Mɛɛ Kɔl Nyuloo Wa Nya Tɛɛŋ Nya Yuŋgula Nyalaŋ Yɛ

Yuŋgu sɛnɛiyo kilaa nɔɔ cho ni. Tonya icho ni maa la nɔ mila ke wanaa velu nya wa bɛɛleŋ, nduyɛ mila kaala nda. Kɛ wana nya cho o nɔɔ niŋndo cho niŋ wana sɔviɔɔ o chieeŋndo choo le num ni. Hei wa lepum ikala le mi waŋnda apum o yuŋgula nyalaŋ niŋ chɛl. Kɛ silala Baabuiyo la mala nya le sinaa nyɛ nya nɔ mila tosa o hei niŋndo. Nduyɛ hei huŋ a kɔl nyuloo nya yuŋgula nyalaŋ tɛɛŋ, te la wa pɛ kindiŋndo le chaŋyɛi nyɛi taŋgullo o yuŋgu sɛnɛi nya kila wo niŋ.

1 VƐƐ NYA NƆ YƐ MILA BII WANAA VELU NYA WA?

NYƐ BAABUIYO DIMI WO: “Ke finya num bɛɛleŋ a kala num.” (Ɛfisiaŋnda 6:​2) Mɛɛ mɛɛ ŋ nɔ wɔsioŋ, a nɔ kuee ma ke wanaa velu numnda bɛɛleŋ. Sina pɛŋgu maa, wana nya cho o nɔɔ niŋndo, chua vialaa o cho ni. O nɔ kuee mbo yɔŋgu hɔlaa muliaa o wanaa velu ndu wa lo. “Kaalaa paŋala le.” Lelaŋ, tambu kɔl le chaŋyɛi cho wana nya cho o nɔɔ niŋndo tɛɛŋ nda yuŋgu ndɔɔ wo le.—1 Kɔliŋtiaŋ 13:​4; Kaleesiaŋnda 5:​26.

NYƐ Ŋ NƆ MA TOSA WO:

• Mal tɔɔyaŋndaŋ. Laŋ la cho ni, “Lɔɔlɔɔ wanaa numnda cho ya kɔllo tɛɛmboo” ɔɔ “Pɛpɛ bɛɛ kala num hɛnaŋ a nyɛ ya tosa wo le”

• Chɔ sɔɔŋ mɛɛ waŋndo o pilɔɔ che muŋ yɛ

2 CHUA KALAŊ NƆ NUMNDO

NYƐ BAABUIYO DIMI WO: “Le saboo hoo poo mɛi finya ndɔ a kala ndɔ mbo chalnuŋ nda laa ndɔ ni, ma simnuŋ dialle i pilɛ.” (Chɛnɛsee 2:​24) Te a chal o nɔɔ pɛ, lepum, mi wanaa velu numnda yiyaŋ maa a cho wɔ nda o ba bɛŋgu. Nduyɛ, a yeema ma yiŋnuŋ pɔŋgeŋ o sɔɔŋ nɔ nyaa niŋ.

O lo a nyapila le mila chɛlaŋ le nda kpeleŋndo kɛsullo. Nduyɛ, la chɔm nda kpeleŋ nya kɛsul nda wo o nɛi kaalaa niŋ. La dimul nda tonya cho nya o kɔllo wakpa. Kɛ o wa a yoŋga le. (Pɔlɔwaa 15:​1) Tuisiŋndo, kɛndɛi, a biuwɔŋndo mala nya ni, le mi chaŋyɛi nyɛi wa ikala poŋ nya wanaa velu nya wa tɛɛŋ. “Nduyɛ mi la biuwaŋ vellaa velle maa wanaa kaaliaŋ.”—Ɛfisiaŋnda 4:2.

NYƐ Ŋ NƆ MA TOSA WO:

• Te la che pɛ maa yuŋgula nyalaŋ la cho yiŋnɔŋndo pɔŋgeŋ o nɔ nyaa niŋ, mɛɛ suukaŋ a wana nya cho o nɔɔ niŋndo teleŋ nyɔɔ wa nya tɛɛŋ mɛmɛlɛsɛɛ wo

• La chɛlaŋ mɛɛ nya nɔ mila bii sɔɔŋ waa naa yɛ