CHAŊ IMƆNƆƆ
א [Alɛfi]*
1 Chiee bɛndu wa hoo o piaa cha a waŋnda chieeya wo, nuawɔ se mɛɛ o loŋnuŋ niŋ fondo fuu yɛ!+
Chiee ndoo fula hoo tɔɔ o lɛŋnde tɛɛŋ ndo, nuawɔ se mɛɛ o simnuŋ mɛɛ waŋndo o vii nuaa pɔnɔɔ yɛ!+
Ndu wa hoo maa chua lemasaa o tandalaŋ tɛɛŋ ndo simnuŋ niŋ hau chiɔɔ!+
ב [Bɛti]
2 Ichɔl pii pii o lɔl chaŋndo fukpaa fukpaa,+ nduyɛ mi mɛmiaŋ ma liviaa ndu kpaŋndoŋ.
Wanaa ndaa kaala ndu wa kpou, o pilɛ bɛɛ cho loŋ le ndu kɔllo dɛɛniaa le.+
Chaaŋaa nduaa kpou faŋaŋ ndu kɔɔli,+ ma simnuŋ yaamɔɔwaa nduaa.
ג [Kimɛɛ]
3 A kuɛ a Chuda o biyɔɔ niŋ,+ o chɛle kala kala leŋ niŋ, nduyɛ mbo wa o nyɛ nɛiyaa niŋ.+
O cho niŋ ichali kaayii cheleŋnde tɛɛŋ,+ kɛ pɛŋgi bɛɛ o cho sɔla le.
Wanaa cho ndu nyɛpalaa tusioo choo wa kpou del ndu choo a teleŋ o cho o nyɛkindilaa niŋndo.
ד [Dalɛti]
4 Nɛila kuɛ Saayɔŋ ndaŋ la cho mɔnɛi biyɔɔ, kanifuule wana o wana cho lɛ hunɔɔ loŋ le bɔŋaŋndo le.+
Diola kpakila ndɔlaŋ kpou la cho la tambɛi,+ mi wanaa nduaa soliaa lasalaa wa mɔnɛi biyɔɔ.
Yufuaa* nduaa cho mɔnɛi bɛndu bɛnduei biyɔɔ, nduyɛ mbo wa o kɔl tambɛi bɛndu bɛndoo niŋ.
ה [Hee]
5 O simnuŋ niŋ buɛiyo le yaamɔɔwaa nduaa, nduyɛ yaamɔɔwaa nduaa choŋnuŋ niŋ hɛnɛkɛ.+
Kanifuule Chɛhowa tusi ndu nyɛpalaa choo, le mɛɛ o tosa hakilaŋ tau yɛ.+
A kuɛ a chuauwaa nduaa o biyɔɔ niŋ yaamɔɔwaa nduaa o hɔl.+
ו [Wau]
6 Naŋɔɔ bɛndu chua laandoo Saayɔŋ ndoo naŋ ndo kpou kuɛŋnuŋ.+
Laŋgbaa nduaa kalla cho niŋ ko maa kialaa laanduaa cho nyɛdiaa nuuviaa kɛ a seeluŋ te wa,
Nduyɛ ma wa kɔlaŋ a saŋgɛi wanaa cho nda kiltaŋ kɔɔli wa lachi.
ז [Sayiŋ]
7 A teleŋ o wa o nyɛpalaa niŋ nduyɛ ndoo nɔ naa chalaa le wo,
Mi Chulusalɛm loonuŋ a nyɛm kɛndɛŋ bɛnduŋ ndoo nɔ o paandoo niŋndoŋ.+
Mɛɛ wanaa nduaa del yaamɔɔwaa nduaa o ba nduyɛ ndoo nɔ lɛ wana malaa le,+
Mi yaamɔɔwaa nduaa cha ndu, nduyɛ ma mam ndu le mɛɛ o sɔla tambei yɛ.+
ח [Hɛti]
8 Chulusalɛm tosa hakioo tau.+
Le sabu koŋ o simnuŋ nyɛ wɔɔŋ wɔɔŋ bɛndu ni.
Wanaa ndaa ke ndu paandu bɛɛleŋ nda kpou, a chi lɛ ndu nyɛ o nyɛ le, kanifuule a che ndu tum fondo.+
Ndupila cho ŋɔɔchiaŋndo,+ nduyɛ mbo muliŋ a siɔmbulaŋ.
ט [Tɛti]
9 Sɔɔŋ ndɔŋ nɔɔlɛiyoŋ cho o nyɛla ndɔla chuɛɛnaŋndaŋ niŋ.
O yiyaŋ a chila ndɔlaŋ okɔɔ le.+
Delɔɔ ndɔɔ wa bɔɔ suɛi kɔndɔfili bɛndu, nduyɛ o sɔla wana o wana le ndu kɔllo dɛɛniaa le.
Oo Chɛhowa, chɔ nyɛ ni palaa, kanifuule yaamɔɔnɔ nuu cho ya saŋgalaŋndo choo.+
י [Yodi]
10 Yaamɔɔnɔ ndɔɔ puŋga nyɛm ndɔŋ sɔvɛ sɔviɔŋ kpou.+
O che lɛŋii cheleŋnde luɛiyɔɔ o chiɛi Mɛlɛkaa niŋ,+
Wanaa ŋ dimi maa a nɔ ma wa wanaa Mɛlɛkaa tɛɛŋ te wa.
כ [Kafi]
11 Wanaa nduaa kpou cho mɔnɛi biyɔɔ. A cho balɔɔ kpeekpei le nyɛdiaa.*+
A cho nyɛm ndaŋ sɔvɛ sɔviɔŋ yɔŋgoo le ma sɔla nyɛ nda dia wo, le halikpeŋ ma wa yoomu.
Oo Chɛhowa, tofawɔ mɛɛ ya simnuŋ niŋ maa wana lanɔ fondo yɛ.*
ל [Lamɛdi]
12 Baa hei cho isɔɔ le nya cho hiouwɔɔ o nɛi ya le?
La tofawɔ!
