Saamiɛɛ Diiŋ Ndɔɔ

3 Sɔŋgɔ wa yuŋgu Sɔɔ nda yuŋgu Deeve wo tɛɛŋndo wa tuŋ hiouwɔɔ lachi. Nduyɛ Deeve wa hiouwɔɔ lachi a kpaayaa sɔlaa,+ kɛ mi kpaaya yuŋgu Sɔɔ wo wa hiouwɔɔ lachi a dɔɔnaŋndo.+

2 Boondii Deeve wa Hɛbulɔŋ nde,+ mbo vialu puaa loŋ. Po ndɔ tasoo wa Aminɔŋ ni,+ nduyɛ nda Ahinowam+ wana waa Chɛsiluɛɛ velu ndu ni. 3 Po ndɔ diiŋ ndɔɔ wa Chiliaabi ni, nduyɛ nda Abikɛɛ+ lanɔ Nabaa mɛiyo, wana waa Kamɛɛ velu ndu ni. Po ndɔ yaa ndɔɔ wa Abisalɔm ni.+ Nda Maaka velu ndu ni, chua Talimai yo,+ masaa Kɛsiɔɔ. 4 Po ndɔ hiɔɔloo wa Adonicha ni,+ nduyɛ nda Hakiti velu ndu ni. Po ndɔ ŋuɛɛnoo wa Siɛfatiaa ni, nduyɛ nda Abitaa velu ndu ni. 5 O ŋɔmpum ndo wa Itiluɛm ni, nduyɛ nda Ɛkilaa velu ndu ni. Puaa Deeve velu o Hɛbulɔŋ niŋnda cho haa ni.

6 Mi che bɛɛ chɔu wa yuŋgu Sɔɔ nda yuŋgu Deeve wo tɛɛŋndo wa hiouwɔɔ lachi, kɛ Abina+ wa tuŋ hiouwɔɔ lachi a simnɔŋndo wana kpaaya bɛndu o yuŋgu Sɔɔ wo choo. 7 Nduyɛ, Sɔɔ ndoo nɔ lanɔ pɔmbɔɔ diolaŋ aa Luisipa,+ chua Eya wo. Mɛɛ teleŋ tiŋ hiou, mi Isi-bosiɛti+ nyuna Abina aa: “Le yɛɛnɛ ŋ hiviŋ yɛ lanɔ pɔmbɔ finya nuu kɔɔli?”+ 8 Mi Abina duaunuŋ tumbe tau tau a Isi-bosiɛti le nyuna o nyuna ndu hoo wo. Mbo dimi aa: “Baa tuŋ fondoo ya cho o Chuda niŋ ni? Mi chɔm yuŋgu finya numndo, pɔmbuaa nduaa, vɛlɛ a chaaŋaa nduaa kaala lo lechoo wo haaa a paale hauleŋ ndeŋ. Nduyɛ paale pilɛ bɛɛ I pisi num Deeve o ba le. Kɛ hau niŋ, ma wa ya tɔɔyaŋndo biyɔɔ le suɛi wana lanɔɔ. 9 Maa Mɛlɛka tusi ya Abina nyɛpalaa bɛndoo choo, te I kɛɛ pɛ le nyɛ Chɛhowa chuel Deeve buŋgɛiyo tosaa.+ 10 Mbo chuel Deeve buŋgɛi maa o cho masaleŋ faŋa o yuŋgu Sɔɔ wo niŋ, okoŋ mbo handu Deeve o kpeŋgbei* lemasaa choo Isɔluɛi a Chuda, chɔŋ Daŋ haaa kɔ Biaa-siɛba.”+ 11 Le hei, nyɛ o nyɛ Isi-bosiɛti nɔla lɛ mbo soo o Abina lo le, kanifuule siooŋii nduɛi wa ndu.+

