FILIPIAŊNDA

1 Ya Pɔɔl a Timoti, buɛiya le Chiisu Kiliti, naŋ cho yauwo hoo poonyiaa ni. Ŋ cho ndu poonyiaa o nya wanaa laalaŋaa* cho o diompilɔɔ niŋ a Chiisu Kiliti, mi la wa o Filipai niŋnda lo kpou,+ a wanaa chua chilaŋnda, vɛlɛ a buɛiyaa malalaŋnda:+

2 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!

3 Teleŋ o teleŋ ya yiyaŋ pɛ a nya okɔɔ, balikaa koni ya mel Mɛlɛka nuu ni. 4 Te I wa pɛ Mɛlɛka nyɔɔloo lɔɔlɔɔ o piɛileŋ niŋ le nya, nyaaloo pila ya duaunuŋ ni.+ 5 Kanifuule, chɔŋ a paale nya chɛl yooŋgu kɛndɔɔ leŋ mbo huŋ bii a hau, la cho hiouwɔɔ lachi a yooŋgoo hoo tooloo. 6 I nɔ laalaŋndo kɛsɛ maa wana kandu wali kɛndɔɔ hoo tosaa nya tɛɛŋndo, o cho hiouwɔɔ lachi a ndu tosaa haaa mbo siou ndu+ o paale Chiisu Kiliti leŋ choo.+ 7 O bɛnda mi yiyaŋ a nya okɔɔ kpou lende, kanifuule I nɔ kaalaa tau le nya. Teleŋ ya cho hoo o biyɔɔ niŋndo, la cho latulu a ya. Teleŋ ya wa bɛɛ chɔulabaa le mi yooŋgu kɛndɔɔ hoo sim yi wo,+ la wa latulu a ya. O hei niŋ, nya ni, ya ni, ŋ cho tɔnɔɔ sɔlaa o kɛndɛi bɛnduii Mɛlɛkɛi niŋ.+

8 Mɛlɛka cho lesei maa mɛɛ Chiisu Kiliti kaala nya yɛ, lende koni ya kaala nya ni. 9 I cho piɛileŋ lɔɔlɔɔ o Mɛlɛka lo maa kaala cho nya o lakɔl lo hiou lachi kɛ,+ nduyɛ mi la sɔla kɔl kaloo,+ a sinapɛŋgu kpeekpeiyo.+ 10 O hei niŋ, la nɔla mi la handu kɔltaŋ o sɔɔŋ hiou wa ŋ sɔvɛ woŋ choo.+ Koŋ tosa mi la wa a diandaa.+ Nduyɛ haaa mi paale Kiliti leŋ le fuuluu, la tosa mi wana o wana mal laalaŋ o nɔ o Chiisu niŋndo le. 11 I cho vɛlɛ piɛileŋ maa Chiisu Kiliti mala nya le mi la hiou lachi a sɔɔŋ sakpoŋ tosaa,+ okoŋ mi Mɛlɛka sɔla saŋgalaa.

12 Puaapiliaa, I yeema mi la sina maa nyɛ yɔŋnuŋ ya hoo wo tosa mi yooŋgu kɛndɔɔ wa hiouwɔɔ lachi a pɛŋgɛlaŋndo. 13 Puaa chɔuwaa cho chiɛi Masaa mandaa wa, a waŋnda a tuaa kpou sina niŋ+ maa le sabu Kiliti wo ya cho o biyɔɔ niŋ ni.+ 14 Biyɔɔ nda bii ya hoo wo, o tosa mi puaapiliaa bɔɔbɔɔ cho o wali Masanɔɔ niŋnda simul kɔl. Nduyɛ a cho hiouwɔɔ lachi a suɛi Mɛlɛkɛi dimioo, a yɔŋ isiooŋ te.