Baa nyɛ nɛiyaa cho pa mbo hiau nyɛ nɛiyaa keeku ya choo wo,
O Chɛhowa tosa mi saŋga a teleŋ o dɔɔnuŋ tumbe o kala kala wo?+
מ [Mɛmi]
13 O yɔŋ yiŋndeŋ fulaa o choo choo niŋ mi le huŋ luɛi o paala nilaŋ niŋ,+ nduyɛ mi le luam paa kɛ kɛ.
O hendul la yaŋɔɔleŋ le peluŋ nuŋ, nduyɛ mbo baŋ ya le mi miiŋgu amakɔɔ.
O mal la yapilɛ kpeele.
Lepaa o lepaa, I cho o nyɛ nɛiyaa* niŋ.
נ [Nuŋ]
14 Hakila nilaŋ la holnuŋ ya maa yɔm nda baa nauwa o ikɛsu wo, mbo hol taŋ kpiŋ a ba ndɔɔ.
La cho ya la kɛsiaa o ikɛsu, nduyɛ I nɔ lɛ mayoomu le.
Chɛhowa mal la wanaa ya nɔla mi simul te wa o ba.+
ס [Samɛki]
15 Chɛhowa chua wanaa mayoomuaa kpou mbo faŋa nda ya ikɛi.+
O chuuŋgiaa waŋnda kunda bɛndoo le ma chuii puaa niaa feleŋguaa mululu.+
Chɛhowa niɔu niɔu chua laandu yufuaanɔɔ Chuda, o doola* nda toosiaa muɛiyaŋ ndo niŋ.+
ע [Ayiŋ]
16 Sɔɔŋ muŋ tosa ni mi wa chaŋndo,+ nduyɛ mi mɛmiaŋ ma wa ya tolɔɔ.
Wana o wana ndoo nɔla mbo dɛɛniaa ya kɔllo ɔɔ mbo tosa mi hini kɔl, a choŋnuŋ landaŋ a ya.
Puaa ya velu wa choŋnuŋ niŋ a ba nda, kanifuule yaamɔɔwaa ndaa yem nda.
פ [Pe]
17 Saayɔŋ heelu bala ndɔlaŋ choo choo,+ nduyɛ o nɔ wana o wana le ndu kɔllo dɛɛniaa le.
Chɛhowa dimul yaamɔɔwaa Chekɔpu wa, a cho ndu a balaa kpou wa le ma chiŋalaŋ ndu.+
Chulusalɛm simnuŋ niŋ nyɛ wɔɔŋ wɔɔŋ bɛndu le nda.+
צ [Sadi]
18 Chɛhowa cho sakpo.+ Kɛ le mɛɛ ya kɛɛ sawala ndɔlaŋ* diikɔŋndo yɛ nyɛpalaa hoo cho ya choo ni.+
La yaŋ nilaŋ nya waŋnda kpou, mi la che nyɛ ni nɛiyaa.
Yufuaa* niaa a puaa niaa feleŋguaa, a kuɛŋnuŋ a nda o biyɔɔ niŋ.+
ק [Kilofi]
19 Mi veelu wanaa ndaa kaala ya wa, kɛ nda kpou faŋaŋ ya kɔɔli.+
Wanaa niaa soliaa lasalaa a waŋ banaa niaa kpou o chiee bɛndoo niŋ sɔla tambei.
A cho nyɛ nda dia wo nuuviaa kpeekpei le halikpeŋ ma wa yoomu.+
ר [Luɛsi]
20 Oo Chɛhowa, chɔ nyɛpalaa bɛndu ya cho niŋndo.
Demboo* cho ya mulu mulɔŋndo niŋ.
Kɔl nuu cho bɔɔ o saŋgaa niŋ, kanifuule I tosal num bɔɔ bolle kalaleŋ.+
Muɛi faŋnde diu diu chuauwaa niaa o bɛɛ,+ nduyɛ chiɛiniŋ bɛɛ waŋnda cho piɔmndaŋ.
ש [Shiŋ]
21 Waŋnda tuei niŋ a mɔnɛi ya cho niŋnde okɔɔ, kɛ wana o wana dɛɛniaa ya kɔllo le.
Yaamɔɔwaa niaa kpou tuei a kpundɛ komal la wo.
Yaamɔɔwaa niaa cho a kɔl kɛndɛ, kanifuule num tosa ni mi i yɔŋnuŋ.+
Kɛ paale numnde ŋ soo a leŋ okɔɔ leŋ le nɔ le hunɔɔ,+ mi nda bɛɛ simnuŋ maa ya.+
ת [Tau]
22 Maa chɔ yɔŋnda ndala wɔɔŋndaŋ kpou, nduyɛ ma tusi nda nyɛpalaa kala kalaa choo,+
Mɛɛ ŋ tusi ya ndu choo le hakila nilaŋ kpou yɛ.
Kanifuule mɔnɛi nii cho bɔɔ, nduyɛ kɔl nuu cho o saŋgaa niŋ.
א [Alɛfi]
2 Nuawɔ se mɛɛ Chɛhowa kumbu chua laandoo Saayɔŋ a kɔl ndɔ tuuwo yɛ, naŋ chaa yumbu yumboo ni!
O soli naŋɔɔ bɛndu Isɔluɛi ndoo naŋ ndo o choo choo niŋ, mbo viau ndu o lɛŋndeŋ choo.+
Mbo kɛɛ le loonɔŋndo naa nduaa o kɛsi peloŋ nda,+ o paale ndɔle kɔl tuuleŋ choo.
ב [Bɛti]
2 Fondaŋnda chalaala Chekɔpu laŋ kpou, Chɛhowa chii laŋ miolɔɔ, inyiɛɛ bɛɛ o tuiinuŋ ndu le.
Fondaŋnda kala kalala chua laandoo Chuda,+ mbo tɛɛmbuu laŋ o kɔl ndɔ tuuwo niŋ.
