BUŊGƐI 3

Vɛɛ Nda Looku yɛ Vɛlɛ Tonya Baabuiyo Saalɔŋ?

Laŋgbaa chuuŋgiaŋ naapilɛ le Baabuiyo pɛɛkoo o wɔsila 1870 — Sukuwaa Baabuiya, o wɔsila 1870 laŋ niŋ

Laŋgbanɔɔ cho Bandu Mɛŋgɛlaa tasoo nuaa — *Bandu Mɛŋgɛlaa* tasoo, o wɔsi 1879 niŋ

Bandu Mɛŋgɛlaa a “Tiondoo!” cho chuaa o ba — *Bandu Mɛŋgɛlaa* hau

Mi Baabuiyo dimi maa o piɔm Chiisoo kɔɔli, wanaa pɛɛkaa lachoowaa chaŋ niŋ Kilisiɔŋaa tasiaa tɛɛŋ, okoŋ ma sɛɛŋgiaa tonya Baabuiyo pɛɛku wo. (Walta Wanaa Chiisuaa 20:29, 30) Lende kpeekpei ndii yɔŋnuŋ teleŋndo opum ni. Mi waŋnda haa muuliaŋ pɛɛkula Chiisulaŋ a pɛɛkula lachoowala cho o piɛiyii lachoowɛi niŋnde. Le hei, mi Kilisiɔŋnde lachoowaleŋ le kilaŋ. (Timoti Diiŋ Ndɔɔ 4:3, 4). Vɛɛ naŋ looku yɛ sina maa ŋ nɔ hau sina lapɛŋgoo a nyɛ kpeekpei Baabuiyo pɛɛku wo?

Mi teleŋndo fuuluu le mi Chɛhowa soli tonyaa kpendekele. Mbo dimi maa ‘o palɛi mɛɛlɛi niŋ, kɔlkalu tonyaa cho kui tau.’ (Daaniɛɛ 12:4) O wɔsila 1870 niŋ, mi kunda pɔmbɔɔ pum kandu tonyaa nuuviaa. Ma sina maa pɛɛkula bɔɔbɔɔ o chɔchii laŋ niŋ la fula o Baabuiyo niŋ te. Lelaŋ, ma kandu tonya kpeekpei cho o Baabuiyo niŋndo yaasiaa le ma bii ndu bila. Nduyɛ mi Chɛhowa duau nda sala ma sɔla sina lapɛŋgoo.

Mi wanaa nɔ yeemɛi le tonyaa wa kandu Baabuiyo pɛɛkoo. Mi Sukuwaa Baabuiyaa masindiaa haa kila nɛi pɛɛkaa pum, o naa bɛɛ cho hau tolɔɔ kɔɔli wo. Challe ma yaasiaa Baabuiyo pɛllo a pɛllo. Te a komal pɛ buŋgɛi kendu biyɔɔ bila ve o Baabuiyo niŋ, a tofa le bolii Baabui cheleŋ le ndi tɛɛsiaa. Te nda kpou chɛl pɛ nyɛ bolle Baabuile leŋ le soo a suɛ keŋ okɔɔ wo maa nyɛ pilɔɔ kpe o cho ni, a poonyiaa leŋ. Le chɛlɔɔ nda chɛl mi Baabuiyo tɛɛsiaa ndupila wo, ma saaluŋ tonyaa a Mɛlɛka okɔɔ vɛlɛ a Masale ndɔleŋ. Ma sina vɛlɛ sabu ndɔɔ le lɛŋndeŋ, a waŋvilɛiya okɔɔ, vɛlɛ a tiindaŋ fula sɛiniŋndo. Mi yaasiaa nda tosa hoo wo mala nda a dou laalaŋ o pɛɛkula lachoowalaŋ niŋ te, kɛlɛŋgaa ma luei balaŋ o sɔɔŋ cheleŋ niŋ.—Chɔŋ 8:31, 32.

O wɔsi 1879 niŋ, mi Sukuwaa Baabuiya haa sina maa teleŋndo fuuluu le tonyaa hoo chɔɔmuu wo wakpa. Lelaŋ o wɔsi pilɛ koŋ niŋ kpe, ma kandu yauwo solioo. Yauwo hoo diola ndɔlaŋ aa, Bandu Mɛŋgɛlaa le Masale Chɛhowaleŋ Yondaa. Ndu naa bɛɛ ŋ cho wɔ hau tuŋ siliŋndo kpeku ni. O suŋ suŋ niŋ, ŋ cho waŋnda tonya Baabuiyo hoo pɛɛkoo o lɛŋnde 240 niŋ. Nduyɛ, o cho o sɔɔŋ maŋgalaŋ niŋ hiouwɔɔ 750. Kɔlkalu tonyaa hoo ndoo kui yɔ paadu naa le.

O piɔm Chiisoo kɔɔli, yɛɛ ndoo yɔŋnuŋ yɛ a tonya Baabuiyo?
Yɛɛ mala yɛ naa miŋ saaluŋ vɛlɛ tonya o Diom Mɛlɛkaa niŋ?