15 I cho kpendekele maa nɛyɔŋndo a paŋalaa cho waŋnda apum viomɔɔ le waŋnda dimullo a Kiliti okɔɔ. Apum yɛ, a yiyaŋ kɛndɔɔ nda cho ndi tosaa ni. 16 Kaala waŋnda haa nɔ le Kiliti wo vem nda hei tosaa ni. Kanifuule, a sina maa le mi chɔulaba le yooŋgu kɛndɔɔ Mɛlɛka hɛli ya ni.+ 17 Kɛ wanaa cho ndi tosaa a nɛyɔŋndo wa, yaamɔɔleŋ le cho nda nyindɔɔ le ndi tosaa ni. A nɔ yiyaŋ kɛndɛ le. A cho kindiŋndo le ya suɛi kuiilullo naa ya cho haa o biyɔɔ niŋnda. 18 Kɛ mɛɛ mɛɛ nda tosa pɛ, o wa a yiyaŋ kɛndɛ ɔɔ a yiyaŋ wɔɔŋ, nyɛ ya dɔɔnuŋ nyaale wo cho ni maa waŋnda cho tueiyɔɔ a Kiliti okɔɔ. Nduyɛ I cho hiouwɔɔ lachi a nyaaloo dɔɔnɔŋndo. 19 I sina maa piɛile nya cho le ya leŋ,+ a nyina diandaa Mɛlɛka ke Chiisu Kiliti wo cho tosa ma mal la.+ 20 Yeemɛi nii kpeekpei cho hei ni, nduyɛ I nɔ tiindaŋndo maa I tulnuŋ niŋ lasiɔmbu le. Kɛ mi sɔla kɔl simulaa suŋ suŋ maa paandu le suɛi a Kiliti okɔɔ, le mi dialuŋ nuŋ saŋgala ndu. I wa yoomu ɔɔ I wu, nyɛ ya yeema mbo yɔŋnuŋndo cho hoo ni.+

21 Te I wa yoomu pɛ, le Kiliti ya cho yoomu ni.+ Nduyɛ te I vi pɛ, I sɔla tɔnɔɔ.+ 22 Te I wa wɔ pɛ yoomu o dialloŋ muŋ niŋ, I nɔla mi tosa wallo tau le ndu. Kɛ le waa yoomu ɔɔ le piɔmndo sɔlaa ndu, I nɔ chuaŋ chua le. 23 O yɔm tɛndaa tɛɛŋ ya cho ni. Kanifuule, yeemɛi cho ya le mi faŋaŋ chieeŋ naŋ, mi kɔ wa latulu a Kiliti.+ O kpeekpei niŋ, keŋ hiou wa i sɔvɛ.+ 24 Kɛ o bɛnda mi wa wɔ yoomu le mi mala nya. 25 I nɔ tiindaŋndo maa I cho wɔ wa yoomu. I cho wɔ wu suŋ suŋ te. I cho wɔ wa latulu a nya kpou le nya malaa mi la hindu o Mɛlɛka piɛiyo niŋ, nduyɛ mi la dɔɔnuŋ nyaale o laalaŋ nyaa niŋ. 26 Okoŋ te I miiŋgu pɛ naa nya chua, koŋ tosa mi la chɔɔlu nyaaloo dɔɔnɔŋ tau le mɛɛ nya cho buɛiyaa Chiisu Kiliti wa yɛ.

27 Kelala nyalaŋ la wa a mɛɛ yooŋgu kɛndɛ nya cho dimioo a Kiliti okɔɔ wo cho yɛ.+ Okoŋ o yɔŋ bɛɛ mi kuɛ nya yilɔɔ ɔɔ mi kue le, I nɔla mi tuei tɔɔ kɛndɔɔ a nya okɔɔ maa la cho isisi yi, mi la nɔ yiyaŋ pilɔɔ,+ nduyɛ mi la wa kindiŋndo vellaa velle le laalaŋ nya nɔ o yooŋgu kɛndɔɔ niŋndo. 28 La nɔ isiooŋ le wanaa simul nya wa le. Hei chɔm ni maa nda nɔ le tambei sɔlaa,+ kɛ mi nya sɔla chindaa.+ Nduyɛ Mɛlɛka cho hei tosa ni. 29 Kanifuule, o cho ko le laalaŋndo dɔwɔɔ o Kiliti niŋ te Mɛlɛka ke nya dioo le, kɛ le mi la saŋga vɛlɛ le ndu.+ 30 Saŋga ya wa niŋndo, saŋga pilɛ koŋ kpe nya bɛɛ cho niŋ ni.+ Nduyɛ a mɛɛ nya sina yɛ, saŋga pilɛ koŋ kpe cho wɔ ya choo ni.