O tusi ndu lɛŋ mɛ mɛ, nduyɛ mbo tɛɛmbuu masale ndɔleŋ+ a masaa nduaa.+
ג [Kimɛɛ]
3 Mɛɛ o dɔɔnuŋ tumbe o kala kala, mbo kili yoomuma kɛ kɛ* Isɔluɛi ndoo nɔ.
Mɛɛ yaamɔɔnɔ ndɔɔ hiŋ, mbo faŋa ndu balaŋ kɔɔli yɔŋii ndoo mala ndu.+
Mɛɛ yiŋnde bɛnduleŋ le luam nuaa nyɛ o nyɛ wa leŋ ikɛiyo yɛ, lende o dɔɔnuŋ tumbe a Chekɔpu ni.+
ד [Dalɛti]
4 O kindu chiɔu ndɔɔ maa yaamɔɔnɔ, nduyɛ mbo bɛɛndiaa ba ndɔ kɛndɔɔ nyɛkɛndɛi le sɔŋgɔɔ maa yaamɔɔnɔ.+
Nduyɛ, mbo hiau lachi a wanaa sɔvɛ sɔviaa diuwo.+
Mbo hulu kɔl ndɔ tuuwo maa leyiŋ+ o tɛndii chua laandoo Saayɔŋ niŋ.+
ה [Hee]
5 Chɛhowa simnuŋ maa yaamɔɔnɔ naa.+
O chii Isɔluɛi miolɔɔ.
O chii bandula ndɔlaŋ miolɔɔ kpou,
Mbo tɛɛmbuu vɛlɛ fondaŋnda ndɔla kala kalalaŋ kpou.
O tosa mi chua laandoo Chuda wa mɔnɛi biyɔɔ, nduyɛ mi chaŋndaŋ la kui.
ו [Wau]
6 O pɛl bafɛi ndɔɔ wɔ wɔ,+ mɛɛ yɛkpɔɔ wa nuaa o kpeloo niŋ yɛ.
O tosa mi bɔŋaŋnda ndɔlaŋ la mɛɛlu.*+
Chɛhowa tosa mi waŋnda puɛɛnuŋ a bɔŋaŋndaŋ, vɛlɛ a paale pɛŋgiaaleŋ o Saayɔŋ niŋ.
Nduyɛ o kɔl ndɔ tuu bɛndoo hoo niŋ, o chɔm lebɛɛ le masa ɔɔ wana soliaa lasala le.+
ז [Sayiŋ]
7 Chɛhowa kɛɛ bandu ndɔ luamaa lasalaa,
Nduyɛ mbo tul chiɛi ndɔɔ leyɛ.+
O chua kpakila ndɔla kala kalalaŋ mbo mal yaamɔɔnɔɔ o ba.+
A cho deŋioo o chiɛi Chɛhowa wo niŋ,+ naŋ chaa o paale bɔŋaŋ ndeŋ choo ni.
ח [Hɛti]
8 Chɛhowa kɛɛsiaŋ o kɔl le kpaki chua laandoo Saayɔŋ tɛɛmbuuwo.+
Nduyɛ, o tuu kpakila ndɔlaŋ a yoole tuwaaleŋ.+
O cho hiouwɔɔ lachi a ba ndɔɔ siɛndioo le ndu tɛɛmbuuwo,*
Mbo tosa vɛlɛ mi kpakila ndɔlaŋ la wa mɔnɛi biyɔɔ.
Laŋ kpou la koombiaa.
ט [Tɛti]
9 Diola ndɔla kpakilaŋ kpou la tolnuŋ o puuloo bɛŋgu.+
O yimi yimi diola ndɔlaŋ kpou, nduyɛ mbo tɛɛmbuu laŋ.
Masa ndɔɔ a laŋgbaa nduaa kalla cho o lɛŋii cheleŋnde niŋ.+
Sawa* cho lɛ le. Wanaa suaa le Mɛlɛka wa bɛɛ sɔla lɛ yilaŋndoŋ Chɛhowa o ba le.+
י [Yodi]
10 Waŋ banaa le chua laandoo Saayɔŋ chal lɛŋ ma mei kpili.+
A kɔndu chundoo ma wounuŋ o lebol, nduyɛ ma wounuŋ nyɛla labɛkilaŋ.+
Yufuaa Chulusalɛm tundu bolle lɛŋ.
כ [Kafi]
11 Hɔltaŋ la yɔŋnuŋ ya niŋ yifidii a mɛmiaŋ.+
Demboo* cho ya mulu mulɔŋndo niŋ.
Mɛɛ ya che mɛɛ chua laandu wanaa niaa del lɛ, mi yemuŋ nuŋ choŋ lɛŋ kpeŋjeŋ.*+
Kanifuule, chuaambuaa a chɛlɛkpiaa cho wouwo kpandeŋ o luŋ kpendekele o chioo niŋ.+
ל [Lamɛdi]
12 A wa kalaa ndaa o laba,
Mɛɛ waŋndo boliŋ nuaa o luŋ chioo mbo wa o wowɛi yɛ,
Ma wa nda nyunaa aa, “Kuɛɛnɛ nyɛdiaa a muɛiyaŋ ma cho yɛ?”+
מ [Mɛmi]
13 Yɛɛnɛ ya nɔ yɛ mi soliŋ kpeku maa tamasi,
Ɔɔ a yɛɛ ya nɔ yɛ mi tuu num, Oo chua laandoo Chulusalɛm?
Oo chua laandu yufuaanɔɔ Saayɔŋ, a yɛɛnɛ ya nɔ yɛ mi tuu num le num kɔllo dɛɛniaa?
