CHƐNƐSI

1 O kandɔŋndo, mi Mɛlɛka toosiaa choo choo a lɛŋndeŋ.+

2 A teleŋ koŋ, lɛŋndeŋ le wa mulukɛlɛɛ, nduyɛ nyɛ o nyɛ ve lechoo le. Nyumndaŋ ma wa kpiŋgbi o mɛŋndaŋ choo,*+ nduyɛ nyina Mɛlɛkaa*+ wa heeloo a tuusoo o mɛŋndaŋ choo.+

3 Mi Mɛlɛka dimi aa: “Nyɛ teŋgaa o wa.” Okoŋ, mi nyɛ teŋgaa wa.+ 4 Okoŋ kɔɔli, mi Mɛlɛka cha maa nyɛ teŋgaa bɛnda. Mbo piɔu nyɛ teŋgaa tɛɛŋ a nyumndaŋ. 5 Mi Mɛlɛka veelu nyɛ teŋgaa aa Ipala, kɛ mbo veelu nyumndaŋ aa Ichɔl.+ Mi nyumndaŋ ma tual, nduyɛ mi paaleŋ le sia, paale taseleŋ.

6 Mi Mɛlɛka dimi aa: “Fondokpa bɛndoo+ wa mɛŋndaŋ tɛɛŋ, nduyɛ mi mɛŋndaŋ ma piɔunuŋ tɛɛŋ sala tiɔɔŋ.”+ 7 Mi i yɔŋnuŋ lende. Okoŋ mi Mɛlɛka toosiaa fondokpa bɛndoo, mbo piɔu mɛŋndaŋ tɛɛŋ sala tiɔɔŋ. Mi mɛŋndaŋ kumbuei pilɛi ma lo o fondokpa koŋ bɛŋgu, mi ma piliaŋ ma hiau lekɔɔli.+ 8 Mi Mɛlɛka veelu fondokpa bɛndu koŋ aa Choo Choo.* Mi nyumndaŋ ma tual, nduyɛ mi paaleŋ le sia, paale diiŋ ndɔleŋ.

9 Okoŋ mi Mɛlɛka dimi aa: “Mɛŋma cho o choo choo bɛŋgu waŋ ma diinuŋ naapilɛ, nduyɛ mi lɛŋnde vesɛileŋ le fula.”+ Mi i yɔŋnuŋ lende. 10 Mi Mɛlɛka veelu fondaŋ vesɛiyo aa Lɛŋndeŋ,+ kɛ mbo veelu mɛŋma diinuŋ naapilɛ waŋ aa Peelaŋ.*+ Okoŋ, mi Mɛlɛka cha maa o bɛnda.+ 11 Mi Mɛlɛka dimi aa: “Lɛŋndeŋ le tosa mi billo vil, nduyɛ mi tɔlɔɔla chuulu mi la nɔ kulloŋ leniŋ ndaŋ, a yɔmii kuamɛi vil a suulaŋ yɛ yɛ. Yɔmnde hei wa komɔɔ a buŋndaŋ leniŋ o lɛŋndeŋ choo.” Mi i yɔŋnuŋ lende. 12 Okoŋ mi billo, tɔlɔɔla chuulu mi la nɔ kulloŋ leniŋ ndaŋ,+ a yɔmii kuam a buŋndaŋ leniŋ nde wul o lɛŋndeŋ choo a suulaŋ yɛ yɛ. Okoŋ, mi Mɛlɛka cha maa o bɛnda. 13 Mi nyumndaŋ ma tual, nduyɛ mi paaleŋ le sia, paale yaa ndɔleŋ.

14 Mi Mɛlɛka dimi aa: “Nyɛm yɔŋgu nyɛ teŋgaa*+ o fondokpa bɛndoo o choo choo niŋndoŋ ŋ wa, le miŋ tosa mi teŋgeŋndo wa paaleŋ tɛɛŋ a nyumndaŋ,+ nduyɛ mi nyɔɔŋ muŋ wa le boondoŋ, palɛi, a wɔsilaŋ sinaa.+ 15 Nyɔɔŋ muŋ cho wa o fondokpa bɛndu cho o choo choo niŋndo, miŋ wa nyɛ teŋgaa yɔŋgoo o lɛŋndeŋ choo.” Mi i yɔŋnuŋ lende. 16 Okoŋ, mi Mɛlɛka toosiaa nyɛm bɛnduŋ yɔŋgu nyɛ teŋgaa woŋ ŋ muuŋ, le mi nyɛ teŋgaa hiou kpou wo nɔ kpaayaa ipala,+ nduyɛ mi nyɛ teŋgaa dɔɔnaŋ ndo nɔ kpaayaa ichɔl. Mbo toosiaa vɛlɛ looŋ.+ 17 Okoŋ, mi Mɛlɛka kɛsi muŋ o fondokpa bɛndu cho o choo choo niŋndo le nyɛ teŋgaa yɔŋgoo o lɛŋndeŋ choo, 18 le miŋ nɔ kpaayaa ipala a ichɔl, nduyɛ miŋ kɛsi teŋgeŋndo paaleŋ a nyumndaŋ tɛɛŋ.+ Okoŋ, mi Mɛlɛka cha maa o bɛnda. 19 Mi nyumndaŋ ma tual, nduyɛ mi paaleŋ le sia, paale hiɔɔlu leŋ.

20 Okoŋ mi Mɛlɛka dimi aa: “Nyaa yoomaa piɔ niko cha o peelaŋ niŋ, nduyɛ mi nyaa yoomaa balu o hueiye niŋnda, balu o fondokpa bɛndu cho lɛŋndeŋ tɛɛŋ a choo choo* wo niŋ.”+ 21 Mi Mɛlɛka toosiaa visiaa bɛnduaa o peelo a nyaa yoomaa suulaŋ yɛ yɛ ma pia o peelaŋ niŋ cha, vɛlɛ a nyaa yoomaa nɔ kumbaŋndaŋ ma balu o choo choo niŋnda suulaŋ yɛ yɛ. Okoŋ, mi Mɛlɛka cha maa o bɛnda. 22 Mi Mɛlɛka duau nda sala, mbo dimi aa: “La kui, mi la pɛ cha o peelaŋ niŋ.+ Nyaa yoomaa balu o choo choo niŋnda bɛɛ kui tau o lɛŋndeŋ choo.” 23 Mi nyumndaŋ ma tual, nduyɛ mi paaleŋ le sia, paale ŋuɛɛnu leŋ.

24 Mi Mɛlɛka dimi aa: “Lɛŋndeŋ le tosa mi nyaa yoomaa fula a suulaŋ yɛ yɛ, visiaa chiee niŋnda, visiaa kua o demboo choo wa,* a visiaa yonduaa suulaŋ yɛ yɛ.”+ Mi i yɔŋnuŋ lende. 25 Mi Mɛlɛka toosiaa visiaa yonduaa suulaŋ yɛ yɛ, visiaa chiee niŋnda suulaŋ yɛ yɛ, a nyaa yoomaa kua o demboo choo o lɛŋndeŋ choo wa kpou suulaŋ yɛ yɛ. Okoŋ, mi Mɛlɛka cha maa o bɛnda.

26 Okoŋ kɔɔli mi Mɛlɛka dimi aa: “Ŋ+ toosiaa wanachioo o velaŋ naa niŋ,+ mbo wa maa naa.+ Mi suuwa o peelo, nyaa yoomaa balu o choo choo niŋnda, visiaa chiee niŋnda, lɛŋndeŋ kpou, a nyaa yoomaa kɛ kɛ kua o demboo choo o lɛŋndeŋ choo wa nda o ba bɛŋgu.”+ 27 Okoŋ, mi Mɛlɛka toosiaa wanachioo o velaŋ ndɔɔ niŋ. Mbo toosiaa wana pɔnɔɔ a wana lanɔɔ o velaŋ ndɔɔ niŋ.+ 28 Mi Mɛlɛka duau nda sala, mbo dimul nda aa: “La violu chuauwa, mi la kui mi la pɛ cha o lɛŋndeŋ choo,+ nduyɛ mi lɛŋndeŋ le wa nya o ba bɛŋgu.+ Okoŋ mi suuwa o peelo, nyaa yoomaa balu o choo choo niŋnda, a nyaa yoomaa kɛ kɛ cho o lɛŋndeŋ choo wa nya o ba bɛŋgu.”+

29 Mi Mɛlɛka dimi aa: “Tɔlɔɔla kɛ kɛ chuulu o lɛŋndeŋ choo mi la nɔ kulloŋ leniŋ, vɛlɛ a yɔmii kɛ kɛ komɔɔ ndɔɔ nɔ buŋndaŋ leniŋ, nya ya ke ni. Tɔlɔɔlaŋ ndaŋ kpou, I ke nya le mi la de.+ 30 Visiaa yonduaa kpou, a nyaa yoomaa balu o choo choo niŋnda, vɛlɛ a nyɛ o nyɛ yoomaa cho o lɛŋndeŋ choo, I ke nda billo le mbo wa nyɛdiaa le nda.”+ Mi i yɔŋnuŋ lende.

31 Okoŋ kɔɔli, mi Mɛlɛka cha maa nyɛ o nyɛ o toosiaa, o bɛnda tau!+ Mi nyumndaŋ ma tual, nduyɛ mi paaleŋ le sia, paale ŋɔmpum ndeŋ.

2 Okoŋ, mi Mɛlɛka chii choo choo, lɛŋndeŋ, a nyɛ o nyɛ cho leniŋ* toosiaa.+ 2 O paale ŋɔmmɛu leŋ choo, Mɛlɛka ndoo chii niŋ wali o wa tosaa wo. Mɛɛ o chii wali o wa tosaa wo kpou, mbo pɛŋgi o paale ŋɔmmɛu leŋ choo.+ 3 Okoŋ, mi Mɛlɛka duau paale ŋɔmmɛu leŋ sala, nduyɛ mbo chua leŋ paale teŋgeŋndeŋ, kanifuule mɛɛ o chii wallo le nyɔɔŋ kpou toosiaa a mɛɛ o kɛɛsiaa yɛ, mbo kandu pɛŋgioo.

4 Bundɛi a choo choo vɛlɛ a lɛŋndeŋ okɔɔ cho hei ni, teleŋ Chɛhowa* Mɛlɛka toosiaa choo choo a lɛŋndeŋ ndo.+

5 Yondo ve wɔ o lɛŋndeŋ choo le, nduyɛ bil kɛ kɛ ndoo kendu wɔ wulɔɔ le, kanifuule Chɛhowa Mɛlɛka ndoo tosa wɔ mi piɔɔ sia o lɛŋndeŋ choo le. Nduyɛ wanachiee ve wɔ le wali tosa lechoo le. 6 Kɛ mi haŋgullo ndoo chɛŋ o lɛŋndeŋ choo, mbo hel choo choo, okoŋ mbo tol o mɔm, mbo pɔɔliaa lɛŋndeŋ kpou.

7 Mi Chɛhowa Mɛlɛka toosiaa wana pɔnɔɔ a puuloo,+ mbo hɔŋ ndu hueiyii yoomɛi o miliŋ,+ mi wana pɔnɔ koŋ simnuŋ wanachiee yoomaa.*+ 8 Okoŋ kɔɔli, mi Chɛhowa Mɛlɛka tosa kpeloo* o Idɛŋ+ niŋ ba paaleŋ le chaŋ ndo, mbo kɛsi wanachiee o toosiaa wo leniŋ.+ 9 Mi Chɛhowa Mɛlɛka tosa mi yɔmii kɛ kɛ naŋ le tofaa a le dioo ve wul o kpele koŋ niŋ. Mbo tosa vɛlɛ mi yɔm yoomoo+ a yɔm wana sina ikɛndɛi a iwɔɔŋnde wo wul o kpele koŋ tɛɛŋ.+

10 Nduyɛ, pioo wa fulaa Idɛŋ le kpele koŋ pɔɔliaa. Mi pee koŋ piɔuwaŋ tɛɛŋ, mbo simnuŋ peelaŋ la hiɔɔlu.* 11 Pee tasoo nɔ diolaŋ ni aa Pisiɔŋ. Pioo hoo balu lɛŋnde Havila leŋ kpou ni, naa kooliiyoŋ cho wa. 12 Kooliŋ kɛndɛ kɛndɔŋ cho o lɛŋnde leŋ niŋ. Yɔm dɛliɔm ndo a pou ɔnisi wo bɛɛ cho loŋ. 13 Pee diiŋ ndɔɔ nɔ diolaŋ ni aa Kihɔŋ. Pioo hoo balu lɛŋnde Kusi leŋ kpou ni. 14 Pee yaa ndɔɔ nɔ diolaŋ ni aa Hidikɛɛ.*+ Pioo hoo kuɛ Asiiliaa+ ba paaleŋ le chaŋ ndo ni. Nduyɛ pee hiɔɔloo nɔ diolaŋ ni aa Yufiluaati.+

15 Mi Chɛhowa Mɛlɛka chua wana pɔnɔ o toosiaa wo, mbo kɛsi ndu o kpeloo Idɛŋ niŋ le mbo wa wallo leniŋ, nduyɛ mbo bii ndu nyɛkɛndɛi.+ 16 Okoŋ, mi Chɛhowa Mɛlɛka kɛsul wana pɔnɔ o toosiaa wo sawaa aa: “Yɔm o yɔm cho o kpeloo niŋ, a dia mɛɛ ŋ yeema yɛ.+ 17 Kɛ yɔm wana sina ikɛndɛi a iwɔɔŋnde wo, dia ndu le pa. Kanifuule paale ŋ cho ndu dio leŋ, a cho wu pɛ.”+

18 Okoŋ kɔɔli, mi Chɛhowa Mɛlɛka dimi aa: “O bɛnda mi wana pɔnɔɔ wa ndupilɛ kpeele le. I cho wana malaa toosiaa le ndu, wana bɛnda le ndu wo.”+ 19 A boondii keŋ, Chɛhowa Mɛlɛka ndoo chii niŋ visiaa yonduaa, a nyaa yoomaa balu o choo choo niŋnda toosiaa a puuloo lɛŋ, okoŋ mbo huŋ a nda naa wana pɔnɔɔ chua le mbo che mɛɛ o cho o kɛ kɛ diolaŋ ke yɛ. Nduyɛ diola kɛ kɛ ndoo ke pɛ nyɛ yoomaa, laŋ la lo ndu choo ni.+ 20 Mi poo ke visiaa chiee niŋnda, a nyaa yoomaa balu o choo choo niŋnda, vɛlɛ a visiaa yonduaa kpou diolaŋ. Kɛ poo ndoo sɔla wɔ wana malaa o bɛnda le ndu wo le. 21 Le hei, mi Chɛhowa Mɛlɛka tosa mi poo hiau o luaŋ yikpi. O wa o malɔ, mi Mɛlɛka soli kpɛndɛi nduɛi i pilɛ, mbo miŋgi dialle o fonda koŋ. 22 Okoŋ, mi Chɛhowa Mɛlɛka toosiaa wana lanɔɔ a kpɛndɛi o soli poo o ŋdial le, mbo kua a ndu naa poo chua.+

23 Okoŋ mi poo dimi aa:

24 Le saboo hoo poo mɛi finya ndɔ a kala ndɔ ni, ma chalnuŋ* nda laa ndɔ, okoŋ ma simnuŋ dialle i pilɛ.+ 25 Mi poo nda laa ndɔ hiau lachi a waa tum fondo,+ kɛ siɔmbula ve nda le.

3 O visiaa yonduaa Chɛhowa Mɛlɛka ndoo toosiaa wa tɛɛŋ kpou, kɛuwo+ ndoo hiou wa yekeŋ.* Mbo nyuna wana lanɔɔ aa: “Baa Mɛlɛka dimi pa kpeekpei maa la dia yɔm kɛ kɛ o kpeloo niŋ te?”+ 2 Okoŋ mi wana lanɔɔ mulul kɛuwo aa: “Yɔmii cho o kpeloo niŋnde kinɛi, ŋ dia komɔɔla ndɔlaŋ.+ 3 Kɛ yɔm cho o kpeloo tɛɛŋ ndo ndu, Mɛlɛka dimi a komɔɔ ndɔɔ okɔɔ aa:+ ‘La dia ndu le, nduyɛ la pilaŋ ndu le. Te o cho koŋ te, la cho wu.’” 4 Okoŋ mi kɛuwo dimul wana lanɔɔ aa: “Sako, pesiŋ bɛɛ la cho wu le.+ 5 Kanifuule Mɛlɛka sina maa paale nya cho ndu dio leŋ, hɔlta nyalaŋ la cho kumbiŋ, nduyɛ mi la wa maa Mɛlɛka, mi la sina ikɛndɛi a iwɔɔŋnde.”+

6 Okoŋ kɔɔli, mi wana lanɔɔ cha maa komɔɔ yɔmndo hoo naŋ le dioo, nduyɛ mbo yusa ndu kɔllo. Mbo cha maa o naŋ bɔɔ le tofaa. Le hei, mbo kendi komɔɔ yɔmndo mbo dia.+ Okoŋ kɔɔli, mɛɛ pɔnɔ ndɔ hiŋ, mbo ke ndu mi ndu bɛɛ dia.+ 7 Nda ŋiɔɔŋ kpou mi hɔltaŋ la kumbiŋ nda, ma sina maa a cho tumnda fondo. Okoŋ ma kendi pei mafikiiye, ma toosiaa nyɛlaŋ, ma yiinuŋ o chaŋ.+

8 A boondii hueiye wa hɔŋndo fɛ fɛ ve,* Chɛhowa Mɛlɛka wa balɔɔ o kpeloo niŋ, okoŋ ma tuɛi diom ndɔɔ. Mi poo nda laa ndɔ kɔ vioŋnuŋ Chɛhowa Mɛlɛka o yɔmii wa o kpeloo niŋnde kɔɔli. 9 Chɛhowa Mɛlɛka wa poo veeloo, mbo nyuna ndu aa: “Kuɛɛnɛ ŋ cho yɛ?” 10 O mɛɛlulaŋ kpɔŋ, mbo dimi aa: “I wa o kpeloo niŋ mi tuɛi diom numndo. Kɛ siooŋnde wa ya, kanifuule I wa tum fondo. Lelaŋ mi viaŋnuŋ.” 11 Okoŋ, mi Mɛlɛka nyuna ndu aa: “Nɛɛnɛ dimullɛ num maa a cho tum fondo?+ Baa yɔm ya kɛsul num sawaa maa a nɔ ma de le wo ŋ de ni?”+ 12 Mi poo muli aa: “Wana lanɔ ŋ ke ya wo, ndu ke ya komɔɔ yɔmndo ni mi dia.” 13 Okoŋ, mi Chɛhowa Mɛlɛka nyuna wana lanɔɔ aa: “Le yɛɛnɛ ŋ tosa yɛ hei?” Mbo muli aa: “Kɛuwo hui ya ni mi dia.”+

14 Okoŋ mi Chɛhowa Mɛlɛka dimul kɛuwo aa:+ “Le nyɛ ŋ tosa hoo wo, o visiaa chiee niŋnda a visiaa yonduaa tɛɛŋ kpou, num sendioo cho choo ni. O demboo choo ŋ cho wa kɔlaŋ ni, nduyɛ teleŋ ŋ cho wa yoomu wo kpou, puuloo ŋ cho wa dioo ni. 15 I cho tosa mi yaamɔɔleŋ*+ le luɛi num tɛɛŋ+ nya wana lanɔɔ,+ nduyɛ mi luei yaamɔɔleŋ chuauwaa numnda*+ tɛɛŋ a chuauwaa nduaa.*+ Num cho ndu tɔndii kɔɔliei lɔwa,+ mi ndu pɛl num bolleŋ.”+

16 Mi Mɛlɛka dimul wana lanɔɔ aa: “Teleŋ ŋ cho wa a folioo* wo, I cho tosa mi nyɛ nɛiyaa numndo chɔɔluŋ tau tau. Nduyɛ, o nyɛ nɛiyaa niŋ ŋ cho chuauwa violɔɔ ni. A nɔ niŋ yeemɛi tau le pɔnɔ num, nduyɛ ndu cho num nɔ kpaayaa choo ni.”

17 Mi Mɛlɛka dimul Adam* aa: “Le mɛɛ ŋ yaŋ laa num nilaŋ, nduyɛ ma dia yɔm ya kɛsul num hoo sawaa+ maa a nɔ ma de ndu le wo yɛ, sendioo cho lɛŋndeŋ choo le sabu numndo.+ Nduyɛ haaa a yoomu numndo mɛɛlulaŋ, mɛɛ ma saŋga tau tau malaŋ ŋ sɔla nyɛdiaa.+ 18 Yɔɔŋ a bil ŋyɔɔ cho wulɔɔ le num, nduyɛ billo yondoo niŋ ŋ cho wa dioo ni. 19 Mɛɛ ma kelu lalle malaŋ ŋ sɔla nyɛdiaa* le dioo, nduyɛ ndi ŋ cho wa tosaa ni haaa ma miiŋgu o puuloo niŋ, kanifuule o puuloo niŋ ŋ fula ni.+ Puuloo ŋ cho ni, nduyɛ o puuloo niŋ ŋ cho miiŋgu ni.”+

20 Okoŋ kɔɔli, mi Adam ke laa ndɔ diolaŋ aa Ifi.* Kanifuule ndu wa simnɔŋ kalaa ni le waŋnda chieeya kpou.*+ 21 Mi Chɛhowa Mɛlɛka toosiaa domala vilɛilaŋ a yaula visiaa, le mi Adam nda laa ndɔ wounuŋ.+ 22 Okoŋ, mi Chɛhowa Mɛlɛka dimi aa: “Wanachioo simnuŋ maa naa, le sinaa ikɛndɛi a iwɔɔŋnde.+ Nduyɛ, yɔŋii o yɔɔ baa mbo kendi vɛlɛ komɔɔ yɔm yoomoo+ mbo de, okoŋ mbo wa achal lefafɛɛŋ,*—” 23 Le hei, mi Chɛhowa Mɛlɛka soli ndu o kpeloo niŋ Idɛŋ,+ le mbo kɔ wa wallo tosaa o lɛŋndeŋ choo, naa o fula wa.+ 24 Mɛɛ o soli poo, mbo simi chɛlɔbiiya+ o kpeloo niŋ Idɛŋ ba paaleŋ le chaŋ ndo, mbo kɛsi muɛi faŋii leyiŋnde o nɛi kuɛ o yɔm yoomoo wo. Nduyɛ teleŋ o teleŋ i wa hiŋnɔŋndo le ndu mandaa.

4 Okoŋ mi Adam tosa chiɛɛniŋndo a Ifi laa ndɔ, mbo chua folioo,*+ mbo vialu Keŋ.+ Mɛɛ o velu ndu, mbo dimi aa: “Chɛhowa mala ya mi vialu wana pɔnɔɔ.” 2 Okoŋ kɔɔli, mbo vialu pɔmbɔ ndɔ, mbo ke ndu diolaŋ aa Ebɛl.+

Mi Ebɛl simnuŋ wana mandaa lasaa, kɛ mi Keŋ simnuŋ wana wali yondoo. 3 Mɛɛ teleŋ tiŋ hiou, mi Keŋ huŋ a komɔɔla o sɔla o wali ndɔɔ niŋndaŋ, le salaa solioo o Chɛhowa lo. 4 Kɛ mi Ebɛl huŋ a saa tasiaa a tiŋ o saa nduaa tɛɛŋ,+ mbo soli nda salaa a chuɛima ndaŋ kpou. Mi Chɛhowa hini kɔl a Ebɛl vɛlɛ a sala ndɔɔ.+ 5 Kɛ o hini kɔl a Keŋ vɛlɛ a sala ndɔɔ le. Le hei, mi Keŋ mia kuu a tumboo, nduyɛ mbo tɛɛmbuu hɔlla. 6 Mi Chɛhowa nyuna Keŋ aa: “Le yɛɛnɛ ŋ mɛ yɛ nuaa kuu a tumboo, nduyɛ ma tɛɛmbuu hɔlla? 7 Te a siŋgaŋ pɛ ma tosa nyɛ cho o kɛndɔɔ wo, num bɛɛ I hini kɔl a num. Kɛ te a siŋgaŋ ma tosa nyɛ cho o kɛndɔɔ wo le, hakioo cho num mɛŋgɛlaa o dio, nduyɛ o yeema mbo nɔ num kpaayaa choo. Kɛ a nɔla ma nɔ ndu kpaayaa choo.”

8 Okoŋ kɔɔli, mi Keŋ dimul Ebɛl pɔmbɔ ndɔ aa: “Ŋ kɔ kelaa yondoo niŋ.” Mɛɛ nda kuɛ yondoo niŋ, mi Keŋ luaa Ebɛl pɔmbɔ ndɔ mbo dii ndu.+ 9 Mɛɛ teleŋ tiŋ hiou, mi Chɛhowa nyuna Keŋ aa: “Kuɛɛnɛ Ebɛl pɔmbɔ num cho yɛ?” Mi Keŋ muli aa: “I sina le. Baa ya cho wana manda pɔmbɔ nuu wo ni?” 10 Okoŋ mi Mɛlɛka nyuna ndu aa: “Yɛɛnɛ ŋ tosa yɛ hoo? Yaŋ nilaŋ! Kooma pɔmbɔ numndaŋ ma cho chaŋndo naa ya chua.+ 11 Lelaŋ, chɔŋ a paale hauleŋ ndeŋ, sendioo cho num choo. Nduyɛ, lɛŋnde ŋ dii pɔmbɔ num, mi le sɔɔsiaa kooma nduaŋ ndeŋ, I cho num touwɔɔ lechoo.+ 12 Nduyɛ o yɔŋ bɛɛ ma tosa wallo lechoo, nyɛ o nyɛ cho naŋɔɔ le. A cho simnɔŋ kaunanɔɔ, ma wa heeloo a tuusoo o lɛŋndeŋ choo.” 13 Okoŋ mi Keŋ dimul Chɛhowa aa: “Nyɛpalaa ŋ handu ya hoo choo le haki nuu wo hiou ya mayoomu. 14 A tou ya hau o lɛŋndeŋ choo, ma faŋa ya num o hɔl. I cho simnɔŋ kaunanɔɔ, mi wa heeloo a tuusoo o lɛŋndeŋ choo. Wana o wana che ya pɛ, o cho ya diyɔɔ.” 15 Mi Chɛhowa dimul ndu aa: “Le sabu koŋ, wana o wana dii num Keŋ pɛ, I cho ndu maa miŋgul bɛmbɔɔ le ŋɔmmɛu.”

Le hei, mi Chɛhowa kɛsi tamasioo le Keŋ maa wana o wana chɔ ndu bɛɛ, o nɔ mbo dii ndu le. 16 Mi Keŋ faŋaŋ Chɛhowa o hɔl, mbo kɔ chalnuŋ o lɛŋnde Nɔdi leŋ* niŋ, Idɛŋ ba paaleŋ le chaŋ ndo.+

17 Okoŋ, mi Keŋ tosa chiɛɛniŋndo a laa ndɔ+ mbo chua folioo,* mbo vialu poo ma ke ndu diolaŋ aa Inɔki. Mi Keŋ taŋgul chiee bɛndoo, mbo ke chiee koŋ diola po ndɔɔ Inɔki. 18 Okoŋ kɔɔli, mi Inɔki vialu poo mbo ke ndu diolaŋ aa Iluadi. Mi Iluadi vialu Mɛhuchayɛɛ, mi Mɛhuchayɛɛ vialu Mɛtusiayɛɛ, nduyɛ mi Mɛtusiayɛɛ vialu Lamɛki.

19 Mi Lamɛki chua laanduaa a ŋiɔɔŋ. Lanɔ tasoo ndoo nɔ diolaŋ ni aa Ada, o diiŋ ndɔɔ diolaŋ aa Siila. 20 Mi Ada vialu poo diolaŋ aa Chebaa. Chebaa wa wana tasoo le luaŋ o tɛndiilaŋ niŋ ni, nduyɛ mi ndoo manda vɛlɛ chɔluaa. 21 Pɔmbɔ ndɔ ndoo nɔ diolaŋ ni aa Chuba. Chuba wa wana tasoo ni le towaa lɔɔ a sɛŋndeŋ hɔŋndo. 22 Mi Siila bɛɛ vialu poo, mbo ke ndu diolaŋ aa Tubaa-keŋ. Sumnɔɔ o wa ni, nduyɛ mi ndoo toosiaa nyɛm walloŋ a chiliŋnde vɛlɛ a chiliŋii siaŋɛi.* Tubaa-keŋ yema ndɔ wa Naama ni. 23 Okoŋ, mi Lamɛki dimul laandaa nduaa Ada nda Siila diomndaŋ ndaŋ aa:

25 Mi Adam tosa vɛlɛ chiɛɛniŋndo a laa ndɔ, mbo vilul ndu poo. Okoŋ mbo ke ndu diolaŋ aa Sɛti,*+ kanifuule mbo dimi aa, “Mɛlɛka ke ya* vɛlɛ po* cheleŋ sɔŋgɔ Ebɛl lo, le mɛɛ Keŋ dii ndu yɛ.”+ 26 Mi Sɛti bɛɛ vialu poo, mbo ke ndu diolaŋ aa Inɔɔsi.+ A boondii keŋ waŋnda kandu diola Chɛhowa laŋ veeloo ni.

5 Konaa cho hoo ni a bundɛi Adam nde okɔɔ. Paale Mɛlɛka toosiaa Adam ndeŋ, mi Mɛlɛka toosiaa ndu o velaŋ ndɔɔ niŋ.+ 2 Mbo toosiaa wana pɔnɔɔ a wana lanɔɔ.+ O paale o toosiaa nda leŋ choo,+ mbo duau nda sala, nduyɛ mbo ke nda diolaŋ aa Waŋnda Chieeya.*

3 Mɛɛ Adam chii wɔsilaŋ 130, mbo vialu poo mɛɛ ndupila cho yɛ, o velaŋ ndɔɔ niŋ. Okoŋ mbo ke ndu diolaŋ aa Sɛti.+ 4 Mɛɛ Adam velu Sɛti, mbo chii vɛlɛ wɔsilaŋ 800. O ndu kɔɔli, mbo vialu puaa a waŋ laanduaa. 5 Kpou kpou, Adam chii wɔsilaŋ 930, okoŋ mbo wu.+

6 Mɛɛ Sɛti chii wɔsilaŋ 105, mbo vialu Inɔɔsi.+ 7 Mɛɛ Sɛti velu Inɔɔsi, mbo chii vɛlɛ wɔsilaŋ 807. O ndu kɔɔli, mbo vialu puaa a waŋ laanduaa. 8 Kpou kpou, Sɛti chii wɔsilaŋ 912, okoŋ mbo wu.

9 Mɛɛ Inɔɔsi chii wɔsilaŋ 90, mbo vialu Kinaŋ. 10 Mɛɛ Inɔɔsi velu Kinaŋ, mbo chii vɛlɛ wɔsilaŋ 815. O ndu kɔɔli, mbo vialu puaa a waŋ laanduaa. 11 Kpou kpou, Inɔɔsi chii wɔsilaŋ 905, okoŋ mbo wu.

12 Mɛɛ Kinaŋ chii wɔsilaŋ 70, mbo vialu Mahalalɛɛ.+ 13 Mɛɛ Kinaŋ velu Mahalalɛɛ, mbo chii vɛlɛ wɔsilaŋ 840. O ndu kɔɔli, mbo vialu puaa a waŋ laanduaa. 14 Kpou kpou, Kinaŋ chii wɔsilaŋ 910, okoŋ mbo wu.

15 Mɛɛ Mahalalɛɛ chii wɔsilaŋ 65, mbo vialu Chaluɛdi.+ 16 Mɛɛ Mahalalɛɛ velu Chaluɛdi, mbo chii vɛlɛ wɔsilaŋ 830. O ndu kɔɔli, mbo vialu puaa a waŋ laanduaa. 17 Kpou kpou, Mahalalɛɛ chii wɔsilaŋ 895, okoŋ mbo wu.

18 Mɛɛ Chaluɛdi chii wɔsilaŋ 162, mbo vialu Inɔki.+ 19 Mɛɛ Chaluɛdi velu Inɔki, mbo chii vɛlɛ wɔsilaŋ 800. O ndu kɔɔli, mbo vialu puaa a waŋ laanduaa. 20 Kpou kpou, Chaluɛdi chii wɔsilaŋ 962, okoŋ mbo wu.

21 Mɛɛ Inɔki chii wɔsilaŋ 65, mbo vialu Mɛtusila.+ 22 Mɛɛ Inɔki velu Mɛtusila, mbo hiau lachi a kɔlaŋ latulu a Mɛlɛka tonyaa le wɔsilaŋ 300. O ndu kɔɔli, mbo vialu puaa a waŋ laanduaa. 23 Kpou kpou, Inɔki chii wɔsilaŋ 365. 24 Mi Inɔki hiau lachi a kɔlaŋ latulu a Mɛlɛka tonyaa.+ Okoŋ kɔɔli, mbo lo pɛ, kanifuule mi Mɛlɛka chua ndu.+

25 Mɛɛ Mɛtusila chii wɔsilaŋ 187, mbo vialu Lamɛki.+ 26 Mɛɛ Mɛtusila velu Lamɛki, mbo chii vɛlɛ wɔsilaŋ 782. O ndu kɔɔli, mbo vialu puaa a waŋ laanduaa. 27 Kpou kpou, Mɛtusila chii wɔsilaŋ 969, okoŋ mbo wu.

28 Mɛɛ Lamɛki chii wɔsilaŋ 182, mbo vialu poo. 29 Mbo ke ndu diolaŋ aa Nuuwa.*+ Mbo dimi aa: “Hoo cho naa hunɔɔ kɔl dɛɛniaa ke ni, nduyɛ mbo soli naa o saŋga naŋ cho niŋndo, le mɛɛ Chɛhowa handu lɛŋndeŋ sendioo choo yɛ.”+ 30 Mɛɛ Lamɛki velu Nuuwa, mbo chii vɛlɛ wɔsilaŋ 595. O ndu kɔɔli, mbo vialu puaa a waŋ laanduaa. 31 Kpou kpou, Lamɛki chii wɔsilaŋ 777, okoŋ mbo wu.

32 Mɛɛ Nuuwa fuuluu wɔsilaŋ 500, mbo vialu Siɛm,+ Ham,+ a Chafɛti.+

6 Mɛɛ waŋnda chieeya kandu kuiyo tau o lɛŋndeŋ choo, nduyɛ ma vialu waŋ laanduaa, 2 mi puaa Mɛlɛka tonyaa*+ cha maa chuaa laanduaa waŋnda chieeya velu haa wa naŋ bɔɔ. Okoŋ, ma hɛli a nda yeema wa, ma siiŋguu nda laandaa ndaa. 3 Okoŋ mi Chɛhowa dimi aa: “I cho lɛ hiouwɔɔ lachi a wanachioo biuwɔŋndo lefafɛɛŋ te,+ kanifuule o dialloŋ niŋ koni o cho ni.* Lelaŋ, wɔsilaŋ 120 kinɛi o cho niŋ nɔ ni.”+

4 Chɔŋ o palɛi keŋ niŋ kɔ kɛ, Nɛfilimnda* wa o lɛŋndeŋ choo. Nduyɛ a boondii keŋ, puaa Mɛlɛka tonyaa wa hiouwɔɔ lachi a hinilaŋ a chuaa laanduaa waŋnda chieeya, ma vilul nda puaa. Wanaa kpaayaa bɛnduaa pila nda wa ni o teleŋ koŋ niŋ, nduyɛ ndaa nɔ bɔɔ tɔɔ.

5 Okoŋ, mi Chɛhowa cha maa dɛnɛ wɔɔŋ waŋnda chieeya kui tau o lɛŋndeŋ choo, nduyɛ maa yiyaŋnda dɛnɛ wɔɔŋndaŋ koni la huŋ nda o lakɔl le teleŋ o teleŋ ni.+ 6 Mi Chɛhowa tambu kɔllo tau le mɛɛ o toosiaa waŋnda chieeya o lɛŋndeŋ choo yɛ, nduyɛ mbo bii mɔnɛi.+ 7 Le hei, mi Chɛhowa dimi aa: “Waŋnda chieeyaa ya toosiaa wa ni, visiaa chiee niŋnda ni, nyaa yoomaa kua o demboo choo wa ni, a nyaa yoomaa balu o choo choo niŋnda, I cho nda basɔɔ tɛɛ. Kanifuule, I tambu kɔl le mɛɛ ya toosiaa nda yɛ.” 8 Kɛ mi Chɛhowa naŋ kɔl tau a Nuuwa.

9 Bundɛi a Nuuwa okɔɔ cho hei ni.

Wana sakpoo Nuuwa wa ni.+ O ve maa waŋnda o boondii nduɛi niŋ te. Ndoo nɔ sɔŋ o sɔŋ* te. Nduyɛ, o wa kɔlaŋ a Mɛlɛka tonyaa latulu.+ 10 Mɛɛ teleŋ tiŋ hiou, mi Nuuwa vialu puaa a yaa, Siɛm, Ham, a Chafɛti.+ 11 Kɛ mi Mɛlɛka tonyaa cha maa chieeŋndo cho o tambɛi, nduyɛ sɔŋgɔlaŋ la cho la piaa cha o chieeŋndo choo. 12 A tonya, mɛɛ Mɛlɛka mɛɛndaŋ chieeŋndo, mbo cha maa o cho o tambɛi.+ Kanifuule, mi waŋnda chieeya o lɛŋndeŋ choo kpou simnuŋ wanaa dɛnɛ wɔɔŋnda.+

13 Okoŋ kɔɔli, mi Mɛlɛka dimul Nuuwa aa: “I kɛɛsiaa le mi tɛɛmbuu waŋnda chieeya kpou o lɛŋndeŋ choo, kanifuule a tosa mi lɛŋndeŋ le wa le piaa cha a sɔŋgɔlaŋ. Lelaŋ, I cho waŋnda chieeya kpou tɛɛmbuu latulu a lɛŋndeŋ.+ 14 Toosiaa dɛndɔɔ le numpila a yɔm kɛndɛ kɛndɔɔ.+ Nduyɛ, ma kili lumuilaŋ o dɛndɛ koŋ niŋ, okoŋ ma yikpa ndu a kotɛiyo*+ leniŋ a o kɔɔ. 15 Mɛɛ ŋ nɔ ma taŋgul ndu yɛ cho hoo ni: Bandii nduɛi nɔ mi i wa nɛiyo 450, toŋgii nduɛi nɛiyo 75, nduyɛ helɔɔ nɛiyo 45.* 16 Toosiaa wundɛiyo* amaluaŋ nɛiyo le pilɛ a tɛndaa tɛɛŋ, le mi nyɛ teŋgaa wa luɛiyɔɔ o dɛndɔɔ niŋ, nduyɛ ma handu dioo o kpeŋgei le luɛiyɔɔ.+ Toosiaa ndu le helɔɔ le yaa, lebɛŋgu, tɛɛŋ, a lechoo.

17 “I cho hunɔɔ a mɛŋma koŋgi bɛnduaŋ+ o lɛŋndeŋ choo, okoŋ mi tɛɛmbuu nyɛ o nyɛ yoomaa* cho lechoo. Nyɛ o nyɛ cho o lɛŋndeŋ choo, o cho hunɔɔ tambei sɔla.+ 18 I cho kpemaa yii a num. Nduyɛ mi num, puaa numnda, laa num, a laandaa puaa numnda kpou luɛi o dɛndɔɔ niŋ.+ 19 Nyɛ o nyɛ cho nyɛ yoomaa,+ chua nda a ŋiɔɔŋ ŋiɔɔŋ, o piaandoo a o laandoo,+ ma luei nda o dɛndɔɔ niŋ, mi nda lo yoomu latulu a nya. 20 Nyaa yoomaa balu o choo choo niŋnda suulaŋ yɛ yɛ, visiaa chiee niŋnda suulaŋ yɛ yɛ, a nyaa yoomaa kua o demboo choo o lɛŋndeŋ choo wa kpou suulaŋ yɛ yɛ. Nda kpou, a ŋiɔɔŋ ŋiɔɔŋ nɔ ni ma luɛi naa num chua o dɛndɔɔ niŋ le ma lo yoomu.+ 21 Okoŋ, ma chuuŋgiaa nyɛdiaa suu o suu ma luei o dɛndɔɔ niŋ, le mi num a chɔluaa cho wa leniŋ nda wa dioo.”+

22 Nduyɛ nyɛ o nyɛ Mɛlɛka ndoo dimul Nuuwa le tosaa, mbo tosa lende kinɛi.+

7 Okoŋ kɔɔli, mi Chɛhowa dimul Nuuwa aa: “Num a yuŋgu numndo kpou, la luɛi o dɛndɔɔ niŋ, kanifuule o waŋnda haa tɛɛŋ kpou, num cho wana sakpoo ya o hɔl ni.+ 2 Visi kɛ kɛ cho o diandaa, chua a ŋɔmmɛu,*+ o piaandoo a o laandoo, nduyɛ ma chua vɛlɛ visi kɛ kɛ cho o nɔɔlɛi a ŋiɔɔŋ kinɛi, o piaandoo a o laandoo, ma luɛi a nda o dɛndɔɔ niŋ. 3 Ma chua vɛlɛ nyaa yoomaa balu o choo choo niŋnda a ŋɔmmɛu,* o piaandoo a o laandoo, le mi chuauwaa ndaa lo yoomu, okoŋ ma tiu o lɛŋndeŋ choo kpou.+ 4 Kanifuule o palɛi i ŋɔmmɛu bɛŋgu, I cho tosa mi piɔɔ sia+ o lɛŋndeŋ choo le palɛi 40 a nyumndaŋ 40.+ Nduyɛ, I cho nyɛ o nyɛ yoomaa ya toosiaa o lɛŋndeŋ choo basɔɔ tɛɛ.”+ 5 Okoŋ, mi Nuuwa tosa nyɛ o nyɛ Chɛhowa ndoo dimul ndu le tosaa.

6 Nuuwa wa wɔsilaŋ 600 mi mɛŋma koŋgi bɛnduaŋ ma huŋ o lɛŋndeŋ choo.+ 7 Tuupa mi mɛŋma koŋgi bɛnduaŋ+ ma huŋ, Nuuwa, puaa nduaa, laa ndɔ, a laandaa puaa nduaa ndaa luɛinuŋ niŋ o dɛndɔɔ niŋ. 8 Visiaa wa a diandaa wa ni, visiaa ve a diandaa le wa ni, nyaa yoomaa balu o choo choo niŋnda ni, a nyɛ o nyɛ kua o lɛŋndeŋ choo,+ 9 ma luɛi a ŋiɔɔŋ ŋiɔɔŋ o dɛndɔɔ niŋ naa Nuuwa chua, o piaandoo a o laandoo, mɛɛ Mɛlɛka ndoo dimul Nuuwa yɛ. 10 Mɛɛ palɛi hiou i ŋɔmmɛu, mi mɛŋma koŋgi bɛnduaŋ ma huŋ o lɛŋndeŋ choo.

11 Wɔsi Nuuwa chiŋa wɔsilaŋ 600 ndo, paŋgii diiŋ nduɛi malɔ 17, o paale leŋ choo, mi mɛŋndaŋ o choo choo niŋ ma buli bu. Nduyɛ mi diola mamɛŋndaŋ o choo choo niŋ kpou la kuumbuŋ.+ 12 Okoŋ, mi piɔɔ huluŋ o lɛŋndeŋ choo le palɛi 40 a nyumndaŋ 40. 13 O paale leŋ choo kpeekpei, mi Nuuwa luɛi o dɛndɔɔ niŋ nda puaa nduaa, Siɛm, Ham, Chafɛti,+ laa ndɔ, a laandaa puaa nduaa.+ 14 Ma luɛi o dɛndɔɔ niŋ a visiaa yonduaa suulaŋ yɛ yɛ, visiaa chiee niŋnda suulaŋ yɛ yɛ, visiaa kua o demboo choo o lɛŋndeŋ choo wa suulaŋ yɛ yɛ, nyaa yoomaa balu o choo choo niŋnda suulaŋ yɛ yɛ, you o you, a nyɛ o nyɛ yoomaa nɔ bɔɔlaŋ. 15 Nyɛ o nyɛ yoomaa wa luɛiyɔɔ o dɛndɔɔ niŋ a ŋiɔɔŋ ŋiɔɔŋ, naa Nuuwa chua. 16 Okoŋ, mi nyaa yoomaa haa o kɛ kɛ luɛi o dɛndɔɔ niŋ, o piaandoo a o laandoo, mɛɛ Mɛlɛka ndoo dimul Nuuwa yɛ. Okoŋ kɔɔli, mi Chɛhowa kinda ndu dioo kɔɔli.

17 Mi piɔɔ hiau lachi a siaa o lɛŋndeŋ choo le palɛi 40, nduyɛ mɛŋndaŋ ma wa tuŋ hunɔɔ. Okoŋ mi ma kandu kɔlaŋ a dɛndɔɔ. Mi dɛndɔɔ hel o mɛŋndaŋ choo pɔ pɔ. 18 Mi mɛŋndaŋ ma pia cha o lɛŋndeŋ choo, nduyɛ ma wa tuŋ hiouwɔɔ lachi a hunɔɔ. Kɛ dɛndɔɔ waŋnuŋ o mɛŋndaŋ choo. 19 Mɛɛ mɛŋndaŋ ma hiu hunɔɔ tei, mi ma kumbu pembuŋ vilɛiyoŋ kpou o lɛŋndeŋ choo.+ 20 Mi mɛŋndaŋ ma hiau pembuŋ bɛndoŋ helɔɔ nɛiyo 22 a tɛndaa tɛɛŋ.*

21 Okoŋ, mi nyaa yoomaa balu o lɛŋndeŋ choo wa kpou wu.+ Nyaa yoomaa balu o choo choo niŋnda, visiaa chiee niŋnda, visiaa yonduaa, nyaa yoomaa balu kunda wa, a waŋnda chieeya kpou.+ 22 Mi nyɛ o nyɛ yoomaa wa o lɛŋnde vesɛileŋ choo wu.+ 23 Nduyɛ nyɛ o nyɛ yoomaa wa o lɛŋndeŋ choo, kɔ bii a waŋnda chieeya, visiaa, nyaa yoomaa kua o demboo choo wa, a nyaa yoomaa balu o choo choo niŋnda, mbo basu nda tɛɛ. Nda kpou mbo basu nda tɛɛ o lɛŋndeŋ choo.+ Nuuwa a wanaa wa latulu a ndu o dɛndɔɔ niŋnda kinɛi sɔla chindaa ni.+ 24 Le palɛi 150,+ mɛŋndaŋ ma wa ma piaa cha o lɛŋndeŋ choo.

8 Mi Mɛlɛka mulul Nuuwa hɔlla,* visiaa yonduaa, vɛlɛ a visiaa chiee niŋnda, a wa a ndu latulu o dɛndɔɔ niŋnda kpou.+ Nduyɛ mi Mɛlɛka tosa mi hueiye hɔŋ o lɛŋndeŋ choo, okoŋ mi mɛŋndaŋ ma kandu tolɔɔ. 2 Mi mɛŋma buli o choo choo niŋndaŋ ma pɛŋgi talaŋndo, nduyɛ mi diola mamɛŋnda kuumbuŋ o choo choo niŋndaŋ la kiindiaŋ, mi piɔɔ pɛŋgi siaa.+ 3 Okoŋ, mi mɛŋma wa o lɛŋndeŋ choo waŋ ma kandu tolɔɔ o pɔmpɔmbɔ. Mɛŋndaŋ maa tol niŋ tau o palɛi 150 mɛɛlulaŋ. 4 A paŋgii ŋɔmmɛu ve malɔ 17, mi dɛndɔɔ kɔ chal o pembei choo Alualuati. 5 Mi mɛŋndaŋ ma hiau lachi a tolɔɔ o pɔmpɔmbɔ haaa a paŋgii tɔ ve. O paŋgii tɔ ve niŋ malɔ le pilɛ, mi pembuŋ bɛndoŋ soli bolle.+

6 Kɛ o palɛi 40 mɛɛlulaŋ, mi Nuuwa kumbi wundɛi*+ wa o dɛndɔɔ wo. 7 Okoŋ mbo soli basabasakuendoo, mbo kɔ balu mbo miiŋgu. O lo keŋ tosaa haaa mi mɛŋndaŋ ma vela o lɛŋndeŋ choo.

8 Okoŋ kɔɔli, mbo viam piiŋndo le sinaa te mɛŋndaŋ ma tol niŋ pɛ o lɛŋndeŋ choo. 9 Mi piiŋndo kɔ balu, kɛ o sɔla fonda o fonda o chal te.* Le hei, mbo miiŋgu naa ndu chua o dɛndɔɔ niŋ, kanifuule mɛŋndaŋ ma wa wɔ ma piaa cha o lɛŋndeŋ choo kpou.+ Okoŋ mbo soli baa, mbo miŋgi ndu o dɛndɔɔ niŋ. 10 Mbo chum vɛlɛ le palɛi i ŋɔmmɛu, okoŋ mbo soli vɛlɛ piiŋndo o bɛɛ. 11 Mɛɛ piiŋndo miiŋgu naa ndu chua a paale yɔŋgaŋndeŋ, mbo cha ndu peele kiyɛile yɔm ɔlifiiyo o ichɔchɔ. Okoŋ, mi Nuuwa sina dɔɔ maa mɛŋndaŋ ma tol niŋ o lɛŋndeŋ choo.+ 12 Mbo chum vɛlɛ le palɛi ŋɔmmɛu cheleŋ. Okoŋ mbo soli vɛlɛ piiŋndo o bɛɛ, kɛ o miiŋgu lɛ naa ndu chua le.

13 Teleŋ Nuuwa chiŋa wɔsilaŋ 601 wo,+ o paŋgii tasei niŋ, paale taseleŋ o paŋgii keŋ niŋ, mɛŋndaŋ maa tol niŋ. Mi Nuuwa kpeeŋa yindɔ dɛndɔɔ,* mbo cha maa lɛŋndeŋ le wa niŋ vesaa. 14 O paŋgii diiŋ nduɛi niŋ malɔ 27, lɛŋndeŋ lee vesa niŋ.