12 Mi Abina viam waŋnda chɔ chɔ o Deeve lo le ma dimul ndu aa: “Le nɛɛnɛ lɛŋndeŋ le cho yɛ?” Mbo dimi vɛlɛ aa: “Yii kpemaa a ya, nduyɛ mi tosa nyɛ o nyɛ ya tiuba le mi Isɔluɛiya kpou hiou num kɔɔli.”+ 13 Okoŋ mi Deeve dimi aa: “O naŋ. I cho kpemaa yii a num. Nyɛ ya cho num dimul kinɛiyo cho ni maa, te o cho ma chuu ya Maikaa+ chua Sɔɔ wo le, mɛɛ fuuluu naa ya chua le.” 14 Okoŋ mi Deeve viam waŋnda o Isi-bosiɛti+ lo po Sɔɔ wo le ma dimul ndu aa: “Ke ya laa nuu Maikaa o ya dɔu fulu a suundula Filitiaŋnda 100 wo.”+ 15 Okoŋ mi Isi-bosiɛti viam waŋnda le ma kɔ chua ndu Palitiɛɛ+ pɔnɔ ndɔ o ba, po Laisi wo. 16 Kɛ pɔnɔ ndɔ wa hunɔɔ a ndu chaŋndo kɔɔli. O lo hunɔɔ ndu kɔɔli haaa ma fuuluu Bahuluim.+ Okoŋ mi Abina dimul ndu aa: “Faŋaŋ naa kɔɔli. Miiŋgu chiee!” Okoŋ mbo miiŋguŋ.

17 A boondii keŋ, mi Abina yɔŋ yooŋgoo o waŋ banaa Isɔluɛi lo le nda dimullo aa: “O cho niŋ hau le teleŋ vilɛi mi nyaa yeema le mi Deeve wa nya choo masa. 18 Lelaŋ la tosa niko nyɛ, kanifuule mi Chɛhowa dimul Deeve+ aa: ‘Deeve buɛi nuu ya cho soliŋ kpeku ni le mbo piŋi wanaa niaa* Filitiaŋnda, vɛlɛ a yaamɔɔwaa ndaa kpou o ba.’” 19 Okoŋ kɔɔli, mi Abina kɔ soo o yuŋgu Bɛŋjamiŋ ndo lo.+ Mi Abina kua vɛlɛ Hɛbulɔŋ, mbo kɔ soo o Deeve lo sɔɔ sɔɔ. Mbo dimul ndu nyɛ Isɔluɛiya a waŋnda o yuŋgu Bɛŋjamiŋ ndo choo kpou chɛlaŋ choo wo.

20 Mɛɛ Abina wa kɔlaŋ naa Deeve chua Hɛbulɔŋ, mbo kua a puaa nduaa ŋwaŋ 20. Okoŋ mi Deeve tosa bɔŋaŋ pɔmbɔ le mi Abina nda puaa wa a ndu latulu wa de nyɛdiaa. 21 Mi Abina dimul Deeve aa: “Mal la mi kɔ chuuŋgiaa Isɔluɛiya kpou naapilɛ le masanɔ nuu, le halikpeŋ ma yii kpemaa a num, nduyɛ ma simnuŋ masaa kaalaŋ Isɔluɛi choo kpou a mɛɛ ŋ yeema yɛ.” Okoŋ mi Deeve mal Abina, mbo kuaŋnuŋ o kɔl nyulu niŋ.

22 A teleŋ koŋ kinɛi, mi puaa Deeve wa a Chowaabi fula nyɔɔŋ puŋgaa o chɔuwo, nduyɛ ma huŋ a muŋ tau. Abina ndoo faŋaŋ niŋ Hɛbulɔŋ naa Deeve chua, kanifuule mi Deeve mal ndu mbo kuaŋnuŋ o kɔl nyulu niŋ. 23 Mɛɛ Chowaabi+ a puaa chɔuwaa wa latulu a ndu wa kpou hiŋ, mi waŋndo dimul Chowaabi aa: “Mi Abina,+ po Nɛɛ wo+ huŋ o masaa lo, kɛ mi masaa mal ndu mbo kuaŋnuŋ o kɔl nyulu niŋ.” 24 Okoŋ mi Chowaabi kua o masaa lo mbo nyuna ndu aa: “Yɛɛnɛ ŋ tosa yɛ hoo? Le yɛɛnɛ mi Abina huŋ nanuŋ ma mal ndu mbo kuaŋnuŋ o kɔl nyulu niŋ? 25 Numpila sina wana suu Abina, po Nɛɛ wo cho wo! Le num huiyo o hiŋ nanuŋ ni, nduyɛ le mbo sina naa ŋ keeku ma fula wa, vɛlɛ a nyɛ o nyɛ ŋ cho tosaa.”

