Sɔɔŋ Chɔɔmaŋndoŋ
9 Mɛɛ maalikɛinɔ ŋuɛɛnoo hɔŋ bulu ndɔɔ,+ mi cha mi luei fula choo choo mi i del o lɛŋndeŋ choo. Ma ke luei hei kiyii kumbi sooŋ yiŋgilɛi nɔ lamɛɛlu le wo.+ 2 Mɛɛ i kumbi sooŋ yiŋgilɛi nɔ lamɛɛlu le wo, mi kumnde fula leniŋ mɛɛ mɛɛ kumnde fula nuaa o yiŋnde tondole bɛnduleŋ niŋ yɛ. Mi i tosa mi paaleŋ a hueiye piimiaa kpilo kpilo.+ 3 Mi soonuaa fula o kumnde hei niŋ ma huŋ o lɛŋndeŋ choo.+ Ma ke nda kpaayaa mɛɛ mɛɛ nda ke ŋgeemaa kpaayaa o lɛŋndeŋ choo yɛ. 4 Ma dimul nda maa a pilaŋ bil puiyaa o lɛŋndeŋ choo, a tɔlɔɔlaŋ, a yɔm o yɔm te, mɛɛ wanaa nɔ tamasi Mɛlɛkaa o ŋtendu le wa.+
5 Ma dimul soonuaa haa maa a dii waŋnda haa le, kɛ maa a tusi nda nyɛpalaa choo le paŋgoŋ ŋuɛɛnu. Nyɛpalaa ndaa hoo wa ko mɛɛ ŋgeemaa+ biaŋ waŋndo, mbo luei ndu o nyɛpalaa niŋ yɛ. 6 A boondii keŋ, waŋnda chieeya nuuviaa niŋ nɛilaŋ le piɔmndo, kɛ a vi niŋ te. A yeema niŋ piɔmndo, kɛ mi piɔmndo nyaanuŋ nda.
7 Wana che pɛ soonuaa haa, naŋ chaa suaa bɛɛndiaŋ le chɔuwo wa ni.+ Nyɔɔ wa nda o lebol maa mɔsil lemasa ŋkoolii. Hɔlla nda maa hɔlaa wanachiee. 8 Yiinde nda o lebol maa yiiŋii wana lanɔ. Chiŋuŋ ndaŋ naŋ chaa chiŋuŋ kpɔkuŋnda* ni.+ 9 A nɔ boola chɔulaŋ nda o latakpa maa boola ŋchiliŋ. Nduyɛ bɔɔla ndalaŋ la wa suɛi, naŋ chaa nyɛm nyaanaŋ suaa naŋndoŋ cho kɔlaŋ le chɔuwo ni.+ 10 Soonuaa haa nɔ puiye a kefoŋ naŋ chaa ŋgeemaa ni. O puiyii ndɛi kpaaya ndaa cho ni le waŋnda nyɛpalaa tusioo choo le paŋgoŋ ŋuɛɛnu.+ 11 Masa ndaa cho maalikɛinɔɔ le sooŋ yiŋgilɛi nɔ la mɛɛlu le wo ni.+ Diola ndɔlaŋ o Hibuluiye niŋ aa Abadɔŋ,* kɛ o Kilikiiye niŋ aa Apoliɔŋ.*
12 Kpundɛ tasoo hiou hoo ni. Kpundɛlaŋ la tiɔɔŋ la lo wɔ+ le hunɔɔ ni.
13 Mɛɛ maalikɛinɔ ŋɔmpum ndo+ hɔŋ bulu ndɔɔ,+ mi tuɛi mi diomndo fula o leela bandu luamaa lasala ŋkoolii+ cho Mɛlɛka lachi wo niŋ. 14 Mbo dimul maalikɛinɔ ŋɔmpum nɔ hoo buloo wo aa: “Tiimbuu maalikɛiyaa hiɔɔluaa cho a yiyaa o pee bɛndoo Yufiluaati wa.”+ 15 Okoŋ, mbo timbi maalikɛiyaa hiɔɔluaa wa a bɛɛndiaŋ le hawɛiyo,* paaleŋ, paŋgei, a wɔsioo wa le ma diu diu waŋnda chieeya. Waŋnda chieeya kpou piɔuwo kundalaŋ la yaa, ma diu diu kundaa o pilɛ.
16 Mi tuɛi mɛɛ puaa chɔuwa wa bolle pilɛ o suaa choo yɛ. A wa miiliɔŋndaŋ kɛmɔɔ lediiŋ. 17 Mɛɛ ya che suaa haa, a wanaa wa lechoo o yilaŋnde niŋnda yɛ cho hoo ni: Nyɛla chɔula wa nda lekɔɔ laŋ, laa nɔ kɔɔleŋ le siaŋa maa leyiŋ, a kɔɔle buliiyo, a kɔɔle basioo. Suaa haa bolii ndɛi naŋ chaa bolii kpɔkuŋnda ni.+ Yiŋndeŋ, kumnde, a fuŋgoo wa nda fulaa o lasondo. 18 Waŋnda chieeya kpou piɔuwo kundalaŋ la yaa, mi kpundɛlaŋ ndaŋ, yiŋndeŋ, kumnde, a fuŋgu wa nda fulaa o lasondo wo diu kundaa o pilɛ. 19 O lasondo a o puiye suaa haa nɔ kpaayaa ni. Puiyii ndɛi naŋ chaa bolii kɛuwa ni. A puiye hei nda yɔŋul waŋnda ni.
20 Kɛ wanaa kpundɛlaŋ ndaŋ la dii le wa, ma kɛɛ le wookɔŋndo. A mel nyinaa wɔɔŋnda, piɔmaa ŋkooliiya, piɔmaa kaniŋ* humbuaa, a nda toosiaa a chiliŋii siaŋɛi ya,* a nda toosiaa a poutaŋ nda, a piɔmaa nda toosiaa a yɔmnde wa sooluuwo le. Piɔmnda haa a chi le, a tui le, kɛlɛŋgaa ma balu.+ 21 A wookuŋ ma mal diyɔɔlaŋ te, a soli vɛlɛ balaŋ o sɔɔŋ nyinaa wɔɔŋnda niŋ te, kɛlɛŋgaa niŋ te ma mal kaa ihini nɔɔlɛiyo* a viileŋ.