15 Okoŋ, mi Mɛlɛka dimul Nuuwa aa: 16 “Num ni, laa num ni, puaa numnda ni, a laandaa puaa numnda,+ la chɔŋ mi la fula o dɛndɔɔ niŋ. 17 Soli nyaa yoomaa suu o suu cho o dɛndɔɔ niŋ.+ Nyaa yoomaa balu o choo choo niŋnda, visiaa, a nyaa yoomaa kua o demboo choo o lɛŋndeŋ choo wa kpou. A fula le ma kui, nduyɛ ma pɛ cha o lɛŋndeŋ choo.”+

18 Okoŋ, mi Nuuwa fula o dɛndɔɔ niŋ latulu nda puaa nduaa,+ laa ndɔ, a laandaa puaa nduaa. 19 Mi nyɛ o nyɛ cho nyɛ yoomaa, kɔ bii a nyaa yoomaa kua o demboo choo wa, nyaa yoomaa balu o choo choo niŋnda, a nyɛ o nyɛ kua lɛŋ, ma fula o dɛndɔɔ niŋ a kundalaŋ yɛ yɛ.+ 20 Okoŋ, mi Nuuwa taŋgul bandu luamaa lasalaa+ le Chɛhowa. Mbo chua visiaa diandaa apum, a nyaa yoomaa diandaa balu o choo choo niŋnda+ apum, mbo soli salala luamaa laŋ o bandu koŋ choo.+ 21 Mi Chɛhowa naŋ kɔl tau a chuŋ kɛndɛ wa ndu komallo wo. Okoŋ mi Chɛhowa dimi o kɔl niŋ aa: “Fɛɛŋ bɛɛ I hendu lɛ lɛŋndeŋ sendioo choo+ le wanachioo le, kanifuule chɔŋ o ichuaambɔya, yiyaŋ dɛnɛ wɔɔŋndo koni huŋ ndu o kɔl le teleŋ o teleŋ ni.+ Nduyɛ, fɛɛŋ bɛɛ I tɛɛmbuu lɛ nyaa yoomaa kpou mɛɛ ya tosa yɛ le.+ 22 Chɔŋ hau mbo kuɛ kɛ, fɛɛŋ bɛɛ boonduŋ tualaŋ a boonduŋ kuauwaŋ chuu niŋ o lɛŋndeŋ choo le. Nduyɛ, fɛɛŋ bɛɛ hueiye a haŋgullo, wɔɔleŋ a sialteŋ, vɛlɛ a paaleŋ a nyumndaŋ chuu niŋ te.”+

9 Mi Mɛlɛka duau Nuuwa nda puaa nduaa sala, mbo dimul nda aa: “La violu chuauwa, mi la kui, nduyɛ mi la pɛ cha o lɛŋndeŋ choo.+ 2 Nyaa yoomaa o lɛŋndeŋ choo kpou, a balu choo choo wa, a kua lɛŋ nda, a suuwa o pee mɛŋma ihɛllo niŋ kpou, a nɔ niŋ siooŋnde le nya. Nya nɔ niŋ nda kpaayaa choo ni.*+ 3 Visiaa cho yoomu wa kpou, I ke nya nda le mi la de.+ Mɛɛ ya ke nya billo yɛ, lende koni ya ke nya nda kpou ni.+ 4 Kɛ, la dia visioo a kooma+ nduaŋ te,+ kanifuule koowaŋ ma cho yoomoo ni. 5 O fulawɔ okoŋ kɔɔli, wana o wana tɛɛmbuu pɛ kooma nyaŋ, I cho ndu nyɛpalaa tusi choo. Nyɛ yoomaa kɛ kɛ tɛɛmbuu pɛ kooma nyaŋ, o nɔ mbo sɔla piɔmndo. Nduyɛ wana o wana dii pɛ chaaŋ ndɔ wanachioo, I tusi ndu nyɛpalaa choo.+ 6 Wana o wana tɛɛmbuu pɛ kooma wanachioo, ndu bɛɛ, wanachioo cho kooma nduaŋ tɛɛmbuu ni.+ Kanifuule, o velaŋ Mɛlɛkaa niŋ wanachioo toosiaŋ ni.+ 7 La violu chuauwa, mi la kui, nduyɛ mi la tiu ba o ba fee o lɛŋndeŋ choo.”+

8 Okoŋ, mi Mɛlɛka dimul Nuuwa nda puaa nduaa aa: 9 “I cho kpemaa yii a nya+ vɛlɛ a chuauwaa nyaa mamaa, 10 a nyɛ o nyɛ yoomaa cho a nya latulu, youwa, visiaa, nyaa yoomaa cho o lɛŋndeŋ choo ma wa a nya latulu wa kpou, a nyaa yoomaa fula o dɛndɔɔ niŋnda kpou. Nyɛ o nyɛ cho nyɛ yoomaa o lɛŋndeŋ choo. + 11 A tonya, kpema ya yii a nya wo cho hoo ni: Fɛɛŋ bɛɛ I tɛɛmbuu lɛ niŋ nyaa yoomaa kpou a mɛŋma koŋgi bɛnduaŋ te. Nduyɛ, fɛɛŋ bɛɛ I hiŋ lɛ a mɛŋma koŋgi bɛnduaŋ le lɛŋndeŋ tɛɛmbuuwo le.”+

12 Mi Mɛlɛka dimi vɛlɛ aa: “Nya ni, nyɛ o nyɛ yoomaa cho a nya latulu, vɛlɛ a wanaa cho hunɔɔ nya kɔɔli wa kpou, kpema ya cho yiiyo a nya wo, tamasi ndɔɔ cho hoo ni. 13 I handu niŋginaŋga nuu o choo choo niŋ, nduyɛ ndu cho wa tamasioo ni le kpema ya yii a lɛŋndeŋ ndo. 14 Teleŋ o teleŋ ya tosa pɛ mi piɔɔ hel, niŋginaŋgaa cho fula o choo choo niŋ. 15 I cho loonɔŋ a kpema cho naa tɛɛŋ naa nyaa, vɛlɛ a nyaa yoomaa suulaŋ yɛ yɛ wo. Nduyɛ fɛɛŋ bɛɛ mɛŋma koŋgi bɛnduaŋ ma tɛɛmbuu lɛ nyaa yoomaa kpou le.+ 16 Niŋginaŋgaa cho fula o choo choo niŋ, nduyɛ mi che ndu a lehɔl. Okoŋ, mi loonuŋ a kpema fafɛɛŋ cho ya Mɛlɛka tɛɛŋ a nyaa yoomaa suula yɛ yiaa cho o lɛŋndeŋ choo wa.”

17 Mi Mɛlɛka chɔɔlu Nuuwa dimul aa: “Nyaa yoomaa cho o lɛŋndeŋ choo kpou wa, kpema ya yii a nda wo, tamasioo cho hoo ni.”+

18 Puaa Nuuwa wa, a fula o dɛndɔɔ niŋnda cho haa ni: Siɛm, Ham, a Chafɛti.+ Okoŋ kɔɔli, mi Ham vialu Kenaŋ.+ 19 Nuuwa, puaa nduaa yaawa wa haa ni, nduyɛ o nda niŋ waŋnda chieeya o lɛŋndeŋ choo kpou fula ni, okoŋ ma tiu ba o ba fee.+

20 Mi Nuuwa kandu wali ichiɔɔ, okoŋ mbo tosa kpele maKilepiiyo. 21 Paale pilɛ, mɛɛ Nuuwa kol muɛiyaŋ, mi ma bii ndu, mbo sooluŋ o tɛndii ndɔɔ niŋ. 22 Mɛɛ Ham, finyaa Kenaŋ che finya nda tum fondo, mbo fula o bɛɛ, mbo kɔ dimul bɛndaa nduaa ŋiɔɔŋnda. 23 Okoŋ, mi Siɛm nda Chafɛti chua doma bɛndoo, ma handuŋ o lachoŋgu, ma kua amakɔɔ. Nduyɛ hɔlla wa nda a muliaa kumbuei i pilɛi, okoŋ ma kuumbuu finya nda. Le hei, a chi finya nda tum fondo le.

24 Mɛɛ muɛiyaŋ ma kiolu Nuuwa o hɔl mbo chaŋ, nduyɛ mbo tuɛi a nyɛ po ndɔ lumndo tosa wo okɔɔ, 25 mbo dimi aa:

“Sendioo cho Kenaŋ choo.+

Maa o simnuŋ chiɔɔ* le bɛndaa nduaa.”+

26 Mbo dimi vɛlɛ aa:

27 Maa Mɛlɛka tosa mi Chafɛti sɔla lɛŋndeŋ tau.

Nduyɛ maa o wa o tɛndiila Siɛm ndaŋ niŋ fɔ.

Ndu bɛɛ, maa Kenaŋ simnuŋ chiɔɔ le ndu fɔ.”

28 Mɛɛ Mɛŋma Koŋgi Bɛnduaŋ+ ma hiou, mi Nuuwa chii vɛlɛ wɔsilaŋ 350. 29 Kpou kpou, Nuuwa chii wɔsilaŋ 950, okoŋ mbo wu.

10 Bundɛi a puaa Nuuwa wa, Siɛm,+ Ham, a Chafɛti okɔɔ cho hei ni.

Mɛɛ Mɛŋma Koŋgi Bɛnduaŋ ma hiou,+ ma vialu puaa. 2 Puaa Chafɛti velu wa cho haa ni: Koma,+ Makɔɔki,+ Madai, Chavaŋ, Tubaa,+ Misiɛki,+ a Tiluasi.+

3 Puaa Koma velu wa cho haa ni: Asikɛnaasi,+ Luifaa, a Tokaama.+

4 Puaa Chavaŋ velu wa cho haa ni: Ilaisia,+ Taasi, Kitim,+ a Dodanim.

5 Waŋnda haa cho finyaa mamaa le wanaa wa ichali o lɛŋii mɛŋndaŋ ma balu ve niŋnda ni. Nduyɛ, a wa ichali a kaala ndalaŋ, yuŋgula ndalaŋ, vɛlɛ a sɔɔŋ ndaŋ maŋgalaŋ.

6 Puaa Ham velu wa cho haa ni: Kusi, Misiluayim,+ Puti,+ a Kenaŋ.+

7 Puaa Kusi velu wa cho haa ni: Siba,+ Havila, Sabita, Luaama,+ a Sabitɛka.

Puaa Luaama velu wa cho haa ni: Siɛba a Dɛdaŋ.

8 Kusi velu Nimilɔɔ ni. Nduyɛ, Nimilɔɔ wa wana tasoo ni le simnɔŋndo wana kpaaya bɛndoo o lɛŋndeŋ choo. 9 Mbo simnuŋ doosunɔ kpaaya bɛndu simul Chɛhowa wo. Lelaŋ nda dimi taloo ni aa: “Maa Nimilɔɔ, doosunɔ kpaaya bɛndu simul Chɛhowa wo.” 10 Chieeŋ bɛnduŋ o wa masaleŋ choo o lɛŋnde Sianaa leŋ+ niŋndoŋ cho muŋ ni: Babɛɛl,+ Ɛluɛchi,+ Akaadi, a Kaanɛ. 11 Mɛɛ o chɛŋ o lɛŋnde leŋ niŋ, mbo kua Asiiliaa,+ okoŋ mbo kɔ taŋgul Ninivɛɛ,+ Luɛhobotiliɛɛ, Kala, 12 a Luisiŋ. Nduyɛ, Ninivɛɛ a Kala tɛɛŋ Luisiŋ cho ni. Mi chiooŋ muŋ duaunuŋ naapilɛ miŋ simnuŋ chiee tɔɔma bɛndoo.*

13 Misiluayim velu Ludim+ ni, a Anamim, Lehabim, Nafituhim,+ 14 Patilusim,+ Kasuluhim (o ndu niŋ Filitiaŋnda+ fula ni), a Kafitoluim.+

15 Kenaŋ velu Saidɔŋ+ a Hɛɛti+ ni. Nduyɛ Saidɔŋ wa po ndɔ tasoo ni. 16 O pulale ndɔleŋ choo Chɛbusaitiiya,+ Amɔluaitiiya,+ Kikasaitiiya, 17 Hivaitiiya,+ Akaatiiya, Sinitiiya, 18 Avadaitiiya,+ Sɛmaluaitiiya, a Hamaatiiya+ fula ni. Okoŋ kɔɔli, mi yuŋgula Kenanaitiiya saŋnuŋ o lɛŋndeŋ choo. 19 Pɛŋgula Kenanaitiiya la wa chɔŋ Saidɔŋ kɔ Kɛlua,+ Kaasa+ ikɛi haaa kɔ Sodɔm, Komoolua,+ Adimaa, a Sɛboyim,+ Lasia ikɛi. 20 Puaa Ham velu wa cho haa ni. Nduyɛ a wa ichali o lɛŋii ndɛi niŋ a kaala ndalaŋ, yuŋgula ndalaŋ, vɛlɛ a sɔɔŋ ndaŋ maŋgalaŋ.

21 Mi Siɛm, pɔmbɔɔ* Chafɛti bɛɛ vialu chuauwa. Nduyɛ ndu wa finya mamaa le chuauwaa Iba+ wa kpou ni. 22 Puaa Siɛm velu wa cho haa ni: Ɛlam,+ Asiɔɔ,+ Apasadi,+ Ludi, a Aluam.+

23 Puaa Aluam velu wa cho haa ni: Ɔɔsi, Hɔɔl, Kiita, a Maasi.

24 Apasadi velu Silua+ ni, nduyɛ Silua velu Iba ni.

25 Puaa a ŋiɔɔŋ Iba velu ni. Po ndɔ tasoo ndoo nɔ diolaŋ ni aa Pilɛki,*+ kanifuule lɛŋndeŋ le wa le piɔuwaŋ tɛɛŋ* teleŋ o wa yoomu wo. Pɔmbɔ ndɔ ndoo nɔ diolaŋ ni aa Chɔkitaŋ.+

26 Puaa Chɔkitaŋ velu wa cho haa ni: Alimodadi, Siɛlɛfi, Hasamavɛti, Chɛlua,+ 27 Hadoluam, Yusa, Dikilaa, 28 Oba, Abimee, Siɛba, 29 Ofii,+ Havila, a Chobabi. Puaa haa kpou Chɔkitaŋ velu nda ni.

30 Mi fondaŋ nda wa wo kua a timbulaŋndo chɔŋ Mɛsia haaa Sɛfaa, o fondaŋ ŋpemboo Ba Paaleŋ le Chaŋ Ndo.

31 Puaa Siɛm velu wa cho haa ni. A wa ichali o lɛŋii ndɛi niŋ a kaala ndalaŋ, yuŋgula ndalaŋ, vɛlɛ a sɔɔŋ ndaŋ maŋgalaŋ.+

32 Yuŋgula puaa Nuuwa wa la cho laŋ ni. Yuŋgulaŋ ndaŋ la cho o lepula kpɛ kpɛ, pulale yuŋgu kɛ kɛ fula choo leŋ, vɛlɛ a kaale ndɔleŋ. O yuŋgulaŋ ndaŋ niŋ kaalaŋ o lɛŋndeŋ choo kpou la fula ni, mi la tiu ba o ba fee mɛɛ Mɛŋma Koŋgi Bɛnduaŋ ma hiou.+

11 A boondii keŋ, suɛi maŋgalɛi i pilɛ kpe wa o lɛŋndeŋ choo ni, nduyɛ diomnda pilɛ laŋ kpe la wa ni. 2 Mɛɛ waŋnda chieeya kuɛ ba paaleŋ le chaŋ ndo, ma saaluŋ lɛŋnde dɛŋgbɛleŋ o Sianaa niŋ,+ okoŋ ma kila chaltaŋ loŋ. 3 Ma dimulaŋ aa: “La huŋ miŋ lɔɔnuŋ kpilikioŋ, okoŋ miŋ lom muŋ!” Le hei, ma soliŋ kpilikioŋ kpeku sɔŋgɔ poutaŋ, nduyɛ ma soliŋ kotɛiyo* kpeku sɔŋgɔ siimɛndiiyo.* 4 Ma dimi aa: “La huŋ miŋ taŋguluŋ chiee bɛndoo le naapila, a chiɛi bɛndu bɛndoo mi tullo fuuluu choo choo pɔ pɔ, okoŋ miŋ fula tɔɔ, yɔŋii naŋ saŋnuŋ ba o ba fee o lɛŋndeŋ choo.”+

5 Okoŋ kɔɔli, mi Chɛhowa tual le mbo kɔ tofa chiee bɛndoo vɛlɛ a chiɛi bɛndu bɛndu chuauwaa ŋwaŋnda chiee wa taŋgullo wo. 6 Mi Chɛhowa dimi aa: “Waŋnda haa cho diompilɛ, nduyɛ suɛi maŋgalɛi i pilɛ kpe nda dimi ni.+ Tofawɔ nyɛ nda kandu tosaa wo! Nyɛ o nyɛ nda kɛɛsiaa pɛ le tosaa, a bumba niŋ ndu tosa le. 7 Lelaŋ, huŋ ŋ+ tol loŋ miŋ kɔ laasiaa suɛi ndɛi maŋgalɛi, le halikpeŋ a biinaŋ lɛ bila le.” 8 Mi Chɛhowa puusiaa nda loŋ, okoŋ mbo sɛŋi nda ba o ba fee o lɛŋndeŋ choo.+ Nduyɛ, ma mal chiee bɛndu nda wa taŋgullo wo. 9 Lelaŋ nda ke ndu diolaŋ ni aa Babɛɛl,*+ kanifuule loŋ Chɛhowa laasiaa suɛi maŋgalɛi o lɛŋndeŋ choo kpou ni. Nduyɛ, mi Chɛhowa sɛŋi nda ba o ba fee o chieeŋndo choo.

10 Bundɛi a Siɛm+ okɔɔ cho hei ni.

Mɛɛ Mɛŋma Koŋgi Bɛnduaŋ ma hiou, wɔsilaŋ la tiɔɔŋ okoŋ kɔɔli, mi Siɛm vialu Apasadi.+ A teleŋ koŋ, o wa wɔsilaŋ 100. 11 Mɛɛ Siɛm velu Apasadi, mbo chii vɛlɛ wɔsilaŋ 500. Okoŋ kɔɔli, mbo vialu vɛlɛ puaa a waŋ laanduaa.+

12 Mɛɛ Apasadi chii wɔsilaŋ 35, mbo vialu Silua.+ 13 Mɛɛ Apasadi velu Silua, mbo chii vɛlɛ wɔsilaŋ 403. Okoŋ kɔɔli, mbo vialu vɛlɛ puaa a waŋ laanduaa.

14 Mɛɛ Silua chii wɔsilaŋ 30, mbo vialu Iba.+ 15 Mɛɛ Silua velu Iba, mbo chii vɛlɛ wɔsilaŋ 403. Okoŋ kɔɔli, mbo vialu vɛlɛ puaa a waŋ laanduaa.

16 Mɛɛ Iba chii wɔsilaŋ 34, mbo vialu Pilɛki.+ 17 Mɛɛ Iba velu Pilɛki, mbo chii vɛlɛ wɔsilaŋ 430. Okoŋ kɔɔli, mbo vialu vɛlɛ puaa a waŋ laanduaa.

18 Mɛɛ Pilɛki chii wɔsilaŋ 30, mbo vialu Luiyu.+ 19 Mɛɛ Pilɛki velu Luiyu, mbo chii vɛlɛ wɔsilaŋ 209. Okoŋ kɔɔli, mbo vialu vɛlɛ puaa a waŋ laanduaa.

20 Mɛɛ Luiyu chii wɔsilaŋ 32, mbo vialu Silɔɔki. 21 Mɛɛ Luiyu velu Silɔɔki, mbo chii vɛlɛ wɔsilaŋ 207. Okoŋ kɔɔli, mbo vialu vɛlɛ puaa a waŋ laanduaa.

22 Mɛɛ Silɔɔki chii wɔsilaŋ 30, mbo vialu Nahɔɔ. 23 Mɛɛ Silɔɔki velu Nahɔɔ, mbo chii vɛlɛ wɔsilaŋ 200. Okoŋ kɔɔli, mbo vialu vɛlɛ puaa a waŋ laanduaa.

24 Mɛɛ Nahɔɔ chii wɔsilaŋ 29, mbo vialu Tɛlua.+ 25 Mɛɛ Nahɔɔ velu Tɛlua, mbo chii vɛlɛ wɔsilaŋ 119. Okoŋ kɔɔli, mbo vialu vɛlɛ puaa a waŋ laanduaa.

26 Mɛɛ Tɛlua chii wɔsilaŋ 70, mbo vialu Ebilam,+ Nahɔɔ,+ a Haluaŋ.

27 Bundɛi a Tɛlua okɔɔ cho hei ni.

Tɛlua velu Ebilam, Nahɔɔ, a Haluaŋ ni. Nduyɛ Haluaŋ velu Lɔtu+ ni. 28 Kɛ Tɛlua wa wɔ yoomu, mi Haluaŋ po ndɔ wu Ɔɔ,+ naa nda velu ndu wa o lɛŋnde Kaadiaŋ ndeŋ niŋ.+ 29 Mi Ebilam nda Nahɔɔ chua laanduaa. Lanɔɔ Ebilam ndoo nɔ diolaŋ ni aa Seluai.+ Nahɔɔ yɛ, laa ndɔ ndoo nɔ diolaŋ ni aa Milika.+ Nduyɛ Haluaŋ velu Milika nda Isika ni. 30 Seluai yɛ, ndoo vilu le.+

31 Okoŋ kɔɔli, mi Tɛlua chua Ebilam po ndɔ, a Lɔtu po ndɔ mama,+ po Haluaŋ ndo, vɛlɛ a Seluai, lanɔɔ Ebilam po ndɔ, ma faŋaŋ Ɔɔ o lɛŋnde Kaadiaŋ ndeŋ niŋ, le kɔlaŋ o lɛŋnde Kenaŋ ndeŋ+ niŋ. Mɛɛ nda fuuluu Haluaŋ,+ ma kila chaltaŋ loŋ. 32 Tɛlua chii wɔsilaŋ 205. Okoŋ kɔɔli, mbo wu o Haluaŋ niŋ.

12 Mi Chɛhowa dimul Ebilam aa: “Faŋaŋ o lɛŋnde numndeŋ niŋ, ma mɛi wanayaŋ numndoŋ a yuŋgu finya numndo, ma kuɛ o lɛŋnde ya cho num chɔm ndeŋ niŋ.+ 2 I cho tosa ma simnuŋ kaale bɛnduleŋ, nduyɛ mi dɔu num sala. I cho tosa mi diola numndaŋ la fula tɔɔ, nduyɛ ma simnuŋ wana salaa cho choo wo.+ 3 Wanaa cho num salaa dɔwɔɔ wa, I cho nda salaa dɔwɔɔ. Kɛ wana o wana handu num sendioo choo pɛ, I cho ndu sendioo handɔɔ choo.+ Nduyɛ yuŋgulaŋ o lɛŋndeŋ choo kpou, la cho hunɔɔ salaa sɔla* sanaa o num niŋ.”+

4 Okoŋ, mi Ebilam chaŋ mbo kua mɛɛ Chɛhowa ndoo dimul ndu yɛ, nduyɛ mi Lɔtu bɛɛ kua a ndu latulu. Ebilam wa wɔsilaŋ 75 mbo faŋaŋ Haluaŋ.+ 5 Okoŋ mi Ebilam chua Seluai+ laa ndɔ, Lɔtu po pɔmbɔ ndɔ wo,+ nyɛ o nyɛ ndaa sɔla,+ vɛlɛ a wanaa nda sɔla o Haluaŋ niŋnda, ma mal le kɔlaŋ o lɛŋnde Kenaŋ ndeŋ niŋ.+ Mɛɛ nda fuuluu o lɛŋnde Kenaŋ ndeŋ niŋ, 6 mi Ebilam balu o lɛŋnde leŋ niŋ haaa mbo fuuluu Siɛkɛm,+ o yɔmii bɛnduei Moluɛɛ ikɛi.+ Nduyɛ a boondii keŋ, Kenanaitiiya wa o lɛŋnde leŋ niŋ. 7 Okoŋ kɔɔli, mi Chɛhowa fula Ebilam o hɔl, mbo dimul ndu aa: “Chuauwaa numnda*+ ya cho hunɔɔ lɛŋndeŋ ndeŋ ke ni.”+ Okoŋ, mi Ebilam taŋgul bandu luamaa lasalaa loŋ le Chɛhowa, naa o fula ndu o hɔl la. 8 Mbo faŋaŋ loŋ, mbo kua o tanda ŋpemboo Bɛtɛl+ ba paaleŋ le chaŋ ndo, mbo kɔ tuandu tɛndii ndɔɔ Bɛtɛl ba paaleŋ le del lo tɛɛŋ a Eyai+ ba paaleŋ le chaŋ ndo. Mbo taŋgul bandu luamaa lasalaa loŋ le Chɛhowa,+ nduyɛ mbo kandu diola Chɛhowa laŋ veeloo.+ 9 Okoŋ kɔɔli, mi Ebilam faŋaŋ loŋ mbo kua ba Nɛkɛbi+ wo. Nduyɛ, o wa keiyo dɔɔŋgɔlaŋ kilaa o fondaŋnda yɛ yɛlaŋ.

10 A boondii pilɛ, mɛɛ yima bɛnduaŋ ma del o lɛŋnde Kenaŋ ndeŋ niŋ, mi Ebilam mal mbo kua ba Ichipi wo le mbo kɔ wa loŋ le teleŋ tiŋ.*+ Kanifuule, yima wa o lɛŋnde leŋ niŋndaŋ ma wa bɔɔ.+ 11 Mɛɛ o hiŋ le luɛiyɔɔ o lɛŋnde Ichipi leŋ niŋ, mbo dimul Seluai laa ndɔ aa: “A yandii, yaŋ ya nilaŋ! I sina maa naŋɔɔ pila ŋ naŋ ni.+ 12 Te waŋnda Ichipi che num dɔɔ pɛ, a cho dimi aa, ‘Laa ndɔ cho hoo ni.’ Okoŋ ma dii ya, kɛ ma mɛi num yoomu. 13 A yandii, dimul nda maa yema nuu ŋ cho ni, le halikpeŋ nyɛ o nyɛ wɔɔŋ yɔŋnuŋ ya le sabu numndo le, nduyɛ ma piŋi yoomu nuu.”*+

14 Dimioo nuaa mi Ebilam luɛi Ichipi, mi waŋnda Ichipi cha maa chuaa hoo naŋ bɔɔ. 15 Mɛɛ laŋgbaa kalla o chiɛi Feloo wo niŋ bɛɛ che ndu, ma kandu ndu saŋgalaa Feloo o hɔl. Okoŋ, ma kua a chuaa hoo o chiɛi Feloo wo. 16 Mbo bii Ebilam nyɛkɛndɛi le sabu Seluai yo, nduyɛ mbo ke ndu saa, nauwa, sofɛliaa laanduaa a sofɛliaa piaanduaa, buɛiyaa piaanduaa a buɛiyaa laanduaa, vɛlɛ a nyɔɔmiaa.+ 17 Okoŋ mi Chɛhowa tusi Feloo, yuŋgu ndɔɔ, vɛlɛ a buɛiyaa nduaa kpou naa wɔɔŋ wɔɔŋndo choo le sabu Seluai yo, lanɔɔ Ebilam.+ 18 Le hei, mi Feloo veelu Ebilam, mbo dimul ndu aa: “Yɛɛnɛ ŋ tosallɛ ya hoo? Le yɛɛnɛ a dimul la maa laa num te o cho le? 19 Le yɛɛnɛ ŋ dimi yɛ aa, ‘Yema nuu o cho ni’?+ Nuawɔ! I wa niŋ le ndu chua mi siiŋguu ndu laa ni. A che laa num. Chua ndu mi la kuɛ!” 20 Okoŋ, mi Feloo dimul buɛiyaa nduaa le ma soli Ebilam, laa ndɔ, a nyɛ o nyɛ ndaa nɔ o lɛŋnde Ichipi leŋ niŋ.+

13 Okoŋ mi Ebilam chua laa ndɔ a nyɛ o nyɛ ndaa nɔ, latulu a Lɔtu, ma faŋaŋ Ichipi ma kua Nɛkɛbi.+ 2 Ebilam ndoo nɔ chɔluaa, kaniŋ humboŋ, vɛlɛ a kooliiyoŋ tau tau.+ 3 Mɛɛ o chɛŋ Nɛkɛbi le kɔlaŋ Bɛtɛl, o wa keiyo dɔɔŋgɔlaŋ kilaa o fondaŋnda yɛ yɛlaŋ haaa mbo fuuluu o fondaŋ tɛndii ndɔɔ wa paandu wo, Bɛtɛl nda Eyai tɛɛŋ.+ 4 O fondaŋ koŋ ndoo taŋgul bandu luamaa lasalaa ni. Nduyɛ loŋ Ebilam veelu diola Chɛhowa laŋ ni.

5 Lɔtu wa kɔlaŋ latulu nda Ebilam. Ndu bɛɛ ndoo nɔ saa, nauwa, a tɛndiilaŋ. 6 Lɛŋndeŋ le ve lɛ letuu le mi nda kpou wa o fondaŋ pilɔɔ le, kanifuule ndaa nɔ nyɔɔŋ tau, nduyɛ ndaa nɔla lɛ ma wa naapilɛ le. 7 Le hei, mi sɛɛŋgiaŋndo del wanaa wa chɔluaa Ebilam nda mandaa wa tɛɛŋ a wanaa wa chɔluaa Lɔtu wa mandaa wa. (A boondii keŋ, Kenanaitiiya a Pɛluisaitiiya wa o lɛŋndeŋ niŋ.)+ 8 Okoŋ mi Ebilam dimul Lɔtu+ aa: “A yandii, o bɛnda mi sɛɛŋgiaŋndo wa naa tɛɛŋ te, kanifuule wanayɛi naŋ cho ni. Nduyɛ, o bɛnda mi sɛɛŋgiaŋndo wa puaa cho chɔluaa naa mandaa wa tɛɛŋ te. 9 Lɛŋndeŋ le cho le kuaŋnaŋ kɛ kɛ. A yandii, ŋ piɔuwaŋ. Te num kuɛ kpeŋgii ba mialle ni, ya I kuɛ kpeŋgii ba kɛndɛi. Kɛ te num kuɛ kpeŋgii ba kɛndɛi ni, ya I kuɛ kpeŋgii ba mialle.” 10 Mɛɛ Lɔtu mɛɛndaŋ, mbo cha tanda Chɔɔdaŋ ndo+ haaa kɔ bii Sowaa.+ Mbo cha maa tanda koŋ kpou ndoo nɔ mɛŋndaŋ tau maa kpele Chɛhowa+ wo, nduyɛ maa lɛŋnde Ichipi leŋ (tuupa mi Chɛhowa tɛɛmbuu Sodɔm a Komoolua). 11 Le hei, mi Lɔtu chua tanda Chɔɔdaŋ ndo kpou, nduyɛ mbo kua a tɛndii ndɔɔ ba paaleŋ le chaŋ ndo. Okoŋ ma piɔuwaŋ. 12 Mi Ebilam chalnuŋ o lɛŋnde Kenaŋ ndeŋ niŋ, kɛ mi Lɔtu kɔ kila chaltaŋ o chieeŋ bɛndoŋ ikɛi o tanda Chɔɔdaŋ ndo niŋ.+ O mɛɛlulaŋ kpɔŋ, mbo tuandu tɛndii ndɔɔ Sodɔm ikɛi. 13 Wanaa dɛnɛ wɔɔŋnda pila waŋnda Sodɔm wa ni, nduyɛ a wa hakila wɔɔŋ wɔɔŋndaŋ tosaa Chɛhowa o hɔl.+

14 Mɛɛ Ebilam nda Lɔtu piɔuwaŋ, mi Chɛhowa dimul Ebilam aa: “A yandii, lo o fondaŋ ŋ cho koŋ ndo ma heelu hɔlla, ma nua ba luaŋ ndo, ba tou wo, ba paaleŋ le chaŋ ndo, a ba paaleŋ le del lo, 15 kanifuule lɛŋnde ŋ cho leŋ chɔɔ leŋ kpou, num a chuauwaa numnda* ya cho leŋ ke ni, mi le wa le nya lefafɛɛŋ.+ 16 Nduyɛ, I cho tosa mi chuauwaa numnda* kui mɛɛ chundoo o wa nuaa lɛŋ yɛ. Te wana o wana nɔla pɛ mbo chɔm chundoo lɛŋ, mɛɛ o nɔla niŋ mbo chɔm chuauwaa numnda.*+ 17 Chɔŋ ma balu o lɛŋndeŋ niŋ le ma sina bandii nduɛi a toŋgii nduɛi, kanifuule num ya cho leŋ ke ni.” 18 Mi Ebilam hiau lachi a waa o tɛndiilaŋ niŋ. Okoŋ kɔɔli, mbo kɔ kila chaltaŋ o Hɛbulɔŋ+ niŋ, o yɔmii bɛnduii Mamilue+ ve tɛɛŋ. Nduyɛ, loŋ o taŋgul bandu luamaa lasalaa le Chɛhowa ni.+

14 O palɛi keŋ niŋ, Amiluafɛɛ wa masaa le Sianaa+ ni, Aliɔɔki wa masaa le Ɛleesa ni, Kɛdɔlawoma+ wa masaa le Ɛlam+ ni, nduyɛ Tida wa masaa le Koyim ni. 2 Mi masaa haa sɔŋga a Bɛlua masaa le Sodɔm,+ Bilisia masaa le Komoolua,+ Sinabi masaa le Adimaa, Siɛmɛba masaa le Sɛboyim,+ a masaa le Bɛla, koŋ cho ni, Sowaa. 3 Mi nda kpou chuuŋgiaa puaa ndaa chɔuwa naapilɛ o Kpoloŋndo* Sidim,+ koŋ cho ni, Pee Mɛŋma Ihɛllo.*+

4 Le wɔsilaŋ 12, nda kpou wa Kɛdɔlawoma o ba bɛŋgu. Kɛ o wɔsi 13 niŋ, ma simul ndu. 5 O wɔsi 14 niŋ, mi Kɛdɔlawoma a masaa wa a ndu latulu wa huŋ del waŋnda haa choo a chɔuwo ma yam nda. Nda cho ni, waŋnda Luɛfem o Asitɛlɔɔ-kanayim niŋ, waŋnda Susim o Ham niŋ, waŋnda Imim+ o Siavɛɛ-kiliaatayim niŋ, 6 a Holuaitiiyaa+ wa o pembii ndɛi Sɛyaa+ haaa kɔ bii Ɛl-paluaŋ o pollo niŋnda. 7 Okoŋ, ma muliŋ ma kua Ɛŋ-misipa, koŋ cho ni, Kedɛsi.+ Ma bii tanda Amalɛkaitiiya+ kpou vɛlɛ a tanda Amɔluaitiiyaa+ wa ichali o Hasasɔŋ-tamaa niŋndo.+

8 Okoŋ, mi masaa le Sodɔm kua o Kpoloŋndo* Sidim latulu a masaa le Komoolua, masaa le Adimaa, masaa le Sɛboyim, a masaa le Bɛla, koŋ cho ni, Sowaa, ma kɔ sim a bɛɛndiaŋnda le sɔŋgɔɔ 9 a Kɛdɔlawoma masaa le Ɛlam, Tida masaa le Koyim, Amiluafɛɛ masaa le Sianaa, a Aliɔɔki masaa le Ɛleesa.+ Mi masaa a hiɔɔlu simul masaa a ŋuɛɛnu. 10 Nduyɛ Kpoloŋndo* Sidim ndoo nɔ sooŋnda nɔ kotɛiyo* leniŋ tau laŋ. Mɛɛ masaa le Sodɔm a masaa le Komoolua kindiŋ le nyaanɔŋndo, ma deli leniŋ. Mi a tuaa nyaanuŋ o tanda ŋpemboo. 11 Okoŋ mi masaa yem chɔuwo wa chɔuviaa nyɛm waŋnda Sodɔm a Komoolua, vɛlɛ a nyɛdiaa ndaa kpou ma kuaŋnuŋ a muŋ.+ 12 Ebilam, po pɔmbɔ ndɔ wo wa ichali Sodɔm+ diolaŋ aa Lɔtu. Ndu bɛɛ ma bii ndu, nduyɛ ma chua nyɛm ndɔŋ kpou ma kuaŋnuŋ.

13 Okoŋ kɔɔli, mi po pilɛ hialuŋ mbo nyaanuŋ, mbo kɔ dounuŋ Ebilam, Hibuluinɔɔ kona. A boondii keŋ, Ebilam wa ichali* o yɔmii bɛnduei tɛɛŋ. Nduyɛ Mamilue, Amɔluaitiinɔɔ+ ndoo nɔ yɔmnde hei ni. Pɔmbuaa nduaa wa Ɛsikɔɔ a Ena ni.+ Chɛlaŋndo wa puaa haa tɛɛŋ a Ebilam. 14 Mi Ebilam tuɛi maa a bii wanayɛi nduɛi+ ma kuaŋnuŋ a ndu. Le hei, mbo chuuŋgiaa buɛiyaa nduaa veluŋ o ndu lo chiɛiniŋ nduyɛ mbo pɛɛku nda chɔuwo wa 318. Okoŋ, ma tisa nda kɔɔli haaa Daŋ.+ 15 Mɛɛ nyumndaŋ ma tol, mi Ebilam piɔu puaa nduaa a kundalaŋ. Okoŋ, mi ndu a buɛiyaa nduaa kɔ chiŋalaŋ nda a sɔŋgɔɔ ma yam nda. Ma tisa nda kɔɔli haaa Hobaa, Damasikɔɔ ba luaŋ ndo. 16 Mi Ebilam poondiaa nyɛ o nyɛ nda chua vɛlɛ a nyɛm Lɔtu woŋ. Nduyɛ mbo piŋi Lɔtu wanayɛi nduɛi, waŋ laanduaa, a wanaa cheleŋ.

17 Mɛɛ Ebilam kɔ yom Kɛdɔlawoma a masaa wa a ndu latulu wa kpou o chɔuwo mbo wa miiŋgoo, mi masaa Sodɔm huŋ Ebilam lachi o Kpoloŋndo* Siavɛɛ, koŋ cho ni, Kpoloŋ Masaa.+ 18 Mi Mɛkisidɛɛki+ masaa le Salɛm+ chuu ndu beediiyo* a muɛiyaŋ, nduyɛ wana soliaa lasalaa o wa ni le Mɛlɛka Bɛndoo.+

19 Okoŋ mbo duau ndu sala aa:

Nduyɛ, mi Ebilam ke ndu o tɔ ndɔɔ o nyɛm o poondiaa woŋ choo kpou.+

21 Okoŋ kɔɔli, mi masaa Sodɔm dimul Ebilam aa: “Ke ya waŋnda, mi num chua nyɛm ŋ poondiaa woŋ.” 22 Kɛ mi Ebilam dimul masaa Sodɔm aa: “I heelu baa, mi mɛnaŋ po o Chɛhowa Mɛlɛka Bɛndoo lo, Wana Toosiaa choo choo a lɛŋndeŋ ndo 23 maa, I cho num nyɛ o nyɛ biyɔɔ o ba le, o yɔŋ bɛɛ aa kɛileŋ ɔɔ yoole lakɔvɛileŋ,* yɔŋii ŋ dimi aa, ‘Ya tosa ni mi Ebilam sul.’ 24 O fulawɔ o nyɛdiaa puaa niaa de wo kɔɔli, I cho lɛ num nyɛ o nyɛ biyɔɔ o ba le. Kɛ puaa kuɛ a ya latulu wa nda, Ena, Ɛsikɔɔ, a Mamilue,+ ke nda nyɔɔŋ ŋ ndaŋ.”

15 Okoŋ kɔɔli, mi Chɛhowa suaa naa Ebilam chua o yilaŋnde niŋ, mbo dimul ndu aa: “Ebilam, yɔŋ isiooŋ te.+ Ya cho boo chɔu manda numndo ni.+ A cho hunɔɔ fandaa sɔla tau tau.”+ 2 Mi Ebilam dimi aa: “Chɛhowa, Mɛlɛka Kpuluŋguma Bɛndoo, yɛɛnɛ kpeekpei ŋ cho yɛ ya ke? Numpila cho chɔɔ maa I nɔ wɔ chua le. Nduyɛ wana cho nyɛm nuŋ loo wo cho Ɛliɛɛsa+ ni, po fula Damasikɔɔ wo.” 3 Mi Ebilam dimi vɛlɛ aa: “A ke ya ŋchuau* le,+ nduyɛ waŋndo* o chiɛi nuu niŋ cho hunɔɔ miiŋgu o foofo nuu ni.” 4 Kɛ mi Chɛhowa dimul ndu aa: “O cho poo hoo le cho hunɔɔ miiŋgu o foofo numndo le, kɛ po numndo kɛsɛ* cho hunɔɔ miiŋgu o foofo numndo ni.”+

5 Okoŋ mi Mɛlɛka soli Ebilam o bɛɛ, mbo dimul ndu aa: “A yandii, heelu wɔ hɔlla choo choo ma chɔm looŋ, te a tiu pɛ ba.” Mbo dimul ndu aa: “Nuaa chuauwaa numnda* cho hunɔɔ wa ni.”+ 6 Mi Ebilam duau laalaŋndo o Chɛhowa niŋ,+ nduyɛ mbo chua ndu maa wana sakpoo o cho ni.+ 7 Okoŋ, mbo dimi vɛlɛ aa: “Ya cho Chɛhowa ni. Ya soli num Ɔɔ o lɛŋnde Kaadiaŋ ndeŋ niŋ ni, le mi ke num lɛŋndeŋ ndeŋ mi le wa le num.”+ 8 Mi Ebilam nyuna aa: “Chɛhowa, Mɛlɛka Kpuluŋguma Bɛndoo, vɛɛ ya cho yɛ looku sina maa I cho lɛŋnde leŋ sɔla?” 9 Mbo muli aa: “Chua nau chii niŋ wɔsilaŋ la yaa wo, chuiŋ laandu chii niŋ wɔsilaŋ la yaa wo, saa kondo chii niŋ wɔsilaŋ la yaa wo, piiŋndo, vɛlɛ a kaŋgboo.” 10 Mbo chua chɔluaa haa kpou, mbo kialu o kɛ kɛ buŋgaŋ ŋ muuŋ. Okoŋ, mbo kɛsi buŋgaŋ muŋ vellaa velle, kɛ o kili youwa tɛɛŋ te. 11 Mi youwaa biyaa kandu tolɔɔ o visioŋ muŋ choo. Kɛ mi Ebilam lambaŋ nda touwɔɔ.

12 Mɛɛ paaleŋ le hiŋ le yɔŋgɔŋndo, mi Ebilam hiaunuŋ o luaŋ yikpi, okoŋ mi nyumma kpiŋgbima bɛnduaŋ ma tual ndu choo. 13 Mi Mɛlɛka dimul Ebilam aa: “Kɛsiŋ o kɔl maa chuauwaa numnda* cho simnɔŋ mialla o lɛŋnde cheleŋ niŋ, mi wanaa kaŋ a siiŋguu nda chiaa, nduyɛ ma saaŋgiaa nda le wɔsilaŋ 400.+ 14 Kɛ I cho lɛŋnde cho nda siiŋguu chiaa leŋ yamɛi kilul,+ nduyɛ mi tosa ma fula o lɛŋndeŋ leŋ niŋ a nyɔɔŋ tau.+ 15 Kɛ num yɛ, a cho yuuwa kudɛɛ o kɔl nyulu niŋ haaa ma vi.+ Okoŋ, ma kuɛ o pɛŋgioo niŋ maa finyaa num aa mamaa. 16 Kɛ chuauwaa numnda* cho miiŋgu nanuŋ+ o kunda sala hiɔɔloo niŋ, kanifuule dɛnɛ wɔɔŋ Amɔluaitiiya fuuluu wɔ boondii ya tusi nda nyɛpalaa choo le.”+

17 Mɛɛ paaleŋ le del doŋ, nduyɛ mi nyumndaŋ ma tual kpiŋgbi, mi kumii kpuŋgbɛi fula, nduyɛ mi yiŋndeŋ le keeku o visiŋ buŋgaŋ muŋ tɛɛŋ. 18 O paale leŋ choo, mi Chɛhowa yii kpemaa a Ebilam,+ mbo dimul ndu aa: “Chuauwaa numnda* ya cho lɛŋndeŋ ndeŋ ke ni,+ chɔŋ o pioo Ichipi mbo kuɛ o pee bɛndoo Yufiluaati:+ 19 Lɛŋnde Kenaitiiya,+ Kenɛsaitiiya, Kadimonaitiiya, 20 Hitaitiiya,+ Pɛluisaitiiya,+ waŋnda Luɛfem,+ 21 Amɔluaitiiya, Kenanaitiiya, Kikasaitiiya, a Chɛbusaitiiya.”+

16 Seluai, lanɔɔ Ebilam ndoo vilul ndu ŋchuau le.+ Kɛ Seluai ndoo nɔ buɛi laandu Ichipiaŋnɔɔ diolaŋ aa Hakaa.+ 2 Le hei, mi Seluai dimul Ebilam aa: “A yandii, yaŋ ya nilaŋ! Chɛhowa kuuna ya chuauwa violɔɔ. Lelaŋ a yandii, hiviŋ buɛi ni laandoo kɔɔli. Naapum I cho chuauwa sɔla sanaa o ndu niŋ.”+ Okoŋ, mi Ebilam yaŋ Seluai nilaŋ. 3 Mɛɛ Ebilam chii wɔsilaŋ tɔ o lɛŋnde Kenaŋ ndeŋ niŋ, mi Seluai laa ndɔ chua buɛi ndɔ laandoo Hakaa, mbo ke Ebilam pɔnɔ ndɔ le mbo wa laa ndɔ. 4 Okoŋ, mi Ebilam hiviŋ Hakaa kɔɔli, nduyɛ mbo chua folioo.* Mɛɛ o sina maa o chua folioo, mbo kandu masanɔ ndɔɔ tɛɛndaŋndo.

5 Le hei, mi Seluai dimul Ebilam aa: “Num tosa ni mi buɛi ni laandoo wa ya mɔnɛi hei lueiyo. Ya chua ndu ni mi ke num,* kɛ mɛɛ o sina maa o cho a folioo, mbo kandu ya tɛɛndaŋndo. Maa Chɛhowa kiolu naa yamɛi tɛɛŋ naa num.” 6 Okoŋ mi Ebilam dimul Seluai aa: “Num nɔ kpaayaa buɛi numndo choo ni. Lelaŋ, nyɛ o nyɛ ŋ yiyaŋ pɛ maa o bɛnda, tosa.” Okoŋ mi Seluai tusi Hakaa siɔmbulaŋ, mbo nyaanuŋ.

7 Okoŋ kɔɔli, mi maalikɛinɔ Chɛhowa wo saaluŋ Hakaa o sooŋ mamɛŋndo o pollo niŋ. Nduyɛ sooŋ mamɛŋndo hoo wa o nɛi kuɛ Suɔɔ wo.+ 8 Mi maalikɛinɔɔ nyuna ndu aa: “Hakaa, buɛi Seluai yo, kuɛɛnɛ ŋ chɛŋ yɛ, nduyɛ kuɛɛnɛ ŋ cho yɛ laŋ?” Mi Hakaa muli aa: “Masanɔ nuu Seluai ya cho nyaanɔŋndo ni.” 9 Okoŋ, mi maalikɛinɔ Chɛhowa wo dimul ndu aa: “Miiŋgu o masanɔ numndo lo, nduyɛ ma kɔ tusiŋ ndu o ba bɛŋgu.” 10 Mi maalikɛinɔ Chɛhowa wo dimi aa: “I cho tosa mi chuauwaa num aa mamaa* kui tau tau, wana nɔla niŋ nda chɔm te.”+ 11 Mi maalikɛinɔ Chɛhowa wo dimi vɛlɛ aa: “A folioo ŋ cho nuaa ni, nduyɛ a cho hunɔɔ poo violɔɔ ma ke ndu diolaŋ aa Isimɛɛ,* kanifuule Chɛhowa tuei chaŋ ŋ cho wo. 12 O cho simnɔŋ maa sofɛlɛ yondo. O cho hunɔɔ wana o wana simul, nduyɛ mi wana o wana simul ndu. O cho pɔmbuaa nduaa kpou faŋaŋ ikɛi, mbo kila chaltaŋ a ba ndɔ.”*

13 Okoŋ, mbo veelu diola Chɛhowa laŋ, wana wa suɛi o ndu lo wo. Mbo dimi aa: “Num cho Mɛlɛka cha wo ni.”+ Nduyɛ mbo dimi aa: “Baa Mɛlɛka cha ya wo pa ya che ni?” 14 Le sabu koŋ nda veelu sooŋ mamɛŋ koŋ ni aa, Biaa-laha-luai.* (Kedɛsi a Biluɛdi tɛɛŋ sooŋndo hoo cho ni.) 15 Okoŋ, mi Hakaa vilul Ebilam poo, nduyɛ mi Ebilam ke po Hakaa velu wo diolaŋ aa Isimɛɛ.+ 16 Ebilam wa wɔsilaŋ 86 mi Hakaa vilul ndu Isimɛɛ.

17 Mɛɛ Ebilam fuuluu wɔsilaŋ 99, mi Chɛhowa fula ndu o hɔl, mbo dimul ndu aa: “Ya cho Mɛlɛka Kpaaya Kpou Kpou Wo ni. Wa ya diikɔŋndo lɔɔlɔɔ, nduyɛ nɔ sɔŋ o sɔŋ te. 2 I cho kpemaa yii naa num tɛɛŋ,+ nduyɛ mi tosa ma kui tau tau.”+

3 Le hei, mi Ebilam baŋ wulaŋ mbo fuuluu hɔlla lɛŋ. Okoŋ mi Mɛlɛka hiau lachi a suɛi naa ndu chua, mbo dimi aa: 4 “I yii kpemaa a num,+ nduyɛ a cho simnɔŋ finyaa le kaala bɔɔbɔɔ.+ 5 Diola numnda cho lɛ Ebilam* te, kɛ diola numndaŋ niŋ aa Ebilaham,* kanifuule I cho tosa ma simnuŋ finyaa le kaala bɔɔbɔɔ. 6 I cho tosa ma kui tau tau, nduyɛ ma simnuŋ kaalaŋ. I cho tosa mi masaa fula o num niŋ.+

7 “I cho loonɔŋ a kpema ya yii a numndo.+ Nduyɛ, o cho wa naa tɛɛŋ naa chuauwaa numnda,* vɛlɛ a chuauwaa ndaa mamaa le fɛɛŋ a fɛɛŋ, le mi wa Mɛlɛka numndo a Mɛlɛka chuauwaa numnda.* 8 Lɛŋnde isumialte ŋ cho leŋ niŋndeŋ,+ lɛŋnde Kenaŋ ndeŋ kpou, I cho num, vɛlɛ a chuauwaa numnda* leŋ ke le fɛɛŋ a fɛɛŋ. Nduyɛ, ya cho wa Mɛlɛka ndaa ni.”+

9 Mi Mɛlɛka chɔɔlu Ebilaham dimul aa: “Kɛ num a chuauwaa numnda,* vɛlɛ a chuauwaa ndaa mamaa kpou, la nɔ mi la loonuŋ a kpema nuu. 10 Kpema ya yii a num, le mi num a chuauwaa numnda* loonuŋ ndo cho hoo ni. Wana pɔnɔ kɛ kɛ nya tɛɛŋ nɔ mbo sɔla hivi chiɛi kɔɔlioo.+ 11 La nɔ mi la sɔla hivi chiɛi kɔɔlioo,* nduyɛ hei cho wa tamasioo ni le kpema ya yii a nya wo.+ 12 Wana pɔnɔ kɛ kɛ veluŋ pɛ o numndo chiɛiniŋ, o nɔ mbo sɔla hivi chiɛi kɔɔlioo o paale ŋɔmaa leŋ choo.+ Nduyɛ wana pɔnɔ kɛ kɛ fula o yuŋgu numndo choo le, kɛ ma piandu ndu a kaniei* wana lekaa wo o ba, ndu bɛɛ nɔ mbo sɔla hivi chiɛi kɔɔlioo. La nɔ mi la wa hei tosaa chɔŋ a boondii nyɛi mbo kuɛ kɛ. 13 Wana pɔnɔ kɛ kɛ veluŋ o numndo chiɛiniŋ, a wana pɔnɔ kɛ kɛ ŋ pendu a kanii numnde, o nɔ mbo sɔla hivi chiɛi kɔɔlioo.+ Kpema ya yii a nya wo cho wa o dialuŋ nyaŋ maa tamasi, nduyɛ mbo wa le fɛɛŋ a fɛɛŋ. 14 Te wana pɔnɔ sɔla hivi chiɛi kɔɔli le wo kɛɛ pɛ le ma hivi ndu o chiɛi kɔɔli,* wana koŋ nɔ mbo sɔla piɔmndo, kanifuule o tɛɛmbuu kpema nuu.”

