Saamiɛɛ Diiŋ Ndɔɔ

17 Okoŋ kɔɔli, mi Ahitofɛɛ dimul Abisalɔŋ aa: “A yandii, I yeema mi chua puaa 12,000 mi tisa Deeve kɔɔli chuɛllɛŋ. 2 A teleŋ o cho wa o saŋgɛi yɔkɔɔ wo ya cho ndu komal ni+ mi kɔllo laasiaŋ ndu. Nduyɛ, mi wanaa cho ndu kɔɔli wa kpou piɔl ma nyaanuŋ, okoŋ mi dii ndu.+ 3 Te I dii ndu pɛ, I hiŋ a waŋnda kpou o numndo. Te a tiu dɔɔ pɛ wana ŋ cho nuuviaa wo ba, waŋnda kpou cho miiŋgu, nduyɛ mi wana o wana wa o kɔl nyulu niŋ.” 4 Mi Abisalɔŋ a waŋ banaa Isɔluɛiya kpou hɛnaŋ a kɛɛsiaa hoo.

5 Kɛ mi Abisalɔŋ dimi aa: “A yandii, la veelu wɔ vɛlɛ Husai+ Akaitiinɔɔ, miŋ tuei nyɛ ndu bɛɛ nɔ le dimioo wo.” 6 Okoŋ, mi Husai luɛi naa Abisalɔŋ chua. Mi Abisalɔŋ dimul ndu aa: “Sila Ahitofɛɛ yɔŋgu wo cho hoo ni. Ŋ tosa mɛɛ o dimi yɛ? Te o cho yɛ koŋ te, mɛɛ dimul naa nyɛ naŋ nɔ miŋ tosa wo.” 7 Okoŋ, mi Husai dimul Abisalɔŋ aa: “Le suŋ suŋ ndɔ, o bɛnda miŋ tol sila Ahitofɛɛ yɔŋgu wo kɔɔli le!”+

8 Mi Husai hiau lachi a suɛi aa: “Numpila sina maa finya num a laŋgbaa nduaa kpou, wanaa kpaayaa bɛnduaa pila nda cho ni.+ Nduyɛ a cho a hiilɛi, mɛɛ sulukoo wa nuaa yondoo niŋ a yolɛi le chuauwaa nduaa luusiaŋ nda yɛ.+ O fulawɔ okoŋ kɔɔli, kuubanɔ chɔuwo finya num cho ni,+ nduyɛ o cho malɔ a waŋnda latulu le. 9 Mɛɛ naŋ suaa nuaa yɛ bɛɛ, o cho dɔɔ o viaŋnaŋ o buuloo* pum niŋ, ɔɔ o fondaŋ cheleŋ.+ Nduyɛ, te o yɔŋ pɛ aa ndu fɛlɛŋ fula mbo huŋ chiŋalaŋ naa, wanaa cho tueiyɔɔ a ndi okɔɔ wa cho dimi aa, ‘Wanaa tol Abisalɔŋ kɔɔli wa kpou a yem nda!’ 10 Te keŋ yɔŋnuŋ pɛ, wana nɔ bɛɛ kɔl simulaa maa kpɔkuŋndo* wo,+ siooŋnde cho ndu biyɔɔ, kanifuule waŋnda Isɔluɛi kpou sina maa wana kpaaya bɛndoo+ pila finya num cho ni. Nduyɛ, puaa kɔl simulaa cho ndu kɔɔli ni. 11 Sila ya nɔ wo cho hoo ni: Tosa mi Isɔluɛiya kpou chuuŋgiaŋ naa num chua, chɔŋ Daŋ kɔ Biaa-siɛba,+ ma sɔla waŋnda a hɔbɛi mɛɛ siooŋnde wa nuaa o pee mɛŋma ihɛllo kɔŋgɔ yɛ.+ Okoŋ, ma sim nda lachi le kɔlaŋ o chɔuwo. 12 Ba o ba o wa pɛ, ŋ cho lakɔ loŋ miŋ kɔ tol ndu choo, mɛɛ mɔmndo kumbu nuaa lɛŋndeŋ yɛ. Ndu ni, puaa cho latulu a ndu wa ni, wana pilɛ bɛɛ cho hiɔlɔŋ te. 13 Nduyɛ te o nyaanuŋ pɛ mbo kɔ vioŋnuŋ o chiee kɛ kɛ niŋ, waŋnda Isɔluɛi kpou cho lakɔ a yuei o chiee koŋ, miŋ baa ndi o kpaki chioo, nduyɛ miŋ naŋ ndu miŋ kɔ mal o kpoloŋndo niŋ. Tɛɛnɛi i pilɛ bɛɛ lo le.”

