niŋ. O mɛɛlulaŋ kpɔŋ, ma fuuluu Mahanɛm.+ 30 Mɛɛ Chowaabi pɛŋgi Abina touwɔɔ mbo miiŋgu, mbo kɔ chuuŋgiaa waŋnda kpou naapilɛ. Mbo saaluŋ maa o fulawɔ o Asahɛɛ kɔɔli, buɛiyaa Deeve wa ŋwaŋ 19 ndaa luusiaŋ ni. 31 Kɛ mi buɛiyaa Deeve wa yam yuŋgu Bɛŋjamiŋ ndo a puaa Abina wa. Nduyɛ ma diu puaa 360 nda tɛɛŋ. 32 Ma chua dialuŋ Asahɛɛ+ woŋ, ma kɔ kumbu muŋ o sɛi finya ndɔ wo niŋ Bɛtilɛhɛm.+ Okoŋ, mi Chowaabi nda puaa nduaa lɔl kɔlaŋ pii pii ma fuuluu Hɛbulɔŋ+ a paale siaaleŋ.