15 Okoŋ mi Mɛlɛka dimul Ebilaham aa: “Laa num Seluai,*+ veelu lɛ ndu aa Seluai le, kanifuule diola ndɔlaŋ niŋ aa Sela.* 16 I cho ndu salaa dɔwɔɔ, nduyɛ mi tosa mbo vilul num poo.+ I cho ndu salaa dɔwɔɔ, nduyɛ mbo simnuŋ kaalaŋ. O ndu niŋ masaa fula niŋ ni.” 17 Le hei, mi Ebilaham baŋ wulaŋ mbo fuuluu hɔlla lɛŋ. Okoŋ mbo kandu mamɔɔ, mbo dimi o kɔl niŋ+ aa: “Baa wana pɔnɔ chii niŋ wɔsilaŋ 100 wo nɔla lɛ pa mbo velu hɔɔ? Baa Sela, wana lanɔ chii niŋ wɔsilaŋ 90 wo nɔla lɛ pa mbo velu?”+

18 Okoŋ, mi Ebilaham dimul Mɛlɛka tonyaa aa: “A yandii, maa dɔu Isimɛɛ sala fɔ!”+ 19 Mi Mɛlɛka dimi aa: “Sela laa num kpeekpei cho num poo vilul ni, nduyɛ ma ke ndu diolaŋ aa Aase.*+ I cho kpemaa yii a ndu, nduyɛ kpema koŋ cho wa le ndu vɛlɛ a chuauwaa nduaa* o ndu kɔɔli le fɛɛŋ a fɛɛŋ.+ 20 Kɛ Isimɛɛ ndu, I tuei nyɛ ŋ dimi a ndu okɔɔ wo. Lelaŋ, I cho ndu salaa dɔwɔɔ, nduyɛ mi tosa mbo velu chuauwa ma kui tau tau. O cho puaa 12 violɔɔ, ma simnuŋ yuŋgula leboltaŋ. I cho tosa mbo simnuŋ kaale bɛnduleŋ.+ 21 Kɛ a koŋ kpou, Aase,+ po Sela cho num vilul nyilasiaŋ a teleŋ waa nuaa wo,+ a ndu ya cho kpema nuu yii ni.”

22 Mɛɛ Mɛlɛka chii suukaŋndo a Ebilaham, mi Mɛlɛka kuaŋnuŋ. 23 Nduyɛ o paale leŋ choo kpeekpei, mi Ebilaham chua Isimɛɛ po ndɔ a puaa veluŋ o chiɛi ndɔɔ niŋnda kpou, vɛlɛ a wana o wana o pendu a kaniei, wana pɔnɔ kɛ kɛ wa o chiɛi Ebilaham ndo niŋ, mbo hivi nda o chiɛi kɔɔli,* mɛɛ Mɛlɛka ndoo dimul ndu yɛ.+ 24 Ebilaham wa wɔsilaŋ 99 mbo sɔla hivi chiɛi kɔɔlioo.+ 25 Nduyɛ, Isimɛɛ po ndɔ wa wɔsilaŋ 13 mbo sɔla hivi chiɛi kɔɔlioo.+ 26 O paale leŋ choo kpeekpei Ebilaham nda Isimɛɛ po ndɔ sɔla hivi chiɛi kɔɔlioo ni. 27 Puaa o ndu lo chiɛiniŋ kpou, o kɛ kɛ veluŋ o ndu lo chiɛiniŋ, a wana o wana o pendu a kaniei wana lekaa wo o ba, nda kpou ma sɔla hivi chiɛi kɔɔlioo a ndu latulu.

18 Okoŋ kɔɔli, mi Chɛhowa+ fula Ebilaham o hɔl, naa o wa o yɔmii bɛnduii Mamilue ve tɛɛŋ nda.+ A teleŋ koŋ, o wa ichali o tɛndii ndɔɔ sondoo a paale kala kala leŋ. 2 Mɛɛ o chua hɔlla, mbo cha puaa a yaa isisi, nduyɛ tiŋ pɔmbɔ wa nda tɛɛŋ.+ Mɛɛ o che nda, mbo chaŋ a kiltaŋ naa o wa o tɛndii ndɔɔ sondoo wa, mbo kua nda lachi. Okoŋ, mbo kɔ baŋ wulaŋ lɛŋ. 3 Mbo dimi aa: “A yandii Chɛhowa,* te I cho pɛ wana sɔvɛ num o hɔl, mɛɛ hiaunuŋ buɛi numndo lende le. 4 A yandii, ŋ chuu wɔ nya mɛŋnde pɔmbɔ le peloŋ pulɔɔ.+ Okoŋ, mi la chal o yɔmndo bɛŋgu. 5 Mɛɛ nya hiŋ o ya buɛi nyaa lo yɛ, I chuu wɔ nya beediiyo* mi la de, le mi la sɔla yoomuaŋ.* Okoŋ, mi la kuɛ naa nya cho laŋ nda.” Ma dimi aa: “Bala tiɔɔŋ. Tosa mɛɛ ŋ dimi yɛ.”

6 Mi Ebilaham kua chɔ chɔ naa Sela chua o tɛndiiyo, mbo dimul ndu aa: “Tuu kpeyaŋ kɛndɛ kɛndɔɔ kiloo 13* chɔ chɔ ma linda, okoŋ ma toosiaa beediiyo.” 7 Okoŋ kɔɔli, mi Ebilaham nyaanuŋ naa chɔluaa nduaa wa wa, mbo bii nau piaandu fɔŋndɔ kɛndɛ kɛndɔɔ. Mbo ke buɛi ndɔɔ, mbo kɔ toosiaa ndu chɔ chɔ. 8 Okoŋ mbo chua bɔtɛiyaŋ,* milikiiyaŋ,* a nau piaandu fɔŋndɔ o toosiaa koŋ ndo, mbo kɛsi nyɛdiaa koŋ nda lachi. Nduyɛ mɛɛ nda wa nyɛdiaa dioo o yɔmndo bɛŋgu, mi Ebilaham sim nda ikɛi.+

9 Ma nyuna ndu aa: “Kuɛɛnɛ Sela laa num cho yɛ?”+ Mbo muli aa: “O cho o tɛndiiyo niŋ.” 10 Mi wana pilɛ o nda tɛɛŋ hiau lachi a suɛi aa: “Nyilasiaŋ a teleŋ waa nuaa, I cho miiŋgu naa num chua, nduyɛ Sela laa num cho poo violɔɔ.”+ Sela wa o dio tɛndiiyo sondoo poo amakɔɔ, mbo wa nilaŋ yaŋɔɔ. 11 Ebilaham nda Sela ndaa yuuwa niŋ tau.+ Sela ndoo hiou niŋ teleŋ vialaa.*+ 12 Okoŋ mi Sela kandu ndupila mamnɔŋndo. Mbo dimi aa: “I cho niŋ o yuuwɛi, nduyɛ masanɔ nuu bɛɛ cho niŋ o yuuwɛi. Baa ya nɔla vɛlɛ ni mi velu?”+ 13 Okoŋ mi Chɛhowa nyuna Ebilaham aa: “Le yɛɛnɛ Sela mam yɛ mbo dimi aa, ‘Baa ya cho niŋ hoo o yuuwɛiyo kpeekpei nɔla vɛlɛ ni mi velu?’ 14 Yɛɛnɛ kpeekpei cho yɛ mi Chɛhowa bumba ndu tosa?+ Nyilasiaŋ a teleŋ waa nuaa, I cho miiŋgu naa num chua, nduyɛ Sela cho poo violɔɔ.” 15 Kɛ mi Sela viinuŋ, mbo dimi aa, “I mem te!” Kanifuule siooŋnde wa ndu. Le hei, mi Mɛlɛka dimi aa: “A tonya, ma mam.”

16 Mɛɛ puaa haa chɛŋ le kɔŋndaŋ, mi Ebilaham kua nda liilaa. Nduyɛ mɛɛ nda siɛndi hɔlla, ma cha Sodɔm.+ 17 Mi Chɛhowa nyuna aa: “Baa I nɔ pa mi viŋ Ebilaham nyɛ ya kɛɛsiaa le tosaa wo?+ 18 Nduyɛ pɛŋ, chuauwaa mamaa Ebilaham nda cho kui ma simnuŋ kaale bɛndu, nduyɛ mi le nɔ kpaayaa tau tau. Kaalaŋ o lɛŋndeŋ choo kpou, la cho hunɔɔ salaa sɔla* sanaa o ndu niŋ.+ 19 Ya hɛli ndu ni, le halikpeŋ mbo pɛɛku puaa nduaa a chuauwaa nduaa mamaa le ma tosa nyɛ cho o kɛndɔɔ, nduyɛ mbo wa sakpo ya Chɛhowa o hɔl lo.+ Hei cho tosa ni, mi ya Chɛhowa peelu buŋgɛi ya chuel Ebilaham nde.”

20 Okoŋ mi Chɛhowa dimi aa: “I tuei chaŋnda waŋnda cho a Sodɔm vɛlɛ a Komoolua okɔɔ laŋ.+ Nduyɛ, hakila ndalaŋ la hiu waa.+ 21 I cho tolɔɔ mi kɔ chɔ te chaŋnda ya cho tueiyɔɔ a nda okɔɔ laŋ la cho pɛ tonya. Te o cho lende le, I cho sina.”+

22 Okoŋ, mi puaa mal ma kua ba Sodɔm ndo, kɛ mi Chɛhowa+ lo latulu a Ebilaham. 23 Mi Ebilaham sɔɔŋguu Mɛlɛka ikɛi, mbo nyuna ndu aa: “Baa ma tɛɛmbuu pa wana cho sakpo wo a wana dɛnɛ wɔɔŋndo latulu?+ 24 Te o yɔŋ yɛ mi wanaa cho sakpo wa ŋwaŋ 50 wa o chiee koŋ niŋ? Baa ma tɛɛmbuu nda, a mel chiee koŋ haki le ŋwaŋ 50 kaŋ te? 25 Pesiŋ bɛɛ a tosa suɛi waa nuaa, le wana cho sakpo wo diyɔɔ a wana dɛnɛ wɔɔŋndo latulu, okoŋ mi wana cho sakpo wo a wana dɛnɛ wɔɔŋndo sɔla paawa* pilɔɔ le!+ Pesiŋ bɛɛ a tosa keŋ te.+ Baa Wana Kialaa Ŋyamaa le lɛŋndeŋ kpou tosa nyɛ cho o kɛndɔɔ wo le?”+ 26 Okoŋ mi Chɛhowa dimi aa: “Te I saaluŋ pɛ wanaa cho sakpo wa ŋwaŋ 50 o Sodɔm niŋ, I cho chiee koŋ kpou malɔɔ haki le sabu ndaa.” 27 Mi Ebilaham dimi vɛlɛ aa: “Mi che bɛɛ chundoo a pultaŋ ya cho ni, kɛ a yandii Chɛhowa, chɛl la vɛlɛ mi soo o numndo. 28 Kɛ te o yɔŋ yɛ mi wanaa ŋuɛɛnu faŋaŋ o ŋwaŋ 50 cho sakpo wa choo? Baa ma tɛɛmbuu pa chioo kpou le wanaa ŋuɛɛnuaa kaŋ?” Mi Mɛlɛka muli aa: “Te I saaluŋ pɛ ŋwaŋ 45, I tɛɛmbuu ndu le.”+

29 Kɛ mi Ebilaham suaa vɛlɛ naa Mɛlɛka chua, mbo nyuna ndu aa: “Kɛ te o yɔŋ yɛ maa ŋwaŋ 40 ŋ saaluŋ loŋ ni?” Mi Mɛlɛka muli aa: “Le ŋwaŋ 40 kaŋ, I tɛɛmbuu ndu le.” 30 Kɛ mbo dimi vɛlɛ aa: “A yandii Chɛhowa, duaunuŋ tumbe a ya le,+ kɛ chɛl la mi hiou lachi a suɛi. Te o yɔŋ yɛ maa ŋwaŋ 30 ŋ saaluŋ loŋ ni?” Mi Mɛlɛka muli aa: “Le ŋwaŋ 30 kaŋ, I tɛɛmbuu ndu le.” 31 Kɛ mbo dimi vɛlɛ aa: “A yandii Chɛhowa, chɛl la mi soo vɛlɛ o numndo. Te o yɔŋ yɛ maa ŋwaŋ 20 ŋ saaluŋ loŋ ni?” Mi Mɛlɛka muli aa: “Le ŋwaŋ 20 kaŋ, I tɛɛmbuu ndu le.” 32 O mɛɛlulaŋ kpɔŋ, mi Ebilaham dimi aa: “A yandii Chɛhowa, duaunuŋ tumbe a ya le, kɛ chɛl la mi soo niŋ le pilɛ kpe. Te o yɔŋ yɛ maa ŋwaŋ tɔ kinɛi ŋ saaluŋ loŋ ni?” Mi Mɛlɛka muli aa: “Te I saaluŋ pɛ ŋwaŋ tɔ, I tɛɛmbuu ndu le.” 33 Mɛɛ Chɛhowa chii suukaŋndo nda Ebilaham, mbo kuaŋnuŋ,+ okoŋ mi Ebilaham miiŋguŋ o ndu lo.

19 Mi maalikɛiyaa ŋiɔɔŋnda fuuluu Sodɔm a paale delaa leŋ, nduyɛ Lɔtu wa ichali o dio kpakioo Sodɔm. Mɛɛ o che nda, mbo chaŋ mbo kua nda lachi, okoŋ mbo baŋ wulaŋ mbo fuuluu hɔlla lɛŋ.+ 2 Mbo dimul nda aa: “A yandii, la ŋ kɔŋnuŋ o ya buɛi nyaa lo chiɛiniŋ, mi la kɔ pulu peloŋ nduyɛ mi la lɔl loŋ chuɛllɛŋ. Okoŋ siɔdii idii puŋ, la chɛŋ la kuɛŋnuŋ.” Kɛ ma dimi aa: “Ɛ ɛ, ŋ cho malɔ chuɛllɛŋ o luŋ.” 3 Kɛ Lɔtu lo nda nyɔɔloo haaa ma chɛl ma kua nda ndaa o chiɛi ndɔɔ. Okoŋ mbo toosial nda nyɛdiaa, nduyɛ mbo toosiaa beedii nɔ yiisii* leniŋ te wo, ma dia.

4 Tuupa mi teleŋ malɔɔ fuuluu, mi puaa o chioo Sodɔm niŋ kpou, poombɔ ni, kaasoŋnɔ ni, ma kuanduŋ ma huŋ balu chiɛi Lɔtu wo silɔ. 5 A wa Lɔtu dimullo aa: “Ɔɔ puaa hiŋ o numndo chuɛllɛŋ nda? Solul naa nda o bɛɛ nanuŋ miŋ hini a nda.”+

6 Okoŋ, mi Lɔtu fula o dioo sondoo naa nda chua, mbo kinda dioo. 7 Mi Lɔtu dimi aa: “A yandii wanaa niaa, la tosa suɛi dɛnɛ wɔɔŋ waa nuaa le. 8 A yandii, I nɔ chuaa niaa laanduaa naŋ a ŋiɔɔŋ, a sina wɔ suɛi wana pɔnɔ le wa. I solul lɔ nya nda o bɛɛ, mi la tosal nda nyɛ o nyɛ bɛnda pɛ le nya. Kɛ la tosal puaa haa nyɛ o nyɛ le, kanifuule sumialii nii* nda cho ni.”+ 9 Le hei, ma dimul Lɔtu aa: “Faŋaŋ o dio!” Ma chɔɔlu dimi aa: “Num miallo hoo bii kɔllo ni ma chɔm naa nyɛ naŋ nɔ miŋ tosa wo? Te a feŋaŋ naa o nɛi le, ŋ cho num suɛi wɔɔŋnde tosal mbo hiou i naŋ cho nda tosal le.” Okoŋ ma pia Lɔtu choo doŋgo doŋgo* le ma pɛl dioo. 10 Kɛ mi puaa ŋiɔɔŋnda haa saa Lɔtu ma naŋ ndu chiɛiniŋ, okoŋ ma kinda dioo. 11 Nduyɛ, ma suumiaa puaa wa kaŋ isisi o dio wa, chuaambɔ ni, kaasoŋnɔ ni. Le hei, ma kandu balaŋ keeliaa le dioo nuuviaa, nduyɛ ma saŋga yɔkɔɔ.

12 Okoŋ ma dimul Lɔtu aa: “Baa a nɔ lɛ wana cheleŋ nanuŋ te? Lefuaa numnda ni, puaa numnda ni, chuaa num aa laanduaa ni, a wanayaŋ numndoŋ kpou, soli nda o chioo hoo niŋ! 13 Ŋ nɔ le chioo hoo tɛɛmbuuwo, kanifuule Chɛhowa cho niŋ bɔɔ tueiyɔɔ chaŋnda waŋnda cho a chioo hoo okɔɔ laŋ.+ Lelaŋ Chɛhowa vem naa ni le miŋ tɛɛmbuu ndu.” 14 Okoŋ mi Lɔtu kua o lefuaa nduaa lo, a ndaa nɔ le chuaa nduaa laanduaa chuaa o nɔlaŋ niŋnda. Mbo dimul nda aa: “La chɔŋ la fula o chioo hoo niŋ, kanifuule Chɛhowa cho ndu tɛɛmbuu!” Kɛ lefuaa nduaa ndaa yiyaŋ ko maa mamɔɔlaŋ o wa ni.+

15 Mɛɛ paaleŋ le hiŋ le siɔɔ, mi maalikɛiya kandu Lɔtu tooloo. Ma dimul ndu aa: “Chɔŋ! Chua laa num a chuaa num aa laanduaa ŋiɔɔŋnda, yɔŋii nya sɔla tambei le dɛnɛ wɔɔŋ chioo hoo!”+ 16 Mɛɛ o wa isiɛlɛŋ siɛlɛŋnde, mi Chɛhowa tuiinuŋ ndu inyiɛɛ.+ Le hei, mi puaa haa saaliaa Lɔtu, laa ndɔ, a chuaa nduaa laanduaa ŋiɔɔŋnda balaŋ, okoŋ ma soli nda ma kɔ simi nda chiee lekɔɔ.+ 17 Dimioo nuaa a soli nda ma simi nda chiee lekɔɔ, mi o pilɛ dimul nda aa: “La nyaanuŋ le yoomula nyalaŋ! La tofaŋ kɔɔli le,+ nduyɛ la sim o fonda kɛ kɛ o tandaa hoo niŋ te!+ La nyaanuŋ o tanda ŋpemboo yɔŋii nya sɔla tambei!”

18 Okoŋ mi Lɔtu dimul nda aa: “A yandii Chɛhowa, yɔŋ ya loŋ te! 19 Ya buɛi numndo, a che ya wana sɔvɛ num o hɔl, nduyɛ ma wa yoomu nuu piŋioo+ le ya kɛndɛi num ii bɛnduei* chɔmndo. Kɛ a yandii, I yeema mi kuɛ o tanda ŋpemboo le, kanifuule siooŋnde cho ya, yɔŋii kpundɔɔ kɔ komal la loŋ mi vi.+ 20 Chiee pɔmbɔɔ cho ikɛi nanuŋ kpɛɛluŋ. O cho chiee bɔɔ le. A yandii chɛl la mi nyaanuŋ loŋ, okoŋ mi sɔla chindaa.”* 21 Mbo dimul ndu aa: “Bala tiɔɔŋ. I cho tosa nyɛ ŋ dimi wo.+ I cho chiee ŋ soo hoo a ndu okɔɔ wo tɛɛmbuu le.+ 22 Nyaanuŋ loŋ chɔ chɔ! Kanifuule, mɛɛ ma fuuluu loŋ malaŋ ya tosa nyɛ o nyɛ!”+ Le sabu koŋ o ke chiee koŋ diolaŋ ni aa Sowaa.*+

23 Teleŋ Lɔtu fuuluu Sowaa wo, yɛŋndeŋ lee kandu niŋ fulaa. 24 Okoŋ, mi Chɛhowa tosa mi pouta leyiŋndaŋ a yiŋndeŋ le chuchuŋ Sodɔm a Komoolua choo. Choo choo le fula ni, o Chɛhowa lo.+ 25 Mbo tɛɛmbuu chieeŋ muŋ a tanda koŋ kpou. Chɔŋ a waŋnda chieeyaa wa o chieeŋ muŋ niŋnda kpou, kɔ bii a tɔlɔɔlaŋ.+ 26 Lanɔɔ Lɔtu wa kɔlaŋ pɔnɔ ndɔ kɔɔli, kɛ mbo tofaŋ amakɔɔ, okoŋ mbo simnuŋ suŋgbule ihɛlteŋ.+

27 Diimandɔɔ, mi Ebilaham pena chɔnɔŋ puŋ, mbo kua o fondaŋ o wa isisi ma wa suukaŋndo nda Chɛhowa wo.+ 28 Mɛɛ o tofa kumbuii Sodɔm a Komoolua ve a o tanda koŋ niŋ kpou, mbo cha suɛi kɔndɔfilii bɛnduei. Mbo cha kumnde helɔɔ choo choo tukpe tukpe maa kumii yiŋnde tondo!+ 29 Mi Mɛlɛka loonuŋ a nyɛ o dimul Ebilaham ndo. Le hei, mɛɛ o wa chieeŋ bɛnduŋ wa o tanda koŋ niŋndoŋ tɛɛmbuuwo, mbo soli Lɔtu o chieeŋ muŋ niŋ. Nduyɛ o chieeŋ bɛnduŋ muŋ niŋ Lɔtu wa ichali ni.+

30 Okoŋ kɔɔli, mi Lɔtu nda chuaa nduaa laanduaa ŋiɔɔŋnda faŋaŋ Sowaa, ma kuaŋnuŋ o tanda ŋpemboo.+ Kanifuule, siooŋnde wa ndu le challe o Sowaa+ niŋ. Le hei, mbo kɔ waŋnuŋ o buuloo niŋ nda chuaa nduaa laanduaa ŋiɔɔŋnda. 31 Okoŋ mi chua tasoo dimul pɔmbɔ ndɔ aa: “Finya naa yuuwa, nduyɛ wana pɔnɔ kɛ kɛ cho o fondaa hoo le miŋ chal ndu o ba o nɔɔ niŋ, miŋ velu chuauwa maa waŋnda a tuaa le. 32 Lelaŋ, huŋ kɔ ke kɛkɛ muɛiyaŋ okoŋ miŋ hini a ndu, le miŋ sɔla chuauwa o ndu niŋ.”

33 Ichɔl koŋ, ma pimi finya nda muɛiyaŋ cha. Okoŋ mi chua tasoo luɛi, mbo kɔ hini a finya ndɔ. Kɛ o sina teleŋ chua ndɔɔ hini a ndu wo le, nduyɛ o sina teleŋ o chɛŋ ndo le. 34 Diimandɔɔ, mi chua tasoo dimul pɔmbɔ ndɔ aa: “Chɔchɔl, mi kɔ hini a kɛkɛ. Lelaŋ, ŋ pimi ndu vɛlɛ muɛiyaŋ chuɛllɛŋ. Okoŋ mi num bɛɛ luɛi ma hini a ndu, le miŋ sɔla chuauwa o ndu niŋ.” 35 Ichɔl koŋ bɛɛ, ma pimi finya nda muɛiyaŋ cha. Okoŋ mi pɔmbɔɔ luɛi mbo kɔ hini a finya ndɔ. Kɛ o sina teleŋ chua ndɔɔ hini a ndu wo le, nduyɛ o sina teleŋ o chɛŋ ndo le. 36 Okoŋ mi chuauwaa ŋiɔɔŋaa Lɔtu wa chua folilaŋ* a finya nda. 37 Mi chua tasoo vialu poo, mbo ke ndu diolaŋ aa Mowaabi.+ Ndu cho finyaa le Mowabaitiiya ni haaa a paale hauleŋ ndeŋ.+ 38 Mi o pɔmbɔɔ bɛɛ vialu poo, mbo ke ndu diolaŋ aa Bɛŋ-ami. Ndu cho finyaa le Amɔnaitiiya+ ni haaa a paale hauleŋ ndeŋ.

20 Mi Ebilaham faŋa tɛndii ndɔɔ loŋ,+ mbo kuaŋnuŋ o lɛŋnde Nɛkɛbi leŋ niŋ, mbo kɔ chalnuŋ Kedɛsi+ a Suɔɔ+ tɛɛŋ. Boondii Ebilaham wa ichali* Kɛlua+ ve, 2 mbo dimi vɛlɛ a Sela laa ndɔ okɔɔ aa: “Yema nuu o cho ni.”+ Okoŋ mi Abimɛlɛki, masaa le Kɛlua viam waŋnda ma chuu ndu Sela.+ 3 Ichɔl pilɛ, mi Mɛlɛka suaa naa Abimɛlɛki chua o lɔma sɔlaŋ niŋ aa: “A cho piɔmndo sɔla, kanifuule wana lanɔ ŋ chua koŋ ndo,+ lanɔ pilaa o cho ni.”+ 4 Kɛ Abimɛlɛki ndoo pilaŋ ndɔ ndu le.* Mbo nyuna aa: “Chɛhowa, baa ma diu wanaa tɛɛmbuu haa isɔɔ le wa?* 5 O cho ndupila le dimul la maa yema ndɔ le chuaa hoo cho le, mi chuaa bɛɛ dimi maa yema ndɔ le poo hoo cho le? Kɔl ni iyamaa choŋnuŋ walaŋ, nduyɛ I tosa suɛi wɔɔŋ te.” 6 Okoŋ, mi Mɛlɛka tonyaa dimul ndu o lɔma sɔlaŋ niŋ aa: “I sina maa a kɔl iyama walaŋndo ŋ tosa hei ni. Lelaŋ ya kuuna num hakioo tosaa a ya ni, I chɛl num ma pilaŋ ndu le. 7 Lelaŋ, miŋgi lanɔɔ po koŋ, kanifuule wana suaa le ya wo o cho ni.+ O cho piɛi le num,+ okoŋ ma hiou lachi a waa yoomu. Kɛ te a kɛɛ pɛ le ndu miŋgioo, mɛɛ kɛsiŋ o kɔl maa num a wanaa numnda kpou la cho wu.”

8 Mi Abimɛlɛki pena chɔnɔŋ idiiyo puŋ, mbo veelu buɛiyaa nduaa kpou. Mbo dimul nda nyɛ o nyɛ yɔŋnuŋ. Le hei, mi siooŋii bɛnduei bii nda. 9 Okoŋ, mi Abimɛlɛki veelu Ebilaham, mbo nyuna ndu aa: “Yɛɛnɛ ŋ tosallɛ naa hoo? Suɛi wɔɔŋ kuɛɛ ya tosallɛ num le ma tusi ya a wanaa ya cho masaleŋ choo wa kpou nyɛpalaa waa nuaa choo? A tosal la suɛi kɛndɛ kposoŋ te.” 10 Mi Abimɛlɛki nyuna vɛlɛ Ebilaham aa: “Yɛɛnɛ kpeekpei wa yɛ num o kɔl ma tosa suɛi hei?”+ 11 Mi Ebilaham muli aa: “Yiyaŋ nuu wa ni maa, wanaa cho o fondaa hoo wa cho ya diyɔɔ le laa nuu,+ kanifuule a nɔ isiooŋ le Mɛlɛka le. 12 O fulawɔ okoŋ kɔɔli, yema nuu kpeekpei o cho ni. Kanifuule finya pilɔɔ naŋ fula ni, kɛ ŋ fula kala pilɛ le. Kɛ mi chua ndu o nɔɔ niŋ.+ 13 Lelaŋ, mɛɛ Mɛlɛka dimul la le mi mal chiɛi finya nuu mi wa heeloo a tuusoo,+ mi dimul Sela aa: ‘Mɛɛ ŋ nɔ ma chɔm ya kaala lo lechoo wo yɛ cho hoo ni: Ba o ba naŋ kuɛ pɛ, dimi aa, “Yema nuu o cho ni.”’”+

14 Mi Abimɛlɛki chua saa, nauwa, buɛiyaa laanduaa, a buɛiyaa piaanduaa mbo ke Ebilaham. Nduyɛ mbo miŋgi ndu Sela laa ndɔ o ba. 15 Mi Abimɛlɛki dimul vɛlɛ ndu aa: “Lɛŋnde nileŋ le cho le kuaŋnaŋ kɛ kɛ. Ba o ba ŋ yeema pɛ le challe, a chal loŋ.” 16 Mi Abimɛlɛki dimul Sela aa: “I chua kaniŋ humboŋ 1,000 mi ke yema num.+ Tamasioo cho hoo ni le wanaa cho a num latulu wa, a le wana o wana chɔmndo maa dɛnɛ keeku naa tɛɛŋ te,* nduyɛ maa tɔɔ wɔɔŋ cho num choo le.” 17 Mi Ebilaham kandu Mɛlɛka tonyaa nyɔɔloo o piɛileŋ niŋ, nduyɛ mi Mɛlɛka siŋgi Abimɛlɛki, laa ndɔ, a buɛiyaa nduaa laanduaa, okoŋ ma kandu chuauwa violɔɔ. 18 Kanifuule, waŋ laanduaa wa o chiɛi Abimɛlɛki wo niŋnda kpou, mi Chɛhowa yii nda dembelaŋ le sabu Sela wo, lanɔɔ Ebilaham.+

21 Mi Chɛhowa mulul Sela hɔlla a mɛɛ ndoo dimi yɛ, nduyɛ mi Chɛhowa tosal ndu nyɛ ndoo chuel ndu buŋgɛiyo.+ 2 Okoŋ mi Sela chua folioo,*+ mbo vilul Ebilaham poo o yuuwɛi nduɛi niŋ. Nduyɛ, a teleŋ kpeekpei Mɛlɛka ndoo dimi le mi i yɔŋnuŋ ndo i yɔŋnuŋ ni.+ 3 Mi Ebilaham ke po Sela vilul ndu wo diolaŋ aa Aase.+ 4 Nduyɛ o paale ŋɔmaa leŋ choo, mi Ebilaham hivi Aase o chiɛi kɔɔli, a mɛɛ Mɛlɛka ndoo dimul ndu yɛ.+ 5 Ebilaham wa wɔsilaŋ 100 ma vialu Aase. 6 Okoŋ mi Sela dimi aa: “Mɛlɛka tosa mi mam muɛɛŋ. Wana o wana tuei a ndi okɔɔ pɛ, o cho mamɔɔ a ya latulu.”* 7 Mbo dimi vɛlɛ aa: “Nɛɛnɛ kpeekpei ndoo dimullɛ Ebilaham aa, ‘Sela cho hunɔɔ chuauwa violɔɔ’? Kɛ, I vilul ndu poo o yuuwɛi nduɛi niŋ.”

8 Mi poombɔɔ hindu, okoŋ mi Sela soli ndu mɛɛleŋ o sondo. Nduyɛ paale o soli Aase mɛɛleŋ o sondo leŋ, mi Ebilaham tosa dunyɛi bɛnduei. 9 Kɛ mi Sela kandu chiikuuwo maa po Hakaa,+ chua Ichipiaŋnɔɔ vilul Ebilaham ndo wa Aase mamɔɔ.+ 10 Okoŋ mi Sela dimul Ebilaham aa: “Tou chuaambɔ chiɔɔ hoo nda po ndɔɔ, kanifuule o cho po ndɔɔ nda Aase po ni le cho hunɔɔ nyɛm kiɔɔŋ loo le!”+ 11 Kɛ mi nyɛ Sela dimi a Isimɛɛ okɔɔ wo tɛɛmbuu Ebilaham kɔllo tau.+ 12 Okoŋ mi Mɛlɛka dimul Ebilaham aa: “Tambu kɔl le nyɛ Sela cho num dimullo a poombɔɔ vɛlɛ a buɛi num laandoo okɔɔ wo le. Yaŋ ndu nilaŋ, kanifuule o Aase niŋ sanaa chuauwaa numnda* cho fula ni.+ 13 Kɛ po chuaambɔ buɛiyo+ bɛɛ, I cho tosa mi kaaleŋ le fula o ndu niŋ,+ kanifuule po numndo* o cho ni.”

14 Okoŋ mi Ebilaham chaŋ idiiyo puŋ, mbo chua beediiyo* a mɛŋndaŋ o bɔlɔ yau visioo niŋ mbo ke Hakaa. Mbo chua nyɔɔŋ muŋ mbo baa Hakaa o choŋgu, okoŋ mbo tuau ndu nda po ndɔɔ.+ Mi Hakaa kɔ wa heeloo a tuusoo o pollo niŋ Biaa-siɛba.+ 15 O mɛɛlulaŋ kpɔŋ, mɛɛ mɛŋma wa o bɔlɔɔ niŋndaŋ ma chuu, mi Hakaa kɔ kɛsi poombɔɔ o bɔɔ bɛŋgu. 16 Okoŋ, mbo mal mbo kɔ chalnuŋ tiŋ landaŋ* a ba ndɔ, kanifuule mbo dimi aa: “I yeema mi che poombɔɔ o piɔmndo le.” Le hei, mbo kɔ chal landaŋ, mbo kandu chaŋndo choo choo kpeleŋ.

17 Okoŋ mi Mɛlɛka tuɛi poombɔɔ chaŋndo,+ nduyɛ mi maalikɛinɔ Mɛlɛkaa lo o choo choo niŋ mbo veelu Hakaa. Mbo nyuna ndu aa:+ “Hakaa, yɛɛnɛ yɔŋnuŋ yɛ? Yɔŋ isiooŋ te, kanifuule Mɛlɛka tuei poombɔɔ chaŋndo naa o cho wa. 18 Chɔŋ ma kɔ saa poombɔɔ ma chua ndu. Kanifuule, I cho tosa mbo simnuŋ kaale bɛndu leŋ.”+ 19 Okoŋ mi Mɛlɛka kumbi ndu hɔlla, mbo cha sooŋ mamɛŋndo. Mbo kɔ pei maŋ o bɔlɔ yau visioo niŋ cha, mbo kosi poombɔɔ. 20 Mɛlɛka wa a poombɔɔ latulu+ mɛɛ o hindu fau. O pollo niŋ Isimɛɛ wa ichali ni, nduyɛ mbo simnuŋ wana wuu chiŋuaŋ ndo. 21 Mbo kɔ chalnuŋ o pollo niŋ Paluaŋ,+ nduyɛ mi kala ndɔ kɔ yil ndu lanɔɔ o lɛŋnde Ichipi leŋ niŋ.

22 A teleŋ koŋ, mi Abimɛlɛki nda Fikɔɔ, masa puaa nduaa chɔuwa dimul Ebilaham aa: “Mɛlɛka cho a num latulu o nyɛ o nyɛ ŋ cho tosaa niŋ.+ 23 Lelaŋ, mɛnaŋ o Mɛlɛka lo nanuŋ maa ya ni, chuauwaa niaa ni, a chuauwaa niaa mamaa, a cho naa lakafa tosal te. Nduyɛ maa kaala lo lechoo ya chɔm numndo, ma chɔm ya a wanaa cho o lɛŋndeŋ ndeŋ niŋnda kaala lo lechoo pilɛ koŋ kpe.”+ 24 Okoŋ mi Ebilaham dimi aa: “I mɛnaŋ po.”

25 Kɛ, mi Ebilaham ŋɔɔchiaŋ Abimɛlɛki o lani a sooŋ mamɛŋ buɛiyaa Abimɛlɛki wa poonda ndu o ba a kaka wo okɔɔ.+ 26 Mi Abimɛlɛki dimi aa: “I sina wana tosa heiyo le. A dimul la a ndi okɔɔ le, nduyɛ I tui a ndi okɔɔ le, mɛɛ hau.” 27 Okoŋ, mi Ebilaham chua saa a nauwa mbo ke Abimɛlɛki, mi nda ŋiɔɔŋ kpou yii kpemaa. 28 Mɛɛ Ebilaham hɛli saa laanduaa a ŋɔmmɛu o saa nduaa tɛɛŋ mbo kɛsi nda teŋgeŋ, 29 mi Abimɛlɛki nyuna Ebilaham aa: “Le yɛɛnɛ ŋ hɛli yɛ saa laanduaa ŋɔmmɛu wa haa ma kɛsi nda teŋgeŋ?” 30 Mbo muli aa: “I cho num saa laanduaa ŋɔmmɛu wa haa kioo, le chɔmndo kɛsɛ maa ya tou sooŋndo hoo ni.” 31 Le sabu koŋ o veelu fondaŋ koŋ ni aa Biaa-siɛba,*+ kanifuule loŋ nda ŋiɔɔŋ kpou yii kpemaa ni. 32 Mɛɛ nda chii kpemaa yii+ Biaa-siɛba, mi Abimɛlɛki nda Fikɔɔ, masa puaa nduaa chɔuwa, miiŋguŋ o lɛŋnde Filitiaa leŋ niŋ.+ 33 Okoŋ kɔɔli, mi Ebilaham tual yɔm tamalikiiyo Biaa-siɛba. Nduyɛ loŋ o veelu diola Chɛhowa laŋ+ ni, Mɛlɛka cho le fɛɛŋ a fɛɛŋ ndo.+ 34 Okoŋ, mi Ebilaham chal* o lɛŋnde Filitiaŋnda niŋ le teleŋ vilɛi.*+

22 Okoŋ kɔɔli, mi Mɛlɛka tonyaa duau Ebilaham o tofaa bɛŋgu.+ Mbo veelu ndu aa: “Ebilaham!” Mbo chɛl aa: “Ee!” 2 Mi Mɛlɛka dimul ndu aa: “A yandii, chua Aase+ po num, po num pilɛ kpe ŋ kaala tau wo,+ mi la kuɛ o lɛŋnde Moliaa leŋ,+ ma kɔ soli ndu sala luamaa loŋ o pembii ya cho num chɔm nde choo.”

3 Mi Ebilaham pena chɔnɔŋ puŋ, mbo bɛɛndiaa naa chalaa sofɛlɛ ndɔɔ o kɔɔ. Mbo tɛɛndiaa yɔmnde le sala luamaa solioo. Okoŋ mbo chua buɛiyaa nduaa a ŋiɔɔŋ a Aase po ndɔ, ma kua o fondaŋ Mɛlɛka tonyaa chɔm ndu wo. 4 O paale yaa ndɔ leŋ choo, mɛɛ Ebilaham chua hɔlla, mbo cha fondaŋ koŋ landaŋ. 5 Mbo dimul buɛiyaa nduaa aa: “Nya lo nanuŋ a sofɛlɔɔ, kɛ ŋ cho lakɔ naa po nuu lachi nda miŋ kɔ piɛi Mɛlɛka, okoŋ miŋ miiŋgu nanuŋ.”

6 Mi Ebilaham chua yɔmnde le sala luamaa solioo, mbo handu Aase po ndɔ o choŋgu. Okoŋ mi ndupila chua yiŋndeŋ a muɛi,* ma hiau lachi a kɔlaŋ nda ŋiɔɔŋ. 7 Mi Aase veelu finya ndɔ aa: “Kɛkɛ!” Mbo chɛl aa: “Ee, po nuu!” Mbo nyuna aa: “Ŋ nɔ yiŋndeŋ a yɔmnde, kɛ kuɛɛnɛ saa naŋ cho laŋ sala luamaa solioo wo cho yɛ?” 8 Mi Ebilaham muli aa: “Po nuu, Mɛlɛka pila cho saa yɔŋgu le sala luamaa solioo.”+ Okoŋ ma hiau lachi a kɔlaŋ.

9 O mɛɛlulaŋ kpɔŋ, ma fuuluu o fondaŋ Mɛlɛka tonyaa chɔm ndu wo. Mi Ebilaham taŋgul bandu luamaa lasalaa loŋ, nduyɛ mbo hɛɛnduu yɔmnde lechoo. Mbo yii Aase po ndɔ balaŋ a peloŋ, okoŋ mbo yambu ndu o yɔmii o hɛɛnduu o bandoo choo ve choo.+ 10 Okoŋ, mi Ebilaham chua muɛi* le po ndɔɔ diyɔɔ.+ 11 Kɛ mi maalikɛinɔ Chɛhowa wo veelu ndu o choo choo niŋ aa: “Ebilaham, Ebilaham!” Mbo chɛl aa: “Ee!” 12 Mbo dimi aa: “Dii poombɔɔ le, nduyɛ tosal ndu nyɛ o nyɛ le. I sina niŋ kɛsɛ maa a nɔ siooŋii Mɛlɛkɛi, kanifuule a kɛɛ le ya pole numnde pilɛ leŋ kpe kioo le.”+ 13 Mɛɛ Ebilaham chua hɔlla, mbo cha saa kondoo a leelaŋ ndu la hauwaa o bɔɔ yɔmndo niŋ ndu ikɛi. Okoŋ mi Ebilaham kɔ bii saa kondo koŋ, mbo soli ndu sala luamaa sɔŋgɔ po ndɔɔ. 14 Okoŋ kɔɔli, mi Ebilaham ke fondaŋ koŋ diolaŋ aa Chɛhowa-chiiluɛɛ.* Lelaŋ waŋnda dimi wɔ hau kɛ ni aa: “Chɛhowa cho yɔŋgu o pembii nduɛi choo.”+

15 Mi maalikɛinɔ Chɛhowa wo o choo choo niŋ dimul vɛlɛ Ebilaham 16 aa: “‘I mɛnaŋ po,’ ya Chɛhowa dimi lende ni,+ ‘maa le mɛɛ ŋ tosa hei, nduyɛ a kɛɛ le ya pole numnde pilɛ leŋ kpe kioo le yɛ,+ 17 I cho num salaa dɔwɔɔ, mi tosa mi chuauwaa numnda* kui maa looŋ o choo choo niŋ, nduyɛ ma wa maa siooŋnde o pee mɛŋma ihɛllo kɔŋgɔ.+ Chuauwaa numnda* cho chieeŋ bɛnduŋ* yaamɔɔwaa ndaa biu biu.+ 18 Kaalaŋ o lɛŋndeŋ choo kpou cho salaa sɔla le ndapila sanaa o chuauwaa numnda*+ niŋ, le mɛɛ ŋ tuei ya diom yɛ.’”+

19 Okoŋ kɔɔli, mi Ebilaham miiŋgu naa buɛiyaa nduaa chua. Okoŋ mi nda kpou chaŋ ma miiŋgu latulu Biaa-siɛba,+ nduyɛ mi Ebilaham hiau lachi a challe o Biaa-siɛba niŋ.

20 Mɛɛ teleŋ tiŋ hiou, mi waŋndo huŋ dimul Ebilaham aa: “Milika bɛɛ, puaa o vilul Nahɔɔ bɛ num nda cho haa ni:+ 21 Po ndɔ tasoo diolaŋ aa Ɔɔsi, pɔmbɔ ndɔ diolaŋ aa Buusi, nduyɛ apiliaa cho haa ni, Kɛmuɛɛ finyaa Aluam, 22 Chɛsɛdi, Haaso, Pilidaasi, Chidilaafi, a Bɛtuɛɛ.”+ 23 Bɛtuɛɛ velu Lubeka+ ni. Puaa ŋɔmaa wa haa Milika vilul Nahɔɔ, bɛndoo Ebilaham ni. 24 Mi Luma laa ndɔ pɔmbɔ bɛɛ vilul ndu puaa. Nda cho haa ni: Tebaa, Keham, Tahaasi, a Maaka.

23 Sela wa achal le wɔsilaŋ 127. Wɔsilaŋ ndaŋ o chii yoomu ni.+ 2 Okoŋ, mbo wu o Kiliaati-aba+ niŋ, koŋ cho ni, Hɛbulɔŋ,+ o lɛŋnde Kenaŋ ndeŋ+ niŋ. Nduyɛ mi Ebilaham chaŋ Sela laa ndɔ chaŋndo pila. 3 Okoŋ kɔɔli, mbo mɛi laa ndɔ vilɛiyo, mbo kɔ dimul puaa Hɛɛti+ wa aa: 4 “Miallo ya cho nya tɛɛŋ ni.+ Lelaŋ a yandii, la ke ya fondaa nya tɛɛŋ mi kumbu laa nuu, nduyɛ mi wa wanaa niaa vilɛiya kumbɔɔ loŋ.” 5 Okoŋ mi puaa Hɛɛti wa dimul Ebilaham aa: 6 “A yandii, yaŋ naa nilaŋ masanɔ naa. Num cho wana yuŋgu lebol Mɛlɛka hɛli wo* naa tɛɛŋ ni.+ O fondaŋnda naŋ kumbu waŋ vilɛiya laŋ tɛɛŋ kinɛi, hɛli o ŋ hɛnaŋ ndo, ma kumbu laa num loŋ. Wana o wana o naa tɛɛŋ kɛɛlu num laa num kumbɔɔ o fondaŋ ndɔ o kumbu waŋ vilɛiya wo le.”

7 Okoŋ mi Ebilaham chaŋ, mbo kɔ tunduŋ wanaa lelɛŋnda lachi, puaa Hɛɛti+ wa. 8 Mbo dimul nda aa: “Te la chɛl la pɛ le mi kɔ kumbu laa nuu, mɛɛ a yandii, la nyɔɔlul la Ɛfulɔŋ po Sohaa wo, 9 le mbo pisi ya buulu ndɔ cho Makipila wo o ba, o cho o yondo ndɔɔ ikɛiyo. O chɔm ya baa+ ndɔɔ mi pendu ndu nya kpou o hɔl, le mi sɔla fondaa le waa wanaa niaa vilɛiya kumbɔɔ.”+

10 Ɛfulɔŋ wa ichali puaa Hɛɛti wa tɛɛŋ. Okoŋ mi Ɛfulɔŋ, Hitaitiinɔɔ dimul Ebilaham puaa Hɛɛti wa o hɔl, a wanaa wa ichali o dio kpaki chiee ndɔɔ sondoo+ wa kpou aa: 11 “Ɛ ɛ, masanɔ nuu! Yaŋ ya nilaŋ. I ke num yondo koŋ a buulu cho loŋ ndo kpou. I ke num ndu wanaa niaa haa kpou o hɔl. Kɔ kumbu laa num loŋ.” 12 Okoŋ mi Ebilaham tunduŋ wanaa lelɛŋnda lachi, 13 mbo suaa o Ɛfulɔŋ ndo waŋnda kpou o hɔl. Mbo dimul ndu aa: “A yandii, yaŋ ya nilaŋ! Chɛl mi pendu num yondo koŋ o ba, le mi kumbu laa nuu loŋ. I cho num paawa* a mɛɛ baa ndɔɔ cho yɛ.”

14 Okoŋ mi Ɛfulɔŋ dimul Ebilaham aa: 15 “Masanɔ nuu, a yandii yaŋ ya nilaŋ. Kaniŋ humboŋ lusullo siɛkɛlloŋ 400* lɛŋndeŋ ndeŋ le nɔ baa ni. Kɛ buulaŋ a keŋ te. Kɔ kumbu laa num tuŋ.” 16 Mi Ebilaham yaŋ Ɛfulɔŋ nilaŋ. Nduyɛ baa Ɛfulɔŋ chɔm le lɛŋnde leŋ puaa Hɛɛti wa o hɔllo, mi Ebilaham chua kaniŋ humboŋ lusullo siɛkɛlloŋ 400,* a mɛɛ wanaa leyulaa ndaa tuu nyɔɔŋ sindɛ yɛ,+ mbo ke Ɛfulɔŋ. 17 Nduyɛ, mi Ɛfulɔŋ pisi yondo ndɔ wa Makipila, Mamilue ikɛiyo. Mi yondo koŋ, buulu wa loŋ ndo, a yɔmii wa o yondo koŋ niŋnde kpou 18 simnuŋ nyɛm kɛŋ Ebilaham ndoŋ. Puaa Hɛɛti wa a wanaa wa ichali o dio kpaki chioo sondoo wa kpou o hɔl hei yɔŋnuŋ ni. 19 Okoŋ kɔɔli, mi Ebilaham kumbu Sela laa ndɔ o buulu wa o yondoo Makipila wo niŋ, o wa Mamilue ikɛiyo, koŋ cho ni, Hɛbulɔŋ, o lɛŋnde Kenaŋ ndeŋ niŋ. 20 Okoŋ, mi puaa Hɛɛti wa chua yondo koŋ a buulu wa loŋ ndo, ma ke Ebilaham, mbo simnuŋ fondaŋ ndɔ o kumbu waŋvilɛiya wo.+

24 Ebilaham ndoo yuuwa niŋ kudɛɛ, nduyɛ mi Chɛhowa duau ndu sala o nyɛ o nyɛ niŋ.+ 2 Mi Ebilaham dimul kaasoŋnɔɔ o buɛiyaa nduaa tɛɛŋ, o wa nyɛm ndɔŋ kpou chilaŋ ndo+ aa: “A yandii, wou ba numndo o lɔlu nuu bɛŋgu, 3 ma mɛnaŋ po o Chɛhowa lo, Mɛlɛka toosiaa choo choo a lɛŋndeŋ ndo maa, a cho lanɔ chua le po nuu chuaa laanduaa Kenanaitiiya tɛɛŋ, a ya cho haa o lɛŋnde ndaleŋ niŋnda le.+ 4 Kɛ a nɔ ma kuɛ o lɛŋnde nileŋ niŋ naa wanayaŋ nuŋ chua,+ ma kɔ chua lanɔɔ le Aase po ni.”

5 Kɛ mi buɛiyo nyuna ndu aa: “Te o yɔŋ yɛ mi chuaa kɛɛ le hunɔɔ a ya latulu o lɛŋndeŋ ndeŋ niŋ? Baa I chua po numndo mi miŋgi ndu o lɛŋnde ŋ fula leŋ niŋ?”+ 6 Mi Ebilaham mulul ndu aa: “Ɛ ɛ, kua a po nuu loŋ te.+ 7 Kanifuule Chɛhowa, Mɛlɛka cho o choo choo niŋndo faŋa ya o chiɛi finya nuu niŋ, a o lɛŋnde wanayaŋ nuŋ+ niŋ ni. Mbo suaa o ya lo, nduyɛ mbo chuel la buŋgɛi+ aa: ‘Chuauwaa num aa mamaa*+ ya cho lɛŋndeŋ ndeŋ ke ni.’+ Lelaŋ, o cho maalikɛinɔ ndɔɔ yɔŋ num lachi,+ ma sɔla lanɔɔ loŋ lekɛndɛi le po nuu.+ 8 Te chuaa kɛɛ yɛ pɛ le hunɔɔ a num latulu, mɛɛ tɔɔyaŋ kɛ kɛ cho num choo le buŋgɛi ŋ chua hei ve le. Kɛ a nɔ ma kuɛ a po nuu loŋ te.” 9 Okoŋ mi buɛiyo wou ba ndɔɔ o lɔlu Ebilaham ndo bɛŋgu, mbo mɛnaŋ po a suɛi hei okɔɔ.+

10 Mi buɛiyo chua nyɔɔmiaa masanɔ ndɔɔ tɔ, a nyɛm kɛndɛŋ suu o suu masanɔ ndɔɔ nɔ, mbo mal le kɔlaŋ Mɛsopoteemiaa, o chiee Nahɔɔ wo. 11 Mɛɛ nda fuuluu o sooŋ mamɛŋ wa chiee lekɔɔ wo a paale yɔŋgaŋndeŋ, mbo tosa mi nyɔɔmiaa hini lɛŋ. Nduyɛ, a boondii keŋ kinɛi waŋ laanduaa ndaa kua mɛŋndaŋ kɔndɔɔ ni. 12 Okoŋ mbo piɛi aa: “Chɛhowa, Mɛlɛka Ebilaham masanɔ nuu, a yandii, tosa mi sɔla batiuwaa paale hauleŋ ndeŋ. Nduyɛ ma chɔm masanɔ nuu Ebilaham kaala lo lechoo numndo. 13 Mi che ya isisi o sooŋ mamɛŋndo ikɛi. Nduyɛ chuaa laanduaa cho fulaa o chioo niŋ, ma wa hunɔɔ mɛŋndaŋ kɔndɔɔ. 14 I cho chua laandoo o pilɛ dimul aa, ‘A yandii tusul la kpɛɛnɛi num mamɛŋnde le mi kol.’ Te o dimi pɛ aa, ‘O wɔu le, kol, nduyɛ te a chii pɛ I ke vɛlɛ nyɔɔmiaa numnda a kol,’ mɛɛ mala ya mi sina kɛsɛ maa ndu ŋ hɛli le Aase buɛi numndo ni. Nduyɛ hei cho tosa mi sina maa, a chɔm masanɔ nuu kaala lo lechoo numndo.”

