Kpele Hɛnɛkiɔɔ Cho Niŋ Kpɛɛluŋ!

Sɔɔŋ wɔɔŋ cho yɔŋnɔŋndo o chieeŋndo choo woŋ chɔm maa Kpele Hɛnɛkiɔɔ cho niŋ kpɛɛluŋ. Baabuiyo dimi maa ŋ cha niŋ sɔɔŋ wɔɔŋ wɔɔŋndoŋ tuupa mi Kpele Hɛnɛkiɔɔ hiŋ. O teleŋnda laŋ niŋ naŋ cho niŋ ni. Tofawɔ sɔɔŋ pum, ŋ Baabuiyo dimi maa ŋ cho yɔŋnɔŋ ndoŋ:

Chɔula kpuŋgaŋndaŋ. “Masaa a masaa a sɔŋga niŋ, mi lɛŋndeŋ a lɛŋndeŋ ma sɔŋga.” (Maatiu 24:​7) Suɛi hei peeluŋ niŋ. Chɔŋ a wɔsi 1914, chɔula chieeŋ ndaŋ la tiɔɔŋ vɛlɛ a la pɔmbɔlaŋ tau la yɔŋnuŋ niŋ. Waŋnda o miiliɔŋndaŋ niŋ vi o chɔulaŋ ndaŋ niŋ ni.

Naala hɔbɛilaŋ. ‘Naala taŋ waŋnda laŋ la kuii niŋ o fondaŋnda faŋga faŋga.’ (Luku 21:​11) I yɔŋnuŋ niŋ pa? Ei, i cho yɔŋnɔŋndo. Naa pauwo, naa puluŋ buuluaa, naa kɔllo, soliŋii vesɛiye, naa ihueiyo, vɛlɛ a naala cheleŋndaŋ la dii niŋ hau waŋnda o miiliɔŋndaŋ niŋ.

Nyɛdiaa lepɛŋndo. O chieeŋndo choo kpede, waŋnda tau nɔ hau nyɛdiaa le dio le. Waŋnda o miiliɔŋndaŋ niŋ cho piɔmndaŋ sɔlaa a yiaaŋ iwɔsi o iwɔsi. Hoo cho vɛlɛ taamaseliiyo opilɛ o chɔm maa Kpele Hɛnɛkiɔɔ cho niŋ kpɛɛluŋndo. Baabuiyo dimi aa, ‘Yiaaŋ ma del niŋ ba o ba fee.’—Maki 13:​8.

Lɛŋnde nyiiyaa leŋ. “Lɛŋndeŋ le nyiiya niŋ o fondaŋnda faŋga faŋga.” (Maatiu 24:​7) Hei bɛɛ i yɔŋnuŋ niŋ o palɛi nɛi niŋ. Chɔŋ a wɔsi 1914, waŋnda hiouwɔɔ miiliɔŋndo opilɛ sɔla niŋ piɔmndo o lɛŋnde nyiiyaa leŋ niŋ.

Wanaa dɛnɛ wɔɔŋnda. Waŋnda cho wa wanaa “kaala ŋkaniaa” vɛlɛ a wanaa “yiyaŋ . . . le nda pila” koni wa. “Kɔl kɛndɛ chieeŋndo nda kaala niŋ ni. A kaala niŋ Mɛlɛka le.” Chuauwa “ve niŋ wanaa tuei wanaa velu nda wa diom te.” (Timoti Diiŋ Ndɔɔ 3:​1-5) Vɛ, a chɛl pa maa wanaa suu waa naa cho hau? A nɔ le bɛɛ le Mɛlɛka le, nduyɛ ma tusi dɛnɛ palaa wanaa cho haa kindiŋndo le pɛɛkoo a Mɛlɛka okɔɔ wa choo.

Sawa tɛɛmbaa. “Dɛnɛ wɔɔŋndo o wa niŋ bɔɔ.” (Maatiu 24:​12) Num bɛɛ nɔla ma chɛl maa sawa tɛɛmbaa cho hiouwɔɔ lachi a kuiyo mbo hiau wɔsila hiou laŋ. Waŋnda ba o ba fee cho a sioonde le sɔɔŋ wɔɔŋndoŋ mɛɛ delɔɔ choo, kafalaŋ, a yɔŋultaŋ la cho naa yɛ.

Nyɔɔŋ muŋ kpou chɔm ni maa Masale Mɛlɛkaleŋ le cho niŋ kpɛɛluŋ. Mi Baabuiyo dimi aa, “Te la che pɛ mi sɔɔŋ muŋ ŋ wa yɔŋnɔŋndo, la sina niko maa teleŋ Mɛlɛka cho kandɔɔ waa waŋnda choo masaa wo, cho niŋ kpɛɛluŋ.” (Luku 21:​31) Yɛɛnɛ cho yɛ Masale Mɛlɛkaleŋ? Masaleŋ o choo choo niŋ, le cho hunɔɔ a Kpele Hɛnɛkiɔɔ o lɛŋndeŋ choo wo. Masale Mɛlɛkaleŋ le cho hunɔɔ miiŋgu o foofo masɛi waŋchieeya.—Daaniɛɛ 2:​44.