Kanifuule, tambii numnde pɛŋgɛlaŋ i hɔbɛi maa pee mɛŋma ihɛl.+ Nɛɛnɛ nɔla yɛ mbo siŋgi num?+
נ [Nuŋ]
14 Yilaŋuŋ wanaa num aa suaa le Mɛlɛka wa che woŋ, choolaŋ ŋ wa ni nduyɛ nyɛ fondoo fuu.+
Te ndaa chɔɔmuu yɔŋ num wɔɔŋndo pɛ, a ve lakɔ o biyɔɔ niŋ te.+
Kɛ ma hiau lachi a yilaŋuŋ lachoowaŋ num dimullo, okoŋ ma hui num a yooŋgula lachoowalaŋ.+
ס [Samɛki]
15 Wanaa cho hiouwɔŋndo o nɛi ya cho balaŋ tiɔmɔɔ ma mam.+
A cho huiyoŋ hɔŋndo o kɔndɔfili bɛndoo niŋ,+ ma hiiluu bolle a nyɛ yɔŋnuŋ chua laandoo Chulusalɛm ndo, ma dimi aa:
“Chiee nda dimi hoo aa, ‘O choŋnuŋ o kɛndɛ kɛndɛ, nduyɛ mbo huŋ a nyaaloo o lɛŋndeŋ choo’ wo, ndu cho niŋ hoo ni?”+
פ [Pe]
16 Yaamɔɔwaa numnda kpou cho niŋ suɛi a num okɔɔ.
A cho huiyoŋ hɔŋndo, ma suam chiŋndoŋ a kɔl tuuwo, ma dimi aa: “Ŋ chii ndu miolɔɔ.+
Paaleŋ ndeŋ naŋ wa chumndo ni!+ Le fuuluu, nduyɛ miŋ cha leŋ!”+
ע [Ayiŋ]
17 Chɛhowa chii tosa nyɛ ndoo kɛɛsiaa wo.+
Nyɛ o dimi niŋ sindɛ pa wo,+ o chii ndu tosa.+
O chii ndu tɛɛmbuu, inyiɛɛ bɛɛ o tuiinuŋ ndu le.+
O tosa mi yaamɔɔwaa numnda duaunuŋ nyaale num choo. O ke yaamɔɔwaa numnda yoomuaŋ* ma hiau num.
צ [Sadi]
18 Oo kpaki chua laandoo Saayɔŋ, kɔlta waŋnda cho chaŋndo o Chɛhowa lo.
Maa mɛmiaŋ ma tol num, mɛɛ mɛŋma koŋgima bɛnduaŋ ma huŋ nuaa paaleŋ a nyumndaŋ yɛ.
Hiou lachi a chaŋndo, nduyɛ chɛl mi hɔlta numndaŋ la pɛŋgi le.
ק [Kilofi]
19 Chɔŋ ma wa chaŋndo ichɔl a teleŋ waŋnda kandu mɛŋgɛlaa wo.
Kumbi kɔl numndo kpou o Chɛhowa lo a mɛmiaŋ o lahɔl, mɛɛ nda tala nuaa mɛŋndaŋ yɛ.
Heelu balaŋ naa ndu chua le yoomula chuauwaa numnda,
A wou ba o ba fee o sɔŋgilaŋ a o nɛila bɛndulaŋ choo a yiaaŋ nda.+
ר [Luɛsi]
20 Oo Chɛhowa, muli hɔlla wanaa numnda choo, a ŋ bii haa ŋuasu ŋuasu wa.
Baa waŋ laanduaa nɔ pa ma hiou lachi a chuauwaa ndaa dioo, chɛlɛkpiaa nda velu ma soli leniŋ nda?+
Ɔɔ baa wanaa soliaa lasalaa a wanaa suaa le Mɛlɛka wa nɔ pa ma sɔla piɔmndo o chiɛi Chɛhowa wo niŋ?+
ש [Shiŋ]
21 Chuaambuaa feleŋguaa a bɛnduaa yuwɛiya cho a hini lɛŋ a vilɛiya lɛɛsiɛŋ o nɛila bɛndulaŋ choo.+
A diu diu yufuaa* niaa a puaa niaa feleŋguaa a muɛi faŋnde.+
Ma diu diu nda paale ŋ dɔɔnuŋ tumbe leŋ, nduyɛ a tuiinuŋ nda inyiɛɛ le.+
ת [Tau]
22 A tosa mi wanaa luei ya siooŋnde wa wa fulaa ba o ba fee, naŋ chaa paale bɔŋaŋ ndeŋ ni.+
Wana o wana heluŋ ɔɔ mbo chinda o paale kɔl tuule Chɛhowa leŋ choo le.+
Yaamɔɔnɔ nuu chii tɛɛmbuu wanaa ya velu nduyɛ mi manda wa.*+
א [Alɛfi]
3 I che dɛnɛ palaa tol waŋnda choo wo, le mɛɛ Mɛlɛka dɔɔnuŋ tumbe o kala kala yɛ.
2 O tou ya nduyɛ mbo tosa mi kua o nyumndaŋ niŋ, kɛ o cho o nyɛ teŋgaa niŋ te.+
3 A tonya, o cho ya nyɛpalaa tusioo choo lepaa o lepaa, o kiolu kɔɔli le.+
ב [Bɛti]
4 O tosa mi dialloŋ tambu ya, nduyɛ mi nyau sɛɛŋ.
O yimi yimi paala nilaŋ.
5 O luei ya o piŋndo niŋ. O balu ya silɔ a pɔsɔni wɔɔŋ wɔɔŋndo+ vɛlɛ a nyɛpalaa.
6 O baŋ ya le challe o fondaŋnda manyumndaŋ niŋ, naŋ chaa wanaa vi niŋ o paandoo niŋnda ni.
ג [Kimɛɛ]
7 O balu ya kpakioo silɔ, le halikpeŋ I hialuŋ te.
O baŋ ya o kpiɔɔ a yɔlɔŋ kala kalaŋ.+
8 Nduyɛ mɛɛ ya chaŋ o ndu lo o piɛileŋ niŋ le malaa, mbo kɛɛ le piɛile nileŋ mulioo.+
9 O kiindiaa nɛila nilaŋ a poutaŋ,
Nduyɛ mbo tosa fondaŋnda ya kei laŋ la tuundiɛi.+
ד [Dalɛti]