15 Tuupa pɛŋ mbo chii suɛi, mi Lubeka, chua Bɛtuɛɛ wo fula a kpɛɛnɛi nduɛi mamɛŋnde o choŋgu. Bɛtuɛɛ+ yɛ, kala ndɔ wa Milika+ ni lanɔɔ Nahɔɔ,+ bɛndoo Ebilaham. 16 Naŋɔɔ pila chuaa hoo ndoo naŋ ni, nduyɛ yufuaanɔɔ o wa ni. Wana pɔnɔ kɛ kɛ ndoo hiviŋ ndɔ ndu kɔɔli le. Mi chuaa hoo kua o sooŋndo mbo kɔ pei mɛŋndaŋ o kpɛɛnɛi nduɛi niŋ, nduyɛ mbo wa miiŋgoo. 17 O lepilɛ niŋ kpe, mi buɛiyo hoo nyaanuŋ naa Lubeka chua, mbo dimul ndu aa: “A yandii, ke ya mɛŋndaŋ nyɛɛmbɔ o kpɛɛnɛi numnde niŋ mi kol.” 18 Mbo dimi aa: “Awa masanɔ nuu, kol.” Okoŋ mbo tusi kpɛɛnɛi nduɛi chɔ chɔ o laba, mbo ke ndu mbo kol. 19 Mɛɛ o chii ndu mɛŋndaŋ ke mbo kol, mbo dimi aa: “I cho vɛlɛ mɛŋndaŋ kɔndɔɔ le nyɔɔmiaa numnda, ma lo kolɔɔ haaa ma pim cha.” 20 Mbo hulu mɛŋndaŋ chɔ chɔ o nyɛ chɔluaa kol lo niŋ. Nduyɛ o lo maŋ vilioo haaa mi nyɔɔmiaa nduaa kpou kol ma pum cha. 21 Boondii chuaa wa mɛŋndaŋ vilioo ve kpou, tofaa tuŋ poo wa ndu ni, nduyɛ mi kɔndɔfillo bii ndu. O wa yiyaŋndo o kɔl niŋ te viomɔɔ nda vem ndu wo Chɛhowa chii nuaa bɛɛndiaa ni.

22 Mɛɛ nyɔɔmiaa chii kolɔɔ, mi poo soli kelɛi miliŋnde lusullo siɛkɛlle tɛndaa tɛɛŋ,* a kelaŋ labaŋ ŋkooliiyoŋ ŋ muuŋ lusullo siɛkɛlloŋ tɔ,* mbo ke ndu. 23 Mbo nyuna ndu aa: “A yandii dimul la, nɛɛnɛ velu yɛ num? Baa finya num nɔ pa lumui fondoo o ndu lo chiɛiniŋ le miŋ lɔl loŋ chuɛllɛŋ?” 24 Okoŋ mbo mulul ndu aa: “Bɛtuɛɛ+ velu ya ni, po Milika vilul Nahɔɔ+ wo.” 25 Mbo dimi vɛlɛ aa: “Ŋ nɔ yiyaa le nya, nduyɛ ŋ nɔ billo a nyɛdiaa tau le nyɔɔmiaa.” 26 Okoŋ mi poo baŋ wulaŋ Chɛhowa lachi, nduyɛ mbo fuuluu hɔlla lɛŋ. 27 Mbo dimi aa: “Maa Chɛhowa, Mɛlɛka masanɔ nuu Ebilaham sɔla saŋgalaa. Kanifuule, o cho hiouwɔɔ lachi a ndu kaala lo lechoo ndɔɔ chɔmndo, nduyɛ mbo wa buŋgaŋ o chuel ndu woŋ peeloo. Chɛhowa tosa a sabu mi huŋ o wanayaŋ masanɔ nuu lo.”

28 Okoŋ mi chuaa nyaanuŋ, mbo kɔ dimul kala ndɔ vɛlɛ a wanaa cheleŋ a sɔɔŋ muŋ okɔɔ. 29 Lubeka ndoo nɔ yemaa diolaŋ aa Lebaŋ.+ Okoŋ mi Lebaŋ malnuŋ a kiltaŋ, mbo kua naa poo wa chiee lekɔɔ, o sooŋ mamɛŋndo wa. 30 Mɛɛ Lebaŋ che yema ndɔ kelɛi o miliŋ a kelaŋ o laba, nduyɛ mi Lubeka yema ndɔ tɛɛsial ndu nyɛ o nyɛ poo dimul ndu, mi Lebaŋ kua naa poo chua o sooŋndo. Nduyɛ, poo wa wɔ isisi loŋ nyɔɔmiaa ikɛi. 31 O lepilɛ niŋ kpe, mbo dimul poo aa: “Num Chɛhowa dɔu hoo sala wo, huŋ kɔ o bɛɛ. Le yɛɛnɛ ma wa isisi nanuŋ? I chii chiɛiyo a fondaa bɛɛndiaa le num a nyɔɔmiaa.” 32 Okoŋ mi poo luɛi chiɛiniŋ, mbo* faaŋiaa nyɔɔmiaa wolɔɔlaŋ o lakɔɔ, mbo ke nda billo a nyɛdiaa. Okoŋ kɔɔli, mbo ke poo mɛŋndaŋ le mi ndu a puaa wa a ndu latulu wa pulu peloŋ. 33 Kɛ mɛɛ nda kɛsul ndu nyɛdiaa le mbo de, mbo dimi aa: “Tuupa mi de nyɛdiaa, mɛɛ mi dimul num fɛlɛŋ nyɛ ya nɔ le dimioo wo.” Okoŋ mi Lebaŋ dimi aa: “Awa, soo!”

34 Mi poo dimi aa: “Buɛi Ebilaham ndo ya cho ni.+ 35 Nduyɛ Chɛhowa dɔu masanɔ nuu sala tau, mbo tosa mbo sul tau. Mbo ke ndu saa, nauwa, kaniŋ humboŋ a kooliiyoŋ, buɛiyaa piaanduaa a buɛiyaa laanduaa, nyɔɔmiaa, vɛlɛ a sofɛliaa.+ 36 Le handɔɔ lechoo, mi Sela lanɔɔ masanɔ nuu vilul ndu poo o yuuwɛi nduɛi niŋ.+ Nduyɛ nyɛ o nyɛ masanɔ nuu nɔ,+ ndu o cho ke ni. 37 Okoŋ mi masanɔ nuu dimul la aa: ‘Mɛnaŋ po maa a cho lanɔ chua le po nuu chuaa laanduaa Kenanaitiiya tɛɛŋ, a ya cho haa o lɛŋnde ndaleŋ niŋnda le.+ 38 Kɛ a nɔ ma kuɛ o yuŋgu finya nuu+ lo, ma kɔ chua lanɔɔ loŋ le po nuu.’+ 39 Kɛ mi nyuna masanɔ nuu aa: ‘Te o yɔŋ yɛ mi chuaa kɛɛ le hunɔɔ a ya latulu?’+ 40 Mbo mulul la aa: ‘Chɛhowa, Mɛlɛka ya cho tolɔɔ kɔɔli+ wo cho maalikɛinɔ ndɔɔ+ yɔŋ mbo wa a num latulu. O cho tosa ma sɔla batiuwaa, okoŋ ma chua lanɔɔ le po nuu wanayaŋ nuŋ tɛɛŋ, o yuŋgu finya nuu niŋ.+ 41 Te a kuɛ pɛ o yuŋgu finya nuu lo ma kɛɛ le num lanɔɔ kioo, mɛɛ a peelu buŋgɛi ŋ chua ve. Nduyɛ sendi cho lɛ num wa choo le buŋgɛi ŋ chua le peeloo ve le.’+

42 “Mɛɛ ya fuuluu hau o sooŋ mamɛŋndo, mi piɛi aa: ‘Chɛhowa, Mɛlɛka masanɔ nuu Ebilaham, te a cho pɛ tosa mi sɔla batiuwaa o viomɔɔ hoo niŋ, 43 mɛɛ a che ya isisi o sooŋ mamɛŋndo nanuŋ. Maa hei yɔŋnuŋ: Te chua laandoo+ hiŋ pɛ mɛŋndaŋ kɔndɔɔ mi dimul ndu aa, “A yandii, ke ya mɛŋndaŋ nyɛɛmbɔ o kpɛɛnɛi numnde niŋ mi kol,” 44 okoŋ mbo dimi aa, “Awa kol. I cho vɛlɛ mɛŋndaŋ kɔndɔɔ le mi nyɔɔmiaa numnda kol,” maa o wa ndu Chɛhowa hɛli ni le po masanɔ nuu fɔ.’+

45 “Tuupa mi chii piɛileŋ o kɔl niŋ, mi cha Lubeka hunɔɔ a kpɛɛnɛi mamɛŋnde o choŋgu. Mbo kua sanaa o sooŋ mamɛŋndo, mbo kandu mɛŋndaŋ kɔndɔɔ. Okoŋ mi dimul ndu aa: ‘A yandii, ke ya mi kol.’+ 46 Mbo tusi mɛŋma wa ndu o choŋgu waŋ chɔ chɔ, mbo dimul la aa: ‘Awa kol.+ I cho vɛlɛ mɛŋndaŋ kɔndɔɔ mi ke nyɔɔmiaa numnda.’ Okoŋ mi kol, nduyɛ mbo ke vɛlɛ nyɔɔmiaa ma kol. 47 Okoŋ kɔɔli mi nyuna ndu aa, ‘Nɛɛnɛ velu yɛ num?’ Mbo muli aa, ‘Bɛtuɛɛ velu ya ni, po Milika vilul Nahɔɔ wo.’ Okoŋ mi wou ndu kelɛi o miliŋ a kelaŋ o laba.+ 48 Mi baŋ wulaŋ Chɛhowa lachi, nduyɛ mi fuuluu hɔlla lɛŋ. Okoŋ kɔɔli mi saŋgala Chɛhowa, Mɛlɛka masanɔ nuu Ebilaham.+ Kanifuule, ndu sim ya lachi ni, le mi huŋ chuel masanɔ nuu chua bɛ ndɔ wo le po ndɔɔ. 49 Lelaŋ, la dimul la te la cho pɛ masanɔ nuu kaala lo lechoo wo chɔm, nduyɛ mi la lo o lediom. Kɛ te o cho lende le, mɛɛ la dimul la, I hiaunuŋ naŋ choo.”*+

50 Okoŋ mi Lebaŋ nda Bɛtuɛɛ dimul ndu aa: “Chɛhowa kɛɛsiaa suɛi hei ni. Lelaŋ, ŋ nɔla miŋ chɛl ɔɔ miŋ kɛɛ le. 51 A che Lubeka. Chua ndu mi la kuɛ, okoŋ mbo simnuŋ lanɔɔ po masanɔ numndo, a mɛɛ Chɛhowa dimi yɛ.” 52 Mɛɛ buɛi Ebilaham ndo tuei nyɛ nda dimi wo, o lepilɛ niŋ kpe, mbo baŋ wulaŋ Chɛhowa lachi. 53 Mi buɛiyo hoo soli nyɛm nda toosiaa a kaniŋ humboŋ vɛlɛ a kooliiyoŋ ndoŋ, a nyɛla chuɛɛnaŋndaŋ mbo ke Lubeka. Nduyɛ, mbo ke yema ndɔ a kala ndɔ nyɛm baa kalaŋ. 54 Okoŋ kɔɔli, mi ndu a puaa wa a ndu latulu wa dia nyɛdiaa, ma kol, nduyɛ ma lɔl loŋ ichɔl koŋ.

Mɛɛ o chɛŋ idiiyo, mbo dimi aa: “La mal la niko mi miiŋgu naa masanɔ nuu chua.” 55 Le hei, mi yema ndɔ a kala ndɔ dimi aa: “Chuaa tosa wɔ palɛi tɔ a naa latulu, okoŋ mbo kuɛ.” 56 Kɛ mbo dimul nda aa: “La kɛsi ya nanuŋ te, kanifuule nyapila cho chɔɔ maa Chɛhowa tosa mi sɔla batiuwaa. Lelaŋ, la mal la I miiŋgu o masanɔ nuu lo.” 57 Okoŋ ma dimi aa: “Awa, ŋ veeluŋndɔ chuaa miŋ sina yiyaŋ ndɔɔ.” 58 Ma veelu Lubeka, nduyɛ ma nyuna ndu aa: “Baa a cho pa lakɔ a poo hoo latulu?” Mbo muli aa: “Ei, I cho lakɔ.”

59 Okoŋ, ma chɛl le mi Lubeka+ yema nda a wana ndɔ malaa*+ kuɛ latulu a buɛi Ebilaham ndo vɛlɛ a puaa nduaa. 60 Ma duau Lubeka sala, ma dimul ndu aa: “Yema naa, maa chuauwaa numnda kui ma wa waalaŋ o waalaŋ niŋ fɔ. Nduyɛ, maa chuauwaa num aa mamaa* bii diola kpakila* wanaa tul nda leyɛ wa fɔ.”+ 61 Okoŋ, mi Lubeka nda buɛiyaa nduaa laanduaa chaŋ ma hel o nyɔɔmiaa choo, ma tual poo kɔɔli. Mi poo chua Lubeka, ma kua nda ndaa.

62 Aase ndoo fula kumbuii Biaa-laha-luai+ ye, kanifuule o lɛŋnde Nɛkɛbi leŋ+ niŋ o wa ichali ni. 63 A paale delaaleŋ, Aase wa balɔɔ o pollo niŋ mbo wa yiyaŋndo o sɔɔŋ choo.+ Mɛɛ o chua hɔlla, mbo cha nyɔɔmiaa hunɔɔ. 64 Mɛɛ Lubeka bɛɛ chua hɔlla, mbo cha Aase. Okoŋ mbo tual chɔ chɔ o nyɔɔmiɔɔ choo. 65 Mbo nyuna po buɛiyo aa: “Laŋunɔ kuɛɛ cho yɛ naa hoo hunɔɔ lachi nda?” Mi buɛiyo mulul ndu aa: “Masanɔ nuu ni.” Okoŋ mi Lubeka chua kola ndɔ waaŋgaa wo, mbo kuumbuŋ. 66 Mɛɛ nda fuuluu naa Aase chua, mi buɛiyo dimul Aase nyɛ o nyɛ yɔŋnuŋ. 67 Okoŋ kɔɔli, mi Aase luei Lubeka o tɛndii Sela kala ndɔ+ wo niŋ, mbo simnuŋ laa ndɔ, nduyɛ mi Aase kaala ndu tau.+ Okoŋ, mi Aase sɔla kɔl dɛɛniaa le piɔm kala ndɔ wo.+

25 Okoŋ kɔɔli, mi Ebilaham chua lanɔ cheleŋ, diolaŋ aa Kɛtulua. 2 Nduyɛ mi Kɛtulua vilul ndu Similuaŋ, Chɔkisaŋ, Midaŋ,+ Midiaŋ, Isibaki, a Suaa.+

3 Mi Chɔkisaŋ vialu Siɛba a Dɛdaŋ.

Puaa Dɛdaŋ velu wa cho haa ni: Asiuluim, Lɛtusim, a Lɛyumim.

4 Puaa Midiaŋ velu wa cho haa ni: Efa, Ɛfa, Hanɔki, Abaida, a Ɛlidaa.

Puaa haa kpou Kɛtulua velu nda ni.

5 Okoŋ kɔɔli, mi Ebilaham ke Aase nyɛ o nyɛ ndoo nɔ.+ 6 Kɛ mbo chua nyɔɔŋ ŋ tiŋ, mbo ke puaa laandaa nduaa pɔmbuaa vilul ndu wa. Ebilaham wa yoomu mbo faŋa nda Aase po ndɔ ikɛi,+ mbo yɔŋ nda o lɛŋndeŋ ba paaleŋ le chaŋ ndo. 7 Wɔsilaŋ 175 Ebilaham chii yoomu ni. 8 Ebilaham ndoo yuuwa niŋ kudɛɛ, nduyɛ mbo tuɛi yoomu ndɔɔ yeela. Okoŋ kɔɔli, mbo chua yoomuma ndɔma mɛɛlaŋ, mbo wu. Okoŋ, ma kumbu ndu maa finyaa nduaa mamaa. 9 Mi puaa nduaa, Aase nda Isimɛɛ kɔ kumbu ndu o buuloo niŋ Makipila o yondo Ɛfulɔŋ ndo niŋ, po Sohaa wo, Hitaitiinɔɔ. Nduyɛ, Mamilue ikɛi yondoo hoo cho ni.+ 10 Yondoo hoo Ebilaham ndoo pendu puaa Hɛɛti wa o ba ni. Nduyɛ, loŋ nda kumbu Ebilaham nda Sela laa ndɔ ni.+ 11 Mɛɛ Ebilaham vi, mi Mɛlɛka hiau lachi a Aase po ndɔ salaa dɔwɔɔ.+ Nduyɛ, Biaa-laha-luai+ ikɛi Aase wa ichali ni.

12 Bundɛi a Isimɛɛ+ po Ebilaham ndo okɔɔ cho hei ni, o Hakaa,+ chua Ichipiaŋnɔɔ vilul ndu wo. Nduyɛ, buɛi Sela wo Hakaa wa ni.

13 Diola puaa fula o pulale Isimɛɛ leŋ choo wa cho haa ni: Nebayɔti+ po ndɔ tasoo, okoŋ kɔɔli mbo vialu Kidaa,+ Adibɛɛ, Mibisam,+ 14 Misima, Dumaa, Masa, 15 Hadadi, Tɛma, Chɛtɔɔ, Nafisi, a Kɛdɛmaa. 16 Puaa haa kpou Isimɛɛ velu nda ni, nduyɛ bolii layuŋguei 12 nda cho o buŋgaŋ ndaŋ niŋ ni. Sɔndɔkɔlta ndalaŋ a chieeŋ ndaŋ kpou, diola ndalaŋ la cho laŋ choo ni.+ 17 Wɔsilaŋ 137 Isimɛɛ chii yoomu ni. Okoŋ kɔɔli, mbo chua yoomuma ndɔma mɛɛlaŋ, mbo wu. Okoŋ, ma kumbu ndu maa finyaa nduaa mamaa. 18 Ma kɔ kila chaltaŋ chɔŋ Havila+ haaa kɔ Asiiliaa. Suɔɔ+ ikɛi Havila cho ni, nduyɛ mi Suɔɔ bɛɛ wa Ichipi ikɛi. Mbo kila chaltaŋ pɔmbuaa nduaa kpou ikɛi.*+

19 Bundɛi a Aase, po Ebilaham ndo okɔɔ cho hei ni.+

Ebilaham velu Aase ni. 20 Aase wa wɔsilaŋ 40 mbo chua Lubeka, chua Bɛtuɛɛ wo+ o nɔɔ niŋ. Nduyɛ Bɛtuɛɛ yɛ, Aluameyaŋnɔɔ o wa ni, fulaa Padaŋ-aluam. Lubeka, yema ndɔ wa Lebaŋ ni. Ndu bɛɛ Aluameyaŋnɔɔ o wa ni. 21 Mi Aase hiau lachi a Chɛhowa nyɔɔloo le Lubeka laa ndɔ, kanifuule ndoo vilu le. Okoŋ mi Chɛhowa muli piɛile ndɔleŋ, nduyɛ mbo tosa mi Lubeka laa ndɔ chua folioo.* 22 Nduyɛ mi puaa ŋiɔɔŋaa wa ndu o dembe wa kandu sɔŋgɔɔ.+ Okoŋ mbo dimi aa: “Te o yɔŋ pɛ maa nuaa i cho ni, mɛɛ le sabu yɛɛ ya cho yɛ yoomu?” Le hei, mbo nyuna Chɛhowa a ndi okɔɔ. 23 Mi Chɛhowa dimul ndu aa: “Kaalaŋ la tiɔɔŋ la cho num o dembe ni.+ Nduyɛ, waŋnda a ŋiɔɔŋ cho num fula o dembe, okoŋ ma piɔuwaŋ.+ Kaaleŋ le pilɛ le cho hiouwɔɔ le pilɛ leŋ kpaayaa,+ nduyɛ po num tasoo cho wa pɔmbɔ ndɔ o ba bɛŋgu.”+

24 Mɛɛ teleŋ ndɔ vialaa fuuluu, pɛnduaa wa ndu o dembe ni. 25 Po tase o velu wo wa o siaŋa, nduyɛ yiiŋnde wa ndu i tiuwaa lekɔɔ silɔ, maa doma nda toosiaa a yiiŋii visioo wo.+ Okoŋ ma ke ndu diolaŋ aa Iisɔ.*+ 26 Mɛɛ nda wa pɔmbɔ ndɔ violɔɔ, mbo saa Iisɔ tɔndii kɔɔliei.+ Okoŋ mbo ke ndu diolaŋ aa Chekɔpu.*+ Aase wa wɔsilaŋ 60 mi Lubeka vialu nda.

27 Mɛɛ nda sul, mi Iisɔ simnuŋ doosunɔ kɛndɛ kɛndɛ,+ wana ndoo kaala yondoo wo. Kɛ Chekɔpu ndu, wana tɔɔyaŋ ve choo le wo o wa ni. Nduyɛ, teleŋ o teleŋ o tɛndiilaŋ niŋ o waŋnuŋ ni.+ 28 Aase ndoo kaala Iisɔ le nyɛmahilu ndoo chuu ndu mbo dia wo. Kɛ Lubeka ndu, Chekɔpu ndoo kaala ni.+ 29 Paale pilɛ, Chekɔpu wa kawuŋ lindaŋ yauwo, mi Iisɔ fula yondoo niŋ o saŋgɛiyo yɔkɔɔ. 30 Okoŋ mi Iisɔ dimul Chekɔpu aa: “Ke ya kawuŋ siaŋaŋ ŋ cho muŋ yauwo woŋ chɔ chɔ, kanifuule yiaaŋ ma cho ya bɔɔ nɛiyo!”* Le saboo hoo nda ke ndu diolaŋ ni aa Idɔm.*+ 31 Kɛ mi Chekɔpu dimul ndu aa: “Pisi ya fɛlɛŋ di ŋ nɔ maa po tase wo o ba!”+ 32 Mi Iisɔ dimi vɛlɛ aa: “Piɔmndo ya cho nuaa ni! Tɔnɔ yɛɛ kpeekpei ya cho yɛ sɔla o di ya nɔ maa po tase wo niŋ?” 33 Mi Chekɔpu dimi vɛlɛ aa: “Bala tiɔɔŋ, kɛ mɛnaŋ ndɔ fɛlɛŋ!” Okoŋ mbo mɛnaŋ, nduyɛ mbo pisi di o nɔ maa po tase wo Chekɔpu o ba.+ 34 Okoŋ kɔɔli, mi Chekɔpu ke Iisɔ beediiyo* a kawuŋ lindaŋ, mbo dia nduyɛ mbo kol. Mɛɛ o chii dio, mbo chaŋ mbo kuaŋnuŋ. Mɛɛ nuaa Iisɔ looku di ndoo nɔ maa po tase wo chua nyɛ fondo fuu ni.

26 A boondii keŋ, mi yima bɛnduaŋ ma del o lɛŋndeŋ niŋ, mɛɛ maa del o palɛi Ebilaham nde niŋ yɛ.+ Le hei, mi Aase kua Kɛlua o Abimɛlɛki lo, masa Filitiaŋnda. 2 Okoŋ mi Chɛhowa chɔɔmuŋ Aase, mbo dimul ndu aa: “Kua Ichipi le, kɛ chal o lɛŋnde ya cho num chɔm ndeŋ niŋ. 3 Chal o lɛŋnde isumialteŋ ndeŋ niŋ.+ I cho hiouwɔɔ lachi a waa a num latulu, nduyɛ mi dɔu num sala, kanifuule num a chuauwaa numnda* ya cho lɛŋnde hei kpou ke ni.+ Buŋgɛi ya chuel Ebilaham finya numnde, I cho ndi peelu.+ 4 ‘I cho tosa mi chuauwaa numnda* kui maa looŋ o choo choo niŋ.+ Nduyɛ, I cho chuauwaa numnda* lɛŋnde hei kpou ke.+ Kaalaŋ o lɛŋndeŋ choo kpou cho salaa sɔla le ndapila sanaa o chuauwaa numnda* niŋ,’+ 5 le mɛɛ Ebilaham tuei ya diom, mbo tosa nyɛ o nyɛ ya dimul ndu, nduyɛ mbo bii sawala nilaŋ kpou yɛ.”+ 6 Le hei, mi Aase hiau lachi a challe o Kɛlua+ niŋ.

7 Te puaa o fondaŋ koŋ ndaa nyuna ndu pɛ a laa ndɔ okɔɔ, mi ndoo dimi aa: “Yema nuu o cho ni.”+ Kanifuule, siooŋnde wa ndu le dimioo aa, “Laa nuu o cho ni.” Le mɛɛ Lubeka ndoo naŋ tau yɛ,+ mbo yiyaŋ maa puaa o fondaŋ koŋ cho ndu diyɔɔ le ndu. 8 Paale pilɛ, mɛɛ Abimɛlɛki, masa Filitiaŋnda wa tofaa o wundɛiyo,* mbo cha Aase Lubeka laa ndɔ kɔɔmiaŋndo.+ 9 O lepilɛ niŋ kpe, mi Abimɛlɛki veelu Aase, mbo dimul ndu aa: “Mɛɛmaa laa num kpeekpei o cho ni! Le yɛɛnɛ ŋ dimi yɛ maa yema num o cho ni?” Mi Aase dimul ndu aa: “Kanifuule, siooŋnde wa ya yɔŋii nda dii ya le ndu. Lelaŋ ya dimi lende ni.”+ 10 Kɛ mi Abimɛlɛki hiau lachi a suɛi aa: “Yɛɛnɛ ŋ tosallɛ naa hoo?+ Waŋndo o pilɛ o naa tɛɛŋ ndoo tiuba mbo tɛm a laa num. Nduyɛ num wa tosa ni mi naŋ luɛi o hakioo niŋ!”+ 11 Okoŋ, mi Abimɛlɛki hendul waŋnda kpou sawaa aa: “Wana o wana pilaŋ pɛ poo hoo nda laa ndɔ, wana koŋ nɔ mbo sɔla piɔmndo!”

12 Mi Aase kandu kulloŋ saŋɔɔ o lɛŋnde leŋ niŋ. Nduyɛ o wɔsi koŋ niŋ, mbo kuau kuluŋ o saŋ ndoŋ bɛmbɔɔ 100, kanifuule Chɛhowa wa ndu salaa dɔwɔɔ.+ 13 Mi Aase sɔla nyɔɔŋ tau tau, nduyɛ mbo sul sullo pila. 14 Mbo sɔla saa, nauwa, a buɛiya tau tau.+ Okoŋ mi Filitiaŋnda kandu ndu paŋalaa.

15 Sooŋnda mamɛŋ buɛiyaa Ebilaham finya ndɔ wa ndaa tou o palɛi nduɛi niŋndaŋ kpou,+ mi Filitiaŋnda miŋgi laŋ beŋul a puuloo. 16 Okoŋ mi Abimɛlɛki dimul Aase aa: “Faŋaŋ o tanda naa niŋ, kanifuule a nɔ niŋ kpaayaa mbo hiau naa poloŋ.” 17 Le hei, mi Aase faŋaŋ loŋ, mbo kɔ kila dɔɔŋgɔɔ o Kpoloŋndo* Kɛlua,+ mbo chalnuŋ loŋ. 18 Sooŋnda Ebilaham finya ndɔ ndoo tou, kɛ mi Filitiaŋnda beŋul taŋ o piɔm ndɔɔ kɔɔli wo,+ mi Aase kɔ miŋgi laŋ touwɔɔ. Mbo ke laŋ diolaŋ mɛɛ finya ndɔ ndoo ke laŋ diolaŋ yɛ.+

19 Mɛɛ buɛiyaa Aase wa a wa sooŋndaŋ touwɔɔ o Kpoloŋndo* niŋ, ma saaluŋ sooŋndo a mɛŋma kɛndɛ kɛndiaŋ leniŋ. 20 Mi wanaa mandaa lasaa Kɛlua kandu sɛɛŋgiaŋndo a wanaa mandaa lasaa Aase wa. Ma dimi aa: “Naŋ nɔ mɛŋndaŋ maŋ ni!” Le hei, ma ke fondaŋ koŋ diolaŋ aa Isɛki,* kanifuule ma sɛɛŋgiaŋ a ndu. 21 Ma kandu vɛlɛ sooŋ cheleŋ touwɔɔ, kɛ mi sɛɛŋgiaŋndo del nda vɛlɛ tɛɛŋ. Mbo ke sooŋ koŋ diolaŋ aa Sitina.* 22 Okoŋ kɔɔli, mbo faŋaŋ loŋ mbo kɔ tou vɛlɛ sooŋ cheleŋ. Kɛ a sɛɛŋgiaŋ lɛ o sooŋ koŋ choo le. Le hei, mbo ke ndu diolaŋ aa Luɛhoboti.* Mbo dimi aa: “Kanifuule Chɛhowa ke naa fondaa tau, nduyɛ mbo tosa miŋ kui tau o lɛŋndeŋ ndeŋ niŋ.”+

23 Okoŋ kɔɔli, mbo faŋaŋ loŋ mbo kua Biaa-siɛba.+ 24 Ichɔl koŋ, mi Chɛhowa chɔɔmuŋ Aase, mbo dimul ndu aa: “Ya cho Mɛlɛka Ebilaham finya numndo ni.+ Yɔŋ isiooŋ te,+ kanifuule I cho a num latulu. I cho num salaa dɔwɔɔ, nduyɛ mi tosa mi chuauwaa numnda* kui tau, le sabu Ebilaham buɛi nuu.”+ 25 Okoŋ mi Aase taŋgul bandu luamaa lasalaa loŋ, mbo veelu diola Chɛhowa laŋ.+ Nduyɛ mbo tuandu tɛndii ndɔɔ loŋ,+ okoŋ mi buɛiyaa nduaa tuau sooŋ mamɛŋndo loŋ.

26 Okoŋ kɔɔli, mi Abimɛlɛki mal Kɛlua nda Ahusaa, wana ndɔ silaa, vɛlɛ a Fikɔɔ, masa puaa nduaa chɔuwa,+ ma kua naa Aase chua. 27 Mi Aase dimul nda aa: “Le yɛɛnɛ nya hiŋ yɛ naa ya chua? Nyapila cho chɔɔ maa la tul la leyɛ, nduyɛ mi la soli ya o tanda nyaa niŋ.” 28 Le hei, ma dimul ndu aa: “Ŋ cho chɔɔ kpendekele maa Chɛhowa cho a num latulu.+ Lelaŋ naŋ dimi ni aa, ‘A yandii, tosa mi chɛlaŋ kɔl nyuloo wa naa tɛɛŋ naa nyaa, nduyɛ miŋ yii kpemaa a num+ 29 maa a cho naa nyɛ o nyɛ wɔɔŋ tosal te, mɛɛ naa bɛɛ tosal num nyɛ wɔɔŋ te yɛ. Numpila sina maa sɔɔŋ kɛndɔŋ naŋ wa num tosallo ni, nduyɛ miŋ soli num o tanda naa niŋ o kɔl nyulu niŋ. Suŋ suŋ niŋ, Chɛhowa dɔu num sala.’” 30 Okoŋ, mbo toosial nda nyɛdiaa ma dia, nduyɛ ma kol. 31 Ma pena chɔnɔŋ idiiyo puŋ, ma chuelnaŋ buŋgaŋ vellaa velle.+ Okoŋ kɔɔli, mi Aase mal nda ma kuaŋnuŋ, nduyɛ ma miiŋgu o nda lo o kɔl nyulu niŋ.

32 O paale leŋ choo, mi buɛiyaa Aase wa kua naa ndu chua, ma dimul ndu a sooŋ nda tou wo+ okɔɔ aa: “Ŋ komal mɛŋndaŋ.” 33 Mbo ke sooŋ koŋ diolaŋ aa Siɛbaa. Le saboo hoo chiee koŋ nɔ diolaŋ ni aa Biaa-siɛba,+ haaa a paale hauleŋ ndeŋ.

34 Mɛɛ Iisɔ fuuluu wɔsilaŋ 40, mbo chua Chuditi o nɔɔ niŋ, chua Biɛɛlui yo, Hitaitiinɔɔ. Nduyɛ mbo chua vɛlɛ Basimati o nɔɔ niŋ, chua Ɛlɔŋ ndo, Hitaitiinɔɔ.+ 35 Mi laandaa ŋiɔɔŋnda haa tɛɛmbuu Aase nda Lubeka kɔllo tau.*+

27 Aase wa niŋ o yuuwɛi nduyɛ ndoo chi lɛ lapi le. Mbo veelu po ndɔ tasoo aa: “Iisɔ+ po ni!” Mbo muli aa: “Ee kɛkɛ!” 2 Mbo hiau lachi a suɛi aa: “I yuuwa niŋ, nduyɛ I sina paale ya cho wu leŋ te. 3 Lelaŋ a yandii, chua wolɔɔla numnda le doosulaŋ, bal numndo a chiɔule numndeŋ ma kuɛ yondoo niŋ, ma kɔ nuuvial la nyɛmahiloo.+ 4 Okoŋ ma toosial la nyɛdiaa ni kɔllo, ma chuu ya mi de, mi dɔu num sala tuupa mi vi.”

5 Kɛ teleŋ Aase wa suɛi o Iisɔ po ndɔ lo wo, Lubeka wa nilaŋ yaŋɔɔ. Okoŋ mi Iisɔ kua doosuleŋ yondoo niŋ, le mbo kɔ huŋ a nyɛmahiloo.+ 6 Mi Lubeka dimul Chekɔpu po ndɔ+ aa: “I laŋga tuei finya num Iisɔ bɛ num dimullo aa, 7 ‘Chuu ya nyɛmahiloo ma toosial la nyɛdiaa ni kɔllo mi de, okoŋ mi dɔu num sala Chɛhowa o hɔl tuupa mi vi.’+ 8 Lelaŋ a yandii po nuu, yaŋ ya nilaŋ nyɛkɛndɛi, nduyɛ ma tosa nyɛ ya cho num dimul lo.+ 9 A yandii, kɔ o fondaŋ chɔluaa, ma bii chuiŋaa fɔŋnduaa kɛndɛ kɛndiaa a ŋiɔɔŋ, ma chuu ya le mi toosial finya num nyɛdiaa ndɔ kɔllo, mɛɛ o yeema ndu yɛ. 10 Okoŋ ma yoo ndu mbo de, le halikpeŋ mbo dɔu num sala tuupa mbo vi.”

11 Mi Chekɔpu dimul Lubeka kala ndɔ aa: “Wana iyiiŋndo Iisɔ bɛ ni cho ni.+ Kɛ ya, dialloŋ ya kpɔlɔkɔ. 12 Te o yɔŋ yɛ mi kɛkɛ piiliaŋ ya dialloŋ?+ O cho yiyaŋ maa mamɔɔ ya cho ndu ni, nduyɛ sala ya cho nuuviaa wo cho simnɔŋ sendioo.” 13 Mi kala ndɔ dimul ndu aa: “Po nuu, ya sendi koŋ cho wa choo ni. Num tosa tuŋ nyɛ ya dimul numndo. Kɔ chuu ya nda.”+ 14 Mi Chekɔpu kua mbo kɔ bii nda, mbo chuu kala ndɔ. Okoŋ, mi kala ndɔ toosial finya ndɔ nyɛdiaa ndɔ kɔllo, mɛɛ o yeema ndu yɛ. 15 Mi Lubeka luɛi chiɛiniŋ, mbo chua domala kɛndɛ kɛndɛla Iisɔ po ndɔ laŋ, mbo wou Chekɔpu.+ 16 Mbo chua vɛlɛ yaula chuiŋaa fɔŋnduaa, mbo wou ndu o laba a o labolo naa yiiŋii ve ndu le wa.+ 17 Okoŋ, mbo chua nyɛdiaa o toosiaa wo a beediiyo,* mbo ke Chekɔpu po ndɔ.+

18 Mbo kua a nyɛdiaa o finya ndɔ lo, mbo veelu ndu aa: “Kɛkɛ!” Mbo muli aa: “Ee, o nɛɛnɛ po nuu?” 19 Mi Chekɔpu mulul finya ndɔ aa: “Iisɔ ni, po num tasoo.+ I chii tosa mɛɛ ŋ dimul la yɛ. A yandii, chɔŋ ma de nyɛdiaa ya toosiaa wo, okoŋ ma dɔu ya sala.”+ 20 Mi Aase nyuna po ndɔɔ aa: “Po nuu, vɛɛnɛ ŋ looku yɛ ndu keleŋa saalɔŋ nuaa?” Mbo muli aa: “Kanifuule Chɛhowa Mɛlɛka numndo mala ya ni mi saaluŋ ndu.” 21 Okoŋ mi Aase dimul Chekɔpu aa: “A yandii po nuu, sɔɔŋguu wɔ ya ikɛi mi piiliaŋ num, le sinaa te num kɛsɛ cho Iisɔ ni ɔɔ te o cho num te.”+ 22 Mi Chekɔpu sɔɔŋguu Aase finya ndɔ ikɛi, mi finya ndɔ piiliaŋ ndu. Okoŋ mbo dimi aa: “Diomndo num maa diom Chekɔpu wo, kɛ balaŋ num maa bala Iisɔ laŋ.”+ 23 Finya ndɔ bii bila maa ndu le, kanifuule yiiŋnde wa ndu o balaŋ maa Iisɔ bɛ ndɔ. Okoŋ mbo duau ndu sala.+

24 Okoŋ kɔɔli mbo nyuna ndu vɛlɛ aa: “Baa num kpeekpei cho Iisɔ po ni ni?” Mbo muli aa: “Ei.” 25 Mbo dimul ndu aa: “Po nuu, ke ya nyɛmahilu ŋ hiŋ ndo mi de, mi dɔu num sala.” Okoŋ mbo ke ndu mbo dia, nduyɛ mbo chuu ndu vɛlɛ muɛiyaŋ mbo kol. 26 Mi Aase dimul ndu aa: “A yandii po nuu, sɔɔŋguu wɔ ya ikɛi, ma sɔsa ya kuuwo.”+ 27 Mi Chekɔpu sɔɔŋguu Aase ikɛi mbo sɔsa ndu kuuwo, nduyɛ mbo bii domala ndɔlaŋ hueiye.+ Okoŋ mbo duau ndu sala, mbo dimi aa:

“Aa ma che! Po nuu cho chuŋndo naŋ chaa yondo Chɛhowa dɔu sala wo ni. 28 Maa Mɛlɛka tonyaa ke num mɔmndo fulaa o choo choo niŋ,+ a lɛŋnde naŋ nyɔɔŋ ndeŋ o chieeŋndo choo fɔ.+ Nduyɛ mbo ke num kulloŋ tau, a muɛima sɛnɛiyaŋ.+ 29 Maa waŋnda wa num o ba bɛŋgu, nduyɛ mi kaalaŋ la beŋ num wulaŋ fɔ. Wa masaa pɔmbuaa numnda choo, nduyɛ mi puaa kala numnda beŋ num wulaŋ.+ Wana o wana handu num sendioo choo pɛ, sendioo cho wa wana koŋ choo. Nduyɛ wana o wana dɔu num sala pɛ, salaa cho wa wana koŋ choo.”+

30 Dimioo nuaa Aase chii Chekɔpu salaa dɔwɔɔ, nduyɛ mi Chekɔpu mɛi ndu mbo fulaŋ, mi Iisɔ bɛ ndɔ fula doosuleŋ yondoo niŋ.+ 31 Mi ndu bɛɛ toosial finya ndɔ nyɛdiaa ndɔ kɔllo mbo chuu ndu. Mbo dimul finya ndɔ aa: “Kɛkɛ, chɔŋ ma de nyɛmahilu ya po numndo chuu num ndo, okoŋ ma dɔu ya sala.” 32 Mi Aase finya ndɔ nyuna ndu aa: “Num nɛɛnɛ?” Mbo muli aa: “Ya Iisɔ ni, po num tasoo.”+ 33 Mi Aase kandu nyiiyaa kpa kpa, mbo dimi aa: “Mɛɛ o nɛɛnɛ kpeekpei kɔ tosa yɛ doosuleŋ mbo chuu ya nyɛmahiloo? I chii ndu niŋ dio, mi duau wana koŋ sala tuupa ma huŋ. Nduyɛ salaa cho ndu wa choo kɛsɛ!”

34 Mɛɛ Iisɔ tuei nyɛ finya ndɔ dimi wo, mbo kandu chaŋndo choo choo kpeleŋ o kɔl tambɛi bɛndoo niŋ. Mbo dimul finya ndɔ aa: “Yandii kɛkɛ, dɔu ya sala. Ya bɛɛ dɔu ya sala!”+ 35 Kɛ mbo dimi aa: “Pɔmbɔ num huŋ hui ya ni mi duau ndu sala cho le num ndo.” 36 Okoŋ mbo dimi aa: “Le sabu koŋ kpeekpei nda ke ndu diolaŋ ni aa Chekɔpu.* Foofola nilaŋ la tiɔɔŋ kpulukuu o chua ni.+ O chua di ya nɔ le waa po tasoo wo,+ a sala ya nɔ le sɔlaa wo!”+ Mbo nyuna vɛlɛ aa: “Mɛɛ a nɔ lɛ sala cheleŋ le ya le?” 37 Kɛ mi Aase mulul Iisɔ aa: “I yulu ndu iso le mbo wa num choo masa,+ nduyɛ mi dimul ndu maa pɔmbuaa nduaa kpou cho wa buɛiya le ndu. Mi duau ndu vɛlɛ sala le mbo sɔla kulloŋ a muɛima sɛnɛiyaŋ.+ Yɛɛ kpeekpei lo yɛ vɛlɛ le mi ke num po nuu?”

38 Mi Iisɔ nyuna finya ndɔ aa: “Kɛkɛ, mbo wa maa salaa o pilɛ kpe ŋ nɔ ni? Yandii kɛkɛ, dɔu ya sala. Ya bɛɛ dɔu ya sala!” Okoŋ mi Iisɔ mal yioo choo choo kpeleŋ, nduyɛ mbo tusi mɛmiaŋ kpasu kpasu.+ 39 Mi Aase finya ndɔ dimul ndu aa:

“Kɛsiŋ o kɔl maa a cho ichali o lɛŋnde naŋ nyɔɔŋ ndeŋ niŋ te, nduyɛ a cho sɔla mɔm fula o choo choo niŋndo le.+ 40 Muɛi num ii faŋnde cho wa tiindaŋ numndo ni,+ nduyɛ a cho wa pɔmbɔ num o ba bɛŋgu.+ Kɛ te a saŋga pɛ a biuwɔŋndo, a cho yɔm ndɔ cho num o ikɛsu wo yomɔɔ.”+

41 Le hei, mi Iisɔ tul Chekɔpu leyɛ, le mɛɛ finya ndɔ dɔu ndu sala yɛ.+ Iisɔ wa dimioo o kɔl niŋ aa: “Palɛi finya nuu cho yoomu ve lo lɛ i bɔɔ le.+ Nduyɛ te ŋ chii ndu dɔɔ pɛ kumbɔɔ, I cho Chekɔpu pɔmbɔ ni diyɔɔ.” 42 Mɛɛ nda dimul Lubeka a nyɛ Iisɔ kɛɛsiaa le tosaa wo okɔɔ, o lepilɛ niŋ kpe, mbo veelu Chekɔpu po ndɔ, mbo dimul ndu aa: “Yaŋ nilaŋ! Iisɔ bɛ num cho kɛɛsiaa le num diyɔɔ, mbo miŋgul num maa.* 43 Lelaŋ a yandii po nuu, tosa nyɛ ya cho num dimul lo. Chɔŋ ma nyaanuŋ Haluaŋ, o Lebaŋ yema ni lo.+ 44 Kɔ wa ndu o bɛŋgu choo haaa mi bɛ num pɔlul tiŋ kɔllo. 45 Nduyɛ, te bɛ num pɔlul pɛ kɔllo mbo puɛɛnuŋ a nyɛ o nyɛ ŋ tosal ndu, I cho yooŋgu le num ma miiŋgu nanuŋ. Kanifuule I yeema mi nya ŋiɔɔŋ kpou hɛluŋ ya o paale pilɛ leŋ choo le.”

46 Mi Lubeka hiau lachi a Aase dimullo aa: “Chuaa laanduaa Hɛɛti wa+ haa tosa mi kɔl nuu luɛi o saŋgaa niŋ. Fɛɛŋ bɛɛ te Chekɔpu chua pɛ lanɔɔ chuaa laanduaa Hɛɛti wa tɛɛŋ maa haa o lɛŋndeŋ ndeŋ niŋ, mɛɛ o wa fisa mi vi.”+

28 Okoŋ mi Aase veelu Chekɔpu, mbo duau ndu sala, nduyɛ mbo sila ndu aa: “A nɔ ma chua lanɔɔ chuaa laanduaa Kenanaitiiya+ tɛɛŋ te. 2 Kɔ Padaŋ-aluam o Bɛtuɛɛ finya num mama lo, ma kɔ chua chuauwaa Lebaŋ bom numnda o pilɛ o nɔɔ niŋ.+ 3 Mɛlɛka Kpaaya Kpou Kpou Wo cho num salaa dɔwɔɔ, nduyɛ mbo tosa ma kui tau tau, okoŋ ma simnuŋ waŋnda kunda bɛndoo.+ 4 Nduyɛ num a chuauwaa numnda,* o cho nya dɔwɔɔ sala o dɔu Ebilaham ndo.+ Lɛŋnde isumialte ŋ cho leŋ niŋ mbo ke Ebilaham ndeŋ, le cho simnɔŋ nyɛ num.”+

5 Okoŋ mi Aase mal Chekɔpu, mbo kua Padaŋ-aluam o Lebaŋ ndo, po Bɛtuɛɛ wo, Aluameyaŋnɔɔ.+ Lebaŋ yɛ, yema ndɔ wa Lubeka ni,+ kalaa Chekɔpu nda Iisɔ.

6 Mi Iisɔ cha maa Aase dɔu Chekɔpu sala, nduyɛ mbo mal ndu mbo kua Padaŋ-aluam le mbo kɔ chua lanɔɔ loŋ. Mbo cha vɛlɛ maa mɛɛ o dɔu ndu sala, mbo sila ndu aa: “A nɔ ma chua lanɔɔ chuaa laanduaa Kenanaitiiya+ tɛɛŋ te.” 7 Mbo cha vɛlɛ maa Chekɔpu diikuŋ finya ndɔ a kala ndɔ, mbo kua Padaŋ-aluam.+ 8 Okoŋ, mi Iisɔ sina maa chuaa laanduaa Kenanaitiiya cho Aase finya ndɔ kɔllo tɛɛmbuuwo.+ 9 Le hei, mi Iisɔ mal mbo kua o Isimɛɛ lo, po Ebilaham ndo, mbo kɔ chua Mahalati chua ndɔ, yemaa Nebayɔti o nɔɔ niŋ. O fulawɔ o chuaa hoo kɔɔli, Iisɔ ndoo nɔ niŋ laanduaa cheleŋ.+

10 Mi Chekɔpu mal Biaa-siɛba, mbo wa kɔlaŋ ba Haluaŋ ndo.+ 11 Mɛɛ o fuuluu o fondaŋ pilɛ, mbo kɛɛsiaa le mbo lɔl loŋ kanifuule paaleŋ lee del niŋ. Okoŋ mbo chua pouwo o pilɛ o pouta wa loŋ ndaŋ tɛɛŋ, mbo kɛsi le mbo handu bolleŋ lechoo, mbo hini loŋ.+ 12 Okoŋ mbo sɔl luaŋ, mbo cha kpeŋgba kaa o simiaa, chɔŋ lɛŋ haaa mbo fuuluu choo choo di. Nduyɛ, maalikɛiyaa Mɛlɛkaa wa helɔɔ ma tual o ndu choo.+ 13 Chɛhowa wa o kpeŋgba kaa koŋ tullo, mbo dimi aa:

“Ya cho Chɛhowa, Mɛlɛka Ebilaham finya num mamaa, a Mɛlɛka Aase finya numndo ni.+ Lɛŋnde ŋ cho leŋ ihini choo leŋ, num a chuauwaa numnda*+ ya cho leŋ ke ni. 14 Chuauwaa numnda* cho kui maa chundoo o lɛŋndeŋ choo.+ Nduyɛ, tanda numndo cho pɛŋgɛlaŋ chɔŋ ba paaleŋ le chaŋ ndo, mbo kuɛ ba le del lo, ba luaŋ ndo, a ba tou wo. Nduyɛ, yuŋgulaŋ o lɛŋndeŋ choo kpou cho salaa sɔla* sanaa a num, vɛlɛ a chuauwaa numnda.*+ 15 I cho wa a num latulu, nduyɛ I cho num manda ba o ba ŋ kuɛ pɛ. I cho num miŋgi pila o lɛŋndeŋ ndeŋ niŋ,+ nduyɛ I cho wa a num latulu haaa mi peelu buŋgɛi ya chuel num nde.”+

16 Mɛɛ Chekɔpu tendu o luaŋ, mbo dimi aa: “A tonya kpeekpei, Chɛhowa cho o fondaa hoo, I sina bɛɛ pɛŋ te.” 17 Mi siooŋnde bii ndu tau, okoŋ mbo dimi aa: “Fondaa hoo cho bɔɔ fonda kɔndɔfili bɛndu! Chiɛi Mɛlɛkaa kpeekpei cho hoo ni,+ nduyɛ nanuŋ dio kpakioo cho ni le choo choo.”+ 18 Mi Chekɔpu pena chɔnɔŋ idiiyo puŋ, mbo chua pou ndoo handu bolleŋ lechoo wo, mbo simi ndu maa tamasi, okoŋ mbo tala chuɛiyaŋ lechoo.+ 19 Mbo ke fondaŋ koŋ diolaŋ aa Bɛtɛl.* Kɛ nduyɛ, chiee wa ikɛi loŋ ndo ndoo nɔ diolaŋ ni aa Luusi.+

20 Mi Chekɔpu chua buŋgɛi, mbo dimi aa: “Te Mɛlɛka hiou pɛ lachi a waa a ya latulu, mbo manda ya o kela nuu niŋ, mbo ke ya nyɛdiaa* a nyɛ chuɛɛnaŋndo, 21 nduyɛ mbo tosa mi miiŋgu o kɔl nyulu niŋ o yuŋgu finya nuu lo, mɛɛ Chɛhowa cho chɔm kpendekele maa ndu cho Mɛlɛka nuu ni. 22 Okoŋ pou ya simi hoo maa tamasi wo cho simnɔŋ chiɛi Mɛlɛkaa.+ Nduyɛ nyɛ o nyɛ ŋ ke ya pɛ, fɛɛŋ bɛɛ I kɛɛ le num o tɔ ndɔɔ kioo le.”