2 Te la nɔ pɛ le waŋnda kɔltaŋ dɛɛniaa sanaa o Kiliti niŋ, mi la nɔ le nda yoomuaŋ lueiyo le mɛɛ nya kaala nda, mi la buulaŋ le nda, nduyɛ mi la nɔ nyiɛɛye le nda yɛ, 2 mɛɛ la hiou lachi a ndi tosaa, mi la nɔ yiyaŋ pilɔɔ, mi la kaaliaŋ vellaa velle, nduyɛ mi la nɔ diompilɔɔ. Te la tosa lende pɛ, I cho wa a nyaale tau.+ 3 La tosa nyɛ o nyɛ a nɛyɔŋndo+ ɔɔ le ma lisa nya le.+ Kɛ nyɛ o nyɛ nya wa pɛ tosaa, la tosa ndu a tusiŋndo, nduyɛ mi la che acheleŋnda maa a bɛnda ma hiau nya.+ 4 O wa ko le dɛnɛ nya kɛndɔɔ suee le nya landuŋ kɔl te.+ Kɛ la landuŋ vɛlɛ kɔl le dɛnɛ kɛndɛ chaanda.+

5 Mɛɛ Chiisu Kiliti ndoo yiyaŋ yɛ, nya bɛɛ la nɔ yiyaŋ pilɛ koŋ kpe.+ 6 Mi che bɛɛ o wa maa Mɛlɛka,+ kɛ le pilɛ bɛɛ o del kɔl le siimaŋndo a ndu le.+ 7 Kɛ mbo mal nyɛ o nyɛ ndoo nɔ, mbo simnuŋ maa chɛ.+ Okoŋ, mbo simnuŋ wanachioo.+ 8 I hiou kpou ve, mɛɛ o simnuŋ wanachioo, mbo tusiŋ toolo, nduyɛ mbo lo Mɛlɛka diikɔŋndo haaa mbo sɔla piɔmndo+ o yɔm imɔnɔɔ* choo.+ 9 Le saboo hoo, mi Mɛlɛka heelu ndu tema mbo hiau bɛɛ maa paandu.+ Okoŋ, mbo ke ndu diola hiou diolaŋ kpou laŋ.+ 10 O tosa hei le mi wana o wana o choo choo niŋ, o lɛŋndeŋ choo, a o lɛŋndeŋ bɛŋgu baŋ wulaŋ o diola Chiisu laŋ niŋ.+ 11 Nduyɛ, mi nda kpou chɔm kpendekele maa Chiisu Kiliti cho Masanɔɔ ni.+ Te keŋ yɔŋnuŋ pɛ, waŋnda saŋgala Mɛlɛka Finya naa.

12 Chaaŋaa niaa kaalaa, teleŋ ya wa nya tɛɛŋndo, mi nyaa tuei ya diom. Kɛ pɛŋgu ya cho hoo nya tɛɛŋ te wo nya nɔ ni mi la tuei ya diom mbo hiou teleŋ ya wa nya tɛɛŋndo. La hiou lachi a siooŋnde nɔɔ vɛlɛ a bɛɛleŋ le mi la huŋ sɔla pioŋɔɔ. 13 Kanifuule, Mɛlɛka ndupila cho wallo o nya niŋ ni, le mi la nɔ yeemɛi a kpaayaa le hɛnaŋ ndɔɔ tosaa. 14 La tosa nyɛ o nyɛ a ŋɔɔchiaŋ te,+ nduyɛ la sɛɛŋgiaŋ te.+ 15 Koŋ tosa la nɔ sɔŋ o sɔŋ te, nduyɛ tɔɔyaŋ o tɔɔyaŋ ve nya choo le. La nɔla mi la simnuŋ chuauwaa Mɛlɛkaa+ wanaa dɛnɛ wɔɔŋnda haa tɛɛŋ,+ mi la wa diondɔɔ maa paŋgele o chieeŋndo hoo niŋ,+ 16 nduyɛ mi la bii yooŋgu ke waŋnda yoomoo wo kpiŋ.+ Okoŋ, I nɔla mi wa a nyaale o paale Kiliti leŋ choo, kanifuule I sina maa nyaanɔŋ nuu, a wali kala kala ya tosa wo ve fondo fuu le. 17 O yɔŋ bɛɛ ma tala ya mɛɛ nda tala nuaa sala mamuɛiyo yɛ,+ tooloo ya cho koŋ yɔŋgoo ni le sala nya cho soliŋndo wo,+ a wali kɛndɛ nya cho tosaa le Mɛlɛka wo. Lelaŋ I naŋ kɔl, nduyɛ I dɔɔnuŋ nyaale a nya kpou latulu. 18 I cho nya nyɔɔloo le mi nya bɛɛ dɔɔnuŋ nyaale a ya latulu.