10 O veŋnuŋ le ya biyɔɔ maa suluku vɛlɛ a mɛɛ kpɔkuŋndo* viaŋnuŋ nuaa le visioo delɔɔ choo yɛ.+
11 O nyindu ya mbo faŋa ya o nɛi, nduyɛ mbo sɛɛsiaa ya.*
O tosa mi lo yapilɛ kpeele.+
12 O kindu chiɔu ndɔɔ mbo yulu ya o hɔl le ya viɔɔ a chiŋɔleŋ.
ה [Hee]
13 O pɛl la kɔl keloŋ a chiŋɔma o soli o bɔlɔ ndɔ machiŋɔɔ niŋndo.
14 I simnuŋ niŋ nyɛ mamaa le waŋnda kpou, nduyɛ lepaa o lepaa, a siiŋguu ya niŋ nyɛ mamaa o chonduŋ ndaŋ niŋ.
15 O tosa mi sɔɔŋ palaŋ bɔɔbɔɔ komal la o yoomu nuu niŋ, nduyɛ mi wa yɔm lolɛiyo kolɔɔ.+
ו [Wau]
16 O yimi ya chiŋndoŋ a wɔsɔkɔɔ,
Nduyɛ mbo nyindu ya mi del o pultaŋ niŋ.+
17 O tosa kɔl nyulu cho lɛ o yoomu nuu niŋ te, nduyɛ mi puɛɛnuŋ a nyɛ cho o kɛndɔɔ wo.
18 Lelaŋ mi dimi aa: “Naŋɔɔ nuu kuɛŋnuŋ, nduyɛ I nɔ lɛ tiindaŋ le mi sɔla nyɛ o nyɛ Chɛhowa o ba le.”
ז [Sayiŋ]
19 Loonuŋ maa I nɔ lɛ naa chalaa le, nduyɛ ma loonuŋ a saŋga ya cho niŋ ndo.+ Loonuŋ vɛlɛ mɛɛ ya cho yɔm lolɛiyo a pɔsɔni wɔɔŋ wɔɔŋndo kolɔɔ yɛ.+
20 A tonya, a cho ya loonɔŋ, ma hiŋ ma mala ya.+
21 Mi loonuŋ hei o kɔl nuu niŋ, le sabu koŋ ya cho biunɔŋ ni mi chum.+
ח [Hɛti]
22 Kaala lo lechoo Chɛhowa wo tosa ni ŋ chuu paku le,+
Kanifuule fɛɛŋ bɛɛ nyiɛɛyii nduɛi nɔ lamɛɛlu le.+
23 A cho naa nyiɛɛyii numnde chɔmndo lepaa o lepaa,+ nduyɛ a cho wana wana nɔla ma tiindaŋ teleŋ o teleŋ.+
24 Mi dimi aa: “Chɛhowa cho nyɛm niŋ kiɔɔŋ ni.+ Le sabu koŋ ya cho biunɔŋ ni mi chum ndu.”+
ט [Tɛti]
25 Chɛhowa cho wana kɛndɛ o wana duau tiindaŋndo o ndu niŋndo,+ wana nuuviaa ndu teleŋ o teleŋ ndo.+
26 I cho suɛi kɛndɛ ma mei kpili,+ ma biunuŋ chumndo, ma che mɛɛ Chɛhowa cho num piŋi yɛ.+
27 I cho suɛi kɛndɛ le mi sɔɔŋ palaŋ komal waŋndo o feleŋgɔyɛi nduɛi niŋ.+
י [Yodi]
28 O chal ndu pilɛ mbo mei kpili, te Mɛlɛka chɛl pɛ miŋ komal ndu.+
29 O wou sondo ndɔɔ o chundoo niŋ,+ naapum tiindaŋndo cho wa.+
30 O mulul wana cho ndu lɔɔ wo kpaŋnde, nduyɛ mbo chɛl ma tusi ndu siɔmbulaŋ tau.
כ [Kafi]
31 Kanifuule, Chɛhowa cho naa kɛɛ le fɛɛŋ a fɛɛŋ te.+
32 Mi che bɛɛ mbo chɛl miŋ bii mɔnɛi, kɛ o cho naa nyiɛɛye tuiinɔŋ le mɛɛ o nɔ kaala lo lechoo wo tau tau yɛ.+
33 O cho yiyaŋ ndɔ le i cho le mbo tusi waŋnda chieeya nyɛpalaa choo ɔɔ mbo tosa ma bii mɔnɛi le.+
ל [Lamɛdi]
34 O chɛl kposoŋ mi waŋndo niɔu niɔu wanaa cho o chiɛila manyumndaŋ niŋ o lɛŋndeŋ choo wa le.+
35 Mɛlɛka Hiou Kpou Wo chɛl mi waŋndo tosal waŋndo kafalaŋ ndu o hɔl te.+
36 O chɛl ma tosal waŋndo kafalaŋ o lemasa le.
Chɛhowa chɛl sɔɔŋ waa nuaa kposoŋ te.
מ [Mɛmi]
37 Te o cho mi Chɛhowa chɛl te, nɛɛnɛ nɔla yɛ mbo soo nduyɛ mi i yɔŋnuŋ?
38 Sɔɔŋ wɔɔŋndoŋ a sɔɔŋ kɛndɔŋ,
Ŋ fula diompilɛ Mɛlɛka Hiou Kpou Wo o sondo le.
39 Le yɛɛnɛ mi wana cho yoomu wo ŋɔɔchiaŋ a fulamakɔɔlila o sɔla le haki ndɔɔ laŋ?+
נ [Nuŋ]
40 La ŋ yaasiaŋ naapila, nduyɛ miŋ mɛɛndaŋ kelala naalaŋ,+ okoŋ miŋ miiŋgu Chɛhowa o ibuŋ.+
41 Ŋ muliŋ kɔlta naalaŋ o Mɛlɛka cho o choo choo niŋndo lo, miŋ heelu bala naalaŋ o ndu lo miŋ dimi aa:+
42 “Ŋ tosa hakioo a nilakalulaŋ,+ nduyɛ a mel naa haki le.+
ס [Samɛki]