29 Okoŋ kɔɔli, mi Chekɔpu hiau lachi a kɔlaŋ. Mbo kua o wanaa wa o lɛŋndeŋ Ba Paaleŋ Le Chaŋ Ndo wa lo. 2 Mɛɛ o fuuluu loŋ, mbo cha sooŋ mamɛŋndo o pollo niŋ. Saa wa ihini ikɛi kundalaŋ la yaa, kanifuule loŋ ndaa ke saa mɛŋndaŋ ni le ma kol. Nduyɛ, pou bɛndoo wa o kɛsiaa o sooŋ koŋ sondoo. 3 Te saa kpou ndaa chuuŋgiaŋ pɛ naapilɛ, a nyindu pou wa o sooŋndo sondoo wo, a ke saa mɛŋndaŋ a kol. Okoŋ kɔɔli, a miŋgi pouwo nyindɔɔ o sooŋndo sondoo.

4 Mi Chekɔpu nyuna nda aa: “Chaaŋaa niaa, kuɛɛnɛ nya fula yɛ?” Ma muli aa: “Haluaŋ+ naŋ fula ni.” 5 Mbo nyuna nda aa: “La sina pa Lebaŋ,+ po mama Nahɔɔ wo?”+ Ma muli aa: “Ei, ŋ sina ndu.” 6 Mbo nyuna nda vɛlɛ aa: “Baa o cho pa kɛndɛ?” Ma muli aa: “Ei, o cho kɛndɛ. Nuawɔ pɛŋ Luechɛɛ+ chua ndɔ hunɔɔ a saa!” 7 Mbo dimul nda aa: “Paaleŋ le cho wɔ tau. Nduyɛ, teleŋndo fuuluu wɔ le chɔluaa chuuŋgiaa naapilɛ le. La ke nda mɛŋndaŋ, mi la mal nda ma kuɛ diolaŋ.” 8 Kɛ ma dimul ndu aa: “Ŋ nɔ di miŋ tosa keŋ te. Mɛɛ mi chɔluaa chuuŋgiaŋ naapilɛ kpou, malaŋ naŋ faŋa pouwo o sooŋndo sondoo, miŋ ke nda mɛŋndaŋ ma kol.”

9 Chekɔpu lo suukaŋndo a nda, mi Luechɛɛ huŋ a saa finya ndɔ wa. Nduyɛ wana mandaa lasaa Luechɛɛ wa ni. 10 Mɛɛ Chekɔpu che Luechɛɛ, chua Lebaŋ bom ndɔ wo a saa finya ndɔ wa, o lepilɛ niŋ kpe mbo kɔ nyindu pou wa o sooŋ mamɛŋndo sondoo wo, mbo ke saa Lebaŋ nda mɛŋndaŋ ma kol. 11 Okoŋ mi Chekɔpu sɔsa Luechɛɛ kuuwo, mbo chaŋ tau nduyɛ mbo tusi mɛmiaŋ kpasu kpasu. 12 Mi Chekɔpu kandu Luechɛɛ tɛɛsiallo maa wanayɛi finya ndɔ ve o cho ni, nduyɛ maa Lubeka velu ndu ni. Okoŋ mi Luechɛɛ nyaanuŋ, mbo kɔ dounuŋ finya ndɔ kona.

13 Dimioo nuaa Lebaŋ+ tuei yooŋgoo a Chekɔpu po yema ndɔ wo okɔɔ, mbo mal a kiltaŋ mbo kua naa ndu chua. Okoŋ mbo demul ndu, mbo sɔsa ndu kuuwo, nduyɛ mbo kua a ndu o ndu lo chiɛiniŋ. Mi Chekɔpu kandu Lebaŋ konaa dounɔŋndo a nyɛ o nyɛ yɔŋnuŋ ndu okɔɔ. 14 Mi Lebaŋ dimul Chekɔpu aa: “Wanayɛi nii kpeekpei ŋ cho ni.”* Nduyɛ le paŋgei kpulukuu Chekɔpu wa ndu o bɛŋgu choo.

15 Mi Lebaŋ dimul vɛlɛ Chekɔpu aa: “Le mɛɛ ŋ cho wanayɛi nii yɛ,+ o bɛnda ma tosal la wali fondoo le. Dimul la, vɛɛnɛ ya paawa* yɛ num?”+ 16 Lebaŋ ndoo nɔ chuaa laanduaa a ŋiɔɔŋ. Kaasoŋnɔɔ ndoo nɔ diolaŋ ni aa Liya, nduyɛ pɔmbɔ ndɔ wa Luechɛɛ ni.+ 17 Liya ndoo niŋ lapi le.* Kɛ Luechɛɛ ndu, naŋɔɔ pila ndoo naŋ ni. Wanaa che ndu dɔɔ pɛ nyɔɔ hɛnaŋ num. 18 Chekɔpu ndoo nɔ niŋ kaala Luechɛɛ wo o kɔl. Le hei, mbo dimi aa: “I chɛl mi tosal num wallo le wɔsilaŋ la ŋɔmmɛu le Luechɛɛ chua num.”+ 19 Okoŋ mi Lebaŋ dimi aa: “Yɔŋii ya ke ndu wana pɔnɔ cheleŋ yɛ, o bɛnda mi ke num ndu. Wa ya o bɛŋgu choo.” 20 Mi Chekɔpu tosa wallo wɔsilaŋ la ŋɔmmɛu le Luechɛɛ.+ Kɛ le mɛɛ ndoo kaala ndu yɛ, wɔsila laŋ la wa ko ndu o hɔl maa palɛi biŋgi.

21 Okoŋ mi Chekɔpu dimul Lebaŋ aa: “Ke ya laa nuu mi hiviŋ ndu kɔɔli, kanifuule teleŋ naŋ chɛlaŋ choo wo chuu.” 22 Le hei, mi Lebaŋ chuuŋgiaa wanaa wa loŋ nda kpou, mbo tosa dunyɛi. 23 Kɛ ichɔl koŋ, mbo chua Liya chua ndɔ mbo you Chekɔpu le mbo hiviŋ ndu kɔɔli. 24 Okoŋ kɔɔli, mi Lebaŋ chua vɛlɛ Silipa buɛi ndɔ laandoo mbo ke Liya chua ndɔ, le mbo wa buɛi ndɔɔ.+ 25 Idiiyo, mi Chekɔpu saaluŋ maa Liya o hiviŋ kɔɔli ni. Mbo nyuna Lebaŋ aa: “Le yɛɛnɛ ŋ tosallɛ ya hei? Baa o cho le Luechɛɛ le ya tosal num wallo le? Le yɛɛnɛ ŋ hui yɛ ya?”+ 26 Mi Lebaŋ mulul ndu aa: “O naamu naa niŋ, ŋ kɛsi chuaambɔɔ o nɔɔ bɛ ndɔ tase le. 27 La siou niko lɔɔ hoo nya chuaa hoo latulu, mi ke num chua nuu o pilɔɔ ma tosal la vɛlɛ wallo le wɔsilaŋ la ŋɔmmɛu.”+ 28 Mi Chekɔpu chɛl, nduyɛ mbo siou lɔɔ koŋ latulu nda Liya. Okoŋ kɔɔli, mi Lebaŋ ke ndu vɛlɛ Luechɛɛ chua ndɔ le mbo wa laa ndɔ. 29 Nduyɛ, mi Lebaŋ chua buɛi ndɔ laandoo Bilihaa,+ mbo ke Luechɛɛ chua ndɔ le mbo wa buɛi ndɔɔ.+

30 Okoŋ mi Chekɔpu hiviŋ Luechɛɛ kɔɔli, nduyɛ mbo kaala ndu tau mbo hiau Liya. Mi Chekɔpu tosal vɛlɛ Lebaŋ wallo le wɔsilaŋ la ŋɔmmɛu.+ 31 Mɛɛ Chɛhowa che maa Chekɔpu kaala Liya le,* mbo tosa mi Liya chua folioo.*+ Kɛ Luechɛɛ ndu, ndoo vilu le.+ 32 Mi Liya chua folioo mbo vialu poo. Mbo ke ndu diolaŋ aa Lubɛŋ.*+ Mbo dimi aa: “Chɛhowa che kɔl ni tambɛiyo.+ Nduyɛ suŋ suŋ niŋ, pɔnɔ nuu cho ya kandɔɔ kaalaa chɔmndo.” 33 Mi Liya chua vɛlɛ folioo mbo vialu poo. Mbo ke ndu diolaŋ aa Simiɔŋ.*+ Mbo dimi aa: “Chɛhowa yaŋ ya nilaŋ, le mɛɛ pɔnɔ nuu kaala ya le yɛ. Lelaŋ o ke ya vɛlɛ hoo ni.” 34 Mi Liya chua vɛlɛ folioo mbo vialu poo. Mbo ke ndu diolaŋ aa Livai.*+ Mbo dimi aa: “Suŋ suŋ niŋ, pɔnɔ nuu cho ya holnɔŋ, kanifuule I vilul ndu puaa a yaa.” 35 Okoŋ kɔɔli, mbo chua vɛlɛ folioo mbo vialu poo. Mbo ke ndu diolaŋ aa Chuda.*+ Mbo dimi aa: “O laŋ niŋ, I cho Chɛhowa saŋgala.” Okoŋ mbo pɛŋgi violɔɔ.

30 Mɛɛ Luechɛɛ che maa o cho Chekɔpu chua vilul te, mbo kandu Liya bɛ ndɔ paŋalaa. Okoŋ mbo dimul Chekɔpu aa: “Ke ya chuauwa, te o cho koŋ te, I cho wu.” 2 Le hei, mi Chekɔpu duaunuŋ tumbe o kala kala a Luechɛɛ. Mbo nyuna ndu aa: “Baa ya cho Mɛlɛka ni le mi kuuna num chuauwa violɔɔ?” 3 Okoŋ mi Luechɛɛ dimul ndu aa: “Mɛɛ, a che buɛi ni laandoo Bilihaa.+ Hiviŋ ndu kɔɔli, le halikpeŋ mbo vilul la chuauwa, okoŋ mi ya bɛɛ sɔla chuauwa sanaa o ndu niŋ.” 4 Mi Luechɛɛ ke Chekɔpu Bilihaa le mbo wa laa ndɔ, nduyɛ mbo hiviŋ ndu kɔɔli.+ 5 Mi Bilihaa chua folioo,* okoŋ mbo vilul Chekɔpu poo. 6 Mi Luechɛɛ dimi aa: “Mɛlɛka suŋgu le ya mbo yaŋ nilaŋ o piɛile nileŋ, nduyɛ mbo ke ya poo.” Le sabu koŋ o ke ndu diolaŋ ni aa Daŋ.*+ 7 Mi Bilihaa, buɛi Luechɛɛ wo chua vɛlɛ folioo, mbo vilul Chekɔpu po diiŋ ndɔɔ. 8 Mi Luechɛɛ dimi aa: “I chiŋalaŋ bɛ nuu chiŋalaŋndo pila a sɔŋgɔɔ, nduyɛ mi yam ndu!” Okoŋ mbo ke ndu diolaŋ aa Nafitalii.*+

9 Mɛɛ Liya che maa o pɛŋgi chuauwa violɔɔ, mbo chua buɛi ndɔɔ Silipa mbo ke Chekɔpu le mbo wa laa ndɔ.+ 10 Mi Silipa, buɛi Liya wo vilul Chekɔpu poo. 11 Mi Liya dimi aa: “Nuawɔ se dɛnɛ kɛndɛ bɛndu!” Okoŋ mbo ke ndu diolaŋ aa Kaadi.*+ 12 Okoŋ kɔɔli, mi Silipa buɛi Liya wo vilul Chekɔpu po diiŋ ndɔɔ. 13 Mi Liya dimi aa: “I cho bɔɔ a kɔl kɛndɛ! Kanifuule, waŋ laanduaa cho dimi maa I cho a kɔl kɛndɛ.”+ Okoŋ mbo ke ndu diolaŋ aa Asia.*+

14 Lubɛŋ+ lo balɔɔ yondoo niŋ a boondii nda kuau witiiyoŋ nde, mbo saaluŋ manduluiyaŋ* o pollo niŋ, mbo chuu Liya kala ndɔ. Okoŋ mi Luechɛɛ dimul Liya aa: “A yandii, ke ya manduluima po numndo chuu num ndaŋ ma tiŋ.” 15 Mi Liya nyuna ndu aa: “Baa a hini wɔ kɔl a pɔnɔ ni ŋ puu ya o ba wo le?+ Baa manduluima po nuu ŋ yeema vɛlɛ ni ma puu ya o ba?” Mi Luechɛɛ dimi aa: “Bala tiɔɔŋ. Mɛɛ la kɔ lɔl chuɛllɛŋ nya Chekɔpu sɔŋgɔ manduluima po numndo.”

16 Mɛɛ Chekɔpu wa fulaa o pollo niŋ a paale delaaleŋ, mi Liya kua ndu lachi, mbo dimul ndu aa: “Naa num cho lɔl chuɛllɛŋ ni, kanifuule I paawa* Luechɛɛ a manduluima po nuu le miŋ kɔ lɔl chuɛllɛŋ naa num.” Ichɔl koŋ, mi Chekɔpu wa a Liya. 17 Mi Mɛlɛka muli piɛile Liya leŋ, okoŋ mbo chua folioo, mbo vilul Chekɔpu po ŋuɛɛnu ndɔɔ. 18 Mi Liya dimi aa: “Mɛlɛka ke ya paawa nuu, kanifuule I chua buɛi nuu mi yɔŋgu pɔnɔ nuu.” Okoŋ mbo ke ndu diolaŋ aa Isaka.*+ 19 Mi Liya chua vɛlɛ folioo, mbo vilul Chekɔpu+ po ŋɔmpum ndɔɔ. 20 Okoŋ mi Liya dimi aa: “Mɛlɛka dɔu ya bɔɔ sala, a tonya, o dɔu ya bɔɔ sala. Suŋ suŋ niŋ, pɔnɔ nuu cho ya hɔlla mulul,+ kanifuule I vilul ndu puaa a ŋɔmpum.”+ Okoŋ mbo ke ndu diolaŋ aa Sɛbulɔŋ.*+ 21 Okoŋ kɔɔli, mbo vialu wana lanɔɔ, mbo ke ndu diolaŋ aa Daina.+

22 O mɛɛlulaŋ kpɔŋ, mi Mɛlɛka mulul Luechɛɛ hɔlla, nduyɛ mbo tuɛi piɛile ndɔleŋ. Mbo tosa mbo chua folioo.*+ 23 Mɛɛ Luechɛɛ chua folioo, mbo vialu poo. Mbo dimi aa: “Mɛlɛka faŋa ya siɔmbulaŋ o hɔl!”+ 24 Mbo ke ndu diolaŋ aa Choosɛ.*+ Mbo dimi aa: “Chɛhowa chɔɔlu ya vɛlɛ po cheleŋ.”

25 Mɛɛ Luechɛɛ velu Choosɛ, mi Chekɔpu dimul Lebaŋ aa: “Mal la niko I miiŋguŋ o lɛŋnde nileŋ niŋ.+ 26 Ke ya laandaa niaa, a chuauwaa niaa ya tosal num wallo le nda wa mi kuɛŋnuŋ. Kanifuule, numpila sina mɛɛ kpɛ ya tosal num wallo yɛ.”+ 27 Okoŋ mi Lebaŋ dimul ndu aa: “A yandii, te I cho pɛ wana sɔvɛ num o hɔl, mɛɛ lo ya o bɛŋgu choo. Kanifuule, I che niŋ kpendekele* maa Chɛhowa cho ya salaa dɔwɔɔ sanaa a num.” 28 Mbo dimi vɛlɛ aa: “Chɔm ya mɛɛ ya nɔ le num paawaa yɛ, okoŋ mi paawa num.”+ 29 Mi Chekɔpu dimul ndu aa: “Numpila sina mɛɛ kpɛ ya tosal num wallo yɛ, nduyɛ a mɛɛ chɔluaa numnda kui ya o ba yɛ.+ 30 Tuupa mi huŋ num o bɛŋgu choo, num oo nɔ chɔluaa bɔɔ le. Kɛ suŋ suŋ niŋ, chɔluaa numnda kui tau tau, nduyɛ Chɛhowa dɔu num sala chɔŋ a teleŋ ya hiŋ naŋnuŋ ndo. Mɛɛ boondii kuɛɛ ya cho yɛ nyɛ tosa le yuŋgu nuu?”+

31 Okoŋ, mi Lebaŋ nyuna ndu aa: “Yɛɛnɛ ya ke yɛ num?” Mi Chekɔpu muli aa: “A nɔ ma ke ya nyɛ o nyɛ le! Kɛ nyɔɔ o pilɛ kpe ya yeema num ni ma tosal la, okoŋ mi hiou lachi a chɔluaa numnda mandaa.+ 32 I cho hau balɔɔ chɔluaa numnda tɛɛŋ kpou. Saa kɛ kɛ cho o ponyɛi o saa laanduaa tɛɛŋ, a saa kɛ kɛ cho tiŋ o tiŋi o saa fɔŋnduaa piaanduaa tɛɛŋ, vɛlɛ a chuiŋ laandu kɛ kɛ cho o ponyɛi, hɛli nda ma dii nda naapilɛ. Chɔŋ hau kɔ kɛ, nda cho wa paawa nuu ni.+ 33 Nduyɛ te a hiŋ pɛ o chilaŋ niŋ le chɔluaa ŋ paawa ya wa mɛɛndaŋndo, a cho sina a sandii nii okɔɔ. Saa niaa a chuiŋaa niaa kpou, te a saaluŋ pɛ o kɛ kɛ mbo ve o ponyɛi ɔɔ mbo wa tiŋ o tiŋi le, mɛɛ viileŋ ya tosa ni.”

34 Mi Lebaŋ dimi aa: “Keŋ bɛnda bɔɔ! I chɛl nyɛ ŋ dimi wo.”+ 35 O paale leŋ choo, mi Lebaŋ hɛli chuiŋaa piaanduaa kɛ kɛ ndaa nɔ tindiaŋ a chuiŋaa laanduaa wa a ponyɛiya, vɛlɛ a saa fɔŋnduaa wa tiŋ a tiŋi, nduyɛ ma nɔ poŋgaŋ humboŋ nda kpou, mbo ke puaa nduaa le ma manda. 36 Okoŋ kɔɔli, mi Lebaŋ faŋa chɔluaa kaŋ Chekɔpu ikɛi, mbo kuaŋnuŋ a nda landaŋ le kɔla tiŋ palɛi yaa. Nduyɛ chɔluaa lo loŋ le Lebaŋ nda, mi Chekɔpu koma lo nda mandaa.

37 Okoŋ, mi Chekɔpu kialu lɛuwuŋ yɔm sitoluɛɛ wo, yɔm amɔŋ ndo, a yɔm pilanɛɛ wo, mbo peeŋguu ndi o fondaŋndaŋ lapum, nduyɛ mi buŋgaŋ humboŋ fula wakpa. 38 Mbo kɛsi lɛuwuŋ yɔmii o peeŋguu keŋ nde o fondaŋnda nda dou chɔluaa mɛŋndaŋ ndaŋ lachi. Nduyɛ o yɔmii keŋ lachi chɔluaa ndaa huŋ helɔɔ ni, a boondii nda huŋ kolɔɔ ve.

39 Te chɔluaa haa ndaa hel pɛ lɛuwuŋ yɔmnde hei lachi, a kom chuauwaa nɔ tindiaŋ nda, a ponyɛiya, a chuauwaa nɔ poŋgaŋ nda. 40 Okoŋ mi Chekɔpu piɔu saa fɔŋnduaa. Mbo chua chɔluaa nɔ tindiaŋ nda, a chɔluaa wa tiŋ a tiŋi wa kpou, mbo kɛsi nda chɔluaa Lebaŋ nda lachi. Okoŋ kɔɔli, mbo piɔu chɔluaa nduaa tɛɛŋ a chɔluaa Lebaŋ nda, yɔŋii nda muuliaŋ. 41 Teleŋ o teleŋ chɔluaa chelulɛiya ndaa wa pɛ helɔɔ, Chekɔpu chua lɛuwuŋ yɔmii o toosiaa keŋ nde, o kɛsi nda lachi o fondaŋnda ndaa dou chɔluaa mɛŋndaŋ ndaŋ, le ma wa yɔmii keŋ tofaa te a wa pɛ helɔɔ. 42 Kɛ te chɔluaa nyawɛiya ndaa wa pɛ helɔɔ, Chekɔpu ndoo kɛsi lɛuwuŋ yɔmii keŋ loŋ te. Le hei, chɔluaa nyawɛiya kinɛi, Lebaŋ ndoo nɔ nda ni. Kɛ a chelulɛiya kpou, Chekɔpu ndoo nɔ nda ni.+

43 Nduyɛ, mi Chekɔpu sul sullo pila. Mbo sɔla chɔluaa tau tau, buɛiyaa piaanduaa a buɛiyaa laanduaa, nyɔɔmiaa, vɛlɛ a sofɛliaa.+

31 A teleŋ pilɛ, mi Chekɔpu tuɛi nyɛ puaa Lebaŋ nda wa dimioo wo aa: “Nyɛ o nyɛ finya naa nɔ, Chekɔpu chii chua kpou. Nyɛm finya naa tosa ni mi Chekɔpu sul sul bɛndoo hoo.”+ 2 Mi Chekɔpu cha Lebaŋ o lahɔl maa o siŋga yiyaŋ ndoo nɔ a ndu okɔɔ wo.+ 3 O mɛɛlulaŋ kpɔŋ, mi Chɛhowa dimul Chekɔpu aa: “Miiŋgu o lɛŋnde finyaa num aa mamaa niŋ, a o wanayaŋ numndoŋ lo.+ Nduyɛ I cho hiouwɔɔ lachi a waa a num latulu.” 4 Okoŋ, mi Chekɔpu yɔŋ yooŋgoo naa Luechɛɛ nda Liya chua, le ma hiŋ naa o wa chɔluaa nduaa mandaa o pollo niŋnda. 5 Mbo dimul nda aa:

“I cho chɔɔ maa yiyaŋ finya nya ndoo nɔ a ya okɔɔ wo siŋgaŋ.+ Kɛ Mɛlɛka finya nuu cho a ya latulu.+ 6 Nyapila sina mɛɛ ya tosal finya nya wallo a kpaaya nuu kpou yɛ.+ 7 Mi finya nya tosal la kafalaŋ, nduyɛ mbo faŋa paawa* nuu lechoo haaa bɛmbɔɔ tɔ. Kɛ Mɛlɛka chɛl ndu mbo yɔŋ ya nyɛ o nyɛ wɔɔŋ te. 8 Te finya nya ndoo dimi pɛ aa, ‘Chɔluaa ponyɛiya cho wa paawa numndo ni,’ chɔluaa kpou a ponyɛiya ndaa kuam ni. Kɛ o baa pilɔɔ choo, te ndoo dimi pɛ aa, ‘Chɔluaa nɔ tindiaŋ nda cho wa paawa numndo ni,’ chɔluaa kpou a nɔ tindiaŋ nda ndaa kuam ni.+ 9 Mɛɛ nuaa Mɛlɛka wa chɔluaa finya nya wa chuaa ni mbo ke ya. 10 Teleŋ pilɛ, mɛɛ chɔluaa wa helɔɔ, mi sɔl luaŋ, okoŋ mi cha chuiŋaa piaanduaa ma wa chuiŋaa laanduaa nɔ tindiaŋ nda, a ponyɛiya, a chuiŋaa nɔ poŋgaŋ nda helɔɔ.+ 11 Okoŋ, mi maalikɛinɔ Mɛlɛka tonyaa veelu ya o lɔma sɔlaŋ niŋ aa, ‘Chekɔpu!’ mi chɛl aa, ‘Ee.’ 12 Mbo hiau lachi a suɛi aa, ‘A yandii, heelu wɔ hɔlla, okoŋ a cho chɔ maa chuiŋaa piaanduaa cho chɔluaa helɔɔ wa kpou, a nɔ tindiaŋ nda, a ponyɛiya, a chuiŋaa nɔ poŋgaŋ nda nda cho ni. Kanifuule, I cho chɔɔ nyɛ o nyɛ Lebaŋ cho num tosallo.+ 13 Ya cho Mɛlɛka tonya chɔɔmuŋ num Bɛtɛl lo ni,+ fondaŋ ŋ kɛsi pouwo maa tamasi, ma tala chuɛiyaŋ lechoo okoŋ ma chuel la buŋgɛiyo.+ Lelaŋ, chɔŋ ma fula o lɛŋndeŋ ndeŋ niŋ, ma miiŋgu o lɛŋnde ŋ veluŋ ndeŋ niŋ.’”+

14 Okoŋ, mi Luechɛɛ nda Liya dimul ndu aa: “Ŋ nɔ lɛ nyɛ o nyɛ o chiɛi finya naa niŋ maa nyɛm ŋkɛ le. 15 Baa o cho maa mialla le o cho niŋ naa chuaa le? Nduyɛ, nyɛsɔlaa o pisi naa num o ba wo bɛɛ, o chii niŋ ndu dio.+ 16 Nyɛ o nyɛ Mɛlɛka bii finya naa o ba, le naa a chuauwaa naa o cho niŋ ni.+ Lelaŋ, tosa nyɛ o nyɛ Mɛlɛka dimul num le tosaa.”+

17 Okoŋ, mi Chekɔpu heelu chuauwaa nduaa a laandaa nduaa o nyɔɔmiaa choo,+ 18 mbo chua chɔluaa nduaa, a nyɛ o nyɛ o sɔla Padaŋ-aluam,+ mbo mal le kɔlaŋ o lɛŋnde Kenaŋ ndeŋ niŋ, o Aase finya ndɔ lo.+

19 A teleŋ koŋ, Lebaŋ ndoo kuɛ saa nduaa yiiŋnde kilioo. Okoŋ, mi Luechɛɛ chiimbuu piɔmaa leyuŋguaa+ finya ndɔ wa.+ 20 Nduyɛ, mi Chekɔpu hui Lebaŋ Aluameyaŋnɔɔ mbo nyaanuŋ, o choŋguŋ ndu le. 21 Chekɔpu lo kɔlaŋ haaa mbo kɔ taŋ Pee Bɛndoo*+ a nyɛ o nyɛ ndoo nɔ. Okoŋ, mbo hiau lachi a kɔlaŋ o tanda ŋpemboo Kiliaadi.+ 22 O paale yaa ndɔleŋ choo, ma dimul Lebaŋ maa Chekɔpu chimbu mbo kuaŋnuŋ. 23 Mi Lebaŋ chua wanayaŋ ndɔŋ mbo tisa Chekɔpu kɔɔli. Ma kua haaa le palɛi i ŋɔmmɛu, okoŋ ma komal ndu o tanda ŋpemboo Kiliaadi. 24 Ichɔl koŋ, mi Mɛlɛka chɔɔmuŋ Lebaŋ Aluameyaŋnɔɔ+ o lɔma sɔlaŋ niŋ,+ mbo dimul ndu aa: “Mandaŋ a nyɛ ŋ cho Chekɔpu dimul lo.”*+

25 Mi Chekɔpu kindu tɛndii ndɔɔ o pembei choo, nduyɛ mi Lebaŋ nda wanayaŋ ndɔŋ wa o dɔɔŋgɔɔ niŋ, o tanda ŋpemboo Kiliaadi. Okoŋ, mi Lebaŋ kua naa Chekɔpu chua. 26 Mbo nyuna Chekɔpu aa: “O yɛɛnɛ ŋ tosa yɛ hoo? Le yɛɛnɛ ŋ hui yɛ ya, nduyɛ ma chua chuauwaa niaa ma huŋnuŋ a nda naŋ chaa wanaa nda bii o chɔuwo wa ni? 27 Le yɛɛnɛ ŋ hui yɛ ya, ma chimbu a dimul la le? Te num oo dimul la pɛ, I wa num choŋgɔŋ a chonduŋ kɔl kɛndɔŋ, mi yaa loo num dundoo a towaa. 28 A tosa I choŋguŋ* lɛ chuauwaa niaa mamaa* a chuauwaa niaa laanduaa le. Diɔmnde pila ŋ tosa hei ni. 29 I nɔ kpaayaa le mi tosal nya suɛi wɔɔŋnde. Kɛ mi Mɛlɛka finya nya wo suaa chɔchɔl naa ya chua, mbo dimul la aa, ‘Mandaŋ a nyɛ ŋ cho Chekɔpu dimul lo.’+ 30 Le mɛɛ ŋ nɔ yeemɛi le miiŋgoo o chiɛi finya numndo yɛ, lelaŋ ŋ mal le kɔŋndaŋ ni. Kɛ le yɛɛnɛ ŋ chiimbuu yɛ mɛlɛkaa niaa?”+

31 Mi Chekɔpu mulul Lebaŋ aa: “Siooŋnde wa ya ni, lelaŋ ya chimbu ni. Kanifuule mi yiyaŋ maa, ‘A wa ya chuauwaa numnda poonda o ba a kaka.’ 32 Wana o wana ŋ saaluŋ pɛ mɛlɛkaa numnda o ba, wana koŋ nɔ mbo sɔla piɔmndo. Yaasiaa o nyɛm nuŋ niŋ kpou wanayaŋ naŋ o hɔl. Te a saaluŋ pɛ nyɛ cho le numndo, a chua.” Kɛ Chekɔpu ndoo sina nuaa maa Luechɛɛ chiimbuu nda le. 33 Mi Lebaŋ luɛi o tɛndii Chekɔpu wo niŋ, tɛndii buɛiyaa laanduaa ŋiɔɔŋnda, a tɛndii Liya wo,+ kɛ o seeluŋ nda le. Mɛɛ o fula o tɛndii Liya wo niŋ, mbo luɛi o tɛndii Luechɛɛ wo niŋ. 34 Kɛ Luechɛɛ ndoo chii niŋ piɔmaa leyuŋguaa kaŋ chua, mbo wou nda o bɔlɔ waŋ laanduaa kɛsi nyɔɔmiaa o lakɔɔ wo niŋ, okoŋ mbo chal lechoo. Mi Lebaŋ nuuviaa o tɛndiiyo niŋ kpou, kɛ o seeluŋ nda le. 35 Okoŋ, mi Luechɛɛ dimul finya ndɔ aa: “Duaunuŋ tumbe a ya le masanɔ nuu. I nɔla mi chɛŋ num o hɔl te, kanifuule o teleŋ nuu niŋ ya cho ni.”+ Okoŋ mi Lebaŋ nuuviaa tɛɛ tɛɛ, kɛ o seeluŋ nda le.+

36 Le hei, mi Chekɔpu duaunuŋ tumbe a Lebaŋ. Mbo nyuna ndu aa: “Dɛnɛ wɔɔŋ kuɛɛ ya tosa yɛ? Nduyɛ suɛi wɔɔŋ kuɛɛ ya tosa yɛ ma hinul la nuaa o miaa kuu a tumboo? 37 A chii nuuviaa o nyɛm nuŋ tɛɛŋ kpou. Yɛɛnɛ ŋ saaluŋ yɛ mbo wa le num? Soli ndu wanayaŋ naŋ o hɔl nanuŋ, okoŋ ma kelu naa yamɛi tɛɛŋ. 38 Wɔsila 20 ya chii laŋ a num latulu laŋ kpou, paale pilɛ bɛɛ saa numnda a chuiŋaa numnda viikuu le.+ Nduyɛ, paale pilɛ bɛɛ I bii chɔlu numndo mi de ndu le. 39 Paale pilɛ bɛɛ I chuu num chɔlu numndo, o visiaa yonduaa diiyo le.+ Te ndii yɔŋnuŋ pɛ, yaa luɛinuŋ choo, I miŋgi sɔŋgɔ koŋ. O yɔŋ bɛɛ aa ipala ɔɔ ichɔl ndaa chiimbuu chɔlu numndo ni, baŋɔɔ num oo baŋ ya ni le mi miŋgi sɔŋgɔ koŋ. 40 I wa fafalaa o paaleŋ a o hueiye niŋ ichɔl le chɔluaa numnda mandaa. Nduyɛ teleŋnda bɔɔbɔɔ yaa lɔl te.+ 41 Le wɔsilaŋ 20, I wa num o bɛŋgu choo. Wɔsilaŋ 14 ya tosal num wallo ni le chuauwaa num aa ŋiɔɔŋnda. Mi manda saa numnda le wɔsilaŋ la ŋɔmpum. Nduyɛ, a wa paawa nuu faŋaa lechoo haaa bɛmbɔɔ tɔ.+ 42 Te Mɛlɛka finya nuu,+ Mɛlɛka Ebilaham ndo a Mɛlɛka Aase nɔ siooŋii nduɛi yo+ ndoo ve a ya latulu le, a wa ya miŋgi o ya lo bala fondo fuu. Mɛlɛka che saŋga nuu a wali kala kala ya tosa wo. Lelaŋ kpeekpei o miŋgi num o nɛi chɔchɔl ni.”+

43 Okoŋ, mi Lebaŋ mulul Chekɔpu aa: “Waŋ laanduaa haa chuauwaa niaa nda cho ni. Nduyɛ chuauwaa nda velu wa, chuauwaa niaa mamaa nda cho ni. Chɔluaa haa, chɔluaa niaa nda cho ni. Nyɛ o nyɛ cho num o ba, ya a chuauwaa niaa nɔ ni. Suɛi wɔɔŋ kuɛɛ kpeekpei ya bii yɛ hau kɔllo mi tosal chuauwaa niaa a chuauwaa nda velu wa? 44 Lelaŋ, huŋ miŋ yii kpemaa naa ŋiɔɔŋ, nduyɛ mbo wa naa tɛɛŋ maa lesei.” 45 Okoŋ mi Chekɔpu chua pouwo, mbo simi ndu maa tamasi.+ 46 Mi Chekɔpu dimul wanayaŋ ndɔŋ aa: “La chɔuviaa poutaŋ!” Okoŋ ma chɔuviaa poutaŋ ma dii laŋ bemboo. Okoŋ kɔɔli, ma dia nyɛdiaa o bembe koŋ choo. 47 Mi Lebaŋ veelu fondaŋ koŋ aa Chɛka-sahaduta,* kɛ mi Chekɔpu veelu ndu aa Kaliidi.*

48 Okoŋ mi Lebaŋ dimi aa: “Pouta bembelaŋ ndaŋ la cho lesei naa ŋiɔɔŋ tɛɛŋ paale hauleŋ ndeŋ.” Lelaŋ o ke bembe koŋ diolaŋ ni aa Kaliidi,+ 49 a Bandu Mɛŋgɛlaa. Mbo dimi aa: “Boondii naŋ cho wa chaŋnaŋ te ve, Chɛhowa cho wa naa tofaa. 50 Te a bii pɛ chuauwaa niaa biyɔɔ wɔɔŋndo, nduyɛ ma kandu laanduaa cheleŋ chuaa o nda kɔɔli, mi che bɛɛ wanachiee cho wa naa chɔ le, kɛ loonuŋ maa Mɛlɛka cho wa naa chɔɔ, nduyɛ ndu cho wa seiyo naa tɛɛŋ ni.” 51 Mi Lebaŋ hiau lachi a suɛi o Chekɔpu lo aa: “A che pouta bembelaŋ ndaŋ, a pou ya simi maa tamasi naa ŋiɔɔŋ tɛɛŋ ndo. 52 Pouta bembelaŋ ndaŋ, a pou ya simi maa tamasi wo cho lesei maa,+ I hiu laŋ mi kɔ tosal num suɛi wɔɔŋnde le. Nduyɛ num bɛɛ a hiu laŋ ma huŋ tosal la suɛi wɔɔŋnde le. 53 Maa Mɛlɛka Ebilaham ndo,+ Mɛlɛka Nahɔɔ wo, a Mɛlɛka finya nda wo kiolu naa yamɛi tɛɛŋ.” Okoŋ, mi Chekɔpu mɛnaŋ po o Mɛlɛka lo, Mɛlɛka Aase finya ndɔ nɔ siooŋii nduɛi yo.*+

54 Okoŋ kɔɔli, mi Chekɔpu soli salaa o pembei choo, mbo veelu wanayaŋ ndɔŋ le nyɛdiaa* dioo. Ma dia nyɛdiaa, nduyɛ ma lɔl o pembii keŋ choo. 55 Kɛ mi Lebaŋ pena chɔnɔŋ, mbo choŋguŋ* chuauwaa nduaa mamaa*+ a chuauwaa nduaa laanduaa, nduyɛ mbo duau nda sala.+ Okoŋ mi Lebaŋ miiŋguŋ o ndu lo.+

32 Mi Chekɔpu hiau lachi a kɔlaŋ, nduyɛ mi maalikɛiyaa Mɛlɛkaa komal ndu. 2 Dimioo nuaa Chekɔpu che nda, mbo dimi aa: “Dɔɔŋgɔ Mɛlɛka wo cho hoo ni!” Okoŋ mbo ke fondaŋ koŋ diolaŋ aa Mahanɛm.*

3 Okoŋ kɔɔli, mi Chekɔpu viam waŋnda ndu lachi o Iisɔ bɛ ndɔ lo, naa o wa o lɛŋnde Sɛyaa leŋ niŋ,+ o tanda Idɔm ndo niŋnda.+ 4 Mbo dimul nda aa: “Nyɛ nya nɔ mi la dimul masanɔ nuu Iisɔ wo cho hoo ni, ‘Nyɛ buɛi numndo Chekɔpu dimi wo cho hoo ni: “I wa Lebaŋ o bɛŋgu choo le teleŋ vilɛi.+ 5 Nduyɛ mi sɔla nauwaa towaa, sofɛliaa, saa, buɛiyaa piaanduaa a buɛiyaa laanduaa.+ Lelaŋ ya yɔŋ yooŋgoo hoo naa masanɔ nuu chua ni, le halikpeŋ mbo naŋ kɔl a ya.”’”

6 Mɛɛ teleŋ tiŋ hiou, mi wanaa Chekɔpu vem nda miiŋgu naa ndu chua, ma dimul ndu aa: “Ŋ komal Iisɔ bɛ num, nduyɛ o cho hunɔɔ naa num chua a puaa 400 ndu kɔɔli.”+ 7 Mi siooŋnde bii Chekɔpu tau nduyɛ mbo kandu buulaŋndo.+ Okoŋ mbo piɔu wanaa wa a ndu latulu wa kundalaŋ la tiɔɔŋ. Mbo piɔu vɛlɛ chuiŋnda, saa, nauwa, a nyɔɔmiaa kundalaŋ la tiɔɔŋ. 8 Mbo dimi aa: “Te Iisɔ del pɛ kundaa o pilɛ choo, kundaa o pilɔɔ tiuba mbo hɛluŋ.”

9 Okoŋ mi Chekɔpu piɛi aa: “Oo Chɛhowa, Mɛlɛka Ebilaham finya ni mama, a Mɛlɛka Aase finya nuu. Num dimul la ni aa, ‘Miiŋgu o lɛŋnde numndeŋ niŋ a o wanayaŋ numndoŋ lo, nduyɛ I cho num wa salaa dɔwɔɔ.’+ 10 Kaala lo lechoo ŋ chɔm ya buɛi numndo wo,+ a nyɛ o nyɛ ŋ tosal la, I cho bɛɛ pɛŋ o sɔvɛ le ma tosal la ndu le, kanifuule teleŋ ya wa Chɔɔdaŋ ndaŋ taŋɔɔ wo, tinda nuu kinɛi wa ya o ba ni. Kɛ suŋ suŋ niŋ, I nɔ kundalaŋ la tiɔɔŋ.+ 11 Lelaŋ a yandii, I piɛi num le ma piŋi ya+ Iisɔ bɛ ni o ba, kanifuule siooŋii nduɛi cho ya maa ya ni, chuauwaa niaa ni, vɛlɛ a kalaa ndaa, o cho hunɔɔ naa delɔɔ choo.+ 12 A dimi maa a cho ya salaa dɔwɔɔ, nduyɛ ma tosa mi chuauwaa niaa mamaa* kui mɛɛ siooŋnde wa nuaa o pee mɛŋma ihɛllo kɔŋgɔ, i chuu chɔm te yɛ.”+

13 Mbo lɔl loŋ ichɔl koŋ. Okoŋ kɔɔli, mbo hɛli chɔluaa nduaa a tiŋ le Iisɔ bɛ ndɔ kioo:+ 14 Chuiŋaa laanduaa 200, chuiŋaa piaanduaa 20, saa laanduaa 200, saa piaanduaa 20, 15 nyɔɔmiaa komsaa 30, nauwaa laanduaa 40, nauwaa towaa 10, sofɛliaa laanduaa 20, a sofɛliaa piaanduaa 10.+

16 Mi Chekɔpu ke buɛiyaa nduaa chɔluaa haa, le ma kuɛ a nda kundalaŋ yɛ yɛ. Mbo dimul nda aa: “La hiou pɔɔ ya lachi, nduyɛ mi tiŋndo wa kunda kɛ kɛ tɛɛŋ.” 17 Mbo dimul buɛi wa kunda tasoo lachi wo aa: “Te o yɔŋ pɛ mi la bɔŋaŋ nya Iisɔ bɛ ni mbo nyuna num aa, ‘Buɛi nɛɛnɛ ŋ cho yɛ, kuɛɛnɛ ŋ cho yɛ laŋ, nduyɛ o nɛɛnɛ nɔ yɛ chɔluaa cho haa num lachi wa?’ 18 dimul ndu aa, ‘Buɛi numndo Chekɔpu nɔ ya ni. O dimi maa ya chuu masanɔ ndɔɔ Iisɔ chɔluaa haa!+ Nduyɛ, ndupila cho naa hunɔɔ kɔɔli.’” 19 Mbo dimul vɛlɛ buɛi wa kunda diiŋ ndɔɔ, kunda yaa ndɔɔ, a wanaa wa kɔlaŋ chɔluaa kɔɔli wa kpou aa: “Nyɛpilɔɔ hoo kpe nya nɔ ni mi la dimul Iisɔ, te la bɔŋaŋ pɛ nya ndaa. 20 La dimul ndu vɛlɛ aa, ‘Buɛi numndo Chekɔpu cho hunɔɔ kɔɔli.’” Kanifuule, Chekɔpu wa yiyaŋndo o kɔl niŋ aa: ‘Te o che pɛ chɔluaa ya cho ndu haa yɔŋndo wa,+ o cho ya biyɔɔ nyɛkɛndɛi te ŋ chiikaŋ pɛ.’ 21 Okoŋ mi buɛiyaa Chekɔpu wa hiau lachi a chɔluaa, kɛ mi ndupila lɔl loŋ ichɔl koŋ.

22 Ichɔl koŋ, mi Chekɔpu chua laandaa nduaa ŋiɔɔŋnda,+ buɛiyaa nduaa laanduaa ŋiɔɔŋnda,+ a puaa nduaa 11, ma taŋ Chabɔki leeloo.+ 23 Okoŋ mbo tɛɛŋguu nda leeloo a nyɛ o nyɛ ndoo nɔ.

24 Mi Chekɔpu lo kɔŋgɔɔ leeloo ndupilɛ kpe. Okoŋ, mi laŋunɔ pilɛ huŋ saa ndu a sɔŋgɔɔ. Nduyɛ, a lo sɔŋgɔɔ haaa mi paaleŋ le huŋ le siɔɔ.+ 25 Mɛɛ laŋunɔɔ hoo che maa o tiu ndu ba le, mbo pilaŋ ndu lɔlu tumndo. Okoŋ mi lɔlu tum Chekɔpu wo faŋaŋ o boondei choo, teleŋ nda wa sɔŋgɔɔ wo.+ 26 Okoŋ kɔɔli, mi laŋunɔɔ hoo dimi aa: “Mal la I kuaŋnuŋ, kanifuule paaleŋ le hiŋ niŋ le siɔɔ.” Mi Chekɔpu dimi aa: “I cho num malɔɔ ma kuɛ le, mɛɛ ma dɔu ya fɛlɛŋ sala.”+ 27 Mbo nyuna ndu aa: “Vɛɛnɛ ŋ nɔ yɛ diolaŋ?” Mbo muli aa: “Chekɔpu.” 28 Okoŋ mbo dimul ndu aa: “Diola numnda cho lɛ aa Chekɔpu le, kɛ Isɔluɛi.*+ Kanifuule a sɔŋga a Mɛlɛka+ vɛlɛ a waŋnda chieeya, nduyɛ o mɛɛlulaŋ kpɔŋ, ma sɔla batiuwaa.” 29 Mi Chekɔpu bɛɛ dimul ndu aa: “Yandii, chɔm ya diola numndaŋ.” Kɛ mbo nyuna Chekɔpu aa: “Le yɛɛnɛ ŋ yeema yɛ ma sina diola nilaŋ?”+ Okoŋ, mbo duau ndu sala loŋ. 30 Mi Chekɔpu ke fondaŋ koŋ diolaŋ aa Pɛniɛɛ,*+ kanifuule mbo dimi aa, “I che Mɛlɛka a lehɔl pɛɛŋ, nduyɛ mi lo yoomu.”+

31 Dimioo nuaa o faŋaŋ Pɛnuɛɛ,* mi paaleŋ le fula. Kɛ o wa kɔlaŋ a tindaa o lɔloo choo.+ 32 Lelaŋ, haaa a paale hauleŋ ndeŋ, Isɔluɛiya di nyɛsuma wa visioo o lɔlu tumndo waŋ te, kanifuule naa nyɛsuaŋ ma cho o lɔlu tumndo wa laŋunɔɔ pilaŋ Chekɔpu ni, mi paa faŋaŋ ndu o boondei choo.

33 Mɛɛ Chekɔpu chua hɔlla, mbo cha Iisɔ hunɔɔ a puaa 400 ndu kɔɔli.+ Le hei, mbo piɔu piɔu chuauwaa nduaa waŋ laanduaa haa: Liya, Luechɛɛ, a buɛiyaa laanduaa ŋiɔɔŋnda.+ 2 Mbo simi buɛiyaa laanduaa a chuauwaa ndaa lachi.+ Liya nda chuauwaa nduaa wa tɛɛŋ.+ Nduyɛ mbo simi Luechɛɛ+ nda Choosɛ kɔɔli. 3 Okoŋ mi ndupila hiau nda lachi. O wa kɔlaŋ a bɛ ndɔ wulaŋ beŋndo mɛɛ o sɔɔŋguu ndu ikɛi fau. Nduyɛ, mbo tosa hei haaa bɛmbɔɔ le ŋɔmmɛu.

4 Kɛ mi Iisɔ nyaanuŋ mbo kɔ demul ndu, mbo sɔsa ndu kuuwo, okoŋ mi nda ŋiɔɔŋ kpou pial chaŋndo. 5 Mɛɛ Iisɔ chua hɔlla, mbo cha waŋ laanduaa a chuaambuaa. Mbo nyuna aa: “Nɛɛ yaa cho yɛ haa?” Mi Chekɔpu mulul ndu aa: “Chuauwaa Mɛlɛka dɔu buɛi numndo sala wa cho haa ni.”+ 6 Okoŋ mi buɛiyaa laanduaa sɔɔŋguu a chuauwaa ndaa, ma beŋ ndu wulaŋ. 7 Mi Liya nda chuauwaa nduaa sɔɔŋguu ma beŋ ndu wulaŋ. Okoŋ, mi Choosɛ nda Luechɛɛ bɛɛ sɔɔŋguu, ma beŋ ndu wulaŋ.+

8 Mi Iisɔ nyuna ndu aa: “Le sabu yɛɛnɛ ŋ vem yɛ waŋnda a chɔluaa naŋ bɔŋaŋ kaŋ nda o ya lo?”+ Mbo muli aa: “Le halikpeŋ mi masanɔ nuu naŋ kɔl a ya.”+ 9 Mi Iisɔ dimi aa: “Pɔmbɔ nuu, I nɔ nyɛm kiɔɔŋ tau tau.+ Kɛsi nyɛm numndoŋ.” 10 Kɛ mi Chekɔpu dimi aa: “A yandii, kɛɛ le. Te a hini pɛ kɔl a ya, mɛɛ bii ya chɔluaa haa o ba, kanifuule I chuu num nda le halikpeŋ miŋ chiikaŋ. Hɔlaa num aa ya che haa wa cho ko maa hɔlaa Mɛlɛkaa ya che ni. Nduyɛ ma demul la a kɔl kɛndɛ.+ 11 A yandii, bii ke ya chuu num hoo wo.*+ Kanifuule Mɛlɛka dɔu ya sala, nduyɛ I nɔ nyɛ o nyɛ ya hauba.”+ Chekɔpu lo Iisɔ nyɔɔloo haaa mbo bii.

12 Okoŋ kɔɔli, mi Iisɔ dimi aa: “La chɔŋ ŋ kɔŋnuŋ. I cho wa nya kɔlaŋ lachi.” 13 Kɛ mi Chekɔpu dimi aa: “Masanɔ nuu, numpila sina maa chuaambuaa cho naa tɛɛŋ a kindu ŋdial te.+ Nduyɛ, I nɔ saa a nauwaa komsaa. Te ŋ kuɛ pɛ a nda chɔ chɔ le paaleŋ kpɛŋ, chɔluaa kpou cho wu. 14 A yandii masanɔ nuu, kɔ pɔɔ lachi. I cho wa hunɔɔ o pɔmpɔmbɔ a chɔluaa vɛlɛ a chuaambuaa haaa mi fuuluu Sɛyaa+ o masanɔ nuu lo.” 15 Okoŋ mi Iisɔ dimul ndu aa: “Awa, mɛɛ I mellɔ num puaa niaa a tiŋ.” Kɛ mi Chekɔpu dimul ndu aa: “Mbɔ o wa lende. I naŋ kɔl le mɛɛ ŋ hini kɔl a ya yɛ.” 16 O paale leŋ choo, mi Iisɔ miiŋguŋ Sɛyaa.

17 Kɛ mi Chekɔpu kua Sukɔti,+ mbo kɔ taŋgul chiɛiyo le ndupila. Nduyɛ, mbo taŋgul fondaŋndaŋ le chɔluaa nduaa. Le saboo hoo o ke fondaŋ koŋ diolaŋ ni aa Sukɔti.*

18 Mi Chekɔpu mal Padaŋ-aluam,+ mbo fuuluu o chiee bɛndoo Siɛkɛm+ o lɛŋnde Kenaŋ ndeŋ+ niŋ, nyɛ o nyɛ yɔŋnuŋ ndu le. Okoŋ, mbo kila dɔɔŋgɔɔ o chiee bɛndu koŋ ikɛi. 19 Okoŋ kɔɔli, mi Chekɔpu piandu lɛŋndeŋ puaa Hemɔɔ wa o ba naa ndoo kindu tɛndii ndɔɔ wa a kaniŋ humboŋ 100.+ Hemɔɔ yɛ, ndu velu Siɛkɛm ni. 20 Mbo taŋgul bandu luamaa lasalaa loŋ, mbo ke ndu diolaŋ aa Mɛlɛka, Mɛlɛka Isɔluɛiya.+

34 Chekɔpu nda Liya velu Daina ni.+ Nduyɛ, mi Daina ndoo kuɛ chuaa laanduaa wa o lɛŋndeŋ niŋnda yilɔɔ,+ nduyɛ mi ndoo chua teleŋndo a nda latulu. 2 Hemɔɔ wa masaa o lɛŋnde leŋ niŋ ni, nduyɛ Hivaitiinɔɔ+ o wa ni. Mɛɛ Siɛkɛm po ndɔ che Daina, mbo bii ndu, okoŋ mbo kpuuwa ndu. 3 Siɛkɛm ndoo kaala bɔɔ Daina, chua Chekɔpu wo. Nduyɛ teleŋ o teleŋ o wa yiyaŋndo a ndu okɔɔ. Le hei, mbo suaa diomnda yeelɛilaŋ o ndu lo.* 4 O mɛɛlulaŋ kpɔŋ, mi Siɛkɛm dimul Hemɔɔ+ finya ndɔ aa: “Kɛkɛ, kaalal la chua laandoo hoo le mbo wa laa ni.”