19 I nɔ tiindaŋndo maa Masanɔɔ Chiisu cho ya chɛlɔɔ mi vem Timoti+ naa nya chua suŋ suŋ. Okoŋ, te o miiŋgu pɛ mi sina la waa loŋ a nya okɔɔ, I sɔla kɔl dɛɛniaa tau. 20 I nɔ wana o wana cheleŋ nanuŋ, o landuŋ kɔl le bahawɛila nyalaŋ maa ndu le. 21 Waŋnda apiliaa nda, le bahawɛila ndalaŋ koni nda landuŋ kɔl ni, kɛ a lenduŋ kɔl le sɔɔŋ cho a Chiisu Kiliti okɔɔ woŋ te. 22 Nyapila sina mɛɛ o chɔm wana suu o cho wo yɛ. Mbo tosa wallo a ya kalaŋ le yooŋgu kɛndɔɔ pɛŋgɛlaa mɛɛ poo+ wa nuaa nda finya ndɔ yɛ. 23 Ndu kpeekpei ya nɔ o kɔl le viomɔɔ naa nya chua ni, te I sina dɔɔ pɛ nyɛ cho yɔŋnɔŋ a ya wo. 24 I nɔ tiindaŋndo kɛsɛ maa Masanɔɔ cho ya chɛlɔɔ mi hiŋ naa nya chua suŋ suŋ.+

25 Kɛ I cho pɔɔ puaapilɛnɔ nuu Ɛpafulodaitɔɔ viomɔɔ naa nya chua. Chaaŋ ni naŋ cho wallo latulu wo o cho ni. Ndu bɛɛ wana chɔuwo o cho ni maa ya. Wana nya viamaa a wana ni malaa o cho ni.+ 26 O cho niŋ a yeemɛi tau le nya chɔɔ. Nduyɛ o cho a kɔl tambɛiyo le mɛɛ nya tuei a naa ndɔɔ okɔɔ yɛ. 27 A tonya, o wa a naa lakalu tei, nduyɛ ndoo lo niŋ chobe mi ndoo vi. Kɛ mi Mɛlɛka tuiinuŋ ndu inyiɛɛ. O cho ko ndu le o tuiinuŋ inyiɛɛ le, kɛ ya bɛɛ mbo tuiinuŋ ya inyiɛɛ, yɔŋii yaa sɔla kɔl tambɛi cheleŋ o hoo kɔɔli. 28 I cho ndu viomɔɔ suŋ suŋ naa nya chua. Nduyɛ te la che ndu pɛ, la nɔla mi la dɔɔnuŋ vɛlɛ nyaale. Okoŋ I hiu lɛ buulaŋ a nya okɔɔ le. 29 La demul ndu mɛɛ nya demul buɛiyaa Masanɔɔ yɛ, nduyɛ mi la hiou lachi a wanaa waa lende biyɔɔ nyɛkɛndɛi.+ 30 Kanifuule, ndoo lo niŋ chobe mi ndoo vi o wali Kiliti wo tosaa niŋ. Le mɛɛ nya ve nanuŋ le ya mala le yɛ, mbo luei yoomu ndɔɔ o kpundɔɔ niŋ le ya malaa.+

3 Lelaŋ puaapiliaa niaa, la hiou lachi a nyaaloo dɔɔnɔŋndo le mɛɛ nya cho buɛiyaa Masanɔɔ yɛ.+ I saŋga a nya sɔɔŋ pilɔŋ muŋ poonyiallo le, kanifuule le nya mandaa ŋ cho ni.