43 A dɔɔnuŋ tumbe a naa, nduyɛ ma kɛɛ le piɛile naaleŋ nilaŋ yaŋɔɔ.+
A tisa naa kɔɔli a kiltaŋ nduyɛ ma diu diu naa, inyiɛɛ bɛɛ a tuiinuŋ naa le.+
44 A kumbu numpila a yumbu yumboo kpou, le halikpeŋ piɛile naaleŋ le komal num te.+
45 A siiŋguu naa nyɛ nɔɔlɛi a billo waŋnda tɛɛŋ.”
פ [Pe]
46 Yaamɔɔwaa naa kpou cho suɛi a naa okɔɔ.+
47 Ŋ cho o siooŋnde niŋ lepaa o lepaa, nduyɛ miŋ wa delɔɔ o yaŋɔɔlaŋ niŋ.+ Ŋ choŋnuŋ naapilɛ kpeele, nduyɛ miŋ wa a tambɛi.+
48 Mɛmiaŋ ma cho ya tolɔɔ o hɔl mɛɛ pioo hiau nuaa wolu wolu yɛ, le mɛɛ chua laandu wanaa niaa del lɛ.+
ע [Ayiŋ]
49 Mɛmiaŋ ma cho hiouwɔɔ lachi a ya tolɔɔ kpeekpei, ma kiolu kɔɔli le,+
50 Haaa mi Chɛhowa tofa naa o cho o choo choo niŋnda mbo che ya.+
51 Mi mɔnɛi bii ya, mɛɛ ya che nyɛ yɔŋnuŋ chuaa laanduaa kpou o chiee ni bɛndoo niŋndo.+
צ [Sadi]
52 Yaamɔɔwaa niaa cho ya nuuviaa o fondo fuuwo choo, mɛɛ waŋndo nyaanuŋ nuaa youwo kɔɔli yɛ.
53 Ma kindiŋ le ya diyɔɔ o sooŋndo niŋ, nduyɛ a wa ya poutaŋ mɛlioo choo kpeekpei.
54 Mi mɛŋndaŋ ma kumbu ya bolleŋ kpu, okoŋ mi dimi aa: “Mbɔ ya i nii chuu!”
ק [Kilofi]
55 Oo Chɛhowa, mi veelu diola numndaŋ naa ya wa o sooŋ yiŋgilɛi koŋ niŋnda.+
56 Yandii tuei ya diom. Kinda nila numndaŋ, ma kɛɛ tueiyɔɔ chaŋ ya cho naa num chua le ya malaa wo le.
57 Ma sɔɔŋguu ya ikɛi o paale ya veelu numndeŋ choo. Ma dimi aa: “Yɔŋ isiooŋ te.”
ר [Luɛsi]
58 Oo Chɛhowa, ma suŋgu le ya nduyɛ ma piŋi yoomu nuu.+
59 Oo Chɛhowa, a che sɔɔŋ wɔɔŋ nda cho ya tosallo woŋ. Yandii kilul la yamɛi o nɛi sakpoo choo.+
60 Numpila che mɛɛ nda cho ya maa miŋgullo yɛ, a sɔɔŋ wɔɔŋ nda tuunuŋ o kɔl le ya woŋ.
ש [Siŋ] or [Shiŋ]
61 Oo Chɛhowa, numpila tuei mɛɛ nda cho ya mamɔɔ yɛ, a sɔɔŋ wɔɔŋ nda tuunuŋ o kɔl le ya woŋ.+
62 Numpila tuei mɛɛ wanaa simul la wa cho suɛi a ya, ma wa inyiimu nyiimuei a ya okɔɔ lepaa o lepaa yɛ.
63 Tofawɔ nda. O wa isisi, o wa ichali, a cho ya mamɔɔ o chonduŋ ndaŋ niŋ!
ת [Tau]
64 Oo Chɛhowa, a cho nda paawa* a mɛɛ kuɛɛla ndalaŋ la cho yɛ.
65 Sendi ŋ cho nda handɔɔ choo wo cho tosa ma simnuŋ wanaa bolii kalaa.
66 Num Chɛhowa, a cho nda tisa kɔɔli a kɔl num tuuwo, nduyɛ ma basu nda tɛɛ o chieeŋndo choo.
א [Alɛfi]
4 Nuawɔ se mɛɛ koolii ŋɛlɛŋgi ŋɛlɛŋgiei yɔŋnuŋ yim yim yɛ, koolii kɛndɛ kɛndɛi!+
Nuawɔ se mɛɛ pouta diandaa laŋ+ la cho la saŋnaŋ o sɔŋgilaŋ niŋ o nɛi o nɛi fee yɛ!+
ב [Bɛti]
2 Puaa sɔvɛ sɔviaa Saayɔŋ, a wa* naŋ chaa koolii kɛndɛ kɛndɛi ni wa,
Nuawɔ se mɛɛ nda simnuŋ niŋ maa nyɛm laanduŋ nda toosiaa a puuloo woŋ,
Ŋ wana chuauwaa ŋkpɛɛnɔɔ toosiaa a bala ndɔlaŋ ndoŋ!
ג [Kimɛɛ]
3 Hali tuŋaa yonduaa bɛɛ ma wɛsi chuauwaa ndaa,
Kɛ chua laandu wanaa niaa simnuŋ ŋuasu ŋuasu,+ mɛɛ ɔsiluichiiya wa nuaa o pollo niŋ yɛ.+
ד [Dalɛti]
4 Mi diɔɔmuleŋ le baaliaŋ chɛlɛkpɛ cho wuɛiyo wo o sondo kpiŋ a bolola vesɛilaŋ.
Mi chuaambuaa wa balɔɔ piɛileŋ le nyɛdiaa,*+ kɛ wana o wana ke nda le.+
ה [Hee]
5 Wanaa ndaa dia nyɛdiaa sɔvɛ sɔviɔɔ wa cho niŋ hau ihini a yiaaŋ* o nɛila bɛndulaŋ.+
Wanaa ndaa wounuŋ nyɛla baa kala kalala nda toosiaa a kɛi siaŋaa laŋ nda,+ cho niŋ hau ihini o pultaŋ niŋ.
ו [Wau]
6 Nyɛpalaa chua laandu wanaa niaa sɔla wo hiou a nyɛpalaa nda tusi Sodɔm choo le haki ndɔɔ wo,+
O ndoo sɔla tambei o teleŋ biŋgi bɛŋgu, nduyɛ wana o wana ve le ndu mala le wo.+
ז [Sayiŋ]
7 Naasiluɛiyaa+ nduaa ndaa dendu ndaa hiou mɔmndo, nduyɛ a wa a humbu fo ndoo hiou milikiiyaŋ.*
Kɔɔleŋ le wa nda kpɔlɔkɔ ndoo hiou pouta baa kalalaŋ o peelo, nduyɛ a wa niŋgili ndoo hiou pou safaluɛɛ wo.