5 Teleŋ Chekɔpu tuei maa Siɛkɛm kpuuwa Daina chua ndɔ wo, puaa nduaa wa chɔluaa nduaa ikɛi yondoo niŋ. Le hei, o suu nyɛ o nyɛ le haaa ma miiŋgu. 6 Mɛɛ teleŋ tiŋ hiou, mi Hemɔɔ, finyaa Siɛkɛm kua o Chekɔpu lo le suɛi o ndu lo. 7 Kɛ dimioo nuaa puaa Chekɔpu wa tuei a ndi okɔɔ, ma mal naa nda wa yondoo niŋnda, ma miiŋgu chiee chɔ chɔ. Ma tambu kɔllo, nduyɛ ma duaunuŋ tumbe tau tau le mɛɛ Siɛkɛm kpuuwa chua Chekɔpu wo,+ mbo tusi Isɔluɛi siɔmbulaŋ yɛ. Nduyɛ keŋ ndii nɔ mi i yɔŋnuŋ kposoŋ te.+

8 Mi Hemɔɔ dimul nda aa: “Siɛkɛm po ni kaala bɔɔ* chua nyaa. Lelaŋ a yandii, la chɛl ndu mbo chua ndu o nɔɔ niŋ, 9 mi la simnuŋ lefuaa niaa.* Okoŋ, miŋ wa laanduaa keŋnaŋndo vellaa velle.+ 10 Ŋ waŋnuŋ nanuŋ naa nyaa, nduyɛ mi lɛŋnde naaleŋ kpou le wa le nya. Ba o ba nya yeema pɛ challe o lɛŋndeŋ ndeŋ niŋ, la chal, nduyɛ mi la tosa yulaleŋ.” 11 Okoŋ mi Siɛkɛm dimul finyaa Daina a puaa nduaa aa: “A yandii la chɛl suɛi hei, nduyɛ nyɛ o nyɛ nya nyuna ya pɛ le ndu, I cho nya ke. 12 O yɔŋ bɛɛ mi la nyuna le fuloo tau vɛlɛ a ke baa kala cheleŋ,+ I cho o bɛɛndiaŋ le mi yɔŋgu nyɛ o nyɛ nya nyuna ya pɛ. La ke ya chuaa hoo tuŋ le mbo wa laa ni.”

13 Mi puaa Chekɔpu wa kɛɛsiaa le Siɛkɛm nda finya ndɔ huiyo, le mɛɛ o tɛɛmbuu Daina yema nda labɛɛ yɛ. 14 Ma dimul nda aa: “Ŋ nɔla miŋ tosa suɛi waa nuaa le. Ŋ chue yema naa miŋ ke wana sɔla hoo hivi chiɛi kɔɔli le wo* le,+ kanifuule keŋ cho bɔɔ suɛi lasiɔmbu le naa. 15 Te la yeema pɛ miŋ chɛl suɛi hei, mɛɛ mi puaa nyaa kpou sɔla hivi chiɛi kɔɔlioo maa naa.+ 16 Ŋ cho nya chuauwaa naa ke, nduyɛ mi naŋ chua chuauwaa nyaa le naapila. Ŋ cho wa latulu naa nyaa o lɛŋndeŋ ndeŋ niŋ, okoŋ miŋ simnuŋ wanaa piliaa. 17 Kɛ te la kɛɛ pɛ le hivi chiɛi kɔɔlioo sɔlaa, mɛɛ ŋ cho yema naa* chua miŋ kuɛŋnuŋ.”

18 Mi Hemɔɔ+ nda Siɛkɛm po ndɔ+ naŋ kɔl a nyɛ nda dimi wo. 19 Siɛkɛm dounuŋ tamala le nyɛ nda dimul ndu wo tosaa le,+ kanifuule ndoo kaala bɔɔ chua Chekɔpu wo. Nduyɛ o chiɛi finya ndɔ wo niŋ kpou, ndu ndaa hiou bɛɛleŋ ke.

20 Okoŋ kɔɔli, mi Hemɔɔ nda Siɛkɛm po ndɔ kua o dio kpaki chioo sondoo, ma kɔ dimul puaa o chiee ndaa+ niŋ aa: 21 “Puaa haa yeema ma wa o kɔl nyulu niŋ a naa. Lelaŋ, ŋ chɛlnuŋ nda ma wa o lɛŋndeŋ ndeŋ niŋ, nduyɛ ma tosa yulaleŋ. Kanifuule, lɛŋndeŋ le cho tau le ma wa leniŋ. Ŋ tiuba miŋ wa laanduaa keŋnaŋndo vellaa velle.+ 22 Nyɛ kinɛi nda dimul naa le miŋ tosa ma chɛl miŋ wa naa ndaa, nduyɛ miŋ simnuŋ wanaa piliaa wo cho hoo ni: Waŋ piaanduaa naa tɛɛŋ o kɛ kɛ nɔ mbo sɔla hivi chiɛi kɔɔlioo, mɛɛ nda sɔla hivi chiɛi kɔɔlioo yɛ.+ 23 Okoŋ, nyɛm nda nɔ woŋ, sulta ndalaŋ, a chɔluaa ndaa kpou cho wa le naa. Lelaŋ, ŋ tosaŋ nyɛ nda dimi wo miŋ waŋnuŋ naa ndaa.” 24 Wanaa wa fulaa o dio kpaki chioo wa kpou ma yaŋ Hemɔɔ nda Siɛkɛm po ndɔ nilaŋ. Okoŋ, mi waŋ piaanduaa kpou o chiee koŋ niŋ sɔla hivi chiɛi kɔɔlioo.

25 O paale yaa ndɔleŋ choo, a wa wɔ o nyɛ nɛiyaa koŋ niŋ, mi puaa Chekɔpu wa a ŋiɔɔŋ, Simiɔŋ nda Livai, yemaa Daina wa,+ o kɛ kɛ chua muɛi nduɛi faŋnde ma kua sɔɔsɔɔ o chioo niŋ, ma diu diu puaa wa loŋ nda kpou.+ 26 Ma dii Hemɔɔ nda Siɛkɛm po ndɔ a muɛi faŋnde, okoŋ ma chua Daina yema nda o chiɛi Siɛkɛm ndo niŋ ma kuaŋnuŋ. 27 Mi puaa Chekɔpu wa apiliaa huŋ puŋga nyɛm puaa nda diu diu wa o chioo niŋ, le mɛɛ nda tɛɛmbuu yema nda labɛɛ yɛ.+ 28 Ma chua saa ndaa, chuiŋaa ndaa, nauwaa ndaa, sofɛliaa ndaa, nyɛ o nyɛ wa o chioo niŋ, a nyɛ o nyɛ wa yondoo niŋ. 29 Ma chua vɛlɛ nyɛm ndaŋ kpou. Ma bii chuauwaa ndaa pɔmbuaa kpou a laandaa ndaa, nduyɛ ma puŋga nyɛ o nyɛ wa o chiɛila ndalaŋ niŋ.

30 Okoŋ mi Chekɔpu dimul Simiɔŋ nda Livai+ aa: “La tusi ya nyɛpalaa bɛndoo* choo, nduyɛ mi la tosa mi simnuŋ nyɛ siouwɛi Kenanaitiiya a Pɛluisaitiiyaa cho o lɛŋndeŋ ndeŋ niŋnda o hɔl. Yuŋgu nuu cho o bɔɔ le. Waŋnda haa cho chuuŋgiaŋ naapilɛ ma huŋ del la choo, nduyɛ ma dii ya a yuŋgu nuu kpou.” 31 Kɛ ma dimul ndu aa: “Wana o wana nɔ mbo chua yema naa maa wana lanɔ suundɛi le o cho le.”

35 Okoŋ kɔɔli, mi Mɛlɛka dimul Chekɔpu aa: “Chɔŋ ma kuɛ Bɛtɛl,+ ma kɔ wa loŋ, nduyɛ ma taŋgul bandu luamaa lasalaa loŋ le Mɛlɛka tonyaa, o chɔɔmuŋ num teleŋ ŋ wa Iisɔ bɛ num nyaanɔŋndo wo.”+

2 Okoŋ, mi Chekɔpu dimul yuŋgu ndɔɔ a wanaa wa ndu o ba bɛŋgu wa kpou aa: “La faŋa mɛlɛkaa cheleŋaa cho nya tɛɛŋ nda,+ mi la dindi nyapila, nduyɛ mi la siŋga nyɛla nyalaŋ, 3 miŋ kuɛŋnuŋ Bɛtɛl. I cho lakɔ bandu luamaa lasalaa taŋgul loŋ le Mɛlɛka tonyaa. Teleŋ ya wa o dɛnɛ palaa niŋndo, ndu muli piɛile nileŋ ni. Nduyɛ ba o ba yaa kuɛ pɛ, ndu wa a ya latulu ni.”+ 4 Okoŋ, ma chua mɛlɛkaa cheleŋaa ndaa nɔ wa kpou a kelaŋ ndaŋ lanioŋ, ma ke Chekɔpu. Mi Chekɔpu bii nyɔɔŋ muŋ, mbo kumbu* muŋ o yɔm bɛndu wa Siɛkɛm ikɛiyo bɛŋgu.

5 Mɛɛ nda mal le kɔlaŋ, mi Mɛlɛka tosa mi siooŋii bɛnduei bii wanaa wa o chieeŋ balu nda woŋ niŋnda. Le hei, a tisa puaa Chekɔpu wa kɔɔli le. 6 Mi Chekɔpu a wanaa wa a ndu latulu wa kpou fuuluu Luusi,+ koŋ cho ni, Bɛtɛl, o lɛŋnde Kenaŋ ndeŋ niŋ. 7 Mbo taŋgul bandu luamaa lasalaa loŋ, mbo ke fondaŋ koŋ diolaŋ aa Ɛl-bɛtɛl.* Kanifuule, loŋ Mɛlɛka tonyaa ndoo chɔɔmuŋ ndu ni, teleŋ o wa bɛ ndɔ nyaanɔŋndo wo.+ 8 Okoŋ kɔɔli, mi Dɛbolua,+ chua wa puaa Lubeka wa mandaa wo wu, ma kumbu ndu Bɛtɛl o yɔm oki wo bɛŋgu. Okoŋ, mbo ke yɔm koŋ diolaŋ aa Alɔŋ-bakuu.*

9 Mi Mɛlɛka chɔɔmuŋ vɛlɛ Chekɔpu mɛɛ o wa faŋaŋndo Padaŋ-aluam, nduyɛ mbo duau ndu sala. 10 Mi Mɛlɛka dimul ndu aa: “Diola numndaŋ aa Chekɔpu.+ Kɛ, diola numnda cho lɛ aa Chekɔpu le. Diola numndaŋ niŋ aa Isɔluɛi.” Okoŋ mbo kandu ndu veeloo aa Isɔluɛi.+ 11 Mi Mɛlɛka dimul ndu vɛlɛ aa: “Ya cho Mɛlɛka Kpaaya Kpou Kpou Wo ni.+ Violu chuauwa, ma kui. A cho simnɔŋ finyaa le kaalaŋ o kaalaŋ niŋ,+ nduyɛ masaa cho fula o num niŋ.+ 12 Lɛŋnde ya ke Ebilaham a Aase leŋ, num a chuauwaa num aa mamaa* o num kɔɔli ya cho leŋ ke ni.”+ 13 Okoŋ, mi Mɛlɛka mɛi Chekɔpu o fondaŋ o soo koŋ o ndu lo wo, mbo kuaŋnuŋ.

14 Mi Chekɔpu simi pouwo maa tamasi o fondaŋ Mɛlɛka soo koŋ o ndu lo wo, okoŋ mbo tala sala mamuɛiyo a chuɛiyaŋ lechoo.+ 15 Mi Chekɔpu veelu vɛlɛ fondaŋ Mɛlɛka soo koŋ o ndu lo wo aa Bɛtɛl.+

16 Okoŋ ma faŋaŋ Bɛtɛl. Tiŋndo wa wɔ landaŋ le fuuluuwo Ɛfiluata, mi pulii vialɛi chaŋ Luechɛɛ nɛiyo. Nduyɛ mbo saŋga tau le violɔɔ. 17 Luechɛɛ wa lau lau koŋ le violɔɔ, mi waŋ laanduaa bii violɔɔ wa o pilɛ dimul ndu aa: “Yɔŋ isiooŋ te. Poo hoo bɛɛ, a cho ndu sɔla.”+ 18 Mi Luechɛɛ huŋ le kɔllo malnɔŋndo. Kɛ tuupa mbo malnuŋ kɔl, mbo ke ndu diolaŋ aa Bɛŋ-onai,* kɛ mi finya ndɔ ke ndu diolaŋ aa Bɛŋjamiŋ.*+ 19 Okoŋ mi Luechɛɛ wu, ma kumbu ndu o nɛi tɛɛŋ le kɔlaŋ Ɛfiluata, koŋ cho ni, Bɛtilɛhɛm.+ 20 Mi Chekɔpu simi pouwo o sɛi Luechɛɛ wo choo. Nduyɛ, pou koŋ cho wɔ o sɛi ndɔɔ choo haaa a paale hauleŋ ndeŋ.

21 Mi Isɔluɛi hiau lachi a kɔlaŋ, mbo kɔ kindu tɛndii ndɔɔ landaŋ o bandu vilɛiyo Ɛda amakɔɔ. 22 Boondii Isɔluɛi wa ichali o lɛŋnde leŋ niŋnde, mi Lubɛŋ kɔ hini a Bilihaa, lanɔ pɔmbɔ finya ndɔ wo. Nduyɛ mi Isɔluɛi tuɛi a ndi okɔɔ.+

Kpou kpou, Chekɔpu ndoo nɔ puaa 12. 23 Puaa Liya velu wa cho haa ni: Lubɛŋ,+ Simiɔŋ, Livai, Chuda, Isaka, a Sɛbulɔŋ. Nduyɛ, nda wa puaa tasiaa Chekɔpu wa ni. 24 Luechɛɛ velu Choosɛ nda Bɛŋjamiŋ ni. 25 Puaa Bilihaa, buɛi Luechɛɛ wo velu wa cho haa ni: Daŋ nda Nafitalii. 26 Nduyɛ puaa Silipa, buɛi Liya wo velu wa cho haa ni: Kaadi nda Asia. Teleŋ Chekɔpu wa Padaŋ-aluam ndo o velu puaa haa kpou ni.

27 O mɛɛlulaŋ kpɔŋ, mi Chekɔpu fuuluu naa Aase finya ndɔ wa Mamilue+ wa, Kiliaati-aba, koŋ cho ni, Hɛbulɔŋ. Nduyɛ loŋ Ebilaham nda Aase bɛɛ wa o sumialle ni.+ 28 Wɔsilaŋ 180 Aase chii yoomu ni.+ 29 Okoŋ kɔɔli, mi Aase chua yoomuma ndɔma mɛɛlaŋ, mbo malnuŋ kɔl. Okoŋ, ma kumbu ndu maa finyaa nduaa mamaa. Tuupa mbo wu, o wa niŋ o yuuwɛi kudɛɛ. Nduyɛ puaa nduaa Iisɔ nda Chekɔpu kumbu ndu ni.+

36 Iisɔ, o nda veelu vɛlɛ aa Idɔm+ ndo, bundɛi a ndu okɔɔ cho hei ni.

2 Waŋ laanduaa Kenanaitiiyaa Iisɔ chua o nɔɔ niŋnda cho haa ni: Ada,+ chua Ɛlɔŋ ndo Hitaitiinɔɔ,+ a Oholibama,+ chua Enaa wo. Enaa yɛ, finya ndɔ wa Sibiɔŋ ni, Hivaitiinɔɔ. 3 O pilɔɔ wa Basimati+ ni, chua Isimɛɛ wo, yemaa Nebayɔti.+

Teleŋ Iisɔ wa o lɛŋnde Kenaŋ ndeŋ niŋndo o velu puaa haa kpou ni. 6 Okoŋ kɔɔli, mi Iisɔ chua laandaa nduaa, puaa nduaa, chuauwaa nduaa laanduaa, wana o wana wa o ndu lo chiɛiniŋ, chɔlu kɛ kɛ ndoo nɔ, a nyɛsɔlaa kɛ kɛ ndoo sɔla+ o lɛŋnde Kenaŋ ndeŋ niŋ, mbo faŋaŋ Chekɔpu pɔmbɔ ndɔ ikɛi, mbo kuaŋnuŋ o lɛŋnde cheleŋ niŋ pɔɔli.+ 7 Kanifuule, ndaa nɔ nyɔɔŋ tau tau, nduyɛ lɛŋnde nda wa niŋndeŋ le ve lɛ le bɔɔ le nda a chɔluaa ndaa le. 8 Le hei, mi Iisɔ kɔ chalnuŋ o tanda ŋpemboo Sɛyaa.+ Iisɔ nda veelu vɛlɛ ni aa Idɔm.+

9 Bundɛi a Iisɔ okɔɔ cho hei ni, finya mamaa le Idɔmaitiiya o tanda ŋpemboo Sɛyaa.+

10 Puaa Iisɔ wa, diola ndalaŋ la cho laŋ ni: Ɛlifaasi, o nda velu nda Ada wo, a Luyɛɛ, o nda velu nda Basimati wo, lanɔɔ o pilɔɔ.+

11 Chuauwaa Ɛlifaasi velu wa cho haa ni: Tɛmaŋ,+ Omaa, Sɛfo, Ketam, a Kinaasi.+ 12 Timina wa lanɔ pɔmbɔ Ɛlifaasi wo ni, po Iisɔ wo. Mɛɛ teleŋ tiŋ hiou, mbo vilul Ɛlifaasi poo diolaŋ Amalɛki.+ Puaa mamaa Ada wa cho haa ni, lanɔɔ Iisɔ.

13 Puaa Luyɛɛ velu wa cho haa ni: Nahati, Siluaa, Siamaa, a Misa. Puaa mamaa Basimati wa+ cho haa ni, lanɔɔ Iisɔ.

14 Puaa Oholibama, lanɔɔ Iisɔ, chua Enaa wo vilul Iisɔ wa cho haa ni: Chɛhusi, Chalam, a Kolua. Enaa yɛ, finya ndɔ wa Sibiɔŋ ni.

15 Masaa* fula o pulale Iisɔ leŋ+ choo wa cho haa ni: Ɛlifaasi, po tase Iisɔ wo, puaa fula o pulale ndɔleŋ choo wa cho haa ni: Masaa Tɛmaŋ, Masaa Omaa, Masaa Sɛfo, Masaa Kinaasi,+ 16 Masaa Kolua, Masaa Ketam a Masaa Amalɛki. Masaa o lɛŋnde Idɔm ndeŋ niŋ a fula o pulale Ɛlifaasi leŋ+ choo wa cho haa ni. Nda cho puaa mamaa Ada wa ni.

17 Luyɛɛ, po Iisɔ wo, puaa fula o pulale ndɔleŋ choo wa cho haa ni: Masaa Nahati, Masaa Siluaa, Masaa Siamaa, a Masaa Misa. Masaa o lɛŋnde Idɔm ndeŋ+ niŋ, a fula o pulale Luyɛɛ leŋ choo wa cho haa ni. Nda cho puaa mamaa Basimati wa ni, lanɔɔ Iisɔ.

18 Nduyɛ puaa Oholibama, lanɔɔ Iisɔ velu wa cho haa ni: Masaa Chɛhusi, Masaa Chalam, a Masaa Kolua. Oholibama, lanɔɔ Iisɔ velu masaa haa ni. Nduyɛ, Enaa velu Oholibama ni.

19 Puaa* Iisɔ wa cho haa ni, nduyɛ masaa ndaa cho haa ni. Iisɔ nda veelu vɛlɛ ni aa Idɔm.+

20 Sɛyaa, Holuaitiinɔɔ, puaa o velu wa cho haa ni, nduyɛ o lɛŋnde leŋ niŋ nda wa ni:+ Lotaŋ, Sioba, Sibiɔŋ, Enaa,+ 21 Disiɔŋ, Esɔ, a Disiaŋ.+ Masaa Holuaitiiya cho haa ni, puaa Sɛyaa wa, o lɛŋnde Idɔm ndeŋ niŋ.

22 Lotaŋ velu Hɔluaa a Himam ni. Nduyɛ Lotaŋ, yema ndɔ wa Timina+ ni.

23 Puaa Sioba velu wa cho haa ni: Alivaŋ, Manahati, Ɛba, Siɛfo, a Onam.

24 Puaa Sibiɔŋ+ velu wa cho haa ni: Eya nda Enaa. Enaa wo hoo saaluŋ pioo* o pollo niŋ ni, teleŋ o wa sofɛliaa Sibiɔŋ finya ndɔ wa mandaa o pollo niŋndo.

25 Chuauwaa Enaa wa cho haa ni: Wana pɔnɔɔ diolaŋ aa Disiɔŋ, wana lanɔɔ diolaŋ aa Oholibama.

26 Puaa Disiɔŋ velu wa cho haa ni: Hɛmidaŋ, Ɛsibaŋ, Itiluaŋ, a Chɛluaŋ.+

27 Puaa Esɔ velu wa cho haa ni: Bilihaŋ, Saavaŋ, a Akaŋ.

28 Puaa Disiaŋ velu wa cho haa ni: Ɔɔsi nda Eluaŋ.+

29 Masaa Holuaitiiya cho haa ni: Masaa Lotaŋ, Masaa Sioba, Masaa Sibiɔŋ, Masaa Enaa, 30 Masaa Disiɔŋ, Masaa Esɔ, a Masaa Disiaŋ.+ Masaa Holuaitiiya haa wa masaa yɛ yiaa o lɛŋnde Sɛyaa leŋ niŋ ni.

31 Masaa haa keeku o masaleŋ choo o lɛŋnde Idɔm ndeŋ+ niŋ ni, tuupa mi masa kɛ kɛ wa Isɔluɛiya* choo.+ 32 Mi Bɛla, po Biyɔɔ wo keeku o masaleŋ choo Idɔm, nduyɛ chiee ndɔ bɛndoo wa Dinihaba ni. 33 Mɛɛ Bɛla vi, mi Chobabi, po Siluaa wo fulaa Bɔsilua miiŋgu o masaleŋ choo o foofo ndɔɔ. 34 Mɛɛ Chobabi vi, mi Husam, fulaa o lɛŋnde Tɛminaitiiya niŋ miiŋgu o masaleŋ choo o foofo ndɔɔ. 35 Mɛɛ Husam vi, mi Hadadi, po Bidaadi wo, o yem Midianaitiiya+ o tanda Mowaabi wo niŋndo miiŋgu o masaleŋ choo o foofo ndɔɔ. Nduyɛ chiee ndɔ bɛndoo wa Aviti ni. 36 Mɛɛ Hadadi vi, mi Samila, fulaa Masiluɛka miiŋgu o masaleŋ choo o foofo ndɔɔ. 37 Mɛɛ Samila vi, mi Siɔ miiŋgu o masaleŋ choo o foofo ndɔɔ. Siɔ yɛ, Luɛhoboti o fula ni, o Pee Bɛndoo ikɛi. 38 Mɛɛ Siɔ vi, mi Baal-hanaŋ, po Achibɔɔ wo miiŋgu o masaleŋ choo o foofo ndɔɔ. 39 Mɛɛ Baal-hanaŋ, po Achibɔɔ wo vi, mi Hada miiŋgu o masaleŋ choo o foofo ndɔɔ. Chiee ndɔ bɛndoo ndoo nɔ diolaŋ ni aa Peyu. Laa ndɔ ndoo nɔ diolaŋ ni aa Mɛhitabɛɛ, chua Matiluɛdi wo. Nduyɛ, Mɛsahabi velu Matiluɛdi ni.

40 Diola masaa fula o pulale Iisɔ leŋ choo wa, yuŋgula ndalaŋ, a diola fondaŋnda nda wa laŋ la cho laŋ ni: Masaa Timina, Masaa Alivaa, Masaa Chɛtɛɛti,+ 41 Masaa Oholibama, Masaa Ɛlaa, Masaa Pinɔŋ, 42 Masaa Kinaasi, Masaa Tɛmaŋ, Masaa Mibisa, 43 Masaa Makidɛɛ, a Masaa Iluam. Masaa Idɔmaitiiya cho haa ni, a fondaŋnda yɛ yɛla nda wa ichali o lɛŋnde leŋ niŋndaŋ.+ Idɔmaitiiya+ yɛ, o pulale Iisɔ leŋ choo nda fula ni.

37 Mi Chekɔpu hiau lachi a challe o lɛŋnde Kenaŋ ndeŋ niŋ, naa finya ndɔ wa ichali o sumialle wa.+

2 Bundɛi a Chekɔpu okɔɔ cho hei ni.

Teleŋ pilɛ, Choosɛ+ wa saa mandaa+ latulu nda puaa Bilihaa+ a Silipa wa,+ laanduaa finya ndɔ wa. Nduyɛ a teleŋ koŋ, Choosɛ wa wɔsilaŋ 17. Mbo kua a yooŋgu wɔɔŋndo a nda okɔɔ o finya nda lo. 3 Choosɛ Isɔluɛi ndoo hiou kaala o chuauwaa nduaa tɛɛŋ kpou,+ kanifuule ndu o velu o yuuwɛi nduɛi niŋ ni. Nduyɛ mbo toosiaa doma vilɛi kɛndɛ kɛndɔɔ mbo ke ndu. 4 Mɛɛ bɛndaa nduaa che maa ndu finya nda hiou kaala a nda kpou, ma kandu ndu yɛleŋ tullo, nduyɛ ndaa chiee lɛ suɛi o ndu lo le.

5 Okoŋ kɔɔli, mi Choosɛ sɔl luaŋ, mbo dimul bɛndaa nduaa a maŋ okɔɔ.+ Le hei, ma chɔɔlu ndu yɛleŋ tul tau. 6 Mbo dimul nda aa: “A yandii, la yaŋ ndɔ nilaŋ o lɔma ya sɔl maŋ ndaŋ. 7 Ŋ wa witiiyoŋ yiiyo naa nyaa o chiɛi niŋ, mi kpɔŋ ya yiiyo chaŋ mbo sim. Okoŋ, mi kpɔŋnda nyalaŋ la huŋ balu kpɔŋ nuu, mi la tunduŋ o kpɔŋ nuu bɛŋgu.”+ 8 Mi bɛndaa nduaa nyuna ndu aa: “Baa a yiyaŋ pa maa num cho wa masaa naa choo ni, nduyɛ miŋ wa num o ba bɛŋgu?”+ Le hei, ma chɔɔlu ndu yɛleŋ tul le lɔma o sɔl laŋ vɛlɛ a nyɛ o dimul nda wo.

9 Okoŋ kɔɔli, mbo sɔl vɛlɛ lɔma cheleŋ, mbo dimul bɛndaa nduaa aa: “I sɔl vɛlɛ lɔma cheleŋ. Kɛ o laŋ niŋ, mi paaleŋ, paŋgei, a looŋ 11 wa ya tundɔŋndo o labɛŋgu niŋ.”+ 10 Okoŋ, mbo kɔ dimul finya ndɔ a bɛndaa nduaa lɔma sɔlaŋ maŋ. Kɛ mi finya ndɔ kpaa ndu, mbo nyuna ndu aa: “Yɛɛnɛ lɔma ŋ sɔl maŋ ndaŋ ma sim yɛ? Baa dimioo ŋ cho ni maa ya, kala num, bɛndaa numnda, a pɔmbɔ num cho num hunɔɔ wulaŋ beŋ?” 11 Le hei, mi bɛndaa nduaa paŋala ndu tau,+ kɛ mi finya ndɔ kɛsiŋ nyɛ o dimi hoo wo o kɔl.

12 Paale pilɛ, mi bɛndaa nduaa kua a chɔluaa finya nda wa Siɛkɛm+ ikɛi le diolaŋ. 13 Okoŋ mi Isɔluɛi dimul Choosɛ aa: “Bɛndaa numnda cho a chɔluaa Siɛkɛm ikɛi. Huŋ, I viam num naa nda chua.” Mi Choosɛ dimi aa: “Awa. I cho lakɔ!” 14 Mbo dimul ndu aa: “A yandii, kɔ tofa bɛndaa numnda a chɔluaa, le sinaa te a cho pɛ kɛndɛ, okoŋ ma huŋ dounuŋ ya kona.” Le hei, mi Choosɛ mal o kpoloŋndo* Hɛbulɔŋ,+ mbo kua ba Siɛkɛm ndo. 15 O lo balɔɔ o pollo niŋ, mi laŋunɔ pilɛ cha ndu. Mbo nyuna ndu aa: “Yɛɛnɛ ŋ cho yɛ nuuviaa?” 16 Mbo mulul ndu aa: “Bɛndaa niaa ya cho nuuviaa ni. A yandii, chɔm ya naa nda kuɛ a chɔluaa wa.” 17 Mi poo dimul ndu aa: “A faŋaŋ nanuŋ. I tuei nda dimulaŋndo aa, ‘La ŋ kɔŋnuŋ Dotaŋ.’” Okoŋ mi Choosɛ tual bɛndaa nduaa kɔɔli, mbo kɔ saaluŋ nda Dotaŋ.

18 Choosɛ lo landaŋ, mi bɛndaa nduaa cha ndu hunɔɔ, okoŋ ma kandu kɛɛsiaa le ndu diyɔɔ. 19 Ma dimulaŋ aa: “La nuawɔ po sɔl luaŋ ndo hunɔɔ!+ 20 Dimioo nuaa mbo fuuluu nanuŋ, ŋ diinuŋ ndu, okoŋ ŋ mal ndu o sooŋ velɛiyo niŋ, ŋ kɔ dɔɔnuŋ kona maa visi biyaa bii ndu mbo dia ndu. Nduyɛ, ŋ cho chɔ nyɛ cho yɔŋnɔŋ a lɔma ndɔma sɔlaŋ ndo.” 21 Mɛɛ Lubɛŋ+ tuei hei, mbo kindiŋ le mbo chiindiaa ndu nda o ba. Mbo dimi aa: “La ŋ diinuŋ ndu le.”+ 22 Mi Lubɛŋ dimul nda aa: “La dii ndu le.+ La yɔŋ ndu nyɛ o nyɛ le.* La mal ndu o sooŋ velɛiyo niŋ nanuŋ o pollo niŋ.”+ O kɛɛsiaa hei le mi ndoo piŋi ndu nda o ba, okoŋ mbo miŋgi ndu o finya ndɔ lo.

23 Dimioo nuaa Choosɛ fuuluu naa bɛndaa nduaa chua, ma soli ndu doma kɛndɛ kɛndɛ wa ndu lekɔɔ wo.+ 24 Ma chua ndu, ma mal ndu o sooŋ velɛiyo niŋ. Nduyɛ a teleŋ koŋ, mɛŋma ve o sooŋndo niŋ te.

25 Okoŋ kɔɔli, ma chal nyɛdiaa dioo. Mɛɛ nda chua hɔlla, ma cha Isimɛlaitiiya+ hunɔɔ kunda, a wa fulaa Kiliaadi. Nyɔɔmiaa ndaa wa kɔlaŋ a tande yɔm labidanɔm ndo, baasam, vɛlɛ a boola yɔmnde.+ Nduyɛ, Ichipi nda wa kɔlaŋ a nyɔɔŋ muŋ ni. 26 Okoŋ, mi Chuda dimul bɛndaa nduaa a pɔmbuaa nduaa aa: “Tɔnɔ yɛɛnɛ naŋ cho yɛ sɔla te ŋ dii pɛ pɔmbɔ naa miŋ kumbu suɛi keŋ?+ 27 Lelaŋ, ŋ pisiŋ ndu+ Isimɛlaitiiya haa o ba. Kɛ ŋ yɔŋnuŋ ndu nyɛ o nyɛ mi tɔɔyaŋ wa naa choo le, kanifuule pɔmbɔ naa o cho ni, nduyɛ kooma piliaŋ naŋ cho ni.” Okoŋ, ma yaŋ ndu nilaŋ. 28 Mɛɛ yulaa Midianaitiiya+ wa hiouwɔɔ, mi bɛnduaa Choosɛ wa soli ndu o sooŋ velɛi koŋ niŋ, ma pisi ndu Isimɛlaitiiya o ba, le kaniŋ humboŋ 20.+ Nduyɛ mi puaa haa kua a Choosɛ Ichipi.

29 Mɛɛ Lubɛŋ miiŋgu o sooŋ velɛi koŋ, o komallɛ Choosɛ leniŋ te. Le hei, mbo sɛɛsiaŋ nyɛlaŋ lekɔɔ. 30 Okoŋ mbo miiŋgu naa pɔmbuaa nduaa chua, mbo dimul nda aa: “Poombɔɔ cho loŋ te! Yɛɛnɛ ya cho yɛ niko tosa?”

31 Okoŋ ma dii chuiŋ piaandoo, ma chua doma Choosɛ wo, ma yiŋ ndu o kooma maŋ niŋ. 32 Okoŋ kɔɔli, ma chua doma kɛndɛ kɛndɛ koŋ, ma yoo finya nda. Ma dimul ndu aa: “Tofawɔ doma naŋ saaluŋ ndo. A yandii, mɛɛndaŋndɔ te o cho doma po numndo le.”+ 33 Mɛɛ o mɛɛndaŋ domaa, mbo dimi aa: “Doma po nuu cho hoo ni! Visi biyaa dii nuaa Choosɛ ni mbo dia ndu!” 34 Mi Chekɔpu sɛɛsiaŋ nyɛlaŋ lekɔɔ, okoŋ mbo baiyaŋ nyɛla labɛkilaŋ o chaŋ, nduyɛ mbo chaŋ po ndɔɔ le palɛi bɔɔbɔɔ. 35 Puaa nduaa a chuauwaa nduaa laanduaa kpou wa ndu nyɔɔloo, kɛ mbo kɛɛ kpooŋ, mbo dimi aa: “I cho lo po nuu chaŋndo haaa mi kuɛ o Sɛiyo*+ niŋ!” Okoŋ mi finya ndɔ hiau lachi a ndu chaŋndo.

36 Mi Midianaitiiya kɔ pisi Choosɛ Ichipi Pɔtifa o ba. Wana bɛndoo o wa o chiɛi lemasa Feloo wo niŋ ni.+ Nduyɛ, ndu wa wanaa manda masaa wa bolleŋ ni.+

38 A boondii keŋ, mi Chuda mɛi bɛndaa nduaa a pɔmbuaa nduaa, mbo kɔ kindu tɛndii ndɔɔ Hilua ikɛi, Adulamaitiinɔɔ. 2 Okoŋ, mi Chuda cha chua laandu Kenanaitiinɔ+ pilɛ, mbo chua ndu mbo hiviŋ ndu kɔɔli. Chuaa hoo finya ndɔ ndoo nɔ diolaŋ ni aa Sua. 3 Mi chuaa hoo chua folioo,* mbo vilul ndu poo. Mbo ke ndu diolaŋ aa Ɛɛ.+ 4 Mbo chua vɛlɛ folioo, mbo vialu poo. Mbo ke ndu diolaŋ aa Onaŋ. 5 Okoŋ kɔɔli, mbo chua vɛlɛ folioo, mbo vialu poo. Mbo ke ndu diolaŋ aa Silua. Akisibi+ o* wa ni mi laa ndɔ vialu Silua.

6 Okoŋ kɔɔli, mi Chuda chuel Ɛɛ po ndɔ tasoo lanɔɔ diolaŋ aa Tamaa.+ 7 Kɛ kaa po ndɔ tasoo hoo ve o kɛndɛ kposoŋ Chɛhowa o hɔl te. Le hei, mi Chɛhowa dii ndu. 8 Lelaŋ, mi Chuda dimul Onaŋ po ndɔ aa: “Chua lanɔ bɛ num mɛiyo o nɔɔ niŋ ma hiviŋ ndu kɔɔli, okoŋ ma vilul bɛ num chuauwa.”+ 9 Kɛ mi Onaŋ sina maa chuauwaa o cho violɔɔ wa ve niŋ chuauwaa ndɔ le.+ Lelaŋ, teleŋ o teleŋ ndaa wa pɛ nda lanɔɔ bɛ ndɔ mbo hiŋ le chiiyo, o faŋaŋ, o chii lɛŋ, yɔŋii o vilul bɛ ndɔ chuauwa.+ 10 Nyɛ o wa hoo tosaa wo wa suɛi wɔɔŋ bɛndu Chɛhowa o hɔl. Lelaŋ, ndu bɛɛ mbo dii ndu.+ 11 Mi Chuda dimul Tamaa, lanɔɔ po ndɔɔ mɛiyo aa: “Challɔ o nɔ cheleŋ te. Kɛ kɔ wa wɔ pɔɔ o chiɛi finya numndo haaa mi Silua po ni sul kaasoŋnɔ.” Kanifuule, Chuda wa siooŋnde maa Silua po ndɔ bɛɛ cho wu mɛɛ puaa nduaa a piliaa vi yɛ.+ Le hei, mi Tamaa kua mbo kɔ wa o chiɛi finya ndɔ wo.

12 Mɛɛ teleŋ tiŋ hiou, mi lanɔɔ Chuda, chua Sua+ wo wu. Mɛɛ Chuda chii laa ndɔ chaŋ, mbo kua Timina+ naa waŋnda wa saa nduaa yiiŋnde kilioo wa nda chaaŋ ndɔ Hilua, Adulamaitiinɔɔ.+ 13 Mi waŋndo dimul Tamaa aa: “Pɔnɔ num vi wo, finya ndɔ cho kɔlaŋ Timina le saa nduaa yiiŋnde kilioo.” 14 Le hei, mi Tamaa soliŋ nyɛla iviila wa ndu lekɔɔ laŋ, mbo wounuŋ nyɛla cheleŋ. Nduyɛ, mbo kumbu hɔlla a kola waaŋgaa wo. Okoŋ, mbo kɔ chal o nɛi chɛŋ Ɛnaim le kɔlaŋ Timina wo sondoo. Kanifuule, mi Tamaa cha maa Silua ndoo sul niŋ kaasoŋnɔ. Kɛ a koŋ kpou, a chɛl mi Tamaa chal Silua o ba o nɔɔ niŋ te.+

15 Mɛɛ Chuda che ndu, mbo yiyaŋ sakpo maa wana lanɔ suundɛiyo o cho ni, kanifuule hɔlla wa ndu a kumbaa mulaa. 16 Mbo kua naa o wa o nɛiyo daŋgala wa, mbo dimul ndu aa: “A yandii, chɛl la mi wa a num.” Kɛ Chuda ve o sina choo maa lanɔ po ndɔɔ mɛiyo+ le. Mi chuaa nyuna ndu aa: “Yɛɛnɛ ŋ cho yɛ ya ke te a wa pɛ a ya?” 17 Mbo muli aa: “I cho chuiŋ fɔŋndɔɔ biyɔɔ o chɔluaa niaa tɛɛŋ mi yɔŋ num.” Kɛ mi chuaa nyuna ndu aa: “Yɛɛnɛ ŋ cho yɛ mɛi o landei bɛŋgu haaa ma hiŋ a ndu?” 18 Mi Chuda nyuna ndu aa: “Yɛɛnɛ ŋ yeema yɛ mi mɛi o landei bɛŋgu?” Mi chuaa muli aa: “Ke ya kelɛi num isuei*+ a yoole ndɔleŋ, vɛlɛ a tinda cho num o ba wo.” Mi Chuda ke ndu nyɔɔŋ muŋ, nduyɛ mbo hiviŋ ndu kɔɔli. Okoŋ, mbo ke ndu folioo. 19 Okoŋ kɔɔli, mi chuaa kuaŋnuŋ mbo kɔ soli nyɛla wa ndu lekɔɔ laŋ, mbo miŋgiŋ nyɛla iviilaŋ lekɔɔ.

20 Mi Chuda ke chaaŋ ndɔ Adulamaitiinɔɔ+ chuiŋ fɔŋndɔɔ le mbo yoo chuaa, okoŋ mbo bii nyɛm o mɛi ndu o ba o landei niŋndoŋ. Kɛ mɛɛ o kuɛ, o seeluŋ ndu le. 21 Mbo kɔ nyuna puaa wa loŋ nda aa: “Kuɛɛnɛ wana lanɔ suundɛi* chal o nɛiyo daŋgala Ɛnaim ndo cho yɛ?” Ma mulul ndu aa: “Kani bɛɛ ŋ chi wɔ wana lanɔ suundɛi waa lende nanuŋ te.” 22 O mɛɛlulaŋ kpɔŋ, mbo miiŋgu naa Chuda chua. Mbo kɔ dimul ndu aa: “I seeluŋ ndu le. Nduyɛ o fulawɔ okoŋ kɔɔli, puaa cho loŋ nda dimul la maa, kani bɛɛ a chi wɔ wana lanɔ suundɛi loŋ te.” 23 Mi Chuda dimi aa: “Nyɛm muŋ wa niko le ndu, yɔŋii naŋ lo nyunaa le muŋ mi siɔmbulaŋ la bii naa. O kpeekpei niŋ, ndu ya yɔŋ chuiŋ fɔŋndɔɔ hoo ni, kɛ a seeluŋ ndu le.”

24 Kɛ mɛɛ paŋgoŋ hiou ŋgaa, ma dimul Chuda aa: “Lanɔ po numndo mɛiyo kɔ suunda, mbo chua folioo.” Le hei, mi Chuda dimi aa: “La soli ndu o bɛɛ mi la lom ndu chilikɔ.”+ 25 Mɛɛ nda wa Tamaa solioo o bɛɛ, mbo yɔŋ diomndeŋ o finyaa pɔnɔ ndɔ lo aa: “Wana nɔ nyɔɔŋ muŋ ndo ke ya folioo ni.” Mi chuaa chɔɔlu dimi aa: “A yandii, mɛɛndaŋndɔ ma sina wana nɔ kelɛi hei a yoole ndɔleŋ ndo, vɛlɛ a tindaa hoo.”+ 26 Mɛɛ Chuda mɛɛndaŋ nyɔɔŋ muŋ, mbo dimi aa: “Chuaa hoo sandu mbo hiau ya poloŋ, kanifuule I ke ndu Silua po ni le.”+ Nduyɛ chɔŋ niŋ a boondii keŋ, o hiviŋ lɛ ndu kɔɔli le.

27 Mɛɛ teleŋndo fuuluu le mi Tamaa velu, pɛnduaa wa ndu o dembe ni. 28 Mɛɛ o wa violɔɔ, mi chɛlɛkpɔɔ o pilɛ soli baa. O lepilɛ niŋ kpe, mi wana lanɔ bii violɔɔ wo chua kɛi siaŋaa, mbo baa chɛlɛkpɔɔ o ba. Mbo dimi aa: “O tase hiŋ ndo cho hoo ni.” 29 Kɛ dimioo nuaa chɛlɛkpɔɔ o miŋgi baa, mi poombɔɔ o pilɔɔ fula. Mi wana lanɔ bii violɔɔ wo dimi aa: “Vɛɛnɛ num looku yɛ dɔɔ kala num fula o dembe nuaa?” Okoŋ ma ke ndu diolaŋ aa Piluɛsi.* + 30 Okoŋ kɔɔli, mbo vialu poombɔɔ o pilɔɔ a kɛi siaŋaa ndu o yiyaa o ba. Ma ke ndu diolaŋ aa Siluaa.+

39 Mɛɛ nda kuɛ a Choosɛ Ichipi,+ mi Ichipiaŋnɔ pilɛ diolaŋ aa Pɔtifa+ piandu ndu Isimɛlaitiiyaa+ ndaa kuɛ a ndu loŋ nda o ba. Wana bɛndoo pila Pɔtifa wa o chiɛi lemasa Feloo wo niŋ ni. Nduyɛ, ndu wa wanaa manda Feloo wa bolleŋ ni. 2 Kɛ Chɛhowa wa latulu a Choosɛ.+ Le hei, mbo sɔla batiuwaa o nyɛ o nyɛ niŋ. Nduyɛ mi masanɔ ndɔɔ, Ichipiaŋnɔ koŋ kɛsi ndu chiɛi ndɔɔ chilaŋ. 3 Mi masanɔ ndɔɔ cha maa Chɛhowa wa latulu a ndu, nduyɛ maa Chɛhowa wa ndu malaa mbo wa batiuwaa sɔlaa o nyɛ o nyɛ o wa tosaa niŋ.

4 Mi Choosɛ simnuŋ wana sɔvɛ Pɔtifa o hɔl, nduyɛ mbo simnuŋ buɛi ndɔ kɔllo. Le hei, mbo kɛsi ndu chiɛi ndɔɔ chilaŋ, nduyɛ nyɛ o nyɛ ndoo nɔ, mbo mal ndu o ba. 5 Chɔŋ a teleŋ o kɛsi Choosɛ chiɛi ndɔɔ chilaŋ, nduyɛ mbo mal ndu nyɛ o nyɛ ndoo nɔ o ba wo, mi Chɛhowa hiau lachi a chiɛi po Ichipiaŋnɔɔ hoo salaa dɔwɔɔ le sabu Choosɛ wo. Nyɛ o nyɛ ndoo nɔ o ndu lo chiɛiniŋ a o yondola ndɔlaŋ niŋ, mi Chɛhowa duau laŋ sala.+ 6 Nyɛ o nyɛ Pɔtifa ndoo nɔ, mbo mal Choosɛ o ba. Ndoo buulaŋ lɛ a nyɛ o nyɛ le, mɛɛ nyɛdiaa ndoo dia wo kinɛi. Choosɛ waŋnuŋ nyɛkɛndɛi o dialloŋ niŋ, nduyɛ naŋɔɔ pila ndoo naŋ ni.

7 Okoŋ kɔɔli, mi lanɔɔ Pɔtifa luɛi Choosɛ lehɔl, mbo dimul ndu aa: “Huŋ wa a ya.” 8 Kɛ mbo kɛɛ. Mbo dimul lanɔɔ masanɔ ndɔɔ aa: “Le sabu ya cho hoo nanuŋ ndo, nyɛ o nyɛ masanɔ nuu nɔ, o buulaŋ lɛ a ndu le. Nduyɛ nyɛ o nyɛ o nɔ, ya o mal o ba ni. 9 Wana o wana cho o chiɛiyo hoo niŋ mbo nɔ kpaayaa mbo hiou ya le. Nduyɛ, o hendul lasawa o nyɛ o nyɛ choo le, mɛɛ num, kanifuule laa ndɔ ŋ cho ni. Vɛ mi tosa suɛi kɔl vesɛi bɛnduii waa nuaa, nduyɛ mi tosa hakioo a Mɛlɛka?”+

10 Lepaa o lepaa, o wa suɛi o Choosɛ lo, kɛ Choosɛ chɛl le mbo wa a ndu, ɔɔ ma wa nda ŋiɔɔŋ kpeele le. 11 Kɛ paale pilɛ, mi Choosɛ luɛi chiɛiniŋ le wali ndɔɔ tosaa, nduyɛ buɛi kɛ kɛ ve loŋ te. 12 Okoŋ, mi chuaa kɔ saa ndu domaa, mbo dimul ndu aa: “Wa a ya!” Kɛ mi Choosɛ mɛi ndu doma ndɔɔ o ba, mbo fulaŋ o bɛɛ a kiltaŋ. 13 Dimioo nuaa o che maa Choosɛ mɛi ndu doma ndɔɔ o ba mbo fulaŋ o bɛɛ a kiltaŋ, 14 mbo kandu chaŋndo choo choo kpeleŋ o puaa wa o ndu lo chiɛiniŋ nda lo, mbo dimul nda aa: “La che nɛ! O chuu naa po Hibuluinɔɔ hoo le mbo siiŋguu naa nyɛ mamaa. Mɛɛ o hiŋ le mbo wa a ya, mi kandu chaŋndo choo choo kpeleŋ. 15 Dimioo nuaa mi mal yioo, mbo mɛi ya doma ndɔɔ o ba, mbo fulaŋ o bɛɛ a kiltaŋ.” 16 Okoŋ kɔɔli, mi chuaa kɛsiŋ doma koŋ ikɛi haaa mi Choosɛ masanɔ ndɔɔ miiŋgu chiɛiniŋ.

17 Okoŋ, mbo dimul ndu nyɛ pilɛ koŋ kpe aa: “Mi po Hibuluinɔ ŋ chuu naa hoo wo luɛi ya hau choo le ya kpuuwaa.* 18 Kɛ dimioo nuaa mi mal yioo choo choo kpeleŋ, mbo mɛi ya doma ndɔɔ o ba, mbo fulaŋ o bɛɛ a kiltaŋ.” 19 Mɛɛ masanɔ ndɔɔ tuei dɔɔ nyɛ laa ndɔ dimul ndu wo aa: “Nyɛ buɛi numndo tosal la wo cho hoo ni,” mbo duaunuŋ tumbe o kala kala. 20 Le hei, mi Pɔtifa chua Choosɛ mbo kɔ mal ndu o chiɛi manyumndo niŋ, naa masaa ndoo duau waŋnda o chiɛi manyumndo niŋnda, nduyɛ mbo wa loŋ o biyɔɔ niŋ.+

21 Kɛ Chɛhowa wa latulu a Choosɛ, nduyɛ o wa ndu kaala lo lechoo wo chɔmndo. Mbo duau ndu sala, nduyɛ mi wana wa chiɛi manyumndo bolleŋ ndo+ hɛnaŋ a suɛi nduɛi. 22 Le hei, mbo kɛsi Choosɛ wanaa wa o chiɛi manyumndo niŋnda kpou chilaŋ. Nduyɛ wali kɛ kɛ nda wa tosaa loŋ, Choosɛ wa ndu hɔlteŋ ni.+ 23 Wana wa chiɛi manyumndo bolleŋ ndo ndoo buulaŋ lɛ a nyɛ o nyɛ Choosɛ wa tosaa wo le. Kanifuule, Chɛhowa wa a Choosɛ latulu, nduyɛ mi Chɛhowa tosa mbo sɔla batiuwaa o nyɛ o nyɛ o wa tosaa niŋ.+

40 Okoŋ kɔɔli, mi masa wanaa talal masaa Ichipi muɛiyaŋ nda,+ a masa wanaa lum ndu beediiyo* wa tɛɛmbuu masaa Ichipi kɔllo. 2 Le hei, mi Feloo duaunuŋ tumbe tau a buɛiyaa nduaa ŋiɔɔŋnda haa.+ 3 Mbo kɔ mal nda o chiɛi manyumndo niŋ, o chiɛi wana bɛndu wanaa manda masaa wa+ niŋ. Nduyɛ, loŋ Choosɛ wa o biyɔɔ niŋ ni.+ 4 Okoŋ, mi wana bɛndu wanaa manda masaa wa dimul Choosɛ le mbo wa nda malaa.+ Nduyɛ, ma viau o chiɛi manyum koŋ niŋ le teleŋ tiŋ.*

5 Ichɔl pilɛ, mi masa wanaa tala muɛiyaŋ nda, a masa wanaa luam beediiyo le masaa Ichipi wa, o kɛ kɛ sɔl luaŋ o chiɛi manyumndo niŋ. Nduyɛ lɔma sɔlaama kɛ kɛ maa nɔ tɛɛsiaa ndɔɔ. 6 Diimandɔɔ, mɛɛ Choosɛ luɛi naa nda wa wa, mbo cha maa a cho a kɔlta tambɛilaŋ. 7 Okoŋ, mbo nyuna buɛiyaa Feloo wa, a wa o biyɔɔ niŋ o chiɛi masanɔ ndɔɔ niŋnda aa: “La vɛ hau hɔlla yiiyo nuaa?” 8 Ma mulul ndu aa: “Naa ŋiɔɔŋ kpou sɔl luaŋ, kɛ ŋ nɔ wana tɛɛsial naa maŋ te.” Mi Choosɛ dimul nda aa: “Baa o cho Mɛlɛka le cho wana tɛɛsiaa lɔma sɔlaŋ ndo le?+ A yandii, la dimullɔ ya lɔma nya sɔl laŋ.”