2 La mandaŋ a wanaa cho maa tuŋnda wa. La mandaŋ a wanaa tosa sɔɔŋ wɔɔŋndoŋ nda. La mandaŋ a wanaa baŋ hivi chiɛi kɔɔlioo wa.*+ 3 Naŋ sɔla hivi chiɛi kɔɔli kpeekpeiyo ni,+ kanifuule ŋ cho wali Mɛlɛkaa tosaa a mala nyina ndɔ diandaa. Lelaŋ, o Chiisu Kiliti+ niŋ naŋ kialu yoŋgaa ni, kɛ ŋ kilu yoŋga o naapila* niŋ te. 4 Ya kpeekpei nɔ ni mi kelu yoŋgaa mbo hiou wana o wana.

Te wana o wana yiyaŋ pɛ maa o nɔ mbo kelu yoŋgaa a ndupila,* mɛɛ I hiou wana koŋ. 5 O paale ŋɔmaaleŋ choo ya sɔla hivi chiɛi kɔɔlioo ni.+ Isɔluɛinɔɔ ya cho ni. O pulale Bɛŋjamiŋ ndeŋ choo ya fula ni. Hibuluiya velu ya ni.+ Te o hiŋ pɛ a sawaa okɔɔ, Falisiinɔɔ ya cho ni.+ 6 Le dialuŋ fulaŋ yaa nɔ woŋ, mi yaa tusi kunda wanaa laalaŋnda nyɛpalaa choo.+ Mi yaa tosa nyɛ o nyɛ sawaa dimi. O pilɛ bɛɛ yaa tɛɛmbuu le. 7 Nyɛm wa muŋ tɔnɔɔ le ya woŋ, mi chua muŋ nyɛm fondoŋ fuu le Kiliti.+ 8 Le sinapɛŋgu sɔvɛ ya sɔla a Masanɔ nuu Chiisu Kiliti okɔɔ wo, I chua vɛlɛ nyɔɔŋ kpou mi siiŋguu muŋ nyɛ fondoo fuu. I mal niŋ nyɛ o nyɛ fee le ndu. Nyɔɔŋ muŋ kpou, I chua muŋ maa bil waa o sal choo, le halikpeŋ mi sɔla Kiliti, 9 nduyɛ mi wa o diompilɔɔ niŋ a ndu. O cho le mɛɛ ya wa Sawaa* biyɔɔ yɛ le ya simnuŋ wana sakpoo Mɛlɛka o hɔl te. Kɛ le mɛɛ ya dɔu laalaŋndo+ o Kiliti niŋ yɛ.+ Mɛlɛka tosa ni mi simnuŋ wana sakpoo ndu o hɔl le laalaŋ nuu.+ 10 I ya cho kiltaŋ kɔɔli ve cho le Chiisu sinaa ni, nduyɛ mi sina kpaaya tosa mbo miiŋgu yoomu wo.+ I yeema mi saŋga maa ndu,+ nduyɛ mi vi maa ndu,+ 11 le halikpeŋ mi ya bɛɛ sɔla fondaa le mi wa wanaa tasiaa cho miiŋgu yoomu wa tɛɛŋ.+

12 O cho nuaa maa I chii nyɛ ya cho kiltaŋ kɔɔli wo sɔla le. Nduyɛ I simnuŋ ndɔ mɛɛ ya nɔ le waa yɛ le. Kɛ I cho fafalaa kpeekpei+ le mi huŋ sɔla fanda koŋ, kanifuule Chiisu Kiliti hɛli ya le mi sɔla ndu.+ 13 Puaapiliaa, yiyaŋ cho ya bɛɛ maa I sɔla niŋ nyɛ ya cho kiltaŋ kɔɔli wo le. Kɛ hei ya cho tosaa ni: I faŋa kɔllo bau o nyɛm ya mɛi kɔɔli woŋ,+ okoŋ mi wa fafalaa le mi huŋ sɔla nyɛm cho ya lachi woŋ.+ 14 Mɛlɛka veelu ya le kɔlaŋ o choo choo niŋ+ sanaa o Chiisu Kiliti niŋ. I cho fafalaa kpeekpei le mi huŋ sɔla fanda koŋ.+ 15 Naŋ cho kaasoŋnda o Mɛlɛka piɛiyo niŋnda,+ ŋ nɔ miŋ nɔ yiyaŋ pilɔɔ hoo kpe. Kɛ num o num nɔ pɛ yiyaŋ cheleŋ, Mɛlɛka cho num mala ma nɔ yiyaŋ naŋ nɔ hoo wo. 16 O koŋ niŋ fau, nɛi naŋ lo kɔlaŋ choo haaa mbo fuuluu a boondei heiyo, ŋ hiounuŋ lachi a kɔlaŋ o nɛi koŋ choo.

