Koloniko Diiŋ Ndɔɔ
11 Dimioo nuaa mi Luihobowam fuuluu Chulusalɛm, mbo chuuŋgiaa puaa chaa sɔŋgɔɔ nyɛkɛndɛi ya 180,000 o kaale Chuda leŋ a o kaale Bɛŋjamiŋ ndeŋ niŋ,+ le ma kɔ del waŋnda Isɔluɛi choo a chɔuwo, le halikpeŋ mi masaleŋ le miiŋgu ndu Luihobowam o ba.+ 2 Okoŋ mi Chɛhowa, Mɛlɛka tonyaa ke Siɛmaya+ wana suaa le ndu wo yooŋgoo aa: 3 “Dimul Luihobowam, po Sɔlɔmɔŋ ndo, masaa le Chuda, a wanaa cho o kaale Chuda leŋ a o kaale Bɛŋjamiŋ ndeŋ niŋnda, a wanaa tuaa kpou o Isɔluɛi niŋ aa, 4 ‘Nyɛ Chɛhowa dimi wo cho hoo ni: “La kua le sɔŋgɔɔ a puaapiliaa nyaa le. Wana o wana miiŋgu o ndu lo, kanifuule ya tosa ni mi suɛi hei yɔŋnuŋ.”’”+ Okoŋ ma tuɛi Chɛhowa diom, nduyɛ ma miiŋgu o la nda lo, a kue lɛ ma kɔ sɔŋga a Chɛlobowam te.
5 Chulusalɛm Luihobowam wa ichali ni, nduyɛ mbo taŋgul chieeŋ bɛndoŋ a kpakila kala kalalaŋ o Chuda niŋ. 6 Mbo taŋgul Bɛtilɛhɛm,+ Ɛtam, Tɛkowa,+ 7 Bɛti-sɔɔ, Sokɔ,+ Adulam,+ 8 Kaati,+ Maluɛsiaa, Sifi,+ 9 Adoluem, Lakisi,+ Asikaa,+ 10 Soluaa, Aichalɔŋ,+ a Hɛbulɔŋ.+ Chieeŋ wa o kpakila kala kalalaŋ niŋ Chuda a Bɛŋjamiŋ ndoŋ wa muŋ ni. 11 Okoŋ kɔɔli, mbo kɛsi puaa chɔuwa o fondaŋnda kala kalalaŋ ndaŋ le laŋ chɔɔloo mandaa. Nduyɛ mbo wa nda nyɛdiaa, chuɛiyaŋ, a muɛiyaŋ kioo. 12 Mbo yɔŋ boola puaa chɔuwa a baltaŋ o chieeŋ bɛndoŋ muŋ niŋ kpou. Mbo tosa mi chiooŋ muŋ sɔla kpaayaa tau tau. Nduyɛ, mi Chuda a Bɛŋjamiŋ wa ndu o ba bɛŋgu.
13 Okoŋ, mi wanaa soliaa lasalaa a Livaiya o Isɔluɛi niŋ kpou mal o fondaŋnda nda wa laŋ, ma hiaunuŋ Luihobowam kɔɔli. 14 Mi Livaiya mɛi fondaŋnda chɔluaa ndaa dia laŋ a nyɛm kɛŋ ndaŋ,+ ma huŋnuŋ Chuda a Chulusalɛm. Kanifuule, Chɛlobowam nda puaa nduaa chɛl lɛ nda le ma wa wanaa soliaa lasalaa le Chɛhowa le.+ 15 Okoŋ, mi Chɛlobowam pila hɛli wanaa soliaa lasalaa, mbo kɛsi nda o fondaŋnda filioŋndaŋ,+ le ma wa salalaŋ solioo o nyinaa wɔɔŋaa cho maa ŋchuiŋ nda*+ lo, a o nauwaa fɔŋnduaa o toosiaa wa lo.+ 16 Nduyɛ, mi waŋnda fulaa o kaalaŋ Isɔluɛi niŋ kpou, a ndaa nɔ yeemɛi le Chɛhowa, Mɛlɛka Isɔluɛiya nuuviaa wa tual nda kɔɔli Chulusalɛm, le salalaŋ solioo o Chɛhowa, Mɛlɛka finyaa ndaa mamaa lo.+ 17 Le wɔsilaŋ la yaa, a wa Luihobowam po Sɔlɔmɔŋ ndo tooloo, nduyɛ ma tosa mi masaleŋ o Chuda niŋ le sim yi. Kanifuule o wɔsila yaala laŋ niŋ, a wa Mɛlɛka piɛiyo mɛɛ Deeve nda Sɔlɔmɔŋ tosa yɛ.
18 Okoŋ mi Luihobowam chua Mahalati, chua Chɛluimɔti nda Abihee wo o nɔɔ niŋ. Chɛluimɔti yɛ, finya ndɔ wa Deeve ni. Nduyɛ Abihee, finya ndɔ wa Ɛliaabi ni, po Chɛɛse wo.+ 19 Mɛɛ teleŋ tiŋ hiou, mbo vilul ndu puaa haa: Chɛhusi, Siɛmaluiya, a Saham. 20 O ndu kɔɔli, mbo chua Maaka, chua mama Abisalɔŋ ndo o nɔɔ niŋ.+ Mɛɛ teleŋ tiŋ hiou, mbo vilul ndu Abaicha,+ Atai, Saisa, a Siɛlomiti. 21 O laanduaa Luihobowam nda tɛɛŋ kpou vɛlɛ a laandaa nduaa pɔmbuaa,+ Maaka chua mama Abisalɔŋ ndo ndoo hiou kaala. Ndoo nɔ laanduaa 18, a laanduaa pɔmbuaa 60. Nduyɛ, ma vilul ndu puaa 28, a waŋ laanduaa 60. 22 Le hei, mi Luihobowam siiŋguu Abaicha, po Maaka wo wana lebollo a simlachinɔɔ le puaa nduaa kpou. Kanifuule, ndoo yeema mbo siiŋguu ndu masaa. 23 Kɛ mbo tosa kɔl kaloo, okoŋ mbo yɔŋ puaa nduaa a tiŋ o tanda Chuda a Bɛŋjamiŋ ndo niŋ, a o chieeŋ bɛnduŋ nɔ kpakila kala kalalaŋ ndoŋ niŋ kpou.+ Mbo ke nda nyɔɔŋ ŋ hɔbɛi, nduyɛ mbo chuel nda laanduaa tau tau.