14 Okoŋ, mi Abisalɔŋ a puaa Isɔluɛi kpou dimi aa: “Sila Husai Akaitiinɔɔ yɔŋgu hoo wo bɛnda+ mbo hiau sila Ahitofɛɛ yɔŋgu wo.”+ Chɛhowa pila kɛɛsiaa ni, le mbo laasiaa sila kɛndɛ Ahitofɛɛ yɔŋgu wo, le halikpeŋ mi ndu Chɛhowa tusi Abisalɔŋ kpundɔɔ choo.+

15 Okoŋ kɔɔli, mi Husai dounuŋ Sadɔki nda Abiaata+ wanaa soliaa lasalaa kona, a sila Ahitofɛɛ yɔŋgu waŋ banaa Isɔluɛiya wo okɔɔ. Nduyɛ, mbo chɔm nda vɛlɛ sila ndu bɛɛ yɔŋgu wo. 16 Mbo dimul nda aa: “La yɔŋ yooŋgoo hoo chɔ chɔ o Deeve lo, mi la dimul ndu aa: ‘La lɔl chuɛllɛŋ o fondaŋnda taŋaalaŋ Chɔɔdaŋ o pollo niŋ te. Kɛ la chɔŋ mi la taŋ chɔ chɔ, te o cho koŋ te, num masaa a wanaa cho latulu a num nda, a cho nya basɔɔ tɛɛ.’”*+

17 Chonataŋ+ nda Ahimaasi+ wa o pioo Ɛŋ-lokɛɛ,+ kanifuule ndaa bii kɔllo ma hel chiee mi waŋnda del nda hɔlteŋ te. Le hei, ma viam chuaambɔ pilɛ le mbo kɔ dimul nda, mi nda kuɛ ma kɔ dimul Masaa Deeve. 18 Kɛ nduyɛ, mi po feleŋgɔnɔ pilɛ cha nda, mbo kɔ dimul Abisalɔŋ. Le hei, mi nda ŋiɔɔŋ kpou nyaanuŋ ma kua Bahuluim chiee,+ o chiɛi po pilɛ o ndoo nɔ sooŋndo o bɛɛ wo. Okoŋ, ma tual o sooŋ koŋ niŋ. 19 Mi lanɔɔ poo hoo chua nyɔɔ mbo pɛŋgɛla o sooŋndo hoo choo, okoŋ mbo tɛi kuluŋ wɔkɔlaŋ lechoo. Wana o wana sina a ndi okɔɔ le. 20 Mɛɛ buɛiyaa Abisalɔŋ nda hiŋ o chuaa hoo lo bɛɛ, ma nyuna ndu aa: “Kuɛɛnɛ Ahimaasi nda Chonataŋ hiou yɛ?”+ Mi chuaa mulul nda aa: “A laŋga hiou, ma kua ba pioo.” Mi puaa haa nuuviaa nda, kɛ a seeluŋ nda le. Okoŋ, ma miiŋgu Chulusalɛm.

21 Mɛɛ nda miiŋguŋ, mi Ahimaasi nda Chonataŋ fula o sooŋndo niŋ, ma kɔ dounuŋ Masaa Deeve kona a sila Ahitofɛɛ yɔŋgu wo okɔɔ. Ma dimul ndu aa: “Chɔŋ chɔ chɔ ma taŋ pioo.”+ 22 O lepilɛ niŋ kpe, mi Deeve a wanaa wa a ndu latulu wa kpou chaŋ ma taŋ Pioo Chɔɔdaŋ. A pɛŋgu paale siaaleŋ, waŋndo o pilɛ bɛɛ ndoo lo lɛ le Pioo Chɔɔdaŋ taŋɔɔ le.

23 Mɛɛ Ahitofɛɛ che maa a kɛɛ le sila ndɔɔ tolɔɔ kɔɔli, mbo hel o sofɛlɔɔ choo mbo kua o chiɛi ndɔɔ o ndu lo chiee.+ Mɛɛ o chii yuŋgu ndɔɔ choŋgɔŋ,+ mbo landuŋ mbo wu.+ Okoŋ, ma kumbu ndu o fondaŋ nda kumbu finyaa nduaa mamaa wo.

24 A teleŋ koŋ, mi Deeve kua Mahanɛm,+ nduyɛ mi Abisalɔŋ a puaa Isɔluɛi kpou taŋ Pioo Chɔɔdaŋ. 25 Mi Abisalɔŋ kɛsi Amasa+ puaa chɔuwa bolleŋ o foofo Chowaabi wo.+ Amasa hoo yɛ, po Isɔluɛinɔ pilɛ diolaŋ aa Itiluaa velu ndu ni nda Abikɛɛ,+ chua Nahasi wo. Abikɛɛ yɛ, pɔmbɔɔ a bɛndoo nda wa nda Sɛluiya ni, kalaa Chowaabi. 26 Mi Abisalɔŋ a puaa chɔuwa Isɔluɛi kɔ kiolu dɔɔŋgɔɔ o buŋgɛi Kiliaadi ve niŋ.+

27 Mɛɛ Deeve fuuluu dɔɔ Mahanɛm, mi Siobi po Nahasi wo, fulaa Luaba+ chiee Amɔnaitiiya, Makaya+ po Amiɛɛ wo, fulaa Lo-dɛba, a Baasilai+ wana waa Kiliaadi, fulaa Lɔkilim, 28 yoo ndu kpelelaŋ, hɛŋgɛilaŋ, kpɛɛnɛŋ puuloŋ, witiiyoŋ, baliiyoŋ, kpeyaŋndo, kuluŋ tuɛiyaŋ, kawuŋ bɛndoŋ, kawuŋ pɔmbɔŋ, kuluŋ tuaŋaŋ, 29 liaaŋ, bɔtɛiyaŋ,* a milikiima* kpuŋgbaŋ. Ma chua nyɔɔŋ muŋ kpou ma yoo Deeve a wanaa wa a ndu latulu wa le ma de.+ Kanifuule ma dimi aa: “Waŋnda haa cho a yiaaŋ ma wa a saŋgɛiya. Nduyɛ, a cho a bolola vesɛilaŋ o pollo niŋ.”+