9 Mi masa wanaa tala muɛiyaŋ nda chɔm Choosɛ lɔma o sɔl laŋ. Mbo dimul ndu aa: “O lɔma ya sɔl laŋ niŋ, mi cha yɔm makilepiiyo ya lachi. 10 Yɔm makilepiiyo hoo ndoo nɔ lɛuwoŋ ŋgaa. Nduyɛ mi lɛuwoŋ muŋ pui, miŋ yandu, miŋ kuam kilepiiyaŋ kpɔŋjɔlaŋ, okoŋ mi ma diu. 11 Taala Feloo wo wa ya o ba, mi kendi kilepiima maŋ, mi wayiaa maŋ o taala ndɔɔ niŋ, mi ke ndu.” 12 Okoŋ, mi Choosɛ dimul ndu aa: “Lɔma ŋ sɔl laŋ, tɛɛsiaa ndɔɔ cho hoo ni: Lɛuwuŋ ŋgaa woŋ sim le palɛi i yaa. 13 O palɛi i yaa bɛŋgu, Feloo cho num soli* mbo miŋgi num o foofo numndo.+ A cho wa ndu muɛiyaŋ talallo, mɛɛ num oo tosa paandu yɛ.+ 14 Nduyɛ te sɔɔŋ kɔ bɛnda pɛ a num, yandii loonuŋ a ya. Chɔm ya kaala lo lechoo wo ma soo o Feloo lo a ya okɔɔ, le halikpeŋ mbo soli ya nanuŋ. 15 O kpeekpei niŋ, o lɛŋnde Hibului leŋ+ niŋ nda bii ya ni ma huŋ a ya nanuŋ. Nduyɛ nanuŋ bɛɛ, I tosa suɛi wɔɔŋ o suɛi wɔɔŋ nda nɔ ma dɔu ya o chiɛi manyum* niŋ te.”+

16 Mɛɛ masa wanaa luam beediiyo wa che maa nyɛ Choosɛ tɛɛsiaa wo bɛnda, mbo dimul ndu aa: “Ya bɛɛ o lɔma ya sɔl laŋ niŋ, kambɛilaŋ la wa ya o lebol la yaa a beedii humboo leniŋ. 17 Nduyɛ, beediila yɛ yɛlaŋ la wa o kambɛi wa lechoo wo niŋ le Feloo, mi youwa wa laŋ dioo ya o lebol.” 18 Mi Choosɛ dimul ndu aa: “Lɔma ŋ sɔl laŋ, tɛɛsiaa ndɔɔ cho hoo ni: Kambɛila yaa laŋ la sim le palɛi i yaa. 19 O palɛi i yaa bɛŋgu, Feloo cho num bolleŋ kiolɔɔ, okoŋ mbo landu num o yɔmndo choo, mi youwa de dialuŋ numndoŋ.”+

20 Nduyɛ, Feloo ndoo nɔ dunyɛi paale ndɔle vialaŋndeŋ+ o paale yaa ndɔleŋ choo. Le hei, mbo toosiaa nyɛdiaa le buɛiyaa nduaa kpou. Okoŋ, mbo soli* masa wanaa tala muɛiyaŋ nda, a masa wanaa luam beediiyo wa buɛiyaa nduaa o hɔl. 21 Mi Feloo miŋgi masa wanaa tala muɛiyaŋ nda o foofo ndɔɔ, nduyɛ mbo hiau lachi a ndu muɛiyaŋ talallo. 22 Kɛ mbo landu masa wanaa luam beediiyo wa o yɔmndo choo, mɛɛ Choosɛ tɛɛsial nda yɛ.+ 23 Kɛ masa wanaa tala muɛiyaŋ nda loonuŋ a Choosɛ okɔɔ le. Mbo puɛɛnuŋ a ndu okɔɔ pɔli.+

41 Mɛɛ wɔsilaŋ la hiou la tiɔɔŋ, mi Feloo sɔl luaŋ,+ mbo wa isisi o Pioo Nail kɔŋgɔ. 2 O wa loŋ, mbo cha nauwaa chelulɛiyaa kɛndɛ kɛndiaa a ŋɔmmɛu, a wa fulaa o Pioo Nail niŋ, ma wa bil wa o pioo kɔŋgɔ wo dioo.+ 3 Okoŋ kɔɔli, mbo cha vɛlɛ nauwaa ŋɔmmɛu cheleŋ fulaa o Pioo Nail niŋ. A wa a wɔɔŋ wɔɔŋ, nduyɛ a wa a nyawɛi sɛɛŋ. Ma sim nauwaa chelulɛiya ikɛi, o Pioo Nail kɔŋgɔ. 4 Okoŋ, mi nauwaa wɔɔŋ wɔɔŋaa nyawɛiya kandu nauwaa ŋɔmmɛuwaa chelulɛiyaa kɛndɛ kɛndiaa dioo. Nduyɛ, mi Feloo tiandu o luaŋ.

5 Okoŋ kɔɔli, mbo miiŋgu vɛlɛ o luaŋ, mbo sɔl lɔma cheleŋ. Mbo cha yasala ŋwitiilaŋ la ŋɔmmɛu fulaa o bɛŋgu ŋwitiiyo, nduyɛ la wa la kuamaa lɔpi lɔpi.+ 6 Okoŋ kɔɔli, mbo cha vɛlɛ yasala ŋwitiilaŋ la ŋɔmmɛu fulaa o bɛŋgu ŋwitii cheleŋ. Kɛ la wa la nyamalɛi a hueiyii tuu fula ba paaleŋ le chaŋ ndo ve. 7 Okoŋ, mi yasala nyamalɛilaŋ la kandu yasala ŋɔmmɛula wa la kuamaa lɔpi lɔpi laŋ misi misioo. Okoŋ kɔɔli, mi Feloo tiandu o luaŋ, mbo sina maa luaŋ o wa sɔllo ni.

8 Mɛɛ paaleŋ le sɛ, mi Feloo luɛi o buulaŋ bɛndoo niŋ. Le hei, mbo yooŋgu le wanaa maŋgalaa a wanaa taasiaa kpou o Ichipi niŋ. Mi Feloo chɔm nda lɔma o sɔl laŋ, kɛ wana o wana nɔla ndu maŋ tɛɛsial te.

9 Okoŋ, mi masa wanaa talal Feloo muɛiyaŋ nda dimul Feloo aa: “I chɔɔmuu wɔ hau hakila nilaŋ. 10 Paale pilɛ, mi Masaa Feloo duaunuŋ tumbe a buɛiyaa nduaa. Mbo kɔ mal la o chiɛi manyumndo niŋ, o chiɛi wana bɛndu wanaa manda Masaa Feloo wa niŋ, latulu a masa wanaa lum ndu beediiyo* wa.+ 11 Ichɔl pilɛ, mi naa ŋiɔɔŋ kpou sɔl luaŋ. Nduyɛ, wana o wana lɔma o sɔl laŋ maa nɔ tɛɛsiaa o ndɔɔ.+ 12 Laŋunɔ Hibuluinɔ pilɛ wa a naa latulu loŋ, buɛiyo o cho ni le wana bɛndu wanaa manda numnda.+ Mɛɛ naŋ chɔm ndu lɔma naŋ sɔl laŋ,+ mbo tɛɛsial naa nyɛ lɔma sɔlaama kɛ kɛ sim ndo. 13 Mi i yɔŋnuŋ mɛɛ o tɛɛsial naa maŋ yɛ. Ma miŋgi ya o wali nuu niŋ, kɛ ma landu poo o pilɔɔ.”+

14 Okoŋ mi Feloo yooŋgu le Choosɛ,+ ma kɔ soli ndu chɔ chɔ o chiɛi manyumndo* niŋ.+ Mbo sendi, nduyɛ mbo siŋga nyɛla wa ndu lekɔɔ laŋ, okoŋ mbo kua naa Feloo chua. 15 Mi Feloo dimul Choosɛ aa: “I sɔl luaŋ, kɛ wana o wana cho mbo tɛɛsial la maŋ te. Nduyɛ, I tuei maa te waŋndo dimul num pɛ lɔma o sɔl laŋ, a nɔla ma tɛɛsial ndu maŋ.”+ 16 Mi Choosɛ dimul Feloo aa: “I nɔla maŋ tɛɛsiaa a ba ni le. Kɛ, Mɛlɛka pila cho num dimul yooŋgu o nɔ le numndo.”+

17 Okoŋ mi Feloo dimul Choosɛ aa: “Mɛɛ ya sɔl luaŋ, mi wa isisi o Pioo Nail kɔŋgɔ. 18 I wa loŋ, mi cha nauwaa chelulɛiyaa kɛndɛ kɛndiaa a ŋɔmmɛu, a wa fulaa o Pioo Nail niŋ, ma wa bil wa o pioo kɔŋgɔ wo dioo.+ 19 Mi cha vɛlɛ nauwaa cheleŋ a ŋɔmmɛu fulaa o Pioo Nail niŋ. A wa a wɔɔŋ wɔɔŋ, nduyɛ a wa a nyawɛi sɛɛŋ. Kani bɛɛ I chi wɔ nauwaa wɔɔŋ waa nuaa o lɛŋnde Ichipi leŋ niŋ kpou le. 20 Nduyɛ, mi nauwaa nyawɛiya kandu nauwaa chelulɛi ŋɔmmɛuwaa tasiaa fula wa dioo. 21 Kɛ mɛɛ nda chii nda dio, wana o wana ndoo sina bɛɛ pɛŋ maa a de nda le, kanifuule a wa a wɔɔŋ wɔɔŋ mɛɛ nda wa o tasela ndɔ yɛ. Okoŋ, mi tiandu o luaŋ.

22 “Okoŋ kɔɔli, mi sɔl vɛlɛ lɔma cheleŋ. Mi cha yasala ŋwitiilaŋ la ŋɔmmɛu fulaa o bɛŋgu ŋwitiiyo. Nduyɛ, la wa la kuamaa lɔpi lɔpi.+ 23 Mi cha vɛlɛ yasala ŋwitiila cheleŋ la ŋɔmmɛu fulaa o bɛŋgu ŋwitiiyo, kɛ la wa la nyamalɛi a hueiyii tuu fula ba paaleŋ le chaŋ ndo ve. 24 Okoŋ, mi yasala nyamalɛilaŋ la kandu yasala ŋɔmmɛula wa la kuamaa lɔpi lɔpi laŋ misi misioo. Le hei, mi dimul wanaa maŋgalaa lɔmasɔlaŋ maŋ,+ kɛ wana o wana nɔla ya maŋ tɛɛsial te.”+

25 Okoŋ mi Choosɛ dimul Feloo aa: “Lɔma yɛ yɛ ma ŋ sɔl laŋ, nyɔɔ o pilɛ kpe ma sim ni. Mɛlɛka tonyaa chii Feloo chɔm nyɛ o cho hunɔɔ tosa wo.+ 26 Nauwaa ŋɔmmɛuwaa kɛndɛ kɛndiaa ŋ che wa, a sim le wɔsilaŋ la ŋɔmmɛu. Nduyɛ, yasala ŋɔmmɛula ŋ che mi la wa la kuamaa lɔpi lɔpi laŋ, la sim le wɔsilaŋ la ŋɔmmɛu. Lɔma yɛ yɛ ma ŋ sɔl laŋ, nyɔɔ o pilɛ kpe ma sim ni. 27 Nauwaa ŋɔmmɛuwaa wɔɔŋ wɔɔŋ ŋ che fulaa, nduyɛ ma wa a nyawɛi ya, a sim le wɔsilaŋ la ŋɔmmɛu. Yasala ŋɔmmɛula ŋwitii hueiyii fula ba paaleŋ le chaŋ ndo ve i nyamaliaa laŋ, la sim le yima bɛnduaŋ wɔsilaŋ la ŋɔmmɛu. 28 A mɛɛ ya dimul num yɛ masanɔ nuu, nyɛ Mɛlɛka tonyaa kɛɛsiaa le tosaa wo o chɔm num ni, Feloo.

29 “Le wɔsilaŋ la ŋɔmmɛu, nyɛdiaa cho wa o hɔbɛi o lɛŋnde Ichipi leŋ niŋ kpou. 30 Kɛ okoŋ kɔɔli, yima bɛnduaŋ ma cho delɔɔ o lɛŋndeŋ niŋ le wɔsilaŋ la ŋɔmmɛu. Nduyɛ, waŋnda cho puɛɛnɔŋ a boondii nyɛdiaa wa o hɔbɛi o lɛŋnde Ichipi leŋ niŋnde. Yiaaŋ ma cho lɛŋndeŋ sɔɔsiaa.+ 31 Yima bɛnduaŋ maŋ ma cho tosa mi waŋnda puɛɛnuŋ a boondii nyɛdiaa wa o hɔbɛi o lɛŋndeŋ niŋnde, kanifuule yima maŋ ma wɔu niŋ bɔɔ. 32 Bɛmbɔɔ le diiŋ Feloo sɔl luaŋ maŋ ni, kanifuule Mɛlɛka tonyaa kɛɛsiaa le hei kpou tosaa ni. Nduyɛ, Mɛlɛka tonyaa cho suŋ tosa mi i yɔŋnuŋ.

33 “Lelaŋ, Feloo nuuviaa wana nɔ kɔl kaloo a taasiaa wo, mbo ke ndu kpaayaa lɛŋnde Ichipi leŋ kpou choo. 34 Feloo nɔ mbo tosa nyɛ. O hɛli simlachiaa o lɛŋndeŋ niŋ, okoŋ ma chua o ŋuɛɛnu ndɔɔ o tɔlɔɔla waŋnda choo, boondii nyɛdiaa cho wa o hɔbɛi o lɛŋnde Ichipi leŋ niŋ le wɔsilaŋ la ŋɔmmɛu ve.+ 35 Nyɛdiaa nda cho koŋ waŋnda biu biu o laba o wɔsila kɛndɛla cho hunɔɔ laŋ niŋ kpou wo, a chuuŋgiaa ndu o chieeŋ bɛndoŋ niŋ, mbo wa o kɛsiaa loŋ. Nduyɛ, le Feloo nyɛdiaa koŋ cho wa ni.+ 36 Boondii yima bɛnduaŋ ma cho wa o lɛŋnde Ichipi leŋ niŋ le wɔsilaŋ la ŋɔmmɛu ve, nyɛdiaa koŋ wa niŋ yɔŋgɔŋndo o lɛŋndeŋ niŋ ni, le halikpeŋ waŋnda chuu a yiaaŋ te.”+

37 Mi Feloo a buɛiyaa nduaa kpou naŋ kɔl a kɛɛsiaa hoo. 38 Okoŋ, mi Feloo dimul buɛiyaa nduaa aa: “Nyina Mɛlɛkaa cho poo hoo choo. Baa ŋ nɔla pa miŋ saaluŋ wana cheleŋ maa ndu?” 39 Mi Feloo dimul Choosɛ aa: “Mɛɛ Mɛlɛka tosa ma sina sɔɔŋ muŋ kpou yɛ, wana o wana cheleŋ cho mbo nɔ kɔl kaloo a taasioo maa num te. 40 Lelaŋ, num cho wa chiɛi nuu chilaŋ ni. Nduyɛ wanaa niaa kpou, nyɛ o nyɛ ŋ dimul nda pɛ le tosaa, a cho num diikɔŋ.+ Ya kinɛi cho num hiouwɔɔ kpaayaa ni, kanifuule ya cho masaa ni.” 41 Mi Feloo chɔɔlu Choosɛ dimul aa: “I handu num lɛŋnde Ichipi leŋ kpou bolleŋ.”+ 42 Okoŋ, mi Feloo soliŋ kelɛi* nduɛi o iso,* mbo wou Choosɛ o iso. Mbo wou ndu nyɛla feŋgbɛla kɛndɛ kɛndɛlaŋ, mbo wou vɛlɛ ndu yɔlɔŋ ŋkooliiyoŋ o labolo. 43 Okoŋ kɔɔli, mbo tosa mi Choosɛ chal o nyɛ ndɔ nyaanaŋ diiŋ ndɔ lemasa suaa naŋndo niŋ, ma wa balɔɔ a ndu. Nduyɛ, waŋnda wa kɔlaŋ a ndu dimioo lachi aa, “Avilɛki.”* Mɛɛ nuaa Feloo handu Choosɛ lɛŋnde Ichipi leŋ kpou bolleŋ ni.

44 Mi Feloo chɔɔlu Choosɛ dimul aa: “Ya cho Feloo ni. Kɛ te o cho ma chɛl te, wana o wana nɔ di mbo tosa nyɛ* o lɛŋnde Ichipi leŋ niŋ kpou le.”+ 45 Okoŋ kɔɔli, mi Feloo ke Choosɛ diolaŋ aa Safɛnati-paniaa. Nduyɛ mbo ke ndu Asinati,+ chua Pɔtifilua wo, wana soliaa lasalaa o Ɔŋ* niŋ le mbo wa laa ndɔ. Okoŋ mi Choosɛ kandu chilaŋ chuaa* o lɛŋnde Ichipi leŋ niŋ.+ 46 Choosɛ wa wɔsilaŋ 30+ mbo kandu wallo le Feloo, masaa le Ichipi.

Okoŋ mi Choosɛ mɛi Feloo, mbo kɔ balu o lɛŋnde Ichipi leŋ niŋ kpou. 47 Wɔsila ŋɔmmɛula nyɛdiaa wa o hɔbɛi laŋ, tɔlɔɔlaŋ la wa naŋɔɔ tau tau o lɛŋndeŋ niŋ. 48 Wɔsila ŋɔmmɛula laŋ kpou, Choosɛ wa hiouwɔɔ lachi a nyɛdiaa chuuŋgiaa o lɛŋnde Ichipi leŋ niŋ, mbo kɛsi ndu o chieeŋ bɛndoŋ niŋ. O chiee bɛndu kɛ kɛ niŋ, o wa nyɛdiaa wa fulaa o chiɔɔŋ niŋ o tanda koŋ niŋndo kɛsioo loŋ. 49 Mi Choosɛ hiau lachi a nyɛdiaa chuuŋgiaa tau tau. Nduyɛ, mi nyɛdiaa kui mɛɛ siooŋnde wa nuaa o pee mɛŋma ihɛllo kɔŋgɔ yɛ. O mɛɛlulaŋ kpɔŋ, a ve lɛ ndu tuu le, kanifuule ndaa nɔla lɛ ndu tuu le.

50 Tuupa mi wɔsi yima bɛnduaŋ ma del lo fuuluu, mi Asinati, chua Pɔtifilua wo, wana soliaa lasalaa o Ɔŋ* niŋ vilul Choosɛ puaa a ŋiɔɔŋ.+ 51 Mi Choosɛ ke po ndɔ tasoo diolaŋ aa Manaasɛ.*+ Mbo dimi aa, “Mɛlɛka tosa mi puɛɛnuŋ a bahawɛila nilaŋ kpou, vɛlɛ a yeemɛi ya nɔ le yuŋgu finya nuu ve.” 52 Mbo ke o pilɔɔ diolaŋ aa Ifiluem.*+ Mbo dimi aa, “Mɛlɛka tosa mi kui o lɛŋnde ya wa mɔnɛi biyɔɔ leŋ niŋ.”+

53 Okoŋ, mi wɔsila ŋɔmmɛula nyɛdiaa wa o hɔbɛi o lɛŋnde Ichipi leŋ niŋndaŋ la mɛɛlu.+ 54 Okoŋ kɔɔli, mi wɔsila ŋɔmmɛula yima bɛnduaŋ la kanduŋ, a mɛɛ Choosɛ ndoo dimi yɛ.+ Mi yima bɛnduaŋ ma tiu ba o ba fee o lɛŋnde niŋ, kɛ nyɛdiaa* wa ba o ba fee o lɛŋnde Ichipi leŋ niŋ.+ 55 O mɛɛlulaŋ kpɔŋ, mi yima bɛnduaŋ ma tiu o lɛŋnde Ichipi leŋ niŋ kpou. Okoŋ mi waŋnda kandu chaŋndo naa Feloo chua le nyɛdiaa.*+ Mi Feloo dimul waŋnda Ichipi kpou aa: “La kɔ o Choosɛ lo, nduyɛ nyɛ o nyɛ o dimul nya pɛ, la tosa.”+ 56 Mi yima bɛnduaŋ ma hiau lachi a waa ba o ba fee o lɛŋndeŋ choo.+ Okoŋ mi Choosɛ kandu chiɛila ndoo kɛsi nyɛdiaa laŋ kpou kuumbuuwo, mbo pisi waŋnda Ichipi nyɛdiaa o ba.+ Kanifuule, yiaaŋ ma wa waŋnda saaŋgiaa kpeekpei o lɛŋnde Ichipi leŋ niŋ. 57 O fulawɔ okoŋ kɔɔli, waŋnda wa fulaa ba o ba fee, ma huŋ Choosɛ nyɛdiaa piondɔɔ o ba o lɛŋnde Ichipi leŋ niŋ, kanifuule yiaaŋ ma wa waŋnda saaŋgiaa kpeekpei o lɛŋndeŋ choo kpou.+

42 Mɛɛ Chekɔpu tuei maa nyɛdiaa cho Ichipi,+ mbo nyuna puaa nduaa aa: “La vɛ challe nuaŋnaŋndo hoo?” 2 Mbo chɔɔlu dimi aa: “I tuei maa nyɛdiaa cho Ichipi. Lelaŋ, la kɔ loŋ mi la kɔ pindul naa nyɛdiaa, yɔŋii naŋ wu a yiaaŋ.”+ 3 Okoŋ, mi bɛnduaa Choosɛ wa+ ŋwaŋ tɔ mal, ma kua nyɛdiaa piondɔɔ Ichipi. 4 Kɛ Chekɔpu chɛl mi Bɛŋjamiŋ,+ pɔmbɔɔ Choosɛ kuɛ nda bɛndaa nduaa latulu le. Kanifuule mbo dimi aa: “Naapum mi kpundɛ wɔɔŋ wɔɔŋndo komal ndu o nɛi tɛɛŋ.”+

5 Okoŋ, mi Isɔluɛi puaa nduaa kua latulu nda wanaa wa kɔlaŋ nyɛdiaa piondɔɔ wa, kanifuule mi yima bɛnduaŋ ma tiu o lɛŋnde Kenaŋ ndeŋ niŋ kpou.+ 6 Choosɛ wa wana bɛndoo o lɛŋndeŋ niŋ ni.+ Nduyɛ, ndu ndoo pisi waŋnda o lɛŋndeŋ choo kpou nyɛdiaa o ba ni.+ Mi bɛnduaa Choosɛ wa huŋ ma beŋ ndu wulaŋ, okoŋ ma fuuluu hɔlla lɛŋ.+ 7 Dimioo nuaa mi Choosɛ cha bɛndaa nduaa, mbo sina nda. Kɛ o chɔɔmuŋ nda le.+ Mbo suaa o nda lo a hɔlla a tuu kpɛi. Mbo nyuna nda aa: “Kuɛɛnɛ nya fula yɛ?” Ma mulul ndu aa: “O lɛŋnde Kenaŋ ndeŋ niŋ naŋ fula ni miŋ huŋ nyɛdiaa piondɔɔ.”+

8 Mi Choosɛ sina bɛndaa nduaa, kɛ nda sina ndu le. 9 O lepilɛ niŋ kpe, mi Choosɛ loonuŋ a lɔma ndoo sɔl a nda okɔɔ waŋ.+ Mbo dimul nda aa: “Suaŋsuaŋnda nya cho ni! La hiŋ mɛɛndaŋndo le chɔɔ naa nya del lɛŋnde naaleŋ choo a sɔŋgɔɔ wa!” 10 Okoŋ ma dimul ndu aa: “Sako masanɔ naa! Nyɛdiaa buɛiyaa numnda hiŋ piondɔɔ ni. 11 Naa kpou finya pilɔɔ velu naa ni. Nduyɛ, wanaa sakpuaa naŋ cho ni. O cho lesuaŋsuaŋ te buɛiyaa numnda hiŋ te.” 12 Kɛ mbo dimul nda aa: “I laalaŋ te. La hiŋ mɛɛndaŋndo le chɔɔ naa nya del lɛŋnde naaleŋ choo a sɔŋgɔɔ wa!” 13 Okoŋ ma dimul ndu aa: “Puaa 12 buɛiyaa numnda cho ni.+ Naa kpou finya pilɔɔ velu naa ni+ o lɛŋnde Kenaŋ ndeŋ niŋ. Lumndo cho a finya naa latulu,+ kɛ o pilɔɔ ndu cho lɛ le.”+

14 Kɛ mi Choosɛ dimul nda aa: “I dimi fau. ‘Suaŋsuaŋnda nya cho ni!’ 15 Le saboo hoo, I cho nya tofa le sinaa te tonyaa nya cho dimioo ni. I mɛnaŋ po o Feloo lo maa haaa mi pɔmbɔ nya lumndo hiŋ, la feŋaŋ o fondaa hoo le.+ 16 La viom wana pilɛ o nya tɛɛŋ mbo kɔ huŋ a pɔmbɔ nya, mi a tuaa lo nanuŋ o biyɔɔ niŋ. O hei niŋ, I cho sina te tonyaa kɛsɛ nya cho dimioo ni. Te o cho koŋ te, I mɛnaŋ po o Feloo lo maa, suaŋsuaŋnda nya cho ni.” 17 Le hei, mbo kɛsi nda o biyɔɔ niŋ le palɛi i yaa.

18 O paale yaa ndɔleŋ choo, mi Choosɛ dimul nda aa: “Le mɛɛ ya nɔ siooŋii Mɛlɛkɛi yɛ, la tosa nyɛ ya cho nya dimul lo, okoŋ mi la wa yoomu. 19 Te wanaa sakpuaa nya cho ni, mɛɛ la mɛi wana pilɛ o nya tɛɛŋ o biyɔɔ niŋ nanuŋ, mi a tuaa kpou kuɛ, ma yoo yuŋgula nyala cho a yiaaŋ ndaŋ nyɛdiaa.+ 20 Te la wa hunɔɔ pɛ, la hiŋ a pɔmbɔ nya lumndo, le mi sina te nyɛ nya cho dimioo wo cho tonya, okoŋ la sɔla lɛ piɔm te.” Ma tosa lende.

21 Ma dimulaŋ aa: “Le nyɛ naŋ tosal pɔmbɔ naa wo kpeekpei naŋ cho saŋgaa hoo ni.+ Kanifuule miŋ cha ndu mɔnɛi biyɔɔ, nduyɛ mbo wa naa nyɔɔloo le miŋ tuiinuŋ ndu inyiɛɛ, kɛ ŋ yeŋ ndu lani le. Le sabu koŋ kpeekpei saŋgaa hoo cho naa choo ni.” 22 Mi Lubɛŋ dimul nda aa: “I dimul nya lɔɔ koŋ maa la yɔŋ poombɔɔ nyɛ o nyɛ le, kɛ la yeŋ ya lani le.+ La che niko le! Kooma nduaŋ ma hel naa o lebol nuaa ni.”+ 23 Nyɛ o nyɛ nda wa dimioo, Choosɛ wa tueiyɔɔ, kɛ a sina le. Kanifuule o wa suɛi o nda lo, mi waŋndo hivul nda. 24 Okoŋ mi Choosɛ faŋaŋ nda ikɛi, mbo kɔ kandu chaŋndo.+ Mɛɛ o miiŋgu, mbo suaa vɛlɛ o nda lo. Okoŋ mbo bii Simiɔŋ,+ mbo yii ndu nda o hɔl.+ 25 Mi Choosɛ dimi le ma pei nyɛdiaa o bɔlɔla ndalaŋ niŋ cha cha. Mbo dimi vɛlɛ le ma miŋgi kanii* wana o wana o bɔlɔ ndɔɔ niŋ, nduyɛ ma ke nda nyɛdiaa le keiyo dioo o nɛi tɛɛŋ. Ma tosal nda lende.

26 Okoŋ kɔɔli, ma dovi wolɔɔla ndalaŋ sofɛliaa ndaa o lakɔɔ, ma kuaŋnuŋ. 27 Mɛɛ nda fuuluu o fondaŋ ndaa nɔ le luaŋ o nɛi tɛɛŋ ndo, mi wana pilɛ kumbi bɔlɔ ndɔɔ le sofɛlɛ ndɔɔ nyɛdiaa kioo. Okoŋ, mbo cha kanii nduɛi o bɔlɔ ndɔɔ niŋ. 28 Mbo dimul a tuaa aa: “A miŋgi kanii nii! Nuawɔ ndi o bɔlɔ nuu niŋ!” Mi kɔltaŋ la kandu nda lɔɔ kpu kpu, nduyɛ ma kandu nyiiyaa a siooŋnde. Ma dimulaŋ aa: “Yɛɛnɛ Mɛlɛka tosal lɛ naa hoo?”

29 Mɛɛ nda miiŋgu o Chekɔpu finya nda lo o lɛŋnde Kenaŋ ndeŋ niŋ, ma dimul ndu nyɛ o nyɛ yɔŋnuŋ nda. Ma dimi aa: 30 “Mi wana bɛndoo o lɛŋnde leŋ niŋ suaa o naa lo a hɔlla a tuu kpɛi.+ Nduyɛ, mbo dimi maa suaŋsuaŋndeŋ naŋ kuɛ o lɛŋnde ndaleŋ niŋ ni. 31 Kɛ miŋ dimul ndu aa, ‘Wanaa sakpuaa naŋ cho ni. O cho ŋsuaŋsuaŋ te naŋ cho le.+ 32 Puaa 12 naŋ cho ni.+ Finya pilɔɔ velu naa ni. O pilɔɔ cho lɛ le,+ nduyɛ pɔmbɔ naa lumndo cho a finya naa latulu o lɛŋnde Kenaŋ ndeŋ niŋ.’+ 33 Kɛ mi wana bɛndoo o lɛŋnde leŋ niŋ dimul naa aa, ‘Le mi sina maa wanaa sakpuaa nya cho ni, la mɛi wana pilɛ nanuŋ.+ Okoŋ mi la chua nyɛdiaa, mi la yoo yuŋgula nyala cho a yiaaŋ ndaŋ.+ 34 Te la wa hunɔɔ pɛ, la huŋ a pɔmbɔ nya lumndo, le mi sina maa la cho ŋsuaŋsuaŋ te, kɛ wanaa sakpuaa nya cho ni. Okoŋ mi miŋgi nya wana nyaa o ba, nduyɛ mi la hiou lachi a yulaleŋ tosaa o lɛŋndeŋ niŋ.’”

35 Mɛɛ nda wa bɔlɔla ndalaŋ pɛiyo, mi wana o wana saaluŋ kanii nduɛi o bɔlɔ ndɔɔ niŋ. Mɛɛ nda a finya nda che kanioŋ o bɔlɔla ndalaŋ niŋ, mi siooŋnde bii nda. 36 Mi Chekɔpu finya nda dimi aa: “La yeema mi la chiilul la chuauwaa niaa?+ Choosɛ cho lɛ le,+ nduyɛ Simiɔŋ bɛɛ cho lɛ le.+ La yeema vɛlɛ mi la kuɛŋnuŋ a Bɛŋjamiŋ? Ya pilɛ kpe sɔɔŋ muŋ kpou tol choo ni!” 37 Mi Lubɛŋ dimul finya ndɔ aa: “Mal la ndu o ba. I cho miiŋgu a ndu nanuŋ.+ Kɛ te I miiŋgu a ndu le, dii puaa niaa ŋiɔɔŋnda.”+ 38 Mbo dimul Lubɛŋ aa: “Po nuu cho lakɔ a nya latulu le, kanifuule bɛ ndɔ vi, nduyɛ ndu pilɛ kpe lo niŋ ni.+ Te o yɔŋ pɛ mi kpundɛ wɔɔŋ wɔɔŋndo komal ndu o nɛi tɛɛŋ, mɛɛ la cho tosa mi tol o Sɛiyo*+ niŋ o yuuwɛi nii niŋ a kɔl tambɛi bɛndoo.”+

43 Yima kala kalaŋ ma wa wɔ o lɛŋndeŋ niŋ.+ 2 Mɛɛ nda chii nyɛdiaa nda fula Ichipi wo dio,+ mi finya nda dimul nda aa: “La miiŋgu mi la kɔ pindul naa nyɛdiaa pɔmbɔ.” 3 Kɛ mi Chuda dimul ndu aa: “Po koŋ dimul naa kpendekele aa, ‘Te la hiŋ a pɔmbɔ nya le, I cha lɛ nya nanuŋ te.’+ 4 Te a chɛl pɛ mi pɔmbɔ naa kuɛ a naa latulu, mɛɛ ŋ cho num lakɔ nyɛdiaa pindul. 5 Kɛ te a chɛl te, mɛɛ ŋ cho lakɔ le, kanifuule poo dimul naa aa, ‘Te la hiŋ a pɔmbɔ nya le, I cha lɛ nya nanuŋ te.’”+ 6 Mi Isɔluɛi+ nyuna nda aa: “Le yɛɛnɛ nya dimul lɛ po koŋ maa la nɔ pɔmbɔ cheleŋ le ya kpundɔɔ tusioo choo?” 7 Ma muli aa: “Ndu pila nyuuniaa a naa okɔɔ vɛlɛ a wanayaŋ naŋ ni aa, ‘Baa finya nya cho wɔ pa yoomu? Baa la nɔ pa pɔmbɔ cheleŋ?’ Naa bɛɛ miŋ dimul ndu tonyaa.+ Nɛɛnɛ wa yɛ kɔl maa o cho naa dimul aa, ‘La huŋ a pɔmbɔ nya’?”+

8 Mi Chuda nyɔɔlu Isɔluɛi finya ndɔ aa: “Yɔŋgu ya poombɔɔ miŋ kuɛ.+ Te o cho koŋ te, num ni, naa ni, a chuauwaa naa kpou+ cho chuu a yiaaŋ.+ 9 Ya cho ndu wa hɔlteŋ choo ni.+ Nduyɛ te nyɛ o nyɛ yɔŋnuŋ ndu pɛ, ya ŋ bii tɔɔyaŋ ni. Kɛ te I miŋgi ndu naa num chua le, mɛɛ I cho hakioo tosa a num le fɛɛŋ a fɛɛŋ. 10 Te naŋ tɛɛmbuu teleŋndo le, maa naŋ kuɛ niŋ hau bɛmbɔɔ le diiŋ.”

11 Mi Isɔluɛi finya nda dimul nda aa: “Te lende i cho ni, mɛɛ la tosa hei: La chua nyɛm kɛndɛ kɛndɔŋ o lɛŋnde naaleŋ niŋ, mi la wou o bɔlɔla nyalaŋ niŋ, mi la yoo ndu.+ La chua baasam nyɛɛmbɔ,+ liaaŋ nyɛɛmbɔ, labidanɔm, boola yɔmndo,+ komɔɔ yɔm pitachioo wo, a komɔɔ yɔm amɔŋ ndo. 12 La chɔɔlu kanioŋ* chua maa pɛi bɛmbɔɔ le diiŋ, nduyɛ mi la chua vɛlɛ kaniŋ nya saaluŋ o bɔlɔla nyalaŋ niŋndoŋ mi la miŋgi.+ Naapum biondɔŋndo yɔŋnuŋ ni. 13 La chua pɔmbɔ nya, mi la miiŋgu naa poo chua. 14 Maa Mɛlɛka Kpaaya Kpou Kpou Wo tosa mi po koŋ tuiinuŋ nya inyiɛɛ, nduyɛ mbo mal Simiɔŋ a Bɛŋjamiŋ fɔ. Kɛ le ya ndu, te chuauwaa niaa wa pɛ chuwɔɔ mi loŋnuŋ fondo, mɛɛ a chuu!”+

15 Mi puaa Chekɔpu wa chua nyɔɔŋ muŋ, kanioŋ, vɛlɛ a Bɛŋjamiŋ, ma bii nɛiyo le kɔlaŋ Ichipi. Okoŋ, ma kɔ sim vɛlɛ Choosɛ o hɔl.+ 16 Dimioo nuaa mi Choosɛ del Bɛŋjamiŋ hɔlteŋ, o lepilɛ niŋ kpe mbo dimul wana wa chiɛi ndɔɔ chilaŋ ndo aa: “Kɔ a waŋnda haa o bɛɛ, ma kɔ dii chɔluaa, okoŋ ma toosiaa nyɛdiaa. Kanifuule naa ndaa cho nyɛdiaa dio latulu paalɛŋ ni.” 17 O lepilɛ niŋ kpe, mi poo tosa mɛɛ Choosɛ dimul ndu yɛ.+ Mbo kua a nda o Choosɛ lo bɛɛ. 18 Kɛ mɛɛ nda wa kɔlaŋ a nda o Choosɛ lo bɛɛ, mi siooŋnde bii nda tau. Okoŋ ma kandu dimioo aa: “Le kaniŋ nda miŋgi pɛi o bɔlɔla naalaŋ niŋndoŋ nda cho kɔlaŋ a naa ni. A cho naa lakɔ delɔɔ choo, ma poondiaa sofɛliaa naa, nduyɛ ma siiŋguu naa chiaa.”+

19 Mɛɛ nda fuuluu o dio, ma sɔɔŋguu wana wa chiɛi Choosɛ wo chilaŋndo ikɛi. 20 Ma dimul ndu aa: “Fallo masaa! Naŋ huŋ piondu pɛi nyɛdiaa nanuŋ ni.+ 21 Kɛ mɛɛ naŋ fuuluu o fondaŋ naŋ nɔ le luaŋ nɛi tɛɛŋ ndo, miŋ kandu bɔlɔla naalaŋ kuumbuuwo, okoŋ mi wana o wana cha kanii nduɛi kpou o bɔlɔ ndɔɔ niŋ.+ Lelaŋ, ŋ yeema miŋ miŋgi muŋ. 22 Ŋ hiŋ a kanioŋ tau le nyɛdiaa piondɔɔ. Nduyɛ, ŋ sina wana miŋgi kaniŋ naŋ o bɔlɔla naalaŋ niŋndo le.”+ 23 Okoŋ mbo dimul nda aa: “O wa lende. La yɔŋ isiooŋ te. Mɛlɛka nyaa a Mɛlɛka finya nya wo wou kaniŋ muŋ o bɔlɔla nyalaŋ niŋ ni. Ya fɛlɛŋ kaniŋ nyaŋ keeku o ba.” Okoŋ kɔɔli, mbo solul nda Simiɔŋ.+

24 Okoŋ, mi poo luei nda o Choosɛ lo chiɛiniŋ. Mbo ke nda mɛŋndaŋ le peloŋ pulɔɔ, nduyɛ mbo ke sofɛliaa ndaa nyɛdiaa. 25 Ma toosiaa kioo+ le Choosɛ, kanifuule ma tuɛi maa o cho hunɔɔ ipalaa, le ma de nyɛdiaa loŋ nda ndaa latulu.+ 26 Mɛɛ Choosɛ luɛi chiɛiniŋ, ma yoo ndu ke nda chuu ndu wo. Okoŋ ma beŋ ndu wulaŋ, ma fuuluu hɔlla lɛŋ.+ 27 Mɛɛ o nyuna nda a kɛndiaa ndaa okɔɔ, mbo nyuna nda vɛlɛ aa: “Vɛɛ finya nya yuuwɛi nya dimul la a ndu okɔɔ wo cho yɛ? Baa o cho wɔ pa yoomu?”+ 28 Ma mulul ndu aa: “Masanɔ naa, finya naa cho kɛndɛ. O cho wɔ yoomu.” Okoŋ kɔɔli, ma baŋ wulaŋ, ma fuuluu hɔlla lɛŋ.+

29 Mɛɛ o heelu hɔlla mbo cha Bɛŋjamiŋ pɔmbɔ ndɔ kala pilɔɔ,+ mbo nyuna nda aa: “Baa pɔmbɔ nya lumndo cho hoo ni, o nya dimul la a ndu okɔɔ wo?”+ Mbo dimi vɛlɛ aa: “Maa Mɛlɛka dɔu num sala fɔ po nuu.” 30 Le mɛɛ Choosɛ ndoo hiu yeemɛi nɔɔ le pɔmbɔ ndɔ yɛ, mi chaŋndo huŋ ndu o kɔl. Le hei, mbo fula o bɛɛ chɔ chɔ, mbo kɔ nuuviaa fondɛi le chaŋndo. Mbo luɛi o lumui ndɔɔ niŋ, mbo kɔ chaŋ loŋ.+ 31 Okoŋ kɔɔli, mbo pulu hɔlla, mbo fula. Mɛɛ o simul kɔllo, mbo dimi aa: “La piɔu nyɛdiaa.” 32 Ma dou ndu o ndɔɔ yɛ, ma dou nda o ndaa yɛ, nduyɛ ma dou Ichipiaŋaa wa a ndu latulu wa o ndaa yɛ. Kanifuule, Ichipiaŋnda ndaa di nyɛdiaa latulu nda Hibuluiya le. Suɛi wɔɔŋnde pila wa keŋ le Ichipiaŋnda ni.+

33 A wa ichali ndu lachi o lepula, chɔŋ a kaasoŋnɔɔ mbo huŋ bii a chuaambɔɔ.+ Mi kɔndɔfillo bii nda, ma wa nuaŋnaŋndo vellaa velle. 34 O wa nyɛdiaa chuaa o tibii* ndɔɔ, mbo yaa o tibii ndaa. Nyɛdiaa o ke Bɛŋjamiŋ ndo, ndoo chua nyɛdiaa bɛndaa nduaa o kɛ kɛ sɔla wo bɛmbɔɔ le ŋuɛɛnu.+ Okoŋ, ma hiau lachi a nyɛdiaa dioo vɛlɛ a kolɔɔ a ndu latulu haaa ma pum cha.

44 Okoŋ kɔɔli, mi Choosɛ dimul po wa chiɛi ndɔɔ chilaŋ ndo aa: “Wou nyɛdiaa o bɔlɔla puaa haa niŋ, mɛɛ nda nɔla kɔlaŋ a ndu yɛ. Nduyɛ ma miŋgi kanii* wana o wana o bɔlɔ ndɔɔ niŋ.+ 2 Okoŋ, ma chua taala ni kolaa nda toosiaa a kanii humbueiyo, ma wou o bɔlɔ pɔmbɔ nda lumndo niŋ a kanii nduɛi latulu.” Mbo tosa mɛɛ Choosɛ dimul ndu yɛ.

3 Mɛɛ paaleŋ le sɛ diimandɔɔ, ma mal nda, ma kuaŋnuŋ a sofɛliaa ndaa. 4 Mɛɛ nda mal chioo, a kue bɛɛ levil te, mi Choosɛ dimul po wa chiɛi ndɔɔ chilaŋ ndo aa: “Chɔŋ ma tisa puaa kaŋ kɔɔli! Te a bendal nda pɛ, dimul nda aa, ‘Vɛ mi waŋndo tosal nya ikɛndɛi, mi la miŋgul ndu a iwɔɔŋnde? 5 Taala masanɔ nuu kol lo cho hoo ni, nduyɛ ndu o soliŋ kpeku ni le sɔɔŋ waa lachioŋ sinaa. Suɛi wɔɔŋii bɛnduei pila nya tosa hei ni.’”

6 Mɛɛ o bendal nda, mbo dimul nda nyɛ masanɔ ndɔɔ dimul ndu wo. 7 Kɛ ma dimul ndu aa: “Le yɛɛnɛ mi masanɔ naa dimi suɛi waa lende? I waa lende del naa pɛŋ o kɔl le tosa le. 8 Numpila sina maa mɛɛ naŋ saaluŋ kanioŋ o bɔlɔla naalaŋ niŋ, miŋ chua muŋ o lɛŋnde Kenaŋ ndeŋ niŋ miŋ chuu num.+ Vɛɛ naŋ bii yɛ kɔllo miŋ chiimbuu kanii humbuei ɔɔ kooliiye o chiɛi masanɔ numndo niŋ? 9 O naa tɛɛŋ kinɛi, te a saaluŋ ndu pɛ wana pilɛ o ba, o nɔ mbo sɔla piɔmndo, okoŋ mi naa a tuaa simnuŋ buɛiya le masanɔ naa.” 10 Mbo dimi aa: “Maa i yɔŋnuŋ mɛɛ nya dimi yɛ: Wana ya cho ndu saalɔŋ o ba wo cho simnɔŋ chɛ nuu, kɛ mi nya a tuaa kpou kuɛŋnuŋ.” 11 Okoŋ mi wana o wana tusi bɔlɔ ndɔɔ lɛŋ chɔ chɔ mbo kumbi. 12 Mbo kandu yaasiaa o bɔlɔla ndalaŋ niŋ, chɔŋ a kaasoŋnɔɔ mbo kɔ bii a pɔmbɔ nda lumndo. O mɛɛlulaŋ kpɔŋ, mbo saaluŋ taalaa o bɔlɔ Bɛŋjamiŋ ndo niŋ.+

13 Okoŋ ma sɛɛsiaŋ domalaŋ lekɔɔ, nduyɛ mi wana o wana miŋgi wolɔɔla ndɔlaŋ sofɛlɛ ndɔɔ o kɔɔ, ma miiŋgu chiee. 14 Mɛɛ Chuda+ nda bɛndaa nduaa vɛlɛ a pɔmbuaa nduaa miiŋgu o chiɛi Choosɛ wo, ma komal ndu loŋ. Okoŋ, ma del ndu o labɛŋguniŋ.+ 15 Mi Choosɛ nyuna nda aa: “Yɛɛnɛ nya tosal lɛ ya hoo? La sina nuaa maa I tiuba mi sina sɔɔŋ waa lachioŋ te?”+ 16 Okoŋ mi Chuda muli aa: “Yɛɛ kpeekpei naŋ cho yɛ masanɔ naa dimul? Yɛɛ cheleŋ naŋ nɔ yɛ miŋ dimi? Vɛɛnɛ naŋ chɔm yɛ maa wanaa sakpuaa naŋ cho ni? Mɛlɛka tonyaa chɔɔmuu biondɔŋ buɛiyaa numnda kpendekele.+ Lelaŋ naa ni, wana nda saaluŋ taala numndo o ba wo ni, buɛiyaa numnda naŋ cho niŋ ni!” 17 Kɛ mi Choosɛ dimi aa: “I waa lende del la pɛŋ o kɔl le tosa le! Wana nda saaluŋ taala nuu o ba wo, ndu cho simnɔŋ chiɔɔ le ya ni.+ Kɛ nya a tuaa kpou, la miiŋguŋ o finya nya lo o kɔl nyulu niŋ.”

18 Okoŋ, mi Chuda sɔɔŋguu ndu ikɛi mbo dimi aa: “A yandii, masanɔ nuu, chɛl mi ya buɛi numndo soo o numndo. Nduyɛ duaunuŋ tumbe a ya le, kanifuule a cho ko maa Feloo pila.+ 19 Pɛi, mi masanɔ naa nyuna naa aa, ‘Baa la nɔ pa finyaa ɔɔ pɔmbɔɔ?’ 20 Miŋ mulul masanɔ naa aa, ‘Ŋ nɔ finyaa, kɛ o cho niŋ o yuuwɛi. Nduyɛ pɔmbɔ naa+ o velu o yuuwɛi nduɛi niŋndo cho. Nda ŋiɔɔŋ kala nda velu ni, kɛ mi bɛ ndɔ wu.+ Ndupilɛ kpe lo niŋ ni.+ Nduyɛ finya ndɔ kaala ndu bɔɔ.’ 21 Okoŋ kɔɔli, ma dimul naa buɛiyaa numnda aa, ‘La kɔ huŋ a ndu nanuŋ le mi che ndu.’+ 22 Kɛ miŋ dimul masanɔ naa aa, ‘Poombɔɔ tiuba mbo faŋaŋ finya ndɔ ikɛi le. Te o faŋaŋ ndu ikɛi pɛ, finya ndɔ cho wu.’+ 23 Okoŋ ma dimul naa aa, ‘Te o cho mi la hiŋ a pɔmbɔ nya lumndo le, I cha lɛ nya nanuŋ te.’+

24 “Le hei, miŋ kua o buɛi numndo lo, ndu yɔŋnuŋ ni maa finya naa, miŋ dimul ndu nyɛ ŋ dimul naa wo. 25 Mɛɛ teleŋ tiŋ hiou, mi finya naa dimul naa aa, ‘La miiŋgu mi la kɔ pindul naa nyɛdiaa pɔmbɔ.’+ 26 Kɛ miŋ dimul ndu aa, ‘Ŋ tiuba miŋ kuɛ le. Kɛ te a chɛl pɛ mi pɔmbɔ naa lumndo kuɛ a naa latulu, mɛɛ ŋ cho lakɔ. Kanifuule, te o cho miŋ kuɛ a ndu le, ŋ tiuba miŋ kuɛ naa po koŋ chua le.’+ 27 Okoŋ mi buɛi numndo, ndu yɔŋnuŋ ni maa finya naa dimul naa aa, ‘Nyapila sina kpendekele maa puaa a ŋiɔɔŋ kinɛi laa nuu vilul la ni.+ 28 Kɛ mi o pilɛ mɛi ya, mi dimi aa: “Visi biyaa dii ndu nuaa ni mbo dia ndu!”+ Nduyɛ haaa a paale hauleŋ ndeŋ, I chi lɛ ndu le. 29 Te o yɔŋ pɛ mi la kuɛŋnuŋ vɛlɛ a hoo, nduyɛ mi kpundɛ wɔɔŋ wɔɔŋndo yɔŋnuŋ ndu, mɛɛ la cho tosa mi tol o Sɛiyo*+ niŋ o yuuwɛi nii niŋ a kɔl tambɛi bɛndoo.’+

30 “Finya naa, ndu yɔŋnuŋ ni maa buɛi numndo kaala poombɔɔ hoo, mɛɛ o kaala ndupila yɛ. Lelaŋ, te ŋ miiŋgu a ndu le, 31 dimioo nuaa mbo che naa, o cho wu. O hei niŋ, ŋ cho tosa mi buɛi numndo, ndu yɔŋnuŋ ni maa finya naa, tol o Sɛiyo* niŋ o yuuwɛi nduɛi niŋ a kɔl tambɛi bɛndoo. 32 Kɛ mi ya buɛi numndo chua buŋgɛi o finya nuu lo a poombɔɔ okɔɔ aa, ‘Te I miŋgi ndu naa num chua le, mɛɛ I cho hakioo tosa a finya nuu le fɛɛŋ a fɛɛŋ.’+ 33 Lelaŋ a yandii, chɛl mi ya buɛi numndo lo nanuŋ sɔŋgɔ poombɔɔ, kɛ mi ndu miiŋgu nda bɛndaa nduaa latulu. 34 Vɛɛ ya nɔla yɛ mi miiŋgu o finya nuu lo mi mɛi poombɔɔ kɔɔli? I bii kɔllo mi che nyɛ yɔŋnuŋ niŋ a finya nuu wo le!”