ח [Hɛti]
8 A yɔŋnuŋ niŋ a tiŋi* kpilo naŋ chaa pindi pindioo ni,
Nduyɛ a wa niŋ bɛɛ o nɛi, wana sina nda pɛŋ te.
Dialloŋ nyau nda sɛɛŋ ma simnuŋ paalaŋ kposoŋ,+ mɛɛ yɔm vesɛiyo wa nuaa yɛ.
ט [Tɛti]
9 Wanaa nda dii a muɛi faŋnde wa cho fisa mbo hiau a cho wuoo a yiaaŋ nda.+
Dialloŋ cho nda tambei le nyɛdiaa lepɛŋndo, naŋ chaa a muɛi faŋnde nda cho nda chuukuuwo ni.
י [Yodi]
10 Waŋ laanduaa nɔ nyiɛɛye wa cho niŋ chuauwaa ndaa yauwo.+
Nda simnuŋ nyɛdiaa ndaa ni teleŋ nda wa mɔnɛi biyɔɔ le delɔɔ chua laandu wanaa niaa del lo.+
כ [Kafi]
11 Chɛhowa chɔm kɔl ndɔ tuuwo,
Mbo hulu kɔl ndɔ tuu ŋama ŋamaa.+
O mɛndul yiŋndeŋ Saayɔŋ mi le luam chiiyuŋ cho loŋ ndoŋ kpou.+
ל [Lamɛdi]
12 Mɛɛ masaa cho o lɛŋndeŋ choo wa a waŋnda kpou tuei maa,
Yaamɔɔnɔɔ luɛi o diola kpakilaŋ Chulusalɛm, a laalaŋ te.+
מ [Mɛmi]
13 Hei kpou yɔŋnuŋ le hakila wanaa nduaa suaa le Mɛlɛka wa, a wanaa nduaa soliaa lasalaa,+
A ndaa diu diu wanaa sakpuaa wa nda tɛɛŋ nda.+
נ [Nuŋ]
14 A cho balɔɔ a sumɛiya+ o nɛila bɛndulaŋ choo.
Le mɛɛ nda tɛɛmbuu koowaŋ yɛ, a dindu lɛ Mɛlɛka o hɔl te.+
Lelaŋ, wana o wana ndoo pilaŋ ndɛ nyɛla ndalaŋ te.
ס [Samɛki]
15 Mi waŋnda ndaa dimul nda aa: “La faŋaŋ nanuŋ! La cho a nɔɔlɛi!” “La faŋaŋ nanuŋ! La faŋaŋ nanuŋ! La pilaŋ naa le!”
Kanifuule, a wa kelaŋndo lende ndaa nɔ lɛ naa chalaa le.
Mi waŋnda o lɛŋii cheleŋnde niŋ ndaa dimulaŋ aa: “Waŋnda haa nɔ ma wa naa tɛɛŋ te.*+
פ [Pe]
16 Chɛhowa sɛŋi nda kpou,+
Nduyɛ o buulaŋ ndɛ a nda le.
Wana o wana cho lɛ lebɛɛ chɔm le wanaa soliaa lasalaa le,+ kɛlɛŋgaa niŋ te ma nɔ nyiɛɛye le waŋ banaa.”+
ע [Ayiŋ]
17 Hali suŋ suŋ bɛɛ ŋ cho tofaa o nɛi le malaa, kɛ ŋ sɔla wɔ ndu le.+
Chumndo tuŋ naŋ cho ni le mi lɛŋnde nɔla mi le baŋa naa bɛɛ le leŋ le huŋ mala naa.+
צ [Sadi]
18 Yaamɔɔwaa naa cho naa mɛŋgɛlaa ba o ba fee,+ le halikpeŋ ŋ kua o luŋnda naala bɛndulaŋ te.
Mɛɛlula naalaŋ la cho niŋ kpɛɛluŋ. Palɛi nɛi chuu, kanifuule mɛɛlula naalaŋ la fuuluu.
ק [Kilofi]
19 Wanaa cho naa touwɔɔ wa nyaanuŋ a hiou mɛɛ koviaa nyaanuŋ nuaa o hueiye niŋ yɛ.+
A tisa naa kɔɔli o pembuŋ bɛndoŋ choo, nduyɛ ma wa ihini a viaŋnaŋnda o pollo niŋ.
ר [Luɛsi]
20 Wana Chɛhowa pɔya wo, o cho hueiyii nɛi yoomɛi yo,+ a bii ndu ma wou ndu o sooŋ nda bɛndoo niŋ.+
A ndu okɔɔ naŋ dimi ni aa: “O wundule ndɔleŋ bɛŋgu naŋ cho pioŋɔɔ sɔla o lɛŋii cheleŋnde niŋ ni.”
ש [Siŋ]
21 Oo chua laandoo Idɔm,+ saŋgalaŋ nduyɛ ma dɔɔnuŋ nyaale, mɛɛ num aa tosa o lɛŋnde Ɔɔsi leŋ niŋ yɛ.
Kɛ kɛsiŋ o kɔl maa num bɛɛ a cho num ke taala kpundɔɔ,+ nduyɛ mi muɛima cho leniŋ ndaŋ ma bii num, okoŋ ma chɔɔmuu tum fondo numndo.+
ת [Tau]
22 Oo chua laandoo Saayɔŋ, nyɛpalaa tol num choo le hakila numndaŋ ndo hiŋ o mɛɛlulaŋ.
O cho lɛ lakɔ a num o biyɔɔ niŋ te.+
Kɛ o cho kɔllo handɔɔ o hakila numndaŋ choo, Oo chua laandoo Idɔm.