26 Okoŋ mi Chowaabi faŋaŋ o Deeve lo, mbo viam waŋnda Abina kɔɔli. Mɛɛ nda bendal ndu o sooŋ mamɛŋndo Sɛlua, ma miiŋgu a ndu pila. Kɛ Deeve sina nyɛ o nyɛ a hei okɔɔ le. 27 Mɛɛ Abina miiŋgu Hɛbulɔŋ,+ mi Chowaabi kua a ndu o dio kpakioo ikɛi le mbo soo o ndu lo sɔɔ sɔɔ. Kɛ, mbo chuku Abina demboo loŋ a muɛi faŋnde mbo wu.+ Le mɛɛ Abina dii Asahɛɛ pɔmbɔ ndɔ yɛ* o tosa hei ni.+ 28 Mɛɛ Deeve tuei a ndi okɔɔ, mbo dimi aa: “Fɛɛŋ bɛɛ Chɛhowa bii ya a masale nileŋ tɔɔyaŋ+ le piɔm Abina, po Nɛɛ wo le. 29 Maa nyɛ Chowaabi+ tosa wo miiŋgu ndu a yuŋgu finya ndɔ wo kpou o lebol fɔ! Maa le fɛɛŋ a fɛɛŋ, puaa chii o lɛmbɔɔ niŋnda,*+ wanaa ŋlɛliaa,+ wanaa bɛvɛiya ɔɔ wanaa nda diu o chɔuwo wa, ɔɔ fofolaa chuu o yuŋgu Chowaabi wo niŋ te fɔ!”+ 30 Mi Chowaabi nda Abisiaa+ bɛ ndɔ dii Abina+ le mɛɛ o dii Asahɛɛ pɔmbɔ nda o chɔuwo Kibiɔŋ yɛ.+

31 Mi Deeve dimul Chowaabi a waŋnda kpou aa: “La sɛɛsiaŋ nyɛlaŋ lekɔɔ, nduyɛ mi la wounuŋ nyɛla labɛkilaŋ okoŋ mi la chaŋ Abina.” Masaa Deeve pila bɛɛ wa kɔlaŋ o nyɛ nda chua dialuŋ vilɛiyoŋ choo wo kɔɔli. 32 Ma kɔ kumbu Abina Hɛbulɔŋ, nduyɛ mi masaa chaŋ choo choo kpeleŋ o sɛi Abina wo choo. Mi waŋnda kpou bɛɛ chaŋ. 33 Mi masaa soli chondei o chaŋ o wa Abina wo niŋ aa:

“Le yɛɛnɛ kpeekpei Abina sɔla yɛ piɔmndo maa diɔm?

Ma del lɛŋ, mɛɛ waŋndo del nuaa wanaa dɛnɛ wɔɔŋnda lachi yɛ.”+

Mɛɛ waŋnda kpou tuei hei, ma chɔɔlu vɛlɛ chaŋ Abina choo.

35 Okoŋ kɔɔli, mi waŋnda kpou kua o Deeve lo ipalaa, le ma ke ndu nyɛdiaa* kɔl dɛɛniaa. Kɛ mi Deeve mɛnaŋ aa: “Haaa mi paaleŋ le del, te I wounuŋ pɛ nyɛdiaa ɔɔ nyɛ o nyɛ cheleŋ o sondo, Mɛlɛka tusi ya nyɛpalaa bɛndoo choo!”+ 36 Mi waŋnda kpou cha nyɛ yɔŋnuŋ ndo, nduyɛ mi i nɛŋi nda kɔllo. Nyɛ o nyɛ masaa tosa, mi waŋnda kpou hini kɔl a ndu! 37 Mi laŋgbaa Deeve wa vɛlɛ a Isɔluɛiya kpou sina o paale leŋ choo maa, bala masaa Deeve laŋ la ve o piɔm Abina, po Nɛɛ wo niŋ te.+ 38 Okoŋ mi masaa dimul buɛiyaa nduaa aa: “La sina nuaa maa masaa a wana tɔɔ bɛndoo le vi hoo hau o Isɔluɛi niŋ te?+ 39 Yoomuaŋ ma chuu ya paale hauleŋ ndeŋ fo, mi che bɛɛ I sɔla pɔyaa le waa masa.+ Nduyɛ puaa haa, nda yɔŋnuŋ maa puaa Sɛluya wa ni,+ a nɔ bɔɔ hɔlaa vesɛiya.+ Maa Chɛhowa miŋgul wana dɛnɛ wɔɔŋndo maa le dɛnɛ ndɔ wɔɔŋndo fɔ!”+