17 Puaapiliaa, la tol tamasi nuu kɔɔli,+ nduyɛ mi la mɛɛndaŋ wanaa cho tamaselii naŋ kɛsul nya wo tolɔɔ kɔɔli wa. 18 Wanaa bɔɔbɔɔ simnuŋ yaamɔɔwa le Kiliti a piɔm o sɔla o yɔm imɔnɔɔ* choo wo. Mi yaa dimul nya a nda okɔɔ teleŋnda bɔɔbɔɔ. Kɛ suŋ suŋ niŋ, a mɛmiaŋ o lahɔl ya cho nya dimullo a nda okɔɔ ni. 19 Waŋnda haa cho hunɔɔ mɛɛlu tambei sɔla. Dembela ndalaŋ la cho mɛlɛka ndaa ni. A sɔɔŋ lasiɔmbuŋ nda tosa woŋ okɔɔ nda kialu yoŋgaa ni. Nduyɛ a sɔɔŋ chieeŋndoŋ okɔɔ kinɛi nda yiyaŋ ni.+ 20 Kɛ naa naa, choo choo+ pilachieeyɛi nɛi+ cho ni. Nduyɛ, ŋ cho chumndo a yeemɛi le mi wana piŋiaa hiŋ. Ndu cho yɛ Masanɔɔ Chiisu Kiliti ni.+ 21 O cho kpaaya ndɔ bɛndoo soliŋ kpeku le dialuŋ naŋ muŋ siŋgaa, mbo miŋgi muŋ maa dialuŋ ndɔŋ.+ Kpaayaa hoo koni o soliŋ kpeku ni le mi nyɛ o nyɛ wa ndu o ba bɛŋgu.+

4 Puaapiliaa niaa ya kaala, nduyɛ mi wa a yeemɛi le nya chɔɔ wa, nya cho nyaale nuu, a fanda nuu ni.+ Chaaŋaa niaa kaalaa, I cho nya nyɔɔloo le mi la lo isisi yi+ Masanɔɔ kɔɔli.

2 I cho Yuwodiaa nda Siŋtike nyɔɔloo le ma miiŋgu o diompilɔɔ niŋ le sabu Masanɔɔ.+ 3 Num wana naŋ cho wallo latulu wo bɛɛ, I cho num nyɔɔloo le ma mala waŋ laanduaa haa ma miiŋgu diompilɛ. Waŋ laanduaa haa ni, Kilɛmɛŋ ni, a chaaŋaa niaa walla, ŋ tosa niŋ wallo latulu kalaŋ le yooŋgu kɛndɔɔ dimioo. Diola waŋnda haa la cho o yau yoomoo niŋ.+

4 La dɔɔnuŋ nyaale lɔɔlɔɔ o Masanɔɔ niŋ. I chɔɔlu wɔ vɛlɛ dimi, la dɔɔnuŋ nyaale!+ 5 Maa waŋnda kpou chɔ maa la cho wanaa dimuluŋ isɔɔ.+ La kɛsiŋ o kɔl maa Masanɔɔ cho niŋ kpɛɛluŋ. 6 La buulaŋ le nyɛ o nyɛ le.+ Kɛ o nyɛ o nyɛ niŋ, la nyuna Mɛlɛka lɔɔlɔɔ o piɛileŋ niŋ, nduyɛ mi la chɔm ndu ba nya hawɛiyo. La wa ndu nyɔɔloo o piɛileŋ niŋ, mi la mel ndu balikaa.+ 7 Okoŋ, kɔl nyulu+ Mɛlɛka yɔŋgu wo, o wanachiee nɔla bɛɛ mbo sina pɛŋgu le wo nɔla mbo manda kɔlta nyalaŋ,+ a yiyaŋnda nyalaŋ sanaa o Chiisu Kiliti niŋ.