45 Choosɛ ndoo nɔla lɛ mbo bii kɔl ndɔɔ buɛiyaa nduaa kpou o hɔl te.+ Le hei, mbo dimul nda aa: “Nya kpou la faŋaŋ ya ikɛi!” Nduyɛ bɛndaa nduaa a pɔmbɔ ndɔ kinɛi wa niŋ loŋ ni, mi Choosɛ koma chɔɔmuŋ nda.+

2 Okoŋ, mbo kandu chaŋndo choo choo kpeleŋ. Nduyɛ, mi Ichipiaŋnda a wanaa wa o chiɛi Feloo wo niŋnda tuɛi ndu chaŋndo. 3 O mɛɛlulaŋ kpɔŋ, mi Choosɛ dimul bɛndaa nduaa a pɔmbɔ ndɔ aa: “Ya cho Choosɛ ni. Baa finya nuu cho wɔ pa yoomu?” Kɛ bakoo bɛɛ a nɔla ma soo le, kanifuule kɔndɔfillo wa nda a ndu okɔɔ. 4 Okoŋ, mi Choosɛ dimul bɛndaa nduaa a pɔmbɔ ndɔ aa: “A yandii, la sɔɔŋguu ya ikɛi.” Ma sɔɔŋguu ndu ikɛi.

Mbo dimul nda aa: “Ya cho Choosɛ pɔmbɔ nya ni, o nya pisi o Ichipi niŋndo.+ 5 Kɛ la tambu kɔl te. Nduyɛ, la biinaŋ tɔɔyaŋ le mɛɛ nya pisi ya nanuŋ yɛ le, kanifuule Mɛlɛka yɔŋ ya pɔɔ nya lachi ni, le yoomulaŋ piŋioo.+ 6 Chɔŋ a teleŋ yima bɛnduaŋ ma del lo,+ wɔsilaŋ tiɔɔŋ ndɔɔ naŋ cho niŋ hoo niŋ ni, nduyɛ o lo wɔ wɔsilaŋ la ŋuɛɛnu. O wɔsila laŋ niŋ bɛɛ, waŋnda ve niŋ chiɔɔŋ tosa ɔɔ ma kou le. 7 Mɛlɛka yɔŋ ya pɔɔ nya lachi ni, le halikpeŋ mi wanaa lo yoomu o nya tɛɛŋ nda+ hiou lachi a waa achal o lɛŋndeŋ choo. Nduyɛ o nɛiyo hoo choo, Mɛlɛka tiuba mbo piŋi nya o nɛi kɔndɔfili niŋ, la vi le. 8 Lelaŋ, o cho nya le yɔŋ ya nanuŋ te, kɛ Mɛlɛka tonyaa yɔŋ ya nanuŋ ni, le halikpeŋ mbo siiŋguu ya wana silaa bɛndoo* le Feloo. Nduyɛ, mbo tosa mi wa chiɛi ndɔɔ kpou chilaŋ vɛlɛ a lɛŋnde Ichipi leŋ kpou.+

9 “Lelaŋ, la miiŋgu chɔ chɔ naa finya nuu chua mi la kɔ dimul ndu aa, ‘Nyɛ Choosɛ po num dimi wo cho hoo ni: “Mɛlɛka yulu ya iso le mi wa lɛŋnde Ichipi leŋ kpou chilaŋ.+ Huŋ naa ya chua. Duaunuŋ tamala le.+ 10 Te a hiŋ pɛ, num ni, puaa numnda ni, puaa num aa mamaa ni, chɔluaa numnda kpou, a nyɛ o nyɛ ŋ nɔ, la huŋ wa ya ikɛi o tanda Koosiɛŋ ndo+ niŋ. 11 Nduyɛ, num ni, yuŋgu numndo ni, a nyɛ o nyɛ ŋ nɔ, I cho wa nya nyɛdiaa kioo loŋ, yɔŋii nyɛ o nyɛ chuu nya o ba fo, kanifuule yima bɛnduaŋ ma lo wɔ le wɔsilaŋ la ŋuɛɛnu.”’+ 12 Nya a Bɛŋjamiŋ pɔmbɔ ni che niko kpendekele maa ya Choosɛ kpeekpei cho suɛi o nya lo ni.+ 13 Lelaŋ, la kɔ dimul finya nuu a bɛɛle bɛndule ya sɔla o lɛŋnde Ichipi leŋ niŋ kpou leŋ okɔɔ, vɛlɛ a nyɛ o nyɛ nya che. La kɔ chɔ chɔ mi la kɔ huŋ a finya nuu nanuŋ.”

14 Okoŋ, mbo kɔmaŋ Bɛŋjamiŋ pɔmbɔ ndɔ mbo chaŋ, nduyɛ mi Bɛŋjamiŋ bɛɛ chaŋ.+ 15 Mbo sɔsa bɛndaa nduaa kpou kuulaŋ, mbo kɔɔmiaŋ nda, nduyɛ mbo chaŋ. Okoŋ kɔɔli, mi bɛndaa nduaa duau baltaŋ a ndu.

16 Mi Feloo a waŋnda o ndu lo chiɛiniŋ tuɛi yooŋgoo aa: “Choosɛ bɛndaa nduaa a pɔmbɔ ndɔ hiŋ!” Mi Feloo a buɛiyaa nduaa kpou naŋ kɔl le hei tueiyɔɔ. 17 Okoŋ, mi Feloo dimul Choosɛ aa: “Dimul bɛndaa numnda a pɔmbɔ num ma dovi wolɔɔlaŋ chɔluaa ndaa o lakɔɔ, ma miiŋgu o lɛŋnde Kenaŋ ndeŋ niŋ. 18 Okoŋ, ma kɔ chua finya nda a yuŋgula ndalaŋ, ma hiŋ naa ya chua nanuŋ. I cho nda nyɛm kɛndɛ kɛndɛŋ cho o lɛŋnde Ichipi leŋ niŋndoŋ ke, nduyɛ ma sɔla tɔnɔɔ o fondaŋ kɛndɛ kɛndɔɔ* o lɛŋndeŋ ndeŋ niŋ.+ 19 Nduyɛ, dimul nda+ vɛlɛ ma chua nyɛm nyaanaŋ+ cho o lɛŋnde Ichipi leŋ niŋndoŋ le chuauwaa ndaa a laandaa ndaa. Okoŋ, ma kɔ wou finya nda o nyɛ nyaanaŋndo o pilɛ niŋ, ma hiŋ nanuŋ.+ 20 A buulaŋ a nyɛm ndaŋ okɔɔ le,+ kanifuule nyɛm kɛndɔŋ o lɛŋnde Ichipi leŋ niŋ kpou, le nda ŋ cho ni.”

21 Mi Isɔluɛi puaa nduaa tosa mɛɛ nda dimul nda yɛ. Nduyɛ mi Choosɛ ke nda nyɛm nyaanaŋndoŋ mɛɛ Feloo dimi yɛ. Okoŋ, mbo ke nda nyɛdiaa le ma kei dio nɛi tɛɛŋ. 22 Mbo ke bɛndaa nduaa o kɛ kɛ doma sɛnɛiyo o pilɛ. Kɛ Bɛŋjamiŋ ndu, mbo ke ndu kaniŋ humboŋ 300 vɛlɛ a domala sɛnɛilaŋ la ŋuɛɛnu.+ 23 Nyɛm o yɔŋ finya ndɔ woŋ cho muŋ ni: mbo dovi nyɛm kɛndɔŋ o Ichipi niŋ sofɛliaa tɔ o lakɔɔ, le ma yoo finya ndɔ. Okoŋ kɔɔli, mbo dovi vɛlɛ witiiyoŋ,* beediiyo,* a nyɛdiaa cheleŋ sofɛliaa laanduaa tɔ o lakɔɔ, le mi finya ndɔ waa kei dio nɛi tɛɛŋ te a wa hunɔɔ pɛ. 24 Okoŋ, mbo choŋguŋ bɛndaa nduaa. Mɛɛ nda wa kɔlaŋ, mbo dimul nda aa: “La kei sɛɛŋgiaŋ nɛi tɛɛŋ te.”+

25 Okoŋ ma mal Ichipi, ma kua o lɛŋnde Kenaŋ ndeŋ niŋ naa Chekɔpu finya nda chua. 26 Ma dimul ndu aa: “Choosɛ cho wɔ yoomu. Ndu cho wana bɛndoo le lɛŋnde Ichipi leŋ kpou ni!”+ Kɛ kɔl yusa ndu le, kanifuule ndoo laalaŋ nyɛ nda wa dimioo wo le.+ 27 Kɛ mɛɛ nda hiou lachi a ndu dimullo nyɛ o nyɛ Choosɛ dimul nda, nduyɛ mbo cha nyɛm nyaanaŋ Choosɛ yɔŋ le ma kuɛ a ndu woŋ, mbo kandu nyaaloo dɔɔnɔŋndo. 28 Mi Isɔluɛi dimi aa: “Nyɛ ya tueiyo cho letuu! I laalaŋ niŋ kɛsɛ maa Choosɛ po ni cho wɔ yoomu! Mɛɛ mi kuɛ mi kɔ chɔ ndu tuupa mi vi!”+

46 Okoŋ, mi Isɔluɛi chua nyɛ o nyɛ ndoo nɔ* ma kandu kɔlaŋ. Mɛɛ o fuuluu Biaa-siɛba,+ mbo soli salalaŋ o Mɛlɛka Aase finya ndɔ wo lo.+ 2 Ichɔllo, mi Mɛlɛka suaa naa Isɔluɛi chua o yilaŋnde niŋ. Mbo veelu ndu aa: “Chekɔpu, Chekɔpu!” Mbo chɛl aa: “Ee!” 3 Mbo dimi aa: “Ya cho Mɛlɛka tonyaa ni, Mɛlɛka finya numndo.+ Yɔŋ isiooŋ le kɔlaŋ Ichipi le, kanifuule loŋ ya cho lakɔ num siiŋguu kaale bɛnduleŋ+ ni. 4 Yapila cho lakɔ a num Ichipi ni, mi soli num vɛlɛ loŋ.+ Nduyɛ, Choosɛ cho num hɔltaŋ pilaŋ ni.”*+

5 Okoŋ kɔɔli, mi Chekɔpu mal Biaa-siɛba. Nduyɛ mi puaa nduaa* chua ndu, chuauwaa ndaa vɛlɛ a laandaa ndaa, ma wou nda o nyɛm nyaanaŋ Feloo yɔŋ le ma kuɛ a Chekɔpu Ichipi woŋ niŋ. 6 Okoŋ, mi Chekɔpu a yuŋgu ndɔɔ kpou chua chɔluaa ndaa a nyɛm nda sɔla o lɛŋnde Kenaŋ ndeŋ niŋndoŋ, ma kua o lɛŋnde Ichipi leŋ niŋ. 7 Mi Chekɔpu chua yuŋgu ndɔɔ kpou, chuauwaa nduaa a chuauwaa nduaa mamaa, mbo kua a nda o lɛŋnde Ichipi leŋ niŋ.

8 Isɔluɛi puaa nduaa, koŋ cho ni puaa Chekɔpu wa, a o kuɛ o lɛŋnde Ichipi leŋ niŋnda,+ diola ndalaŋ la cho laŋ ni: Chekɔpu po ndɔ tasoo wa Lubɛŋ ni.+

9 Puaa Lubɛŋ velu wa cho haa ni: Hanɔki, Palu, Hɛsilɔŋ, a Kaami.+

10 Puaa Simiɔŋ velu wa+ cho haa ni: Chɛmuɛɛ, Chamiŋ, Ohadi, Chakiŋ, Sohaa, a Siɔ.+ Nda chua Kenanaitiinɔɔ velu Siɔ ni.

11 Puaa Livai+ velu wa cho haa ni: Kɛɛsiɔŋ, Kohati, a Meluali.+

12 Puaa Chuda+ velu wa cho haa ni: Ɛɛ, Onaŋ, Silua,+ Piluɛsi,+ a Siluaa.+ Kɛ mi Ɛɛ nda Onaŋ wu o lɛŋnde Kenaŋ ndeŋ niŋ.+

Puaa Piluɛsi velu wa cho haa ni: Hɛsilɔŋ a Hamu.+

13 Puaa Isaka velu wa cho haa ni: Tola, Puvaa, Iyɔbi, a Similɔŋ.+

14 Puaa Sɛbulɔŋ+ velu wa cho haa ni: Sɛluɛdi, Ɛlɔŋ, a Chaaliɛɛ.+

15 Puaa haa Liya vilul Chekɔpu o Padaŋ-aluam niŋ ni, vɛlɛ a Daina+ chua ndɔ. Puaa nduaa a chuaa nduaa laanduaa kpou, a wa ŋwaŋ 33.

16 Puaa Kaadi+ velu wa cho haa ni: Sifiɔŋ, Hakiki, Suni, Ɛsibɔŋ, Ɛlui, Aluaadi, a Aluilai.+

17 Puaa Asia+ velu wa cho haa ni: Iminaa, Isivaa, Isivi, a Bɛluaya, nduyɛ yema nda wa Siluai ni.

Puaa Bɛluaya velu wa cho haa ni: Hɛba a Malikiɛɛ.+

18 Puaa 16 Silipa+ vilul Chekɔpu ni. Nduyɛ, chuaa hoo Lebaŋ ke Liya chua ndɔ ni.

19 Puaa Luechɛɛ, lanɔɔ Chekɔpu velu wa cho haa ni: Choosɛ+ a Bɛŋjamiŋ.+

20 Mi Choosɛ vialu Manaasɛ+ a Ifiluem+ o lɛŋnde Ichipi leŋ niŋ. Nduyɛ nda Asinati+ chua Pɔtifilua wo, wana soliaa lasalaa o Ɔŋ* niŋ velu nda ni.

21 Puaa Bɛŋjamiŋ+ velu wa cho haa ni: Bɛla, Bika, Asibɛɛ, Kiluaa,+ Naamaŋ, Ɛhi, Lɔsi, Mupim, Hupim,+ a Aadi.+

22 Puaa Luechɛɛ vilul Chekɔpu wa, a wa ŋwaŋ 14.

23 Daŋ+ velu Husim+ ni.

24 Puaa Nafitalii+ velu wa cho haa ni: Chaasɛɛ, Kuni, Chɛsa, a Siɛlɛm.+

25 Puaa a ŋɔmmɛu Bilihaa vilul Chekɔpu ni. Nduyɛ, chuaa hoo Lebaŋ ke Luechɛɛ chua ndɔ ni.

26 O fulawɔ o laandaa puaa Chekɔpu wa kɔɔli, wanaa fula o pulale Chekɔpu leŋ choo ma kua a ndu latulu o lɛŋnde Ichipi leŋ niŋnda, a wa ŋwaŋ 66.+ 27 Puaa a ŋiɔɔŋ Choosɛ velu o lɛŋnde Ichipi leŋ niŋ ni. Wanaa fula o yuŋgu Chekɔpu wo niŋ ma kua o lɛŋnde Ichipi leŋ niŋnda kpou kpou, a wa ŋwaŋ 70.+

28 Mi Chekɔpu viam Chuda+ lachi le mbo kɔ dimul Choosɛ maa o cho o nɛi le kɔlaŋ Koosiɛŋ. Mɛɛ nda fuuluu o tanda Koosiɛŋ ndo+ niŋ, 29 mi Choosɛ bɛɛndiaa nyɛ ndɔ nyaanaŋ suaa naŋndo mbo kua Koosiɛŋ, le ma kɔ chiikaŋ nda Isɔluɛi finya ndɔ. Mɛɛ Choosɛ chɔɔmuŋ finya ndɔ, o lepilɛ niŋ kpe, mbo kɔmaŋ finya ndɔ,* nduyɛ mbo chaŋ le teleŋ tiŋ.* 30 Okoŋ mi Isɔluɛi dimul Choosɛ aa: “I wu niŋ bɛɛ o cho suɛi wɔɔŋ te, kanifuule I che num a lehɔl pɛɛŋ, nduyɛ mi sina maa a cho wɔ yoomu.”

31 Mi Choosɛ dimul bɛndaa nduaa a yuŋgu finya ndɔ wo kpou aa: “I kua wɔ mi kɔ dimul Feloo+ aa, ‘Bɛndaa niaa a yuŋgu finya nuu, a wa ichali o lɛŋnde Kenaŋ ndeŋ niŋnda hiŋ nanuŋ naa ya chua.+ 32 Wanaa mandaa lasaa nda cho ni,+ nduyɛ chɔluaa nda manda ni.+ A hiŋ a chɔluaa ndaa vɛlɛ a nyɛ o nyɛ nda nɔ.’+ 33 Te Feloo veelu nya pɛ mbo nyuna nya aa, ‘Wali yɛɛ nya tosa yɛ?’ 34 la dimul ndu aa, ‘Chɔŋ o chuaambɔyɛi nɛi niŋ, chɔluaa naa buɛiyaa numnda manda ni, nduyɛ finyaa naa mamaa bɛɛ, chɔluaa ndaa manda ni.’+ O hei niŋ, Feloo cho tosa mi la waŋnuŋ o tanda Koosiɛŋ ndo niŋ,+ kanifuule yɛleŋ pila Ichipiaŋnda tul wanaa mandaa lasaa ni.”+

47 Okoŋ mi Choosɛ kɔ dimul Feloo aa:+ “Finya nuu a bɛndaa niaa mal o lɛŋnde Kenaŋ ndeŋ niŋ ma huŋ chal Koosiɛŋ.+ Nduyɛ, a hiŋ a chɔluaa ndaa vɛlɛ a nyɛ o nyɛ nda nɔ.” 2 Mbo chua bɛndaa nduaa a ŋuɛɛnu, mbo kua a nda naa Feloo chua, le ma chiikaŋ nda ndaa.+

3 Mi Feloo nyuna bɛndaa nduaa aa: “Wali yɛɛ nya tosa yɛ?” Ma mulul Feloo aa: “Chɔluaa buɛiyaa numnda manda ni. Nduyɛ finyaa naa mamaa bɛɛ, chɔluaa ndaa manda ni.”+ 4 Okoŋ ma dimul Feloo aa: “Yima bɛnduaŋ ma del o lɛŋnde Kenaŋ ndeŋ niŋ,+ nduyɛ ŋ nɔ bil o bil le chɔluaa naa le. Lelaŋ naŋ hiŋ le challe o lɛŋndeŋ ndeŋ niŋ ni.+ A yandii, chɛl naa miŋ chal o tanda Koosiɛŋ ndo niŋ.”+ 5 Mi Feloo dimul Choosɛ aa: “Sumialii num finya num a bɛndaa numnda hiŋ ni. 6 Nduyɛ lɛŋnde Ichipi leŋ kpou, le num le cho ni. Lelaŋ, tosa mi finya num a bɛndaa numnda chal o fondaŋ kɛndɛ kɛndɔɔ o lɛŋndeŋ ndeŋ niŋ.+ A chal o lɛŋnde Koosiɛŋ ndeŋ niŋ. Nduyɛ te a saaluŋ pɛ wanaa chaa chɔluaa mandaa nyɛkɛndɛi ya nda tɛɛŋ, a handu nda chɔluaa niaa chilaŋ.”

7 Okoŋ, mi Choosɛ kua a Chekɔpu finya ndɔ naa Feloo chua, le ma chiikaŋ nda ndu. Nduyɛ, mi Chekɔpu duau Feloo sala. 8 Mi Feloo nyuna ndu aa: “Vɛɛnɛ ŋ nɔ yɛ niŋ wɔsilaŋ?” 9 Mi Chekɔpu mulul Feloo aa: “O cho wɔ wɔsila bɔɔ le. Wɔsilaŋ 130 ya nɔ ni, nduyɛ wɔsila kala kalalaŋ pila la wa laŋ le ya ni.+ O laŋ niŋ kpou, I wa heeloo a tuusoo. Wɔsila finyaa niaa mamaa chii o heeloo a tuusoo niŋndaŋ la hiou poloŋ a la nilaŋ.”+ 10 Okoŋ kɔɔli, mi Chekɔpu duau Feloo sala, mbo kuaŋnuŋ.

11 Mi Choosɛ tosa mɛɛ Feloo dimul ndu yɛ. Mbo ke finya ndɔ a bɛndaa nduaa fondaŋ kɛndɛ kɛndɔɔ o lɛŋnde Ichipi leŋ niŋ, o tanda Luamɛsi wo niŋ+ le ma chal loŋ. 12 Nduyɛ Choosɛ wa hiouwɔɔ lachi a finya ndɔ, bɛndaa nduaa vɛlɛ a wana o wana wa o yuŋgu finya ndɔ wo niŋ nyɛdiaa* kioo, mɛɛ o kɛ kɛ ndoo nɔ chuauwa yɛ.

13 Nduyɛ nyɛdiaa* kɛ kɛ ve o lɛŋnde Ichipi leŋ niŋ a o lɛŋnde Kenaŋ ndeŋ niŋ te, kanifuule yiaaŋ ma wa hiouwɔɔ lachi a pɛŋgɛlaŋndo. Mi waŋnda o lɛŋnde Ichipi leŋ niŋ a o lɛŋnde Kenaŋ ndeŋ niŋ saŋga tau a yiaaŋ.+ 14 Choosɛ wa hiouwɔɔ lachi a kaniŋ* wa o lɛŋnde Ichipi leŋ niŋ a o lɛŋnde Kenaŋ ndeŋ niŋndoŋ kpou biu biuwo wanaa wa hunɔɔ nyɛdiaa piondɔɔ wa o laba,+ okoŋ mbo kua a kaniŋ muŋ o chiɛi Feloo wo niŋ. 15 Mɛɛ teleŋ tiŋ hiou, mi kaniŋ wa o lɛŋnde Ichipi leŋ niŋ a o lɛŋnde Kenaŋ ndeŋ niŋndoŋ kpou chuu. Okoŋ, mi Ichipiaŋnda kandu hunɔɔ naa Choosɛ chua, ma dimul ndu aa: “Ke naa nyɛdiaa! Baa ma lo naa nuaa miŋ vi a yiaaŋ le mɛɛ kaniŋ naŋ chuu yɛ?” 16 Mi Choosɛ dimul nda aa: “Te kanioŋ chuu nya pɛ o laba, mɛɛ la yɔŋgu chɔluaa nyaa, okoŋ mi ke nya nyɛdiaa sɔŋgɔ chɔluaa kaŋ.” 17 Mi waŋnda kandu hunɔɔ a chɔluaa ndaa naa Choosɛ chua. Ma huŋ a suaa ndaa, saa, chuiŋnda, nauwa, a sofɛliaa naa Choosɛ chua. Nduyɛ, mbo wa nda nyɛdiaa kioo sɔŋgɔ chɔluaa ndaa kaŋ. Choosɛ lo nda nyɛdiaa kioo lende o wɔsi koŋ niŋ haaa mi chɔluaa ndaa chuu paku.

18 Mɛɛ wɔsi koŋ hiou, ma kandu hunɔɔ naa Choosɛ chua wɔsioo o pilɔɔ, ma dimul ndu aa: “Masanɔ naa, ŋ cho num suɛi hei viŋ te. Kaniŋ naŋ a chɔluaa naa kpou, ŋ chii num ke. Lelaŋ, ŋ nɔ lɛ hau nyɛ o nyɛ le masanɔ naa le, mɛɛ dialuŋ naŋ a lɛŋii nɛi. 19 Baa ma lo naa nuaa miŋ vi a yiaaŋ, nduyɛ mi lɛŋii nɛi loŋnuŋ fondo fuu? Naapila ni, lɛŋii nɛi ni, piondu naa a nyɛdiaa miŋ simnuŋ chiaa le Feloo, nduyɛ mi lɛŋii nɛi wa le ndu. Ke naa yɛiye miŋ tosa chiɔɔŋ, yɔŋii naŋ wu a yiaaŋ, nduyɛ mi lɛŋii nɛi loŋnuŋ fondo fuu.” 20 Okoŋ, mi Choosɛ piinduu lɛŋii Ichipiaŋnda kpou le Feloo. Kanifuule, mi Ichipiaŋnda o kɛ kɛ pisi yondo ndɔɔ le mɛɛ yima bɛnduaŋ ma wa o lɛŋndeŋ niŋ yɛ. Okoŋ, mi lɛŋii ndɛi wa le Feloo.

21 Wanaa wa o sɔndɔkɔltaŋ o Ichipi niŋ kpou wa, mi Choosɛ heelu nda o chieeŋ bɛndoŋ niŋ.+ 22 Lɛŋii wanaa soliaa lasalaa kinɛi Choosɛ pindu le ni,+ kanifuule Feloo ndoo ke nda nyɛdiaa ni. Nduyɛ nyɛdiaa koŋ ndaa tiindaŋ ni. Le sabu koŋ nda pisi lɛŋii ndɛi le ni. 23 Mi Choosɛ dimul waŋnda aa: “Nya ni, yondola nyalaŋ ni, I chii nya hau piondɔɔ le Feloo. La che yɛiye le mi la tosa chiɔɔŋ. 24 Te la kou pɛ, la piɔu kundalaŋ la ŋuɛɛnu, mi la ke Feloo kundaa o pilɛ.+ Okoŋ mi kundala hiɔɔlu laŋ la wa le yɛiye a nyɛdiaa le nyapila, wanaa cho o nya lo chiɛiniŋ nda vɛlɛ a chuauwaa nyaa.” 25 Okoŋ ma dimi aa: “A piŋi yoomula naalaŋ.+ Lelaŋ a yandii, chɛl naa miŋ simnuŋ chiaa le Feloo.”+ 26 Okoŋ, mi Choosɛ duau sawaa o lɛŋnde Ichipi leŋ niŋ kpou maa Feloo nɔ o ŋuɛɛnu ndɔɔ ni. Nduyɛ haaa a paale hauleŋ ndeŋ, sawa koŋ cho wɔ. Lɛŋii wanaa soliaa lasalaa kinɛi ve le Feloo le ni.+

27 Mi Isɔluɛiya hiau lachi a challe Koosiɛŋ o lɛŋnde Ichipi leŋ niŋ.+ Ma sɔla nyɔɔŋ, ma vialu chuauwa, nduyɛ ma kui loŋ tau tau.+ 28 Wɔsilaŋ 17 Chekɔpu chii o lɛŋnde Ichipi leŋ niŋ ni. Nduyɛ kpou kpou, Chekɔpu chii wɔsilaŋ 147.+

29 Teleŋndo wa niŋ fuuluuwo le mi Isɔluɛi vi.+ Le hei, mbo veelu Choosɛ po ndɔ, mbo dimul ndu aa: “A yandii, wou ba numndo o lɔlu nuu bɛŋgu, ma mɛnaŋ po maa a cho ya kaala lo lechoo wo chɔm, nduyɛ ma lo o lediom. A yandii, kumbu ya o lɛŋnde Ichipi leŋ niŋ te.+ 30 Te I vi pɛ,* la soli ya o lɛŋnde Ichipi leŋ niŋ, mi la kɔ kumbu ya o sɛi nda kumbu finyaa niaa mamaa wo niŋ.”+ Okoŋ mi Choosɛ dimi aa: “I cho tosa mɛɛ ŋ dimi yɛ.” 31 Mi Isɔluɛi dimul ndu aa: “Mɛnaŋ.” Mi Choosɛ mɛnaŋ.+ Okoŋ, mi Isɔluɛi tundu bolleŋ o kpele ndɔɔ bolleŋ.+

48 Okoŋ kɔɔli, ma dimul Choosɛ aa: “Finya num cho o fonda le.” Le hei, mbo chua puaa nduaa ŋiɔɔŋnda, Manaasɛ nda Ifiluem, ma kua latulu.+ 2 Ma dimul Chekɔpu aa: “Choosɛ po num hiŋ naa num chua.” Le hei, mi Isɔluɛi kindi kindiŋ mbo chal o kpele. 3 Mi Chekɔpu dimul Choosɛ aa:

“I wa Luusi o lɛŋnde Kenaŋ ndeŋ niŋ, mi Mɛlɛka Kpaaya Kpou Kpou Wo chɔɔmuŋ ya, nduyɛ mbo duau ya sala.+ 4 Mbo dimul la aa, ‘I cho tosa ma velu chuauwa, nduyɛ ma kui tau tau. I cho tosa ma simnuŋ kaale bɛnduleŋ.+ I cho chuauwaa num aa mamaa* lɛŋndeŋ ndeŋ ke, mi le wa nyɛ nda le fɛɛŋ a fɛɛŋ.’+ 5 Nduyɛ puaa ŋiɔɔŋaa ŋ velu o lɛŋnde Ichipi leŋ niŋ tuupa mi huŋ nda, ya nɔ nda ni.+ Ifiluem nda Manaasɛ cho simnɔŋ puaa niaa, mɛɛ Lubɛŋ nda Simiɔŋ cho puaa niaa yɛ koni.+ 6 Kɛ nduyɛ, a kɛ kɛ ŋ velu pɛ o nda kɔɔli, num nɔ kaŋ ni. A diola bɛndaa ndaa ŋiɔɔŋnda nda cho wa nda veeloo ni, nduyɛ o nda niŋ sanaa nda cho nyɛm kiɔɔŋ sɔla ni.+ 7 Mɛɛ ya wa chɔnɔŋndo Padaŋ, mi Luechɛɛ kei ya wu o ba+ o lɛŋnde Kenaŋ ndeŋ niŋ. Nduyɛ a boondii keŋ, tiŋndo wa wɔ landaŋ le kɔlaŋ Ɛfiluata.+ Okoŋ, mi kumbu ndu nɛi tɛɛŋ loŋ le kɔlaŋ Ɛfiluata. Koŋ cho ni, Bɛtilɛhɛm.”+

8 Mɛɛ Isɔluɛi che puaa Choosɛ wa, mbo nyuna ndu aa: “Nɛɛ yaa cho yɛ haa?” 9 Mi Choosɛ mulul finya ndɔ aa: “Puaa Mɛlɛka ke ya o lɛŋndeŋ ndeŋ niŋnda cho haa ni.”+ Mi finya ndɔ dimul ndu aa: “A yandii, chuu wɔ ya nda, le mi dɔu nda sala.”+ 10 A teleŋ koŋ, Isɔluɛi wa niŋ o yuuwɛi, nduyɛ ndoo chi lɛ lapi le. Okoŋ, mi Choosɛ sɔɔŋguu nda finya ndɔ ikɛi, mbo sɔsa nda kuulaŋ, nduyɛ mbo kɔmaŋ nda. 11 Mi Isɔluɛi dimul Choosɛ aa: “I ve lɛ pɛŋ kɔl maa I dellɛ num lehɔl te.+ Kɛ mi Mɛlɛka tosa mi cha chuauwaa numnda.”* 12 Okoŋ, mi Choosɛ faŋa nda Isɔluɛi o la wu, mbo baŋ wulaŋ, nduyɛ mbo tundu hɔlla lɛŋ.

13 Okoŋ, mi Choosɛ chua puaa nduaa ŋiɔɔŋnda, mbo sɔɔŋguu nda Isɔluɛi ikɛi. Mbo saa Ifiluem+ a ba ndɔ kɛndɔɔ, mbo hivi ndu o ba mial Isɔluɛi yo choo. Nduyɛ mbo saa Manaasɛ+ a ba ndɔ miallo, mbo hivi ndu o ba kɛndɛ Isɔluɛi yo choo. 14 Kɛ, mi Isɔluɛi chua ba ndɔ kɛndɔɔ, mbo handu Ifiluem o lebol, mi che bɛɛ ndu wa chuaambɔɔ ni. Okoŋ, mbo handu ba ndɔ miallo Manaasɛ o lebol. Ndoo sina maa Manaasɛ wa po tasoo ni.+ Kɛ ndupila kɛsɛ kɛɛsiaa ni mbo handu nda balaŋ choo lende. 15 Okoŋ mbo duau Choosɛ sala. Mbo dimi aa:+

Maa diola nilaŋ a diola finyaa niaa, Ebilaham nda Aase wa nda choo fɔ!

Maa a violu chuauwa, nduyɛ ma kui tau tau o lɛŋndeŋ choo fɔ!”+

17 Mɛɛ Choosɛ che maa ba kɛndɛ finya ndɔ wo cho wɔ tuŋ o handaa Ifiluem o lebol, mbo tambu kɔl tau. Okoŋ, mbo kindiŋ le mbo faŋa ba kɛndɛ finya ndɔ wo Ifiluem o lebol, mbo handu Manaasɛ o lebol. 18 Mi Choosɛ dimul finya ndɔ aa: “O bɛnda lende le kɛkɛ, kanifuule Manaasɛ cho po tasoo ni.+ Handu ndu ba num kɛndɔɔ o lebol.” 19 Kɛ mi finya ndɔ kɛɛ. Mbo dimi aa: “I sina po nuu, I sina. Ndu bɛɛ cho simnɔŋ kunda bɛndoo mbo fula tɔɔ. Kɛ a koŋ kpou, tɔɔ pɔmbɔ ndɔ wo hiau niŋ a o ndɔɔ.+ Nduyɛ chuauwaa nduaa mamaa* cho kui tau, ma simnuŋ kaalaŋ.”+ 20 Okoŋ, mbo hiau lachi a nda salaa dɔwɔɔ o paale leŋ choo.+ Mbo dimi aa:

Kɛ a koŋ kpou, mbo handu Ifiluem Manaasɛ lachi, mɛɛ o wa nda salaa dɔwɔɔ.

21 Okoŋ mi Isɔluɛi dimul Choosɛ aa: “Piɔmndo ya hiŋ nuaa ni.+ Kɛ Mɛlɛka cho hiouwɔɔ lachi a waa a nya latulu, mbo tosa mi la miiŋgu o lɛŋnde finyaa nyaa mamaa niŋ.+ 22 Nduyɛ, lɛŋnde ibuŋga ya chɔulaba Amɔluaitiiya a muɛi nii faŋnde vɛlɛ a chiɔule nileŋ mi puu nda o ba leŋ, I cho num buŋgɛi kilul loŋ mbo hiou mɛɛ bɛndaa numnda cho sɔla yɛ.”

49 Mi Chekɔpu veelu puaa nduaa, mbo dimul nda aa: “La chuuŋgiaŋ naapilɛ, le mi dimul nya nyɛ nɔ le nya yɔŋnɔŋndo o chilaŋ* niŋndo. 2 Nya chuauwaa Chekɔpu wa, la chuuŋgiaŋ naapilɛ mi la yaŋ nilaŋ. La yaŋ ya Isɔluɛi finya nya nilaŋ.

3 “Lubɛŋ,+ num cho po ni tasoo ni.+ Num cho violɔɔ ni tasoo a kpaaya nuu o chua piaanduyɛi nii niŋ ni. A wa wana lebɛɛ bɛndu a wana kpaaya bɛndu. 4 Kɛ a sɔla niŋ batiuwaa le. Mɛɛ mɛŋma hunaŋ ma cho nuaa ma kandaŋ te yɛ, lende ŋ cho ni. Kanifuule, ma bii kɔllo ma hel o kpele finya numndo choo.+ A teleŋ koŋ, ma nɔɔliaa kpele nuu. A tonya kpeekpei, mbo hel o kpele nuu choo!

5 “Pɔmbɔɔ a bɛndoo Simiɔŋ nda Livai cho ni.+ Nduyɛ, le sɔŋgɔlaŋ mɛlioo nda toosiaa wolɔɔla ndala chɔulaŋ ni.+ 6 Maa fɛɛŋ bɛɛ I tosa chaŋyɛi a nda le fɔ! Maa diola nilaŋ la chiɛɛliaŋ a kunda ndaa le, kanifuule te a tuulu pɛ kɔl, waŋnda chieeya nda diu diu ni.+ Nduyɛ le kɔl nda kɛndɔɔ, nauwaa towaa nda kili nyɛsuaŋ ni. 7 Sendioo cho kɔl nda tuuwo choo, kanifuule o wɔu bɔɔ.+ Nduyɛ sendioo cho yolɛi ndɛi choo, kanifuule i tuulu bɔɔ. I cho nda puusiaa o tanda Chekɔpu wo niŋ, nduyɛ mi sɛŋi nda o Isɔluɛi niŋ.+

8 “Kɛ num Chuda,+ pɔmbuaa numnda a bɛndaa numnda cho num saŋgala.+ Ba numndo cho wa yaamɔɔwaa numnda o ikɛsu.+ Nduyɛ puaa finya numnda cho num hunɔɔ wulaŋ beŋ.+ 9 Kpɔkuŋ* fɔŋndɔɔ Chuda cho ni.+ Po nuu, a fula niŋ ma kɔ del nyɛdiaa numndo choo ma de ndu, okoŋ ma kuɛŋnuŋ. O bɛmnuŋ, nduyɛ mbo siɛndiŋ puɛɛŋ maa kpɔkuŋ. O nɛɛnɛ bii yɛ kɔllo mbo kpeŋa kpɔkuŋndo? 10 Tinda lemasaa feŋaŋ niŋ Chuda le,+ nduyɛ tindaa feŋaŋ niŋ o peluŋ ndɔŋ bɛŋgu le, haaa mi Silɔɔ* hiŋ.+ Nduyɛ waŋnda kpou cho ndu diikɔŋ.+ 11 O cho sofɛlɛ ndɔɔ baa o yɔm makilepiiyo, nduyɛ mbo baa chuale sofɛlɛ ndɔɔ o yɔm makilepii kɛndɛ kɛndɔɔ. O cho nyɛla ndɔlaŋ tɔɔ o muɛiyaŋ niŋ, nduyɛ mbo tɔɔ doma ndɔɔ o muɛima kilepiiyaŋ niŋ. 12 Hɔltaŋ la cho ndu la diuwaa yɔɔ a muɛiyaŋ, nduyɛ mi chiŋndoŋ wa ndu ŋ humbu fo a milikiiyaŋ.*

13 “Sɛbulɔŋ+ cho wa ichali o pee mɛŋma ihɛllo kɔŋgɔ, naa dɛndɛla mamɛŋndaŋ la huŋ simndaŋ nda.+ Nduyɛ, pɛŋgula lɛŋnde ndɔleŋ la kua niŋ haaa ba Saidɔŋ ndo.+

14 “Sofɛlɛ dialuŋ kalaa Isaka+ cho ni, mbo wa ihini bɔlɔla nda handu sofɛliaa o lakɔɔ laŋ la tiɔɔŋ tɛɛŋ. 15 O cho chɔ maa fondaŋ o cho pɛŋgioo wo cho fondaŋ kɛndɛ, nduyɛ maa lɛŋnde o cho niŋ ndeŋ le naŋ tau. O cho choŋgulaŋ tusi mbo chua wolɔɔlaŋ, nduyɛ mbo chɛl ma baŋ ndu le wali kala kalaa tosaa.

16 “Kaaleŋ le pilɛ o Isɔluɛi niŋ Daŋ+ cho ni, nduyɛ o cho hunɔɔ kɔɔsa a wanaa nduaa kpou.+ 17 Daŋ wa maa kɛu wɔɔŋ wɔɔŋ cho o nɛiyo daŋgala wo, o lɔwa sofɛlɔɔ tɔndii kɔɔliei, mi wana cho kɔlaŋ a ndu wo del amakɔɔ wo.+ 18 Oo Chɛhowa, I cho chum le ma piŋi ya.

19 “Kaadi ndu,+ wanaa del waŋnda choo o nɛilaŋ nda cho ndu delɔɔ choo. Kɛ o cho nda mululaŋ, nduyɛ mbo tisa nda kɔɔli.+

20 “Asia+ nɔ niŋ nyɛdiaa* o hɔbɛi. Nduyɛ, o cho wa nyɛdiaa bɛnda le masaa wo yɔŋgoo.+

21 “Kial laandu mɛsɛlɛiyo Nafitalii+ cho ni. Nduyɛ diomnda taasilaŋ la fula ndu o sondo ni.+

22 “Choosɛ+ cho lɛuvii fula o yɔm kuamaa wo ni, yɔm kuamaa cho o pioo kɔŋgɔ, o lɛuwuŋ ndɔŋ pɛŋgɛlaŋ o kpakioo choo wo. 23 Kɛ mi wanaa wuu chiŋuaŋ nda del ndu choo, nduyɛ ma via ndu a maŋ. Ma hiau vɛlɛ lachi a ndu yɛleŋ tullo.+ 24 Kɛ a koŋ kpou, chiɔule ndɔleŋ le wa ndu o ba.+ Nduyɛ bala ndɔlaŋ la wa la kala poŋ, le chiŋuaŋ wuuwo chɔ chɔ.+ Wana kpaaya bɛndu mala Chekɔpu wo tosa hei ni, wana mandaa lasaa, pouwo le Isɔluɛi. 25 O Mɛlɛka finya nya wo lo o* fula ni, nduyɛ o cho nya mala. O cho latulu a Mɛlɛka Kpaaya Kpou Kpou Wo. O cho nya salaa dɔwɔɔ a salala fula o choo choo niŋndaŋ, vɛlɛ a salala fula o lɛŋndeŋ bɛŋgu laŋ.+ O cho nya salaa dɔwɔɔ mi la sɔla chɔluaa a chuauwa tau tau. 26 Salala finya numndaŋ la cho wa filioŋ, mbo hiou salala pembuŋ bɛnduŋ cho le fɛɛŋ a fɛɛŋ ndoŋ, vɛlɛ a salala nyɛm kɛndɛŋ cho o pemboŋ choo woŋ.+ Salalaŋ ndaŋ la cho wa Choosɛ choo. La cho wa o mɔsil lemasa wana sɔla hɛlioo bɛndaa nduaa tɛɛŋ ndo choo.+

27 “Bɛŋjamiŋ+ cho hiouwɔɔ lachi a yaamɔɔwaa nduaa sɛɛsiaa, mɛɛ tiwollo tosa yɛ.+ Te paaleŋ le sɛ pɛ, o cho nyɛ o dii yo dio, nduyɛ ichɔllo, mbo piɔu nyɛm o puŋga woŋ.”+

28 O haa niŋ kaala 12 ndaŋ Isɔluɛi la fula ni. Nduyɛ mɛɛ finya nda wa nda salaa dɔwɔɔ, nyɛ o dimul nda wo wa hoo ni. Mbo duau wana o wana sala o nɔ mbo sɔla wo.+

29 Okoŋ kɔɔli, mbo dimul nda aa: “I cho suŋ wu.+ Nduyɛ te I vi pɛ, la kumbu ya naa nda kumbu finyaa niaa mamaa wa, o buulu cho o yondo Ɛfulɔŋ, Hitaitiinɔɔ wo niŋ.+ 30 Buuloo hoo cho o yondoo Makipila, Mamilue lachi o lɛŋnde Kenaŋ ndeŋ niŋ. Yondoo hoo Ebilaham pendu Ɛfulɔŋ, Hitaitiinɔɔ o ba ni, le waa wanaa nduaa vilɛiya kumbɔɔ. 31 Loŋ nda kumbu Ebilaham nda Sela laa ndɔ ni.+ Loŋ nda kumbu Aase+ nda Lubeka laa ndɔ ni. Nduyɛ loŋ ya kumbu Liya ni. 32 Puaa Hɛɛti wa o ba o pendu yondo koŋ a buulu cho leniŋ ndo ni.”+

33 Mɛɛ Chekɔpu chii puaa nduaa sɔɔŋ muŋ kpou dimul, mbo heelu peluŋ ndɔŋ o kpele, mbo chua yoomuma ndɔma mɛɛlaŋ. Okoŋ mbo wu, ma kumbu ndu maa finyaa nduaa mamaa.+

50 Okoŋ mi Choosɛ del finya ndɔ choo+ a chaŋndo, nduyɛ mbo sɔsa ndu kuuwo. 2 Okoŋ kɔɔli, mi Choosɛ dimul wanaa sina a koowaŋ okɔɔ wa le ma toosiaa* dialuŋ+ finya ndɔ woŋ. Okoŋ, ma toosiaa muŋ. 3 Nduyɛ, ma chua palɛi 40 kpulukuu le ndu toosiaa. Kanifuule, boondei hei ndaa chua ni le dialuŋ vilɛiyoŋ toosiaa. Le palɛi 70 waŋnda Ichipi wa ndu chaŋndo.

4 Mɛɛ palɛi ndaa chua le ndu chaŋndo ve chuu, mi Choosɛ dimul laŋgbaa kalaa Feloo wa o pilɛ aa: “Te I cho pɛ wana sɔvɛ num o hɔl, mɛɛ a yandii, dimul la Feloo yooŋgoo hoo aa: 5 ‘Mi finya nuu dimul la aa: “Piɔmndo ya hiŋ nuaa ni.+ Lelaŋ, mɛnaŋ+ po maa te I vi pɛ, a cho ya lakɔ kumbɔɔ o lɛŋnde Kenaŋ ndeŋ niŋ,+ o fondaŋ ni ya toosiaa le waŋvilɛiyaa niaa kumbɔɔ wo.”+ Lelaŋ a yandii, chɛl la mi kɔ kumbu finya nuu. Te I chii pɛ, I cho miiŋgu nanuŋ.’” 6 Mi Feloo muli aa: “Mɛɛ lo o buŋgɛi ŋ chua ve choo.+ Kɔ kumbu finya num.”

7 Okoŋ, mi Choosɛ kua finya ndɔ kumbɔɔ. Nduyɛ mi buɛiyaa Feloo wa, laŋgbaa nduaa kalla, vɛlɛ a waŋ banaa+ o lɛŋnde Ichipi leŋ niŋ kpou kua a ndu latulu. 8 Mi Choosɛ kua vɛlɛ a yuŋgu ndɔɔ, bɛndaa nduaa a pɔmbɔ ndɔ, vɛlɛ a wana o wana wa o yuŋgu finya ndɔ wo niŋ.+ Chuauwaa ndaa pɔmbuaa, saa ndaa, chuiŋaa ndaa, a nauwaa ndaa kinɛi nda mɛi Koosiɛŋ ni. 9 Mi puaa kua a nyɛm nyaanaŋ suaa naŋndoŋ+ nda, a wanaa nyaanuŋ suaa wa bɛɛ kua a ndu latulu. Faŋga bɛndoo pila nda wa ni. 10 Mɛɛ nda fuuluu o yasaba Atadi wo o tanda Chɔɔdaŋ ndo niŋ, ma chaŋ chaŋndo pila. Nduyɛ, mi Choosɛ chaŋ finya ndɔ le palɛi i ŋɔmmɛu. 11 Mɛɛ Kenanaitiiyaa wa o lɛŋnde leŋ niŋnda che nda chaŋndo o yasaba Atadi wo, ma dimi aa: “Biisi bɛndoo pila cho hoo le Ichipiaŋnda ni!” Le sabu koŋ nda ke fondaŋ koŋ diolaŋ ni aa, Ebɛl-misiluim.* O tanda Chɔɔdaŋ ndo niŋ fondaa hoo cho ni.

12 Okoŋ, mi puaa Chekɔpu wa tosa mɛɛ o dimul nda yɛ.+ 13 Mi puaa nduaa kua a ndu o lɛŋnde Kenaŋ ndeŋ niŋ, ma kɔ kumbu ndu o buuloo niŋ o yondoo Makipila, o cho Mamilue lachi wo. Yondoo hoo Ebilaham pendu Ɛfulɔŋ, Hitaitiinɔɔ o ba ni, le waa wanaa nduaa vilɛiya kumbɔɔ.+ 14 Mɛɛ Choosɛ chii finya ndɔ kumbɔɔ, mi ndu, bɛndaa nduaa a pɔmbɔ ndɔ, vɛlɛ a wanaa liila ndu finya ndɔ kumbɔɔ wa kpou miiŋgu Ichipi.

15 Mɛɛ bɛnduaa Choosɛ wa che maa finya nda vi, ma dimi aa: “Wana che pɛ maa Choosɛ bii naa o kɔl, nduyɛ maa o cho naa maa miŋgul le nyɛ o nyɛ wɔɔŋ naŋ tosal ndu.”+ 16 Okoŋ, ma yɔŋ yooŋgoo o Choosɛ lo aa: “Tuupa mi finya num wu, mbo mɛi lediom aa: 17 ‘La dimul Choosɛ aa: “Nyɛ bɛndaa numnda tosal numndo niŋ kposoŋ te. Kɛ a yandii, I cho num nyɔɔloo le ma mal nda haki le nyɛ nda tosal numndo.’” Kanifuule Mɛlɛka finya num ndoo piɛiyo, buɛiyaa nduaa naŋ cho ni. Lelaŋ a yandii, mal naa haki.” Mɛɛ Choosɛ tuei nyɛ nda dimi wo, mbo chaŋ. 18 Okoŋ mi bɛndaa nduaa huŋ ma del ndu o labɛŋgu niŋ, ma dimi aa: “A che naa, chiaa numnda naŋ cho ni!”+ 19 Mi Choosɛ dimul nda aa: “La yɔŋ isiooŋ te. Baa ya cho Mɛlɛka ni le mi kilul nya yamɛi? 20 Mi che bɛɛ mi nyaa tuu le ya iwɔɔŋnde tosallo,+ kɛ a mɛɛ nya cho ndi chɔɔ hau yɛ, mi Mɛlɛka tosa mi i simnuŋ ikɛndɛ, le yoomula bɔɔbɔɔ chiindiaa.+ 21 Lelaŋ la yɔŋ isiooŋ te. I cho hiouwɔɔ lachi a nya, vɛlɛ a chuauwaa nyaa nyɛdiaa kioo.”+ Mi nyɛ o dimi hoo wo dɛɛniaa nda kɔltaŋ, nduyɛ mbo ke nda tiindaŋndo.

22 Okoŋ, mi Choosɛ a yuŋgu finya ndɔ wo hiau lachi a waa o lɛŋnde Ichipi leŋ niŋ. Choosɛ wa achal le wɔsilaŋ 110. 23 Mi Choosɛ cha chuaa mamaa Ifiluem nda.*+ Mbo cha vɛlɛ puaa Makaya+ wa, Manaasɛ po ndɔɔ. Nda kpou mi Choosɛ bii nda o bɛŋgu.* 24 O mɛɛlulaŋ kpɔŋ, mi Choosɛ dimul bɛndaa nduaa aa: “Piɔmndo ya hiŋ nuaa ni. Kɛ Mɛlɛka cho nya hɔlla mulul,+ nduyɛ mbo soli nya o lɛŋndeŋ ndeŋ niŋ, mbo kuɛ a nya o lɛŋnde o chuel Ebilaham, Aase, a Chekɔpu buŋgɛi leŋ niŋ.”+ 25 Mi Choosɛ dimul Isɔluɛi puaa nduaa aa: “Mɛlɛka cho nya hɔlla mulul. Lelaŋ, la mɛnaŋ maa te I vi pɛ, la cho paala nilaŋ faŋa nanuŋ, mi la kuɛ a laŋ.”+ 26 Okoŋ kɔɔli, mi Choosɛ wu. O wa wɔsilaŋ 110. Ma toosiaa dialuŋ ndɔŋ,+ ma wou muŋ o kɔfiŋndo* niŋ Ichipi.