O cho hakila numndaŋ chɔɔmuu kpendekele.+
5 Oo Chɛhowa, loonuŋ a sɔɔŋ yɔŋnuŋ naa woŋ,
Nduyɛ ma che bɛɛla naala tambɛilaŋ.+
2 Mialla nɔ niŋ hau nyɛm naŋ kiɔɔŋ ni, mi chiɛila naalaŋ la wa le wanaa lekaawa.+
3 Ŋ simnuŋ viiyaa nɔ lɛ ŋfinya le wa, mi kalaa naa wa niŋ maa wanaa vii piaanduaa wa.+
4 Mɛɛ miŋ paawa* malaŋ naŋ kol mɛŋma naŋ,+ nduyɛ yɔmii nɛi bɛɛ mɛɛ miŋ pendu.
5 Wanaa cho naa touwɔɔ wa cho niŋ kpɛɛluŋ le naa biyɔɔ,
Ŋ cho niŋ a saŋgɛi yɔkɔɔ, kɛ pɛŋgi bɛɛ ŋ cho sɔla le.+
6 Ichipi+ a Asiiliaa+ naŋ tiindaŋ niŋ ni, le halikpeŋ miŋ sɔla nyɛdiaa* tau le dioo.
7 Finyaa naa mamaa tosa hakioo wa cho lɛ hau yoomu le, kɛ naŋ cho niŋ nyɛpalaa sɔlaa ni le hakila ndalaŋ.
8 Buɛiya cho niŋ hau masaa naa choo ni, nduyɛ wana o wana cho le mbo soli naa nda o ba le.
9 Miŋ luei yoomula naalaŋ o kpundɔɔ niŋ le hunɔɔ a nyɛdiaa naa,+ kanifuule waŋnda wa o pollo niŋ a mɔɔŋ faŋndoŋ.
10 Mi dialuŋ naŋ tuulu kpɛi kpɛi naŋ chaa yiŋnde tondoleŋ ni, kanifuule yiaaŋ ma wa ma hɔbɛi.+
11 Ma kpuviaa laandaa naa o Saayɔŋ niŋ, vɛlɛ a yufuaa naa o chieeŋ bɛndoŋ niŋ Chuda.+
12 Ma yii laŋgbaa naa kalla balaŋ ma landu nda,+ nduyɛ ndaa chɔm lebɛɛ le waŋ banaa naa le.+
13 Mi puaa feleŋguaa ndaa kuɛ a pouta nda chuii nyɔɔŋ ndaŋ o laba, nduyɛ mi puaambuaa pɔmbuaa ndaa saŋga tau o yɔmii kpɔŋnde bɛŋgu.
14 Waŋ banaa ndaa kue lɛ o dio kpaki chioo le,+ nduyɛ puaa feleŋguaa ndaa loo lɛ nyɛchaa le.+
15 Ŋ cho lɛ a kɔl kɛndɛ kposoŋ te, nduyɛ yola naalaŋ la simnuŋ niŋ mɔnɛi.+
16 Mɔsil lemasaa fula naa o lebol. Kpundɔɔ cho le naa, kanifuule ŋ tosa hakioo!
17 Le saboo hoo kɔlta naalaŋ la cho o saŋgaa niŋ ni,+
Nduyɛ sɔɔŋ muŋ kpou tosa ni mi hɔlta naalaŋ la yɔŋnuŋ yifidii.+
18 Le mɛɛ Pembii Saayɔŋ nde lo pɔm yɛ,+ siifaa cho niŋ balɔŋndo loŋ ni.
19 Kɛ num Chɛhowa, a cho ichali o kpeŋgbei* num lemasaa choo le fɛɛŋ a fɛɛŋ.
Kpeŋgbei num lemasaa cho le fɛɛŋ a fɛɛŋ.+
20 Le yɛɛnɛ ŋ puɛɛnuŋ yɛ a naa okɔɔ, nduyɛ ma mal naa le teleŋ vilɛi waa nuaa?+
21 Oo Chɛhowa, miŋgi naa numpila o ibuŋ, nduyɛ ŋ cho a bɛɛndiaŋ le miŋ miiŋgu naa num chua.+
Tosa mi palɛi nɛi miiŋgu ikɛndɛ maa paandu.+
22 Kɛ a koŋ kpou, ma kɛɛ naa kpooŋ.
Ma hiau lachi a waa o kɔl tuu bɛndu bɛndoo niŋ a naa.+
Diomnda chaŋ imɔnɔla cho o bolleŋ 1-4 niŋndaŋ, a chomulta maHibului laŋ nda poonyiaa laŋ ni.
Ɔɔ “Waŋ laanduaa feleŋguaa.”
Hibuluiye, “beediiyo ɔɔ buloo.”
Chulusalɛm nda cho tuuwo ni maa wana lanɔ fondo.
Hibuluiye, “naa.”
Ɔɔ “yindɛi.”
Hibuluiye, “sondo ndɔɔ.”
Ɔɔ “Waŋ laanduaa feleŋguaa.”
Hibuluiye, “Puloŋ.”
Hibuluiye, “lee kɛ kɛ.”
Ɔɔ “tambu.”
Hibuluiye, “le ndu miolɔɔ.”
Ɔɔ “Nɛi chɔmaa.”
Hibuluiye, “Puloŋ.”
Naapum diomndaŋ ndaŋ la sim le mɔnɛi ɔɔ nyiɛɛye.
Hibuluiye, “lioo.”
Ɔɔ “waŋ laanduaa feleŋguaa.”
Ɔɔ “mi soli leniŋ nda.”
Ɔɔ “yalakanaa.”
Ɔɔ naapum, “mbo tosa mi hini lɛŋ sakpo.”
Ɔɔ “sala.”
Ɔɔ “a wa a sɔvɛ.”
Hibuluiye, “beediiyo ɔɔ buloo.”
Hibuluiye, “choŋnuŋ niŋ a ba nda.”
Ɔɔ “nɔnɔɔ.”
Hibuluiye, “piimiɛi.”
Ɔɔ “a nɔ ma wa naa mialla tɛɛŋ te.”
Ɔɔ “sala.”
Hibuluiye, “beediiyo ɔɔ buloo.”
Ɔɔ “kpɛŋɛ.”