8 Lelaŋ puaapiliaa, nyɛ o nyɛ cho suɛi tonya, nyɛ o nyɛ cho suɛi sɔvɛ, nyɛ o nyɛ cho suɛi sakpo, nyɛ o nyɛ cho suɛi diandaa, nyɛ o nyɛ cho suɛi kaalaa, nyɛ o nyɛ cho suɛi chandaa, nyɛ o nyɛ cho suɛi kɛndɛ, a nyɛ o nyɛ cho suɛi wana lisa, la hiou lachi a yiyaŋndo o sɔɔŋ muŋ choo.+ 9 Sɔɔŋ nya pɛɛku ya o ba, mi la chɛl, mi la tuɛi, nduyɛ mi la cha ya muŋ tosaa woŋ, la tosa muŋ.+ Okoŋ, Mɛlɛka kɔl nyuloo cho wa a nya latulu.

10 I cho a nyaale tau o Masanɔɔ niŋ le mɛɛ nya muli vɛlɛ kɔltaŋ o ya lo yɛ.+ Mi che bɛɛ nyaa buulaŋ le ya, kɛ la sɔla fondaŋ nya chɔm ndu le. 11 I ya cho hei dimioo ve, o cho nuaa maa o bahawɛi niŋ te ya cho le. Kanifuule, I pɛɛku niŋ le kɔl hiniaa nɔɔ o nyɛ o nyɛ niŋ.+ 12 I sina nyɛ cho pɛŋndeŋ ndo.+ Nduyɛ te waŋndo nɔ vɛlɛ pɛ tau, keŋ bɛɛ I sina. O nyɛ o nyɛ niŋ, I pɛɛku niŋ suɛi wanaa bɔɔ sina le ve: I wa o pumaa, I wa a mayi, I nɔ tau ɔɔ mi wa o pɛŋndeŋ niŋ, I pɛɛku niŋ le kɔl hiniaa nɔɔ o nyɛ o nyɛ niŋ. 13 Mɛlɛka ke ya kpaayaa ni le mi nɔla nyɛ o nyɛ fee tosaa.+

14 Nduyɛ boondii ya wa o nyɛpalaa niŋnde, nya mala ya ni. 15 Nya waŋnda Filipai, la sina walaŋ maa teleŋ tase nya chɛl yooŋgu kɛndɔɔ, nduyɛ mi wa fulaa Masidooniaa wo, kunda kɛ kɛ mala ya le, mɛɛ nya.+ 16 Teleŋ ya wa Tɛsalonaika wo bɛɛ, mi la yɔŋ ya nyɔɔŋ le ya malaa. O ve bɛɛ lepilɛ le, kɛ lediiŋ kpulukuu. 17 O cho nuaa maa nyɛm nyaŋ te ya yeema le. Kɛ I yeema nya mi la sɔla tɔnɔɔ, nduyɛ mi la hiou lachi a walta kɛndɛlaŋ tosaa Mɛlɛka o hɔl. 18 Nyɛ o nyɛ cho lɛ ya lepɛŋ te. I sɔla nyɔɔŋ mbo hiau bɛɛ mɛɛ ya hau ba yɛ. Nyɛm nya yɔŋ a Ɛpafulodaitɔɔ+ woŋ kpou, I sɔla muŋ. Nyɛm nya yɔŋ muŋ ndoŋ cho ko maa sala chuŋ kɛndɛ,+ o Mɛlɛka chɛl, nduyɛ mbo hini kɔl a ndu wo. 19 Nya bɛɛ, Mɛlɛka nuu, o nɔ sultaŋ kpou wo cho nya nyɛm nya hauba woŋ ke+ sanaa o Chiisu Kiliti niŋ. 20 Maa biiloo wa le Mɛlɛka Finya naa le fɛɛŋ a fɛɛŋ fɔ! Amiina.*

21 La yil la wanaa laalaŋaa* cho o diompilɔɔ niŋ a Chiisu Kiliti wa kpou. Puaapiliaa naŋ cho latulu wa bɛɛ cho nya kpou yilɔɔ. 22 Wanaa laalaŋnda kpou yil nya, kɛ taama taama a cho o Siisa+ lo chiɛiniŋ nda.

23 Maa Masanɔ naa Chiisu Kiliti tosal nya kɛndɛi nduɛi bɛnduei le kaa nya cho chɔmndo wo fɔ!